1, 2. a) ¿Tiquʼn jaku txi qxjelin «nikʼpuntzun ktel jlu» te Jehová? b) ¿Tiquʼn in tzaj tqʼuqbʼaʼn qkʼuʼj aju techel kyaj kyqʼoʼn tmajen Jehová kukx e ajbʼen te toj ambʼil ojtxe?

«¿NIKʼPUNTZUN ktel jlu, Nman?». «Nman, ¿jteʼ maj chin qanile onbʼil teya?». Atzun jlu xi tqanin Isaías ex Habacuc te Jehová, kabʼe tmajen e ten toj ambʼil ojtxe (Is. 6:11; Hab. 1:2). Toj Salmo 13 ax ikx xi tqanin aj kawil David xjel lu kyaje maj (Sal. 13:1, 2). Ex xi tqanin Jesús chʼixme ax xjel lu tej tok tqʼoʼn twitz tiʼj qa mintiʼ qʼuqbʼil kykʼuʼj xjal (Mat. 17:17). Tuʼntzunju, mintiʼ tuʼn qjaw labʼin tiʼj jlu qa ma txi qqanin ax xjel te Jehová.

² ¿Tiquʼn jaku txi qqanin «nikʼpuntzun ktel jlu» te Jehová? Bʼalo tuʼnju o tzʼok bʼinchaʼn jun nya bʼaʼn qiʼj. Ex qa tuʼnju ya ma qo tijen moqa tuʼn jun yabʼil. Ax ikx jaku tzaj bʼaj qkʼuʼj tuʼnju in qo anqʼin kyoj «mankbʼil tqʼijlalil» (2 Tim. 3:1). Ex qa tuʼnju in tzaj bʼaj qkʼuʼj aj tok qqʼoʼn qwitz tiʼj nya bʼaʼn kymod xjal jatumel in qo anqʼin. Noq tiʼxku in bʼaj, in tzaj qʼuqbʼaʼn qkʼuʼj kyuʼn tmajen Dios xi kyqʼamaʼn aju kubʼ kynaʼn te Jehová, ex mintiʼ e tzaj kawin tuʼn jlu.

3. ¿Tiʼ jaku tzʼonin qiʼj aj qikʼ toj jun ambʼil nya bʼaʼn?

 ³ ¿Tiʼ jaku tzʼonin qiʼj aj qikʼ kyoj ambʼil nya bʼaʼn ik tzeʼn qe jlu? Bʼant tuʼn Jehová tuʼn tkubʼ ttzʼibʼin Santiago, aju titzʼin Jesús, aju nabʼil lu: «Kyjaʼtzun erman ten kypasense, che ayone okxi tul Qajaw» (Sant. 5:7). Tuʼntzunju qkyaqilx il tiʼj tuʼn tten qpasens. Noqtzun tuʼnj, ¿tiʼ t-xilen aju tuʼn tten qpasens ex alkye tten jaku kubʼ qyekʼin jlu?

4, 5. a) ¿Tiʼ aju tuʼn tten qpasens ex alkye tten in kubʼ qyekʼin? b) ¿Tiʼ tzaj tchikʼbʼaʼn Santiago tiʼjju tuʼn tten qpasens? (Qʼonka twitza tiʼj tnejel tilbʼilal).

⁴ In tzaj tqʼamaʼn Tyol Dios qa in ten qpasens, aj ttzaj tqʼoʼn Jehová xewbʼaj xjan qe. Kwest tuʼn tten qpasens tuʼnju nya tzʼaqli qoʼ, tuʼntzunju oʼkx jaku kubʼ qyekʼin qa ma tzʼonin Jehová qiʼj. Jun oyaj jlu tuʼn. Qa ma ten qpasens in kubʼ qyekʼin qa kʼujlaʼn Jehová quʼn ex qe xjal. In chewix kʼujlabʼil at qxolx qa mintiʼ qpasens (1 Cor. 13:4; Gál. 5:22). At toklen pasens kyukʼil txqantl mod nim kyoklen in kubʼ tyekʼin jun okslal. Jun techel, aju tuʼn tten qpasens ax ikx a t-xilen tuʼn tikʼx quʼn ex tuʼn qex twitz alkyexku nya bʼaʼn in qo ok weʼ twitz, ex tuʼn tten tbʼanel qximbʼetz (Col. 1:11; Sant. 1:3, 4, TNM). Ax ikx in yolin tiʼj tuʼn tikʼx kʼixkʼoj quʼn ex tuʼn miʼn taj qqʼoʼn t-xel jun nya bʼaʼn, ex tuʼn kukx tok tilil quʼn noq tiʼxku ma bʼaj. Nya oʼkxju, ax ikx in tzaj tqʼamaʼn Tyol Dios qa il tiʼj tuʼn tkubʼ qximen tuʼn qyon. Atzun jun tbʼanel xnaqʼtzbʼil in nel qnikʼ tiʼj toj Santiago 5:7, 8 (kjawil uʼjit).

⁵ ¿Tiquʼn bʼaʼn tuʼn tkubʼ qximen qa il tiʼj tuʼn qyon tiʼj Jehová tuʼn t-xi tbʼinchaʼn kyiʼj nya bʼaʼn? Tqʼama Santiago qa ik qten ik tzeʼn in bʼaj tiʼj jun xjal in aqʼunan toj txʼotxʼ. ¿Tiquʼn? Tuʼnju in nok tilil tuʼn tuʼn tkux tawaʼn ijaj toj txʼotxʼ, noqtzun tuʼnj, mlay tzʼel tnikʼ tiʼj qa tzul jbʼal moqa miʼn, nix jaku tzʼonin tuʼn tbʼet naj ambʼil tuʼn tul tqʼij awal. In nel tnikʼ tiʼj qa il tiʼj tuʼn tten tpasens tuʼn tyon, ajxi ttzaj tqʼoʼn awal «twitz [...] tbʼanilxix». Ik tzeʼn qe, in qo yon tuʼn tjapun kywi ttziybʼil Jehová, noqtzun tuʼnj, at nim tiʼchaq mlay bʼant quʼn (Mar. 13:32, 33; Hech. 1:7). Ik tzeʼn aju xjal in nawan tiʼj ijaj, il tiʼj tuʼn qyon tukʼil pasens.

6. ¿Tiʼ xnaqʼtzbʼil in nel qkanoʼn tiʼj aj sanjel Miqueas?

⁶ Chʼixme axju in bʼaj toj ambʼil jaʼlo ik tzeʼn toj ambʼil tej tanqʼin aj sanjel Miqueas. Anqʼin Miqueas toj ambʼil tej tkawin nya bʼaʼn aj kawil Acaz. Toj ambʼil aju, in che sbʼun xjal ex otoq ten nim kyojtzqibʼil «tuʼn tbʼant mya bʼaʼn kyuʼn» (kjawil uʼjit Miqueas 7:1-3). Tuʼnju el tnikʼ Miqueas tiʼj qa mlay chʼexpaj junjun tiʼ tuʼn, tqʼama jlu: «Atzun weye, chin ayole tiʼj Qman; kʼokel qeʼ nkʼuʼje tiʼj Dios aju Klol weye, porque chin tzajel bʼiʼne tuʼn» (Miq. 7:7). Yon Miqueas tukʼil pasens, ax ikx qe il tiʼj tuʼn qyon tukʼil pasens.

7. ¿Tiquʼn qo yol tukʼil tkyaqil qkʼuʼj tuʼn tjapun kywi ttziybʼil Jehová?

⁷ Qa ik qʼuqbʼil qkʼuʼj ik tzeʼn te Miqueas, qo yol tuʼn t-xi tbʼinchaʼn Jehová tiʼj tkyaqil nya bʼaʼn. Tuʼn tel qnikʼ tiʼj, qo ximen tiʼj jun xjal tokx toj cárcel ex in yon tuʼn tpon qʼij tuʼn tkubʼ bʼyoʼn. Maske nya taj tuʼn tpon qʼij lu, noqtzun tuʼnj il tiʼj tuʼn tyon. Junxitl qe in bʼaj qiʼj. Tuʼnju ojtzqiʼn quʼn qa kjapunel twi ttziybʼil Jehová tuʼn ttzaj tqʼoʼn qchwinqlal te jumajx ex qa kbʼantel tuʼn tojxix ambʼil bʼantni tiʼj, tuʼn tkyaqil qkʼuʼj in qo yon tiʼj jlu. In xi qbʼiʼn nabʼil lu: «Tuʼntzun  tikʼx kyuʼne tuj tkyaqil ex tuʼn tten kypasense ex tuʼn kytzalaje» (Col. 1:11, 12). Tzul tbʼis Jehová qa mintiʼ in qo yon tuʼn tkyaqil qkʼuʼj ex qa in qo ok ten yolil tiʼj tiquʼn kukx in tzaj tqʼoʼn mas ambʼil (Col. 3:12).

8. Akux in qo xnaqʼtzan kyiʼj techel kyaj kyqʼoʼn junjun xjal kukx e ajbʼen te Jehová toj ambʼil ojtxe, ¿tiʼ bʼaʼn tuʼn qximen tiʼj?

⁸ ¿Tiʼ kʼonil qiʼj tuʼn kukx qyon? Aju qa ma qo ximen tiʼj techel kyaj kyqʼoʼn junjun xjal e ten toj ambʼil ojtxe, aʼyeju e yon tukʼil pasens tuʼn tjapun kywi ttziybʼil Jehová (Rom. 15:4). Akux in qo xnaqʼtzan kyiʼj techel lu, qo ximen tiʼj jniʼ ambʼil e yon, tiquʼn ten kypasens tuʼn kyyon ex tiʼ kʼiwlabʼil tzaj kykʼamoʼn tuʼnju ten kypasens.

9, 10. ¿Jniʼ ambʼil yon Abrahán ex Sara tuʼntzun tjapun twiʼ junjun ttziybʼil Jehová?

⁹ Qo xnaqʼtzan tnejel tiʼj Abrahán ex Sara. Tuʼnju kubʼ kyyekʼin «kyokslabʼl ex [...] kypasens», tzaj kykʼamoʼn «aju tzaj ttziyan Dios» kye. In tzaj tqʼamaʼn Tyol Dios tiʼj Abrahán qa tuʼnju ten «tpasens tuʼn tayon», tzaj tkʼamoʼn aju ttziybʼil Jehová tuʼn ttzaj kʼiwlaʼn ex tuʼn tchmet tyajil (Heb. 6:12, 15). Tuʼnju mas yajxitl kjapunel kywi ttziybʼil Jehová, iltoq tiʼj tuʼn kukx tyon Abrahán. Aju yol kyaj bʼant tiʼj tuʼn Jehová tukʼil Abrahán, tzyet tuʼn tjapun twiʼ toj abʼqʼi 1943 toj qʼij 14 te nisán te t-xjawil kye aj judiy tej naʼmxtoq tul Jesús. Toj qʼij aju, e ikʼx Abrahán, Sara ex qeju in che anqʼintoq kyukʼil toj nim aʼ Éufrates ex e okx toj Txʼotxʼ tzaj Tziyen kye tuʼn Jehová. Noqtzun tuʼnj, kukx yon Abrahán juntl  25 abʼqʼi tuʼntzun tul itzʼj Isaac toj abʼqʼi 1918. Ex yon juntl 60 abʼqʼi tuʼntzun kyul itzʼj Esaú ex Jacob, aqeju tchman, toj abʼqʼi 1858 (Heb. 11:9).

¹⁰ ¿Tzajpe tkʼamoʼn Abrahán jun piẍ tiʼj Txʼotxʼ tzaj Tziyen kye tuʼn Jehová? In tzaj tqʼamaʼn Tyol Dios qa «mintiʼ xi tqʼoʼn Dios tetzbʼil Abraham, mi jun piẍ txʼotxʼ; noq oʼkx xi ttziyan Dios te tuʼn t-xi tqʼoʼn aju txʼotxʼ te tetzbʼil ex te tibʼajxi te kyetzbʼil tiyjil, maske naʼnxtoq titzʼj jun tkʼwaʼl Abraham tej tyolin Dios tukʼil» (Hech. 7:5). Tej otoqxi tzikʼx Abrahán toj nim aʼ Éufrates, ikʼ 430 abʼqʼi tuʼntzun tchmet tyajil ex tuʼn kyok te jun nasyon tuʼntzun kyanqʼin toj txʼotxʼ lu (Éx. 12:40-42; Gál. 3:17).

11. a) ¿Tiquʼn ten tpasens Abrahán tuʼn tyon? b) ¿Tiʼ kʼiwlabʼil ktzajel tkʼamoʼn Abrahán tuʼnju yon?

¹¹ Mintiʼ ok tqʼoʼn Abrahán twitz tiʼjju otoq txi ttziyen Jehová te, noqtzun tuʼnj, kukx yon tuʼn tkyaqil tkʼuʼj ex tukʼil pasens tuʼnju ok qeʼ tkʼuʼj tiʼj Jehová (kjawil uʼjit Hebreos 11:8-12). ¿Jaku kubʼ qximen jniʼ tzalajbʼil kbʼel tnaʼn aj tjaw anqʼin toj Tbʼanel Najbʼil? Kjawil labʼin tiʼj tkyaqilju in tzaj tqʼamaʼn Tyol Dios tiʼj tanqʼibʼil ex kyiʼj tyajil. * Ax ikx kjawel tzalaj aj tel tnikʼ tiʼj qa onin tuʼn tjapun twi ttziybʼil Jehová aju at toklen tukʼil tyajil xuʼj. Kʼelel tnikʼ tiʼj qa tzaj tiʼn nim tbʼanel tuʼnju yon nim ambʼil.

12, 13. a) ¿Tiquʼn iltoq tiʼj tuʼn tten tpasens José? b) ¿Tiʼ tbʼanel tmod José kubʼ tyekʼin?

¹² Ax ikx kubʼ tyekʼin jun tbisnieto Abrahán tpasens tuʼn tyon. José tbʼi ex ok bʼinchaʼn junjun nya bʼaʼn tiʼj. Tnejel, xi kʼayin te majen tej qʼiʼn junlo 17 abʼqʼi tuʼn. Yajxitl, xi qʼamaʼn jun nya ax tok yol tiʼj qa tajtoq tuʼn tkubʼ ten tukʼil t-xuʼjil tpatrón, ex tuʼn jlu okx qʼoʼn toj cárcel (Gén. 39:11-20; Sal. 105:17, 18). Maske kukx kubʼ tbʼinchaʼn aju bʼaʼn, noqtzun tuʼnj, e tzaj nya bʼaʼn tiʼj twitzju tuʼn ttzaj tkʼamoʼn kʼiwlabʼil. Chʼexpaj naj tkyaqil tej tikʼtl 13 abʼqʼi. Etz José toj cárcel ex ok te tkabʼin xjal mas nim toklen toj tnam Egipto (Gén. 41:14, 37-43; Hech. 7:9, 10).

¹³ ¿Tzajpe tqʼoj José tuʼn tkyaqil nya bʼaʼn ok bʼinchaʼn tiʼj? ¿Xipe tqʼoʼn ambʼil tuʼn ya miʼn tok qeʼ tkʼuʼj tiʼj Jehová, aju Tdios? Mintiʼ. ¿Tiquʼn kukx yon tukʼil pasens? Tuʼnju ten qʼuqbʼil tkʼuʼj tiʼj Jehová. El tnikʼ tiʼj qa a Dios in keʼyin tiʼj tkyaqilju bʼaj. Tuʼntzunju xi tqʼamaʼn jlu kye terman: «Miʼn che xobʼe, bʼaqa Dios qine. Kubʼ kyximane tuʼn tbʼant mya bʼaʼn wiʼje, atzunte Dios o tzʼok tqʼoʼn te bʼaʼn, tuʼn tbʼant aju in qil jaʼlo, tuʼn kyklet nimku xjal tuʼn miʼn kykyim» (Gén. 50:19, 20). Yajxitl, el tnikʼ José tiʼj qa ok te tbʼanel tuʼnju yon tukʼil pasens.

14, 15. a) ¿Tiquʼn in qo jaw labʼin tiʼj tpasens David? b) ¿Tiʼ onin tiʼj David tuʼn tyon tukʼil pasens?

¹⁴ Ax ikx ok bʼinchaʼn nim nya bʼaʼn tiʼj aj kawil David. Maske jaw tskʼoʼn Jehová te tuʼn tok te aj kawil tej tzmatoq kuʼxun, noqtzun tuʼnj, kukx yon David junlo 15 abʼqʼi tuʼntzun tkawin kyibʼaj tyajil (2 Sam. 2:3, 4). Tiʼj ambʼil lu, el oq David twitz aj kawil Saúl tuʼnju tajtoq tuʼn tkubʼ tbʼyoʼn te. * Tuʼntzunju, at maj anqʼin tiʼjxi ttnam moqa toj toy pik toj tzqij txʼotxʼ. Tej tbʼet ambʼil kyim Saúl toj jun qʼoj. Maske ikju, kukx yon David  juntl 7 abʼqʼi tuʼntzun tkawin kyibʼaj kykyaqil aj Israel (2 Sam. 5:4, 5).

¹⁵ ¿Tiquʼn ten tpasens David tuʼn tyon? Tzaj tqʼoʼn tzaqʼwebʼil toj Salmo 13, jatumel xi tqanin kyaje maj te Jehová jtoj tuʼn kybʼaj qeju nya bʼaʼn e tzaj tiʼj. Tqʼama jlu: «Qʼuql nkʼuʼje tiʼj tkʼujlalila; in tzalaj wanmiye porque aya klol weye. Ok chin bʼitzale te Qman tuʼnju bʼaʼn ma tbʼincha weye» (Sal. 13:5, 6). Qʼuqlitoq tkʼuʼj David tiʼj axix tok tkʼujlabʼil Jehová. Yon tukʼil tzalajbʼil tuʼn tpon qʼij tuʼn tkubʼ tnajsaʼn Jehová tkyaqilju nya bʼaʼn in nikʼtoq tiʼj. Ax ikx, ximen tiʼj alkye tten otoq tzʼonin Jehová tiʼj. El tnikʼ David tiʼj qa tbʼanel ok tuʼnju yon.

16, 17. ¿Alkye tten o kubʼ tyekʼin Jehová ex Jesús qa ax ikx kye in che yon tukʼil pasens?

¹⁶ Aj ttzaj tqʼamaʼn Jehová qe tuʼn tten qpasens, nya taj tuʼn tkubʼ qbʼinchaʼn jun tiʼ aju nya taj tuʼn tkubʼ tbʼinchaʼn. Axpe ikx, a Jehová aju mas tbʼanel techel qwitz tuʼn tten qpasens (kjawil uʼjit 2 Pedro 3:9). Jun techel, o tzikʼ nim mil abʼqʼi in yon tukʼil pasens tuʼn tkubʼ tyekʼin qa nya ax tok qeju tyol Satanás tqʼama toj tbʼanel najbʼil Edén. «In ayon» Jehová tuʼn tpon ambʼil tuʼn tok tbʼi te xjan te jumajx. Mlay kanin qximbʼetz tiʼj tkyaqil kʼiwlabʼil tzul tqʼoʼn kye qeju in che yon tiʼj (Is. 30:18).

¹⁷ Ax ikx o kubʼ t-ximen Jesús tuʼn tyon. Tej tten tzalu twitz Txʼotxʼ kukx ajbʼen te Jehová tejxi tkyim. Toj abʼqʼi 33 xi tyekʼin te Jehová aju toklen chojbʼil bʼant tuʼn. Noqtzun tuʼnj, kukx yon tuʼn tjapun abʼqʼi 1914 tuʼntzun ttzyet tkawin toj kyaʼj (Hech. 2:33-35; Heb. 10:12, 13). Ex kukx kyyol ajxi tjapun bʼaj Mil Abʼqʼi tuʼn Tkawin, tuʼntzun kykubʼ najset qeju aj qʼoj tiʼj te jumajx (1 Cor. 15:25). Nim ambʼil il tiʼj tuʼn tyon, noqtzun tuʼnj, ojtzqiʼn quʼn qa tbʼanel kʼokel tuʼnju kukx kyyol.

18, 19. ¿Tiʼ kʼonil qiʼj tuʼn kukx qyon tukʼil pasens?

¹⁸ Qkyaqilx il tiʼj tuʼn kukx qyon tukʼil pasens. ¿Tiʼ kʼonil qiʼj tuʼn tten qpasens? Bʼaʼn tuʼn ttzaj qnaʼn qa il tiʼj tuʼn t-xi qqanin xewbʼaj xjan te Jehová tuʼntzun tten qpasens (Efes. 3:16; 6:18; 1 Tes. 5:17-19). Tuʼntzunju, il tiʼj tuʼn t-xi qqanin onbʼil te Jehová tuʼn kukx tikʼx quʼn tukʼil pasens.

¹⁹ Ax ikx bʼaʼn tuʼn ttzaj qnaʼn tiquʼn kukx yon Abrahán, José ex David tukʼil pasens kyiʼj ttziybʼil Jehová. Tuʼnju ten qʼuqbʼil kykʼuʼj tiʼj ex tiʼjju bʼant tuʼn. Mintiʼ e ximen kyiʼjx moqa tiʼjju mas tbʼanel te kye. Qa ma qo ximen kyiʼj kʼiwlabʼil che ul qkʼamoʼn, kʼonil qiʼj tuʼn kukx tten qpasens.

20. ¿Tiʼ kbʼel qximen tuʼn tbʼant quʼn?

²⁰ Maske jaku qo ok weʼ kywitz nim nya bʼaʼn, il tiʼj tuʼn kukx qyon tukʼil pasens. Ax tok, atlo maj jaku kubʼ qxjelin jlu: «¿Nikʼpuntzun ktel jlu, Nman?» (Is. 6:11). Noqtzun tuʼnj, tukʼil onbʼil in tzaj tqʼoʼn xewbʼaj xjan jaku txi qqʼamaʼn ik tzeʼn tqʼama Jeremías: «Kukx chin yole tiʼj» (Lam. 3:21, 24, TNM).