TAJ Jehová tuʼn tok qqʼoʼn toklen mujbʼabʼil ex tuʼn tok tilil quʼn tuʼn kukx tten. Aj tbʼant jlu quʼn, in qo tzalajxix tuʼnju at nim mujbʼabʼil qxol. Tuʼn jlu jaku che oktz txqantl toj ttnam Jehová.

Jun techel, jun chman, moqa aj yoʼẍ, ojtzqiʼnxix kyuʼn xjal te tnam Madagascar jaw labʼin tiʼj mujbʼabʼil at kyxol testigos de Jehová. Kubʼ t-ximen jlu: «Qa ma pon jun qʼij tuʼn nxiʼye toj jun okslabʼil, a jlu kjawil njyoʼne». Tej tbʼet ambʼil, kyaj tkolin tuʼn tbʼinchan kyaqʼun chman, ikʼ nim xjaw ok tilil tuʼn tuʼn tkubʼ tbʼinchaʼn aju in tzaj tqʼamaʼn Tyol Dios toj tmejebʼleʼn ex ok te jun ajbʼel te Jehová, aju Dios te mujbʼabʼil.

Ik tzeʼn aju chman lu, at nim xjal in kanet mujbʼabʼil kyuʼn toj ttnam Jehová tkyaqil abʼqʼi, aju mujbʼabʼil in che jyonxix tiʼj. In tzaj tqʼamaʼn Tyol Dios qa aju tloʼch qanmi ex aju qʼoj in tzaj kyxol jun kʼloj okslal, jaku naj kyamiwbʼil erman tuʼn ex jaku tzaj tiʼn nim nya bʼaʼn (Sant. 3:14-16). Ax ikx in tzaj tqʼoʼn Tyol Dios qe tbʼanel nabʼil, aʼyeju in che onin tuʼn miʼn ttzaj jun nya bʼaʼn ex tuʼn kukx tten mujbʼabʼil qxol. Qo xnaqʼtzan tiʼj alkye tten o kubʼ kyqʼoʼn junjun erman qe nabʼil lu toj xnaqʼtzbʼil.

«At jun nya bʼaʼn qxole tukʼil jun erman in naqʼunantoq junx wukʼile. Jun qʼij akux in qo schʼine, e okx kabʼe xjal ex kyil tej in qo iline» (chi CHRIS).

«Jun ermana kukx in qo pakbʼane junx tukʼil, noq minabʼen kyaj tkolin tuʼn tex pakbʼal wukʼile, axpe ikx ya mintiʼ tzaj yolin weʼye. Mintiʼtoq ojtzqiʼn wuʼne tiquʼn» (chi JANET).

«Ok jun conferencia quʼne tuʼn qyoline oxe qbʼete toj teléfono. Kyaj tkolin jun tuʼn tyolin, ex kubʼ nximane qa otoq kubʼ tcolgarin teléfono. Tuʼntzunju, in nok tene yolil nya bʼaʼn tiʼj, noqtzun tuʼnj, mintiʼ otoq kubʼ tcolgarin teléfono ex ok tbʼiʼn tkyaqilju nqʼamaye tiʼj» (chi MICHAEL).

«Kyxol jun kʼloj okslal, attoq jun nya bʼaʼn kyxol kabʼe precursora. Ok ten jun ilil tiʼj juntl tkyaqil maj. Tzaj bʼaj kykʼuʼj txqantl tuʼnju nya bʼaʼn attoq kyxol» (chi GARY).

Bʼalo nya nim kyoklen qeju nya bʼaʼn lu toj qwitz, noqtzun tuʼnj, kubʼlo kynaʼn bʼis qeju e ikʼ toj nya bʼaʼn lu ex tzajlo nya bʼaʼn tiʼj mujbʼabʼil at kyxol kʼloj okslal tuʼn. Kykyaqil erman lu e ok lepeʼ tiʼj onbʼil in tzaj tqʼoʼn Tyol Dios ex onin kyiʼj tuʼn tten mujbʼabʼil kyxol juntl maj. ¿Alkyeqe nabʼil e onin kyiʼj?

«Miʼn che qʼojle tuj bʼe» (Gén. 45:24). Xi tqʼoʼn José nabʼil lu kye terman tej naʼmxtoq kymeltzʼaj tukʼil kyman. ¡Tbʼanelxix qe yol lu! Qa at jun xjal jun rat naj in kubʼ tnaʼn nya bʼaʼn ex jun rat naj in tzaj tqʼoj, jaku tzaj kyqʼoj  txqantl tuʼn jlu. El tnikʼ Chris tiʼj qa in jawtoq tnimsan tibʼ ex kwest tuʼn t-xi tbʼiʼn aju in tzaj kyqʼamaʼn txqantl te. Tuʼnju tajtoq tuʼn tkubʼ tchʼixpuʼn tmod, xi tqanin najsam te erman otoq ilin tukʼil ex ok tilil tuʼn tuʼn miʼn ttzaj naj tqʼoj. Tej tok tqʼoʼn erman twitz tiʼj qa in nok tilil tuʼn Chris tuʼn tkubʼ tchʼixpuʼn tmod, ax jlu bʼant tuʼn erman. Atzun jaʼlo, in che tzalaj ex in che ajbʼen junx te Jehová.

«Mintiʼ in japun aju in kubʼ kyximan xjal qa mi aʼl jun qʼol kykonsej» (Prov. 15:22). El tnikʼ Janet tiʼj qa il tiʼj tuʼn t-xi tbʼiʼn aju nabʼil lu, tuʼntzunju kubʼ t-ximen tuʼn tyolin tukʼil ermana. Tej kyyolin, xi tqanin Janet te ermana tiquʼn otoq tzaj tqʼoj. Kyuw e yolin tej t-xi tzyet kyuʼn, noqtzun tuʼnj, bʼant tiʼj tej kyyolin chebʼe. El tnikʼ ermana tiʼj qa nya bʼaʼn otoq tzʼel junjun tiʼ toj twitz, aju mintiʼ toklen tukʼil Janet, tuʼntzunju xi tqanin najsam te. Atzun jaʼlo in che ajbʼen junx te Jehová juntl maj.

«Kyjaʼtzun, ok t-xiʼya qʼol toyaja twitz altar, ok tpona ex qa ma tnaʼya qa at jun tila twitz termaniya, axtzun kyjel tqʼoʼna toyaja twitz altar, ex nej txiʼya tukʼil termaniya tuʼn tbʼant ttena tukʼil, maxitzun kxel tqʼoʼna toyaja» (Mat. 5:23, 24). Jakulo tzul nabʼil lu toj qwiʼ aju xi tqʼoʼn Jesús toj tchikʼbʼabʼil twiʼ jun witz. Kubʼ tnaʼn Michael nya bʼaʼn tej tel tnikʼ tiʼj qa mintiʼ otoq kubʼ tyekʼun tbʼanel tmod tukʼil erman. Noqtzun tuʼnj, otoq kubʼ t-ximen tuʼn tten mujbʼabʼil juntl maj. Kubʼ tin tibʼ ex yolin tukʼil erman tuʼn t-xi tqʼamaʼn qa nya bʼaʼn otoq bʼant tuʼn. ¿Tiʼ tzaj tuʼn jlu? Tqʼama Michael jlu: «Kubʼ tnajsaʼn erman wile tuʼn tkyaqil tkʼuʼj». Ten kyamiwbʼil juntl maj.

«Tzikʼx kyuʼne aju kypaltil junjuntl, kynajsam kyile kyxolxe qa at jun at tyol tiʼj juntl» (Col. 3:12-14). ¿Naʼnx tuʼna aʼyeju kabʼe precursora tzaj nya bʼaʼn kyxol? Onin jun ansyan kyiʼj tuʼn tel kynikʼ tiʼj qa in kubʼtoq kynaʼn txqantl nya bʼaʼn tuʼn jlu. Ex xi tqanin kye qa jaku bʼant tuʼn tten kypasens, iktzun tten jaku che onin tuʼn tten mujbʼabʼil kyxol kʼloj okslal. Xi kybʼiʼn ermana nabʼil xi tqʼoʼn ansyan kye ex kubʼ kyqʼoʼn toj xnaqʼtzbʼil. Toj ambʼil jaʼlo at tbʼanel kyxol ex kukx in che pakbʼaʼn tbʼanel tqanil junx.

Jaku tzʼonin nabʼil ma jaw quʼjin toj Colosenses 3:12-14 qiʼj qa ma tzʼok bʼinchaʼn jun nya bʼaʼn qiʼj. Nim xjal in nel kynikʼ tiʼj qa ma kubʼ kyin kyibʼ, in nonin kyiʼj tuʼn tkubʼ kynajsaʼn kyil txqantl ex tuʼn tikʼ tnaʼl kyuʼn. Noqtzun tuʼnj, qa ma tzʼel qnikʼ tiʼj qa kwest tuʼn tbʼant jlu quʼn, jaku txi qbʼiʼn nabʼil in tzaj tqʼamaʼn Mateo 18:15. Maske atz yolin Jesús tiʼj aj tok tbʼinchaʼn jun xjal jun matij il tiʼj juntl, ax ikx jaku tzʼajbʼen quʼn qa ma tzaj jun nya bʼaʼn qxol tukʼil jun erman. Aju bʼaʼn tuʼn tbʼant quʼn, bʼaʼn tuʼn tkubʼ qin qibʼ, qyekʼunx tbʼanel  qmod ex qo yolin tukʼil erman tuʼn t-xi qbʼinchaʼn tiʼj nya bʼaʼn.

Ax tok, in tzaj tqʼoʼn Tyol Dios txqantl nabʼil at kyajbʼen. Noqtzun tuʼnj, oʼkx jaku che onin qiʼj qa ma kubʼ qyekʼun qmod ik tzeʼn in tqʼon xewbʼaj xjan: «Tuʼn tten qkʼujlalil, tuʼn qtzalaj, tuʼn tten qmojbʼabʼl qibʼ, tuʼn tten qpasens, tuʼn qbʼinchante xtalbʼil te juntl, tuʼn tten qbʼanil, tuʼn qweʼxix tuj qokslabʼl, tuʼn qok mans, ex tuʼn qjakʼunte qibʼ» (Gál. 5:22, 23). Ik tzeʼn aceite in najbʼen tuʼn chebʼe kyaqʼunan kʼuxbʼil, ax ikx qeju mod in tzaj tqʼoʼn Jehová, in che onin qiʼj tuʼn tten tbʼanel qxol kyukʼil erman.

Teyele te junjun qe junxitl tmod. Qkyaqilx junxitl qmod, junxitl tten qo ximen ex qo yolin. Kyuʼn jlu in ten tbʼanel qamiwbʼil kyukʼil txqantl. Noqtzun tuʼnj, ax ikx jaku tzaj nya bʼaʼn qxol kyuʼn jlu. Tqʼama jun ansyan at nim tojtzqibʼil jlu: «Jun xjal at t-xobʼil tiʼj jaku kubʼ tnaʼn nya bʼaʼn qa at tukʼil jun xjal nim yolin. Maske nya nim toklen jlu toj qwitz, jaku tzaj nya bʼaʼn tuʼn». Qa ikju, ¿mlaype ten tbʼanel kyxol kabʼe xjal junxitl kymod? Qo ximen tiʼj kabʼe apóstol: Pedro ex Juan. Tuʼnju in jaw quʼjin toj Tyol Dios, in kubʼ qximen qa mintiʼ ximen Pedro tej xi tqʼamaʼn jun tyol. Ex aj qximen tiʼj Juan, in nul toj qximbʼetz qa jun xjal at tkʼujlabʼil ex at tnabʼil. Junxitl kymod apóstol lu, noqtzun tuʼnj, e aqʼunan junx toj tbʼanel (Hech. 8:14; Gál. 2:9). Aju techel kyaj kyqʼoʼn, in tzaj tyekʼun qa ax ikx qe jaku qo aqʼunan junx maske junxitl qmod.

Bʼalo at jun erman jatumel in nok qchmon qibʼ in kubʼ tbʼinchaʼn ex qa in tzaj tqʼamaʼn jun tiʼ nya bʼaʼn in nela toj qwitz. Maske ikju, ojtzqiʼn quʼn qa o kyim Jesús tuʼn tchjet til ex il tiʼj tuʼn tok qkʼujlaʼn (Juan 13:34, 35; Rom. 5:6-8). Tuʼntzunju, bʼaʼn tuʼn tkubʼ qxjelin jlu tuʼntzun miʼn tel qikʼun ex tuʼn miʼn tkubʼ qximen  qa mlay qo ok te tamiw: «¿In kubʼpe tbʼinchaʼn erman jun tiʼ aju in tzaj tqʼamaʼn Tyol Dios qa nya bʼaʼn? ¿Tajpe tuʼn tok tbʼinchaʼn nya bʼaʼn wiʼje? ¿Moqa noq tuʼnju junxitl qmode? Axpe ikx, ¿tiʼ jaku tzʼel nkanoʼne kyiʼj tbʼanel tmod?».

Nim toklen aju mankbʼil xjel. Qa at jun tganin tuʼn tyolin, atzun qe nya qgan, qo ximen tiʼj qa nya kwest tuʼn t-xi tzyet tyolin tukʼil jun xjal toj pakbʼabʼil. Jakulo txi qqanin te tuʼn tex pakbʼal qukʼil ex tuʼn qximen tiʼj tzeʼn jaku tzʼel qkanoʼn tiʼj. Qa tgan erman tuʼn tqʼon oyaj, ¿jakupe tzʼel qkanoʼn tiʼj ex tuʼn tkubʼ qnaʼn tzalajbʼil aj qonin kyiʼj qe ma che tijen, qe yabʼ ex qa kyiʼj qeju kyaj onbʼil? Aju qaj tuʼn tel qnikʼ tiʼj a jlu: maske junxitl qmod, jaku qo ten junx tukʼil jun erman qa ma tzʼok qqʼoʼn qwiʼ kyiʼj tbʼanel tmod. Maske mlayx tzʼok te jun tbʼanel qamiw, jaku tzʼonin jlu qiʼj tuʼn tten tbʼanel qxol tukʼil, tuʼn qtzalaj tukʼil ex tuʼn tten mujbʼabʼil kyxol kʼloj okslal.

Evodia ex Síntique, kabʼe okslal e anqʼin toj tnejel syent abʼqʼi. Bʼalo junxitl kymod at. Maske ikju, tqʼama Pablo jlu kye: «Chin kubʼsale kywitze tuʼn kytene junx kynabʼle, tuʼnju okslal qeye tiʼj Qajaw» (Filip. 4:2). ¿Axpe jlu kbʼantel quʼn tuʼntzun tten mujbʼabʼil kyxol kʼloj okslal?

Aju nya bʼaʼn in kubʼ qnaʼn kyiʼj txqantl ik tten ik tzeʼn chʼiʼx kʼul kyxol bʼech, kukx kchʼiyel qa mintiʼ ma jatz qbʼaqoʼn. Chʼixme ax in bʼaj tukʼilju nya bʼaʼn in kubʼ qnaʼn tiʼj jun erman qa kukx ma txi qqʼoʼn ambʼil tuʼn tchʼiy, jaku tzaj nya bʼaʼn kyiʼj kykyaqil okslal tuʼn. Qa kʼujlaʼn Jehová ex qe erman quʼn, kʼokel tilil quʼn tuʼn miʼn tnaj mujbʼabʼil kyxol erman noq tuʼnju junxitl qmod.

Qa ma tzʼok tilil quʼn tuʼn tbʼant tiʼj alkyexku nya bʼaʼn at qxol noq tuʼn tten mujbʼabʼil, jaku qo jaw labʼin tiʼj tbʼanel jaku tzaj tiʼn. Qo  ximen tiʼjju bʼaj tiʼj jun ermana tej tqʼama jlu: «Kubʼ nnaʼne qa in chin oktoq qʼoʼne ik tzeʼn jun tal txin tuʼn jun ermana, ex tuʼn jlu tzaj nim nqʼoje. Tuʼnju kukxtoq tzaj nqʼoje, kubʼ nyekʼune nya bʼaʼn nmode tukʼil. Kubʼ nximane: ‹Mintiʼ in chin ok nimane tuʼn, ax ikx weʼye mlay tzʼok nnimane te›».

Yajxitl ok ten ermana lu ximel kyiʼj tbʼinchbʼen ex tqʼama jlu: «Ok nqʼoʼne nwitze kyiʼj nya bʼaʼn nmode ex tzaj bʼaj nkʼuʼje tuʼn jlu. El nnikʼe tiʼj qa iltoq tiʼj tuʼn tkubʼ nchʼixpuʼne tten nximbʼetze. In naʼne Dios te Jehová tiʼj jlu. Yajxitl, tzaj nlaqʼoʼne jun oyaj tuʼn t-xi nqʼoʼne te ermana ex xi nqane najsam te toj jun uʼj tuʼnju nya bʼaʼn nmode kubʼ nyekʼune tukʼil. Tzaj qchlen qibʼe ex kubʼ qximane tuʼn tikʼ tnaʼl jlu quʼne. Naʼmx ttzaj juntl nya bʼaʼn qxole tukʼil jaʼlo».

Kukx kyaj xjal tuʼn tten mujbʼabʼil kyxol. Noqtzun tuʼnj, at maj mintiʼ in kubʼ kyyekʼun tbʼanel kymod tuʼnju in jaw kynimsan kyibʼ moqa tuʼnju in kubʼ kyximen qa jaku tzʼok bʼinchaʼn nya bʼaʼn kyiʼj. In bʼant jlu kyuʼn xjal toj ambʼil jaʼlo, noqtzun tuʼnj, toj tnam Jehová il tiʼj tuʼn tten mujbʼabʼil ex tzalajbʼil. Bʼant tuʼn Jehová tuʼn tkubʼ ttzʼibʼin Pablo jlu: «Chin kubʼsale kywitze tuʼn kybʼete tuj tumelxix, porque ma che txkonjtze tuʼn Dios. Kymansinku kyibʼe ex che oke mans; ten kypasense ex tzikʼxku kyuʼne kyxolxe, ex kykʼujlam kyibʼe. Tzʼok tililx kyuʼne kukx tuʼn tten kymojbʼabʼl kyibʼe, aju in tqʼoʼn Xewbʼaj Xjan, porque kytzuylaj kyibʼe tuʼnju kymojbʼabʼl kyibʼe» (Efes. 4:1-3). Nim toklen aju ttzuylal qibʼ te mojbʼabʼil. Tuʼntzunju, bʼaʼn tuʼn tkubʼ qximen tuʼn kukx tten jlu ex tuʼn t-xi qbʼinchaʼn tiʼj alkyexku nya bʼaʼn jaku tzaj qxol.