1, 2. ¿Tiquʼn il tiʼj tuʼn qyolin tiʼjju alkye tten kxel qqʼuqbʼaʼn kykʼuʼj qeju o kyim jun toj kyja? (Qʼonka twitza tiʼj tnejel tilbʼilal).

TQʼAMA jun ermana Susi tbʼi: «Tej otoqxi kyim jun wale, chʼixmi jun abʼqʼi kubʼ qnaʼne nim bʼis». Ex tzaj tqʼamaʼn juntl erman qa kubʼ tnaʼn «kʼixkʼoj tiʼj t-xmilal, aju mlay bʼant tchikʼbʼet tuʼn» tej noq minabʼen kyim t-xuʼjil. Bʼisbʼajil tuʼnju nim xjal in che ikʼ toj ambʼil ik tzeʼn jlu. Ateʼ nim tmajen Jehová mintiʼ ximen kyuʼn qa tuʼn tkyim jun toj kyja akux in pon ambʼil tuʼn tul Armagedón. Qa o kyim jun teya toj tja ex qa jun tamiwe, moqa te jun xjal ojtzqiʼn twitz tuʼna, jakulo kubʼ t-xjelina jlu: «¿Alkye onbʼil jaku txi qqʼoʼn aj tbʼaj jlu?».

² Olo tzʼok qbʼiʼn qe yol qa aj tbʼet ambʼil chebʼe in nel bʼis tiʼj qanmi. Noqtzun tuʼnj, ¿tkyaqilpe maj in bʼaj ikju? Tqʼama jun ermana o kyim tchmil: «Aju mas bʼaʼn tuʼn t-xi qʼamet toj nwitze, aju qa chebʼe in nel bʼis tiʼj qanmi kyuʼn tiʼchaq in che bʼant quʼn». Ik kyten bʼis tiʼj qanmi ik tzeʼn jun iẍil tiʼj qxmilal: qa ma che ok xqʼuqit tukʼil kʼujlabʼil, chebʼe chebʼe che kbʼantel. Qa ikju, ¿tiʼ jaku bʼant quʼn tuʼntzun t-xi qqʼuqbʼaʼn kykʼuʼj qeju o kyim jun toj kyja?

3, 4. ¿Tiquʼn jaku tzʼok qeʼ qkʼuʼj tiʼj qa in nel tnikʼ Jehová tiʼj bʼis in kubʼ qnaʼn aj tkyim jun toj qja?

³ Jaku tzʼok qeʼ qkʼuʼj tiʼj qa a Jehová tnejel in tzaj qʼuqbʼante qkʼuʼj (kjawil uʼjit 2 Corintios 1:3, 4). A in kubʼ qʼonte tbʼanel techel tuʼn tel qnikʼ tiʼj tiʼ in kubʼ kynaʼn txqantl. In tzaj ttziyen Jehová jlu kye tmajen: «Ax qine chin xel qʼuqbʼante kykʼuʼje» (Is. 51:12; Sal. 119:50, 52, 76).

⁴ Aju Qtat «in qʼaqʼan tkʼuʼj qiʼj», ax ikx te o che kyim junjun xjal kʼujlaʼn tuʼn ik tzeʼn Abrahán, Isaac, Jacob, Moisés ex aju aj kawil David (Núm. 12:6-8; Mat. 22:31, 32; Hech. 13:22). In tzaj tyekʼin Tyol Dios qa tajxix Jehová tuʼn tpon ambʼil jatumel kxel tqʼoʼn juntl maj kychwinqlal qeju kʼujlaʼn tuʼn (Job 14:14, 15). Toj ambʼil aju, che tzalajel tiʼj kyanqʼibʼil ex ya mlay che yabʼ. Ax ikx bʼaʼn tuʼn ttzaj qnaʼn qa kubʼ tnaʼn Jehová bʼis tej tkyim Tkʼwaʼl, aju otoq «tzalaj» tukʼil (Prov. 8:22, 30). Mlay kanin qximbʼetz tiʼj bʼis kubʼ tnaʼn Jehová (Juan 5:20; 10:17).

5, 6. ¿Alkye tten in tzaj tqʼuqbʼaʼn Jehová qkʼuʼj?

⁵ Jaku tzʼok qeʼ qkʼuʼj tiʼj qa kʼonil Jehová qiʼj. Tuʼntzunju, mintiʼ tuʼn tkubʼ qximen kabʼe maj tuʼn t-xi qqʼamaʼn te tiʼ in kubʼ qnaʼn. In chewix qkʼuʼj tuʼnju ojtzqiʼn quʼn qa in nel tnikʼ Jehová tiʼj bʼis in kubʼ qnaʼn ex in tzaj tqʼuqbʼaʼn qkʼuʼj. Noqtzun tuʼnj, ¿alkye tten in bʼant tuʼn?

⁶ Jun tten in bʼant tuʼn, in tzaj tqʼuqbʼaʼn qkʼuʼj «tuʼn Xewbʼaj Xjan» (Hech. 9:31). Kyaj ttziyen Jesús qa tzul tqʼoʼn Jehová «Xewbʼaj Xjan kye qeju in che qanin te» (Luc. 11:13). In tzaj tqʼamaʼn Susi jlu, aju ma qo yolin tiʼj toj tnejel taqikʼ: «Nim maj o kubʼ ẍmejeʼye twitz Jehová tuʼn t-xi qqanine te tuʼn ttzaj tqʼuqbʼaʼn qkʼuʼje. Ex toj teyele junjun ambʼil lu, kubʼ qnaʼne qa chewix qkʼuʼje tuʼn» (kjawil uʼjit Filipenses 4:6, 7).

7, 8. ¿Tiquʼn jaku tzʼok qeʼ qkʼuʼj tiʼj qa tzul tqʼuqbʼaʼn Jesús qkʼuʼj?

⁷ Aju bʼant tuʼn Jesús ex aju tqʼama tej tten tzalu twitz Txʼotxʼ, kubʼ tyekʼin tkʼujlabʼil ex qʼaqʼbʼil tkʼuʼj Jehová (Juan 5:19). Tzaj tsamaʼn Jehová te twitz Txʼotxʼ «tuʼn kybʼanix qeju bʼis taʼ kyanmi» ex «tuʼn tqʼuqbʼet kykʼuʼj» tuʼn (Is. 61:1, 2; Luc. 4:17-21). Jakutoq tzʼok kyqʼoʼn xjal kywitz tiʼj qa tzaj qʼaqʼin tkʼuʼj Jesús kyiʼj, in neltoq tnikʼ tiʼj yajbʼil kubʼ kynaʼn ex qa tajtoq tuʼn tonin kyiʼj (Heb. 2:17).

⁸ Tej tzmatoq kuʼxun Jesús, axlo ikx ok weʼ twitz bʼis tej kykyim junjun toj tja ex qe tamiw. Tej qʼiʼn junlo 20 abʼqʼi tuʼn Jesús, bʼalo kyim José, aju ok te ttat. * Noq oʼkx qo ximen tiʼj qa kwest ok ambʼil lu te Jesús, aju attoq nim tkʼujlabʼil, tej tok weʼ twitz bʼis ex tej tok tqʼoʼn twitz tiʼj tbʼis ttxuʼ, ex qe titzʼin.

9. ¿Alkye tten kubʼ tyekʼin Jesús qa el tnikʼ tiʼjju kubʼ kynaʼn xjal ik tzeʼn tej tkyim Lázaro?

⁹ Tej pakbʼan Jesús, kubʼ tyekʼin qa el tnikʼ tiʼjju in kubʼ kynaʼn xjal. Jun techel, tej tkyim Lázaro, aju tbʼanel tamiw, ojtzqiʼntoq tuʼn qa kjawiltoq anqʼin. Maske ikju, tej tok tqʼoʼn twitz tiʼj tbʼis María ex Marta, kux chʼyoʼn toj tanmi ex jaw oqʼ (Juan 11:33-36).

10. ¿Tiquʼn qʼuqli qkʼuʼj tiʼj qa kukx in tzaj qʼaqʼin tkʼuʼj Jesús qiʼj aj ttzaj qbʼis?

¹⁰ ¿Alkye tten in nonin qiʼj qa ma tzʼel  qnikʼ tiʼjju bʼant tuʼn Jesús toj ambʼil ojtxe? In tzaj tqʼamaʼn Tyol Dios jlu: «Axte Jesucrist ew, ex jaʼlo, ex te jumajx» (Heb. 13:8). A Jesús «aju Tajaw chwinqlal», ojtzqiʼn tuʼn tiʼ in qnaʼn aj ttzaj qbʼis, ex tuʼntzunju jaku tzʼonin kyiʼj «qeju in che ok tuj joybʼil kyiʼj» (Hech. 3:15; Heb. 2:10, 18). Jaku tzʼok qeʼ qkʼuʼj tiʼj qa kukx in tzaj qʼaqʼin tkʼuʼj Jesús qiʼj aj ttzaj qbʼis. In nel tnikʼ tiʼj qbʼis ex in tzaj tqʼuqbʼaʼn qkʼuʼj toj ambʼil at «tajbʼenxix qe» (kjawil uʼjit Hebreos 4:15, 16).

11. ¿Alkye taqikʼ Tyol Dios mas in nok qʼuqbʼaʼn tkʼuʼja tuʼn?

¹¹ Nya oʼkx in yolin Tyol Dios tiʼjju tej ttzaj tbʼis Jesús tej tkyim Lázaro, ax ikx ateʼ txqantl versículo toj, aʼyeju jaku che onin qiʼj tuʼn ttzaj kyqʼuqbʼaʼn qkʼuʼj. Mintiʼ in qo jaw labʼin tiʼj jlu, tuʼnju «tkyaqil aju o tzʼibʼanjtz tuj Tuʼjil ojtxi, o tzʼibʼanjtz te xnaqʼtzbʼil qe, tuʼn tten qpasens ex tuʼn tqeʼ qkʼuʼj tuʼnju yol tzʼibʼan tuj Tuʼjil, tuʼntzun tqeʼxix qkʼuʼj tiʼj Dios» (Rom. 15:4). ¿Atpe jun teya toj tja o kyim? Qa ikju, jaku tzʼok qʼuqbʼaʼn tkʼuʼja kyuʼn taqikʼ Tyol Dios lu:

• «Niqayin taʼ Qman tuʼn kyklet qe xjal ma tzʼok taʼw bʼis tiʼj kykʼuʼj ex mintiʼtl jatum tuʼn tok qeʼ kykʼuʼj» (Sal. 34:18, 19).

• «Ok in tzaj nximbʼetze ex in bʼaj nkʼuʼje, in tzaj tqʼuqbʼaʼna nkʼuʼje ex in tzaj tqʼoʼna tzalajbʼil» (Sal. 94:19).

• «Ma qo kʼujlanjtz tuʼn Qajaw Jesucrist ex tuʼn Qman Dios, ex ma qʼuqbʼanjtz qkʼuʼj te jumajx tuʼn, ex ma tzaj tmaʼn tuʼn tqeʼ qkʼuʼj tiʼj jun bʼaʼn tzul tqʼoʼn Dios qe noq tuʼn t-xtalbʼil. Awt qʼuqbʼante kykʼuʼje, ex awt kyuwsante kyeye tuj tkyaqil» (2 Tes. 2:16, 17). *

12. ¿Alkye jun tbʼanel tten jaku t-xi qqʼuqbʼaʼn kykʼuʼj txqantl?

¹² Ax ikx jaku kanet qʼuqbʼil kykʼuʼj qeju o kyim jun toj kyja kyxol erman (kjawil uʼjit 1 Tesalonicenses 5:11). ¿Alkye tten jaku qo onin ex jaku txi qqʼuqbʼaʼn tkʼuʼj jun erman «in bʼisun» ex «in bʼaj tipun t-ximlal»? (Prov. 17:22). Bʼaʼn tuʼn ttzaj qnaʼn qa «at tqʼijlalil tuʼn mi kyyolin xjal, ex at tqʼijlalil tuʼn kyyolin» (Ecl. 3:7). Qbʼinx aju in tzaj kyqʼamaʼn kabʼe ermana. In tzaj tqʼamaʼn jun ermana Dalene tbʼi, aju o kyim tchmil: «Kyaj qeju in che bʼisun tuʼn ttzaj kyqʼamaʼn kyximbʼetz ex aju in kubʼ kynaʼn. Tuʼntzunju, aju mas nim toklen tuʼn tbʼant quʼn, aju tuʼn kyok qbʼiʼn ex tuʼn t-xi qqʼoʼn ambʼil kye tuʼn kyyolin». Atzunte Junia, kyim t-xibʼin tuʼnju kubʼ tbʼyon tibʼ, in tzaj tqʼamaʼn jlu: «Maske mlay tzʼel qnikʼ tiʼj tkyaqil bʼis in kubʼ tnaʼn xjal otoq kyim jun toj tja, aju mas nim toklen aju qaj tuʼn tel qnikʼ tiʼj».

13. ¿Tiʼ bʼaʼn tuʼn ttzaj qnaʼn?

¹³ Ax ikx bʼaʼn tuʼn ttzaj qnaʼn qa junxitl tten in kubʼ kynaʼn ex in tzaj kyqʼamaʼn junjun xjal aju kybʼis. At maj, oʼkx aju in bʼisun in nel tnikʼ tiʼj tbʼis ex tiʼjju in kubʼ tnaʼn, ex atlo maj kwest tuʼn ttzaj tqʼamaʼn. Tiʼj jlu in yolin Tyol Dios aj ttzaj tqʼamaʼn jlu: «Bʼaʼn tuʼn tanmi xjal alkye taʼw tok tiʼj, ex mi aʼl juntl xjal jaku tzʼel tnikʼ tiʼj ttzalajbʼil» (Prov. 14:10). Ex maske in tzaj tqʼamaʼn xjal aju in kubʼ tnaʼn, atlo maj mlay tzʼel kynikʼ txqantl tiʼjju tajbʼil tuʼn ttzaj tqʼamaʼn.

14. ¿Tiʼ mas jaku bʼant quʼn tuʼntzun t-xi qqʼuqbʼaʼn kykʼuʼj qeju in che bʼisun?

¹⁴ Tuʼn tkyaqil jlu, atlo maj kwest tuʼn tel qnikʼ tiʼ jaku txi qqʼamaʼn kye qeju in che bʼisun. Maske ikju, in tzaj tqʼamaʼn  Tyol Dios qa aju «kyyol qe xjal at kynabʼl nnoʼk te qʼanbʼil kye mastl» (Prov. 12:18). Ateʼ nim okslal in kanet tumel kyuʼn toj uʼj Cuando muere un ser querido tuʼn t-xi kyqʼuqbʼaʼn kykʼuʼj txqantl. * Ex chʼixmi tkyaqil maj, mas bʼaʼn in nela qa ma txi qbʼiʼn nabʼil lu: «Che oqʼe kyukʼil qeju in che oqʼ» (Rom. 12:15). In tzaj tqʼamaʼn jun ermana Gaby tbʼi ex o kyim tchmil: «O che ok taʼl nwitze te jun tumel tuʼn t-xi nqʼamaʼne tiʼ in kubʼ nnaʼne. Tuʼntzunju, in chewix nkʼuʼje aj kyoqʼ wamiwe wukʼile. Kyoj ambʼil lu mintiʼ in kubʼ nnaʼne qa njunalxe atine».

15. Qa kwest tuʼn t-xi qqʼamaʼn jun qyol teju in bʼisun, ¿tiʼ jaku bʼant quʼn tuʼn t-xi qqʼuqbʼaʼn kykʼuʼj txqantl? (Qʼonka twitz tiʼj recuadro « ¿Tiʼ jaku txi qqʼamaʼn tuʼn t-xi qqʼuqbʼaʼn kykʼuʼj txqantl?»).

¹⁵ Qa kwest tuʼn t-xi qqʼamaʼn jun qyol teju in bʼisun, maslo nya kwest tuʼn tkubʼ qtzʼibʼin toj jun tarjeta, toj jun correo ex qa toj jun mensaje. Jaku kubʼ qtzʼibʼin jun tbʼanel taqikʼ Tyol Dios, moqa jun tbʼanel yol tiʼjju xjal otoq kyim ex qa tiʼj jun tbʼanel ambʼil in tzaj qnaʼn tukʼil kʼujlabʼil. In tzaj tqʼamaʼn Junia jlu: «Mintiʼ in che kanet yol wuʼne tuʼn t-xi nqʼamaʼne qa nim in nonin wiʼje aj ttzaj qʼoʼn jun tal uʼj weye tukʼil jun tbʼanel tqanil ex qa aj ttzaj qʼoʼn jun txokbʼil wiʼje tuʼn ntene jun rat kyukʼil txqantl ermana. Kyuʼn jlu in kubʼ nnaʼne qa ateʼ xjal at kykʼujlabʼil wiʼje ex in che xqʼuqin wiʼje».

16. ¿Alkye juntl tbʼanel tten jaku txi qqʼuqbʼaʼn kykʼuʼj qeju in che bʼisun?

¹⁶ Ax ikx tbʼanel qa ma qo naʼn Dios kyiʼj qeju in kubʼ kynaʼn bʼis ex tuʼn qnaʼn Dios junx kyukʼil. Ax tok, kwestlo tuʼn qnaʼn Dios kyoj ambʼil lu. Jakulo qo jaw oqʼ moqa ya mlay bʼant qyolin. Noqtzun tuʼnj,  jaku chewix kykʼuʼj qa ma qo naʼn Dios kyiʼj. Naʼnx jlu tuʼn Dalene aju ma qo yolin tiʼj toj taqikʼ 12: «At maj, aj kyul ermana qʼuqbʼalte nkʼuʼje, in xi nqanine kye qa jaku bʼant jun naʼj Dios kyuʼn. Aj ttzyet kynaʼn Dios, kwest in bʼant kyyolin. Noqtzun tuʼnj, chebʼe chebʼe in bʼant mas kyyolin ex aj tkubʼ bʼaj otoq bʼant jun tbʼanel naʼj Dios kyuʼn. In chʼiy qʼuqbʼil nkʼuʼje aj tok nkeʼyine qʼuqbʼil kykʼuʼj, kykʼujlabʼil ex qʼaqʼbʼil kykʼuʼj».

17-19. ¿Tiquʼn kukx kxel qqʼoʼn qʼuqbʼil kykʼuʼj erman?

¹⁷ Tuʼnju junxitl junjun xjal, at junjun jun rat naj in nikʼ tnaʼl bʼis kyuʼn ex junjuntl mas yajxitl. Tuʼntzunju, nya oʼkx tuʼn qonin kyiʼj aj tzmatoq in tzaj bʼis kyiʼj moqa toj ambʼil jatumel ateʼ nim xjal ex qe kyamiw. Sino tbʼanel qa kukx ma qo onin kyiʼj aj tikʼ mas ambʼil, ex toj ambʼil jatumel ya otoq tzikʼ tnaʼl kyuʼn txqantl. In tzaj tqʼamaʼn Proverbios 17:17 jlu: «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman». Kukx qo onil tiʼjju in bʼisun toj tkyaqil ambʼil akux at tajbʼen te (kjawil uʼjit 1 Tesalonicenses 3:7).

¹⁸ Bʼaʼn tuʼn ttzaj qnaʼn qa jaku tzul bʼis toj kyximbʼetz toj alkyexku ambʼil. Jakulo tzaj tnaʼn bʼis aj tjapun juntl abʼqʼi tkubʼlen mojeʼ, tuʼn jun bʼitz, jun foto, jun tbʼanel ambʼil, axpe ikx tuʼn tkʼokʼjal jun tiʼ, tuʼn tqʼajqʼojil jun tiʼ ex qa tuʼn jun ambʼil toj abʼqʼi. Kwest kʼelel toj twitz aju otoq kyaj ten tjunalx tuʼn tbʼant junjun tiʼchaq tuʼn, tuʼnju ya mintiʼ tchmil at tukʼil, ex qa ya mintiʼ t-xuʼjil, ik tzeʼn tuʼn t-xiʼ toj nimaq chmabʼil ex aj tpon ambʼil tuʼn tkubʼ ikʼset Nabʼitz Tkyimlen Jesucristo. Tqʼama jun ermano o kyim t-xuʼjil jlu: «Kubʼ nximane qa bʼistoq kjapunel juntl abʼqʼi in kubʼlen mojeʼye tuʼnju njunalxe atine, ex atzun bʼaj. Noqtzun tuʼnj, bʼaj kybʼinchaʼn erman jun chmabʼil tuʼn ntzalaje jun rat junx kyukʼil qe tbʼanel wamiwe tuʼntzun miʼn ntene njunalxe».

¹⁹ Ax ikx bʼaʼn tuʼn ttzaj qnaʼn qa nya oʼkx kyaj qeju in che bʼisun qʼuqbʼil kykʼuʼj kyoj ambʼil nim toklen te kye. In tzaj tqʼamaʼn Junia jlu: «Tkyaqil maj, aj kyonin erman ex aj ttzaj kyqʼamaʼn tuʼn kyten junx wukʼile kyoj junjuntl ambʼil, nim in nonin jlu wiʼje. Aqeju tbʼanel ambʼil lu, nim kyoklen ex in nok qʼuqbʼaʼn qkʼuʼj kyuʼn». Ax tok, mlay tzʼel qiʼn tkyaqil bʼis in kubʼ tnaʼn erman otoq kyim jun toj tja. Noqtzun tuʼnj, jaku bʼant nim tiʼchaq quʼn tuʼn t-xi qʼuqbʼet tkʼuʼj (1 Juan 3:18). Naʼnx jlu tuʼn Gaby: «In xi nqʼoʼne chjonte te Jehová tuʼnju e onin ansyan wiʼje tukʼil kʼujlabʼil ex mintiʼ in kyaj kykoline kyoj ambʼil kwest. E onin wiʼje tuʼn tkubʼ nnaʼne qa at Jehová ntxlaje toj tkyaqil ambʼil».

20. ¿Tiquʼn in nok qʼuqbʼaʼn qkʼuʼj kyuʼn ttziybʼil Jehová?

²⁰ In tzaj qʼuqbʼaʼn qkʼuʼj tuʼn Jehová, aju Dios «kukx in tqʼuqbʼaʼn qkʼuʼj», qa kʼelel tiʼn kʼixkʼoj te jumajx aj kyjaw anqʼin «kykyaqil xjal maquʼn tuj kamposant», aj tok kybʼin tqʼajqʼajel twiʼ Jesús (Juan 5:28, 29). O tzaj ttziyen Jehová qa «te jumajx knajel kamik tuʼn» ex qa «kʼelel t-suʼn taʼl kywitz kykyaqil» xjal (Is. 25:8). Aj tpon qʼij lu, te t-xelju tuʼn qoqʼ «kyukʼil qeju in che oqʼ», aʼyeju che anqʼil tzalu twitz Txʼotxʼ che tzalajel «kyukʼil qeju in che tzalaj» (Rom. 12:5).