QO XIMEN tiʼj qa in qo bʼet toj jun bʼe ex chʼixtoq ttzaj qlolj. Noq minabʼen, in nok qqʼoʼn qwitz tiʼj qa at jun xjal lepchix qiʼj. Qa ma qo kubʼ weʼ, ax ikx te xjal in kubʼ weʼ, qatzun mas in nok tilil quʼn tuʼn qbʼet, ax ikx te xjal mas in nok tilil tuʼn. In tzajtzun qnaʼn qa nqa taʼ tja jun qamiw jatumel atoʼ. Tuʼntzunju, in qoʼx ojqelan tzmaxi aj qpon tja. In kubʼtzun qnaʼn bʼaʼn tuʼnju otoq qo klet tuʼnju sokx tjaqoʼn qamiw ttzi tja qwitz ex xqo okx tiʼn toj tja.

Mintiʼlo o bʼaj jlu jun maj qiʼj. Noqtzun tuʼnj, atlo junjuntl tiʼchaq in tzaj bʼaj qkʼuʼj kyiʼj toj qanqʼibʼil. Jun techel, ¿in nokpe tilil quʼn tuʼn tkubʼ tiʼj jun nya bʼaʼn quʼn, noqtzun tuʼnj, kukx in qo el txalpaj jun ex juntl maj? ¿Mape bʼet ambʼil tel len qʼiʼn qaqʼun ex kwest tuʼn tkanet juntl? ¿In tzajpe bʼaj qkʼuʼj tuʼnju ya chʼix qtijen ex tuʼnju jaʼ kytzaj yabʼil qiʼj? ¿In tzajpe bʼaj qkʼuʼj tiʼj juntl tiʼ?

Noq alkyexku jun tiʼ in tzaj bʼaj qkʼuʼj tiʼj, tbʼanel qa at jun qamiw in qo kubʼ tbʼiʼn ex taj tuʼn tonin qiʼj. ¿Atpe jun qamiw ik tzeʼn jlu? At. A Jehová aju amiw lu. Ok Jehová te tamiw Abrahán, aju kukx ajbʼen te ik tzeʼn in jaw quʼjin toj Isaías 41:8-13. Toj versículo 10 in tzaj ttziyen Jehová jlu te teyele junjun qe: «Miʼn che xobʼe porque lu qine atine kyukʼile, miʼn bʼaj kykʼuʼje, aqine Kydiose. Kxel nqʼoʼne kyipumale ex chin onile kyiʼje, tzyuʼn qeye wuʼne tuʼn nbʼanqʼabʼe tuʼnju tzʼaqlxix qine». Atzun toj versículo 13 in tzaj tqʼamaʼntl jlu: «Aqine Dios aju Kymane, tzyuʼn qeye wuʼne ex o nmaye kyeye kyjaʼ: Miʼn che xobʼe, chin onile kyiʼje».

Nimxix in tzaj kyqʼuqbʼaʼn tyol Jehová qkʼuʼj. In tzaj tqʼamaʼn jlu qe: «Aqine Dios aju Kymane, tzyuʼn qeye wuʼne». Aj in qo ok weʼ twitz nya bʼaʼn, in qo tzaj tonin Jehová ik tzeʼn in qo etz tjakʼuʼn ex in qo etz tiʼn toj nya bʼaʼn. Ex in tzaj tqʼuqbʼaʼn qkʼuʼj aj in tzaj tqʼamaʼn jlu qe: «Miʼn che xobʼe, chin onile kyiʼje».

¿In nokpe qqʼoʼn Jehová ik tzeʼn jun qamiw ex jun qman aju kʼujlaʼn qoʼ tuʼn? ¿In nokpe qeʼ qkʼuʼj tiʼj qa tzul tonin qoʼ aj kytzaj nya bʼaʼn qiʼj? Kwentin qoʼ tuʼn Jehová ex taj tuʼn tonin qiʼj. Aj in che tzaj nya bʼaʼn qiʼj, taj tuʼn miʼn ttzaj bʼajxix qkʼuʼj. ¿Tiquʼn? Tuʼnju nimxix kʼujlaʼn qoʼ tuʼn. A Jehová «kolol qiʼj ex qʼol qipumal; a onil qe tuj qʼij ok ttzaj yajbʼil qiʼj» (Salmo 46:1).

Ateʼ junjun okslal kukx in che ximen tiʼjju nya bʼaʼn bʼant kyuʼn ojtxi ex in kubʼ kyxjelin qa o kubʼ tnajsaʼn Jehová kyil. Qa a jlu in kubʼ qnaʼn, qo ximen tiʼj Job aju kukx ajbʼen te Jehová. El tnikʼ tiʼj qa otoq kubʼ tbʼinchaʼn nya bʼaʼn tej kuʼxintoq (Job 13:26). Ax ikx te David el tnikʼ tiʼj qa otoq  kubʼ tbʼinchaʼn il tej kuʼxintoq. Tuʼntzunju xi tqanin te Jehová tuʼn miʼn ttzaj tnaʼn qe til (Salmo 25:7). Tuʼnju qkyaqilx aj il qoʼ, in tzaj tqʼamaʼn Tyol Dios qa «qkyaqil o qo bʼinchan il, ex mintiʼ in qo kanun tuʼn qok tzʼaqlxix ik tzaʼn te Dios tzʼaqlxixte» (Romanos 3:23).

E kubʼ tzʼibʼin qe yol tkuʼx toj capítulo 41 toj uʼj te Isaías kye aj Israel. Otoq kubʼ kybʼinchaʼn nimxix nya bʼaʼn ex tuʼntzunju tqʼama Jehová qa tuʼn tkubʼtoq tqʼoʼn kykastiw tuʼn kyxi qʼiʼn toj tnam Babilonia (Isaías 39:6, 7). Noqtzun tuʼnj, ax ikx xi ttziyen qa che kleteltoq qeju kʼajetztoq tiʼj kyanmi tuʼn ex qa che meltzʼajtoq tukʼil (Isaías 41:8, 9; 49:8). Ax ikx toj ambʼil jaʼlo, in tzaj tyekʼun Jehová tkʼujlabʼil ex qʼaqʼbʼil tkʼuʼj kyiʼj qeju in najtz tiʼj kyanmi tuʼn tkyaqil kykʼuʼj ex in nok tilil kyuʼn tuʼn ttzalaj Jehová kyuʼn (Salmo 51:1).

Qo ximen tiʼjju bʼaj tiʼj jun ermano Takuya tbʼi. * In noktoq tilil tuʼn tuʼn tkyaj ttzaqpiʼn tuʼn tok tqʼoʼn twitz kyiʼj xjal mintiʼ kyxbʼalun ex tuʼn t-saqchan tiʼj ttzʼalbʼil. Noqtzun tuʼnj, kukx in kubʼtoq tzʼaq juntl maj. In tzaj tqʼamaʼn erman qa in kubʼtoq tnaʼn qa mintiʼtoq tajbʼen. Noqtzun tuʼnj, aj noktoq ten kubʼsal twitz Jehová tuʼn tkubʼ tnajsaʼn til, kubʼ tnaʼn qa in jaw wabʼan tuʼn Jehová tej otoqxi kubʼ tzʼaq. ¿Alkye tten bʼant jlu tuʼn Jehová? E ajbʼen ansyan tuʼn. Xi kyqʼamaʼn ansyan te Takuya qa bʼaʼn tuʼn ttzaj llamarin kyiʼj tkyaqil maj aj tkubʼtoq tzʼaq. El tnikʼ erman tiʼj qa kwesttoq tuʼn tbʼant jlu tuʼn, noqtzun tuʼnj, aj tbʼanttoq tuʼn, in nonin tiʼj. Jun qʼij, xi kyqʼamaʼn ansyan te ansyan in bʼet kyojele Ja te Chmabʼil tuʼn t-xi visitaril te Takuya. Tej tpon ansyan visitaril te erman, xi tqʼamaʼn te qa nya noq kukx otoq tpon, sino otoq jaw skʼoʼn kyuʼn ansyan tuʼn tpon visitaril te. Tqʼama Takuya qa maske in bʼinchaʼntoq il, e ajbʼen ansyan tuʼn Jehová tuʼntzun tonin tiʼj. Tej tbʼet ambʼil, kyaj ttzaqpiʼn nya bʼaʼn ex ok te precursor regular. Atzun jaʼlo, in najbʼen toj jun ninja qʼil twitz aqʼuntl. Onin Jehová tiʼj erman lu, ax ikx kʼonil qiʼj aj qel txalpaj.

Ateʼ junjun in tzaj bʼaj kykʼuʼj tuʼnju o tzʼel qʼiʼn kyaqʼun ex mintiʼ in kanet juntl. Qo ximen tiʼj jlu: kwest aj qel ikʼun tuʼn jun ex juntl tajaw aqʼuntl. Tuʼn jlu ateʼ junjun in kubʼ kynaʼn qa mintiʼ kyajbʼen. Qa a jlu in bʼaj qiʼj, ¿alkye tten jaku tzʼonin Jehová qiʼj? Melaylo tzaj tqʼoʼn naj jun qaqʼun aju bʼaʼn in nela toj qwitz, noqtzun tuʼnj, jaku tzʼonin qiʼj tuʼn ttzaj qnaʼn qe tyol David lu: «Kuʼxun qine nej, atzun jaʼlo ma chin tijine; pero bʼajx wile jun xinaq bʼaʼn otoq kyaj kolin, ex bʼajx wile in che moʼn qe tkʼwaʼl» (Salmo 37:25). Nimxix qoklen toj twitz Jehová. In tzaj tqʼoʼn Jehová aju tbʼanqʼabʼ qe tuʼnju tzʼaqli te tuʼntzun tten aju at tajbʼen qe tuʼn kukx qajbʼen te.

Ok tqʼoʼn twitz jun erman, aju Sara tbʼi te tnam Colombia alkye tten onin Jehová tiʼj. In naqʼunantoq toj tkyaqil ambʼil toj jun aqʼuntl nim toklen ex in tkambʼantoq nim pwaq. Noqtzun tuʼnj, tajbʼiltoq tuʼn tajbʼen mas te Jehová. Tuʼntzunju, kyaj ttzaqpiʼn aqʼuntl ex ok te precursora. Kwesttoq tuʼn tkanet jun taqʼun noq oʼkx mij, moqa nikʼjan qʼij, tuʼntzunju kubʼ tqʼoʼn jun tkʼaẍ te kʼayil  elad. Noqtzun tuʼnj, kubʼ bʼaj tpwaq ex tuʼntzunju ya mintiʼ kʼayin elad. In tzaj tqʼamaʼn Sara qa kwest i eʼx qeju oxetl abʼqʼi, noqtzun tuʼnj, onin Jehová tiʼj tuʼn tikʼx tuʼn. El tnikʼ tiʼj alkyeqe tiʼchaq atxix tajbʼen te ex tiʼ tuʼn tbʼant tuʼn tuʼntzun miʼn ttzaj bʼajxix tkʼuʼj tiʼjju te nchiʼj (Mateo 6:33, 34). Tej tbʼet ambʼil, tzaj llamarin tuʼn tnejel tpatrón tuʼntzun t-xi tqʼamaʼn te tuʼn taqʼunan juntl maj tukʼil. Xitzun tqʼamaʼn Sara te qa jakutoq txi ttziyen aqʼuntl oʼkx qa ma tzʼaqʼunan mij qʼij ex qa jakutoq tzaj qʼoʼn ambʼil te tuʼn t-xiʼ kyoj chmabʼil ex kyoj nimaq chmabʼil. Bʼaʼn ela toj twitz tajaw aqʼuntl. Mintiʼ in tzaj tkʼamoʼn Sara nim pwaq toj ambʼil jaʼlo ik tzeʼn nej, noqtzun tuʼnj, kukx in najbʼen te precursora. Tqʼama qa kyoj ambʼil kwest kubʼ tnaʼn alkye tten onin Jehová tiʼj tukʼil kʼujlabʼil.

At nim xjal in tzaj bʼaj kykʼuʼj tuʼnju jaʼ kyok te tij ex ya chʼix tpon ambʼil tuʼn miʼntl kyaqʼunan. In kubʼ kyximen qa jaku kanin kypwaq tuʼntzun kyanqʼin toj txubʼtxaj. Ax ikx in tzaj bʼaj kykʼuʼj kyiʼj nya bʼaʼn jaku tzaj kyiʼj kyuʼn yabʼil toj ambʼil tzul. Bʼalo a aj kawil David xi kubʼsante jlu te Jehová: «Miʼn chin el tikʼuna ok ntijine; miʼn chin kyaj tkolina ok mintiʼtl wipune» (Salmo 71:9, 18).

¿Tiʼ jaku tzʼonin kyiʼj qeju ya ma che tijen tuʼn miʼn ttzaj bʼajxix kykʼuʼj tiʼjju ambʼil tzul? Tuʼn tchʼiy qʼuqbʼil kykʼuʼj tiʼj Jehová ex tuʼn tok qeʼ kyuʼj tiʼj qa tzul tqʼoʼn tkyaqilju at tajbʼen kye. Ateʼ junjun o che tzalaj kyiʼj junjun tiʼchaq tej tten mas kypwaq. Tuʼntzunju, il-lo tiʼj tuʼn t-xi kyxnaqʼtzan kyibʼ tuʼn kyanqʼin tukʼil nya nim tiʼchaq ex tuʼn kytzalaj kyiʼj. Axpe ikx jaku tzʼel kynikʼ tiʼj qa mas bʼaʼn jaku tzʼel te kyxmilal qa «itzaj» kychiʼ xbʼaj twitzju qa chibʼj (Proverbios 15:17). Qa ma tzʼok qqʼoʼn qwiʼ tiʼjju tuʼn qajbʼen te Jehová, tzul tqʼoʼn tkyaqilju at tajbʼen qe aj qtijen.

Qo ximen tiʼj José ex Rose, jun mejebʼleʼn aju iqʼen mas te 65 abʼqʼi kyuʼn tuʼn kyajbʼen te Jehová toj tkyaqil ambʼil. Kyoj kykyaqil abʼqʼi lu o che ok weʼ twitz nim nya bʼaʼn. Jun techel, e xqʼuqin tiʼj tman Rose, aju iltoq tiʼj tuʼn tok xqʼuqit toj 24 or tkyaqil qʼij. Nya oʼkxju, ax ikx ok operarin José tiʼj cáncer ex tzaj tkʼamoʼn quimioterapia. ¿Alkye tten onin Jehová tukʼil tbʼanqʼabʼaj tiʼj mejebʼleʼn lu? E ajbʼen kabʼe erman tuʼn, Tony ex Wendy kybʼi. Attoq jun kyja Tony ex Wendy ex kyajbʼiltoq tuʼn t-xi kyqʼoʼn noq kukx kye qeju precursor in che ajbʼen toj tkyaqil ambʼil te Jehová. Tzaj tnaʼn Tony qa tej attoq toj tja xnaqʼtzbʼil, kukx in noktoq tqʼoʼn twitz tiʼj toj ventan tej in che pakbʼantoq José ex Rose. In tzalajtoq tej in noktoq tqʼoʼn twitz tiʼj qa in noktoq tilil kyuʼn tuʼn kypakbʼan ex jaw labʼin tiʼj jlu. Tuʼnju otoq che ajbʼen José ex Rose toj tkyaqil kyanqʼibʼil te Jehová, xi tqʼoʼn Tony ex Wendy kyja kye. Ma tzikʼ 15 abʼqʼi in che onin Tony ex Wendy tiʼj José ex Rose, aju qʼiʼn 85 abʼqʼi kyuʼn. Jun oyaj Tony ex Wendy tuʼn Jehová toj twitz José ex Rose.

In tzaj ttziyen Jehová jlu qe: «Miʼn che xobʼe, chin onile kyiʼje». Ax ikx in tzaj tqʼoʼn onbʼil qe tuʼn tbʼanqʼabʼ tuʼnju tzʼaqli te. ¿Kxelpe qnuqpiʼn qqʼabʼ tuʼntzun ttzaj qtzyun tqʼabʼ Jehová?