1. ¿Alkyeqe tbʼanel tiʼchaq che kbʼantel noq tuʼn chojbʼil?

NOQ tuʼn chojbʼil bʼant tuʼn Jesús, che ul qkʼamoʼn nim kʼiwlabʼil. Jun techel, kpol jun qʼij jatumel tzul qʼoʼn ambʼil kye kykyaqil tbʼanel tkʼwaʼl Adán tuʼn kyten kyxol qeju toj tja Dios. Ax ikx tzul qʼoʼn ambʼil qe tuʼn qanqʼin te jumajx toj tzalajbʼil. Noqtzun tuʼnj, nya oʼkx jlu in bʼant tuʼn chojbʼil. Ax ikx at toklen kyukʼil kykyaqil qeju ateʼ toj kyaʼj ex qeju ateʼ twitz Txʼotxʼ (Hebreos 1:9).

2. a) ¿Alkyeqe yol nim kyoklen tqʼama Jesús toj naʼj Dios, tuʼn tbʼant toj kyaʼj ex twitz Txʼotxʼ? (Qʼonka twitza tiʼj tnejel tilbʼilal). b) ¿Tiʼ qo xnaqʼtzal tiʼj toj xnaqʼtzbʼil lu?

² Tej atxtoq kabʼe abʼqʼi tuʼn tkyim Jesús, xi t-xnaqʼtzaʼn kye t-xnaqʼtzbʼen alkye tten tuʼn kynaʼn Dios kyukʼil qe yol lu: «Qman Dios ata toj kyaʼj, tzʼokwit tbʼiya te xjan. Ku ttzajju Tkawbʼila. Bʼant-xwitju tajbʼila, ik tzeʼn toj kyaʼj, ax ikx twitz Txʼotxʼ» (Mateo 6:9-13, TNM). Toj ju xnaqʼtzbʼil lu kʼelel qnikʼ tiʼj tiʼ toklen chojbʼil kyukʼil oxe tichaq lu: 1) tuʼn tok tbʼi Jehová te xjan, 2) tukʼilju Tkawbʼil Dios ex 3) tuʼn tbʼant tajbʼil.

3. a) ¿Alqiʼj in yolin tbʼi Dios? b) ¿Alkye tten bʼaj ttzʼilsaʼn Satanás tbʼi Jehová?

³ Aju tnejil xi tqanin Jesús toj naʼj Dios kyaj t-xnaqʼtzaʼn, aju tuʼn tok tbʼi Dios te xjan. Toj juntl yol, xi tqanin tuʼn tok nimen tbʼi Dios tuʼnju xjan. Aju bʼibʼaj lu in yolin tiʼj Jehová ex in tzaj tchikʼbʼaʼn alkyexix qe tmod at. Aju Xjal mas nim tipumal at ex tzʼaqli twitz tkyaqil Txʼotxʼ. Tqʼama Jesús jlu tiʼj Jehová: «Aya xjan» (Juan 17:11). Ex tuʼnju xjan Jehová, tkyaqilju in bʼant tuʼn xjan, axpe ikx qeju tkawbʼil. Noqtzun tuʼnj, toj Edén yolin Satanás nya bʼaʼn tiʼj toklen Jehová tuʼn tkubʼ tqʼoʼn qe kawbʼil kyiʼj xjal. Tqʼama nya ax tok yol tiʼj Jehová ex bʼaj ttzʼilsaʼn tbʼi (Génesis 3:1-5).

4. ¿Alkye tten ok tbʼi Dios te xjan tuʼn Jesús?

⁴ Mintiʼ ok Jesús ik tzeʼn Satanás tuʼnju ok tkʼujlaʼn tbʼi Jehová. Tuʼntzunju, ok tilil tuʼn tuʼn tok te xjan (Juan 17:4, 25, 26). ¿Alkye tten ok tqʼoʼn te xjan? Tukʼil tbʼinchbʼen ex tukʼilju xi t-xnaqʼtzaʼn. Iktzun tten onin Jesús kyiʼj txqantl tuʼn tel kynikʼ tiʼj qa tzʼaqli qe tkawbʼil Jehová ex qa tkyaqilju in tzaj tqanin qe, te qex in che ajbʼen (kjawil uʼjit Salmo 40:8-10). Kukx ajbʼen Jesús te Jehová, maske ikʼ toj nim kʼixkʼoj tuʼn Satanás tej tkyim. Kubʼ tyekʼun qa jaku nimen jun xjal tzʼaqli te Jehová toj tkyaqil ambʼil.

5. ¿Alkye tten jaku tzʼok tbʼi Jehová te xjan quʼn?

⁵ Yajtzun qe, ¿alkye tten in kubʼ qyekʼun qa kʼujlaʼn tbʼi Jehová quʼn? Tukʼil qbʼinchbʼen. Taj Jehová tuʼn qok te xjan (kjawil uʼjit 1 Pedro 1:15, 16). Tuʼntzunju, oʼkx in qo kʼulin te ex in xi qnimen tuʼn tkyaqil qkʼuʼj. Ex qa in qo el ikʼun, in nok tilil quʼn tuʼn tkubʼ qbʼinchaʼn aju in tzaj t-xnaqʼtzaʼn Jehová qe. Aj in chex qbʼiʼn tkawbʼil, in jaw qnimsaʼn tbʼi (Mateo 5:14-16). Tuʼn jlu in kubʼ qyekʼun qa tbʼanel qe tkawbʼil ex qa nya ax tok yol in tqʼamaʼn Satanás. Ax tok, at maj in qo el txalpaj tuʼnju aj il qo. Noqtzun tuʼnj, in najtz tiʼj qanmi ex in nok tilil quʼn tuʼn miʼn tkubʼ qbʼinchaʼn alkyexku tiʼ jaku tzʼilsante tbʼi Jehová (Salmo 79:9).

6. ¿Tiquʼn jaku qo ok tqʼoʼn Jehová te tzʼaqli maske aj il qoʼ?

⁶ Qa skʼoʼn maj qoʼ moqa atoʼ kyxol txqantl ẍneʼl, in kubʼ tnajsaʼn Jehová qil qa at qʼuqbʼil qkʼuʼj tiʼj chojbʼil. In chex tkʼamoʼn Jehová qeju in najbʼen kychwinqlal kyuʼn tuʼn kyajbʼen te. In che ok tqʼoʼn Jehová qe okslal skʼoʼn maj te tzʼaqli ex te tkʼwaʼl. Ax ikx in che ok tqʼoʼn te tzʼaqli ex te tamiw qe txqantl ẍneʼl (Juan 10:16; Romanos 5:1, 2; Santiago 2:21-25). Noq tuʼn chojbʼil, ax ikx jaʼlo jaku ten jun tbʼanel qamiwbʼil tukʼil Qtat ex jaku tzʼok tbʼi te xjan quʼn.

7. ¿Alkyeqe kʼiwlabʼil che kbʼantel tuʼn Tkawbʼil Dios noq tuʼn chojbʼil?

⁷ Toj naʼj Dios kyaj t-xnaqʼtzaʼn Jesús, tqʼama jlu: «Ku ttzajju Tkawbʼila». ¿Tiʼ toklen chojbʼil tukʼil Tkawbʼil Dios? Ojtzqiʼn quʼn qa a Jesús ex qe 144,000 okslal o che jaw skʼoʼn kyxol xjal, che tel toj Tkawbʼil Dios. Noq tuʼn chojbʼil che jawil anqʼin xjal lu tuʼntzun kyxiʼ anqʼil toj kyaʼj (Apocalipsis 5:9, 10; 14:1). Atztzu, che okel te aj kawil ex te pal, ex che kawil tibʼaj Txʼotxʼ toj mil abʼqʼi junx tukʼil Jesús. Toj ambʼil aju, kʼajbʼel tkawbʼil Jehová tuʼn tuʼntzun tok Txʼotxʼ te jun tbʼanel najbʼil ex tuʼn tonin kyiʼj xjal tuʼn kyok te tzʼaqli. Iktzun tten che okel tmajen Jehová ateʼ  toj kyaʼj ex qeju ateʼ twitz Txʼotxʼ te junx ja (Apocalipsis 5:13; 20:6). Kbʼel tnajsaʼn Jesús Satanás ex kʼelel tiʼn tkyaqil nya bʼaʼn in tzaj (Génesis 3:15).

8. a) ¿Alkye tten onin Jesús kyiʼj t-xnaqʼtzbʼen tuʼn tel kynikʼ tiʼj qa nim toklen Tkawbʼil Dios? b) ¿Alkye tten in kubʼ qyekʼun qa in qo onin tiʼj Tkawbʼil Dios?

⁸ Onin Jesús kyiʼj t-xnaqʼtzbʼen tuʼn tel kynikʼ tiʼj qa nim toklen Tkawbʼil Dios. ¿Alkye tten bʼant tuʼn? Oʼkx tej tjaw aʼ twiʼ ok ten pakbʼal tiʼj «tqanil bʼaʼn tiʼj tkawbʼil Dios» noq jaxku tumel (Lucas 4:43). Ax ikx, xi tqʼamaʼn kye t-xnaqʼtzbʼen tuʼn kyxiʼ «tuj tkyaqil twitz txʼotxʼ» qʼamalte tqanil tiʼj (Hechos 1:6-8). Toj ambʼil jaʼlo, in xi tqʼoʼn pakbʼabʼil ambʼil tuʼn tel kynikʼ xjal tiʼ kʼiwlabʼil in tzaj tuʼn chojbʼil ex tuʼn kyanqʼin tjaqʼ Tkawbʼil Dios. Aj qpakbʼan, in kubʼ qyekʼun qa kukx in qo onin kyiʼj skʼoʼn maj tuʼn t-xi pakbʼet tbʼanel tqanil tiʼj Tkawbʼil Dios twitz tkyaqil Txʼotxʼ (Mateo 24:14; 25:40).

9. ¿Tiquʼn jaku tzʼok qeʼ qkʼuʼj tiʼj qa kjapunel twiʼ t-ximbʼetz Jehová at kyiʼj xjal?

⁹ Ax ikx tqʼama Jesús jlu: «Bʼant-xwitju tajbʼila». ¿Tiʼ tajtoq tuʼn ttzaj tqʼamaʼn? Aj ttzaj tqʼamaʼn Jehová qa kbʼajel jun tiʼ, atzun in bʼaj (Isaías 55:11). Mintiʼ o chʼexpaj tajbʼil Jehová noq tuʼnju el tpan tibʼ Satanás tiʼj. ¿Alkyetoq t-ximbʼetz Jehová attoq tiʼj Txʼotxʼ? Tajtoq tuʼn tnoj twitz kyuʼn tkʼwaʼl Adán tzʼaqli (Génesis 1:28). Noqwit e kyim Adán ex Eva tej naʼmxtoq tul kykʼwaʼl, mintiʼwtlo japun twiʼ t-ximbʼetz Jehová aju tuʼn tnoj twitz Txʼotxʼ kyuʼn xjal. Tuʼntzunju, xi tqʼoʼn Jehová ambʼil te Adán ex Eva tuʼn tul kykʼwaʼl. In xi tqʼoʼn chojbʼil ambʼil kye xjal at qʼuqbʼil kykʼuʼj tuʼn kyok te tzʼaqli ex tuʼn kyanqʼin te jumajx. Kʼujlaʼn qe xjal tuʼn Jehová ex taj tuʼn tten tbʼanel kyanqʼibʼil te jumajx ik tzeʼn kubʼ t-ximen tnejel.

10. ¿Alkye tten kʼonil chojbʼil kyiʼj xjal o che kyim?

¹⁰ O che kyim nim millón xjal ex mintiʼ o tzʼel kynikʼ tiʼj Jehová. ¿Tiʼ kbʼajel kyiʼj? Tuʼnju taj Jehová tuʼn kyanqʼin xjal, che jawil anqʼin tuʼn. Kbʼantel jlu noq tuʼn chojbʼil. Aj kyjaw anqʼin xjal, kxel qʼoʼn ambʼil kye tuʼn tel kynikʼ tiʼj Jehová ex tuʼn kyanqʼin te jumajx (Hechos 24:15). Tuʼnju a Jehová qʼol chwinqlal, kʼokel te Kytat kykyaqil qeju che kyjawil anqʼin (Salmo 36:9). Tuʼntzunju tqʼama Jesús toj naʼj Dios qa a Jehová Qman, aju at «toj kyaʼj» (Mateo 6:9, TNM). O txi tqʼoʼn Jehová toklen Jesús tuʼn kyjaw anqʼin kyimni tuʼn. Tuʼntzunju, tqʼama jlu: «Aqine qʼolte anqʼibʼl ex aqine qʼol chwinqlal» (Juan 6:40, 44; 11:25).

11. ¿Alkye t-ximbʼetz Jehová at kyiʼj «nimxix kyajlal xjal»?

¹¹ Ax ikx tqʼama Jesús jlu: «Alkyeju in tbʼinchaʼn tajbʼil Dios, atzun witzʼine, ex atzun wanbʼe, ex atzun ntxuʼye» (Marcos 3:35). Taj Jehová tuʼn kykʼulin xjal twitz te junxichaq tnam, kyyajil ex kyyol. In tzaj tqʼamaʼn Tyol Dios qa atzun xjal lu in che ok te «nimxix kyajlal» aju mintiʼ jun «jaku bʼant tajlante kye». Qʼuqli kykʼuʼj xjal lu tiʼj chojbʼil ex kyaj tuʼn kynimen te Jehová. Ax ikx in jaw kynimsaʼn te ex in kyqʼamaʼn: «Aju kolbʼil qe tuʼn Qdios aju qʼuql tuj tqʼuqbʼil jatum in kawin, ex tuʼnju Tal Ẍneʼl» (Apocalipsis 7:9, 10).

12. ¿Tiʼ xnaqʼtzbʼil in tzaj tqʼoʼn qe aju naʼj Dios kyaj t-xnaqʼtzaʼn Jesús tiʼj t-ximbʼetz Jehová at kyiʼj xjal?

 ¹² Aju naʼj Dios kyaj t-xnaqʼtzaʼn Jesús, in tzaj t-xnaqʼtzaʼn nim tiʼchaq tiʼj Jehová ex tiʼj t-ximbʼetz at kyiʼj xjal. Tnejel, in nel qnikʼ tiʼj qa kʼokel tilil quʼn tuʼn tbʼant alkyexku tiʼ quʼn tuʼntzun tok tbʼi Dios te xjan ex tuʼn tjaw nimset (Isaías 8:13). Noq tuʼn chojbʼil qo kletel ex in jaw tnimsaʼn tbʼi Dios. Ax ikx, «A Jehová Kolil» t-xilen tbʼi Jesús. Tkabʼ, in nel qnikʼ tiʼj qa kʼajbʼel Tkawbʼil Jehová tuʼn tuʼntzun ttzaj kykʼamoʼn xjal bʼaʼn che bʼin te qe kʼiwlabʼil tuʼn chojbʼil. Ex toxin, in nel qnikʼ tiʼj qa mintiʼ jun jaku kubʼ weʼ twitz Jehová tuʼn miʼn tbʼant tajbʼil (Salmo 135:6; Isaías 46:9, 10).

13. ¿Tiquʼn in jaw aʼ qwiʼ?

¹³ Jun tumel nim toklen tuʼn tkubʼ qyekʼun qa in xi qqʼoʼn chjonte tiʼj chojbʼil, aju qa ma qo ajbʼen te Jehová ex qa ma jaw aʼ qwiʼ. Iktzun tten kbʼel qyekʼun qa in xi qqʼoʼn chjonte tiʼj chojbʼil ex qa «te Qajaw [‹Jehová›, TNM] qoʼ» (Romanos 14:8). Ex aj tjaw aʼ qwiʼ, in xi qqanin te Jehová «tuʼn qanqʼin tuj tumelxix», moqa tuʼn tten tbʼanel qximbʼetz (1 Pedro 3:21). In qo tzaj ttzaqʼweʼn Jehová aj ttzaj tqʼoʼn qe kʼiwlabʼil qe, aju in bʼant tuʼn chojbʼil. Tuʼntzunju, qʼuqli qkʼuʼj tiʼj qa tzul tqʼoʼn tkyaqilju o tzaj ttziyen qe (Romanos 8:32).

14. ¿Tiquʼn in tzaj tqʼamaʼn Jehová tuʼn tok qkʼujlaʼn qe txqantl?

¹⁴ In bʼant tkyaqil tuʼn Jehová tuʼnju at tkʼujlabʼil. Ex taj tuʼn tel qkanoʼn tiʼj ex tuʼn tok qkʼujlan qibʼ qxolx (1 Juan 4:8-11). Aj tok qkʼujlaʼn qe xjal, in kubʼ qyekʼun qa qaj tuʼn qok te tkʼwaʼl Qtat «aju at tuj kyaʼj» (Mateo 5:43-48). Aju tnejel mandamyent mas nim toklen, aju tuʼn tok qkʼujlaʼn Jehová. Ex aju tkabʼin, tuʼn tok qkʼujlaʼn qe txqantl (Mateo 22:37-40). Jun tten tuʼn tkubʼ qyekʼun qkʼujlabʼil kyiʼj xjal, aju qa ma qo yolin tiʼj tbʼanel tqanil tiʼj Tkawbʼil Dios kyukʼil. Qa ma txi qnimen aju mandamyent tuʼn tok qkʼujlaʼn qe txqantl, mas qeju qerman, in «tzʼaqet-xix» qkʼujlabʼil tiʼj Jehová (1 Juan 4:12, 20).

15. a) ¿Alkyeqe kʼiwlabʼil in tzaj tqʼoʼn Jehová qe toj ambʼil jaʼlo? b) ¿Alkyeqe kʼiwlabʼil che ul qʼoʼn qe toj ambʼil tzul?

¹⁵ In tzaj ttziyen Jehová qe qa jaku kubʼ ‹tnajsaʼn qil› te jumajx qa ma ten qʼuqbʼil qkʼuʼj tiʼj chojbʼil (kjawil uʼjit Hechos 3:19-21). Ik tzeʼn ma qo xnaqʼtzan tiʼj, noq tuʼn chojbʼil in che ok tqʼoʼn Jehová junjun xjal te tkʼwaʼl tuʼntzun kyanqʼin toj kyaʼj. Aqe jlu, atzun qe okslal skʼoʼn maj (Romanos 8:15-17). Ax ikx in txoken Jehová kyiʼj txqantl ẍneʼl tuʼn kyten kyukʼil qe toj tja tzalu twitz Txʼotxʼ. Aj kyok okslal lu te tzʼaqli, che okel toj jun mankbʼil joybʼil. Qa kukx ma che ajbʼen te Jehová, che okel tqʼoʼn te tkʼwaʼl (Romanos 8:20, 21; Apocalipsis 20:7-9). Kukx che okel tkʼujlaʼn Jehová qe tkʼwaʼl. Ex noq tuʼn chojbʼil, kukx tzul qkʼamoʼn qe kʼiwlabʼil te jumajx (Hebreos 9:12). O tzaj tqʼoʼn Jehová aju tbʼanel oyaj lu qe ex mintiʼ jun jaku tzʼel qʼinte qe.

16. ¿Alkye tten in qo klet tuʼn chojbʼil?

¹⁶ Qa ma tzʼajtz tiʼj qanmi aj tkubʼ qbʼinchaʼn il, mlay bʼant jun tiʼ tuʼn Tajaw il tuʼn miʼn qten kyukʼil qe toj tja Jehová. «Noq junx maj kyim» Jesús. A t-xilen jlu qa nya il tiʼj tuʼn t-xi qʼet juntl maj chojbʼil (Hebreos 9:24-26). Kyaj tqʼoʼn Adán il qibʼaj, atzun te chojbʼil tzul tqʼoʼn qchwinqlal te jumajx. Jaku qo klet tuʼn chojbʼil tiʼj tkyaqilju tokx tjaqʼ tkawbʼil Satanás ex tuʼn miʼn qtzaj xobʼ te kamik (Hebreos 2:14, 15).

17. ¿Tiʼ in kubʼ qnaʼn aj qximen tiʼj nim tkʼujlabʼil Jehová at qiʼj?

¹⁷ Jaku tzʼok qeʼ qkʼuʼj tiʼj qa kjapunel twiʼ qe ttziybʼil Jehová. Iktzun mintiʼ in chʼexpaj ley tiʼj Txʼotxʼ, ax ikx te Jehová mlay chʼexpaj ex mlayx tzaj qbʼis tuʼn (Malaquías 3:6). Nya oʼkx in tzaj tqʼoʼn Jehová qchwinqlal, ax ikx in tzaj tyekʼun tkʼujlabʼil qiʼj. «Kyjaʼtzun nneʼl qnikʼ tiʼj tkʼujlalil Dios qiʼj ex ma txi qokslaʼn. Ate Dios at tkʼujlalil» (1 Juan 4:16). Tuʼnju kukx in che japun twi ttziybʼil Jehová, toj chʼintl ambʼil kʼokel Txʼotxʼ te jun tbʼanel najbʼil. Kykyaqil xjal kʼelel kykanoʼn tiʼj Jehová ex kʼokel kykʼujlan kyibʼ kyxolx. Tuʼntzunju, kykyaqil tmajen Jehová ateʼ toj kyaʼj ex twitz Txʼotxʼ ok kyqʼama jlu: «Qo yolin bʼaʼn tiʼj Qdios, qnimsaʼnktz tbʼi, qqʼonx chjonte te; qo niman te tuj tkyaqil tabʼqʼiyil te jumajx, qmanx oʼkxte at tnabʼl ex at tipumal ex at tipun te jumajx. Ikxwitju» (Apocalipsis 7:12).