1, 2. a) ¿Tiʼ o tzaj tyekʼun Jehová qe? b) ¿Alkye ttziybʼil Jehová in kanet quʼn toj Isaías 46:10, 11 ex 55:11?

IN TZYET tyolin Tyol Dios tiʼj jun txol yol nya kwest, noqtzun tuʼnj, nim t-xilen. In tzaj tqʼamaʼn: «T-xe tnejel kubʼ tbʼinchaʼn Dios kyaʼj ex txʼotxʼ» (Génesis 1:1). Noq junjun tiʼchaq ojtzqiʼn quʼn tiʼj nimku tiʼchaq o kubʼ tbʼinchaʼn Jehová. Noq chʼin ojtzqiʼn quʼn kyiʼj qeju tiʼchaq ik tzeʼn aju twitz kyaʼj, spikʼun ex tiʼj tipumal Txʼotxʼ (gravedad) (Eclesiastés 3:11). Noqtzun tuʼnj, o tzaj tqʼamaʼn Jehová tiʼ t-ximbʼetz at tiʼj Txʼotxʼ ex kyiʼj xjal. Kubʼ tbʼinchaʼn qe xjal ik tzeʼn tilbʼilal ex tajbʼiltoq tuʼn kyanqʼin twitz Txʼotxʼ toj tzalajbʼil (Génesis 1:26). Tuʼntoq kyok xjal te tkʼwaʼl, atzun te tuʼn toktoq te Kytat.

² Atzun toj capítulo 3 te Génesis in tzaj tqʼamaʼn qa tzaj jun nya bʼaʼn ex tuʼn jlu naʼmx tjapun twiʼ t-ximbʼetz Dios attoq tnejel (Génesis 3:1-7). Noqtzun tuʼnj, jaku kyaj toj ttxolil noq alkyexku nya bʼaʼn tuʼn Jehová. Mintiʼ jun jaku kubʼ weʼ twitz Jehová tuʼn miʼn tjapun twiʼ t-ximbʼetz (Isaías  46:10, 11; 55:11). Jaku tzʼok qeʼ qkʼuʼj tiʼj qa kjapunel twiʼ t-ximbʼetz Jehová attoq tnejel tojxix ambʼil ximen tuʼn.

3. a) ¿Alkyeqe xnaqʼtzbʼil nim toklen in nonin qiʼj tuʼn tel qnikʼ tiʼj tqanil in tzaj tqʼamaʼn Tyol Dios? b) ¿Tiquʼn qo xnaqʼtzal kyiʼj xnaqʼtzbʼil lu jaʼlo? c) ¿Alkyeqe xjel qo xnaqʼtzal kyiʼj?

³ Ojtzqiʼnlo quʼn alkye t-ximbʼetz Dios at tiʼj Txʼotxʼ ex kyiʼj xjal. Ax ikx ojtzqiʼn quʼn alkye tten in nonin Jesús tuʼn tjapun twiʼ t-ximbʼetz Jehová. Nim kyoklen xnaqʼtzbʼil lu tiʼj Tyol Dios. Bʼalo aʼye jlu el qnikʼ kyiʼj tnejel tej ttzaj tzyet qxnaqʼtzbʼil tiʼj Tyol Dios. Ex qajbʼil tuʼn qonin kyiʼj txqantl tuʼn tel kynikʼ kyiʼj jlu. Toj abʼqʼi lu at ambʼil qe tuʼn tbʼant quʼn tuʼnju in qo txoken kyiʼj xjal tuʼn kyul toj Nabʼitz Tkyimlen Jesucristo (Lucas 22:19, 20). Qa ma che pon qukʼil toj ambʼil nim toklen lu, ok kʼelel mas kynikʼ tiʼjju t-ximbʼetz Dios at. Tuʼntzunju, atzun ambʼil tuʼn qximen kyiʼj junjun xjel jaku che onin kyiʼj xjal tuʼn kypon. Toj xnaqʼtzbʼil lu qo xnaqʼtzal kyiʼj oxe xjel lu: ¿Tiʼtoq t-ximbʼetz Dios at tiʼj Txʼotxʼ ex kyiʼj xjal? ¿Tiʼ nya bʼaʼn tzaj? Ex, ¿tiquʼn nim toklen chojbʼil bʼant tuʼn Jesús tuʼntzun tjapun twiʼ t-ximbʼetz Dios?

4. ¿Tiquʼn in tzaj tqʼamaʼn Tyol Dios qa in jaw nimsaʼn Jehová kyuʼn tiʼchaq o che kubʼ tbʼinchaʼn?

⁴ A Jehová bʼinchalte qe tbʼanel tiʼchaq. Tbʼanelxix tkyaqilju o bʼant tuʼn (Génesis 1:31; Jeremías 10:12). ¿Tiʼ xnaqʼtzbʼil in tzaj tqʼoʼn qe alkye tten bʼinchabʼin kye ex aj tok qkeʼyin qa nukʼun kyten? Qa tkyaqilju o bʼant tuʼn Jehová at tajbʼen qe, axpe ikx qe tiʼchaq mas tal chʼin ex qeju mas matij. ¿Nyape ax tok in qo jaw labʼin tiʼj alkye tten in naqʼunan qcélula, aj tul itzʼj jun neʼ, moqa tal neʼẍ, ex aj tok qqʼoʼn qwitz tiʼj aj tkux bʼaj Qʼij? Jaku qo jaw tzalaj kyiʼj tbʼanel tiʼchaq tuʼnju o qo kubʼ tbʼinchaʼn Jehová tuʼn tkubʼ qnaʼn jlu (kjawil uʼjit Salmo 19:1 ex 104:24).

5. ¿Tiʼ o bʼant tuʼn Jehová tuʼntzun taqʼunan tkyaqil tchʼisbʼen toj tumelxix ik tzeʼnx taj?

⁵ Ok tqʼoʼnxix Jehová twiʼ tiʼj tej tkubʼ tqʼoʼn qe kawbʼil kyiʼj tchʼisbʼen. Kubʼ tqʼoʼn ley tiʼj tkyaqilju at ex qe kawbʼil kyiʼj xjal, tuʼntzun tten tkyaqil toj tbʼanel ex tzeʼnx tajbʼil Jehová (Salmo 19:7-9). Xi tqʼoʼn Jehová taqʼun teyelex te junjun tiʼchaq ex jatumel tuʼn tten. Jun techel, aju ley tiʼj gravedad in nonin tuʼn miʼn tel laqʼeʼ atmósfera tiʼj Txʼotxʼ ex tuʼn t-xqʼuqin tiʼj mar. Qa mintiʼ gravedad, mlay ten chwinqlal twitz Txʼotxʼ. Tkyaqilju o kubʼ tbʼinchaʼn Dios in naqʼunan toj ttxolil tuʼnju nukʼun kyten tuʼn ex o che kubʼ tqʼoʼn toj jun kylugar. A jlu in tzaj tyekʼun qa at jun tiquʼn o kubʼ tbʼinchaʼn Jehová Txʼotxʼ ex qe xjal. Aj qpakbʼan kye xjal, jaku qo onin kyiʼj tuʼn tok kyojtzqiʼn aju Bʼinchal tkyaqil (Apocalipsis 4:11).

6, 7. ¿Alkye junjun oyaj xi tqʼoʼn Jehová kye Adán ex Eva?

⁶ Aju t-ximbʼetz Jehová attoq kyiʼj xjal, aju tuʼn kyanqʼin te jumajx twitz Txʼotxʼ (Génesis 1:28; Salmo 37:29). Tuʼnju at nim tkʼujlabʼil, xi tqʼoʼn nim oyaj kye Adán ex Eva (kjawil uʼjit Santiago 1:17). Jun techel, xi tqʼoʼn ambʼil kye tuʼn tjaw kyjyoʼn tiʼ tuʼn tbʼant kyuʼn, tuʼn tbʼant kyximen, tuʼn tten kykʼujlabʼil ex tuʼn tten kyamiw. Xi tqʼamaʼn Jehová  te Adán alkye tten jaku kubʼ tbʼinchaʼn aju bʼaʼn. Axpe ikx xi t-xnaqʼtzan Jehová te alkye tten jaku tzʼok t-xqʼuqin tibʼ, tuʼn taqʼunet txʼotxʼ tuʼn ex tuʼn tok tkwentin qe txkup (Génesis 2:15-17, 19, 20). E kubʼ tbʼinchaʼn Jehová Adán ex Eva tuʼn kymakon, tuʼn kykeʼyin, tuʼn ttzaj kygan tiʼj jun tiʼ, tuʼn kybʼin ex tuʼn t-xi kysqoʼn qe tbʼanel tiʼchaq. Iktzun tten jaku che tzalaj tiʼj kyanqʼibʼil toj kynajbʼil otoq txi qʼoʼn. Ax ikx xi tqʼoʼn Jehová nim tbʼanel kyaqʼun. Kukxtoq tuʼn tel kynikʼ Adán ex Eva kyiʼj tiʼchaq akʼaj.

⁷ ¿Tiʼ mastl ximen tuʼn Jehová tuʼn tbʼant? Ax ikx xi tqʼoʼn Jehová ambʼil tuʼn tten kykʼwaʼl Adán ex Eva tzʼaqli. Ax ikx tuʼn tul kykʼwaʼl qe kykʼwaʼl. Iktzun tten tuʼn tnoj twitz Txʼotxʼ kyuʼn xjal. Tajbʼiltoq Jehová tuʼn tok kykʼujlaʼn mambʼaj qe kykʼwaʼl ik tzeʼnx te otoq che ok tkʼujlaʼn qe tnejel xjal, Adán ex Eva. Xi tqʼoʼn Jehová Txʼotxʼ kye xjal, tkyaqil tiʼchaq tbʼanel ex nim kyoklen attoq twitz. Ex atzun tuʼn kyanqʼin te jumajx (Salmo 115:16).

8. ¿Tiquʼn xi tqʼoʼn Jehová aju kawbʼil tkuʼx toj Génesis 2:16, 17 te Adán ex Eva?

⁸ Mintiʼ bʼant ik tzeʼn otoq kubʼ t-ximen Jehová. ¿Tiʼ bʼaj? Qo xnaqʼtzan tiʼj. Xi tqʼoʼn Jehová jun kawbʼil nya kwest kye Adán ex Eva tuʼn tel kynikʼ tiʼj qa mlay bʼant tkyaqil kyuʼn. Tqʼama: «Bʼaʼn t-xi tloʼna twitz tkyaqil tzeʼ at tuj tqan awal; atzunju twitz tzeʼ tuʼn tel nikʼbʼaj tiʼj bʼaʼn ex tiʼj mya bʼaʼn, miʼn txi tloʼna; qatzun ma txi tloʼna, ax tok kymela» (Génesis 2:16, 17). Nyatoq kwest tuʼn tel kynikʼ tiʼj kawbʼil lu. Axpe ikx nya kwest tuʼn t-xi kybʼiʼn, tuʼnju attoq nim wiq awal toj tbʼanel najbʼil ex jakutoq txi kywaʼn twitz.

9, 10. a) ¿Tiʼ nya bʼaʼn yol tqʼama Satanás tiʼj Jehová? b) ¿Tiʼ kubʼ kyximen Adán ex Eva tuʼn tbʼant kyuʼn? (Qʼonka twitza tiʼj tnejel tilbʼilal).

⁹ Ajbʼen jun lobʼaj, moqa kan, tuʼn Satanás tuʼntzun t-sbʼun tiʼj Eva ex tuʼn miʼn t-xi tbʼiʼn Jehová, aju Ttat (kjawil uʼjit Génesis 3:1-5; Apocalipsis 12:9). Axpe ikx ok tqʼoʼn qa nya bʼaʼn aju mintiʼ in tzaj tqʼoʼn Jehová ambʼil tuʼn kywan xjal tiʼj tkyaqil kywitz «tzeʼ at tuj tqan awal». Ik tten jlu ik tzeʼn xi tqʼamaʼn kye: «¿Tiquʼn mlay bʼant aju kyeye kyajbʼil?». Yajxitl tqʼama nya ax tok yol lu te Eva: «Ojtzqiʼn tuʼn Dios, ok t-xi kyloʼne twitz tzeʼ lu, kjaqetel kynabʼle», moqa kywitze. Kyuʼn yol lu, tqʼama Satanás qa nyatoq taj Jehová tuʼn t-xi kyloʼn Adán ex Eva twitz tzeʼ, tuʼnju qa ma txi kyloʼn, jakutoq ten kyojtzqibʼil nimxix toklen. Yajxitl tqʼama Satanás nya ax tok yol lu: «Che okele ik tzaʼn te Dios ex kʼelel kynikʼe tiʼj bʼaʼn ex tiʼj mya bʼaʼn».

¹⁰ Iltoq tiʼj tuʼn tkubʼ kyximen Adán ex Eva qa tuʼn t-xi kybʼiʼn Jehová moqa tuʼn t-xi kybʼiʼn aju tzaj tqʼamaʼn lobʼaj. Aju bʼant kyuʼn mintiʼ xi kybʼiʼn Jehová. El kyikʼun Jehová ex ya nya kyajbʼiltoq tuʼn tok te Kytat. Iktzun tten xi kybʼiʼn Satanás. Toj ambʼil aju, e kyaj ten kyjunalx ex xi kynajsaʼn aju in tzajtoq tqʼoʼn Jehová kye (Génesis 3:6-13).

11. ¿Tiquʼn mintiʼ kubʼ tnajsaʼn Jehová til Adán ex Eva?

¹¹ Tej mintiʼ xi kybʼiʼn Adán ex Eva tkawbʼil Jehová, ya mintiʼ e ok te tzʼaqli. E ok te taj qʼoj Dios, tuʼnju in nel tikʼun Jehová aju nya bʼaʼn. In tzaj tqʼamaʼn  Tyol Dios qa xjanxix twitz ex ‹mintiʼ in tzalaj tiʼjju mya bʼaʼn› (Habacuc 1:13). Noqwit mintiʼ kubʼ tqʼoʼn Jehová kykastiw Adán ex Eva, tuʼn jlu jakutoq tzaj nya bʼaʼn tiʼj tkyaqil tbʼinchbʼen. Jakulo kubʼ kyxjelen anjel ex qe xjal qa jaku tzʼok qeʼ kyuʼj tiʼjju in tzaj tqʼamaʼn. Tuʼnju in japun tuʼn Jehová aʼyeju tkawbʼil, kukx in japun tuʼn (Salmo 119:142). Maske attoq ambʼil kye Adán ex Eva tuʼn tkubʼ kyximen aju kbʼantel kyuʼn, iltoq tiʼj tuʼn ttzaj nya bʼaʼn kyiʼj qa mintiʼ ma txi kybʼiʼn Jehová. Tej tbʼet ambʼil, e kyim ex e ok juntl maj te quq (Génesis 3:19).

12. ¿Tiʼ tzaj kyiʼj qeju tkʼwaʼl Adán?

¹² Tej t-xi kyloʼn Adán ex Eva twitz tzeʼ, ya mintiʼ xi tqʼoʼn Jehová ambʼil kye tuʼn kukx tten kyoklen kyukʼil toj tja. Tuʼntzunju, i eʼx tiʼn toj Edén ex mintiʼ xi tqʼoʼn ambʼil tuʼn kymeltzʼaj (Génesis 3:23, 24). Bʼant tuʼn Jehová tuʼn kyok weʼ twitz nya bʼaʼn tuʼnju otoq bʼant kyuʼn (kjawil uʼjit Deuteronomio 32:4, 5). Aju tzaj tuʼn jlu ya mintiʼ e ten qe kymod ik tzeʼn te Jehová tmod. Xi tnajsaʼn Adán aju tbʼanel tuʼn ttzaj te ex kye tkʼwaʼl. Oʼkx kyaj tqʼoʼn il ex kamik kyibʼaj (Romanos 5:12). Xi tnajsaʼn Adán ambʼil kye qe tkʼwaʼl tuʼn kyanqʼin te jumajx. Ya mlaytoq ten kykʼwaʼl Adán ex Eva tzʼaqli ax ikx kye kykʼwaʼl. Atxix tej tel tpaʼn Satanás Adán ex Eva tiʼj Jehová, kukx in nok tilil tuʼn tuʼn tbʼant ax jlu kyuʼn xjal (Juan 8:44).

13. ¿Tiʼ kukx taj Jehová kye xjal?

¹³ Maske kyaj kytzaqpin Adán ex Eva Jehová, kukxtoq kʼujlaʼn qe xjal tuʼn. Kukx tajtoq Jehová tuʼn kyok xjal te tamiw ex nya tajtoq tuʼn kykyim (2 Pedro 3:9). Tuʼntzunju, lwey bʼant jun tiʼ tuʼn tuʼntzun kyok xjal te tamiw. ¿Alkye tten bʼant tuʼn ex mintiʼ kubʼ tchʼexpuʼn qe tkawbʼil? Qo xnaqʼtzan tiʼj.

14. a) Ik tzeʼn in tzaj tqʼamaʼn Juan 3:16, ¿tiʼ bʼant tuʼn Jehová tuʼn qetz tiʼn tjaqʼ il ex kamik? b) ¿Alkye xjel jaku kubʼ qxnaqʼtzaʼn kyukʼil xjal?

¹⁴ (Kjawil uʼjit Juan 3:16). Aju versículo lu, tokxlo toj kywiʼ junjun xjal che tzajel qtxkoʼn toj Nabʼitz Tkyimlen Jesucristo. Noqtzun tuʼnj, ¿ojtzqiʼnpe kyuʼn xjal tiquʼn jaku tzaj tqʼoʼn chojbʼil bʼant tuʼn Jesús qchwinqlal te jumajx? Jaku qo onin kyiʼj xjal tuʼn tel kynikʼ tiʼj tzaqʼwebʼil tiʼj xjel lu. ¿Jtoj? Aj t-xi qqʼoʼn txokbʼil kye tuʼn kypon toj Nabʼitz Tkyimlen Jesucristo, aj kypon toj qʼij lu ex aj qmeltzʼaj visitaril kye. Qa in nel kynikʼ tiʼj tiʼ t-xilen chojbʼil bʼant tuʼn Jesús, ok kʼelel kynikʼ tiʼj jniʼ kʼujlaʼn qo tuʼn Jehová ex aju tnabʼil at. ¿Alkye junjun xnaqʼtzbʼil tiʼj chojbʼil bʼant tuʼn Jesús jaku qo yolin tiʼj kyukʼil?

15. ¿Tiquʼn ok Jesús junxitl twitz Adán?

 ¹⁵ Tzaj tqʼoʼn Jehová tchwinqlal jun xjal tzʼaqli tuʼn qklet. Aju xjal lu, iltoq tiʼj tuʼn kukx tajbʼen te Jehová ex tuʼn t-xi tqʼoʼn tchwinqlal kyiʼj xjal (Romanos 5:17-19). Ok tqʼoʼn Jehová tanqʼibʼil Tkʼwaʼl, aju tnejel tbʼinchbʼen, toj talbʼil María tuʼn tul itzʼji tzalu twitz Txʼotxʼ (Juan 1:14). Iktzun tten ok Jesús te tzʼaqli ik tzeʼn te Adán tnejel. Noqtzun tuʼnj, junxitl ok Jesús twitz Adán. ¿Tiquʼn? Tuʼnju xi tbʼiʼn qe tkawbʼil Dios ik tzeʼn tajbʼil tuʼn tbʼant tuʼn jun xjal tzʼaqli. Maske ok weʼ Jesús twitz nim joybʼil, kukx xi tbʼiʼn qe tkawbʼil Dios.

16. ¿Tiquʼn jun oyaj nim toklen aju chojbʼil bʼant tuʼn Jesús?

¹⁶ Tej t-xi tqʼoʼn Jesús tchwinqlal tzʼaqli qiʼj qkyaqilx, o etz tkloʼn tiʼj il ex kamik. Ok ik tzeʼn tuʼntoq tok Adán. Ok te tzʼaqli ex kubʼ tyekʼun qa kukx ajbʼen ex kukx xi tbʼiʼn te Jehová (1 Timoteo 2:6). Tuʼnju chojbʼil bʼant tuʼn, in tzaj qʼoʼn ambʼil kye xinaq, xuʼj ex kʼwaʼl tuʼn kyanqʼin te jumajx (Mateo 20:28). Ik tzeʼn in nel qnikʼ tiʼj, nimxix toklen chojbʼil bʼant tuʼn Jesús tuʼntzun tjapun twiʼ t-ximbʼetz Dios (2 Corintios 1:19, 20).

17. ¿Tiʼ tbʼanel in tzaj qe tuʼnju chojbʼil bʼant tuʼn Jesús?

¹⁷ Tzaj tqʼoʼn Jehová jun chojbʼil matijxix tuʼntzun qklet tuʼn (1 Pedro 1:19). Nimxix qoklen toj twitz Jehová tuʼnju tzaj tqʼoʼn Tkʼwaʼl kʼujlaʼnxix tuʼn tuʼn tkyim tuʼn qpaj (1 Juan 4:9, 10). Toj juntl yol, ok Jesús te t-xel Adán ex ok te qtat (1 Corintios 15:45). Tukʼilju chojbʼil  bʼant tuʼn Jesús, nya oʼkx in tzaj tqʼoʼn ambʼil qe tuʼn qanqʼin te jumajx. Ax ikx in tzaj tqʼoʼn ambʼil qe tuʼn qmeltzʼaj kyukʼil qe toj tja Dios toj ambʼil tzul. Noq tuʼnju chojbʼil bʼant tuʼn, qo okel te tzʼaqli ex qo xel tkʼamoʼn Jehová juntl maj kyukʼil qe toj tja, ex kukx che japunel qe tkawbʼil. Qo ximen tiʼj tbʼanel ambʼil aj kyoj kykyaqil xjal kukx in che ajbʼen te Dios te tzʼaqli. Tojtzun ambʼil lu, kykyaqil qeju at kychwinqlal toj kyaʼj ex twitz Txʼotxʼ che okel te junx ja xjal. Qkyaqilx qo okel te tkʼwaʼl Dios (Romanos 8:21).

18. ¿Toj alkye ambʼil kʼokel «toklen Dios tibʼaj tkyaqil»?

¹⁸ Maske el kyikʼun qe tnejel qtat te Jehová, noqtzun tuʼnj, kukx ok tkʼujlaʼn qe xjal. Tuʼntzunju, tzaj tqʼoʼn tchwinqlal Tkʼwaʼl tuʼntzun qklet tuʼn. Maske aj il qoʼ, mlay qo ok t-obligarin Satanás tuʼn miʼn qnimen te Jehová. Kʼajbʼel chojbʼil tuʼn Jehová tuʼn tonin qiʼj tuʼn qok te tzʼaqlixix. Tbʼanelxix kʼokel ambʼil aj tten kychwinqlal te jun majx kykyaqil qeju in xi kykʼamoʼn ex in nok qeʼ kykʼuʼj tiʼj Jesús (Juan 6:40). Aju Qtat Jehová, aju at tkʼujlabʼil ex tnabʼil, kjapunel twiʼ t-ximbʼetz ex kʼonil kyiʼj xjal tuʼn kyok te tzʼaqli. Iktzun tten kʼokel «toklen Dios tibʼaj tkyaqil» (1 Corintios 15:28).

19. a) ¿Tiʼ kbʼantel quʼn qa in xi qqʼoʼn chjonte tiʼjju chojbʼil bʼant tuʼn Jesús? (Qʼonka twitza tiʼj recuadro, « Kukx qo jyon kyiʼj xjal kyaj tuʼn tel kynikʼ tiʼj Jehová»). b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁹ Qa in xi qqʼoʼn chjonte tiʼjju chojbʼil bʼant tuʼn Jesús, qo yolil tiʼj oyaj lu kyukʼil txqantl. Il tiʼj tuʼn tel kynikʼ xjal tiʼj qa noq tuʼn chojbʼil tzul tqʼoʼn Jehová kychwinqlal te jumajx tukʼil kʼujlabʼil. Noqtzun tuʼnj, nya oʼkx in tzaj tqʼoʼn chojbʼil ambʼil qe tuʼn qanqʼin te jumajx. Ax ikx in tzaj tqʼoʼn tzaqʼwebʼil kyiʼj qe yol tqʼama Satanás toj Edén. Toj juntl xnaqʼtzbʼil qo xnaqʼtzal tiʼj alkye tten in tzaj tqʼoʼn chojbʼil tzaqʼwebʼil kyiʼj yol lu.