1, 2. ¿Tiquʼn kukx che tel xjal mebʼa toj ambʼil jaʼlo?

TOJ ambʼil jaʼlo at nim xjal mintiʼ kypwaq ex junjuntl in che ok te qʼinun. Mintiʼ in kanet kyaqʼun kuʼxun. Nim xjal in cheʼx toj juntl nimaq tnam mas qʼinun maske jaku tzaj jun nya bʼaʼn kyiʼj. Axpe ikx kyoj nimaq tnam lu at mebʼayil. In che ok qʼinun te mas qʼinun ex qe mebʼa, moqa prow, te mas mebʼa. Kʼitzqeku kyqʼama junjun tqanil qa kykyaqil qʼinun ik kypwaq at ik tzeʼn kye kykyaqil xjal at twitz tkyaqil Txʼotxʼ. In nel qnikʼ tiʼj qa at nim mil millón xjal mebʼa, atzun kye txqantl at nim kypwaq tuʼn kyxqʼuqin tiʼj nim kʼloj kyyajil. El tnikʼ Jesús tiʼj jlu tej tqʼama: «Qe xjal mebʼa kukx che tel kyukʼile» (Mar. 14:7). ¿Tiquʼn at junjun xjal nya nim kypwaq at ex junjuntl at nim?

² Ojtzqiʼn tuʼn Jesús qa oʼkx Tkawbʼil Dios kxel bʼinchante tiʼj nya bʼaʼn in tzaj kyiʼj xjal tuʼn tpaj pwaq. Toj Apocalipsis 18:3 in yolin Tyol Dios kyiʼj «qe komersyant», aju in kubʼ techlaʼn qe nimaq kʼaẍjel. At kyoklen kʼaẍjel, kykawbʼil xjal ex qeju okslabʼil nya ax tok kyukʼil tiʼchaq tokx tjaqʼ tkawbʼil Satanás. Mintiʼ in nokx kyqʼon kyibʼ tmajen Jehová kyxol aj kawil ex kyxol okslabʼil nya ax tok. Noqtzun tuʼnj, mlay tzʼel kypaʼn kyibʼ kyiʼj kykyaqil kʼaẍjel ex qe tiʼchaq te twitz txʼotxʼ.

3. ¿Alkyeqe xjel che xel qtzaqʼweʼn?

 ³ Il tiʼj tuʼn kyximen okslal tiʼj tiʼ kyximbʼetz at kyiʼj kʼaẍjel. Bʼaʼn tuʼn tkubʼ qxjelin jlu: «¿Alkye tten jaku che ajbʼen tiʼchaq at weʼye tuʼn tkubʼ nyekʼine qa kukx in chin ajbʼene te Jehová? ¿Tiʼ jaku bʼant wuʼne tuʼn miʼn tpon nkʼuʼje kyiʼj tiʼchaq te twitz txʼotxʼ? ¿Alkyeqe techel in tzaj kyyekʼin qa in nok qeʼxix kykʼuʼj tmajen Jehová tiʼj?».

4, 5. a) ¿Tiʼ tzaj tiʼj mayordom yolin Jesús tiʼj toj txʼolbʼabʼil? b) ¿Tiʼ nabʼil xi tqʼoʼn Jesús kye t-xnaqʼtzbʼen?

⁴ (Kjawil uʼjit Lucas 16:1-9). Yolin Jesús tij jun txʼolbʼabʼil jatumel el qʼiʼn taqʼun mayordom tuʼnju ok tbʼiʼn tajaw aqʼuntl qa otoq bʼaj tnajsaʼn mayordom tpwaq. * Noqtzun tuʼnj, ten «tnabʼl» moyordom ex ok tamiwin tibʼ kyukʼil xjal jakutoq che onin tiʼj aj tel qʼiʼn taqʼun. ¿Tqʼamape Jesús kye t-xnaqʼtzbʼen qa il tiʼj tuʼn kyok te nya bʼaʼn tuʼntzun kyanqʼin akux in nul xitbʼil? Miʼn. Ax qʼamante qa oʼkx qe «xjal mya okslal ateʼ tuj tqʼijlalil jaʼlo» in bʼant jlu kyuʼn. Tqʼama Jesús txʼolbʼabʼil jlu tuʼn ttzaj tqʼoʼn jun tbʼanel xnaqʼtzbʼil qe.

⁵ Kwest aju ikʼ tiʼj mayordom. Ex ojtzqiʼn tuʼn Jesús qa kwest tuʼn kyanqʼin t-xnaqʼtzbʼen toj ambʼil jaʼlo. Tuʼntzunju tqʼama jlu kye: «Tzʼok tililx kyuʼne tuʼn kychmet kyamiwoye tuʼnju qʼinumabʼl at twitz txʼotxʼ». Iktzun tten aj ttzaj nya bʼaʼn kyiʼj jlu, kxel tkʼamoʼn Jehová ex Jesús kye toj «najbʼil te jumajx». ¿Tiʼ xnaqʼtzbʼil jaku tzʼel qiʼn tiʼj nabʼil tqʼama Jesús?

6. ¿Tiquʼn in xi qqʼamaʼn qa mintiʼ toklen tukʼil t-ximbʼetz Jehová aju tuʼn tten nim kypwaq xjal?

⁶ ¿Tiquʼn tqʼama Jesús qa te twitz txʼotxʼ qe qʼinumabʼil? Mintiʼ in tzaj tqʼamaʼn Tyol Dios tiquʼn, oʼkx in tzaj tyekʼin qa mintiʼ toklen tukʼil t-ximbʼetz Jehová aju tuʼn qjyon tiʼj pwaq. ¿Tiquʼn in xi qqʼamaʼn jlu? Tuʼnju toj tbʼanel najbʼil xi tqʼoʼn Jehová aju at tajbʼen kye Adán ex Eva (Gén. 2:15, 16). Ax ikx, tej ttzaj tqʼoʼn Jehová xewbʼaj xjan kye okslal skʼoʼn maj toj tnejel syent abʼqʼi «mi jun [...] qʼmante qa noq teku aju at te, noq oʼkx [...] bʼaj kysipan kyxolx tkyaqilju at kye» (Hech. 4:32). Tqʼama aj sanjel Isaías qa kpol jun qʼij jatumel che wal xjal tiʼjju in tzaj tqʼoʼn txʼotxʼ (Is. 25:6-9; 65:21, 22). Akux in pon qʼij lu, il tiʼj tuʼn tten kynabʼil t-xnaqʼtzbʼen Jesús tuʼntzun kyanqʼin noq kyuʼn «qʼinumabʼl» at twitz txʼotxʼ, ex tojx ambʼil lu kʼokel tilil kyuʼn tuʼn kyajbʼen te Jehová.

7. ¿Tiʼ xnaqʼtzbʼil in kanet quʼn toj Lucas 16:10-13?

⁷ (Kjawil uʼjit Lucas 16:10-13). Aju mayordom yolin Jesús tiʼj ok te kyamiw xjal noq tuʼn ttzaj tiʼn tbʼanel te. Atzunte Jesús onin kyiʼj t-xnaqʼtzbʼen tuʼn tok kyamiwen kyibʼ tukʼil Jehová ex Jesús, ex nya oʼkx tuʼn kyximen kyiʼjx. Kyoj junjuntl taqikʼ Tyol Dios in tzaj tyekʼin qa tajtoq Jesús tuʼn ttzaj t-xnaqʼtzaʼn qa aju alkye tten in che ajbʼen qʼinumabʼil te twitz txʼotxʼ quʼn, in kubʼ qyekʼin qa kukx in qo ajbʼen te Jehová.

8, 9. ¿Alkye tten in che ajbʼen qʼinumabʼil te twitz txʼotxʼ kyuʼn junjun erman?

⁸ Jun tten tuʼn tkubʼ qyekʼin qa kukx in qo ajbʼen te Jehová, aju tuʼn kyajbʼen qe tiʼchaq at qe tuʼn qonin tiʼj pakbʼabʼil kyaj tqʼamaʼn Jesús tuʼn tbʼant twitz tkyaqil Txʼotxʼ (Mat. 24:14). Qo xnaqʼtzan tiʼj alkye tten in bʼant kyuʼn junjun erman. Toj tnam India, attoq jun tkubʼil tpwaq jun tal txin ex in kuʼx tqʼoʼn tpwaq toj. Ya mintiʼtl laqʼon kyiʼj tsaqchbʼil.  Tej tnoj tkubʼil tpwaq xi tqʼoʼn te oyaj tuʼn tonin tiʼj pakbʼabʼil. Tojx tnam lu at jun erman at tqan coco tukʼil, ax ikx te in kubʼ tyekʼin «tnabʼl» tuʼnju in kubʼ t-ximen tuʼn t-xi tqʼoʼn qe coco te oyaj toj ja jatumel in che kubʼ qʼoʼn uʼj toj yol malayálam. Tqʼama qa tuʼnju in che ajbʼen coco toj ja, kubʼ t-ximen qa mas bʼaʼn tuʼn t-xi tqʼoʼn qe coco twitzju tuʼn t-xi tqʼoʼn pwaq tuʼn kylaqʼet. Axju in bʼant kyuʼn erman te tnam Grecia jatumel in xi kyqʼoʼn aceite de oliva, queso ex junjuntl qe wabʼj kye qeju in che ajbʼen toj Betel.

⁹ Qo xnaqʼtzan tiʼjju in bʼant tuʼn jun ermano te tnam Sri Lanka aju in anqʼin toj juntl lugar. Tuʼnju toj ttnam at jun tja ex ttxʼotxʼ, in xi tqʼoʼn tja tuʼn kyok chmabʼil ex nimaq chmabʼil toj, ex in che kyaj ten erman in che ajbʼen toj tkyaqil ambʼil toj. Maske in nok tqʼoʼn pwaq tiʼj, atzun jun tten in onin kyiʼj erman mebʼa. Kyoj junjun lugar jatumel mintiʼ qʼoʼn ambʼil tuʼn qpakbʼan, in che ajbʼen kyja erman tuʼn kyok te Ja te Chmabʼil. Noq tuʼn jlu nim pakbʼal ex precursor nya nim kypwaq, at jun tembʼil jatumel in nok kychmon kyibʼ ex mintiʼ in che chojin twiʼ jun ja.

10. ¿Alkye tbʼanel in tzaj tqʼoʼn qe qa bʼaʼn qo qʼon oyaj?

¹⁰ In tzaj kyyekʼin techel lu qa tzʼaqli qe tmajen Dios «tuj chʼin», aj tajbʼen qe tiʼchaq te twitz txʼotxʼ kyuʼn, aju mas nya nim kyoklen twitzju qamiwbʼil tukʼil Jehová (Luc. 16:10). ¿Tiʼ kyximbʼetz erman at tiʼjju in bʼant kyuʼn tuʼntzun tten tbʼanel kyamiwbʼil tukʼil Jehová? Ojtzqiʼn kyuʼn qa aju tuʼn kyonin atzun jun tten tuʼn kykambʼan tiʼj axix tok qʼinumabʼl (Luc. 16:11). Jun ermana kukx in qʼon oyaj tuʼn tonin tiʼj pakbʼabʼil, in nel tnikʼ tiʼj qa kyoj qe abʼqʼi o che ikʼ o tzaj tkʼamoʼn nim kʼiwlabʼil. In tzaj tqʼamaʼn jlu: «O tzʼok nqʼoʼne nwitze tiʼj qa mas in xi nqʼoʼne oyaj, mas in kubʼ nnajsaʼne kyil txqantl, mas in ten npasense, mintiʼxix in ttzaj nbʼise aj kytzaj junjun nya bʼaʼn ex mas nya kwest tuʼn t-xi nbʼiʼne qe nabʼil in tzaj qʼoʼn weye». Atzun txqantl erman bʼaʼn che qʼon oyaj, o tzʼel kynikʼ tiʼj qa in nonin kyiʼj tuʼn tten tbʼanel kyamiwbʼil tukʼil Jehová (Sal. 112:5; Prov. 22:9).

11. a) ¿Tiquʼn jaku txi qqʼamaʼn qa aju tuʼn qqʼon oyaj atzun jun tten tuʼn tkubʼ qyekʼin qa at qnabʼil? b) ¿Tiʼ in bʼant tuʼn ttnam Jehová toj ambʼil jaʼlo tuʼn tten junx kye kykyaqil? (Qʼonka twitza tiʼj tnejel tilbʼilal).

¹¹ Juntl tten tuʼn tkubʼ qyekʼin qa at qnabʼil aj kyajbʼen tiʼchaq at qe, aju tuʼn qonin kyiʼj txqantl toj ambʼil at tajbʼen kye. At junjun erman at kypwaq, noqtzun tuʼnj mintiʼ in bʼant tuʼn kyajbʼen toj tkyaqil ambʼil nix tuʼn kyxiʼ onil toj juntl tnam. Jaku kubʼ kynaʼn tzalajbʼil tuʼnju ax ikx in che onin tiʼj kypakbʼabʼil txqantl erman (Prov. 19:17). Kyukʼil oyaj in xi qqʼoʼn, in qo onin tuʼn kybʼant ex tuʼn kyxi sipet mas quʼj, ex in qo onin tuʼn tpon tqanil kyoj lugar jatumel ateʼ xjal mebʼa ex kyaj tuʼn kyxnaqʼtzan. Kyoj nim abʼqʼi toj tnam Congo, Madagascar ex Ruanda, il tiʼj tuʼn tjaw kyjyoʼn erman qa tuʼn tlaqʼet kywa toj kyja ex qa tuʼn tlaqʼet Tyol Dios kyuʼn, aju ik twiʼ ik tzeʼn twi kykʼuʼj in kanet toj jun seman ex qa toj jun xjaw. Noq tuʼn onbʼil in xi kyqʼoʼn erman o bʼant tuʼn  tten «junx» kye kykyaqil. Tuʼn jlu, o che kubʼ Tyol Dios kyoj mas yol tuʼn ttnam Jehová ex o txi qʼet kye kykyaqil ja xjal, ex kye qe in che xnaqʼtzan tiʼj Tyol Dios, aʼyeju kyaj tuʼn tel kynikʼ tiʼj Jehová (kjawil uʼjit 2 Corintios 8:13-15). Iktzun tten kykyaqil qe in xi kyqʼoʼn ex qe in tzaj kykʼamoʼn jaku che ok te tamiw Jehová.

12. ¿Alkye tten kubʼ tyekʼin Abrahán qa ten qʼuqbʼil tkʼuʼj tiʼj Jehová?

¹² Juntl tten jaku qo ok te tamiw Jehová aju qa ma tzʼel qpan qibʼ kyiʼj kʼaẍjel te twitz txʼotxʼ ex tuʼn tajbʼen noq alkyexku ambʼil quʼn tuʼn qjyon kyiʼj qʼinumabʼil axix tok. Atzun jlu bʼant tuʼn Abrahán, jun xinaq ten nim qʼuqbʼil tkʼuʼj toj ambʼil ojtxe. Tuʼnju tajtoq tuʼn tok te tamiw Jehová, xi tbʼiʼn aju tzaj tqʼamaʼn Jehová te ex kyaj tkolin tbʼanel tnam Ur, ex anqʼin kyoj ja xbʼalun (Heb. 11:8-10). Ojtzqiʼntoq tuʼn qa tukʼil Jehová in che tzaj axix tok qʼinumabʼil. Tuʼntzunju, mintiʼ ok tilil tuʼn tuʼn tten nim tpwaq, quʼn jakutoq kubʼ tyekʼin qa mintiʼxix qʼuqbʼil tkʼuʼj (Gén. 14:22, 23). Tej tikʼ mas ambʼil, tqʼama Jesús te jun kuʼxun qʼinun tuʼn tten qʼuqbʼil tkʼuʼj ik tzeʼn jlu tej tqʼama: «Qa taja tuʼn toka tzʼaqlxix, txiʼya, kʼayinxa tkyaqilju at teya ex qʼonxa kye mebʼa, ex kteltzun tqʼinumabʼla tuj kyaʼj; tzaja, ex lpeʼka wiʼje» (Mat. 19:21). Aju kuʼxun lu mintiʼ ten qʼuqbʼil tkʼuʼj ik tzeʼn te Abrahán, noqtzun tuʼnj ateʼ txqantl o tzʼok qeʼ kykʼuʼj tiʼj Jehová.

13. a) ¿Tiʼ tqʼama Pablo te Timoteo? b) ¿Alkye tten jaku qo ok lepeʼ tiʼj nabʼil lu?

¹³ Timoteo, atzun juntl xinaq kubʼ tyekʼin qa at qʼuqbʼil tkʼuʼj. Tqʼama Pablo qa «jun bʼaʼn soldad te Jesucrist» Timoteo ex tqʼamatl jlu te: «Mi jun soldad jaku bʼaj t-sakun tibʼ tuʼn t-xi tjyoʼn juntl taqʼun, porque atzun taj tuʼn ttzalaj ju xjal tiʼj, aju o qʼmante te tuʼn tok te soldad» (2 Tim. 2:3, 4). Toj ambʼil jaʼlo in nok tilil kyuʼn t-xnaqʼtzbʼen Jesús tuʼn kyok lepeʼ tiʼj nabʼil lu. Kyxol soldad jlu at mas te jun millón erman in che ajbʼen toj tkyaqil ambʼil. In ok tilil kyuʼn erman lu tuʼn miʼn tkubʼ kyiʼj kyuʼn tqanil ex kyuʼn txqantl, ex in tzaj kynaʼn qa at jun xjal in qanin kʼas, in «kyaj tjaqʼ tkawbʼil aju in qʼonte kychʼex» (Prov. 22:7). Taj Satanás tuʼn tbʼaj qnajsaʼn ambʼil ex qipumal noq tuʼn kypaj tiʼchaq te twitz txʼotxʼ. Ateʼ junjun in netz kyiʼn pwaq te chʼex noq tuʼn tlaqʼet jun kyja, jun kykar, tuʼn tetz jun tbʼanel kyxnaqʼtzbʼil ex qa tuʼn tbʼant jun kymejebʼleʼn wiʼyilxix. Qa mintiʼ ma tzʼok qxqʼuqin qibʼ tiʼjju in jaw qjyoʼn, jaku qo kyaj tjaqʼ kʼas toj nimku abʼqʼi. Qa ma ten qnabʼil, qo anqʼil kyukʼil nya nim tiʼchaq qe ex mlay tzʼetz qiʼn chʼex, ex mlay bʼaj qnajsaʼn qpwaq. Ik tzeʼn tten qo okel te tmajen Jehová ex nya kye tiʼchaq te twitz txʼotxʼ (1 Tim. 6:10).

14. ¿Ti kbʼel qximen tuʼn tbʼant quʼn? Qʼamantza tiʼ o bʼant kyuʼn junjun erman.

¹⁴ Qa qaj tuʼn qanqʼin tukʼil nya nim tiʼchaq qe, il tiʼj tuʼn tkubʼ qqʼoʼn tnejel aju mas nim toklen. Attoq jun kykʼaʼẍ jun mejebʼleʼn ex in kyaj tqʼoʼntoq nim kypwaq. Noqtzun tuʼnj, kyajtoq tuʼn kyajbʼen juntl maj te Jehová toj tkyaqil ambʼil. Tuʼntzunju xi kykʼayin kykʼaʼẍ, kylanch ex txqantl tiʼchaq kye. I eʼx onil tuʼn tjaw bʼinchet akʼaj kytxuylal ninja qʼil twitz aqʼuntl atz Warwick (Nueva York). Ok jlu te nim toklen kye, tuʼnju e ajbʼen toj Betel junx tukʼil tmeʼjel, moqa tmyal, ex tchmil tmeʼjel. Axpe ikx e aqʼunan nim seman kyukʼil tman chmilbʼaj. Atzun juntl precursora najli atz Colorado (Estados Unidos), kanet jun taqʼun toj jun banco te chʼin ambʼil. Tej tikʼ chʼintl ambʼil xi kyqʼamaʼn tajwil aqʼuntl te qa jaku tzʼaqʼunan toj tkyaqil ambʼil ex xi qʼamaʼn te tuʼn t-xi qʼoʼn oxe maj mas twiʼ tkʼuʼj. Noqtzun tuʼnj, mintiʼ xi tkʼamoʼn tuʼnju ya mlay tzaj tqʼoʼn ambʼil tuʼn tex pakbʼal. Aʼyeju  kabʼe techel lu noq jun yekʼbʼil tiʼjju in bʼant kyuʼn erman noq tuʼn kyajbʼen te Jehová. Qa qaj tuʼn tkubʼ qqʼoʼn Tkawbʼil Dios tnejel, kbʼel qyekʼin qa mas nim toklen qamiwbʼil tukʼil Jehová ex qa mas nim toklen aju axix tok qʼinumabʼil qe kywitzju tiʼchaq te twitz txʼotxʼ.

15. ¿Alkyeqe qʼinumabʼil in tzaj kyqʼoʼn mas tzalajbʼil qe?

¹⁵ Qa at nim tiʼchaq qe, nya a t-xilen qa kʼiwlaʼn qoʼ tuʼn Dios. In che tzaj tkʼiwlaʼn Jehová qeju in chmet «kyaqʼunbʼen bʼaʼn ik tzaʼn jun qʼinumabʼl» (kjawil uʼjit 1 Timoteo 6:17-19). Qo xnaqʼtzan tiʼjju ikʼ tiʼj jun ermana te tnam Italia, aju Lucia tbʼi. * Tej tok tbʼiʼn qa kyajtoq erman te tnam Albania onbʼil tuʼn kypakbʼan, ok qeʼ tkʼuʼj tiʼj Jehová ex xiʼ anqʼil toj tnam aju toj 1993, maske mintiʼ nim tpwaq tuʼn tanqʼin. Bʼant tyolin tiʼj yol albanés, ex atxix toj ambʼil lu o tzʼonin kyiʼj 60 xjal tuʼn tjaw aʼ kywiʼ. Ax tok, chʼixme qkyaqilx mintiʼxix in tzaj tqʼoʼn tbʼanel qe jatumel in qo pakbʼan. Noqtzun tuʼnj, noq alkyexku tiʼ in bʼant quʼn tuʼn qonin kyiʼj txqantl tuʼn tkanet bʼe te chwinqlal kyuʼn, kʼokel jlu ik tzeʼn jun qʼinumabʼil te kye ex te qe te jumajx (Mat. 6:20).

16. a) ¿Tiʼ kbʼajel kyiʼj qʼinumabʼil te twitz txʼotxʼ? b) Tuʼnju ojtzqiʼn quʼn tiʼ kbʼajel kyiʼj qʼinumabʼil te twitz txʼotxʼ, ¿alkye qximbʼetz ktel kyiʼj?

¹⁶ Mintiʼ tqʼama Jesús qa jakutoq tzaj nya bʼaʼn kyiʼj «qʼinumabʼl at twitz txʼotxʼ», sino ktzajel nya bʼaʼn kyiʼj (Lucas 16:9). Toj ambʼil jaʼlo at nim mebʼayil ex in che kubʼ naj junjun banco, noqtzun tuʼnj, mlay tzʼok qmojbʼan jlu tukʼilju kbʼajel toj ambʼil tzul. Kbʼel xiten tkyaqilju tokx tjaqʼ tkawbʼil Satanás, ik tzeʼn aju at toklen kyukʼil kʼaẍjel, kykawbʼil xjal ex kyukʼil okslabʼil nya ax tok. Kyqʼama aj sanjel Ezequiel ex Sofonías qa mintiʼ kyajbʼen qʼan pwaq ex saq pwaq, maske toj nimku ambʼil o tzʼok qʼoʼn nim kyoklen (Ezeq. 7:19; Sof. 1:18). ¿Tiʼ kbʼel qnaʼn qa chʼix qkyim ex in nel qnikʼ tiʼj qa otoq txi qnajsaʼn aju axix tok qʼinumabʼil noq tuʼn kypaj qʼinumabʼil te twitz txʼotxʼ? Jakulo kubʼ qnaʼn ik tzeʼn jun xjal in naqʼunan nimxix toj tkyaqil tanqʼibʼil noq tuʼn tkambʼan tiʼj nim pwaq ex in nel tnikʼ tiʼj qa ya mintiʼ tajbʼen jlu (Prov. 18:11). Ktzajel nya bʼaʼn kyiʼj qʼinumabʼil te twitz txʼotxʼ. Tuʼntzunju, bʼaʼn tuʼn kyajbʼen quʼn tuʼn tten qamiwbʼil tukʼil Jehová ex Jesús. Noq alkyexku tiʼ in bʼant quʼn tuʼn qonin tiʼj Tkawbʼil Dios, kʼonil qiʼj tuʼn qok te tbʼanel tamiw Jehová.

17, 18. ¿Tiʼ tbʼanel tzul kye tamiw Jehová?

¹⁷ Aj tul Tkawbʼil Dios, mintiʼ jun xjal kchjol twiʼ majen ja, nix chʼex, nix twiʼ kykʼuʼj aj qʼanel ex kywiʼ qʼanbʼil. Ktel nim wabʼj noq kukx kye kykyaqil xjal. Aʼyeju tmajen Jehová che anqʼil tzalu twitz Txʼotxʼ, che tzalajel kyiʼj tbʼanel tiʼchaq tzul tqʼoʼn txʼotxʼ kye. Mlay kubʼ qchmoʼn qʼan pwaq, saq pwaq nix qe abʼj wiʼyilxix kywiʼ. Ex mlay tzʼajbʼen pwaq quʼn tuʼn kylaqʼet qe jlu, sino che ajbʼel quʼn tuʼn tbʼaj qbʼinchen qten. Qkyaqilx kyjawil qbʼinchan qja kyukʼil tbʼanel tzeʼ, abʼj ex tbʼanel kʼuxbʼil. Ex che onil qe qamiw qiʼj tuʼnju atzun kyaj tuʼn tbʼant kyuʼn ex nya tuʼn chjet twiʼ kykʼuʼj. Kbʼajel qsipin qxolx tkyaqilju tzul tqʼoʼn txʼotxʼ.

¹⁸ Tkyaqil jlu noq chʼin yekʼbʼil tiʼj tkyaqil tbʼanel oyaj tzul tqʼoʼn Jehová kye qeju in nok kyamiwen kyibʼ tukʼil ex tukʼil Jesús. Kykyaqil tmajen Jehová che tzalajel aj ttzaj tqʼamaʼn Jesús qe yol lu kye: «Kytzaje aqeye kyʼiwlaʼn qeye tuʼn Nmane, kykʼmonxe aju kawbʼil bʼanimaj te kyeye atxix tej tbʼant twitz txʼotxʼ» (Mat. 25:34).