1, 2. ¿Tiʼ in tzaj kyqʼamaʼn junjun xjal kyiʼj testigos de Jehová?

ATEʼ nim xjal o tzaj kyqʼamaʼn qa at tbʼanel kymod testigos de Jehová. Jun techel, toj jun tuʼj aj tzʼibʼil Anton Gill yolin kyiʼj testigos de Jehová tej kyten toj Alemania nazi. Tqʼama qa mas el ikʼun qe testigos de Jehová kyuʼn xjal lu, ex qa toj 1939 attoq 6,000 kybʼet kyoj tembʼil jatumel e ok obligarin tuʼn kyaqʼunan. Ex tqʼamatl qa maske ok bʼinchaʼn nim nya bʼaʼn kyiʼj, kukx jakutoq tzʼok qeʼ kykʼuʼj txqantl kyiʼj, kukx ten mujbʼabʼil kyxol, mintiʼ e jaw qʼojin tej tok qʼoʼn nim aqʼuntl kyiʼj ex kukx e ajbʼen te Kydios.

² Ma tzikʼ junjun abʼqʼi, ok kyqʼoʼn junjun xjal te Sudáfrica kywitz tiʼj kymod tmajen Jehová ik tzeʼn jlu. Tnejel, mintiʼ in tzaj kyqʼoʼn aj kawil te Sudáfrica ambʼil tuʼn tok kychmon kyibʼ testigos de Jehová junx kyukʼil txqantl erman te junxichaq kyyajil. Noqtzun tuʼnj, toj domingo 18 te diciembre te 2011, noj toj jun matij estadio atz Johannesburgo kyuʼn testigos de Jehová te junxichaq tnam te Sudáfrica ex junjuntl lugar nqaku tok. Ok kychmon kyibʼ tuʼn tok kybʼiʼn Tyol Dios. Tqʼama jun xjal in kwentin tiʼj estadio jlu: «Naʼmx tok nqʼoʼne nwitze kyiʼj nim xjal in kubʼ kyyekʼin tbʼanel kymod. Kykyaqilx tok tbʼanel  kyxbʼalun. Ex saq ma kyaj kyqʼoʼn estadio. Noqtzun tuʼnj, aju mas in chin jaw labʼine tiʼj, aju mintiʼ ikʼbʼil at kyxole maske junxichaq kyyajile».

3. ¿Tiquʼn mintiʼ juntl kʼloj xjal at ik tzeʼn ttnam Jehová?

³ Aqeju yol in tzaj kyqʼamaʼn xjal nya testigos de Jehová kyiʼj erman, in tzaj kyyekʼin qa mintiʼ juntl kʼloj xjal twitz tkyaqil Txʼotxʼ at ik tzeʼn ttnam Jehová (1 Ped. 5:9). ¿Tiquʼn junxitl qoʼ ik tzeʼn junjuntl kʼloj xjal? Tuʼnju noq tuʼn tonbʼil Tyol Dios ex xewbʼaj xjan in nok tilil quʼn tuʼn tkyaj qtzaqpiʼn «aju ojtxi» qten ex in nok qqʼoʼn aju «akʼaj» qten (Col. 3:9, 10).

4. ¿Tiʼ qo xnaqʼtzal tiʼj toj xnaqʼtzbʼil lu ex tiquʼn?

⁴ Noqtzun tuʼnj, il tiʼj tuʼn tkyaj qtzaqpiʼn aju ojtxe qten te jumajx. Toj xnaqʼtzbʼil lu kʼelel qnikʼ tiʼj alkye tten jaku kyaj qtzaqpiʼn aju ojtxe qten ex tiquʼn nim toklen tuʼn tbʼant jlu quʼn. Ax ikx, kʼelel qnikʼ tiʼj qa jaku bʼaj kychʼixpuʼn xjal kymod maske otoq bʼant nim nya bʼaʼn kyuʼn. Ax ikx qo xnaqʼtzal tiʼj tiʼ jaku bʼant kyuʼn qeju ya ma bʼant nim ambʼil ateʼ toj ttnam Jehová tuʼn miʼn kymeltzʼaj tiʼj ojtxe kyten. ¿Tiquʼn nim toklen tuʼn qxnaqʼtzan tiʼj jlu? Bʼisbʼajil tuʼnju ateʼ junjun o che ten toj ttnam Jehová mintiʼ ok kyxqʼuqin kyibʼ ex tzyet kyanqʼin juntl maj ik tzeʼn tej naʼmx kyok te tmajen Jehová. Tuʼntzunju, qkyaqilx il tiʼj tuʼn ttzaj qnaʼn nabʼil lu: «Qa at jun waʼlxix taʼ tuj tnabʼl, kwentim tibʼ tuʼn miʼn tkubʼ tzʼaq» (1 Cor. 10:12).

5. a) Qʼamantza tukʼil jun techel tiquʼn il tiʼj tuʼn tkyaj qtzaqpiʼn naj aju ojtxe qten. (Qʼonka twitza tiʼj tnejel tilbʼilal). b) ¿Alkye junjun tiʼ at toklen tukʼilju ojtxe qten in yolin Colosenses 3:5-9 tiʼj?

⁵ ¿Tiʼ jaku bʼant quʼn qa tzʼil tiʼj qxbʼalun ex qa tzuʼj tiʼj? ¿Mlaypetzulo tzʼok tilil quʼn tuʼn tel qchʼexpuʼn naj? Chʼixmi axju jaku bʼant quʼn, nim toklen tuʼn t-xi qnimen naj aju kawbʼil in tzaj tqʼoʼn Jehová tuʼn tel qikʼun aju in nel tikʼun. Xi tqʼoʼn Pablo nabʼil lu kye okslal e ten toj ambʼil tej tanqʼin: «Atzun jaʼlo kyqʼonkje tkyaqil jlu». Qo yolin tiʼj kabʼe il tqʼama Pablo: aju yaẍbʼil ex aju ttzʼilil (kjawil uʼjit Colosenses 3:5-9).

6, 7. a) Ik tzeʼn kyaj tqʼamaʼn Pablo, ¿tiʼ kbʼantel quʼn tuʼntzun tkyaj qtzaqpiʼn aju ojtxe qten? b) ¿Tzeʼn tanqʼibʼil Sakura attoq tnejel, ex tiʼ onin tiʼj tuʼn tbʼaj tchʼexpuʼn tanqʼibʼil?

⁶ Aju yaẍbʼil. Aj tyolin Tyol Dios tiʼj yaẍbʼil, ax ikx in yolin kyiʼj kabʼe xjal in che kubʼ kuẍe junx ex nya bʼantni tiʼj kymejebʼleʼn twitz jun aj kawil, ex aj in che kubʼ ten xinaq tukʼil juntl xinaq. Tqʼama Pablo kye okslal tuʼn tkyaj kytzaqpiʼn tkyaqilju tajbʼil kychibʼjal ik tzeʼn yaẍbʼil. A t-xilen jlu qa il tiʼj tuʼn tok tilil quʼn tuʼn tkyaj qtzaqpiʼn tkyaqil achbʼil nya bʼaʼn. Kwest jaku bʼant jlu, noqtzun tuʼnj, jaku qo kambʼan tiʼj.

⁷ Qo xnaqʼtzan tiʼjju bʼaj tiʼj jun txin te tnam Japón, aju Sakura tbʼi. * Akux in chʼiy, kubʼ tnaʼn qa tjunalx at ex qa mintiʼ ttxolil tanqʼibʼil qʼiʼn. Tuʼn tjyon tiʼj tzalajbʼil, kubʼ kuẍe kyukʼil junxichaq xjal tej tjapun twi 15 abʼqʼi. Aju tzaj tuʼn jlu, el tiʼn oxe tal. In tzaj tqʼamaʼn jlu: «Tnejel, tej in chin kubʼ kuẍeye kyukʼil xjal, kubʼ nnaʼne bʼaʼn, qa at wajbʼene ex qa kʼujlaʼn qine. Tejtzun tbʼet ambʼil, chebʼe chebʼe kubʼ nnaʼne nya bʼaʼn». Kukx anqʼin Sakura ik tzeʼn jlu tejxi tjapun twiʼ 23 abʼqʼi. Pontzun ambʼil tuʼn ttzyet t-xnaqʼtzan tiʼj Tyol Dios kyukʼil testigos de Jehová. Tbʼanel ela toj twitz aju in neltoq tnikʼ tiʼj. Tuʼn tonbʼil Jehová, ok tilil tuʼn tuʼn miʼn t-ximen tiʼj qa a at tpaj ex tuʼn miʼn kukx ttzaj chʼixwi, ex kyaj tkolin aju nya bʼaʼn in bʼanttoq tuʼn. Atzun jaʼlo, in najbʼen te precursora regular ex ya mintiʼ in kubʼ tnaʼn qa tjunalx at. In tzaj tqʼamaʼntl  jlu: «Nim in chin tzalaje tuʼnju in kubʼ nnaʼne tkʼujlabʼil Jehová tkyaqil qʼij».

8. ¿Alkyeqe tiʼchaq jaku qo ok kyqʼoʼn te tzʼil toj twitz Jehová?

⁸ Aju ttzʼilil. Tej tkubʼ tzʼibʼin tnejel maj aju yol «ttzʼilil» toj Tyol Dios, at nim t-xilen jlu ex nya oʼkx in yolin tiʼj yaẍbʼil. Jun techel, ax ikx jaku yolin kyiʼj junjun tiʼchaq in bʼant kyuʼn xjal ex nya bʼaʼn, ik tzeʼn tuʼn kysichʼen ex qa tuʼn kyyaqin kyukʼil nya bʼaʼn yol (2 Cor. 7:1; Efes. 5:3, 4). Ax ikx jaku yolin kyiʼj nya bʼaʼn in bʼant kyuʼn xjal toj ewaj, ik tzeʼn tuʼn kyuʼjin kyiʼj uʼj in yolin tiʼj yaẍbʼil moqa aj tok kyqʼoʼn kywitz kyiʼj xjal mintiʼ kyxbʼalun tok. Kyuʼn jlu jaku che naqʼet xjal tuʼn kysaqchan tiʼj kytzʼalbʼil (Col. 3:5). *

9. ¿Tiʼ jaku bʼaj qa ma chʼiy qajbʼil tuʼn qkubʼ kuẍe tukʼil juntl xjal?

⁹ Aqeju xjal naqʼli tuʼn tok kyqʼoʼn kywitz kyiʼj xjal mintiʼ kyxbʼalun tok, oʼkx in chʼiy kyajbʼil tuʼn kykubʼ kuẍe tukʼil juntl. Ateʼ junjun xjal in che jyon kyiʼj tqanil o tzʼel kynikʼ tiʼj qa aqeju xjal in nok kyqʼoʼn kywitz kyiʼj xjal mintiʼ kyxbʼalun tok, axju achbʼil in kynaʼn ik tzeʼn in tnaʼn jun xjal o naqʼet tiʼj kʼaj qʼeʼn, moqa droga. Tuʼn jlu in nel qnikʼ tiʼj qa in tzaj tiʼn nim nya bʼaʼn tiʼj jun xjal naqʼli tuʼn tok tqʼoʼn twitz kyiʼj xjal mintiʼ kyxbʼalun tok. Junjun nya bʼaʼn in che tzaj tuʼn jlu aju in tzaj nim kychʼixwi, mintiʼ in bʼant tbʼanel kyaqʼun, mintiʼ tzalajbʼil toj kyja, in kubʼ naj kymejebʼleʼn, axpe ikx jaku kubʼ kybʼyon kyibʼ. Kubʼ ttzʼibʼin jun xjal jlu tej tel jun abʼqʼi ya mintiʼ ok tqʼoʼn twitz kyiʼj xjal mintiʼ kyxbʼalun tok: «Tzmatzun in nok nqʼoʼne woklene».

10. ¿Alkye tten kubʼ tiʼj achbʼil tuʼn Ribeiro, aju tuʼn tok tqʼoʼn twitz kyiʼj xjal mintiʼ kyxbʼalun tok?

¹⁰ Nim xjal in nok tilil kyuʼn tuʼn ya miʼn tok kyqʼoʼn kywitz tiʼj kyilbʼilal xjal mintiʼ kyxbʼalun tok. Noqtzun tuʼnj, jaku che kambʼan tiʼj ik tzeʼn in tzaj tyekʼin aju ikʼ tiʼj jun xjal te Brasil, aju Ribeiro tbʼi. Tej tzma kʼwaʼlx, ikʼ bʼet tja ex tzyet taqʼunan toj jun ja jatumel in che bʼaj chmet uʼj. Atztzu, jakutoq tzʼok tqʼoʼn twitz tiʼj kyilbʼilal xjal mintiʼ kyxbʼalun tok. In tzaj tqʼamaʼn jlu: «Chebʼe chebʼe chʼiy wajbʼile tuʼn tok nqʼoʼne nwitze kyiʼj xjal mintiʼ kyxbʼalun tok, wajtoqe tuʼn tex xuʼj in chin anqʼine tukʼil toj ja tuʼntzun tok nqʼoʼne nwitze kyiʼj video jatumel in che etz yekʼin xjal mintiʼ kyxbʼalun tok». Jun qʼij, akux attoq Ribeiro toj taqʼun, ok tqʼoʼn twitz tiʼj jun uʼj kyxol txqantl aju tok tbʼi, El secreto de la felicidad familiar. Jaw tiʼn ex ok ten uʼjil tiʼj. Aju jaw tuʼjin onin tiʼj tuʼn t-xnaqʼtzan tiʼj Tyol Dios kyukʼil testigos de Jehová. Noqtzun tuʼnj, xi tiʼn nim ambʼil tuʼn tkyaj ttzaqpiʼn aju nya bʼaʼn in bʼanttoq tuʼn. ¿Tiʼ onin tiʼj? In tzaj tchikʼbʼaʼn jlu: «Chʼiy nkʼujlabʼile kyiʼj tbʼanel tmod Jehová tej nnaʼne Dios, tej wuʼjine tiʼj Tyol ex tej wok tene ximel tiʼjju in neltoq nnikʼe tiʼj. Tuʼn jlu chʼiy mas nkʼujlabʼile tiʼj Jehová twitzju tuʼn tok nqʼoʼne nwitze kyiʼj xjal mintiʼ kyxbʼalun tok». Tuʼn tonbʼil Tyol Dios ex xewbʼaj xjan, kyaj tkolin Ribeiro aju ojtxe tten. Jaw aʼ twiʼ ex in najbʼen te ansyan kyxol jun kʼloj okslal toj ambʼil jaʼlo.

11. ¿Tiʼ kbʼantel quʼn qkyaqilx tuʼntzun miʼn tok qqʼoʼn qwitz kyiʼj xjal mintiʼ kyxbʼalun tok?

¹¹ Nya oʼkx xnaqʼtzan Ribeiro tiʼj Tyol Dios. Ax ikx ok tqʼonxix twiʼ tiʼjju jaw tuʼjin ex xi tqʼoʼn ambʼil tuʼn tkuʼpin toj tanmi. Ex xi tqanin onbʼil te Jehová. Iktzun tten onin naʼj Dios ex tej t-ximen tiʼjju el tnikʼ tiʼj tuʼn tchʼiy tkʼujlabʼil tiʼj Jehová, ex tuʼn tkyaj  tkolin aju achbʼil tuʼn tok tqʼoʼn twitz kyiʼj xjal mintiʼ kyxbʼalun tok. Qkyaqilx il tiʼj tuʼn tok qkʼujlaʼn Jehová tuʼn tkyaqil qanmi ex tuʼn tel qikʼun aju tuʼn tok qqʼoʼn qwitz kyiʼj xjal mintiʼ kyxbʼalun tok (kjawil uʼjit Salmo 97:10).

12. ¿Tiʼ onin tiʼj Stephen tuʼn tel tikʼun qʼoj ex yasbʼil?

¹² Ateʼ junjun xjal jun rat in tzaj kyqʼoj ex in tzaj kyqʼamaʼn nya bʼaʼn yol ex jaku kux chyoʼn toj qanmi tuʼn. Ex tuʼn mod in kubʼ kynaʼn ja xjal nya bʼaʼn. Qo xnaqʼtzan tiʼjju ikʼ tiʼj jun mambʼaj te tnam Australia, aju Stephen tbʼi. In tzaj tqʼamaʼn jlu: «In xitoq nqʼamaʼne nya bʼaʼn yol ex in tzajtoq nqʼoje tiʼj alkyexku tiʼ. Oxe maj el qpan qibʼe tukʼil nxuʼjile ex chʼixme kubʼ qnajsaʼne qmejebʼleʼne». Tzyettzun t-xnaqʼtzan tiʼj Tyol Dios kyukʼil testigos de Jehová. ¿Tiʼ tzaj tej tkubʼ tqʼoʼn Stephen toj xnaqʼtzbʼil qeju nabʼil in tzaj tqʼoʼn Tyol Dios? In tzaj tqʼamaʼn qa mas tbʼanel e ten qe toj tja. Tnejel, ik tten ik tzeʼn jun bomba chʼixtoq tel poqʼch, moqa poqʼle, atzun jaʼlo in kubʼ tnaʼn tzalajbʼil ex mintiʼ in kubʼ tnaʼn qʼoj. Toj ambʼil jaʼlo in najbʼen Stephen te onil kyiʼj ansyan, atzun t-xuʼjil ya ma tzikʼ nim abʼqʼi in najbʼen te precursora regular. In tzaj kyqʼamaʼn ansyan ateʼ kyxol kʼloj okslal jatumel at Stephen: «Mans Stephen, mintiʼ in jaw tnimsan tibʼ ex aqʼunal xjal». Ax ikx in tzaj kyqʼamaʼn qa naʼmx tok kyqʼoʼn kywitz tiʼj qa in qʼojin. In nel tnikʼ Stephen tiʼj qa nya tuʼnx o che bʼant chʼixpubʼil lu. In tzaj tqʼamaʼntl: «In chin tzalaje tiʼj tkyaqil kʼiwlabʼil lu tuʼnju o tzaj nkʼamoʼne tonbʼil Jehová tuʼn tbʼaj nchʼexpuʼne nmode».

13. a) ¿Tiquʼn nya bʼaʼn aju qʼoj? b) ¿Tiʼ in tzaj tqʼamaʼn Tyol Dios tuʼn tbʼant quʼn?

¹³ In tzaj tqʼamaʼn Tyol Dios tuʼn tel qikʼun qʼoj, yasbʼil ex aju tuʼn qjaw ilin tukʼil qʼoj (Efes. 4:31). Tuʼnju at maj in che ok ten xjal bʼiyel kyiʼj txqantl tuʼn jlu. Jakulo kubʼ kyximen nim xjal qa bʼaʼn jlu, noqtzun tuʼnj, nya bʼaʼn in nela toj twitz Jehová. Tuʼntzunju, nim okslal o tzʼok tilil kyuʼn tuʼn ya miʼn kybʼant jlu kyuʼn ex tuʼn tok kyqʼoʼn aju akʼaj kyten (kjawil uʼjit Salmo 37:8-11).

14. ¿Jakupe tzʼok jun xjal bʼaʼn qʼojin te mans?

¹⁴ Atzun jaʼlo qo xnaqʼtzal tiʼjju ikʼ tiʼj Hans, jun ansyan kyxol kʼloj okslal te Austria. In tzaj tqʼamaʼn ansyan qʼol kyaqʼun kʼloj ansyan jlu tiʼj: «Atzun jun erman mas mans jaku tzʼok tojtzqiʼna». Noqtzun tuʼnj, nya iktoq tmod Hans ik tzeʼn jlu tnejel. Tzyet tkʼaʼn Hans qʼeʼn tej tzmatoq kuʼxun ex ok te nya bʼaʼn. Jun maj tej otoq bʼaj nim qʼeʼn tuʼn, kubʼ tbʼyoʼn txin in yolin tukʼil tuʼnju tzaj nim tqʼoj. Kubʼ qʼoʼn 20 abʼqʼi tkastiw tuʼn tten toj cárcel. Noqtzun tuʼnj, mintiʼ chʼexpaj tanqʼibʼil tej tten toj cárcel. Tej tel ambʼil, xi tqanin ttxuʼ te jun ansyan tuʼn t-xiʼ visitaril Hans toj cárcel ex tzyet t-xnaqʼtzan tiʼj Tyol Dios. In tzaj tqʼamaʼn Hans jlu: «Kwest ela toj nwitze tuʼn tkyaj nkoline aju ojtxe ntene. At kabʼe taqikʼ Tyol Dios onin wiʼje. Jun, atzun Isaías 55:7 jatumel in tzaj tqʼamaʼn: ‹Aju xjal bʼinchal il, bʼaʼn tuʼn tkyaj tkolin ju tbʼe mya bʼaʼn›. Atzun juntl, aju 1 Corintios 6:11, in tzaj tqʼamaʼn qa ateʼ junjun okslal otoq kubʼ kybʼinchaʼn nim il ex kyaj kytzaqpiʼn tej kyok te okslal. Kyoj nim abʼqʼi o tzʼonin Jehová wiʼje tukʼil pasens tuʼn xewbʼaj xjan tuʼntzun tok nqʼoʼne aju akʼaj ntene». Jaw aʼ twiʼ Hans akux attoq toj cárcel. Etz toj cárcel tej otoq tzikʼ 17 abʼqʼi tukʼil mij, moqa nikʼjan, tsentens. Ax ikx in tzaj tqʼamaʼn jlu: «Nim in xi nqʼoʼne chjonte te Jehová tuʼnju at nim qʼaqʼbʼil tkʼuʼj ex kubʼ tnajsaʼn wile».

15. ¿Tiʼ in bʼant kyuʼn nim xjal, noqtzun tuʼnj, tiʼ in tzaj tqʼamaʼn Tyol Dios?

¹⁵ Juntl tiʼ at toklen tukʼilju ojtxe qten aju nya ax tok yol. Jun techel, nim xjal in xi  kyqʼamaʼn nya ax tok yol noq tuʼn miʼn txi kychjoʼn chojbʼil tiʼj jun kʼaẍjel ex qa noq tuʼn miʼn ttzaj nya bʼaʼn kyiʼj aj kyel txalpaj. Atzunte Jehová, atzunju «Dios axix tok» (Sal. 31:5). Tuʼntzunju, in tzaj tqʼamaʼn kye okslal tuʼn t-xi kyqʼamaʼn aju axix tok toj tkyaqil ambʼil, ex tuʼn miʼn qyolin tiʼj nya ax tok yol qxolx (Efes. 4:25; Col. 3:9). Tkyaqil maj kxel qqʼamaʼn aju axix tok maske jaku tzaj qchʼixwi tuʼn, moqa nya aju mas tbʼanel te qe (Prov. 6:16-19).

16. ¿Tiʼ jaku tzʼonin qiʼj tuʼn tkyaj qtzaqpiʼn aju ojtxe qten?

¹⁶ Mlay bʼant tuʼn tkyaj qtzaqpiʼn aju ojtxe qten tuʼn qex qipumal. Ok tilil tuʼn Sakura, Ribeiro, Stephen ex Hans tuʼn tkyaj kytzaqpiʼn aju ojtxe tten kyanqʼibʼil. ¿Alkye tten e kambʼan tiʼj? Noq tuʼn tonbʼil Tyol Dios ex xewbʼaj xjan bʼant chʼixpubʼil kyuʼn (Luc. 11:13; Heb. 4:12). Ax ikx qe, jaku tzʼonin jlu qiʼj qa ma qo uʼjin tiʼj Tyol Dios tkyaqil qʼij, qa ma qo ximen tiʼj ex qa ma txi qqanin onbʼil te Jehová tuʼn ttzaj tqʼoʼn qnabʼil ex qipumal tuʼn t-xi qnimen aju in tzaj tqʼamaʼn Tyol (Jos. 1:8; Sal. 119:97; 1 Tes. 5:17). Ax ikx jaku tzaj tqʼoʼn xewbʼaj xjan ex Xjan Uʼj qipumal qa ma bʼaj qbʼinchaʼn qten kyiʼj chmabʼil ex qa ma qoʼx kyoj (Heb. 10:24, 25). Nya oʼkxju, ax ikx bʼaʼn tuʼn kyajbʼen qe onbʼil in tzaj tqʼoʼn ttnam Jehová qe ik tzeʼn qe uʼj, aju canal JW Broadcasting, aju aplicación JW Library ex aju qtembʼil at toj Internet jw.org (Luc. 12:42).

17. ¿Tiʼ qo xnaqʼtzal tiʼj toj juntl xnaqʼtzbʼil?

¹⁷ Ma qo xnaqʼtzan tiʼj junjun tiʼchaq il tiʼj tuʼn tkyaj qtzaqpiʼn te jumajx. Noqtzun tuʼnj, ¿oʼkxpe jlu il tiʼj tuʼn tbʼant quʼn tuʼntzun ttzalaj Jehová qiʼj? Miʼn. Ax ikx il tiʼj tuʼn tok qqʼoʼn aju akʼaj qten ex tuʼn tok qqʼoʼn te jumajx qiʼj. Toj juntl xnaqʼtzbʼil kʼelel qnikʼ tiʼj tzeʼn jaku bʼant quʼn.