1, 2. a) ¿Tiʼ nya bʼaʼn in tzaj kyiʼj kykʼwaʼl qeju in cheʼx anqʼil toj juntl tnam? b) ¿Alkyeqe xjel che xel tzaqʼwet toj xnaqʼtzbʼil lu?

TQʼAMA jun erman jlu, aju Joshua tbʼi: «I eʼx nmane anqʼil toj juntl tnam tej tzma kʼwaʼlx qine, in chin yolintoqe toj kyyol atz ja ex kyxol kʼloj okslal». Noqtzun tuʼnj, tej ttzyet tbʼet Joshua toj tja xnaqʼtzbʼil, mas bʼaʼn ela toj twitz aju yol in che yolin xjal tiʼj jatumel otoq che pon. Ex tqʼamatl jlu: «Tej tikʼtl junjun abʼqʼi, chʼexpaj tkyaqil: mintiʼtoq in nel nnikʼe kyiʼj chmabʼil ex ya mintiʼ kubʼ nnaʼne qa ik wanqʼibʼile ik tzeʼn kye nmane». Nim maj in bʼaj jlu ik tzeʼn ikʼ tiʼj Joshua.

² Toj ambʼil jaʼlo, in che anqʼin mas te 240 millón xjal toj junxitl tnam. Qa mambʼaj teya ex in nanqʼina toj juntl tnam, ¿alkye tten jaku tzʼonina kyiʼj tkʼwaʼla tuʼn tok kykʼujlaʼn Jehová ex tuʼn kukx kyten tojju «yol axix tok»? (3 Juan 4). ¿Ex alkye tten jaku che onin txqantl okslal kyiʼje?

3, 4. a) ¿Alkye tten jaku kubʼ kyqʼoʼn mambʼaj jun tbʼanel techel kywitz kykʼwaʼl? b) ¿Tiʼ mintiʼ tuʼn tkubʼ kyximen mambʼaj kyiʼj kykʼwaʼl?

³ Aqeye mambʼaj, qa kyaje tuʼn kyok kykʼwaʼle te tbʼanel tamiw Jehová ex tuʼn kyanqʼin te jumajx, nim toklen tuʼn tkubʼ kyqʼoʼne  tbʼanel techel kywitz. Aj tok kyqʼoʼn kykʼwaʼle kywitz tiʼj qa in kubʼ kyqʼoʼne «tnejelxix aju tkawbʼil Dios», kʼokel qeʼ kykʼuʼj tiʼj Jehová qa tzul tqʼoʼn aju at tajbʼen kyeye junjun qʼij (Mateo 6:33, 34). Kyqʼonke kyajbʼebʼile te Jehová tnejel twitzju tuʼn kyjyoʼne kyiʼj tiʼchaq te twitz txʼotxʼ. Che anqʼine tukʼil nya nim tiʼchaq ex miʼn tzʼokx kyqʼon kyibʼe tjaqʼ kʼas. Che jyone tiʼj kyqʼinumabʼile te «tuj kyaʼj», moqa aju tkʼiwlabʼil Jehová, ex nya aju tuʼn tkanet mas kypwaqe moqa jun kyoklene kyxol xjal (Juan 12:43; kjawil uʼjit Marcos 10:21, 22).

⁴ Bʼaʼn tuʼn tel kypaʼne ambʼil kye kykʼwaʼle. Kyqʼamanxe kye qa in che tzalaje kyiʼj aj tok kyqʼoʼn Jehová tnejel toj kyanqʼibʼil ex nya aju tuʼn tok kyqʼoʼn kywiʼ tuʼn tten kyoklen moqa tuʼn tten kypwaq, ex qa tuʼn t-xi kyqʼoʼn pwaq kyeye. Mintiʼ tuʼn tkubʼ kyximane qa il tiʼj tuʼn kyaqʼunan kykʼwaʼle tuʼntzun tten jun tbʼanel kyanqʼibʼile. Bʼaʼn tuʼn ttzaj kynaʼne qa mya a qe «kʼwaʼlbʼaj che chmolte pwaq tuʼn t-xi kyqʼoʼn te kyman, noq oʼkx aqe mambʼaj che chmolte pwaq tuʼn t-xi kyqʼoʼn kye kykʼwaʼl» (2 Corintios 12:14).

5. ¿Tiquʼn il tiʼj tuʼn kyyolin mambʼaj nim maj tiʼj Jehová kyukʼil kykʼwaʼl?

⁵ Ik tzeʼn kyaj tqʼamaʼn Tyol Dios, nim «stranjer xjal kye mastl nasyon» in che oktz toj ttnam Jehová (Zacarías 8:23). Aqeye mambʼaj, qa mintiʼ in nikʼ toj kywiʼ kykʼwaʼle aju yol in che yoline tiʼj, kwestlo jaku tzʼela kyeye tuʼn t-xi kyxnaqʼtzaʼne axix tok kye. Mas nim toklen tuʼn t-xi kyqʼoʼne xnaqʼtzbʼil tiʼj Tyol Dios kye kykʼwaʼle twitz alkyexku juntl. Ex tuʼn ttzaj qʼoʼn kychwinqlal te jumajx, il tiʼj tuʼn tok kyojtzqiʼn Jehová (Juan 17:3). Tuʼntzunju, nim toklen tuʼn kyyoline nim maj kyukʼil tiʼjju in tzaj t-xnaqʼtzaʼn Jehová (kjawil uʼjit Deuteronomio 6:6, 7).

6. ¿Tiʼ tbʼanel jaku tzaj qa ma bʼant kyyolin kʼwaʼl toj yol in che yolin kyman tiʼj? (Qʼonka twitza tiʼj tnejel tilbʼilal).

⁶ Jaku bʼant kyyolin kykʼwaʼle tiʼj kyyol xjal jatumel otoq che pone aj kyxiʼ toj tja xnaqʼtzbʼil moqa aj kyyolin kyukʼil txqantl. Tuʼntzunju, oʼkx jaku bʼant kyyolin toj kyeye kyyol qa naqʼli qeye tuʼn kyyoline kyukʼil. Qa ma bʼant kyyolin toj kyeye kyyol, mas nya kwest kʼelel toj kywitz tuʼn kyyolin kyukʼile ex tuʼn ttzaj kyqʼamaʼn tiʼ in kubʼ kynaʼn. Ax ikx, jaku tzaj tiʼn junjun tbʼanel. Qa ma bʼant kyyolin toj juntl yol, kʼonil kyiʼj tuʼn tok kynabʼil ex tuʼn tel kynikʼ tiʼj tiʼ in kubʼ kynaʼn txqantl xjal. Nya oʼkxju, ax ikx mas che onil toj pakbʼabʼil. In tzaj tqʼamaʼn Carolina jlu, aju tmyal jun erman in nanqʼin toj juntl tnam: «Tbʼanel aj qten kyxol jun kʼloj okslal jatumel in che yolin tiʼj junxitl yol. Ex nganiye tuʼn wonine jatumel at nim aqʼuntl tuʼn tbʼant».

7. ¿Tiʼ jaku bʼant kyuʼn mambʼaj qa kwest in nela yol toj kywitz qe toj tja?

⁷ Chebʼe chebʼe in che naqʼet kʼwaʼl tiʼj kyanqʼibʼil ex tiʼj kyyol xjal jatumel in che pon. Tuʼntzunju, ateʼ junjun ya nya kyaj tuʼn kyyolin tiʼj yol in che yolin kyman tiʼj,  axpe ikx jaku tzikʼ tnaʼl kyuʼn. Qa a jlu in bʼaj kyiʼj kykʼwaʼle, ¿jakupe bʼant chʼin kyyoline tiʼj kyyol xjal jatumel ateʼye? Iktzun tten mas nya kwest tuʼn tel kynikʼe tiʼj tiʼ in che yolin kykʼwaʼle tiʼj kyukʼil txqantl, tiʼ in che saqchan tiʼj ex tzeʼn ateʼ tukʼil kydeber. Ax ikx, che onile kyiʼj qa ma che yoline kyukʼil aj xnaqʼtzal. Ax tok, il tiʼj tuʼn tel kypaʼne ambʼil, tuʼn tten kyipumale ex tuʼn tkubʼ kyin kyibʼe tuʼn tbʼant juntl yol kyuʼne. Noqtzun tuʼnj, tbʼanel qa ma bʼant. Ximana tiʼj jlu. Noqwit ya mintiʼ in bʼant tbʼin jun tkʼwaʼla, ¿mlaype tzʼok tilil tuʼna tuʼn tbʼant kyyol men tuʼna tuʼntzun tyolina tukʼil? Jaku bʼant. Tuʼntzunju, qa mas in bʼant tyolin kykʼwaʼle toj juntl yol, ¿nyapetzun axju toklen kʼokel kyqʼoʼne? * (Qʼonka twitza tiʼj tqanil).

8. ¿Alkye tten jaku che onin mambʼaj kyiʼj kykʼwaʼl maske mintiʼxix in bʼant kyyolin tiʼj yol in che yolin xjal tiʼj jatumel ateʼ?

⁸ Kwest jaku tzʼela toj kywitz mambʼaj in cheʼx anqʼil toj juntl tnam tuʼn kyyolin toj akʼaj yol in bʼant kyuʼn kykʼwaʼl. Tuʼnlo jlu kwest in nela toj kywitz tuʼn kyonin kyiʼj tuʼn tel kynikʼ tiʼj «Xjan Tuʼjil» (2 Timoteo 3:15). Qape a jlu in bʼaj kyiʼje. Maske ikju, jaku che onine kyiʼj kykʼwaʼle tuʼn tok kyojtzqiʼn Jehová ex tuʼn tok kykʼujlaʼn. Tqʼama jun erman Shan tbʼi: «Atzun te ntxuʼye, tjunalx ok t-xqʼuqin qoʼye tej qtzaj chʼiye, mintiʼxix in bʼant tyolin tojju yol in qo yoline tiʼj kyukʼil wanbʼe, ex mintiʼxix in bʼantoq qeye qyolin toj te tyol. Noqtzun tuʼnj, tej tok qqʼoʼne qwitze tiʼj aj t-xnaqʼtzan, aj tnaʼn Dios ex tej tok tilil tuʼn tuʼn qkʼuline te Jehová kyukʼil toj qjaye tkyaqil seman, onin qiʼje tuʼn tel qnikʼe tiʼj qa nim toklen tuʼn tok qojtzqiʼn Jehová».

9. ¿Tiʼ jaku bʼant kyuʼn mambʼaj tuʼn t-xi kyxnaqʼtzaʼn kykʼwaʼl tiʼj Tyol Dios toj kabʼe yol?

⁹ Ateʼ junjun kʼwaʼl il tiʼj tuʼn t-xi qʼet xnaqʼtzbʼil kye tiʼj Jehová toj kabʼe yol. ¿Tiquʼn? Tuʼnju in che yolin tiʼj jun yol toj tja xnaqʼtzbʼil ex juntl kyja. Tuʼntzunju, ateʼ mambʼaj in che ajbʼen uʼj, grabación ex qe video kyuʼn toj kabʼe yol. Ax tok, maslo in nok tilil kyuʼn mambʼaj in che anqʼin toj juntl tnam tuʼn kyonin kyiʼj kykʼwaʼl tuʼn kyok te tbʼanel tamiw Jehová.

10. a) ¿Alkye kbʼel ximente jatumel kʼokel kychmon kyibʼ qe ja xjal in che pon toj juntl tnam? b) ¿Tiʼ jaku tzʼonin tiʼj wibʼaj toj ja tuʼn tjaw tjyoʼn aju mas bʼaʼn?

¹⁰ Qa najchaq ateʼ erman «stranjer xjal» tiʼj jun kʼloj okslal in che yolin toj kyyol, il-lo tiʼj tuʼn tok kychmon kyibʼ kyukʼil erman in che yolin toj yol te tnam jatumel otoq che pon (Salmo 146:9). Noqtzun tuʼnj, qa at jun kʼloj okslal in che yolin toj kye kyyol, a wibʼaj toj ja kbʼel ximente jatumel kʼokel kychmon kyibʼ ex alkye mas bʼaʼn kye kykyaqil. Naʼmxtoq tbʼant jlu tuʼn, il tiʼj tuʼn tel tnikʼ tiʼj ex tuʼn t-xi tqanin onbʼil te Jehová. Nya oʼkxju, ax ikx kyolil tukʼil t-xuʼjil ex kyukʼil tkʼwaʼl (1 Corintios 11:3). ¿Tiʼ il tiʼj tuʼn ttzaj tnaʼn? ¿Alkyeqe taqikʼ Tyol Dios jaku che onin tiʼj tuʼn tjaw tjyoʼn aju mas bʼaʼn?

11, 12. a) ¿Jniʼ in nonin yol tiʼj kʼwaʼl tuʼntzun tikʼ xnaqʼtzbʼil toj twiʼ kyoj chmabʼil? b) ¿Tiquʼn nya kyaj junjun kʼwaʼl tuʼn kyxnaqʼtzan tiʼj yol in che yolin kyman tiʼj?

¹¹ Il tiʼj tuʼn kyximen mambʼaj tiʼj alkye mas bʼaʼn kye kykʼwaʼl. Tuʼn tel kynikʼ kʼwaʼl tiʼj axix tok tiʼj Tyol Dios, nya oʼkx tuʼn tok  kybʼiʼn junjun or xnaqʼtzbʼil kyoj chmabʼil junjun seman. Tuʼnju qa atz in che bʼet kyoj chmabʼil toj jun yol mas in nok toj kywiʼ, kʼelel kynikʼ tiʼj noq tuʼnju in che pon. Maslo jaku tzʼel kynikʼ tiʼj twitzju in kubʼ kyximen mambʼaj. Kwest tuʼn tel kynikʼ kʼwaʼl tiʼj xnaqʼtzbʼil qa mintiʼ in nok toj kywiʼ aju in netz qʼamaʼn kyoj chmabʼil (kjawil uʼjit 1 Corintios 14:9, 11). Aju yol in yolin kʼwaʼl tiʼj akux in chʼiy, nya il tiʼj tuʼn ttzaj tqʼamaʼn aju in kubʼ t-ximen ex aju in kubʼ tnaʼn toj yol lu. Nya oʼkxju, ateʼ junjun kʼwaʼl in xi kyxnaqʼtzan kyibʼ tuʼn t-xi kyqʼoʼn jun tzaqʼwebʼil kyoj chmabʼil, tuʼn tex kyqʼoʼn jun yekʼbʼil moqa tuʼn tex kyqʼoʼn jun chikʼbʼabʼil toj yol in che yolin kyman tiʼj, noqtzun tuʼnj, mintiʼ in tzaj kyqʼamaʼn aju axix tok in kubʼ kyximen ex aju in kubʼ kynaʼn.

¹² Nya oʼkx jaku tzʼonin yol tiʼjju tmod ex tiʼj alkye t-ximbʼetz jun kʼwaʼl. Atzun jlu bʼaj tiʼj Joshua aju ma qo yolin tiʼj. In tzaj tqʼamaʼn Esther jlu, jun terman Joshua: «Toj kywitz kʼwaʼl, junx aju kyyol kyman toj kywitz, ax ikx aju kyanqʼibʼil ex kyokslabʼil». Qa junxitl in nela kyanqʼibʼil kyman toj kywitz, ax ikx mlay ten kyajbʼil tuʼn kyxnaqʼtzan tiʼj kyyol nix tuʼn t-xi kykʼamoʼn aju okslan kyuʼn. ¿Tiʼ jaku bʼant kyuʼn mambʼaj qa ma bʼaj jlu kyiʼj?

13, 14. a) ¿Tiquʼn kubʼ kyximen jun ja xjal tuʼn tok kychmon kyibʼ kyxol jun kʼloj okslal toj yol in yolinjtz toj tnam? b) ¿Tiʼ bʼant kyuʼn mambʼaj lu tuʼntzun kyten kyuwxix toj kyokslabʼil?

¹³ Aʼye mambʼaj okslal il tiʼj tuʼn tok tilil kyuʼn tuʼn kyxqʼuqin tnejel kyiʼj kykʼwaʼl ex nya tiʼjju kye kyajbʼil (1 Corintios 10:24). Tzaj tqʼamaʼn Samuel, aju tman Joshua ex Esther, qa ok kyqʼoʼn kywitz tiʼj tukʼil t-xuʼjil toj alkye yol mas in kuʼpin axix tok toj kyanmi kykʼwaʼl. Ax ikx, xi kyqanin kynabʼil te Jehová. Aju tzaqʼwebʼil tzaj qʼoʼn tiʼj kynaʼj Dios, nya aju mas bʼaʼn ela toj kywitz. Tqʼama Samuel jlu kyiʼj tkʼwaʼl: «Tej tok qqʼoʼne qwitze tiʼj qa mintiʼxix in neʼl kynikʼ kyiʼj xnaqʼtzbʼil toj qeye qyol, kubʼ qximane tuʼn tkubʼ qchʼexpuʼne jatumel tuʼn tok qchmon qibʼe. In qoʼxtoqe kyoj chmabʼil ex pakbʼal junx kyukʼil. Ax ikx, in tzajtoq qtxkoʼne qe erman waʼl qukʼile ex tuʼn qxiʼye pasialil. Tkyaqil jlu onin kyiʼj qkʼwaʼle tuʼn tok kyojtzqiʼnxix qe erman ex tuʼn tok kyqʼoʼn Jehová te Kyman, te Kyamiw ex nya noq te jun Kydios. Mastoq nim toklen jlu toj qwitze twitzju tuʼn tbʼant qyole kyuʼn».

¹⁴ Tqʼama Samuel qa tuʼn kyten kyuwxix toj kyokslabʼil, ax ikx kye in cheʼxtoq kyoj chmabʼil toj kye kyyol. Ex tqʼamatl: «Attoq nim tiʼchaq tuʼn tbʼant quʼne ex in kubʼtoq qnaʼne siktleʼn. Noqtzun tuʼnj, tzaj tkʼiwlaʼn Jehová aju bʼant quʼne ex tuʼntzunju in xi qqʼoʼne chjonte te. Aʼyeju oxe qkʼwaʼle in che ajbʼentoq toj tkyaqil ambʼil te Jehová».

15. ¿Tiquʼn kubʼ t-ximen jun ermana qa jakutoq tzʼajbʼen mas te Jehová qa ma tzʼok tchmon tibʼ jatumel in che yolin erman tiʼj yol jatumel e pon?

¹⁵ Aj kychʼiy kʼwaʼl, bʼalo jaku tzʼel kynikʼ tiʼj qa mas jaku che ajbʼen te Jehová qa ma che ten kyxol jun kʼloj okslal toj yol mas in nel kynikʼ tiʼj. Qa ma bʼaj jlu, mintiʼ tuʼn tkubʼ kyximen mambʼaj qa nya kyaj kʼwaʼl tuʼn kyten kyukʼil. Naʼnx jlu tuʼn jun ermana Kristina tbʼi: «In neltoq chʼin nnikʼe tiʼj kyyol nmane, noqtzun tuʼnj, kwesttoq tuʼn tel nnikʼe kyiʼj chmabʼil. Tej in japune twiʼ  12 abʼqʼi, in xiʼye toj jun nimaq chmabʼil tojju yol in che yolin kʼwaʼl toj tja xnaqʼtzbʼil tiʼj. El nnikʼe tiʼj qa atzun tnejel maj ok nbʼiʼne aju axix tok. Juntl ambʼil onin wiʼje aju tej wok tene naʼl Dios toj yol in yolinjtz toj tja xnaqʼtzbʼil. Iktzun tten xi nqʼamaʼne te Jehová aju tkuʼx toj wanmiye» (Hechos 2:11, 41). Tej tjapun Kristina twiʼ 18 abʼqʼi, yolin kyukʼil tman ex kubʼ t-ximen tuʼn tok tchmon tibʼ kyxol jun kʼloj okslal toj yol in che yolin xjal tiʼj toj tnam jatumel e pon. Tqʼamatl jlu: «Tej tel nnikʼe tiʼj Jehová tojju yol in yolinjtz toj tja xnaqʼtzbʼil, onin wiʼje». Tej tikʼ chʼintl ambʼil, ok Kristina te precursora regular ex in nonin jlu tiʼj tuʼn ttzalaj.

16. ¿Tiquʼn in tzalaj Nadia tuʼnju ax kyaj ten kyxol okslal in che yolin toj yol in che yolin kyman tiʼj?

¹⁶ Aya kuʼxun, ¿maspe tgana tuʼn tok tchmon tibʼa toj yol in yolinjtz toj tnam jatumel o che pone? Qa ikju, bʼaʼn tuʼn tkubʼ t-ximana tiquʼn. ¿Taja tuʼn t-xiʼya kyxol okslal lu tuʼnju kʼonil tiʼja tuʼn tchʼiy tamiwbʼila tukʼil Jehová? (Santiago 4:8). ¿Moqa taja tuʼn tbʼant jlu tuʼna tuʼnju nya tgana tuʼn tok kyqʼoʼn tmana kywitz tiʼj tiʼ in bʼant tuʼna ex nya taja tuʼn tok tilil tuʼna? Bʼinxa aju in tzaj tqʼamaʼn Nadia, aju in najbʼen toj Betel: «Tej tzmatoq kuʼxun nxibʼine ex junjuntl wermane xuʼj, qajbʼile tuʼn qxiʼye kyxol juntl kʼloj okslal jatumel in yolinjtz yol te tnam jatumel o pone». Noqtzun tuʼnj, ojtzqiʼntoq kyuʼn kyman qa mlay tzʼonin jlu tiʼj kyamiwbʼil tukʼil Jehová. Tqʼamatl Nadia jlu: «Jaʼlo, in xi qqʼoʼne chjonte kye qmane tuʼnju ok tilil kyuʼn tuʼn ttzaj kyyekʼun kyyol qeye ex tuʼnju ax o kyaj tene kyxol okslal in che yolin toj kye kyyol. Tzaj tiʼn nim tbʼanel toj qanqʼibʼile ex tzaj tqʼoʼn ambʼil qeye tuʼn qonine kyiʼj mas xjal tuʼn tel kynikʼ tiʼj Jehová».

17. a) ¿Alqe o txi qʼoʼn oklenj tuʼn kyxi xnaqʼtzet kʼwaʼl? b) ¿Tiʼ jaku bʼant kyuʼn mambʼaj qa kyajbʼil onbʼil tuʼn t-xi xnaqʼtzet axix tok kye kykʼwaʼl?

¹⁷ O txi tqʼoʼn Jehová oklenj kye mambʼaj tuʼn t-xi kyxnaqʼtzaʼn aju axix tok kye kykʼwaʼl. Mintiʼ o txi tqʼoʼn oklenj lu kye kychman moqa te alkyexku juntl xjal (kjawil uʼjit Proverbios 1:8 ex 31:10, 27, 28). Noqtzun tuʼnj, atlo junjun mambʼaj mintiʼ ojtzqiʼn kyuʼn aju yol in che yolin xjal tiʼj toj tnam jatumel o che pon. Aj t-xi kyqanin mambʼaj lu onbʼil, mintiʼ in bʼant kyuʼn noq tuʼnju nya kyajbʼil tuʼn t-xi kyxnaqʼtzaʼn kykʼwaʼl. Sino in xi kyqanin onbʼil tuʼntzun kyonin kyiʼj kykʼwaʼl tuʼn kyxi xnaqʼtzet «ik tzaʼn in tmaʼn» Jehová (Efesios 6:4). Jun techel, jaku txi kyqanin junjun kynabʼil kye ansyan tiʼj tiʼ jaku bʼant kyuʼn aj t-xi kyqʼoʼn ambʼil te Jehová kyukʼil toj kyja. Ax ikx jaku txi kyqanin onbʼil tuʼn kyonin ansyan kyiʼj tuʼn kykanet tbʼanel kyamiw kykʼwaʼl.

18, 19. a) ¿Alkye tten jaku che onin txqantl okslal kyiʼj kuʼxun? b) ¿Tiʼ il tiʼj tuʼn kukx tbʼant kyuʼn mambʼaj?

¹⁸ Tuʼn kyonin mambʼaj kyiʼj kykʼwaʼl, jaku txi kyqʼoʼn txokbʼil kyiʼj juntl ja xjal tuʼn kypon kyukʼil tojju ambʼil in xi kyqʼoʼn te Jehová kyukʼil toj kyja. Ateʼ kuʼxun in nel kynikʼ kyiʼj junjun tiʼchaq aj kyex pakbʼal kyukʼil txqantl erman ex aj tkubʼ kybʼinchaʼn junjun tiʼchaq kyukʼil (Proverbios 27:17). Tqʼama Shan jlu, aju ma qo yolin tiʼj: «Naʼnx wuʼne alkyeqe erman e onin wiʼje. Tkyaqil maj tej kyonin  wiʼje tuʼn tbʼaj nbʼinchaʼne ntene tiʼj jun oklenj, el mas nnikʼe kyiʼj junjuntl tiʼchaq. Ex ngantoqe aju in bʼantoq quʼne junx tuʼntzun qtzalaje».

¹⁹ Ax tok, aqeju erman in che onin kyiʼj mambʼaj, il tiʼj tuʼn kyonin kyiʼj kykʼwaʼl erman tuʼntzun tok kynimen kyman. ¿Alkye tten jaku bʼant kyuʼn? Aj kyyolin bʼaʼn kyiʼj kyman ex aj tok kynimen kyoklen mambʼaj tuʼn kyxi xnaqʼtzet. Nya oʼkxju, ax ikx mintiʼ tuʼn tkubʼ kybʼinchaʼn erman in che onin kyiʼj kykʼwaʼl erman te juntl tnam alkyexku nya toj tumel jaku tzʼela toj kywitz erman moqa toj kywitz xjal (1 Pedro 2:12). Maske jaku txi kyqanin mambʼaj onbʼil kye txqantl erman, kukx at kyoklen tuʼn t-xi kyyekʼun axix tok kye kykʼwaʼl. Ax ikx, il tiʼj tuʼn tok kyqʼoʼn kywitz tiʼj onbʼil in xi kyqʼoʼn txqantl erman kye kykʼwaʼl.

20. ¿Alkye tten jaku che onin mambʼaj kyiʼj kykʼwaʼl tuʼn kyok te tmajen Jehová?

²⁰ Aqeye mambʼaj, kyqaninxe onbʼil te Jehová ex kukx tzʼok tilil kyuʼne tuʼn tbʼant aju jaku bʼant kyuʼne (kjawil uʼjit 2 Crónicas 15:7). Kyqʼonke mas toklen kyamiwbʼil kykʼwaʼle tukʼil Jehová twitzju kyeye kyajbʼil. Tzʼok tilil kyuʼne tuʼn tel kynikʼe tiʼj qa in kuʼpin Tyol Dios toj kyanmi kykʼwaʼle. Bʼaʼn tuʼn tok qeʼ kykʼuʼje tiʼj qa jaku che ok kykʼwaʼle te tmajen Jehová. Aj tkubʼ kybʼinchaʼn aju in tzaj tqʼamaʼn Tyol Dios ex aj kyok lepeʼ tiʼj techel in kubʼ kyqʼoʼne kywitz, kbʼel kynaʼne ik tzeʼn tqʼama apóstol Juan tej tok tqʼoʼn qe okslal ik tzeʼn qe tkʼwaʼl. Tqʼama jlu: «Atzun mas in chin tzalaje tiʼj jlu, ok nbʼinteye qa oʼkx in che ok lpeʼ qe nkʼwaʼle tiʼj ju yol axix tok» (3 Juan 4).