Qa ma tzaj tzaqʼweʼn qe, ikju, ¿tiʼ jaku kubʼ qnaʼn? Qo ximen tiʼj jun techel. Kubʼ tbʼyon tibʼ tkʼwaʼl jun erman ex tzaj nim tbʼis tuʼn jlu. Kubʼ t-xjelin erman qa ya ojtzqiʼntoq tuʼn Jehová aju tuʼn tbʼaj ex qa otoq kubʼ t-ximen qa jaku tzikʼx bʼis lu tuʼn tukʼil t-xuʼjil. Bʼisbʼajilx tuʼnju in qo anqʼin jatumel in tzaj nim nya bʼaʼn qiʼj. Noqtzun tuʼnj, ¿bʼaʼnpe tuʼn tkubʼ qximen qa tuʼn Jehová in nikʼ tkyaqil jlu qiʼj?

Qa ma qo xnaqʼtzan tiʼjju in tzaj tqʼamaʼn 1 Corintios 10:13, kʼelel qnikʼ tiʼj qa mintiʼ in tzaj t-xnaqʼtzaʼn Xjan Uʼj qa tnejel in kubʼ t-ximen Jehová jniʼ jaku tzikʼx quʼn ex qa yajxitl in kubʼ t-ximen alkye joybʼil tuʼn ttzaj qiʼj. Qo xnaqʼtzan tiʼj kyaje tiquʼn in xi qqʼamaʼn jlu.

Aju tnejel tiquʼn, aju o tzaj tqʼoʼn Jehová ambʼil qe tuʼn tkubʼ qximen tiʼ kbʼantel quʼn. Taj Jehová tuʼn awoʼx tuʼn qximen tiʼj tiʼ kbʼantel quʼn (Deuteronomio 30:19, 20; Josué 24:15). Qa ma kubʼ qbʼinchaʼn aju bʼaʼn, jaku tzʼok qeʼ qkʼuʼj tiʼj qa tzul tonin Jehová qoʼ (Proverbios 16:9). Noqtzun tuʼnj, qa ma kubʼ qbʼinchaʼn aju nya bʼaʼn, ax ikx tzul nya bʼaʼn qiʼj (Gálatas 6:7). Noqwit a Jehová in kubʼ ximen alkyeqe joybʼil che ul qiʼj, ¿jakupe txi qqʼamaʼn qa at tzoqpibʼil qe tuʼn tjaw qjyoʼn tiʼ kbʼantel quʼn?

Aju tkabʼin tiquʼn, mintiʼ in xqʼuqin Jehová qiʼj tiʼjju «noq minabʼen in tzaj», moqa aju mintiʼ ojtzqiʼn quʼn tuʼn tbʼaj (Eclesiastés 9:12). Jaku tzaj nya bʼaʼn qiʼj noq tuʼnju atoʼ toj nya bʼaʼn tembʼil ex qa ambʼil. Yolin Jesús tiʼj jun nya bʼaʼn tzaj jatumel e kyim 18 xjal tej tikʼ tzʼaq jun torre. Kyaj tqʼamaʼn qa nya tuʼn Jehová otoq che kyim xjal lu (Lucas 13:1-5). Tuʼntzunju, nya bʼaʼn tuʼn tkubʼ qximen qa a Jehová in kubʼ ximen alkye kʼanqʼil ex alkye kkyimel naʼmxtoq ttzaj jun aksident.

Aju toxin tiquʼn, teyele junjun qe il tiʼj tuʼn tkubʼ tyekʼun qa kukx kʼajbʼel te Jehová. Tqʼama Tajaw il qa in qo ajbʼen te Jehová noq tuʼnju in tzaj tqʼoʼn qe tiʼchaq qe ex qa ya mlay qo ajbʼen te qa ma qo ok weʼ kywitz joybʼil (Job 1:9-11; 2:4; Apocalipsis 12:10). Noqwit in qo ok t-xqʼuqin Jehová kyiʼj joybʼil, jakulo txi qqʼamaʼn qa ax tok tyol Satanás.

Aju tkyajin tiquʼn, in kubʼ t-ximen Jehová tuʼn miʼn tok tbʼiʼn aju kbʼajel qiʼj toj ambʼil tzul. Ax tok, qa taj tuʼn tok tbʼiʼn aju kbʼajel, jaku bʼant tuʼn (Isaías 46:10). Noqtzun tuʼnj, in tzaj tqʼamaʼn Xjan Uʼj qa at qe tiʼchaq che kbʼajel toj ambʼil tzul, in kubʼ t-ximen Jehová tuʼn miʼn tok tbʼiʼn (Génesis 18:20, 21; 22:12). ¿Tiquʼn? Tuʼnju at tkʼujlabʼil ex tzʼaqli, ex in nok tnimen aju tzoqpibʼil o tzaj tqʼoʼn qe tuʼn tkubʼ qximen tiʼ kbʼantel quʼn (Deuteronomio 32:4; 2 Corintios 3:17, TNM).

Qa ikju, ¿alqiʼj yolin Pablo tej tqʼama qa mlay tzaj tqʼoʼn Jehová ambʼil tuʼn qikʼ toj joybʼil, aju mlay tzikʼx quʼn? Kyukʼil yol lu, yolin Pablo tiʼj alkye tten in qo tzaj tonin Jehová aj qikʼ toj jun nya bʼaʼn, ex nya tiʼjju in bʼant tuʼn naʼmxtoq ttzaj nya bʼaʼn qiʼj. Qa qʼuqli qkʼuʼj tiʼj Jehová, kʼonil qiʼj tuʼn tikʼx noq alkyexku nya bʼaʼn quʼn (Salmo 55:22). Atzun jaʼlo, qo xnaqʼtzan tiʼj kabʼe tiquʼn tqʼama Pablo qa mlay tzaj tqʼoʼn Jehová ambʼil tuʼn qikʼ toj joybʼil, aju mlay tzikʼx quʼn.

Aju tnejel tiquʼn tqʼama Pablo, aju qa noq alkyexku joybʼil in tzaj qiʼj «axju in tzaj kyiʼj kykyaqil xjal». A t-xilen jlu qa il tiʼj tuʼn kytzaj nya bʼaʼn qiʼj tuʼnju a Satanás in kawin. Qkyaqilx qo ikʼel toj jun joybʼil, axpe ikx jaku tzaj nya bʼaʼn qiʼj. Noqtzun tuʼnj, qa qʼuqli qkʼuʼj tiʼj Jehová, jaku che ikʼx nya bʼaʼn quʼn ex kukx jaku qo ajbʼen te  (1 Pedro 5:8, 9). Kyoj junjun versículo naʼmxtoq qkuʼpin tiʼj 1 Corintios 10:13, yolin Pablo tiʼj junjun joybʼil tzaj kyiʼj aj Israel tej kyten toj tzqij txʼotxʼ (1 Corintios 10:6-11). Aʼyeju aj Israel ok qeʼ qkʼuʼj tiʼj Jehová, ikʼx qe joybʼil kyuʼn. Atzun qeju mintiʼ ok qeʼ kykʼuʼj tiʼj, mintiʼ e nimen te ex mintiʼ e ajbʼen te.

Aju tkabʼin tiquʼn tqʼama Pablo, aju qa jaku tzʼok qeʼ «qkʼuʼj tiʼj» Dios. ¿Tiʼ t-xilen jlu? Qa ma qo ximen tiʼj alkye tten o kolin Jehová kyiʼj tmajen, kʼelel qnikʼ tiʼj qa jaku tzʼok qe qkʼuʼj tiʼj ex qa kʼonil kyiʼj qeju «in che kʼujlante te ex in che japun qe tmandamyent kyuʼn» (Deuteronomio 7:9). Ax ikx, in japun tuʼn Jehová tkyaqilju in tzaj ttziyen (Josué 23:14). Tuʼntzunju, jaku tzʼok qe qkʼuʼj tiʼj kabʼe tiʼ. Tnejel, mlay tzaj tqʼoʼn Jehová ambʼil tuʼn qikʼ toj jun joybʼil, aju mlay tzikʼx quʼn. Ex tkabʼin, tzul tyekʼun Jehová «jun tumel» tzeʼn tten tuʼn qex toj jun joybʼil.

¿Alkye tten in tzaj tyekʼun Jehová «jun tumel» qe qa ma tzʼok qe qkʼuʼj tiʼj? Ax tok, jaku tzʼel tiʼn joybʼil qiʼj. Noqtzun tuʼnj, tqʼama Pablo qa tzul tyekʼun Jehová «jun tumel» qe tuʼn tikʼx quʼn. Tuʼn jlu in nel qnikʼ tiʼj qa kukx in tzaj tyekʼun Jehová jun tumel qe aj ttzaj tqʼoʼn qipumal tuʼn kukx qajbʼen te. In tzaj tqʼoʼn qipumal toj junxichaq tten. Qo xnaqʼtzan tiʼj junjun.

• «In tqʼuqbʼaʼn Dios qkʼuʼj tuj tkyaqil yajbʼil qe» aj ttzaj jun joybʼil qiʼj (2 Corintios 1:3, 4). Jaku tzaj tqʼuqbʼaʼn Jehová qkʼuʼj ex qximbʼetz tuʼn tonbʼil Xjan Uʼj, xewbʼaj xjan ex tuʼn majen in bʼant taqʼun (Mateo 24:45; Juan 14:16; Romanos 15:4).

• Jaku tzaj tyekʼun Jehová qbʼe tuʼn tonbʼil xewbʼaj xjan (Juan 14:26). Jaku tzʼonin xewbʼaj xjan qiʼj tuʼn ttzaj qnaʼn qe txʼolbʼabʼil ex junjun nabʼil tkuʼx toj Tyol Dios, aʼyeju che onil qiʼj tuʼn tjaw qjyoʼn tbʼanel qbʼe.

• Jaku che ajbʼen anjel tuʼn Jehová tuʼn tonin qiʼj (Hebreos 1:14).

• Jaku che ajbʼen qe erman tuʼn Jehová tuʼn tonin qiʼj. In tzaj kyqʼuqbʼaʼn erman qkʼuʼj aj kybʼincha xtalbʼil qiʼj ex aj ttzaj kyqʼamaʼn tbʼanel kyyol qe (Colosenses 4:11).

Tuʼn tkubʼ bʼaj, ¿tiʼ in tzaj t-xnaqʼtzaʼn qe aʼyeju yol kyaj tqʼamaʼn Pablo toj 1 Corintios 10:13? In nel qnikʼ tiʼj qa nya a Jehová in jaw jyonte qe joybʼil in che tzaj qiʼj. Ax ikx in nel qnikʼ tiʼj qa ma tzʼok qe qkʼuʼj tiʼj, jaku tzikʼx noq alkyexku joybʼil quʼn. Kukx tzul tyekʼun Jehová jun tumel tuʼn tikʼx joybʼil quʼn tuʼntzun kukx qajbʼen te.