1, 2. a) ¿Tiʼ kyximbʼetz junjun xjal at tiʼj tzoqpibʼil at qe tiʼj tiʼ kbʼantel quʼn? b) ¿Tiʼ in tzaj t-xnaqʼtzan Tyol Dios tiʼj tzoqpibʼil at qe tiʼj tiʼ kbʼantel quʼn? c) ¿Alkyeqe xjel che xel qtzaqʼweʼn toj xnaqʼtzbʼil lu?

JUN xuʼj in ximen tuʼn tkubʼ tbʼinchaʼn jun tiʼ xi tqʼamaʼn te jun tamiw: «Miʼn chʼin ok tqʼoʼna ximel tiʼj tiʼ kbʼantel wuʼne, oʼkx qʼamantza tiʼ jaku bʼant wuʼne. Mas nya kwest». Aju xuʼj lu oʼkx taj tuʼn txi kyqʼamaʼn te tiʼ jaku bʼant tuʼn ex nya tuʼn tajbʼen aju tzoqpibʼil at te, a jlu jun tbʼanel oyaj o tzaj tqʼoʼn Dios. ¿Yajtzun qe? ¿Qgan tuʼn ax qo tuʼn qximen tiʼj jun tiʼ kbʼantel quʼn moqa mas qgan tuʼn ttzaj kyqʼamaʼn txqantl tiʼ jaku bʼant quʼn? ¿Tiʼ qximbʼetz at tiʼj tzoqpibʼil at qe?

² Junxitl kyximbʼetz xjal at tiʼj tzoqpibʼil at qe tuʼn tbʼant jun tiʼ quʼn. At junjun xjal in kyqʼamaʼn qa nya ax tok at, tuʼnju ya o kubʼ t-ximen Dios tiʼ kbʼantel quʼn. Junjuntl in kyqʼamaʼn qa oʼkx jaku kubʼ qximen aju kbʼantel quʼn qa at tzoqpibʼil mintiʼ bʼajsbʼil tiʼj qe. Noqtzun tuʼnj, in tzaj tqʼamaʼn Tyol Dios qa o qo kubʼ tbʼinchaʼn Jehová tukʼil qnabʼil ex tukʼil tzoqpibʼil qe tuʼn tkubʼ qximen tiʼ kbʼantel quʼn toj tumel (kjawil uʼjit Josué 24:15). Axpe ikx, in tzaj ttzaqʼweʼn Xjan Uʼj qe xjel  lu: ¿Atpe jatumel in pon bʼaj aju tzoqpibʼil at qe? ¿Alkye tten kʼajbʼel tzoqpibʼil at qe? ¿Alkye tten in kubʼ qyekʼun qa kʼujlaʼnxix Jehová quʼn aj tkubʼ qxim tiʼ kbʼantel quʼn? ¿Alkye tten jaku kubʼ qyekʼun qa at tbʼanel qximbʼetz tiʼjju in kubʼ kyximen txqantl? Toj xnaqʼtzbʼil lu che xel qtzaqʼweʼn xjel lu.

3. ¿Alkye tten in najbʼen aju tzoqpibʼil mintiʼ bʼajsbʼil tiʼj tuʼn Jehová?

³ Oʼkx Jehová tzoqpiʼn tuʼn tbʼant alkyexku tuʼn, noqtzun tuʼnj, jaku tzʼel qkanoʼn tiʼj alkye tten in najbʼen tuʼn. Jun techel, ajbʼen aju tzoqpibʼil tuʼn Jehová tuʼn tjaw tjyoʼn aju tnam aj Israel ik tzeʼn jun tnam «tekuxix» (Deuteronomio 7:6-8). Bʼant jlu tuʼn tuʼntzun tjapun ttziybʼil otoq txi tqʼamaʼn te Abrahán aju tamiw (Génesis 22:15-18). Nya oʼkxju, ax ikx in najbʼen tzoqpibʼil tuʼn Jehová tukʼil kʼujlabʼil ex toj tumel. Kubʼ tyekʼun jlu tej tkubʼ tqʼoʼn kykastiw aj Israel tej mintiʼ e nimen te. Tej tajtz tiʼj kyanmi tiʼjju otoq kubʼ kybʼinchaʼn, kubʼ tyekʼun Jehová tkʼujlabʼil ex qʼaqʼbʼil tkʼuʼj kyiʼj. Tqʼama jlu: «Kʼelel wiʼne ttxʼuʼjil kywiʼ aj Israel: che okel nkʼujlaʼne» (Oseas 14:4). Ik tzeʼn in nel qnikʼ tiʼj, in najbʼen tzoqpibʼil tuʼn Jehová tuʼn tonin kyiʼj txqantl. ¡Jun tbʼanel techel te qe!

4, 5. a) ¿Alkye xi kʼamonte tnejel aju oyaj tiʼj tzoqpibʼil ex alkye tten ajbʼen tuʼn? b) ¿Alkye xjel bʼaʼn tuʼn tkubʼ qxjelin qkyaqilx?

⁴ Tej tkubʼ tbʼinchaʼn Jehová qe anjel ex qe xjal, xi tqʼoʼn ambʼil kye tuʼn tkubʼ kyximen tiʼ tuʼn tbʼant kyuʼn. A Jesús kubʼ tbʼinchaʼn Jehová tnejel ex kubʼ tbʼinchaʼn ik tzeʼn te tilbʼilal. A xi kʼamonte tnejel aju oyaj lu (Colosenses 1:15). ¿Alkye tten ajbʼen jlu tuʼn Jesús? Tej naʼmxtoq ttzaj tzalu twitz Txʼotxʼ, kubʼ t-ximen tuʼn kukx tajbʼen te Jehová ex tuʼn miʼn tonin tiʼj Satanás. Ex tej tul tzalu twitz Txʼotxʼ, kubʼ t-ximen tuʼn tel tikʼun qe joybʼil kubʼ tqʼoʼn Satanás twitz (Mateo 4:10). Nya oʼkxju, toj qʼonikʼen tej chʼixtoq tkubʼ bʼyoʼn, naʼn Dios te Ttat ex xi tqʼamaʼn te qa tajbʼiltoq tuʼn tkubʼ tbʼinchaʼn tajbʼil. Xi tqʼamaʼn jlu te: «Tat, qa tajbʼila chin tkloma tuʼn miʼn tikʼx ju kʼixkʼoj lu wuʼne; pero kuchiwt miʼn bʼant aju weye wajbʼil, oʼkx aju teya tajbʼila» (Lucas 22:42). ¿Jakupe tzʼel qkanoʼn tiʼj Jesús tuʼn tajbʼen aju tzoqpibʼil at qe tuʼntzun tkubʼ qbʼinchaʼn tiʼchaq in jaw nimsaʼn Jehová tuʼn ex tuʼn tkubʼ qbʼinchaʼn tajbʼil?

⁵ Jaku, jaku tzʼel qkanoʼn tiʼj Jesús tuʼnju ax ik qe bʼinchan maj qo ik tzeʼn tilbʼilal Dios (Génesis 1:26). Noqtzun tuʼnj, nya tzoqpiʼn qoʼ tuʼn tbʼant alkyexku tiʼ quʼn ik tzeʼn te Jehová. In tzaj tqʼamaʼn Xjan Uʼj qa o kubʼ tqʼoʼn Jehová jatumel jaku pon tzoqpibʼil at qe ex tajbʼil tuʼn t-xi qbʼiʼn. Jun techel, aʼyeju xuʼjilbʼaj il tiʼj tuʼn t-xi kynimen toklen kychmil ex qe kʼwaʼl, il tiʼj tuʼn t-xi kynimen kyman (Efesios 5:22; 6:1). Tuʼntzunju, qkyaqilx bʼaʼn tuʼn tkubʼ qxjelin jlu: «¿In nelpe nnikʼe tiʼj qa nya toj tkyaqil ambʼil jaku bʼant alkyexku tiʼ wuʼne?». Aju tzaqʼwebʼil in xi qqʼoʼn tiʼj xjel lu, jaku tzaj tqʼoʼn ambʼil qe tuʼn qanqʼin te jumajx.

6. Qʼamantza tukʼil jun techel tiquʼn nim toklen aju mintiʼ in tzaj qʼoʼn ambʼil qe tuʼn tbʼant tkyaqil quʼn.

⁶ Tuʼnju nya tzoqpiʼn qoʼ tuʼn tbʼant tkyaqil quʼn, ¿jakupe txi qqʼamaʼn qa axix tok at tzoqpibʼil qe? Jaku. ¿Tiquʼn? Tuʼnju qa mintiʼ qʼoʼn ambʼil tuʼn tbʼant tkyaqil quʼn, jaku qo ok t-xqʼuqin. Qo xnaqʼtzan tiʼj jun  techel. Qo ximen tiʼj qa ma qoʼx bʼetil toj jun tnam najchaq, noqtzun tuʼnj, mintiʼ kawbʼil at tiʼj alkye tten tuʼn kybʼet kar. Mintiʼ ttxolil kybʼe kar qʼiʼn ex qa kyuw che bʼet. ¿Jakupe qo bʼet toj txubʼtxaj? Mlay. Aju techel lu in tzaj tyekʼun qa oʼkx jaku qo tzalaj qa nya tzaqpiʼn qoʼ tuʼn tbʼant tkyaqil quʼn. Qo xnaqʼtzan kyiʼj junjun techel in yolin Tyol Dios tiʼj, aʼyeju in tzaj kyyekʼun qa te qex kʼajbʼel aju mintiʼ qʼoʼn ambʼil qe tuʼn Jehová tuʼn tbʼant tkyaqil quʼn.

7. a) Qʼamantza tiquʼn junxitl Adán kywitz txkup. b) ¿Alkye tten ajbʼen tuʼn Adán aju tzoqpibʼil xi qʼoʼn te?

⁷ Aju tnejel xjal kubʼ tbʼinchaʼn Jehová a Adán. Xi tqʼoʼn Jehová ambʼil te tuʼn tkubʼ t-ximen tiʼ tuʼn tbʼant tuʼn, ik tzeʼn otoq t-xi tqʼoʼn kye anjel. Noqtzun tuʼnj, mintiʼ xi tqʼoʼn aju tzoqpibʼil lu kye txkup. ¿Alkye tten ajbʼen tuʼn Adán aju tzoqpibʼil xi qʼoʼn te? Xi tkʼamoʼn aju aqʼuntl tuʼn tok tqʼoʼn kybʼi txkup. In tzaj tqʼamaʼn Xjan Uʼj qa xi tiʼn Jehová qe txkup twitz tuʼntzun tok tqʼoʼn twitz kyiʼj ex tuʼn tok tqʼoʼn tbʼanel kybʼi. Mintiʼ bʼaj tchʼixpuʼn Jehová kybʼi txkup otoq tzʼok tqʼoʼn Adán. Aju bʼant tuʼn, ten tbʼanel t-ximbʼetz tiʼjju otoq bʼant tuʼn Adán (Génesis 2:19).

8. ¿Tiʼ nya bʼaʼn bʼant tuʼn Adán tiʼjju tzoqpibʼil attoq te, ex tiʼ o tzaj tuʼn jlu?

⁸ Xi tqʼoʼn Jehová ambʼil te Adán tuʼn tok Txʼotxʼ te jun tbʼanel najbʼil tuʼn. Tqʼama Dios jlu: «Che kʼwaʼline, chmet-x kybʼaje, kynojsame twitz txʼotxʼ ex che kawine tibʼaj. Kbʼel ten kykawbʼile kyibʼaj kyiẍ tuj mar, kyibʼaj chyuʼj ex txqantl jil in che lipan twitz kyaʼj, ex kyibʼaj kykyaqil txkup ateʼ twitz txʼotx» (Génesis 1:28). Noqtzun tuʼnj, xi tloʼn Adán twitz tzeʼ aju mintiʼtoq tuʼn t-xi tloʼn ex mintiʼ xi tbʼiʼn qa mlaytoq bʼant tkyaqil tuʼn. Tuʼnju mintiʼ ajbʼen tzoqpibʼil toj tumel tuʼn Adán, o tzaj nim nya bʼaʼn kyiʼj xjal toj nim mil abʼqʼi (Romanos 5:12). Bʼaʼn tuʼn ttzaj qnaʼn toj tkyaqil ambʼil aju nya bʼaʼn o tzaj tuʼnju mintiʼ ajbʼen tzoqpibʼil toj tumel tuʼn Adán. A jlu kʼonil qiʼj tuʼn tajbʼen tzoqpibʼil at qe toj tumel aj tkubʼ qximen jun tiʼ ex tuʼn t-xi qbʼiʼn qa mlay bʼant tkyaqil quʼn.

9. ¿Alkye ambʼil xi tqʼoʼn Jehová kye aj Israel ex tiʼ xi kytziyen tuʼn tbʼant kyuʼn?

⁹ Qkyaqilx o tzʼel qiqen il ex kamik tiʼj Adán ex Eva. Maske ikju, kukx in tzaj qʼoʼn ambʼil qe tuʼn tkubʼ qximen tiʼ qajbʼil tuʼn tbʼant quʼn. In nel qnikʼ tiʼj jlu tiʼjju tmod Jehová kubʼ tyekʼun kyiʼj aj Israel. Xi tqʼoʼn Jehová ambʼil kye qa kyaj tuʼn kyok te jun tnam etzan tuʼn moqa miʼn (Éxodo 19:3-6). Xi kykʼamoʼn aj Israel tuʼn kyok te ttnam Jehová ex el kynikʼ tiʼj qa nya tzoqpiʼn qe tuʼn tbʼant tkyaqil kyuʼn. Xi kytziyen tuʼn tbʼant jlu kyuʼn: «Tkyaqilju ma tma Qman kbʼantel quʼne» (Éxodo 19:8). Noqtzun tuʼnj, bʼisbʼajil tuʼnju tej tbʼet ambʼil kubʼ kyximen tuʼn miʼn tjapun twiʼ kyyol. Aju techel kubʼ kyqʼoʼn, in tzaj tqʼoʼn jun xnaqʼtzbʼil nim toklen qe. ¿Alkye? Aju tuʼn tok qqʼoʼn toklen ambʼil o tzaj qʼoʼn qe tuʼn tkubʼ qximen tiʼ kbʼantel quʼn, tuʼn kukx qten nqayin ttxlaj Jehová ex tuʼn t-xi qnimen qe tkawbʼil (1 Corintios 10:11).

10. Maske aj il qoʼ, ¿alkyeqe techel tkuʼx toj capítulo 11 te uʼj te Hebreos aju in tzaj tyekʼun qa jaku tzʼajbʼen aju tzoqpibʼil at qe tuʼn tjaw qnimsaʼn Jehová? (Qʼonka twitza tiʼj tnejel tilbʼilal).

¹⁰ Toj capítulo 11 te Hebreos in tzaj tqʼamaʼn kybʼi 16 xinaq ex xuʼj, aʼyeju kukx e ajbʼen te Jehová ex el kynikʼ tiʼj qa mintiʼ qʼoʼn ambʼil kye tuʼn tbʼant alkyexku tiʼ kyuʼn. Tuʼnju kubʼ kybʼinchaʼn aju bʼaʼn,  tzaj kykʼamoʼn nim kʼiwlabʼil ex qʼuqbʼil kykʼuʼj tiʼj ambʼil tzul. Jun techel, ten nim qʼuqbʼil tkʼuʼj Noé ex xi tnimen tkyaqilju tqʼama Jehová te tuʼn tjaw tbʼinchaʼn jun ark ex tuʼn kyklet qe toj tja, ex qe tiyjil che ul te tibʼajxi (Hebreos 11:7). Ax ikx xi kynimen Abrahán ex Sara Jehová tuʼn tkyaqil kykʼuʼj ex i eʼx tojju txʼotxʼ otoq txi ttziyen kye. Maske jakutoq che «meltzʼaj juntl maj» toj tnam Ur, noqtzun tuʼnj, atz e ximen kyiʼj ttziybʼil Jehová. In tzaj tqʼamaʼn Tyol Dios qa ok tilil kyuʼn «tuʼn kypon tuj jun tnam mas bʼaʼn» (Hebreos 11:8, 9, 13, 15, 16). Atzun te Moisés kubʼ t-ximen tuʼn tel tikʼun qe qʼinumabʼil attoq toj tnam Egipto ex «mas o tajbʼexix [...] tuʼn tyajlanjtz kyukʼil qe xjal etzan tuʼn Dios, ex mya tuʼn ttzalaj tiʼj ju achbʼil in tqʼoʼn il aju noq te kabʼ qʼij» (Hebreos 11:24-26). Bʼaʼn tuʼn tel qkanoʼn qʼuqbʼil kykʼuʼj tmajen Dios lu ex bʼaʼn tuʼn tkubʼ qyekʼun qa in nok qqʼoʼn toklen aju tzoqpibʼil at qe aj tajbʼen quʼn tuʼn tbʼant aju tajbʼil Dios.

11. a) ¿Alkye tbʼanel ambʼil ktel qe qa ma jaw qjyoʼn tuʼn tajbʼen aju tzoqpibʼil at qe toj tumel? b) ¿Tiʼ kʼonil qiʼj tuʼn tajbʼen tzoqpibʼil at qe toj tumel?

¹¹ Jakulo kubʼ qximen qa mas nya kwest qa juntl xjal ma tzaj qʼamante qe tiʼ kbʼantel quʼn. Noqtzun tuʼnj, qa ma bʼant jlu quʼn, kxel qnajsaʼn jun ambʼil nim toklen. ¿Alqiʼj in qo yolin? In tzaj chikʼbʼaʼn jlu toj Deuteronomio 30:19, 20 (kjawil uʼjit). Toj versículo 19 xi tqʼamaʼn Jehová nim tumel kye aj Israel tuʼntzun kyximen tiʼj alkye tuʼn tjaw kyjyoʼn. Ex toj versículo 20 in tzaj tqʼamaʼn qa tukʼilju kbʼanteltoq kyuʼn, jaku kubʼ kyyekʼun jniʼ kykʼujlabʼil at tiʼj Jehová. Ax ikx qe o tzaj qʼoʼn ambʼil qe tuʼn tjaw qjyoʼn qa qaj tuʼn qkʼulin te Jehová. Qa ma bʼant jlu quʼn, jaku tzʼajbʼen tbʼanel ambʼil lu quʼn tuʼn tajbʼen aju tzoqpibʼil at qe tuʼn tjaw qnimsaʼn Jehová ex tuʼn tkubʼ qyekʼun qkʼujlabʼil tiʼj.

12. ¿Tiʼ nya qajbʼil tuʼn tbʼant quʼn tiʼjju tzoqpibʼil o tzaj tqʼoʼn Jehová qe?

¹² Qo ximen tiʼj qa in xi qqʼoʼn jun oyaj nimxix toklen te jun qamiw. ¿Tiʼ kbʼel qnaʼn qa ma tzʼex t-xoʼn toj tzʼis moqa qa ma tzʼok tbʼinchaʼn nya bʼaʼn kyiʼj txqantl tuʼn? ¿Mlaype tzaj qbʼis? Tuʼnju o tzaj tqʼoʼn Jehová oyaj qe aju tuʼn tjaw qjyoʼn tiʼ kbʼantel quʼn, in kubʼ tnaʼn bʼis aj tok tqʼoʼn twitz tiʼj qa nya toj tumel in najbʼen aju tzoqpibʼil at qe kyuʼn junjun xjal moqa in nok kybʼinchaʼn nya bʼaʼn kyiʼj txqantl. In tzaj tqʼamaʼn Tyol Dios qa «tuj mankbʼil tqʼijlalil», mlay che qʼon xjal chjonte (2 Timoteo 3:1, 2). Atzun qe nya qaj tuʼn tajbʼen aju tzoqpibʼil lu quʼn tuʼn tkubʼ qbʼinchan nya bʼaʼn moqa tuʼn miʼn qqʼon chjonte. Qa ikju, ¿alkye tten jaku kubʼ qyekʼun qa in xi qqʼoʼn chjonte te Jehová tiʼjju tzoqpibʼil o tzaj tqʼoʼn qe? ¿Alkye tten jaku tzʼajbʼen toj tumel quʼn aju oyaj o tzaj tqʼoʼn Jehová qe?

13. ¿Alkye tten jaku tzʼajbʼen tzoqpibʼil at qe toj tumel?

¹³ Qkyaqilx at ambʼil qe tuʼn tjaw qskʼoʼn alkyeqe qamiw che tel, alkye tten kbʼajel qxbʼalumin qibʼ ex alkye tten kʼajbʼel ambʼil quʼn. Noqtzun tuʼnj, il tiʼj tuʼn tok qxqʼuqin qibʼ tuʼn miʼn tkubʼ qximen qa jaku tzʼajbʼen tzoqpibʼil at qe tuʼn tkubʼ qbʼinchaʼn aju nya bʼaʼn in nela toj twitz Jehová moqa tuʼn tkubʼ qbʼinchaʼn aju in bʼant kyuʼn xjal (kjawil uʼjit 1 Pedro 2:16). Bʼaʼn tuʼn tajbʼen aju tzoqpibʼil at qe tuʼn «tjaw nimsaʼn tbʼi Dios» ex nya tuʼn  tkubʼ qbʼinchaʼn nya bʼaʼn (1 Corintios 10:31; Gálatas 5:13).

14. ¿Tiquʼn il tiʼj tuʼn tok qeʼ qkʼuʼj tiʼj Jehová aj tajbʼen tzoqpibʼil at qe?

¹⁴ In tzaj tqʼamaʼn Jehová jlu qe: «Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye, aqine chin xel ẍaqlunte kyeye tuj bʼe kxel kyiʼne» (Isaías 48:17). Qa qʼuqli qkʼuʼj tiʼj Jehová, kxel qbʼiʼn qa mlayx bʼant tkyaqil quʼn ex kbʼel qximen toj tumel tkyaqil kbʼantel quʼn. Kbʼel qmasin qibʼ tuʼn tel qnikʼ tiʼj qa «mya ax te xjal tajaw tchwinqlal, ex mlay tzʼel tnikʼ xjal tiʼj alkye bʼe bʼaʼn tuʼn tbʼet tuj» (Jeremías 10:23). Mintiʼ xi tbʼiʼn Adán ex junjun aj Israel Jehová qa mlayx bʼant tkyaqil kyuʼn aju otoq tqʼama kye. Aju bʼant kyuʼn, ok qeʼ kykʼuʼj kyiʼjx. Miʼn tzʼel qkanoʼn nya bʼaʼn techel lu kyiʼj. Bʼaʼn tuʼn tok qeʼ qkʼuʼj tiʼj Jehová tuʼn tkyaqil qanmi ex nya tuʼn tok qeʼ qkʼuʼj qiʼjx (Proverbios 3:5).

15. ¿Tiʼ in tzaj t-xnaqʼtzaʼn nabʼil tkuʼx toj Gálatas 6:5 qe?

¹⁵ Ax ikx il tiʼj tuʼn tten tbʼanel qximbʼetz tiʼjju in kubʼ kybʼinchaʼn txqantl. ¿Tiquʼn? Tuʼnju qkyaqilx at ambʼil qe tuʼn tkubʼ qximen tiʼ kbʼantel quʼn. Tuʼntzunju, jaku kubʼ kybʼinchaʼn txqantl junxitl twitzju qe jaku kubʼ qbʼinchaʼn. Ax ikx jaku bʼaj jlu tukʼil alkye qmod ex tukʼil qkʼulbʼil te Dios. Bʼaʼn tuʼn ttzaj qnaʼn aju nabʼil tkuʼx toj Gálatas 6:5 (kjawil uʼjit). Aju nabʼil lu in tzaj tyekʼun qa teyele junjun okslal at toklen tiʼjju kbʼantel tuʼn. Qa ma tzʼel qnikʼ tiʼj jlu, ktel tbʼanel qximbʼetz tiʼjju in kubʼ kybʼinchaʼn txqantl.

16, 17. a) ¿Tiquʼn ok te jun nya bʼaʼn aju tzoqpibʼil at kye okslal te tnam Corinto? b) ¿Alkye tten onin Pablo kyiʼj okslal lu? c) ¿Tiʼ xnaqʼtzbʼil in nel qiʼn tiʼj?

 ¹⁶ Qo xnaqʼtzan tiʼj jun techel in yolin Tyol Dios tiʼj tiquʼn il tiʼj tuʼn tten tbʼanel qximbʼetz tiʼjju in kubʼ kybʼinchaʼn qe erman. Nya junx kyximbʼetz okslal te tnam Corinto ten tiʼj qa kyxeltoq kychyoʼn chibʼj in kubʼ qʼoʼn kywitz tilbʼilal ex yajxitl in xi kʼayin. At junjun xi kychyoʼn aju chibʼj ex mintiʼ kubʼ kynaʼn nya bʼaʼn, tuʼnju ojtzqiʼn kyuʼn qa mintiʼ kyajbʼen tilbʼilal. Noqtzun tuʼnj, aqeju otoq che kʼulin kywitz tilbʼilal tej naʼmxtoq kyok te axix tok okslal, kubʼ kyximen qa ma txi kychyoʼn aju chibʼj lu ax t-xilen ik tzeʼn in che kʼulintoq twitz tilbʼilal (1 Corintios 8:4, 7). A jlu ok te jun nya bʼaʼn ex jakutoq tzaj nya bʼaʼn kyxol okslal tuʼn. ¿Tiʼ bʼant tuʼn Pablo tuʼn tonin kyiʼj erman tuʼn tkyaj nya bʼaʼn lu toj ttxolil?

¹⁷ Tnejel, xi tqʼamaʼn Pablo kye okslal te tnam Corinto qa tuʼnju wabʼj mlaytoq che ok te tbʼanel tamiw Dios (1 Corintios 8:8). Xi tqʼamaʼn Pablo kye qa maske at tzoqpibʼil kye tuʼn tkubʼ kyximen tiʼ tuʼn tbʼant kyuʼn, iltoq tiʼj tuʼn tok kyxqʼuqin kyibʼ tuʼn miʼn ttzaj kybʼis qeju chʼin kyokslabʼil at (1 Corintios 8:9). Yajxitl tqʼama kye qeju mas chʼin kyokslabʼil tuʼn miʼn kyok ten yolil kyiʼj qeju in kubʼtoq kyximen tuʼn t-xi kychyoʼn chibʼj (1 Corintios 10:25, 29, 30). Ik tzeʼn in nel qnikʼ tiʼj, a jlu attoq toklen tukʼil kykʼulbʼil te Jehová ex teyelex te junjun okslal tuʼn t-ximen tiʼj tiʼ kbʼantel tuʼn. ¿Nyape ikx qe il tiʼj tuʼn tten tbʼanel qximbʼetz tiʼj tiʼ kbʼantel kyuʼn erman maske nya nim toklen? (1 Corintios 10:32, 33).

18. ¿Alkye tten in kubʼ qyekʼun qa nim toklen aju oyaj o tzaj tqʼoʼn Jehová qe?

¹⁸ Aju tzoqpibʼil jun oyaj o tzaj tqʼoʼn Jehová qe aju in tzaj tqʼoʼn ambʼil qe tuʼn tjaw qjyon tiʼ kbʼantel quʼn (2 Corintios 3:17). In nok qʼoʼn toklen oyaj lu tuʼnju in tzaj tqʼoʼn ambʼil qe tuʼn tkubʼ qyekʼun qa nim toklen Jehová qe aj tkubʼ qbʼinchaʼn jun tiʼ. Bʼaʼn tuʼn tjaw qnimsaʼn Jehová tukʼilju qbʼinchbʼen ex tuʼn tten qximbʼetz bʼaʼn tiʼjju kbʼantel kyuʼn txqantl. Iktzun tten kbʼel qyekʼun qa nim toklen aju oyaj o tzaj tqʼoʼn Jehová qe.