1, 2. a) Toj nya nim yol qʼamantza aju txʼolbʼabʼil tiʼj xjal attoq tqan t-uva. b) ¿Alkye tten in tzaj tyekʼun txʼolbʼabʼil lu aju qʼaqʼbʼil tkʼuʼj jun xjal ex aju t-xtalbʼil?

ATTOQ tqan t-uva jun xjal at. Jun qʼij, ex jyol qe aqʼunal toj plas te qlaxix, moqa te primxix. Xi tqʼamaʼn kye jteʼ jakutoq t-xi tchjoʼn twiʼ kykʼuʼj ex bʼaʼn ela kye. Yajxitl, el tnikʼ xjal tiʼj qa il tiʼj tuʼn ttzaj tjyoʼn mas aqʼunal. Tuʼntzunju, akux in nex qʼij, nim maj meltzʼaj jyolte qe aqʼunal. Ex xi tqʼamaʼn kye qa kxeltoq tqʼoʼn jun tbʼanel twiʼ kykʼuʼj kykyaqilx. Tejtzun tkubʼ bʼaj qʼij, ok tchmoʼn kykyaqil aqʼunal tuʼntzun t-xi tchjoʼn twiʼ kykʼuʼj. Ateʼ junjun otoq che aqʼunan enter qʼij ex junjuntl noq oʼkx jun or. Noqtzun tuʼnj, ax twiʼ kykʼuʼj kykyaqil xjal xi tchjoʼn tajaw aqʼuntl. Tuʼntzunju, tzaj kyyol qeju xjal otoq che aqʼunan enter qʼij tiʼj. Xitzun tnaʼn tajaw aqʼuntl kye xjal qa bʼaʼn otoq tzʼela toj kywitz aju twiʼ kykʼuʼj otoq t-xi tqʼamaʼn kye. Ax ikx xi tqʼamaʼn kye qa attoq toklen tuʼn t-xi tqʼoʼn twiʼ kykʼuʼj qeju majen ik tzeʼn te tajbʼil. Xitzun tqanin kye qa in  tzajtoq loʼchj kykʼuʼj tiʼj tuʼnju kubʼ tyekʼun qʼaqʼbʼil tkʼuʼj kyiʼj txqantl (Mateo 20:1-15).

² Tqʼama Jesús txʼolbʼabʼil lu tuʼntzun t-xi tqʼoʼn jun xnaqʼtzbʼil nim toklen tiʼj «t-xtalbʼil Dios» (kjawil uʼjit 2 Corintios 6:1). Atlo junjun jakulo kubʼ kyximen qa iltoq tiʼj tuʼn t-xi qʼet mas twiʼ kykʼuʼj qe xjal e aqʼunan enter qʼij. Noqtzun tuʼnj, kubʼ tyekʼun aju xjal attoq tqan t-uva t-xtalbʼil kyiʼj qeju mintiʼ e aqʼunan enter qʼij. Tqʼama jun xjal aj nabʼil qa aj in kubʼ qʼet aju yol «t-xtalbʼil Dios» toj Xjan Uʼj, atz in yolin tiʼj «jun tiʼ noq kukx in tzaj qʼoʼn qe ex mintiʼ qoklen tiʼj» ex tiʼj «jun tiʼ in xi qʼoʼn te jun xjal ex mintiʼ jun tiʼ otoq bʼant tuʼn tuʼn t-xi tkʼamoʼn».

3, 4. a) ¿Tiquʼn o kubʼ tyekʼun Jehová t-xtalbʼil kyiʼj kykyaqil xjal? b) ¿Alkye tten o kubʼ tyekʼun Jehová t-xtalbʼil?

³ In tzaj tqʼamaʼn Xjan Uʼj qa jun «oyaj noq kukx» aju t-xtalbʼil Dios (Efesios 3:7, TNM). Tuʼnju mlay bʼant tuʼn qnimen te Jehová toj tkyaqil, mintiʼ qoklen tiʼj tuʼn ttzaj tyekʼun t-xtalbʼil qiʼj. Sino aju tuʼn ttzaj qʼoʼn qe, atzun tuʼn qkyim. Tqʼama aj kawil Salomón jlu: «Mi aʼl jun xjal at twitz txʼotxʼ tzʼaqlxix wen in tbʼinchaʼn aju bʼaʼn ex bʼajx bʼinchan il» (Eclesiastés 7:20). Tej tbʼet mas ambʼil tqʼama Pablo qa qkyaqilx «o qo bʼinchan il, ex mintiʼ in qo kanun tuʼn qok tzʼaqlxix ik tzaʼn te Dios tzʼaqlxixte» ex qa «aju chojbʼil qe in tzaj tqʼoʼn il, atzun tuʼn qkyim» (Romanos 3:23; 6:23a).

⁴ Kʼujlaʼnxix qeju xjal tuʼn Jehová. Tuʼntzunju tzaj t-samaʼn oʼkxku junx Tkʼwaʼl tuʼn tkyim tuʼn qpaj. Atzun jlu aju matij yekʼbʼil at tiʼj t-xtalbʼil (Juan 3:16). Tqʼama Pablo qa o tzʼok qʼoʼn nim toklen Jesús ex qa o «jaw nimsaʼn tuʼn tlaj ju kʼixkʼoj ikʼx tuʼn tej tkyim, kyim tuʼn qlaj qkyaqil noq tuʼn t-xtalbʼil Dios» (Hebreos 2:9). Tuʼntzunju, aju oyaj in tzaj tqʼoʼn t-xtalbʼil Dios qe atzun «qchwinqlal te jumajx tuʼn qmojbʼabʼl qibʼ tukʼil Jesucrist aju Qajaw» (Romanos 6:23b).

5, 6. a) ¿Tiʼ in tzaj qa in xi qqʼoʼn ambʼil tuʼn tkawin il qibʼaj? b) ¿Tiʼ in tzaj qa in xi qqʼoʼn ambʼil tuʼn tkawin t-xtalbʼil Dios qibʼaj?

⁵ ¿Tiquʼn in kubʼ qbʼinchaʼn il ex in qo kyim? In tzaj tqʼamaʼn Tyol Dios qa noq tuʼn tpaj il kubʼ tbʼinchaʼn Adán «kawinju’ kamik». Tuʼnju atz tzajni qoʼ tiʼj Adán, qkyaqilx atoʼ tjaqʼ il ex in qo kyim (Romanos 5:12, 14, XT, 17). Maske ikju, jaku kubʼ qximen tuʼn miʼn tkawin il qibʼaj. ¿Alkye tten jaku bʼant jlu quʼn? Qa ma tzʼok qeʼ qkʼuʼj tiʼj chojbʼil bʼant tuʼn Jesús. Iktzun tten in xi qqʼoʼn ambʼil te t-xtalbʼil Dios tuʼn tkawin qibʼaj. In tzaj tqʼamaʼn Tyol Dios jlu: «Ik tzaʼn o chmet-xix kyil xjal, ax ikxtzun mas nimxix t-xtalbʼil Dios tzaj tqʼoʼn. Ik tzaʼn e kyaj xjal tjaqʼ tipumal il ex e kyim tuʼn, ax ikxtzun te Dios t-xtalbʼil at tipumal tuʼn qok te tzʼaqlxix tuʼn, ex tuʼn tten qchwinqlal te jumajx noq tuʼn Jesucrist» (Romanos 5:20, 21).

⁶ Maske kukx aj il qoʼ, mintiʼ tuʼn t-xi qqʼoʼn ambʼil te il tuʼn tkawin qibʼaj. Tuʼntzunju, aj in kubʼ qbʼinchaʼn jun tiʼ nya toj tumel, in xi qqanin te Jehová tuʼn tkubʼ tnajsaʼn qil. Tqʼama Pablo jlu: «Ate il mintiʼtl toklen tuʼn tkawin kyiʼje, porque myatzun ateʼye tjaqʼ ley, noq oʼkx tkubʼ t-xtalbʼil Dios kyibʼaje» (Romanos 6:14).  ¿Tiʼ tbʼanel tzul qe qa ma txi qqʼoʼn ambʼil te t-xtalbʼil Dios tuʼn tkawin qibʼaj? Tqʼama Pablo qa in kyaj «qkolin aju mya bʼaʼn ex aju achbʼil twitz txʼotxʼ» ex tuʼn qanqʼin tukʼil «qnabʼl tuj tqʼijlalil jaʼlo, ex tuʼn qbʼet tuj tumelxix, ex tuʼn qniman Dios» (Tito 2:11, 12).

7, 8. ¿Tiʼ t-xilen aju in tzaj tyekʼun Jehová t-xtalbʼil qiʼj te «junxilchaq tten»? (Qʼonka twitza tiʼj tnejel tilbʼilal).

⁷ Kubʼ ttzʼibʼin apóstol Pedro qa bʼaʼn tuʼn tajbʼen aju o tzaj tqʼoʼn Dios qe tuʼn qonin kyiʼj txqantl ik tzeʼn jun tbʼanel «mayordom» tiʼj t-xtalbʼil Dios aju o tzaj tqʼoʼn qe te «junxilchaq tten» (1 Pedro 4:10). ¿Tiʼ t-xilen aju in tzaj tyekʼun Jehová t-xtalbʼil qiʼj te «junxilchaq tten»? A jlu in yolin tiʼj qa noq alkyexku jun nya bʼaʼn in tzaj toj qanqʼibʼil, in tzaj tqʼoʼn Jehová aju at tajbʼen qe tuʼntzun tikʼx quʼn (1 Pedro 1:6). Tkyaqil maj in tzaj tqʼoʼn aju atxix tajbʼen qe tuʼntzun qex twitz junjun nya bʼaʼn.

⁸ Ik tzeʼn in nel qnikʼ tiʼj, in tzaj tyekʼun Jehová t-xtalbʼil qiʼj toj junxilchaq tten. Kubʼ ttzʼibʼin apóstol Juan jlu: «Nimxix xtalbʼil at [...], aju xtalbʼil lu kukx in tzaj tqʼoʼn» (Juan 1:16). Tuʼnju in tzaj tyekʼun Jehová t-xtalbʼil toj nim tten, in tzaj qkʼamoʼn nim kʼiwlabʼil. Qo xnaqʼtzan kyiʼj junjun kʼiwlabʼil lu.

9. a) ¿Tiʼ tbʼanel in tzaj qe tuʼnju at t-xtalbʼil Dios? b) ¿Alkye tten in kubʼ qyekʼun qa in xi qqʼoʼn chjonte tiʼj jlu?

⁹ In kubʼ tnajsaʼn Jehová qil. Noq tuʼn t-xtalbʼil Jehová, in kubʼ tnajsaʼn qil. Noqtzun tuʼnj, oʼkx in kubʼ tnajsaʼn qil qa in najtz tiʼj qanmi ex qa in nok tilil quʼn tuʼn tkyaj qkolin aju nya bʼaʼn (kjawil uʼjit 1 Juan 1:8, 9). Xi tchikʼbʼaʼn Pablo alkye tten in kubʼ tnajsaʼn Jehová qil kye qe okslal skʼoʼn toj ambʼil tej tanqʼin. Tej tyolin tiʼj Dios, tqʼama: «Ma qo klet tuʼn Dios, ma qo etz tiʼn tuj tipumal qlolj, ma qo pon tiʼn tuj tkawbʼil Tkʼwaʼl aju kʼujlaʼn tuʼn, ex ma qo kolpet tuʼn Crist [noq tuʼnju tchkʼel], ex ma najset qil tuʼn» (Colosenses 1:13, 14). Qa in xi qqʼoʼn chjonte tiʼjju o bʼant tuʼn Dios qiʼj, kbʼel qyekʼun jlu aj tjaw qnimsaʼn. Ex tuʼnju in kubʼ tnajsaʼn qil, jaku tzaj qkʼamoʼn txqantl tbʼanel kʼiwlabʼil.

10. ¿Tiʼ in qo tzalaj tiʼj noq tuʼnju t-xtalbʼil Dios?

¹⁰ Jaku qo tzalaj tuʼnju atoʼ toj mujbʼabʼil tukʼil Dios ex tuʼnju tamiw qoʼ. Tuʼnju aj il qoʼ, atxix tej qul itzʼ aj qʼoj qoʼ tiʼj Dios. Maske ikju, tqʼama apóstol Pablo jlu: «Ma bʼant qten tukʼil Dios tuʼnju tkyimlen Tkʼwaʼl tej aj qʼojtoq qoʼ tiʼj» (Romanos 5:10). Noq tuʼnju chojbʼil bʼant tuʼn Jesús, jaku kubʼ tnajsaʼn Dios qil. A t-xilen jlu qa jaku ten mujbʼabʼil qxol tukʼil Dios ex jaku qo ok te tamiw. Noqtzun tuʼnj, ¿tiʼ toklen jlu tukʼil t-xtalbʼil Dios? Xi tchikʼbʼaʼn Pablo jlu kye okslal skʼoʼn maj: «Ma qo ok  te tzʼaqlxix tuʼn Dios noq tuʼn qokslabʼl, ex ma bʼant qten tukʼil Dios noq tuʼn Qajaw Jesucrist. Ma tzaj tqʼoʼn Dios t-xtalbʼil qe noq tuʼn Jesucrist, porque ma qo okslan tiʼj, ex waʼl qoʼxix tuj t-xtalbʼil» (Romanos 5:1, 2). Jaku txi qqʼoʼn nim chjonte tuʼnju at mujbʼabʼil qxol tukʼil Dios ex tuʼnju ma qo ok te tamiw.

11. ¿Alkye tten in che onin skʼoʼn maj kyiʼj txqantl ẍneʼl «tuʼn kyok te tzʼaqlxix»?

¹¹ Jaku qo ok te tzʼaqli twitz Dios. Kubʼ ttzʼibʼin Daniel aju t-sanjel Dios qa kyoj mankbʼil tqʼijlalil tzultoq kyiʼn skʼoʼn maj nim «xjal tuʼn kyok te tzʼaqlxix» (kjawil uʼjit Daniel 12:3). ¿Alkye tten in bʼant jlu kyuʼn skʼoʼn maj? In xi kypakbʼaʼn tqanil tiʼj Tkawbʼil Dios ex in xi kyxnaqʼtzaʼn qe tkawbʼil Dios kye nim millón xjal te txqantl ẍneʼl (Juan 10:16). Iktzun tten in che onin kyiʼj txqantl xjal tuʼntzun kyok tqʼoʼn Dios te tzʼaqli. In bʼant jlu noq tuʼn t-xtalbʼil Jehová. Kyaj tchikʼbʼaʼn Pablo jlu: «Noq kukx qo okel te tzʼaqlxix noq tuʼn t-xtalbʼil Dios, tuʼnju ma qo kolpet tuʼn Jesucrist» (Romanos 3:23, 24).

12. ¿Tiʼ toklen t-xtalbʼil Dios tukʼil naʼj Dios?

¹² Jaku qo ok laqʼeʼ ttxlaj Jehová tuʼn naʼj Dios. Noq tuʼnju t-xtalbʼil Dios, jaku qo naʼn Dios te. Tqʼama Pablo qa aju tqʼuqbʼil Jehová atzun «tqʼuqbʼil jatum taʼ t-xtalbʼil» ex in qo tzaj ttxkoʼn tuʼn qok laqʼeʼ ttxlaj tqʼuqbʼil tukʼil qʼuqbʼil «qkʼuʼj» (Hebreos 4:16a). Toj tbʼi Jesús jaku qo naʼn Dios te Jehová toj alkyexku ambʼil. Jun tbʼanel oklenj jlu. Tqʼama Pablo jlu: «Ma qeʼ qkʼuʼj ex at tzoqpibʼl qe tuʼn qpon laqʼeʼ twitz Dios, noq tuʼn qokslabʼl tiʼj Crist» (Efesios 3:12).

13. ¿Alkye tten in qo tzaj tonin t-xtalbʼil Dios toj ambʼil at «tajbʼenxix qe»?

 ¹³ Jaku tzaj qkʼamoʼn onbʼil tojxix ambʼil at tajbʼen qe. Tqʼama Pablo qa bʼaʼn tuʼn qnaʼn Dios te Jehová tojxix ambʼil at tajbʼen qe «tuʼntzun ttzaj qʼaqʼan tkʼuʼj qiʼj ex tuʼn qkʼmonte jun xtalbʼil tuj tqʼijlalil ok tul tajbʼenxix qe» (Hebreos 4:16b). Tkyaqil maj, aj ttzaj jun nya bʼaʼn qiʼj, jaku txi qqanin onbʼil te Jehová. Nya il tiʼj tuʼn ttzaj ttzaqʼweʼn Jehová qe, noqtzun tuʼnj, in qo tzaj ttzaqʼweʼn. Nim maj in che ajbʼen qe erman jatumel in nok qchmon qibʼ tuʼn tuʼntzun tonin qiʼj. Ex tuʼnju in tzaj ttzaqʼweʼn Jehová qnaʼj Dios, jaku «qeʼxix qkʼuʼj tuʼn t-xi qmaʼn: Ate Qman onil weye; mlay chin xobʼe. Mintiʼ jun mya bʼaʼn jaku kybʼincha xjal wiʼje» (Hebreos 13:6).

14. ¿Alkye juntl kʼiwlabʼil in tzaj qʼoʼn qe noq tuʼn t-xtalbʼil Dios?

¹⁴ Jaku tzaj qʼuqbʼaʼn qkʼuʼj. Juntl tbʼanel kʼiwlabʼil in tzaj qʼoʼn qe noq tuʼn t-xtalbʼil Dios, aju in tzaj tqʼuqbʼaʼn qkʼuʼj aj ttzaj bʼaj qkʼuʼj tiʼj jun tiʼ (Salmo 51:17). Tej i el ikʼun okslal te Tesalónica, xi ttzʼibʼin apóstol Pablo jlu kye: «Ma qo kʼujlanjtz tuʼn Qajaw Jesucrist ex tuʼn Qman Dios, ex ma qʼuqbʼanjtz qkʼuʼj te jumajx tuʼn, ex ma tzaj tmaʼn tuʼn tqeʼ qkʼuʼj tiʼj jun bʼaʼn tzul tqʼoʼn Dios qe noq tuʼn t-xtalbʼil. Awt qʼuqbʼante kykʼuʼje, ex awt kyuwsante kyeye» (2 Tesalonicenses 2:16, 17). In tzaj tqʼuqbʼaʼn jlu qkʼuʼj tuʼnju in nel qnikʼ tiʼj qa noq tuʼn t-xtalbʼil Jehová kʼujlaʼn qoʼ tuʼn ex in qo ok t-xqʼuqin.

15. ¿Alkye qʼuqbʼil qkʼuʼj at noq tuʼnju t-xtalbʼil Jehová?

¹⁵ Jaku ten qʼuqbʼil qkʼuʼj tuʼn qanqʼin te jumajx. Tuʼnju aj il qoʼ, mlay ten jun qʼuqbʼil qkʼuʼj noqwit mintiʼ in nonin Jehová qiʼj (kjawil uʼjit Salmo 49:7, 8). Noqtzun tuʼnj, o tzaj tqʼoʼn jun tbʼanelxix qʼuqbʼil qkʼuʼj. ¿Alkye? Tqʼama Jesús jlu: «Atzun jlu tajbʼil ju tzaj samante weye, tuʼn tten kychwinqlal te jumajx kykyaqil qeju in che keʼyin wiʼje ex in che okslan wiʼje» (Juan 6:40). Tuʼntzunju, noq tuʼnju t-xtalbʼil Jehová at qʼuqbʼil qkʼuʼj tuʼn qanqʼin te jumajx. Tqʼama Pablo jlu: «Ma tzaj tyekʼun Dios t-xtalbʼil kye kykyaqil xjal tzaʼn tten tuʼn kyklet» (Tito 2:11).

16. ¿Alkye tten e ikʼ junjun okslal tibʼaj t-xtalbʼil Dios toj tnejel syent abʼqʼi?

¹⁶ Ik tzeʼn ma tzʼel qnikʼ tiʼj, noq tuʼnju t-xtalbʼil Jehová at qiʼj, in tzaj qkʼamoʼn nim kʼiwlabʼil. Noqtzun tuʼnj, mintiʼ tuʼn qikʼ tibʼaj t-xtalbʼil, moqa toj juntl yol, mintiʼ tuʼn tkubʼ qbʼinchaʼn il noq tuʼnju at t-xtalbʼil Jehová. Toj ambʼil tej kyten qe tnejel okslal, ateʼ junjun okslal ajbʼen t-xtalbʼil Dios kyuʼn ik tzeʼn jun tiquʼn tuʼn tkubʼ kybʼinchaʼn nya bʼaʼn (Judas 4). Kubʼ kyximen qeju okslal lu aqeju nya kukx e ajbʼen te Jehová qa jakutoq kubʼ kybʼinchaʼn nya bʼaʼn ex qa jakutoq che yon tiʼj tuʼn kukx tkubʼ tnajsaʼn kyil. Ax ikx ok tilil kyuʼn tuʼn tkubʼ kybʼinchaʼn txqantl okslal nya bʼaʼn ik tzeʼn kye. Toj ambʼil jaʼlo, qa at jun xjal in kubʼ tbʼinchaʼn jlu, mintiʼ in nok tqʼoʼn toklen «Xewbʼaj Xjan [...], aju qʼol xtalbʼil» (Hebreos 10:29).

17. ¿Alkye nabʼil tqʼama apóstol Pedro?

¹⁷ Toj ambʼil jaʼlo, o che kubʼ t-sbʼuʼn Satanás junjun okslal tuʼnju in kubʼ kyximen qa jaku kubʼ kybʼinchaʼn jun il ex tuʼn tkubʼ  kyyoʼn tuʼn tkubʼ tnajsaʼn Jehová kyil ex qa mintiʼ jun tiʼ tuʼn tbʼant kyuʼn. Ax tok, in kubʼ tnajsaʼn Jehová kyil qeju in najtz tiʼj kyanmi. Noqtzun tuʼnj, ax ikx tajbʼil tuʼn tok tilil quʼn tuʼn miʼntl tkubʼ qbʼinchaʼn il. Bʼant tuʼn Jehová tuʼn tkubʼ ttzʼibʼin apóstol Pedro aju nabʼil lu: «Kykwentin ok kyibʼe tuʼn miʼn kyxi lachʼoʼne kyuʼn xjal mya bʼaʼn qe ex ma che el tzpet tiʼj ju yol axix tok; kykwentin ok kyibʼe tuʼn kykyaj tene waʼlxix tuʼn miʼn kykubʼ tzʼaqe. Pero che chʼiyxe tuj t-xtalbʼil Qajaw ex Klol qe Jesucrist ex tzʼelx mastl kynikʼe tiʼj» (2 Pedro 3:17, 18).

18. Tuʼnju o tzaj tyekʼun Jehová t-xtalbʼil qiʼj, ¿tiʼ il tiʼj tuʼn tbʼant quʼn?

¹⁸ Qa in xi qqʼoʼn chjonte tiʼjju t-xtalbʼil Jehová at qiʼj, il tiʼj tuʼn kyajbʼen qeju tiʼchaq in tzaj tqʼoʼn qe tuʼn tjaw qnimsaʼn ex tuʼn qonin kyiʼj txqantl. ¿Alkye tten jaku bʼant quʼn? Tqʼama Pablo qa «junxilchaq toklen junjun qe ma tzaj tqʼoʼn Dios ik tzaʼnx» t-xtalbʼil. Tqʼama jlu: «Alkye at toklen tuʼn t-xi tpakbʼaʼn tyol Dios, bʼaʼn tuʼn t-xi tpakbʼaʼn». Ex tqʼamatl: «Alkye at toklen tuʼn tqʼonte xnaqʼtzbʼil, bʼaʼn tuʼn t-xi tqʼoʼn xnaqʼtzbʼil. Alkye at toklen tuʼn t-xi tqʼoʼn kynabʼl mastl, bʼaʼn tuʼn t-xi tqʼoʼn kynabʼl». Ax ikx tqʼama jlu: «Alkye in qʼaqʼan tkʼuʼj tiʼj juntl, oninx tuʼn tkyaqil tzalajbʼil» (Romanos 12:6-8). ¿Tiʼ t-xilen tkyaqil jlu? Tuʼnju o tzaj tyekʼun Jehová t-xtalbʼil qiʼj, il tiʼj tuʼn tok tilil quʼn tuʼn qpakbʼan, tuʼn t-xi qqʼoʼn xnaqʼtzbʼil tiʼj Tyol Dios kye txqantl, tuʼn t-xi qqʼuqbʼaʼn kykʼuʼj erman ex tuʼn tkubʼ qnajsaʼn kyil qeju in nok kybʼinchaʼn jun nya bʼaʼn qiʼj.

19. ¿Tiʼ qo xnaqʼtzal tiʼj toj juntl xnaqʼtzbʼil?

¹⁹ Tuʼnju o tzaj tqʼoʼn Jehová nimxix kʼiwlabʼil qe noq tuʼnju t-xtalbʼil at qiʼj, il tiʼj tuʼn tok tilil quʼn tuʼn tjapunxix qajbʼebʼil tuʼn qpakbʼaʼn tiʼj «tqanil bʼaʼn tiʼj t-xtalbʼil Dios» (Hechos 20:24). Toj juntl xnaqʼtzbʼil qo xnaqʼtzal tiʼj jlu.