1, 2. a) ¿Alqiʼj japun tnejel maj qe yol in che jatz toj Mateo 24:12? b) ¿Alkye tten in tzaj tyekʼun uʼj te Hechos qa chʼixme kykyaqil okslal toj tnejel syent abʼqʼi kukx ten kykʼujlabʼil tiʼj Jehová? (Qʼonka twitza tiʼj tnejel tilbʼilal).

TEJ tten Jesús tzalu twitz Txʼotxʼ, kyaj tqʼamaʼn tiʼ kbʼajel aj «chʼixtoq tjapun bʼaj tqʼijlalil». Jun techel, kyaj tqʼamaʼn qa «nimku xjal miʼn tentl kykʼujlalil kyxolx» (Mateo 24:3, 12). Aʼyeju yol lu japun kywiʼ tnejel maj kyiʼj aj Judiy toj tnejel syent abʼqʼi. In kyqʼamaʼntoq qa aʼye ttnam Dios, noqtzun tuʼnj, otoq txi kyqʼoʼn ambʼil tuʼn tchewix kykʼujlabʼil tiʼj Jehová.

² Atzun kye okslal toj tnejel syent abʼqʼi, junxitl kymod ik tzeʼn kye aj Judiy. Ok tilil kyuʼn tuʼn kypakbʼan tiʼj «tqanil bʼaʼn tiʼj Jesús» ex kubʼ kyyekʼun qa kʼujlaʼn Jehová, qe erman ex qe xjal naʼmxtoq tel kynikʼ tiʼj axix tok. Ten kykʼujlabʼil okslal lu kyuwxix tiʼj Dios (Hechos 2:44-47; 5:42). Noqtzun tuʼnj, bʼisbʼajil tej t-xi kyqʼoʼn junjun ambʼil tuʼn  tchewix kykʼujlabʼil tiʼj Jehová. ¿Tiquʼn ojtzqiʼn jlu quʼn?

3. ¿Tiquʼn chewix kykʼujlabʼil junjun okslal?

³ Tqʼama Jesús kyiʼj okslal te tnam Éfeso qa otoq chewix kykʼujlabʼil attoq tnejel (Apocalipsis 2:4). Bʼalo xi kyqʼoʼn ambʼil tuʼn tten kyximbʼetz ik tzeʼn kye xjal jatumel in che anqʼintoq, aʼyeju oʼkx in che ximen tuʼn tbʼant aju kyex kyajbʼil (Efesios 2:2, 3). Attoq nim kypwaq xjal te tnam Éfeso, tuʼntzunju ok kyqʼoʼn nim toklen tuʼn tten tbʼanel tiʼchaq kye. Nya oʼkxku, ax ikx nim xjal in kubʼtoq kybʼinchaʼn nim nya bʼaʼn ex mintiʼ ok kynimen qe tley Jehová. Mas ok kyqʼoʼn toklen aju tuʼn kytzalaj tiʼj kyanqʼibʼil twitzju tuʼn tok kykʼujlaʼn Jehová ex qe txqantl xjal.

4. a) ¿Tiquʼn o chewix kykʼujlabʼil xjal toj ambʼil jaʼlo? b) ¿Tiʼ qo xnaqʼtzal tiʼj?

⁴ Aʼyeju yol kyaj tqʼamaʼn Jesús tiʼ tuʼn tbʼaj tiʼj kʼujlabʼil, ax ikx in japun kywiʼ toj ambʼil jaʼlo. Mas in chewix kykʼujlabʼil xjal tiʼj Dios junjun qʼij. Nim millón xjal in cheʼx jyol onbʼil kyukʼil kʼloj xjal tuʼntzun t-xi kybʼinchaʼn tiʼj nya bʼaʼn ex mintiʼ in che jyon onbʼil tukʼil Dios. Tuʼntzunju kukx in chewix kykʼujlabʼil tiʼj Dios. Ax ikx jaku chewix kykʼujlabʼil tmajen Jehová ik tzeʼn bʼaj kyiʼj okslal te tnam Éfeso. Kyjuʼtzun, qo xnaqʼtzan tiʼj alkye tten kukx jaku chʼiy qkʼujlabʼil tiʼj Jehová, tiʼj axix tok tkuʼx toj Tyol ex kyiʼj erman.

5. ¿Tiquʼn il tiʼj tuʼn tok qkʼujlaʼn Jehová?

⁵ ¿Alkye mas kʼokel qkʼujlaʼn? Tqʼma Jesús jlu: «Kykʼujlame Qman Dios tuʼn tkyaqil kyanmiye ex tuʼn tkyaqil kykʼuʼje ex tuʼn tkyaqil kynabʼle. Atzun tnejel mandamyent jlu maʼxix toklen» (Mateo 22:37, 38). In nonin qkʼujlabʼil tiʼj Jehová tuʼn t-xi qbʼiʼn qe tkawbʼil, tuʼn kyikʼx yajbʼil quʼn ex tuʼn tel qikʼun aju nya bʼaʼn (kjawil uʼjit Salmo 97:10). Noqtzun tuʼnj, in nok tilil tuʼn Satanás ex tuʼnju tokx tjaqʼ tkawbʼil tuʼn tchewix qkʼujlabʼil tiʼj Jehová.

6. ¿Tiʼ in bʼaj aj tnaj kykʼujlabʼil xjal tiʼj Dios?

⁶ Nya toj tumel kyximbʼetz xjal at tiʼj kʼujlabʼil. Nimku «oʼkx tok kykʼuʼj kyiʼjx» ex nya tiʼj Dios (2 Timoteo 3:2). Oʼkx in che ximen tiʼjju «tajbʼil qchibʼjal mya bʼaʼn, ex tkyaqilju mya bʼaʼn nnoʼk qkeʼyin ex in pon qkʼuʼj tiʼj, ex aju qnimbʼil qibʼ tuj qchwinqlal» (1 Juan 2:16). Tqʼama apóstol Pablo tiʼ jaku bʼaj qa oʼkx ma qo ximen tiʼjju qex qajbʼil. Tqʼama: «Qa ma qo ximan tiʼj ju tajbʼil qchibʼjal, kamik in tzaj tuʼn». ¿Tiquʼn in tzaj kamik tuʼn? Tuʼnju in che ok xjal te taj qʼoj Dios qa oʼkx in che ximen kyiʼjx (Romanos 8:6, 7). In tzaj bʼis kyiʼj xjal oʼkx in che ximen tuʼn tkambʼet nim kypwaq ex qa tuʼn kyyaẍin (1 Corintios 6:18; 1 Timoteo 6:9, 10).

7. ¿Alkyeqe ximbʼetz moqa mod jaku tzaj tiʼn nya bʼaʼn kyiʼj okslal toj ambʼil jaʼlo?

⁷ In nok tilil kyuʼn xjal mintiʼ in nok qeʼ kykʼuʼj qa at jun Dios ex qeju in kyqʼamaʼn qa mintiʼ jun bʼinchal tkyaqil tuʼn ya miʼn tok kykʼujlaʼn xjal Dios. In nok tilil kyuʼn tuʼn tkubʼ kyximen qa oʼkx jun xjal mintiʼ tnabʼil moqa nya nim t-xnaqʼtzbʼil at jaku txi tnimen qa at jun bʼinchalte tkyaqil. Ex nim xjal in nok kynimen mas qe xjal at kyojtzqibʼil  twitzju tuʼn kynimen te Jehová (Romanos 1:25). Qa ma txi qqʼoʼn ambʼil tuʼn kyokx ximbʼetz lu toj qwiʼ, jaku chewix qkʼujlabʼil tiʼj Jehová ex jaku naj qamiwbʼil tukʼil (Hebreos 3:12).

8. a) ¿Tiquʼn jaku tzaj bʼaj kykʼuʼj tmajen Jehová? b) ¿Tiʼ qʼuqbʼil qkʼuʼj in tzaj tqʼoʼn Salmo 136?

⁸ Tuʼnju a Satanás in kawin kyibʼaj xjal, atlo maj jaku tzaj bʼaj qkʼuʼj (1 Juan 5:19). Noqtzun tuʼnj, qa ma txi qqʼoʼn ambʼil tuʼn ttzaj bʼaj qkʼuʼj, jaku chewix qkʼujlabʼil ex qʼuqbʼil qkʼuʼj tiʼj Jehová. Bʼalo in tzaj nya bʼaʼn qiʼj tuʼnju mintiʼxix qpwaq, tuʼn yabʼil moqa tuʼnju ma qo tijen. Ax ikx jaku tzaj qbʼis tuʼnju mintiʼ in bʼant junjun tiʼchaq quʼn ik tzeʼn qajbʼil. Ex jaku tzaj qbʼis qa o tzaj jun tiʼ toj qanqʼibʼil aju mintiʼ in qo yon tiʼj. Noq alkyexku nya bʼaʼn in qo ok weʼ twitz, miʼn kubʼ qximen qa o qo kyaj tkolin Jehová. Bʼaʼn tuʼn ttzaj qnaʼn qe yol te qʼuqbʼil qkʼuʼj tkuʼx toj Salmo 136:23. In tzaj tqʼamaʼn jlu tiʼj Jehová: «Kyqʼonxe chjonte teju in tzaj naʼnte qe ok qok tuj yajbʼil qiʼj, tuʼnju kukx kʼujlaʼn qoʼ tuʼn te jumajx». Jaku qo tzaj tbʼiʼn Jehová qa ma t-xi qqanin onbʼil te ex tzul ttzaqʼweʼn qnaʼj Dios (Salmo 116:1; 136:24-26).

9. ¿Tiʼ onin tiʼj Pablo tuʼn kukx tten tkʼujlabʼil tiʼj Jehová?

⁹ Kukx ximen Pablo tiʼj alkye tten onin Jehová tiʼj, ex tuʼn jlu ten tipumal. Kubʼ ttzʼibʼin jlu: «Ate Qman onil weye; mlay chin xobʼe. Mintiʼ jun mya bʼaʼn jaku kybʼincha xjal wiʼje» (Hebreos 13:6). Onin qʼuqbʼil tkʼuʼj Pablo at tiʼj Jehová tuʼn tex kywitz nya bʼaʼn. Maske ikʼ toj nim yajbʼil, mintiʼ naj qʼuqbʼil tkʼuʼj tiʼj Jehová. Ax ikx tej tten pres, onin kyiʼj erman tej t-xi ttzʼibʼin qe uʼj kye tukʼil tbʼanel yol (Efesios 4:1; Filipenses 1:7; Filemón 1). Kukx ok tkʼujlaʼn Jehová tukʼil tkyaqil tanmi, maske tzaj nim nya bʼaʼn tiʼj. Ok qeʼ tkʼuʼj tiʼj Dios «kukx in tqʼuqbʼaʼn qkʼuʼj», aju in tzaj qʼonte qʼuqbʼil «qkʼuʼj tuj tkyaqil yajbʼil qe» (2 Corintios 1:3, 4). ¿Alkye tten jaku tzʼel qkanoʼn tbʼanel techel tiʼj Pablo?

10. ¿Tiʼ jaku bʼant quʼn tuʼntzun tten nim qkʼujlabʼil tiʼj Jehová?

 ¹⁰ Tqʼama Pablo jun tiʼ jaku bʼant quʼn tuʼntzun tten nim qkʼujlabʼil tiʼj Jehová. Tqʼama jlu: «Kukx che naʼne Dios». Ax ikx tqʼama: «Miʼn che qʼajene tuʼn kynaʼne Dios» (Colosenses 4:2; 1 Tesalonicenses 5:17). ¿Tiquʼn in nonin naʼj Dios tuʼn tchʼiy qamiwbʼil tukʼil Jehová? Tuʼnju aj qnaʼn Dios in qo yolin tukʼil Jehová (Salmo 86:3). Aj t-xi qqʼamaʼn te Qtat aju in qnaʼn ex aju in tzaj bʼaj qkʼuʼj tuʼn, in qo ok laqʼeʼ mas ttxlaj (Salmo 65:2). Ex mas in chʼiy qkʼujlabʼil tiʼj aj ttzaj ttzaqʼweʼn qnaʼj Dios. In nel qnikʼ tiʼj qa «niqayin taʼ Qman kyiʼj qeju in che kubʼsan twitz» (Salmo 145:18). Qa qʼuqli qkʼuʼj tiʼj qa kʼujlaʼn qo tuʼn Jehová ex qa in qo tzaj tonin, kʼonil qiʼj tuʼn kyikʼx nya bʼaʼn in tzaj qiʼj jaʼlo ex toj ambʼil tzul.

11, 12. ¿Tiʼ jaku bʼant quʼn tuʼntzun tok qkʼujlaʼn mas Tyol Dios?

¹¹ Kʼujlaʼn axix tok kyuʼn okslal. Ex in kanet aju axix tok quʼn toj Tyol Dios. Tqʼama Jesús jlu te Ttat: «Aju tyola axix tok» (Juan 17:17). Tuʼn tok qkʼujlaʼn aju axix tok tkuʼx toj Tyol Dios, il tiʼj tuʼn tel qnikʼ tiʼj tiʼ in tzaj t-xnaqʼtzaʼn (Colosenses 1:10). Noqtzun tuʼnj, at juntl tiʼ tuʼn tbʼant quʼn. In qo tzaj tonin aj tzʼibʼil tiʼj uʼj te Salmo 119 tuʼn tel qnikʼ tiʼj tiʼ mas tuʼn tbʼant quʼn (kjawil uʼjit Salmo 119:97-100). Aj tex qʼij, il tiʼj tuʼn qximen tiʼjju in jaw quʼjin toj Tyol Dios. Qa ma qo ximen tiʼj tzeʼn jaku tzʼonin qiʼj qa ma kubʼ qqʼoʼn toj xnaqʼtzbʼil aju axix tok tkuʼx toj Xjan Uʼj, kʼokel qkʼujlaʼn mas.

¹² Ax ikx tqʼama aj tzʼibʼil tiʼj uʼj te Salmo 119 jlu: «Aju yol tzaj ttziyana weye mas chiʼ nneʼl tuj ntziʼye twitz taʼl kabʼ» (Salmo 119:103). Aqeju uʼj in che etz tuʼn ttnam Jehová, ik kyten ik tzeʼn jun tbʼanel wabʼj. Aj t-xi qnikʼbʼeʼn jun tiʼ kʼokʼj ex qgan, chebʼe in qo ok ten nikʼbʼel tiʼj. Chʼixme ax kbʼantel quʼn aj xnaqʼtzan, mintiʼ tuʼn quʼjin jun rat naj. Iktzun tten qo tzalajel kyiʼj «qe yol tujxix tumel» tiʼj axix tok ex jaku tzaj qnaʼn aju otoq jaw quʼjin, ex tuʼn tajbʼen quʼn tuʼn qonin kyiʼj txqantl (Eclesiastés 12:10).

13. ¿Tiʼ onin tiʼj Jeremías tuʼn tok tkʼujlaʼn aju tzaj t-xnaqʼtzaʼn Jehová te, ex alkye tten onin tiʼj?

¹³ Kʼujlaʼntoq tuʼn aj sanjel Jeremías aju tzaj t-xnaqʼtzaʼn Jehová te. Tqʼama jlu: «Tej ttzaj yolina weye, kyaj wawaʼne tyola tuj wanmiye, nim o chin tzalaje kyiʼj ex e ok te jun tzalajbʼil tuj wanmiye, porque etzan qine tuʼna, aya Nman Dios Tajaw Tkyaqil» (Jeremías 15:16). Tuʼntzunju ximen tiʼj Tyol Dios ex ok tkʼujlaʼn toklen tzaj tqʼoʼn Jehová tuʼn t-xi tqʼamaʼn tqanil kye xjal. Qa kʼujlaʼn aju axix tok tkuʼx toj Tyol Dios quʼn, ax ikx kʼokel qkʼujlaʼn qoklen tuʼnju testigos de Jehová qoʼ ex tuʼn qpakbʼan tiʼj tqanil tiʼj Tkawbʼil Dios kyoj bʼajsbʼil tqʼijlalil.

14. ¿Tiʼ mas kbʼantel quʼn tuʼn kukx tchʼiy qkʼujlabʼil tiʼj axix tok tkuʼx toj Tyol Dios?

¹⁴ ¿Tiʼ mas kbʼantel quʼn tuʼn kukx tchʼiy qkʼujlabʼil tiʼj axix tok tkuʼx toj Tyol Dios? Il tiʼj tuʼn qbʼet tkyaqil seman kyoj chmabʼil tuʼnju in najbʼen tuʼn Jehová tuʼn qtzaj t-xnaqʼtzaʼn. In najbʼen uʼj Aju Xqʼuqil tuʼn Jehová tuʼntzun qxnaqʼtzan tiʼj Tyol. Qa qaj tuʼn tetz qiʼn  tbʼanel xnaqʼtzbʼil toj chmabʼil lu, il tiʼj tuʼn tbʼaj qbʼinchaʼn qten. Jun techel, jaku jaw quʼjin kykyaqil taqikʼ Tyol Dios tkuʼx toj xnaqʼtzbʼil. Toj ambʼil jaʼlo, nim erman jaku jaw kyuʼjin ex qa jaku kutz kyiʼn uʼj Aju Xqʼuqil toj kytableta ex qa toj kycelular. At uʼj Aju Xqʼuqil toj nim yol toj qtembʼil toj Internet jw.org ex toj aplicación JW Library. Ateʼ junjun formato lwey jaku che kanet taqikʼ Tyol Dios quʼn kyoj. Noq alkyexku tten in najbʼen quʼn tuʼn qxnaqʼtzan, il tiʼj tuʼn qximen kyiʼj taqikʼ Tyol Dios aj kyjaw quʼjin. Qa ma bʼant jlu quʼn, mas kʼokel qkʼujlaʼn axix tok tkuʼx toj Tyol Dios (kjawil uʼjit Salmo 1:2).

15, 16. a) ¿Alkye kawbʼil kyaj tqʼoʼn Jesús toj Juan 13:34, 35? b) ¿Tiquʼn at toklen kʼujlabʼil in kubʼ qnaʼn tiʼj Jehová ex tiʼj Tyol tukʼilju qkʼujlabʼil kyiʼj erman?

¹⁵ Toj mankbʼil qonikʼen tej tten Jesús tzalu twitz Txʼotxʼ, tqʼama jlu kye t-xnaqʼtzbʼen: «Kxel nqʼoʼne jun akʼaj mandamyent kyeye: Tuʼn kykʼujlante kyibʼe kyxolxe ik tzaʼn weye ma che nkʼujlaye, ikxtzun kyeye tuʼn kykʼujlante kyibʼe kyxolxe. Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:34, 35).

¹⁶ Aju kʼujlabʼil in kubʼ qnaʼn kyiʼj erman at toklen tukʼil qkʼujlabʼil at tiʼj Jehová. Qa mintiʼ kʼujlaʼn Dios quʼn, mlay che ok qkʼujlaʼn qe erman. Ex qa mintiʼ qkʼujlabʼil kyiʼj erman, mlay tzʼok qkʼujlaʼn Dios. Kubʼ ttzʼibʼin apóstol Juan jlu: «Qa mintiʼ in tkʼujlaʼn xjal terman aju nnoʼk tkeʼyin, ax mlay bʼant tuʼn tkʼujlanjtz Dios tuʼn, aju naʼnx tok tkeʼyin» (1 Juan 4:20). Nya oʼkxju, at toklen kʼujlabʼil in kubʼ qnaʼn tiʼj Jehová ex kyiʼj erman tukʼil qkʼujlabʼil at tiʼj Tyol Dios. ¿Tiquʼn? Tuʼnju qa ma tzʼok kʼujlaʼn aju in nel qnikʼ tiʼj toj Tyol Dios, kxel qbʼiʼn kawbʼil in tzaj tqʼoʼn tuʼn tok qkʼujlaʼn Jehová ex qe erman (1 Pedro 1:22; 1 Juan 4:21).

17. ¿Alkye tten jaku kubʼ qyekʼun qkʼujlabʼil kyiʼj erman?

 ¹⁷ (Kjawil uʼjit 1 Tesalonicenses 4:9, 10). ¿Alkye junjun tten jaku kubʼ qyekʼun qkʼujlabʼil kyiʼj erman jatumel in nok qchmon qibʼ? Bʼalo at jun ma tijen ex taj onbʼil tuʼn t-xiʼ kyoj chmabʼil ex qa at jun ermana mintiʼ tchmil taj tuʼn tbʼaj bʼinchet jun aqʼuntl tja (Santiago 1:27). Ex il tiʼj tuʼn t-xi qʼuqbʼet kykʼuʼj ex tuʼn kyxi onit erman in che bʼisun, in tzaj bʼaj kykʼuʼj moqa in che ikʼ toj jun nya bʼaʼn (Proverbios 12:25; Colosenses 4:11). Kyukʼil qyol ex qbʼinchbʼen in kubʼ qyekʼun qkʼujlabʼil kyiʼj erman toj qokslabʼl (Gálatas 6:10).

18. ¿Tiʼ kʼonil qiʼj tuʼn t-xi qbʼinchaʼn tiʼj alkyexku nya bʼaʼn jaku tzaj qxol kyukʼil erman?

¹⁸ Kyaj qʼamaʼn toj Tyol Dios qa kyoj «mankbʼil tqʼijlalil» che tel nim xjal oʼkx tok kykʼuʼj kyiʼjx ex kyaj tuʼn tten nim tiʼchaq kye (2 Timoteo 3:1, 2). Tuʼntzunju, il tiʼj tuʼn tok tilil kyuʼn okslal tuʼn tok kykʼujlaʼn Jehová, aju Tyol ex tuʼn tok kykʼujlan kyibʼ. Tuʼnju nya tzʼaqli qoʼ, atlo maj jaku tzaj jun nya bʼaʼn qxol. Noqtzun tuʼnj, kʼonil kʼujlabʼil qiʼj tuʼn t-xi qbʼinchaʼn naj tiʼj alkyexku nya bʼaʼn jaku tzaj qxol (Efesios 4:32; Colosenses 3:14). Mi txi qqʼoʼn ambʼil tuʼn tchewix qkʼujlabʼil. Sino kʼokel tilil quʼn tuʼn tten qkʼujlabʼil tiʼj Jehová, tiʼj Tyol ex kyiʼj erman tuʼn tkyaqil qkʼuʼj.