1, 2. ¿Tiʼ bʼant tuʼn apóstol Pablo tuʼntzun tkubʼ tyekʼun qa in xi tqʼoʼntoq chjonte tuʼnju tzaj tyekʼun Jehová t-xtalbʼil tiʼj?

OTOQ tzʼok tbʼinchaʼn apóstol Pablo nim nya bʼaʼn kyiʼj okslal. Tuʼntzunju, ojtzqiʼntoq tuʼn qa mintiʼtoq toklen tuʼn ttzaj qʼaqʼin tkʼuʼj Dios tiʼj. Kyjuʼtzun, tqʼama tuʼn tkyaqil tkʼuʼj qa «mya noqx gan» otoq txi tkʼamoʼn aju t-xtalbʼil Dios (kjawil uʼjit 1 Corintios 15:9, 10).

² Tej chʼixtoq tkyim Pablo, xi ttzʼibʼin jlu te Timoteo: «Kxel nqʼoʼne chjonte te Qajaw Jesucrist tuʼnju ma tzaj qʼoʼn wipumale tuʼn, porque ma qeʼ tkʼuʼj wiʼje ex ma chin ok qʼoʼne tuʼn, tuʼn wajbʼene te» (1 Timoteo 1:12-14). ¿Alqiʼj yolin Pablo tej tqʼama qa otoq tzʼok qʼoʼn toklen tuʼn tajbʼen tuʼn Jesús? Tqʼamatl Pablo lu kye okslal te Éfeso: «Mintiʼ ma kubʼ nximane qa maʼxix toklen nchwinqlale te wexe, oʼkx in chin ximane tiʼj  tuʼn tjapun bʼaj aqʼuntl wuʼne tukʼil tzalajbʼil, ex tuʼn tjapun wajbʼebʼle aju o nkʼame te Qajaw Jesús tuʼn t-xi npakbʼaʼne tqanil bʼaʼn tiʼj t-xtalbʼil Dios» (Hechos 20:24).

3. ¿Alkye tbʼanel oklenj xi tkʼamoʼn Pablo? (Qʼonka twitza tiʼj tnejel tilbʼilal).

³ ¿Alkye qeju «tqanil bʼaʼn» pakbʼan Pablo tiʼj? ¿Ex alkye tten in kubʼ tyekʼun tqanil bʼaʼn aju t-xtalbʼil Jehová? Xi tqʼamaʼn Pablo jlu kye okslal te Éfeso: «Porque malo kybʼiye tzaʼn tten tzaj tqʼoʼn Dios t-xtalbʼil weye tuʼn t-xi nqʼoʼne kyeye» (Efesios 3:1, 2). Otoq t-xi tqʼamaʼn Jesús te Pablo tuʼn t-xi tpakbʼaʼn tbʼanel tqanil kye qeju xjal nya aj Judiy. Iktzun tten jakutoq che kawin junjuntl xjal te juntl tnam toj Tkawbʼil Dios, aju nejni Mesías twitz (kjawil uʼjit Efesios 3:5-8). Pakbʼan Pablo tuʼn tkyaqil tkʼuʼj ex kyaj tqʼoʼn jun tbʼanel techel kywitz qeju okslal toj ambʼil jaʼlo. Kubʼ tyekʼun qa «mya noqx gan» xi tkʼamoʼn aju t-xtalbʼil Dios moqa mintiʼ kubʼ tyajin.

4, 5. ¿Tiquʼn jaku t-xi qqʼamaʼn qa aju tqanil bʼaʼn tiʼj Tkawbʼil Dios, ax ikx in che ok te «tqanil bʼaʼn tiʼj t-xtalbʼil»?

⁴ Kyoj bʼajsbʼil tqʼijlalil jaʼlo, o tzaj qʼoʼn kyoklen tmajen Jehová tuʼn t-xi kypakbʼaʼn «aju tqanil bʼaʼn [...] tiʼj tkawbʼil Dios [...] tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon» (Mateo 24:14). Aju tqanil bʼaʼn tiʼj Tkawbʼil Dios, ax ikx in che ok te «tqanil bʼaʼn tiʼj t-xtalbʼil». ¿Tiquʼn? Tuʼnju tkyaqilju kʼiwlabʼil tzul qkʼamoʼn tjaqʼ Tkawbʼil Dios, kbʼantel jlu noq tuʼn t-xtalbʼil (Efesios 1:3). Kubʼ tyekʼun Pablo qa xi tqʼoʼn chjonte tiʼj t-xtalbʼil Dios tej tpakbʼan tuʼn tkyaqil tkʼuʼj. ¿In nelpe qkanoʼn aju techel kyaj tqʼoʼn Pablo? (kjawil uʼjit Romanos 1:14-16).

⁵ Tojju xnaqʼtzbʼil ma kyaj, el qnikʼ tiʼj qa in tzaj tiʼn t-xtalbʼil Dios tbʼanel qe kyoj nimku tten maske aj il qoʼ. Ex tuʼnju o tzaj tiʼn nim tbʼanel qe, at qoklen tiʼj tuʼn t-xi qqʼamaʼn kye txqantl alkye tten in tzaj tyekʼun Jehová tkʼujlabʼil qiʼj ex alkye tbʼanel in tzaj tiʼn qe. ¿Alkye tten jaku qo onin kyiʼj txqantl tuʼn t-xi kyqʼoʼn chjonte tiʼjju t-xtalbʼil Dios?

6, 7. Aj in qo yolin tiʼj chojbʼil kyukʼil xjal, ¿alkye tten in qo pakbʼan tiʼj tbʼanel tqanil tiʼj t-xtalbʼil Dios?

⁶ Toj ambʼil jaʼlo, nim xjal mintiʼ in kubʼ kynaʼn jun nya bʼaʼn aj tkubʼ kybʼinchaʼn il, tuʼntzunju mintiʼ in nel kynikʼ tiʼj qa at tajbʼen chojbʼil kye. Noqtzun tuʼnj, ateʼ junjun xjal in nel kynikʼ tiʼj qa mintiʼ in che tzalaj tiʼjju alkye tten kyanqʼibʼil at. Ajtzun kyyolin testigos de Jehová kyukʼil, in neltzun kynikʼ tiʼj alkye nya bʼaʼn in tzaj qiʼj tuʼn il ex tiʼ jaku bʼant quʼn tuʼn qetz klet tjaqʼ il. Qa at jun tbʼanel kyanmi xjal aj tel kynikʼ tiʼj jlu, in xi kyqʼoʼn chjonte te Jehová aj in nok kybʼiʼn qa tzaj t-samaʼn Tkʼwaʼl tuʼntzun qetz klet tjaqʼ il ex kamik. Bʼant jlu tuʼn Jehová tuʼnju at nim tkʼujlabʼil ex tuʼnju kubʼ tyekʼun t-xtalbʼil (1 Juan 4:9, 10).

⁷ Qbʼinx tiʼ tqʼama Pablo tiʼj Tkʼwaʼl Jehová aju kʼujlaʼn tuʼn: «Noq tuʼn Crist ma qo kolpet tuʼnju tchkʼel, ex ma najset qil tuʼnju  t-xtalbʼil nimxix» (Efesios 1:7). Aju chojbʼil bʼant tuʼn Jesús, atzun yekʼbʼil mas matij at tiʼj tkʼujlabʼil Jehová ex in tzaj tyekʼun qe qa at nimxix t-xtalbʼil. In tzaj tqʼuqbʼaʼn qkʼuʼj aj tel qnikʼ tiʼj qa ma tzʼok qeʼ qkʼuʼj tiʼj chojbʼil, jaku kubʼ tnajsaʼn Dios qil ex jaku ten jun tbʼanel qximbʼetz (Hebreos 9:14). Axix tok in che ok jlu te tbʼanel tqanil ex bʼaʼn tuʼn t-xi qqʼamaʼn kye txqantl.

8. ¿Tiquʼn il tiʼj tuʼn tbʼant kyten xjal tukʼil Dios?

⁸ Qa mintiʼ ma tzʼok qeʼ qkʼuʼj tiʼj chojbʼil bʼant tuʼn Jesús, in qo ok tqʼoʼn Dios te aj qʼoj tiʼj. Tuʼntzunju, il tiʼj tuʼn t-xi qqʼamaʼn kye txqantl xjal qa jaku che ok te tamiw Jehová. Kubʼ ttzʼibʼin apóstol Juan jlu: «Alkye ma tzʼokslan tiʼj Tkʼwaʼl Dios, at tchwinqlal te jumajx; atzunju tkʼiʼ tzʼokslan tiʼj Tkʼwaʼl Dios, mlayx ten tchwinqlal, noq oʼkx kbʼel jun tkastiw maʼxix tuʼn Dios» (Juan 3:36). Nim in qo jaw tzalaj tuʼnju in nel qnikʼ tiʼj qa jaku bʼant qten tukʼil Jehová noq tuʼn chojbʼil bʼant tuʼn Jesús. Tqʼama Pablo jlu: «Ax ikx kyeye najchaq ateʼye tiʼj Dios ojtxi, ex aj qʼoj qeye tiʼj Dios tuj kyanmiye tuʼnju in kybʼinchaʼntoqe mya bʼaʼn, atzun jaʼlo ma bʼant kytene tukʼil Dios tuʼn Crist, tej tkʼixbʼisanjtz t-ximlal ex tej tkyim» (Colosenses 1:21, 22).

9, 10. a) ¿Alkye oklenj o txi tqʼoʼn Jesús kye okslal skʼoʼn maj? b) ¿Alkye tten in che onin txqantl ẍneʼl kyiʼj skʼoʼn maj?

⁹ O txi tqʼoʼn Jesús oklenj kye skʼoʼn maj tuʼn t-xi kyqʼamaʼn «kye xjal tuʼn tbʼant kyten tukʼil Dios». Tqʼama Pablo jlu kye: «Tkyaqil jlu tuʼn Dios in tzaj tqʼoʼn, ex tuʼnx Dios ma bʼant qten tukʼil noq tuʼn Crist, ex ma tzaj tqʼoʼn qoklen tuʼn t-xi qmaʼn kye xjal tuʼn tbʼant kyten tukʼil Dios. Ate Dios ok tilil tuʼn tuʼn tbʼant kyten xjal tukʼil noq tuʼn Crist, mintiʼ ok tqʼoʼn Dios tkwent tiʼj kyil xjal; ex tzaj tmaʼn qeye tuʼn t-xi qmaʼne kye xjal tzaʼn tten tuʼn tbʼant kyten tukʼil. Kyjaʼtzun, aqoʼye ma qo tzaj samaʼne te t-sanjel Crist, mer ik tzaʼn a Dios in kubʼsan kywitz xjal tuʼn qyole; tuj tbʼi Crist in qo kubʼsane kywitze tuʼn tbʼant kytene tukʼil Dios» (2 Corintios 5:18-20).

¹⁰ Jun tbʼanel oklenj toj kywitz txqantl ẍneʼl aj in che onin kyiʼj skʼoʼn maj toj pakbʼabʼil (Juan 10:16). Tuʼnju in che ajbʼen txqantl ẍneʼl tuʼn Jesús tuʼn t-xi kyiʼn tqanil, chʼixmi kyuʼn in bʼant tkyaqil aqʼuntl tiʼj pakbʼabʼil, in xi kyxnaqʼtzaʼn aju axix tok kye xjal ex in che onin kyiʼj tuʼn kyok te tamiw Jehová. A jlu atzun jun tumel nim toklen tuʼntzun t-xi pakbʼet tbʼanel tqanil tiʼj t-xtalbʼil Dios.

11, 12. ¿Tiquʼn jun tbʼanel tqanil kye xjal aj in nel kynikʼ tiʼj qa jaku che naʼn Dios te Jehová?

¹¹ Nim xjal in che naʼn Dios noq tuʼnju in kubʼ kynaʼn bʼaʼn tuʼn, noqtzun tuʼnj, mintiʼ  in xi kynimen qa ax tok in che tzaj bʼiʼn tuʼn Dios. Il tiʼj tuʼn tel kynikʼ tiʼj qa in tzaj tbʼiʼn Jehová qe naʼj Dios. Kubʼ ttzʼibʼin David jlu: «Porque in tbʼiʼna aju qnaʼj Diose. Kykyaqil xjal in che ul tukʼila. In kubʼ qiʼje tuʼnju qbʼinchbʼene mya bʼaʼn, pero in kubʼ tnajsaʼna qile» (Salmo 65:2, 3).

¹² Ax ikx tqʼama Jesús lu kye qe t-xnaqʼtzbʼen: «Axxi’x kxe’l nma’n kyeye’ qa kxe’l q’onte’ kyeye’ tu’n Nmane’ tkyaqilju’ kxe’l kqani’ne’ te toj nb’iye’» (Juan 16:23, XT). A jlu in tzaj tyekʼun qe qa jaku txi qqanin alkyexku tiʼ te Jehová aju at toklen tukʼil tajbʼil. Kubʼ ttzʼibʼin apóstol Juan lu: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn, kyjaʼtzun tten in qeʼxix qkʼuʼj tiʼj» (1 Juan 5:14). Tbʼanel tuʼnju in qo onin kyiʼj xjal tuʼn tel kynikʼ tiʼj qa nya oʼkx in kubʼ qnaʼn bʼaʼn tuʼn naʼj Dios, sino atzun jun tten tuʼn qpon twitz tqʼuqbʼil Dios «jatum taʼ t-xtalbʼil» (Hebreos 4:16). Il tiʼj tuʼn t-xi qxnaqʼtzaʼn kye xjal alkye tten tuʼn kynaʼn Dios, alqe che naʼl Dios ex tiʼ kxel kyqanin toj kynaʼj Dios. Iktzun tten in qo onin kyiʼj tuʼn kyok te tamiw Jehová ex tuʼn tkanet qʼuqbʼil kykʼuʼj aj ttzaj kʼixkʼoj kyiʼj (Salmo 4:1; 145:18).

13, 14. a) ¿Tiʼ tbʼanel oklenj ktel kye qeju skʼoʼn maj toj ambʼil tzul? b) ¿Tiʼ kbʼantel kyuʼn skʼoʼn maj kyiʼj xjal?

¹³ Mas tzul tyekʼun Jehová t-xtalbʼil «tuj tqʼijlalil tzul». ¿Alkye tten kbʼantel tuʼn? Kbʼantel tuʼn Jehová tuʼn t-xi kykʼamoʼn qeju 144,000 jun oklenj aj kykawin tukʼil Jesús toj kyaʼj. ¿Alkye oklenj kxel kykʼamoʼn? Kyaj tchikʼbʼaʼn Pablo tej tkubʼ ttzʼibʼin jlu: «Pero ate Dios nimxix tqʼaqʼbʼil tkʼuʼj, ex nimxix tkʼujlalil qiʼj, kyjaʼtzun ma tzaj tqʼoʼn Dios qchwinqlal junx tukʼil Crist, maske kyimnitoq qoʼ nej tuʼn tlaj qil. Kyjaʼtzun noq tuʼn t-xtalbʼil Dios ma che klete. Ex ma qo jaw anqʼin tuʼn Dios junx tukʼil Crist, ax ikx ma qo kubʼ tqʼuqbʼaʼn tuj kyaʼj junx tukʼil, tuʼntzun ttzaj tyekʼun tuj tabʼqʼiyil tzul aju t-xtalbʼil nimxix ex tkʼujlalil qiʼj tuʼn Jesucrist» (Efesios 2:4-7).

¹⁴ O bʼaj tbʼinchaʼn Jehová nim tbʼanel tiʼchaq kye skʼoʼn maj aj kykawin tukʼil Jesús toj kyaʼj (Lucas 22:28-30; Filipenses 3:20, 21; 1 Juan 3:2). Mas kbʼel tyekʼun Jehová «aju t-xtalbʼil nimxix» kyiʼj qeju skʼoʼn maj. Atzun qe jlu che okel te «akʼaj Jerusalén», aju kbʼel mojeʼ tukʼil Jesús (Apocalipsis 3:12; 17:14; 21:2, 9, 10). Ex che aqʼunal junx tukʼil Jesús tuʼn kyqʼanit qe «nasyon». A t-xilen jlu qa che onil kyiʼj xjal tuʼn kyetz klet tjaqʼ il ex kyimen, ex tuʼn kyok te tzʼaqli (kjawil uʼjit Apocalipsis 22:1, 2, 17).

15, 16. ¿Alkye tten kbʼel tyekʼun Jehová t-xtalbʼil kyiʼj txqantl ẍneʼl toj akʼaj twitz Txʼotxʼ?

¹⁵ In tzaj tqʼamaʼn Efesios 2:7 qa tzul  tyekʼun Jehová t-xtalbʼil ex tkʼujlabʼil toj «tabʼqʼiyil tzul». Iktzun tten kʼokel kyqʼoʼn kywitz qeju xjal che anqʼil twitz Txʼotxʼ tiʼjju nimxix «t-xtalbʼil» (Lucas 18:29, 30). Aj kyjaw anqʼin xjal tuʼn Jehová, atzun jun tten jatumel kbʼel tyekʼunxix t-xtalbʼil tzalu twitz Txʼotxʼ (Job 14:13-15; Juan 5:28, 29). ¿Alkyetzun qe xjal che jawil anqʼin? Che jawil anqʼin kykyaqil xjal kukx e ajbʼen te Jehová tej naʼmxtoq tkyim Jesús ex qeju txqantl ẍneʼl in che kyim kyoj bʼajsbʼil tqʼijlalil. Kykyaqil xjal lu, che jawil anqʼin ex kukx che ajbʼel te Jehová.

¹⁶ Ax ikx che jawil anqʼin nim millón xjal aqeju mintiʼ ok kyojtzqiʼn Jehová. Kubʼ ttzʼibʼin apóstol Juan lu: «Ex o wile qe kyimni, qeju maʼ kyoklen ex qeju chʼin kyoklen, waʼl qe qwitz Dios; ex e jaqet qe libro, ex at juntl libro jaqet, aju libro te chwinqlal. Kubʼtzun kysentens qe kyimni, ex ju kysentens kubʼ ik tzaʼnxju kybʼinchbʼen tzʼibʼan kyuj libro. Ex xi tqʼoʼn mar qe kyimni ateʼ tuj; ex ju kamik tukʼix ju kynajbʼil kyimni xi kyqʼoʼn qe kyimni ateʼ kyuj; ex teyle junjun kubʼ t-sentens ik tzaʼnxju tbʼinchbʼen» (Apocalipsis 20:12, 13). Aj kyjaw anqʼin xjal lu, kxel qʼoʼn ambʼil kye tuʼn tel kynikʼ tiʼj Jehová ex tuʼn tokx kyqʼon kyibʼ tjaqʼ tkawbʼil. Ex kbʼel kyqʼoʼn toj xnaqʼtzbʼil qeju akʼaj nabʼil ex kawbʼil aj kytzaj qʼoʼn kyoj akʼaj «libro». Aqeju akʼaj kawbʼil che ul qʼoʼn, atzun juntl tumel alkye tten tzul tyekʼun Jehová t-xtalbʼil.

17. ¿Tiʼ il tiʼj tuʼn ttzaj qnaʼn aj qpakbʼan?

¹⁷ Tuʼnju ya chʼinx tul xitbʼil, mas nim toklen toj ambʼil jaʼlo tuʼn qpakbʼan tiʼj tbʼanel tqanil tiʼj Tkawbʼil Dios (Marcos 13:10). Nim toklen tuʼn ttzaj qnaʼn qa aju in qo jyon tiʼj aj qpakbʼan, aju tuʼn tjaw qnimsaʼn Jehová. ¿Alkye tten jaku bʼant quʼn? Il tiʼj tuʼn t-xi qqʼamaʼn kye xjal qa jaku qo tzalaj tiʼj tkyaqil kʼiwlabʼil tzul tqʼoʼn Dios toj akʼaj twitz Txʼotxʼ noq tuʼnju tzul tyekʼun nimxix t-xtalbʼil qiʼj.

18, 19. ¿Alkye tten jaku jaw qnimsaʼn t-xtalbʼil Jehová?

¹⁸ Aj qpakbʼan kye xjal, bʼaʼn tuʼn t-xi qqʼamaʼn kye qa tzul qkʼamoʼn kykyaqil tbʼanel tuʼn chojbʼil aj ttzyet tkawin Jesús toj Tkawbʼil Dios ex chebʼe chebʼe qo okel te tzʼaqli. In tzaj tqʼamaʼn Tyol Dios jlu: «Porque ax ikx ax tchʼisbʼen Dios ktzoqpetel tuʼn miʼn ttentl tjaqʼ tipumal najen, oʼkx tuʼn tten junx kyukʼil tkʼwaʼl Dios tuj tzoqpibʼl kye maʼ t-xilen» (Romanos 8:21). Kbʼantel jlu noq tuʼnju tzul tyekʼun Jehová t-xtalbʼil kyiʼj xjal.

¹⁹ At jun tbʼanel qoklen tuʼn t-xi qqʼamaʼn kye txqantl xjal aju in tzaj ttziyen Jehová toj Apocalipsis 21:4, 5, aju in tqʼamaʼn: «Ex kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porque aqeju at tnejel ma che naj, chi ju tzaj yolin. Ex tma Dios aju qʼuql tuj tqʼuqbʼil jatum in kawin: —Tkyaqil kʼokel te akʼaj wuʼne. Ex tzaj tmaʼn weye: —Tzʼibʼankuya, porque aqeju yol lu axix tok ex bʼaʼn tuʼn tqeʼ kykʼuʼje kyiʼj». Aj qpakbʼan tuʼn tkyaqil qkʼuʼj tiʼj tbʼanel tqanil kye txqantl xjal, tuʼn jlu in jaw qnimsaʼn t-xtalbʼil Jehová at qiʼj.