IN TZAJ tqʼamaʼn uʼj te Mateo jlu: «Okxtzun Jesús tuj tja Dios, e bʼjeʼtz tlajoʼn kykyaqil qeju in che kʼayin ex in che loqʼon tuj tja Dios; ex jaw tpichʼqʼuʼn kymes qe chʼexpul twitz pwaq, tukʼix kyqʼuqbʼil qeju in che kʼayin paloma. Xi tmaʼn kye: —At jun yol in tmaʼn tuj Tuʼjil chi kyjaʼ: We nja, ja te nabʼl Dios tbʼi kʼokel, chi tuj Tuʼjil; atzun kyeye ma tzʼok kyqʼoʼne te kyjul eleqʼ» (Mat. 21:12, 13).

Aju txʼolbʼabʼil tiʼj kyanqʼibʼil aj Judiy, in tzaj tyekʼun qa in che sbʼuntoq kʼayil toj tja Dios kyiʼj xjal, tuʼnju in neltoq kyqanin nim kywiʼ kʼaẍjel kyiʼj. In tzaj tqʼamaʼn jun tqanil qa toj tnejel syent abʼqʼi iltoq tiʼj tuʼn taqʼunan jun xjal nya nim t-xnaqʼtzbʼil 25 qʼij tuʼntzun ttzaj tlaqʼoʼn kabʼe palom tuʼn t-xi tqʼoʼn te chojbʼil. In tzajtoq tqʼoʼn Ley ambʼil tuʼn t-xi kyqʼoʼn prow xjal qe paloma te chojbʼil. Noqtzun tuʼnj, otoq tjax nim kywiʼ ex tuʼntzunju ya mintiʼtoq laqʼet kyuʼn (Lev. 1:14; 5:7; 12:6-8). Nya bʼaʼn ela jlu toj twitz jun xjal rabino, aju Simeón ben Gamaliel tbʼi, ex kutz tiʼn tajlal chojbʼil il tiʼj tuʼn t-xi qʼet. Aju tbʼanel tzaj tuʼn jlu, ya oʼkx jaku che aqʼunan xjal oxe or tuʼn tkanet twiʼ kabʼe palom kyuʼn.

Ik tzeʼn ma tzʼel qnikʼ tiʼj, at nim tiquʼn ok tqʼoʼn Jesús kybʼi xjal in che kʼayin toj tja Dios te «eleqʼ», tuʼnju in che sbʼuntoq kyiʼj xjal, ex oʼkx e ximen tuʼn tkanet nim kypwaq.