1, 2. a) ¿Alkye jun tiʼ mas nim toklen tuʼn kyonin xjal tiʼj? b) ¿Tiquʼn nim toklen tuʼn tel qnikʼ tiʼj jlu?

MAS nim toklen pwaq toj kywitz nim xjal. Tuʼntzunju, oʼkx in che ximen tuʼn tkanet kyqʼinumabʼil moqa tuʼn miʼn tnaj aju at kye. Atzun kye txqantl, mas nim toklen toj kyja ex qa tuʼn miʼn ttzaj yabʼil kyiʼj.

² Noqtzun tuʼnj, at jun tiʼ mas nim toklen kywitz kykyaqil jlu ex mintiʼ tuʼn tikʼ tnaʼl quʼn: aju tuʼn qonin tiʼj toklen Jehová tuʼn tkawin. Jaku tzikʼ tnaʼl jlu quʼn qa mintiʼ ma tzʼok qxqʼuqin qibʼ, tuʼnju oʼkx jaku qo ximen kyiʼj junjun tiʼchaq in bʼant quʼn junjun qʼij moqa kyiʼj nya bʼaʼn in che tzaj qiʼj. Qa mas ma tzʼel qnikʼ tiʼj toklen Jehová tuʼn tkawin, mas kbʼajel qbʼinchaʼn qten tuʼn qkubʼ weʼ kywitz nya bʼaʼn in che tzaj junjun qʼij ex mas kchʼiyil qamiwbʼil tukʼil Jehová.

3. ¿Alkye yol in tzaj tqʼamaʼn Satanás tiʼj tkawbʼil Jehová?

³ Tqʼama Satanás qa mintiʼ toklen Jehová tuʼn tkawin. In tzaj tqʼamaʼn qa at sbʼubʼil toj tkawbʼil, qa nya taj tuʼn ttzaj tqʼoʼn aju mas bʼaʼn qe ex qa mas jaku che tzalaj xjal qa ma che kawin kyuʼnx kyibʼ (Gén. 3:1-5). Ax ikx o tzaj tqʼamaʼn  qa mintiʼ jun xjal in najbʼen tuʼn tkyaqil tanmi te Jehová ex qa kykyaqilx jaku tzʼel kyikʼun toklen qa ma che ok obligarin tuʼn tbʼant kyuʼn (Job 2:4, 5). Tuʼntzunju in tzaj tqʼoʼn Jehová ambʼil tuʼntzun telxix jlu toj qʼanchaʼl: qa ma tzʼel qikʼun toklen Jehová tuʼn tkawin, in tzaj nim nya bʼaʼn.

4. ¿Tiquʼn il tiʼj tuʼn t-xi bʼinchet tiʼj toklen Jehová tuʼn tkawin?

⁴ Ojtzqiʼn tuʼn Jehová qa nya ax tok qe yol o tqʼama Satanás. Qa ikju, ¿tiquʼn o txi tqʼoʼn nim ambʼil tuʼn tel jlu toj qʼanchaʼl qa ax tok moqa nya ax tok aju tqʼama Satanás? At toklen tzaqʼwebʼil tiʼj xjel lu kyukʼil anjel ex qe xjal (kjawil uʼjit Salmo 83:18). At nim xjal o tzʼel kyikʼun toklen Jehová tuʼn tkawin ik tzeʼn bʼant tuʼn Adán ex Eva. Atlo junjun jaku kubʼ kyximen qa ax tok aju tqʼama Satanás. Akux in nel kynikʼ xjal tiʼj jlu, mlay ten tzalajbʼil ex mujbʼabʼil kyxol. Ajtzun tel toj qʼanchaʼl qa a Jehová at toklen tuʼn tkawin, qkyaqilx qo anqʼil te jumajx tjaqʼ tkawbʼil ex ktel mujbʼabʼil kyxol kykyaqil tbʼinchbʼen (Efes. 1:9, 10).

5. ¿Alkye tten in qo onin tiʼj toklen Jehová tuʼn tkawin?

⁵ Kʼelel toj qʼanchaʼl qa tbʼanel te Jehová kawin ex qa nya bʼaʼn tkawbʼil Satanás, ex kykawbʼil xjal, tuʼntzunju che kbʼel najset. Atzunte Jehová tkawbʼil kukx ktel aj ttzyet tkawin Mesías. Otoq kubʼ kyyekʼun qe tmajen Jehová kukx in che ajbʼen te qa jaku che onin xjal tiʼj toklen tuʼn tkawin (Is. 45:23, 24). ¿Qajpe tuʼn qten kyxol qeju tmajen Dios lu? Qaj. Tuʼn qten kyxol, il tiʼj tuʼn ttzaj qnaʼn ex tuʼn tel qnikʼ tiʼj qa nim toklen Jehová tuʼn tkawin.

6. ¿Jniʼ toklen kye xjal aju toklen Jehová tuʼn tkawin?

⁶ Ik tzeʼn ma qo xnaqʼtzan tiʼj, aju toklen Jehová tuʼn tkawin, nim toklen jlu kye xjal. Mas nim toklen twitzju tuʼn ttzalaj alkyexku qe. ¿Ape t-xilen jlu qa nya nim toklen tuʼn qklet moqa mintiʼ tkʼujlabʼil Jehová qiʼj? Miʼn. ¿Tiquʼn?

7, 8. ¿Tiʼ toklen tuʼn tel toj qʼanchaʼl aju toklen Jehová tuʼn tkawin tukʼilju tuʼn kyjapun twi tyol?

⁷ Nim qoklen toj twitz Jehová ex at nim tkʼujlabʼil qiʼj. Tuʼntzunju tzaj tqʼoʼn Tkʼwaʼl tuʼn tkyim tuʼn qklet ex tuʼn ttzaj tqʼoʼn qchwinqlal te jumajx (Juan 3:16; 1 Juan 4:9). Noqwit mlay che japun twiʼ Tyol Jehová, jaku tzʼajbʼen jlu tuʼn Tajaw il tuʼn ttzaj tqʼamaʼn qa in yolin Jehová tiʼj nya ax tok yol ex qa in nok te jun nya bʼaʼn aj kawil tuʼnju mintiʼ in tzaj tqʼoʼn aju mas bʼaʼn kye xjal. Ax ikx jaku tzʼajbʼen tuʼn tuʼn t-xi tqʼamaʼn jlu kye qeju in che qʼojin tiʼj Jehová: «¿Jatumtzun taʼ tuʼn tul Crist ik tzaʼn tzaj tmaʼn? Porque atxix tej kykyim qe qxeʼchel, ttenx tkyaqil ik tzaʼn t-xe tnejel tej tbʼant twitz txʼotxʼ» (2 Ped. 3:3, 4). Tuʼntzunju, kbʼantel tuʼn Jehová tuʼn kyklet xjal bʼaʼn che nimen te, tuʼnju at toklen jlu tukʼilju toklen tuʼn tkawin (kjawil uʼjit Isaías 55:10, 11). Nya oʼkxju, ax ikx kkawil Jehová tukʼil kʼujlabʼil. Tuʼn jlu jaku tzʼok qeʼ qkʼuʼj tiʼj qa kukx che okel tkʼujlaʼn ex kʼokel tqʼoʼn kyoklen tmajen kukx in che ajbʼen te (Éx. 34:6).

⁸ Aj tok qqʼoʼn mas toklen Jehová tuʼn tkawin, mintiʼ in yolin jlu tiʼj qa mintiʼ in nok qqʼoʼn toklen aju tuʼn qklet moqa nyaxix nim qoklen toj twitz Jehová. Aju in bʼant quʼn, in kubʼ qqʼoʼn teyele junjun tiʼchaq toj tlugar, aju toklen  Jehová tuʼn tkawin ex aju tuʼn qklet. Nim toklen tuʼn tel qnikʼ tiʼj jlu tuʼntzun miʼn tikʼ tnaʼl quʼn alkye mas nim toklen ex tuʼn qonin tiʼj toklen Jehová tuʼn tkawin.

9. ¿Tiʼ tqʼama Satanás tiʼj Job? (Qʼonka twitza tiʼj tnejel tilbʼilal).

⁹ Aju uʼj te Job, jun ojtxe uʼj kubʼ tzʼibʼin toj Tyol Dios, in tzaj tyekʼun qa nim toklen tuʼn tten tbʼanel qximbʼetz. In jaw quʼjin toj uʼj lu qa tqʼama Satanás qa tuʼn tel tikʼun Job Jehová qa ma tzaj nim yajbʼil tiʼj. Xi tqanin Satanás te Jehová tuʼn tok tbʼinchaʼn nya bʼaʼn tiʼj Job. Mintiʼ bʼant jlu tuʼn Jehová maske xi tqʼoʼn ambʼil tuʼn tok tmajen toj malbʼil. Xi tqʼamaʼn Jehová jlu te Satanás: «Bʼinchama alkye taja tuʼn tbʼant tiʼj tkyaqil tiʼxti at te» (kjawil uʼjit Job 1:7-12). Jun rat e kyim qe tmajen Job, e naj qe tiʼchaq te ex e kyim qe lajaj tkʼwaʼl. Ok tilil tuʼn Satanás tuʼn tkubʼ t-ximen Job qa a Jehová at tpaj tiʼj tkyaqil yajbʼil tzaj tiʼj (Job 1:13-19). Yajxitl, ok tqʼoʼn Satanás jun kʼixkʼoj yabʼil tiʼj Job (Job 2:7). Ex tuʼn t-xiʼ mas toj il, ok tilil tuʼn t-xuʼjil Job ex qeju oxe xjal ok kyqʼon kyibʼ te tamiw tuʼn ttzaj bʼaj tkʼuʼj kyuʼn (Job 2:9; 3:11; 16:2).

10. a) ¿Alkye tten kubʼ tyekʼun Job qa kukx ajbʼen te Jehová? b) ¿Tiʼ el txalpaj Job tiʼj?

¹⁰ ¿Axpe tok aju tqʼama Satanás? Nya, tuʼnju mintiʼ el tpan tibʼ Job tiʼj Jehová (Job 27:5, TNM). Maske ikju, pon jun ambʼil jatumel ikʼ tnaʼl tuʼn Job alkye mas nim toklen. Ok tqʼoʼn twiʼ tiʼj tuʼn tkubʼ tyekʼun qa tbʼanel xjal te, axpe ikx tajtoq tuʼn t-xi chikʼbʼaʼn te tiquʼn in tzajtoq nya bʼaʼn tiʼj (Job 7:20; 13:24). Jakulo kubʼ qximen qa toj tumel aju bʼant tuʼn tuʼnju in nel qnikʼ tiʼj tkyaqilju otoq tzikʼ tiʼj, noqtzun tuʼnj, kubʼ t-ximen Jehová tuʼn t-xi kawit. ¿Tiʼ tqʼama?

11, 12. a) ¿Tiʼ el tnikʼ Job tiʼj noq tuʼnju onin Jehová tiʼj? b) ¿Alkye tmod Job kubʼ tyekʼun?

¹¹ In jaw quʼjin qe tyol Jehová kyoj capítulo 38 a 41 toj uʼj te Job, noqtzun tuʼnj, mintiʼ jatumel in kanet quʼn qa xi tchikʼbʼaʼn Jehová te Job tiquʼn tzaj yajbʼil tiʼj. Oʼkx tajtoq Jehová tuʼn tonin tiʼj Job tuʼn tel tnikʼ tiʼj qa mlay tzʼok tmojbʼan tibʼ tukʼil Dios, tuʼnju matijxix toklen. Ax ikx onin tiʼj tuʼn tel tnikʼ tiquʼn e tzaj nya bʼaʼn tiʼj ex qa at junjuntl tiquʼn mas nim kyoklen (kjawil uʼjit Job 38:18-21). Noq tuʼn jlu, kubʼ tchʼixpuʼn Job t-ximbʼetz attoq tnejel.

¹² ¿Kyuwpe yolin Jehová tukʼil Job tej t-xi tqʼamaʼn qe yol lu te tej otoqxi tzikʼ toj nim yajbʼil? Miʼn, ex mintiʼ kubʼ  t-ximen Job ikju. Maske otoq tzikʼ toj nim yajbʼil, chebʼe el tnikʼ kyiʼj tiʼchaq. Axpe ikx tqʼama jlu: «Ma tzaj nbʼise tuʼnju yol xi nmaʼne ex nnuʼl tilil wuʼne, ex lu qine qʼuql tuj quq ex tuj tzaʼj». Xi tqʼamaʼn Jehová qe yol tojxix ambʼil at tajbʼen te Job ex ok qʼuqbʼaʼn tkʼuʼj kyuʼn (Job 42:1-6). Ax ikx otoq txi tkawin kuʼxun Elihú te Job (Job 32:5-10). Ok tqʼoʼn Jehová twitz tiʼj tmod Job kubʼ tyekʼun ex tqʼama qa bʼaʼn ela te (Job 42:7, 8).

13. ¿Alkye tten kukx e onin qe tyol Jehová tiʼj Job tej otoqxi tzikʼ toj nya bʼaʼn?

¹³ Kukx e onin qe tyol Jehová tiʼj Job, axpe ikx tej ya mintiʼ e tzaj yajbʼil tiʼj. Ax tok xi «kyʼiwlaʼn Job tuʼn Dios kyuj mankbʼil tabʼqʼiyil mas nimxix ik tzaʼn nej», noqtzun tuʼnj, mintiʼ chʼexpaj naj jlu. Xi tiʼn ambʼil tuʼn kyul itzʼji «wuqtl tkyʼajal ex oxtl tmeʼjel» (Job 42:12-14). Kukxlo bʼisun Job kyiʼj tkʼwaʼl otoq che kyim tuʼn tpaj Satanás. Ax ikx, tzajlo tnaʼn tkyaqilju otoq tzikʼ tiʼj toj jun ambʼil. Ex maske el tnikʼ tiʼj tiquʼn tzaj nya bʼaʼn tiʼj, kubʼlo t-ximen junjun maj tiquʼn iltoq tiʼj tuʼn tikʼ kyoj nim nya bʼaʼn. Noq alkyexku bʼaj, jakutoq tzaj tnaʼn qe yol otoq tqʼama Jehová te. Jakutoq tzʼonin jlu tiʼj tuʼn tten tbʼanel t-ximbʼetz ex jakutoq tzʼok qʼuqbʼaʼn tkʼuʼj kyuʼn (Sal. 94:19).

14. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Job?

¹⁴ Ax ikx jaku tzʼonin txʼolbʼabʼil tiʼj Job qiʼj tuʼntzun tten tbʼanel qximbʼetz ex tuʼn ttzaj tqʼuqbʼaʼn qkʼuʼj. Kyaj tqʼoʼn Jehová qe yol lu «te xnaqʼtzbʼil qe, tuʼn tten qpasens ex tuʼn tqeʼ qkʼuʼj tuʼnju yol tzʼibʼan tuj Tuʼjil, tuʼntzun tqeʼxix qkʼuʼj tiʼj Dios» (Rom. 15:4). Aju xnaqʼtzbʼil mas nim toklen, aju tuʼn miʼn tok qqʼoʼn qwiʼ tiʼjju in bʼaj qiʼj, tuʼnju jaku tzikʼ tnaʼl quʼn aju mas nim toklen: aju tuʼn qonin tiʼj toklen Jehová tuʼn tkawin. Ex bʼaʼn tuʼn ttzaj qnaʼn qa in qo onin tiʼj toklen Jehová tuʼn tkawin qa kukx ma qo ajbʼen te, axpe ikx kyoj ambʼil nya bʼaʼn, ik tzeʼn bʼant tuʼn Job.

15. ¿Tiʼ kbʼajel qa kukx in qo ajbʼen te Jehová aj kytzaj nya bʼaʼn qiʼj?

¹⁵ ¿Tiquʼn in nok qʼuqbʼaʼn qkʼuʼj aj qximen qa nim toklen tuʼn kukx qajbʼen te Jehová? Tuʼnju in tzaj tnaʼn qe qa nya noqx gan in tzaj yajbʼil qiʼj. Aj qikʼ toj yajbʼil, nya a t-xilen qa in qʼojin Jehová qiʼj, sino in tzaj kyqʼoʼn ambʼil tuʼn tkubʼ qyekʼun qa qaj tuʼn tkawin Jehová qibʼaj (Prov. 27:11). Qa kukx ma tzikʼx quʼn, tzul tkʼiwlaʼn Jehová qoʼ ex kchʼiyil mas qʼuqbʼil qkʼuʼj (kjawil uʼjit  Romanos 5:3-5). Aju ikʼ tiʼj Job, in tzaj tyekʼun qa «ate Qman nim in qʼaqʼan tkʼuʼj ex in tzʼeʼy tkʼuʼj qiʼj» (Sant. 5:11). Tuʼntzunju, jaku tzʼok qeʼ qkʼuʼj tiʼj qa tzul tkʼiwlaʼn kye kykyaqil qeju in che onin tiʼj toklen tuʼn tkawin. Aj tel qnikʼ tiʼj jlu, in nonin qiʼj tuʼn kukx kyikʼx yajbʼil quʼn tukʼil pasens ex tzalajbʼil (Col. 1:11).

16. ¿Tiquʼn il tiʼj tuʼn ttzaj qnaʼn qa nim toklen tuʼn qonin tiʼj toklen Jehová tuʼn tkawin?

¹⁶ Ax tok, kwest tuʼn ttzaj qnaʼn aju toklen Jehová tuʼn tkawin, mas qa in kubʼ qnaʼn bʼis tuʼn jun nya bʼaʼn. Axpe ikx, oʼkx jaku txi bʼaj qwiʼ kyiʼj junjun nya bʼaʼn chʼin kyoklen qa oʼkx ma qo ximen kyiʼj. Tuʼntzunju, bʼaʼn tuʼn ttzaj qnaʼn qa nim toklen tuʼn qonin tiʼj toklen Jehová tuʼn tkawin aj qikʼ kyoj ambʼil kwest.

17. Qa atz tok qwiʼ tiʼj aqʼuntl o tzaj tqʼoʼn Jehová qe, ¿tiquʼn in nonin qiʼj tuʼn miʼn tikʼ tnaʼl quʼn aju toklen Jehová tuʼn tkawin?

¹⁷ Qa atz tok qwiʼ tiʼj aqʼuntl o tzaj tqʼoʼn Jehová qe, jaku tzʼonin qiʼj tuʼn miʼn tikʼ tnaʼl quʼn aju toklen Jehová tuʼn tkawin. Qo xnaqʼtzan tiʼj jun techel. Tzaj jun derrame cerebral tiʼj jun ermana ex nim maj tzaj kʼixkʼoj tiʼj tuʼn jlu, ax ikx attoq cáncer tiʼj. Tej tok qʼanbʼil tiʼj, pakbʼan kye xjal in che aqʼunan toj spital, kye junjuntl yabʼ ex kye qeju e pon visitaril te. Jun maj, pakbʼan 80 or kyoj kabʼe seman tukʼil mij, moqa nikʼjan, tej tten toj spital. Mintiʼ ikʼ tnaʼl tuʼn aju toklen Jehová tuʼn tkawin, axpe ikx mintiʼ ikʼ tnaʼl tuʼn tej chʼixmi kyim. Onin jlu tiʼj tuʼn miʼn tkubʼ tnaʼn nim kʼixkʼoj.

18. ¿Tiʼ xnaqʼtzbʼil in tzaj tqʼoʼn qe aju ikʼ tiʼj jun ermana tej tonin tiʼj toklen Jehová tuʼn tkawin?

¹⁸ Qajbʼil tuʼn tok qqʼoʼn qwiʼ tiʼj toklen Jehová tuʼn tkawin aj qok weʼ tkyaqil qʼij kywitz nya bʼaʼn chʼin kyoklen. Ten Jennifer oxe qʼij toj jun aeropuerto, in nyontoq tiʼj jun avión tuʼn tmeltzʼaj tja. Tzaj qʼamaʼn qa ya mlaytoq che ex avión, ex ax tzaj qʼamaʼn jun ex juntl maj. Aju mas nya kwest jaku bʼant tuʼn tej tkubʼ tnaʼn qa tjunalx at ex tej tsikt, aju tuʼn ttzaj qʼaqʼin tkʼuʼj tiʼjx. Noqtzun tuʼnj, mintiʼ bʼant jlu tuʼn. Xi tqanin onbʼil te Jehová tuʼntzun tpakbʼan kye txqantl xjal otoq tzaj bʼaj kykʼuʼj ik tzeʼn te. ¿Tzeʼn ok? Pakbʼan kye nim xjal ex kyaj tqʼoʼn nim quʼj kye. Tqʼama Jennifer jlu: «Maske kwest ok jlu, kubʼ nnaʼne qa tzaj tkʼiwlaʼn Jehová qine ex tzaj tqʼoʼn wipumale tuʼn tjaw nnimsaʼne tbʼi». Tuʼn jlu in nel qnikʼ tiʼj qa mintiʼ ikʼ tnaʼl tuʼn aju t-ximbʼetz Jehová.

19. ¿Alkye kyximbʼetz tmajen Jehová at tiʼj toklen tuʼn tkawin?

¹⁹ Kukx o tzʼel kynikʼ tmajen Jehová tiʼjju toklen Kydios tuʼn tkawin ex in che onin tiʼj. Tuʼn jlu, junxitl qe kywitz txqantl okslabʼil nya ax tok. Teyele junjun qe il tiʼj tuʼn tel qnikʼ tiʼj qa axju in bʼant quʼn, tuʼnju in qo onin tiʼj kʼulbʼil axix tok.

20. ¿Tiʼ t-ximbʼetz Jehová at tiʼj onbʼil in xi qqʼoʼn tiʼj toklen tuʼn tkawin?

²⁰ Jaku tzʼok qeʼ qkʼuʼj tiʼj qa nim toklen toj twitz Jehová aj qonin tiʼj toklen tuʼn tkawin tuʼnju kukx in nikʼx quʼn ex tuʼnju kukx in qo ajbʼen te (Sal. 18:25). Toj juntl xnaqʼtzbʼil kʼelel mas qnikʼ tiʼj tiquʼn at toklen Jehová tuʼn qonin tiʼj tkawbʼil ex alkye tten jaku bʼant quʼn.