DON, jun testigo de Jehová te tnam Canadá in nok tilil tuʼn tuʼn tyolin kyukʼil xjal in che anqʼin toj kay. In tzaj tqʼamaʼn aju bʼaj tiʼj jun xjal: «Peter, atzun jun xjal mas tzʼil at toj kay ex naʼmxtoq tok nqʼoʼne nwitze tiʼj juntl ik tzeʼn te. In tzajtoq nim tqʼoj ex tkyaqil maj in jyontoq tumel tuʼn ttzaj kyqʼoj txqantl tuʼn. Nim maj el tikʼun tbʼanel mod kubʼ kyyekʼun txqantl tiʼj». Maske ikju, ok tilil tuʼn Don tuʼn tkubʼ tyekʼun tbʼanel tmod tukʼil kyoj mas te 14 abʼqʼi.

Jun qʼij, xi tqanin Peter jlu te Don: «¿Tiquʼn nim in ximana wiʼje? Mintiʼ juntl xjal in ximen wiʼje. ¿Tiquʼn in bʼant teya tuʼn?». Toj tumel ajbʼen oxe texto tuʼn Don tuʼntzun tkuʼpin toj tanmi Peter. Tnejel, xi tqanin te qa ojtzqiʼn tuʼn qa at jun tbʼi Dios ex xi tqʼamaʼn te tuʼn tjaw tuʼjin Salmo 83:18 toj Tyol Dios. Yajxitl xi tyekʼun Don te Peter tiquʼn in ximen tiʼj, xi tqʼamaʼn te tuʼn tjaw tuʼjin Romanos 10:13 ex 14, jatumel in tzaj tqʼamaʼn qa «kykyaqil qeju in che kubʼsan twitz Qman, ok che kletel». Tuʼn tkubʼ bʼaj, jaw tuʼjin Don Mateo 9:36, aju in tqʼamaʼn: «Tejtzun tkeʼyinte Jesús nim xjal, tzaj qʼaqʼan tkʼuʼj kyiʼj; porque otoq che sikt ex in che bʼisun, ik kyten ik tzaʼn qe ẍneʼl mintiʼ pastoril kye». Xi tqʼamaʼn Don te Peter tuʼn tjaw tuʼjin. Tej tjaw tuʼjin, in noqʼ tej t-xi tqanin jlu: «¿In chin ok qʼoʼne te jun ẍneʼl ik tzeʼn qe jlu?».

Tzyet tchʼexpuʼn tibʼ Peter. Bʼaj bañarin, bʼaj tbʼinchaʼn tten t-xmatzi ex ok tqʼoʼn t-xbʼalun xi tqʼoʼn Don. Atxix toj ambʼil aju, ok tilil tuʼn tuʼn tbʼaj tsaqin t-xmilal ex tuʼn tbʼaj tbʼinchaʼn tten.

Kubʼ ttzʼibʼin Peter aju in bʼajtoq tiʼj junjun qʼij. Mintiʼxix in nel nikʼbʼaj kyiʼj tnejel yol kubʼ ttzʼibʼin ex bʼis qe, noqtzun tuʼnj, junxitl qeju mankbʼil. Jun kyxol jlu in tqʼamaʼntoq: «Jaʼlo, ma tzʼel nnikʼe tiʼj tbʼi Dios. Jaku chinx yoline te Jehová aj nnane Dios. Tbʼanelxix aj tel qnikʼ tiʼj tbʼi. In tzaj tqʼamaʼn Don weye qa jaku tzʼok Jehová te wamiwe, aju at ambʼil tiʼj tuʼn wok bʼiʼne tuʼn toj alkyexku ambʼil ex noq tiʼxku jaku txi nqʼamaʼne te».

 Aqeju makbʼil yol kubʼ ttzʼibʼin, kubʼ ttzʼibʼin kye terman. In tqʼamaʼntoq jlu:

«Nyaxix bʼaʼn atine jaʼlo. Malo bʼet wabʼqʼiye. Noqtzun tuʼnj, qa oʼkx mankbʼil qʼij atine jaʼlo, ojtzqiʼn wuʼne qa kʼokel nkeʼyine juntl maj wamiwe [Don] toj Tbʼanel Najbʼil. Qa in che uʼjine tiʼj jlu, in bʼant kyuʼne tuʼnju ya mintiʼ atine kyukʼile. Qa ma tzʼok kyqʼoʼne kywitze tiʼj jun xjal junxitl kywitz txqantl aj kyul toj muqbʼil wiʼje, che yoline tukʼil, ex kybʼinchame xtalbʼil, kyuʼjinktze uʼj lu aju azul, [atz in yolintoq tiʼj uʼj te onbʼil tuʼn qxnaqʼtzan tiʼj Tyol Dios, La verdad que lleva a vida eterna, aju otoq tzʼel junjun abʼqʼi tkyajlen qʼoʼn te]. * In tzaj tqʼamaʼn toj qa kʼokel nkeʼyine wamiwe juntl maj toj Tbʼanel Najbʼil. Qʼuqli nkʼuʼje tiʼj tuʼn tkyaqil wanmiye. Aju kyermane kʼujlaʼn qeye tuʼn, Peter».

Tej otoq kux muquʼn Peter, tqʼama Ummi, jun tanabʼ jlu: «Ma tzʼel kabʼe abʼqʼi pon yolin Peter wukʼile. Otoq tzʼel nim ambʼil ex tzma tnejel maj in tzalajtoq. Axpe ikx in tzeʼntoq». Ex tqʼama jlu te Don: «Kjawil wuʼjine uʼj tuʼnju noq alkye jun tiʼ o pon tiʼj tanmi nxibʼane, nimlo toklen». Ax ikx bʼaʼn ela toj twitz Ummi tuʼn tpon jun testigo de Jehová visitaril te tuʼntzun t-xnaqʼtzaʼn tiʼj uʼj ¿Tiʼ in tzaj t-xnaqʼtzaʼnxix Tyol Dios?

Ax ikx qe, jaku tzʼok tilil quʼn tuʼn miʼn tok qqʼoʼn qwitz oʼkx tiʼjju in nok qkeʼyin, tuʼn tkubʼ qyekʼun axix tok kʼujlabʼil ex qpasens tiʼj alkyexku xjal (1 Tim. 2:3, 4). Qa ma bʼant jlu quʼn, jakulo qo onin tuʼn tkuʼpin axix tok toj kyanmi xjal, ik tzeʼn Peter, maske nya tbʼanel qe aj tok qqʼoʼn qwitz kyiʼj tnejel maj, noqtzun tuʼnj, kyaj tuʼn tel kynikʼ tiʼj. Ojtzqiʼn quʼn qa kchʼiyil axix tok toj kyanmi qeju kyaj tuʼn kypon laqʼeʼ ttxlaj Dios, aju in nok tqʼoʼn twitz «tiʼj tanmi xjal» (1 Sam. 16:7; Juan 6:44).