1. Qʼamantza jun techel tiquʼn nimxix toklen tuʼn tok qqʼoʼn qwiʼ tiʼj alkye ambʼil atoʼ ex tiʼjju in bʼaj qtxlaj. (Qʼonka twitza tiʼj tnejel tilbʼilal).

QO XIMEN tiʼj qa chʼix t-xi tzyet jun nimaq chmabʼil. In jax nejenel te chmabʼil twitz plataforma ex in xi tqʼoʼn bʼaʼn kyulene kye kykyaqil. Ya chʼix t-xi ttzyet tqʼajqʼajel bʼitz. Ya ojtzqiʼn kyuʼn qeju ma che pon qa ma pon or tuʼn kykubʼ qeʼ. Kyajbʼil tuʼn tok kybʼiʼn qeju tbʼanel tqʼajqʼajel bʼitz ex kyajxix tuʼn tok kybʼiʼn qe chikʼbʼabʼil. Noqtzun tuʼnj, atlo junjun mintiʼ ma tzʼok kyqʼoʼn kywiʼ tiʼjju ma tqʼama nejenel, moqa mintiʼ in nok kybʼiʼn qa ya ma txi tzyet qeju tqʼajqʼajel kywi bʼitz. Tuʼn jlu mintiʼ in nel kynikʼ tiʼj qa ya ma pon ambʼil tuʼn t-xi tzyet nimaq chmabʼil ex tuʼntzunju kukx in che bʼet moqa kukx in che yolin kyukʼil kyamiw. Aju techel lu in tzaj tyekʼun qe aju jaku bʼaj qa mintiʼxix in nok qqʼoʼn qwiʼ tiʼj alkye ambʼil atoʼ moqa tiʼjju in bʼaj qtxlaj. Nim toklen aju xnaqʼtzbʼil jaku tzʼel qiʼn tiʼj jlu, tuʼnju toj chʼintl ambʼil kxeʼl tzyet juntl tiʼ nimxix toklen ex il tiʼj tuʼn tbʼaj qbʼinchaʼn qten. ¿Alqiʼj in qo yolin?

2. ¿Tiquʼn xi tqʼamaʼn Jesús kye t-xnaqʼtzbʼen tuʼn kyxqʼuqin?

 ² Xi tqʼamaʼn Jesús kye t-xnaqʼtzbʼen qa il tiʼj tuʼn kyxqʼuqin ex tuʼn tbʼaj kybʼinchaʼn kyten «aj tjapun bʼaj tqʼijlalil tiʼchaq at twitz Txʼotxʼ». Xi tqʼamaʼn jlu kye: «Ten kykwente kyiʼje, che xqʼuqine ex che naʼne Dios; porque mintiʼ bʼiʼn kyuʼne jtoj bʼan tjapun tqʼijlalil». Tej tbʼet ambʼil, nim maj xi tqʼamaʼn Jesús jlu kye: «Che xqʼuqine» (Mateo 24:3, TNM; kjawil uʼjit Marcos 13:32-37). In tzaj tyekʼun uʼj te Mateo qa xi tqʼamaʼn Jesús kye t-xnaqʼtzbʼen tuʼn kyxqʼuqin. Xi tqʼamaʼn jlu kye: «Che xqʼuqine, porque mintiʼ bʼiʼn kyuʼne alkye or tzul Kyajawe». Juntl maj, xi tqʼamaʼn jlu kye: «Kybʼincham kytene; porque chin ule tuj or aju mya ximan kyuʼne». Ex juntl maj, tqʼama jlu kye: «Che xqʼuqine, porque mintiʼ bʼiʼn kyuʼne alkye or chin ule» (Mateo 24:42-44; 25:13).

3. ¿Tiquʼn il tiʼj tuʼn tok qqʼoʼn qwiʼ tiʼj kawbʼil kyaj tqʼamaʼn Jesús?

³ Aqoʼ testigos de Jehová, in xi qbʼiʼn aju kawbʼil tqʼama Jesús. ¿Tiquʼn? Tuʼnju ojtzqiʼn quʼn qa in qo anqʼin kyoj «mankbʼil tqʼijlalil» ex qa ya chʼix txi tzyet «kʼixbʼisabʼl maʼxix» (Daniel 12:4; Mateo 24:21). Ik tzeʼn kyaj tqʼamaʼn Jesús, in che pakbʼan tmajen Jehová tqanil tiʼj Tkawbʼil Dios twitz tkyaqil Txʼotxʼ. Ax ikx in nok qqʼoʼn qwitz kyiʼj mas nimaq qʼoj, yabʼil, kyaqnajnabʼ, waʼyij, bʼiybʼil ex kyiʼj nya bʼaʼn kyoj nim lugar ik tzeʼn kyaj tqʼamaʼn Jesús. Nya oʼkxju, ax ikx mas o chʼiy kybʼet qeju nejenel kye okslabʼil ex in che sbʼun kyiʼj xjal (Mateo 24:7, 11, 12, 14; Lucas 21:11). Qajbʼilxix tuʼn tpon ambʼil tuʼn tul Jesús ex tuʼn tjapun tuʼn aju tajbʼil Ttat (Marcos 13:26, 27).

4. a) ¿Tiquʼn jaku txi qqʼamaʼn qa ya ojtzqiʼn tuʼn Jesús toj alkye qʼij tzul Armagedón? b) Maske mintiʼ ojtzqiʼn quʼn alkye qʼij kxel tzyet nimxix yajbʼil, ¿alqiʼj jaku tzʼok qeʼ qkʼuʼj?

⁴ Chʼixmi tkyaqil maj ojtzqiʼn quʼn toj alkye or kxel tzyet jun nimaq chmabʼil te prim ex te qale. Noqtzun tuʼnj, mintiʼ ojtzqiʼn quʼn toj alkyexix ambʼil kyxel tzyet nimxix yajbʼil. Tqʼma Jesús jlu: «Pero alkye qʼij ex alkye or tuʼn wule, mi aʼl jun xjal bʼilte, mi qe anjel tuj kyaʼj mintiʼ bʼiʼn kyuʼn, ax ikx weye mintiʼ bʼiʼn wuʼne, aqine Tkʼwaʼl Dios. Oʼkx Nmane bʼaʼn tuʼn» (Mateo 24:36). Tuʼnju a Jesús kbʼel nej toj qʼoj te Armagedón, jaku txi qqʼamaʼn qa ya ojtzqiʼn tuʼn jaʼlo toj alkye ambʼil kxel tzyet qʼoj lu (Apocalipsis 19:11-16). Atzun qe naʼmx tel qnikʼ tiʼj alkye qʼij ex alkye or tzul xitbʼil. Tuʼntzunju, nim toklen tuʼn tok qxqʼuqin qibʼ. O kubʼ t-ximen Jehová toj alkyexix ambʼil kyxel tzyet nimxix yajbʼil. Ex aju ambʼil lu mas niqayin taʼ. Ik tzeʼn in tzaj tqʼamaʼn Tyol Dios: «Mlay tzikʼx tiʼj» (kjawil uʼjit Habacuc 2:1-3). ¿Tiquʼn jaku tzʼok qeʼ qkʼuʼj tiʼj?

5. Qʼamantza jun techel aju in tzaj tyekʼun qa in japun twiʼ tyol Jehová tojxix ambʼil ik tzeʼn otoq tqʼama.

⁵ Toj tkyaqil ambʼil o japun kywiʼ tyol Jehová tojxix ambʼil ik tzeʼn tqʼama. Jun  techel, qo ximen tiʼj qʼij 14 te nisán te abʼqʼi 1513 tej naʼmxtoq tul Jesús. Atzun qʼij lu i etz tiʼn Jehová qe aj Israel toj tnam Egipto. Yajxitl, kubʼ ttzʼibʼin Moisés qa e klet toj «ax qʼij» aju tej chʼixtoq kykubʼ bʼaj qeju «430 abʼqʼi» (Éxodo 12:40-42). Tzaj tzyet qeju 430 abʼqʼi toj 14 te nisán te abʼqʼi 1943 tej naʼmxtoq tul Jesús, tej ttzaj tzyet tuʼn tjapun twiʼ tyol Jehová aju tuʼn ttzajtoq tkʼiwlaʼn qeju tiyjil, moqa tyajil Abrahán (Gálatas 3:17, 18). Tej tbʼet ambʼil, xi tqʼamaʼn Jehová te Abrahán qa che okeltoq qe tiyjil te stranjer xjal kyoj junjuntl tnam, qa che okeltoq te majen ex qa che bʼajeltoq yajlaʼn toj «kyaje syent abʼqʼi» (Génesis 15:13; Hechos 7:6). Aqeju kyaje syent abʼqʼi lu, e tzaj tzyet toj abʼqʼi 1913 tej naʼmxtoq tul Jesús, tej ok ten Ismael xmayil tiʼj Isaac. Ex e kubʼ bʼaj tej kyetz tiʼn Jehová qe aj Israel toj tnam Egipto (Génesis 21:8-10; Gálatas 4:22-29). Ik tzeʼn in nel qnikʼ tiʼj, toj nim syent abʼqʼi otoq bʼaj t-ximen Jehová alkye qʼij tuʼn kyklet aj Israel tuʼn.

6. ¿Tiquʼn jaku tzʼok qeʼ qkʼuʼj tiʼj qa kkolil Jehová tiʼj ttnam?

⁶ Jun kyxol qeju xjal i etz toj tnam Egipto a Josué. Tej tikʼtl nim abʼqʼi xi tnaʼn jlu kye aj Israel: «Wajbʼile tuʼn telxix kynikʼe tiʼj tuʼn tkyaqil kyanmiye ex tuʼn tkyaqil kykʼuʼje ax tok ma japun tuʼn Qman tkyaqilju bʼaʼn o tzaj ttziyan. Mintiʼ jun yol aju o tzaj ttziyan miwt ma japun tuʼn» (Josué 23:2, 14). O tzaj ttziyen Jehová kye tmajen qa ok che kletel tuʼn toj nimxix yajbʼil ex qa kxel tqʼoʼn kychwinqlal te jumajx toj akʼaj twitz Txʼotxʼ. Jaku tzʼok qeʼ qkʼuʼj tiʼj qa kjapunel twiʼ tyol Jehová. Tuʼntzunju, qa qaj tuʼn qanqʼin toj akʼaj twitz Txʼotxʼ, il tiʼj tuʼn tok qxqʼuqin qibʼ.

7, 8. a) ¿Tiʼ in bʼanttoq tuʼn jun xqʼuqil toj ambʼil ojtxi ex tiʼ xnaqʼtzbʼil jaku tzʼel qiʼn tiʼj? b) ¿Tiʼ jakutoq bʼaj qa in nikʼ jtan jun xqʼuqil? Qʼamantza jun techel.

⁷ Jaku tzʼel qiʼn jun tbʼanel xnaqʼtzbʼil kyiʼj qeju xjal in che xqʼuqintoq kyoj tnam toj ambʼil ojtxi. Toktoq qe muro matij kywaʼl tiʼj tnam Jerusalén ex junjuntl tnam tuʼntzun miʼn kyokx aj qʼoj. Atz in che kyaj ten qe xqʼuqil tzmax twi muro tuʼntzun tok kyqʼoʼntoq kywitz tiʼjju in bʼajtoq tiʼjxi tnam. Ateʼ junjuntl in che xqʼuqintoq ttziʼ tnam. Kykyaqil qe jlu iltoq tiʼj tuʼn kyxqʼuqin qʼijtl ex qonikʼen. Ex aj in noktoq kyqʼoʼn kywitz tiʼj qa kyjaʼtoq kytzaj aj qʼoj, iltoq tiʼj tuʼn t-xi kyqʼamaʼn kye kykyaqil xjal toj tnam (Isaías 62:6). Ojtzqintoq kyuʼn qa nim toklen tuʼn kyxqʼuqintoq ex tuʼn tok kyqʼoʼntoq kywitz tiʼjju in bʼaj kytxlaj. Qa mintiʼtoq xbʼant kyuʼn, jakutoq che kyim nim xjal (Ezequiel 33:6).

⁸ Toj abʼqʼi 70 tiʼj ambʼil iqʼin quʼn jaʼlo, e okx qeju soldad te tnam Roma toj tnam Jerusalén. ¿Alkye tten e okx? In tzaj tqʼamaʼn jun xjal in xnaqʼtzan tiʼjju o tzikʼ, aju Josefo tbʼi, qa e kyaj jtan junjun xjal in che xqʼuqintoq toj jun plaj te tnam. Iktzun tten e okx qeju soldad te tnam Roma, ok kyqʼoʼn tqʼaqʼal tja Dios ex kubʼ kyxiten tkyaqil tnam. Atzun jlu aju matij yajbʼil o tzaj tiʼj kytnam xjal aj Judiy.

9. ¿Tiʼ mintiʼ in nel kynikʼ nim xjal tiʼj?

⁹ Toj ambʼil jaʼlo, chʼixmi kykyaqil aj kawil at kysoldad ex o bʼaj kybʼinchaʼn junjun kʼuxbʼil mas akʼaj tuʼntzun tok kyxqʼuqin ttxaʼn kytnam. Tuʼn jlu in nok qeʼ kykʼuʼj tiʼj qa mlay che pon xjal xobʼsalte kytnam. Noqtzun tuʼnj, mintiʼ in nel kynikʼ tiʼj qa at  juntl kawbʼil toj kyaʼj mas nim tipumal kywitz, tojju kawbʼil lu, a Jesús kykawil. Toj chʼintl ambʼil, ok kqʼojil kawbʼil lu kyiʼj kykyaqil kykawbʼil xjal te twitz Txʼotxʼ (Isaías 9:6, 7, 56:10; Daniel 2:44). Qajbʼilxix tuʼn tpon qʼij aju ex qajbʼil tuʼn ya bʼantni qten aj tul. Tuʼntzunju, ilxix tiʼj tuʼn tok qqʼoʼn qwiʼ kyiʼj qeju yol e kyaj qʼamaʼn toj Xjan Uʼj ex qajbʼil tuʼn kukx qajbʼen te Jehová (Salmo 130:6).

10, 11. a) ¿Alqiʼj il tiʼj tuʼn tok qxqʼuqin qibʼ ex tiquʼn? b) ¿Tiquʼn in xi tqʼamaʼna qa o kubʼ kyiʼj xjal tuʼn Tajaw il tuʼn miʼn tok kyqʼoʼn qwiʼ kyiʼj yol e kyaj qʼamaʼn toj Tyol Dios?

¹⁰ Qo ximen tiʼj jun xqʼuqil mintiʼ ma jtan enter qonikʼen. Kyoj qeju makbʼil or aj chʼix qsqix ya otoq sikt. Tuʼntzunju, kwestlo tuʼn tok tilil tuʼn, tuʼn miʼn tikʼ jtan. Chʼixme ax jlu in bʼaj qiʼj toj ambʼil jaʼlo, in qo anqʼin kyoj mankbʼil tqʼijlalil. Tuʼntzunju, ilxix tiʼj tuʼn kukx tok tilil quʼn tuʼn miʼn qkyaj jtan. ¿Tiquʼn? Tuʼnju qa mas niqayin taʼ aju xitbʼil, mas kwest kʼelel toj qwitz tuʼn miʼn qikʼ jtan. Bʼisbʼajilxix qa ma bʼaj jlu qiʼj toj ambʼil jaʼlo. Qo xnaqʼtzan tiʼj oxe tiʼ aju jaku qo ikʼ jtan kyuʼn toj qokslabʼil.

¹¹ In sbʼun Tajaw il kyiʼj xjal. Tej chʼixtoq tkyim Jesús, xi tnaʼn oxe maj kye t-xnaqʼtzbʼen qa a Satanás «nejenel at twitz txʼotxʼ» (Juan 12:31; 14:30; 16:11). O che ajbʼen okslabʼil nya ax tok tuʼn Tajaw il tuʼn t-sbʼun kyiʼj xjal. Tuʼntzunju, at nim xjal mintiʼ in nok kyqʼoʼn kywiʼ kyiʼj qeju yol e kyaj qʼamaʼn toj Tyol Dios, aju in tzajxix kyyekʼun qa chʼix tul xitbʼil tiʼj tkyaqil nya bʼaʼn (Sofonías 1:14). Tuʼn jlu in nel qnikʼ tiʼj qa o «moẍsanjtz kynabʼl» xjal tuʼn Satanás (2 Corintios 4:3-6). Ex tuʼn jlu, nim xjal nya kyaj tuʼn qok kybʼiʼn aj in nok tilil quʼn tuʼn t-xi qqʼamaʼn kye qa chʼix tul xitbʼil ex qa ya in kawin Jesús. Chʼixmi tkyaqil maj in tzaj kyqʼamaʼn jlu qe: «Mintiʼ waje tiʼj».

12. ¿Tiquʼn mintiʼ tuʼn t-xi qqʼoʼn ambʼil tuʼn qkubʼ sbʼuʼn tuʼn Tajaw il?

¹² Maske at nim xjal nya kyaj tuʼn tel kynikʼ kyiʼj yol e kyaj qʼamaʼn toj Tyol Dios, mintiʼ tuʼn ttzaj bʼaj qkʼuʼj tuʼnju kymod. Ojtzqiʼn quʼn tiquʼn nim toklen tuʼn tok qxqʼuqin qibʼ. Xi tqʼamaʼn Pablo jlu kye  terman: «Bʼiʼnxix kyuʼne aju tqʼijlalil ok tul Qajaw tzul ik tzaʼn jun eleqʼ nnuʼl qonikʼan» (kjawil uʼjit 1 Tesalonicenses 5:1-6). Ex kyaj tqʼamaʼn Jesús jlu qe: «Noq bʼanin kytene, porque alkye or mintiʼ in che ximane tiʼj, atzun or chin ule» (Lucas 12:39, 40). Toj chʼintl ambʼil, ok che kbʼel t-sbʼuʼn Satanás xjal toj juntl tten. Kbʼantel tuʼn, tuʼn tkubʼ kyximen xjal qa «mintiʼ bʼis» ex qa «bʼaʼn taʼ tkyaqil». Ex noq minabʼen tzul tqʼijlalil Jehová. Tzul nim kyxobʼil xjal. ¿Yajtzun qe? Qa qajbʼil tuʼn ya bʼantni qten aj tul qʼij aju, mintiʼ tuʼn t-xi qqʼoʼn ambʼil tuʼn qkubʼ t-sbʼuʼn Tajaw il ik tzeʼn txqantl xjal. Tuʼntzunju, bʼaʼn tuʼn tbʼant quʼn aju tqʼama Pablo: «Noq oʼkx tuʼn qxqʼuqin ex tuʼn tten qnabʼl». Tuʼn tbʼant jlu quʼn, il tiʼj tuʼn quʼjin tiʼj Xjan Uʼj tkyaqil qʼij ex tuʼn qximen tiʼjju in tzaj tqʼamaʼn Jehová qe.

13. a) ¿Tiʼ o tzaj kyiʼj xjal tuʼnju nya bʼaʼn ximbʼetz? b) ¿Tiʼ jaku bʼant quʼn tuʼn miʼn tel qkanoʼn kyximbʼetz xjal?

¹³ Aju kyximbʼetz ex kyanqʼibʼil xjal mintiʼ ojtzqiʼn Jehová kyuʼn. Toj ambʼil jaʼlo, nim xjal in kubʼ kyximen qa mintiʼ tajbʼen kye aju tuʼn tok kyojtzqiʼn Dios (Mateo 5:3). Aju in bʼant kyuʼn, oʼkx in nok kyqʼoʼn nim ambʼil ex kyipumal tuʼn tkanet qeju tiʼchaq te twitz txʼotxʼ kyuʼn (1 Juan 2:16). Nya oʼkxju, ax ikx at mas saqchbʼil toj ambʼil jaʼlo. Kyuʼn saqchbʼil lu oʼkx in che ximen xjal tiʼjju kyajbʼil ex tiʼjju achbʼil (2 Timoteo 3:4). Aju o tzaj tuʼn jlu, mintiʼ in tzaj kynaʼn xjal aju mas nim toklen ex mintiʼ in che ximen tiʼj tuʼn tten jun kyamiwbʼil tukʼil Dios. ¿Tiʼ jaku bʼant quʼn tuʼn miʼn tel qkanoʼn tiʼj kyximbʼetz xjal? Tqʼama apóstol Pablo qa mintiʼ tuʼn tok qqʼoʼn qwiʼ kyiʼj qeju tiʼchaq qajbʼil. Qa ma txi qbʼiʼn nabʼil lu, mlay qo ikʼ jtan toj qokslabʼil (Romanos 13:11-14).

14. ¿Alkye kawbʼil in kanet quʼn toj Lucas 21:34, 35?

¹⁴ Qajbʼil tuʼn ttzaj tyekʼun xewbʼaj xjan qbʼe ex nya tuʼn kyximbʼetz xjal. O tzʼajbʼen xewbʼaj xjan tuʼn Jehová tuʼn tonin qiʼj tuʼntzun telxix qnikʼ tiʼj tiʼ kbʼajel toj chʼintl ambʼil (1 Corintios 2:12) ^[1] (tqanil jun). Noqtzun tuʼnj, il tiʼj tuʼn tok qkwentin qibʼ. Axpe ikx, jaku mlay tzʼok qqʼoʼn qwiʼ tiʼj qajbʼebʼil te Jehová kyuʼn junjun tiʼchaq in bʼant quʼn tkyaqil qʼij (kjawil uʼjit Lucas 21:34, 35). Jakulo tzaj kyqʼamaʼn junjun xjal qe qa mintiʼ qnabʼil tuʼnju in xi qnimen qa ya in qo anqʼin kyoj bʼajsbʼil tqʼijlalil (2 Pedro 3:3-7). Noqtzun tuʼnj, mintiʼ tuʼn t-xi qqʼoʼn ambʼil te jlu tuʼn ttzaj bʼaj qkʼuʼj tuʼn. At nim yekʼbʼil tiʼj qa ya chʼix tul xitbʼil. Qa qajbʼil tuʼn ttzaj tyekʼun xewbʼaj xjan qbʼe, il tiʼj tuʼn qxiʼ kyoj kykyaqil chmabʼil jatumel in nok qchmon qibʼ.

15. ¿Tiʼ bʼaj tiʼj apóstol Pedro, Santiago ex Juan, ex tzeʼn jaku bʼaj jlu qiʼj?

¹⁵ Tuʼnju ate junjun tiʼchaq jun rat in qo kubʼ kyuʼn, kwest tuʼn tok qxqʼuqin qibʼ. Ojtzqiʼn tuʼn Jesús qa aj il xjal qoʼ ex qa ateʼ junjun tiʼchaq jun rat in qo kubʼ kyuʼn. Qo ximen tiʼjju bʼaj tiʼj Jesús tej atxtoq juntl qonikʼen tuʼn tkyim. Tzʼaqlitoq te Jesús, noqtzun tuʼnj, ojtzqiʼntoq tuʼn qa iltoq tiʼj  tuʼn t-xi tqanin onbʼil te Jehová tuʼn tonin tiʼj tuʼn kukx tajbʼen te. Xi tqanin Jesús kye apóstol Pedro, Santiago ex Juan tuʼn miʼn kyikʼ jtan akux in naʼntoq Dios. Noqtzun tuʼnj, mintiʼ el kynikʼ tiʼj qa nim toklen tuʼn kyxqʼuqin toj ambʼil aju. ¿Tiʼtzun bʼaj kyiʼj? Tuʼnju nim otoq che sikt e ikʼ jtan. Ax ikx otoq sikt Jesús, noqtzun tuʼnj, mintiʼ te ikʼ jtan tuʼnju kukx naʼn Dios te Ttat. Ax jlu iltoq tiʼj tuʼn tbʼant kyuʼn qeju apóstol ik tzeʼn te Jesús (Marcos 14:32-41).

16. Ik tzeʼn kyaj tqʼamaʼn Jesús toj Lucas 21:36, ¿tiʼ il tiʼj tuʼn tbʼant quʼn tuʼn tok qxqʼuqin qibʼ?

¹⁶ ¿Tiʼ jaku tzʼonin qiʼj tuʼn miʼn qikʼ jtan ex tuʼn ya bʼantni qten aj tul tqʼijlalil Jehová? Nim toklen tuʼn tkubʼ qnaʼn qa axix tok qajbʼil tuʼn tkubʼ qbʼinchaʼn aju bʼaʼn. Noqtzun tuʼnj, nya oʼkx jlu kbʼantel quʼn. Tej atxtoq junjuntl qʼij tuʼn tkyim Jesús, xi tqʼmaʼn kye t-xnaqʼtzbʼen qa il tiʼj tuʼn kukx t-xi kyqanin te Jehová tuʼn tonin kyiʼj (kjawil uʼjit Lucas 21:36). Tuʼn tok qxqʼuqin qibʼ toj ambʼil jaʼlo, il tiʼj tuʼn kukx qnaʼn Dios (1 Pedro 4:7).

17. ¿Tiʼ jaku bʼant quʼn tuʼntzun tel qnikʼ tiʼj qa ya bʼantni qten tiʼjju ya chʼix tul?

¹⁷ Xi tqʼamaʼn Jesús kye t-xnaqʼtzbʼen qa tuʼn tul xitbʼil toj jun «or aju mya ximan», kyuʼn (Mateo 24:44). Tuʼntzunju, il tiʼj tuʼn tbʼaj qbʼinchaʼn qten toj tkyaqil ambʼil. Nya a ambʼil jaʼlo tuʼn qjyon kyiʼj qe tiʼchaq tokx tjaqʼ tkawbʼil Satanás. In tzaj kyqʼamaʼn xjal qe qa jaku qo tzalaj kyuʼn qeju tiʼchaq lu. Noqtzun tuʼnj, ojtzqiʼn quʼn qa nya ax tok jlu. Toj Xjan Uʼj in tzaj tqʼamaʼn Jehová ex Jesús aju jaku bʼant quʼn tuʼntzun tok qxqʼuqin qibʼ. Tuʼntzunju, bʼaʼn tuʼn tok qqʼoʼn qwiʼ kyiʼj qeju yol o kyaj qʼamaʼn toj Tyol Dios ex bʼaʼn tuʼn qximen tiʼj alkye tten in japun kywiʼ. Kukx qqʼonk tilil tuʼn tchʼiy qamiwbʼil tukʼil Jehová ex kukx qqʼonku Tkawbʼil tnejel toj qanqʼibʼil. Iktzun tten ya bʼantni qten aj tul xitbʼil (Apocalipsis 22:20). Bʼaʼn tuʼn ttzaj qnaʼn qa tuʼn jlu jaku qo klet.