¿Alkyeqe che jawil qnimsaʼn?
«Qqʼonx chjonte te Dios aju qʼuql tuj tqʼuqbʼil, ex teju Tal Ẍneʼl; bʼaʼn tuʼn kykʼmonte nimbʼil, ex tuʼn tjaw nimsaʼn kybʼi, ex tuʼn kykawin tibʼaj tkyaqil tuj tkyaqil tabʼqʼiyil te jumajx» (APOCALIPSIS 5:13).
BʼITZ: 9 EX 14
1. a) ¿Tiquʼn bʼaʼn tuʼn tok qʼet toklen jun xjal? b) ¿Tiʼ qo xnaqʼtzal tiʼj toj xnaqʼtzbʼil lu?
¿ALKYE tten in nok qqʼoʼn toklen jun xjal? Qa ma ten tbʼanel qmod tukʼil ex qa in xi qqʼoʼn nimbʼel te. Chʼixmi tkyaqil maj, in nok qqʼoʼn toklen jun xjal tuʼnju in kubʼ tbʼinchaʼn jun tiʼ ex qa o tzʼok qʼet jun toklen. Toj xnaqʼtzbʼil lu qo xnaqʼtzal tiʼj alkyeqe che jawil qnimsaʼn ex tiquʼn.
2, 3. a) ¿Tiquʼn il tiʼj tjaw nimset Jehová? (Qʼonka twitza tiʼj tnejel tilbʼilal). b) ¿Alkyeju Tal Ẍneʼl in yolin Apocalipsis 5:13 tiʼj ex tiquʼn il tiʼj tuʼn tjaw qnimsaʼn?
2 In tzaj tqʼamaʼn Apocalipsis 5:13 qa bʼaʼn tuʼn tjaw nimset «aju qʼuql tuj tqʼuqbʼil» ex aju «Tal Ẍneʼl». Aju qʼuqli «tuj tqʼuqbʼil», in yolin tiʼj Jehová. Aju capítulo 4 te uʼj Apocalipsis in yolin tiʼj jun kʼloj anjel, aʼyeju in tzaj kyqʼamaʼn jun tiquʼn bʼaʼn tuʼn tjaw nimset Jehová, aju «itzʼ tuj tkyaqil tabʼqʼiyil te jumajx». In tzaj kyqʼamaʼn jlu: «Aya Qman Dios, bʼaʼn tuʼn tjaw nimset tbʼiya, ex tuʼn tnimanjtza, ex tuʼn tkʼmonteya ipumalj; porque aya bʼinchante tkyaqil, ex noq tuʼnju tajbʼila ateʼ, ex e bʼinchanjtz» (Apocalipsis 4:9-11).
3 Atzunju Tal Ẍneʼl in yolin Apocalipsis 5:13 tiʼj, a Jesucristo. ¿Tiquʼn ojtzqiʼn jlu quʼn? Tuʼnju tej tten Jesús tzalu twitz Txʼotxʼ, ok qʼoʼn tbʼi te «Tal T-ẍneʼl Dios aju nneʼl qʼiʼn kyil xjal tuʼn» (Juan 1:29). Oʼkx Jesús o tzʼok te jun aj kawil, aju o txi tqʼoʼn tchwinqlal tuʼn kyklet xjal che tel tjaqʼ tkawbʼil. Atzun jun tiquʼn bʼaʼn tuʼn tjaw nimset Jesús. Ax ikx, bʼaʼn tuʼn tjaw nimset tuʼnju «atzun Kyajaw kykyaqil qeju at kyoklen, ex atzun Rey kyibʼaj kykyaqil qe rey» (Apocalipsis 17:14). Ax tok, in kubʼlo qnaʼn ik tzeʼn qe anjel in che bʼitzen kyjalu: «Aju Tal Ẍneʼl kubʼ bʼyoʼn, bʼaʼn tuʼn tkʼmonte toklen, ex qʼinumabʼl, ex nabʼl, ex ipumalj, ex nimbʼil te, ex tajwalil, ex tuʼn tjaw nimsaʼn tbʼi» (Apocalipsis 5:12).
4. ¿Tiquʼn nim toklen tuʼn tjaw qnimsaʼn Jehová ex Jesús?
4 In tzaj tqʼamaʼn Juan 5:22 ex 23 qa o jaw tskʼoʼn Jehová Jesucristo tuʼn t-xi tbʼinchaʼn kyiʼj kykyaqil xjal. Atzun juntl tiquʼn nim toklen tuʼn tjaw qnimsaʼn Jesús. Aj tjaw qnimsaʼn Jesús, ax ikx in jaw qnimsaʼn Jehová, ex qa ma bʼant jlu quʼn, jaku qo anqʼin te jumajx (kjawil uʼjit Salmo 2:7, 11).
5. ¿Tiquʼn bʼaʼn tuʼn qok nimen qkyaqilx ex tuʼn tok qʼoʼn qoklen?
5 O qo kubʼ tbʼinchaʼn Jehová «ik tzaʼnx te tilbʼilal» (Génesis 1:27). A t-xilen jlu qa qkyaqilx jaku kubʼ qyekʼun qmod ik tzeʼn te. Jun techel, jaku kubʼ qyekʼun qkʼujlabʼil, qʼaqʼbʼil qkʼuʼj ex jaku tzaj tzʼeʼy qkʼuʼj kyiʼj txqantl. Ax ikx qkyaqilx at qximbʼetz, aju in tzaj tqʼamaʼn qe alkye bʼaʼn ex alkye nya bʼaʼn, alkye toj tumel ex alkye nya toj tumel (Romanos 2:14, 15). Qkyaqilx qgan tuʼn kyten qe tiʼchaq saq ex tbʼanel che keʼyin, ex tuʼn tten mujbʼabʼil. Mintiʼ tuʼn qjaw labʼin tiʼj jlu tuʼnju tgan Jehová tuʼn kyten kykyaqil tiʼchaq toj ttxolil ex toj mujbʼabʼil. Tuʼn jlu in nel qnikʼ tiʼj qa o qo kubʼ tbʼinchaʼn Dios ik tzeʼn te ex jaku tzʼel qkanoʼn tiʼj toj junxichaq tten. Tuʼntzunju, qkyaqilx at qoklen tuʼn qok nimen ex tuʼn tok qʼoʼn qoklen (Salmo 8:5).
QQʼONK KYOKLEN TXQANTL TOJ TUMEL
6, 7. ¿Tiquʼn junxitl qe testigos de Jehová kywitz txqantl xjal aj tok kyqʼoʼn kyoklen junjuntl?
6 Ojtzqiʼn quʼn qa bʼaʼn tuʼn tok qqʼoʼn kyoklen txqantl, noqtzun tuʼnj, atlo maj kwest tuʼn tel qnikʼ tiʼj alkye tten tuʼn tbʼant quʼn ex jniʼ kyoklen kʼokel qqʼoʼn. In bʼaj jlu tuʼnju chʼixmi kykyaqil xjal in che ok lepeʼ tiʼj kymod ex kyximbʼetz xjal ateʼ tjaqʼ tkawbʼil Satanás. Ateʼ junjun in nok kyqʼoʼn qe xuʼj ex qe xinaq ik tzeʼn jun kydios. In jaw kynimsaʼn kye ex nya oʼkx in ten kyximbʼetz kyiʼj ik tzeʼn tajbʼil Jehová. Ateʼ junjun in nel kykanoʼn alkye tten in bʼaj kyxbʼalumin kyibʼ ex kymod qe xjal ojtzqiʼnxix kywitz. Atlo maj in nel kykanoʼn kyiʼj qe at kyoklen toj jun kawbʼil, kyiʼj nejenel kyxol okslabʼil nya ax tok, kyiʼj qe in che etz kyoj película moqa toj jun saqchbʼil.
7 Ojtzqiʼn quʼn qa nya bʼaʼn tuʼn tjaw qnimsaʼn jun xjal. Kyxol kykyaqil xjal o che ten tzalu twitz Txʼotxʼ, oʼkx Jesús o kyaj qʼonte jun techel tzʼaqlixix qwitz, aju bʼaʼn tuʼn tel qkanoʼn (1 Pedro 2:21). Bʼaʼn tuʼn ttzaj qnaʼn qa «qkyaqil o qo bʼinchan il, ex mintiʼ in qo kanun tuʼn qok tzʼaqlxix ik tzaʼn te Dios tzʼaqlxixte» (Romanos 3:23). Tuʼntzunju, mintiʼ toklen jun xjal tuʼn tok qkʼulin. Qa ma txi qqʼoʼn nim nimsabʼil te jun xjal, nya bʼaʼn kʼelel toj twitz Jehová.
8, 9. a) ¿Alkye kyximbʼetz testigos de Jehová at kyiʼj xjal at jun kyoklen toj jun kawbʼil? b) ¿Toj alkye ambʼil mintiʼ in chex qbʼiʼn qeju at kyoklen toj jun kawbʼil?
8 Ateʼ junjun xjal bʼaʼn tuʼn tok qnimen ex tuʼn tok qʼet kyoklen tuʼnju aqʼuntl in bʼant kyuʼn. Jun techel, qo ximen kyiʼj xjal in che aqʼunan toj jun kawbʼil. In che aqʼunan xjal lu tuʼntzun tten chʼin mujbʼabʼil qxol ex in che ximen tiʼjju at tajbʼen kye txqantl. In nonin kyaqʼun qiʼj. Tqʼama apóstol Pablo qa bʼaʼn tuʼn tok qqʼoʼn kyoklen «aj sanjelal te gobierni» ex qa bʼaʼn tuʼn t-xi qbʼiʼn qe ley in kubʼ kyqʼoʼn. Jun techel, tqʼama jlu: «Kychjonxe kye kykyaqil aju kʼasbʼeʼnan kyuʼne. [...] Qa tiʼj txʼotxʼ ex qa tiʼj kʼaẍjel [...]; kyqʼonxe nimbʼil teju at tuʼn tnimanjtz» (Romanos 13:1, 7).
9 In nok tilil kyuʼn testigos de Jehová tuʼn kynimen kye qeju at kyoklen toj jun kawbʼil. Ax tok, teyele junjun tnam at kykostumbr. Tuʼntzunju, ateʼ junjun aj kawil in xi kyqanin junjun tiʼchaq, atzun kye junjuntl mintiʼ in xi kyqanin. Noq jaxku tumel in qo anqʼin, in nok tilil quʼn tuʼn qonin kyiʼj qeju at jun kyoklen toj jun kawbʼil. Qatzun in tzaj kyqʼamaʼn tuʼn tkubʼ qbʼinchaʼn jun tiʼ aju nya bʼaʼn toj twitz Jehová, mintiʼ in chex qbʼiʼn toj ambʼil lu. Aju in bʼant quʼn, in qo nimen te Jehová ex in jaw qnimsaʼn, ex mintiʼ in che ok qnimen qe xjal (kjawil uʼjit 1 Pedro 2:13-17).
10. ¿Alkye tbʼanel techel kyaj kyqʼoʼn junjun tmajen Jehová qwitz te ambʼil ojtxi?
10 Toj Xjan Uʼj, in che kanet tbʼanel techel quʼn kyiʼj junjun tmajen Jehová e nimen kye aj kawil ex junjuntl aqʼunal toj kawbʼil. Qo xnaqʼtzan tiʼ bʼaj tiʼj José ex María. Tej tkubʼ t-ximen aj kawil te tnam Roma tuʼn tok tbʼiʼn jteʼ xjal ateʼ tjaqʼ tkawbʼil, i eʼx José ex María tzmax Belén, maske chʼixtoq tul itzʼji tal María (Lucas 2:1-5). Ax ikx kyaj tqʼoʼn apóstol Pablo jun tbʼanel techel qwitz, tuʼnju nimen kye xjal at kyoklen toj kawbʼil. Tej ttzaj qʼamaʼn qa otoq kubʼ tbʼinchaʼn jun tiʼ nya bʼaʼn, yolin toj tumel twitz aj kawil Herodes Agripa ex twitz Festo aju aj kawil te tnam Judea tokx tjaqʼ tkawbʼil Roma (Hechos 25:1-12; 26:1-3).
11, 12. a) ¿Tiquʼn mintiʼ in nok qqʼoʼn kyoklen nejenel kyxol okslabʼil nya ax tok? b) ¿Tiʼ bʼaj tuʼnju yolin jun testigo de Jehová toj tumel tukʼil jun xjal at toklen toj kawbʼil?
11 Yajtzun qe nejenel kyxol okslabʼil nya ax tok, ¿kʼokelpe qqʼoʼn jun matij kyoklen? Miʼn. Ax qmod kbʼel qyekʼun kyukʼil ik tzeʼn qmod in kubʼ qyekʼun tukʼil alkyexku juntl xjal. Maske in che yon tuʼn tok qqʼoʼn jun matij kyoklen, nya bʼaʼn qa ma bʼant jlu quʼn. ¿Tiquʼn? Tuʼnju mintiʼ in xi kyqʼoʼn xnaqʼtzbʼil axix tok tiʼj Jehová ex tiʼj Tyol. Yolin Jesús kyiʼj aj xnaqʼtzal kyxol nya ax tok okslabʼil tuʼnju mintiʼ xi kyxnaqʼtzaʼn xjal tiʼj axix tok ex ok tqʼoʼn kybʼi te xmeletzʼ (Mateo 23:23, 24). Noqtzun tuʼnj, toj tumel in qbʼinchan qa ma qo nimen kye xjal at jun kyoklen toj jun kawbʼil. At maj o che onin jlu qiʼj tuʼnju in nok kyqʼoʼn kywitz tiʼj qa bʼaʼn qo nimen kye tuʼnju at jun kyoklen.
12 Jun xjal at toklen toj kawbʼil onin qiʼj, o ten Heinrich Gleissner, jun doctor en Derecho ex jun aj kawil toj tnam Austria. Tej tikʼ Tkabʼ Nimaq Qʼoj twitz Tkyaqil Txʼotxʼ, tzyet kyuʼn xjal te nazi (toj ambʼil tej kyokx qʼoʼn xjal toj cárcel tjaqʼ tkawbʼil Hitler) ex xi qʼiʼn toj tren, ex okx qʼoʼn toj campo de concentración. Toj tren, ok tojtzqiʼn twitz Leopold Engleitner, jun testigo de Jehová in noktoq tilil tuʼn toj pakbʼabʼil te tnam Austria. Xi tchikʼbʼaʼn ermano Engleitner toj tumel aju nimen quʼn te Gleissner, ok tbʼiʼn xjal lu te erman. Tej tbʼaj ambʼil te qʼoj, nim maj ajbʼen toklen Gleissner tuʼn tuʼntzun tonin kyiʼj testigos de Jehová te tnam Austria. Olo tzʼok qbʼiʼn junjuntl techel jatumel o tzaj tiʼn tbʼanel tuʼnju in qo nimen kye aj kawil.
BʼAʼN TUʼN QNIMEN KYE TXQANTL
13. ¿Alkyeqe kʼokel qnimen ex kʼokel qqʼoʼn mas kyoklen, ex tiquʼn?
13 Kykyaqil ermano ex ermana at kyoklen tuʼn kyok qnimen ex tuʼn tok qqʼoʼn kyoklen. Mas qeju erman qʼil twitz aqʼuntl kyxol kʼloj okslal, ik tzeʼn qe ansyan, qe ansyan in che bʼet kyojele Ja te Chmabʼil, qe Kʼloj ansyan qʼil twitz aqʼuntl toj jun ninja ex qeju ansyan ateʼ toj Kʼloj Xjal Qʼil Twitz Aqʼuntl (1 Timoteo 5:17). Kykyaqil erman lu in che xqʼuqin tiʼj ttnam Jehová. In tzaj tqʼamaʼn Tyol Dios qa ik kyten xinaq lu ik tzeʼn jun oyaj kyxol kʼloj okslal (Efesios 4:8, TNM). Tuʼntzunju, bʼaʼn tuʼn tok qnimen qe erman lu, noq alkyexku kyoklen, kytnam, kyxnaqʼtzbʼil, qa at moqa mintiʼ kypwaq. Kyaj kyqʼoʼn okslal toj tnejel syent abʼqʼi jun tbʼanel techel qwitz. E nimen kye erman e kubʼ nej twitz aqʼuntl, ax jlu jaku bʼant quʼn. Noqtzun tuʼnj, aj qten kyukʼil erman lu, mintiʼ tuʼn kyjaw qnimsaʼn ik tzeʼn jun anjel. Aju in bʼant quʼn, in qo nimen kye ex in nok qqʼoʼn kyoklen tuʼnju tbʼanel kyaqʼun ex tuʼnju mintiʼ in jaw kynimsan kyibʼ (kjawil uʼjit 2 Corintios 1:24 ex Apocalipsis 19:10).
14, 15. ¿Tiquʼn junxitl qe ansyan kywitz qe nejenel kyxol okslabʼil nya ax tok?
14 Ik kyten ansyan kyxol kʼloj okslal ik tzeʼn jun xqʼuqil ẍneʼl mintiʼ in jaw tnimsan tibʼ. Nya kyaj tuʼn kyok qqʼoʼn ik tzeʼn qe xjal ojtzqiʼnxix kywitz kyuʼn txqantl. Mintiʼ in che ok ik tzeʼn qe nejenel kyxol okslabʼil nya ax tok toj ambʼil jaʼlo nix ik tzeʼn qeju e ten toj ambʼil tej tten Jesús. Tqʼama Jesús jlu kyiʼj: «Kyajbʼil tuʼn kykubʼ qeʼ tuj tnejel qʼuqbʼil tuj nintz waʼn, ex tuʼn kykubʼ qeʼ tuj tnejel qʼuqbʼil kyuj ja te kʼulbʼil. Ex kyajbʼil tuʼn kyok qʼolbʼeʼn tuj plas» (Mateo 23:6, 7).
Aj tkubʼ kyin kyibʼ ansyan ex aj tkubʼ kybʼinchaʼn aju tqʼama Jesús, che okel kʼujlaʼn ex che okel nimen kyuʼn erman
15 In xi kynimen ansyan qe tyol Jesús lu: «Atzun kyeye miʼn kubʼ tuj kywitze tuʼn tok qʼoʼn kybʼiye xnaqʼtzal, porque junx xnaqʼtzal kyeye, aju Crist, atzun kyeye kyitzʼin kyibʼe kykyaqile. Ex miʼn tzʼok kyqʼoʼne te kymane jun xjal tzalu twitz txʼotxʼ; porque junx Kymane at, aju at tuj kyaʼj. Ex miʼn tzʼok qʼoʼn kybʼiye nejenel kyuʼn xjal, porque junx nejenel kyeye at, atzun qine aju Crist. Aju mas maʼ toklen kyxole, atzunju kʼokel te kymajene. Porque alkye ma jaw tniman tibʼ kʼokel te chʼin; pero alkye ma tzʼok tqʼon tibʼ te chʼin ok kjawil nimsaʼn» (Mateo 23:8-12). Aj tkubʼ kyin kyibʼ ansyan kyxol kʼloj okslal twitz tkyaqil Txʼotxʼ ex aj tkubʼ kybʼinchaʼn aju tqʼama Jesús, che okel kʼujlaʼn ex che okel nimen kyuʼn erman.
Qa mintiʼ in jaw kynimsaʼn ansyan kyibʼ, in che ok kʼujlaʼn ex in che ok nimen kyuʼn erman. (Qʼonka twitza kyiʼj taqikʼ 13 a 15).)
16. ¿Tiquʼn bʼaʼn tuʼn tok tilil quʼn tuʼn qnimen kye txqantl?
16 Ik tzeʼn kye okslal toj tnejel syent abʼqʼi, kxel-lo tiʼn chʼin ambʼil tuʼn tel qnikʼ tiʼj alkye tten tuʼn qnimen kye erman ik tzeʼn tajbʼil Jehová (Hechos 10:22-26; 3 Juan 9, 10). Noqtzun tuʼnj, tbʼanel qa ma tzʼok tilil quʼn. Qa ma qo nimen kye txqantl ik tzeʼn tajbʼil Jehová, nim kʼonil qiʼj.
KʼONIL QIʼJ QA MA QO NIMEN KYE TXQANTL
17. ¿Alkye tten in nonin qiʼj aj tok qqʼoʼn kyoklen junjun xjal?
17 Qa ma tzʼok qqʼoʼn kyoklen ex qa ma qo nimen kye xjal at kyoklen jatumel in qo anqʼin, jakulo che onin qiʼj tuʼn kukx qpakbʼan. Ax ikx, jakulo che yolin bʼaʼn tiʼj aqʼuntl in bʼant quʼn. Ma tzikʼ nim abʼqʼi, bʼaj jlu toj tnam Alemania. Xiʼ jun precursora Birgit tbʼi toj qʼij tej tetz qʼoʼn tdiploma tal. Kyqʼama aj xnaqʼtzal te Birgit qa tbʼanel tuʼnju otoq che ten junjun kʼwaʼl testigos de Jehová toj tja xnaqʼtzbʼil toj nim abʼqʼi. Ax ikx kyqʼama qa in che onintoq tuʼn tten tbʼanel kyxol kʼwaʼl toj tja xnaqʼtzbʼil. Xi tchikʼbʼaʼn Birgit kye qa in nok tilil kyuʼn mambʼaj testigos de Jehová tuʼn t-xi kyxnaqʼtzaʼn kykʼwaʼl tuʼn tten kymod ik tzeʼn tajbʼil Dios, ik tzeʼn tuʼn kynimen ex tuʼn tok kyqʼoʼn kyoklen aj xnaqʼtzal. Tqʼama jun aj xnaqʼtzal qa noqwit kykyaqil kʼwaʼl testigo de Jehová, maslo tbʼanel tuʼn t-xi kyqʼoʼn xnaqʼtzbʼil kye. Aqeju aj xnaqʼtzal lu e yolin bʼaʼn kyiʼj kʼwaʼl testigos de Jehová, axpe ikx, xiʼ jun kye toj jun nimaq chmabʼil tej tikʼ junjuntl seman.
18, 19. ¿Tiʼ bʼaʼn tuʼn ttzaj qnaʼn aj qnimen kye ansyan?
18 Jaku che onin nabʼil ateʼ toj Tyol Dios qiʼj tuʼntzun tel qnikʼ tiʼj alkye tten tuʼn tok qqʼoʼn kyoklen ansyan (kjawil uʼjit Hebreos 13:7, 17). Jaku ex il tiʼj tuʼn t-xi qqʼamaʼn kye erman qa tbʼanel aqʼuntl in bʼant kyuʼn. Aj t-xi qbʼiʼn aju in tzaj kyqʼamaʼn, in qo onin kyiʼj. Iktzun tten che tzalajel tiʼj kyaqʼun. Ax ikx in tzaj tqʼamaʼn Tyol Dios qa bʼaʼn tuʼn tel qkanoʼn tiʼj qʼuqbʼil kykʼuʼj. Noqtzun tuʼnj, mintiʼ in yolin tiʼj qa il tiʼj tuʼn tel qkanoʼn alkye tten in bʼaj t-xbʼalumin tibʼ jun ansyan, tzeʼn yolin ex tzeʼn qʼoʼn xnaqʼtzbʼil. Tuʼnju qa ma bʼant jlu quʼn, jaku tzʼok jlu ik tzeʼn lepchek qo tiʼj jun xjal ex nya tiʼj Jesús. Mintiʼ tuʼn tikʼ tnaʼl quʼn qa ax ikx aj il qe ansyan ik tzeʼn qe.
19 Qa ma qo nimen kye ansyan ex mintiʼ ma tzʼok qqʼoʼn kyoklen ik tzeʼn qe xjal ojtzqiʼnxix kywitz kyuʼn txqantl, qo onil kyiʼj tuʼn miʼn tjaw kynimsan kyibʼ. Iktzun tten mlay kubʼ kyximen qa mas nim kyoklen kywitz txqantl ex qa mintiʼ jun maj in che el txalpaj.
20. ¿Alkye tten in nonin qiʼj qa ma tzʼok qqʼoʼn kyoklen txqantl?
20 Qa ma qo nimen kye txqantl in nonin qiʼj tuʼn miʼn qximen oʼkx qiʼjx ex tuʼn miʼn tjaw qnimsan qibʼ aj tkubʼ kyyekʼun txqantl tbʼanel kymod qukʼil. Aj qnimen kye txqantl ax ikx in qo ok t-xqʼuqin. In nonin qiʼj tuʼn miʼn tkyaj qtzaqpiʼn Jehová aj ttzaj qbʼis tuʼn jun erman qa ma kubʼ tbʼinchaʼn jun nya bʼaʼn. Juntl tten in nonin qiʼj qa ma tzʼok qqʼoʼn kyoklen txqantl, ktel mujbʼabʼil toj ttnam Jehová. Mintiʼ in jaw tnimsaʼn ttnam Jehová jun erman nix jun nya erman.
21. ¿Tiʼ tbʼanel in tzaj tuʼnju in qo nimen kye txqantl?
21 Aju mas tbʼanel in tzaj tuʼnju in qo nimen kye txqantl, aju in tzalaj Jehová qiʼj. Nya oʼkxju, aj qnimen kye txqantl, in kubʼ qyekʼun qa in xi qbʼiʼn Jehová ex kukx qo ajbʼel te. Iktzun tten kxel tqʼoʼn Jehová jun tzaqʼwebʼil te Satanás, aju tqʼama qa mlay tzʼajbʼen jun xjal tkyaqil ambʼil te (Proverbios 27:11, TNM). Mintiʼ ojtzqiʼn kyuʼn xjal alkye tten tuʼn tok kyqʼoʼn kyoklen txqantl ik tzeʼn tajbʼil Jehová. Tuʼntzunju, bʼaʼn tuʼn t-xi qqʼoʼn chjonte te Jehová tuʼnju in qo tzaj t-xnaqʼtzaʼn alkye tten tuʼn kyok qnimen ex tuʼn tok qqʼoʼn kyoklen txqantl ik tzeʼn tajbʼil.
