1, 2. ¿Alkye tten in nonin Romanos 5:12 qiʼj?

IN TZAJ tqʼamaʼn Romanos 5:12 jlu: «Kyjaʼtzun, ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il». Ojtzqiʼnxix aju versículo lu quʼn tuʼnju nim maj in najbʼen quʼn aj t-xi qyekʼun kye xjal aju in tzaj tqʼamaʼn Tyol Dios.

² Nim maj in najbʼen versículo lu toj nimaq uʼj ¿Tiʼ in tzaj t-xnaqʼtzaʼnxix Tyol Dios? Aj tkubʼ qxnaqʼtzaʼn qeju xnaqʼtzbʼil 3, 5 ex 6 yukʼil qkʼwaʼl ex kyukʼil txqantl xjal, in jawlo quʼjin Romanos 5:12 kye. In jaw quʼjin jlu kye tuʼntzun qonin kyiʼj tuʼn tel kynikʼ tiʼj tiquʼn nya jun tbʼanel najbʼil twitz Txʼotxʼ toj ambʼil jaʼlo, tiquʼn il tiʼj jun chojbʼil ex tiquʼn in qo kyim. Noqtzun tuʼnj, ax ikx jaku tzʼonin versículo lu qiʼj tuʼn tok qqʼoʼn mas toklen qamiwbʼil tukʼil Jehová. Nya oʼkxju, ax ikx jaku tzʼonin  qiʼj tuʼn kukx tok tilil quʼn tuʼn qnimen te ex tuʼn kukx qyon tiʼjju o tzaj ttziyen qe.

3. ¿Tiʼ il tiʼj tuʼn ttzaj qnaʼn qkyaqilx?

³ Qkyaqilx bʼaʼn tuʼn ttzaj qnaʼn qa aj il qoʼ ex qa tkyaqil qʼij in qo el txalpaj, ex ojtzqiʼn jlu tuʼn Jehová. Noqtzun tuʼnj, in tzaj qʼaqʼin moqa in tzaj tzʼeʼy tkʼuʼj qiʼj ex tajbʼil tuʼn tkubʼ tnajsaʼn qil (Salmo 103:13, 14). Kyaj t-xnaqʼtzaʼn Jesús qa il tiʼj tuʼn t-xi qqanin te Jehová tuʼn tkubʼ tnajsaʼn qil (Lucas 11:2-4). Qa o kubʼ tnajsaʼn Jehová qeju il kubʼ qbʼinchaʼn ojtxi, ya mintiʼ tuʼn qximen kyiʼj. ¿Tiquʼn jaku kubʼ tnajsaʼn Jehová qil? Qo xnaqʼtzaʼn tiʼj.

4, 5. a) ¿Tiʼ in nonin qiʼj tuʼn tel qnikʼ tiʼj qa jaku kubʼ tnajsaʼn Jehová qil? b) ¿Alqiʼj in yolin «t-xtalbʼil Dios»?

⁴ Aju jaku tzʼonin qiʼj tuʼn tel qnikʼ tiʼj tiquʼn jaku kubʼ tnajsaʼn qil, aju uʼj xi ttzʼibʼin kye okslal te Roma, mas aju capítulo 6. Toj Romanos 3:23 ex 24, kyaj tchikʼbʼaʼn Pablo qa qkyaqilx o qo bʼinchan il ex tqʼamatl jlu: «Pero noq kukx qo okel te tzʼaqlxix noq tuʼn t-xtalbʼil Dios, tuʼnju ma qo kolpet tuʼn Jesucrist». Aj tyolinjtz tiʼj «t-xtalbʼil Dios», atz yolin Pablo tiʼj qa o bʼant jun tiʼ nim toklen tuʼn Dios qiʼj ex mintiʼ nyon tuʼn taj qqʼoʼn t-xel. Ax ikx, mintiʼ o qo aqʼunan tiʼj tuʼn tkambʼet quʼn ex mintiʼ qoklen tiʼj.

⁵ In tzaj tqʼamaʼn jun xjal at tojtzqibʼil qa aj tyolin Tyol Dios tiʼj t-xtalbʼil Dios, chʼixmi tkyaqil maj in yolin tiʼjju o bʼant tuʼn Jehová ex tuʼn Jesús tuʼntzun qetz klet tjaqʼ il ex kamik. Tuʼntzunju, in tzaj tqʼamaʼn Traducción del Nuevo Mundo «bondad inmerecida». Qo xnaqʼtzan tiʼjju o bʼant tuʼn Dios qiʼj ex tiʼ tbʼanel in tzaj tiʼn t-xtalbʼil qe toj ambʼil jaʼlo ex qa in tzaj tqʼoʼn jun qʼuqbʼil qkʼuʼj toj ambʼil tzul.

6. ¿Alkyeqe jaku tzaj tbʼanel kye noq tuʼn t-xtalbʼil Dios ex tiʼ tzul qʼoʼn kye?

⁶ Noq tuʼn tpaj il kubʼ tbʼinchaʼn Adán, qkyaqil o tzʼel qiqen il ex kyimen. Tuʼntzunju, in tzaj tqʼamaʼn Tyol Dios qa noq tuʼnju mintiʼ nimen «junx xjal», Adán, oktz il kyxol kykyaqil xjal. Noqtzun tuʼnj, tzaj tyekʼun Jehová t-xtalbʼil qiʼj ex tzaj tqʼoʼn jun tumel tuʼn kyetz klet kykyaqil xjal, «noq tuʼn jun xjal, a Jesucrist» (Romanos 5:12, 15, 17). Kyjuʼtzun, qkyaqilx jaku tzaj tbʼanel qe noq tuʼn t-xtalbʼil Dios. Tuʼnju nimen Jesús te Jehová, nim xjal che okel te tzʼaqli ex ktel kychwinqlal te jumajx (Romanos 5:19, 21).

7. ¿Tiquʼn jun tbʼanel oyaj ex jun yekʼbʼil tiʼj t-xtalbʼil Dios aju chojbʼil?

⁷ Jun tbʼanel oyaj tuʼn Jehová aju chojbʼil ex jun yekʼbʼil tiʼj t-xtalbʼil. Qo ximen tiʼj jlu: ten nimxix qʼaqʼbʼil tkʼuʼj Jehová qiʼj tuʼnju tzaj tqʼoʼn jun tumel tuʼn qetz klet tjaqʼ il ex kyimen. Noqtzun tuʼnj, nya il tiʼj tuʼn ttzaj tqʼoʼn Jehová Tkʼwaʼl te chojbʼil. Nya oʼkxju, ax ikx mlay kubʼ qximen qa at jun qe nimxix toklen tuʼntzun tbʼant jlu tuʼn Jehová ex Jesús, tuʼntzun tkubʼ najset qil ex tuʼn qanqʼin  te jumajx. Tukʼilju alkye tten in qo anqʼin, jaku txi qyekʼun te Jehová qa in xi qqʼoʼn nimxix chjonte te.

8. ¿Alkye ximbʼetz il tiʼj tuʼn tel qikʼun?

⁸ Ojtzqiʼn quʼn qa taj Jehová tuʼn tkubʼ tnajsaʼn qil, axpe ikx qeju matij il. Noqtzun tuʼnj, at jun ximbʼetz il tiʼj tuʼn tel qikʼun. Mintiʼ tuʼn tkubʼ qximen qa tuʼnju at t-xtalbʼil Jehová jaku kubʼ qbʼinchaʼn jun tiʼ nya bʼaʼn ex mintiʼ jun tiʼ jaku bʼaj tuʼnju in kubʼ tnajsaʼn Jehová qil. Toj tnejel syent abʼqʼi e ten junjun okslal ten kyximbʼetz ikju, maske ateʼxtoq junjun apóstol (kjawil uʼjit Judas 4). Ax ikx toj ambʼil jaʼlo, il tiʼj tuʼn tok qxqʼuqin qibʼ tuʼn miʼn t-xi qqʼoʼn qwiʼ tiʼjju in tzaj kyqʼamaʼn xjal tuʼntzun miʼn tten qe qximbʼetz ik tzeʼn kye.

9, 10. ¿Tiquʼn tqʼamaʼn Pablo qa «kyimni» taʼtoq tiʼj il ex txqantl okslal?

⁹ Xi tqʼamaʼn Pablo kye okslal qa nya bʼaʼn tuʼn tkubʼ kyximen qa kbʼel tnajsaʼn Jehová kyil noq tiʼxku in kubʼ kybʼinchaʼn. Xi tqʼamaʼn kye qa iltoq tiʼj tuʼn tel kyikʼun aju ximbʼetz lu tuʼnju «kyimni qoʼ te il» (kjawil uʼjit Romanos 6:1, 2). ¿Tiʼ tqʼama tuʼn jlu?

¹⁰ Noq tuʼn chojbʼil kubʼ tnajsaʼn Jehová til Pablo ex kyil qeju txqantl okslal toj tnejel syent abʼqʼi. E jaw t-skʼoʼn Jehová qe tuʼn xewbʼaj xjan tuʼntzun kyok te tkʼwaʼl. Qa kukxtoq in che ajbʼen te Jehová, jakutoq che anqʼin toj kyaʼj ex jaku che kawin tukʼil Jesús. Noqtzun tuʼnj, kukxtoq in che anqʼin tzalu twitz Txʼotxʼ toj ambʼil aju. Qa ikju, ¿tiquʼn tqʼama Pablo qa otoq che kyim te il? Tqʼama jlu tuʼnju otoq chʼexpaj kyanqʼibʼil toj tkyaqil tten. Ajbʼen Jesús te techel tuʼn Pablo tuʼntzun ttzaj tchikʼbʼaʼn jlu. Tqʼama qa ya mintiʼtoq «toklen kamik tiʼj» Jesús tuʼnju otoq jaw anqʼin tukʼil jun t-xmilal mintiʼ qʼanchaʼl. Axju bʼaj kyiʼj okslal, otoq che kyim te il, noqtzun tuʼnj, «itzʼ» qe tuʼn Dios noq «tuʼnju» bʼant tuʼn Jesús (Romanos 6:9, 11). Otoq chʼexpaj kyanqʼibʼil toj tkyaqil tten, tuʼnju ya mintiʼtoq in xi kyqʼoʼn ambʼil tuʼn kykubʼ kyuʼn qeju nya bʼaʼn kyajbʼil. Ya in noktoq tilil kyuʼn tuʼn ttzalaj Dios kyiʼj.

11. ¿Alkye tten «kyimni» qe okslal te il toj ambʼil jaʼlo?

¹¹ ¿Yajtzun qe? ¿Alkye tten «kyimni qoʼ te il»? Toj ambʼil ojtxi, kubʼlo qbʼinchaʼn nim tiʼchaq nya bʼaʼn tuʼnju mintiʼ ojtzqiʼn quʼn tiʼ t-ximbʼetz Jehová at kyiʼj. Tnejel «tmajen il» qoʼ (Romanos 6:19, 20). Noqtzun tuʼnj, tej tel qnikʼ tiʼj toj Xjan Uʼj tzeʼn tajbʼil Jehová tuʼn qanqʼin, kubʼ qximen tuʼn tkubʼ qchʼixpuʼn qanqʼibʼil, xi qqʼmaʼn te Jehová tuʼn qajbʼen te ex jaw aʼ qwiʼ. Ten qajbʼil tuʼn qnimen te ex tuʼn tkubʼ qbʼinchaʼn qe tiʼchaq bʼaʼn in nel toj twitz. O qo etz klet «tjaqʼ tipumal il» ex o qo ok «te majen tuʼn» qbʼinchante «aju tzʼaqlxix» (Romanos 6:17, 18).

12. ¿Tiʼ il tiʼj tuʼn tkubʼ qximen tuʼn tbʼant quʼn?

¹² Tqʼama Pablo jlu: «Miʼn txi kyqʼoʼne ambʼil te il tuʼn tkawin tuj kyximlale aju at tkyimel, ex miʼn txi kynimane aju tajbʼil kyximlale» (Romanos 6:12). Tuʼntzunju, il tiʼj tuʼn tkubʼ qximen jun tiʼ tuʼn tbʼant quʼn. Qa kxel qqʼoʼn ambʼil tuʼn qkubʼ kyuʼn nya bʼaʼn ximbʼetz ex qeju nya bʼaʼn qajbʼil, moqa kbʼel kyiʼj quʼn. Qxjelin kubʼ jlu: «¿In xipe nqʼoʼne ambʼil tuʼn kychʼiy nya bʼaʼn nximbʼetze ex in kubʼ nbʼinchaʼne? ¿Moqa jun rat naj in che el wikʼune?». Qa ax tok in xi qqʼoʼn chjonte  tiʼjju t-xtalbʼil Dios, kʼokel tilil quʼn tuʼn ttzalaj Jehová quʼn.

13. ¿Tiquʼn jaku tzʼok qeʼ qkʼuʼj tiʼj qa jaku kubʼ qbʼinchaʼn aju bʼaʼn?

¹³ Toj tnejel syent abʼqʼi toj tnam Corinto, ateʼ junjun eleqʼ, qe xinaq in che kubʼ kuẍe tukʼil juntl xinaq, qeju in che yaẍin, qeju in che kʼulin kywitz tilbʼilal ex qeju in xi kykʼaʼn nim qʼeʼn, el kynikʼ tiʼj Jehová, ok kykʼujlaʼnxix ex bʼaj kychʼixpuʼn kyanqʼibʼil. Tzaj kychʼixwi tiʼjju otoq kubʼ kybʼinchaʼn (Romanos 6:21; 1 Corintios 6:9-11). Chʼixmi ax qe chʼixpubʼil bʼant kyuʼn okslal te tnam Roma. Tqʼama Pablo jlu: «Ex miʼn txi kyqʼoʼne kyximlale te il tuʼn tbʼinchet aju mya bʼaʼn; oʼkx kyqʼonx kyibʼe te Dios mer ik tzaʼn kyimni qeye nej pero itzʼ qeye jaʼlo, ex kyqʼonx kyximlale te Dios tuʼn tbʼinchet aju tzʼaqlxix» (Romanos 6:13). Qʼuqlitoq tkʼuʼj Pablo tiʼj qa jakutoq kubʼ kybʼinchaʼn aju bʼaʼn tuʼntzun kytzalaj tiʼj t-xtalbʼil Dios.

14, 15. ¿Alkyeqe xjel jakulo kubʼ qxjelin?

¹⁴ Axju in bʼaj toj ambʼil jaʼlo. Ateʼ junjun erman kubʼtoq kybʼinchaʼn junjun nya bʼaʼn ik tzeʼn qeju xjal te tnam Corinto. Noqtzun tuʼnj, tej tok kyojtzqiʼn Jehová, kubʼ kychʼixpuʼn kyanqʼibʼil. Ok jlu ik tzeʼn otoq che bʼaj txʼjet. Qkyaqilx bʼant junjun chʼixpubʼil quʼn tuʼntzun ttzalaj Jehová qiʼj. Tuʼntzunju, kukx qqʼonx chjonte tiʼjju t-xtalbʼil Dios. ¿Alkye tten jaku bʼant quʼn? Aj tok tilil quʼn tuʼn kykubʼ kyiʼj nya bʼaʼn qajbʼil ex qa ma tzʼajbʼen qanqʼibʼil quʼn tuʼn qajbʼen te Jehová.

¹⁵ Noqtzun tuʼnj, bʼaʼn tuʼn tok tilil quʼn tuʼn miʼn tkubʼ qbʼinchaʼn qe matij il ik tzeʼn kubʼ kybʼinchaʼn xjal te tnam Corinto. Mlay bʼant tuʼn kukx tkubʼ qbʼinchaʼn qeju matij il ex tuʼn tkubʼ qyoʼn qa tzul tyekʼun Jehová t-xtalbʼil qiʼj, ex tuʼn tkubʼ tnajsaʼn qil. Tuʼn jlu, jakulo kubʼ qxjelin jlu: «¿Tiʼ in bʼaj kyukʼil qeju il in kubʼ kyximen junjun qa nya matij il qe? ¿In nokpe tilil quʼn tuʼn qnimen te Jehová toj tkyaqil tten?» (Romanos 6:14, 17).

16. ¿Alkye tten in tzaj tyekʼun techel kyaj tqʼoʼn Pablo qa ax ikx il tiʼj tuʼn tel qikʼun qeju il mintiʼ in tzaj tqʼamaʼn 1 Corintios 6:9-11?

¹⁶ Qo ximen tiʼj apóstol Pablo. Kubʼ ttzʼibʼin jlu: «Atzun weye in nbʼinchaʼne aju tajbʼil nchibʼjale, kʼaʼyimaj qine tjaqʼ tipumal il. Porque aju in nbʼinchaʼne, mintiʼ nneʼl nnikʼe tiʼj; aju wajbʼile, mintiʼ in bʼant wuʼne; ex aju nkʼiʼye, atzunju in bʼant wuʼne» (Romanos 7:14, 15). Maske mintiʼ kubʼ tbʼinchaʼn qeju il ik tzeʼn in tzaj tqʼamaʼn 1 Corintios 6:9-11, noqtzun tuʼnj, el tnikʼ tiʼj qa in kubʼtoq tbʼinchaʼn il. Tajbʼil tuʼn ttzalaj Jehová tiʼj, tuʼntzunju ok tilil tuʼn tuʼn tkubʼ tbʼinchaʼn aju bʼaʼn (kjawil uʼjit Romanos 7:21-23). Bʼaʼn tuʼn tel qkanoʼn techel kyaj tqʼoʼn ex tuʼn tok tilil quʼn tuʼn qnimen te Jehová.

17. ¿Tiquʼn mintiʼ in che yolin okslal tiʼj nya ax tok yol?

 ¹⁷ Jun techel, ojtzqiʼn quʼn qa tuʼn qajbʼen te Jehová il tiʼj tuʼn qok te tbʼanel xjal ex tuʼn qyolin tiʼjju axix tok yol (kjawil uʼjit Proverbios 14:5 ex Efesios 4:25). Nya qajbʼil tuʼn qok ik tzeʼn Satanás, aju «in tzaj nikʼaj yol tukʼil». Bʼaʼn tuʼn ttzaj qnaʼn qa kyim Ananías tukʼil t-xuʼjil tuʼnju mintiʼ e yolin tiʼj ax tok yol. Tuʼntzunju, mintiʼ in qo yolin tiʼj nya ax tok yol (Juan 8:44; Hechos 5:1-11). Noqtzun tuʼnj, tuʼn qok te tbʼanel xjal nya oʼkx tuʼn miʼn qyolin tiʼj nya ax tok yol. Qa ax tok in xi qqʼoʼn chjonte tiʼjju t-xtalbʼil Dios, qo okel te tbʼanel xjal kyoj junjuntl tten.

18, 19. ¿Alkyeqe tiʼchaq mintiʼ tuʼn tkubʼ qbʼinchaʼn tuʼntzun qok te tbʼanel xjal?

¹⁸ Qa qajbʼil tuʼn qok te tbʼanel xjal, ateʼ junjuntl tiʼchaq il tiʼj tuʼn tbʼant quʼn ex nya oʼkx tuʼn miʼn qyolin tiʼj nya ax tok yol. Jun techel, xi tqʼamaʼn Jehová jlu kye aj Israel: «Miʼn che elqʼane. Miʼn bʼaj kysbʼun kyibʼe ex miʼn che nikʼane yol kyxolxe». ¿Tiquʼn mintiʼ tuʼn tbʼant jlu kyuʼn? Tuʼnju tqʼama Jehová jlu kye: «Che okxe xjan, porque weye xjan qine, aqine Kymane ex Kydiose» (Levítico 19:2, 11). Maske mintiʼ in qo yolin tiʼj nya ax tok yol, mintiʼ in qo ok te tbʼanel xjal qa ma txi qqʼamaʼn jun tiʼ  nya ax tok ex in xi kyniman txqantl qa ax tok.

¹⁹ Jun techel, qo ximen tiʼj jun xjal in xi tqʼamaʼn te tpatrón ex qa kye tukʼil qa il tiʼj tuʼn tex naj toj aqʼuntl tuʼnju il tiʼj tuʼn t-xi tukʼil jun aj qʼanil. Noqtzun tuʼnj, nya tuʼn jlu taj tuʼn tex naj. Tuʼnju, ya chʼix t-xi ttzyet qe tvacacion, tuʼntzun taj tuʼn tex naj. Aju tuʼn tbʼant tuʼn, oʼkx tuʼn t-xiʼ jun rat toj jun farmancia ex qa oʼkx tuʼn t-xiʼ chjolte jun factura tukʼil aj qʼanil. ¿Jakupe txi qqʼamaʼn qa ma tzʼok xjal lu te tbʼanel? ¿Moqa jaku txi qqʼamaʼn qa ma sbʼun? Aju xjal lu ma tqʼama jun tiʼ nya ax tok ex ma txi kynimen txqantl. At maj, in che sbʼun xjal noq tuʼn ttzaj kykʼamoʼn jun tiʼ moqa noq tuʼn miʼn tkubʼ jun kykastiw. Atzun qe, in qo nimen te Jehová aju in tzaj tqʼamaʼn tuʼn miʼn qsbʼuʼn. Qaj tuʼn tkubʼ qbʼinchaʼn aju in tzaj tqʼamaʼn Jehová qa bʼaʼn ex qa saqxix (Romanos 6:19).

20, 21. ¿Tiʼ kʼelel qikʼun qa in xi qqʼoʼn chjonte tiʼjju t-xtalbʼil Dios?

²⁰ Ojtzqiʼn quʼn qa il tiʼj tuʼn tel qikʼun yaẍbʼil, tuʼn qkʼaʼn nim qʼeʼn ex junjuntl matij il. Noqtzun tuʼnj, qa in xi qqʼoʼn chjonte tiʼj t-xtalbʼil Dios, ax ikx kʼelel qikʼun alkyexku juntl tiʼ mintiʼ in tzalaj Jehová tiʼj. Jun techel, nya oʼkx mintiʼ in qo yaẍin, sino ax ikx mintiʼ in nok qqʼoʼn qwitz kyiʼj tiʼchaq tzʼilxix. Ex nya oʼkx mintiʼ in qo kʼaʼn nim qʼeʼn, sino ax ikx mintiʼ in xi qqʼoʼn ambʼil tuʼn ttzaj sutin toj qwitz tuʼn. Kwestlo tuʼn tkubʼ kyiʼj tiʼchaq lu quʼn, noqtzun tuʼnj, jaku bʼant quʼn.

²¹ Bʼaʼn tuʼn tok tililxix quʼn tuʼn t-xi qbʼiʼn aju nabʼil tqʼama Pablo: «Kyjaʼtzun, miʼn txi kyqʼoʼne ambʼil te il tuʼn tkawin tuj kyximlale aju at tkyimel, ex miʼn txi kynimane aju tajbʼil kyximlale» (Romanos 6:12; 7:18-20). Ax tok, kwestlo tuʼn tkubʼ tiʼj il quʼn. Noqtzun tuʼnj, aj tok tilil quʼn tuʼn tkubʼ tiʼj alkyexku il, in kubʼ qyekʼun qa in xi qqʼoʼn chjonte tiʼj t-xtalbʼil Jehová ex Jesús.

22. ¿Tiʼ tbʼanel tzul qe qa ma txi qqʼoʼn chjonte tiʼjju t-xtalbʼil Dios?

²² O kubʼ tnajsaʼn Jehová qil ex kukx jaku bʼant tuʼn. Nimxix in xi qqʼoʼn chjonte tiʼj t-xtalbʼil Dios. Tzʼokxix tilil quʼn tuʼn miʼn tkubʼ qbʼinchaʼn kykyaqil tiʼchaq nya bʼaʼn in tzaj tqʼamaʼn Jehová, maske bʼaʼn in che ela toj kywitz txqantl xjal. ¿Tiʼ tbʼanel tzul qe qa ma bʼant jlu quʼn? In tzaj tqʼamaʼn Pablo jlu: «Atzun jaʼlo ma che tzoqpete tjaqʼ tipumal il ex ma che oke te tmajen Dios, ex atzun ma kykambʼaye jlu: Tuʼn kyanqʼine kypaʼn kyibʼe tiʼj il, ex tuʼn tten kychwinqlale te jumajx» (Romanos 6:22).