In qo tzalaje kyukʼil nya nim tiʼchaq qeye
KUBʼ mojeʼ Daniel ex Míriam toj septiembre toj 2000, ex attoq jun tbʼanel kyanqʼibʼil atz Barcelona (España). Tqʼama Daniel jlu: «In kanun twiʼ qkʼuʼje tuʼn qxiʼye wal kyoj tbʼanel restaurante, tuʼn qxiʼye bʼetil toj juntl lugar ex tuʼn tok tbʼanel qxbʼalune. Ax ikx, attoq ambʼil qiʼje tuʼn qpakbʼane». Noqtzun tuʼnj, chʼexpaj jun tiʼ toj kyanqʼibʼil.
Toj jun nimaq chmabʼil ok toj 2006, kuʼpin jun chikʼbʼabʼil toj tanmi Daniel jatumel tzaj qanin xjel lu: «¿In nokpe tilil quʼn tuʼn qonin kyiʼj ‹xjal chʼix kyxi qʼiʼn tuʼn kykubʼ bʼyoʼn› tuʼntzun tkanet kychwinqlal te jumajx?» (Proverbios 24:11). Toj chikʼbʼabʼil lu tzaj qʼamaʼn qa il tiʼj tuʼn t-xi qqʼamaʼn tqanil tiʼj Tyol Dios kye xjal, tuʼnju jaku che klet tuʼn jlu (Hechos 20:26, 27). Naʼnx jlu tuʼn Daniel: «Kubʼ nnaʼne qa wukʼile in yolin Jehová». Ax ikx etz qʼamaʼn toj chikʼbʼabʼil qa mas in qo tzalaj aj tok tilil quʼn tuʼn qpakbʼan. Ojtzqiʼn tuʼn Daniel qa ax tok jlu, tuʼnju ya otoq tzʼok Míriam te precursora ex in tzalaj.
Jaw labʼin Daniel tiʼj chikʼbʼabʼil ex kubʼ t-ximen tuʼn tbʼant jun matij chʼixpubʼil tuʼn toj tanqʼibʼil. Ya nya nim or aqʼunan ex ok te precursor, ex kubʼ t-ximen qa che tzalajel tukʼil Míriam qa ma cheʼx ajbʼel toj juntl lugar jatumel kyaj erman onbʼil toj pakbʼabʼil.
TEJ OTOQ CHE IKʼ NYA BʼAʼN, E UL TBʼANEL TQANIL
Toj mayo te 2007 kyaj tkolin Daniel ex Míriam kyaqʼun ex i eʼx anqʼil atz Panamá, jun tnam jatumel otoq che xaj bʼetil. E pakbʼan kytziʼ junjun islas nqayin tok jun tiʼj juntl atz Bocas del Toro, toj mar Caribe. Chʼixme kykyaqil xjal in che anqʼin atztzu qxjalil qe ex in che yolin tiʼj yol Ngäbere. Kubʼ t-ximen Daniel ex Míriam qa jakutoq che ten wajxaq xjaw atz tukʼilju pwaq otoq kubʼ kykʼuʼn.
Bʼaj kybʼetin islas toj lanch ex tibʼaj biciclet. Naʼnx kyuʼn tej tbʼaj kybʼetin 30 kilómetros kyibʼaj tal witz tuʼn biciclet toj jun qʼij tej at nim kyaq. Otoq sikt Daniel ex chʼixme tzaj sutin toj twitz. Noqtzun tuʼnj, kubʼ kyyekʼun xjal in che yolin toj yol Ngäbere tbʼanel kymod kyukʼil, tuʼnju otoq bʼant junjun yol tuʼn Daniel ex Míriam toj kye kyyol. Tej tikʼ chʼin ambʼil, ya in che qʼontoq 23 xnaqʼtzbʼil tiʼj Tyol Dios.
¿Ti bʼaj tej tkubʼ bʼaj kypwaq? Tqʼama Daniel: «O jaw oqʼe tej tkubʼ qximane tuʼn qmeltzʼaje España». Tzaj kybʼis tuʼn tkyaj kykolin qe xjal in che xnaqʼtzan kyukʼil. Noqtzun tuʼnj, tej tikʼ juntl xjaw e pon tbʼanel tqanil kyukʼil. Tqʼama Míriam jlu: «Tzʼaj qʼoʼn txokbʼil qiʼje tuʼn qoke te precursor especial. Kubʼ qnaʼne nim tzalajbʼil tej tok qbʼiʼne qa ax tuʼn qkyaj tene».
AJU MAS IN CHE TZALAJ TUʼN
Tuʼnju o bʼant junjun chʼixpubʼil tuʼn ttnam Jehová, ya mintiʼ in najbʼen Daniel ex Míriam te precursor especial atxix toj 2015. ¿Tiʼtoq tuʼn tbʼant kyuʼn? Ok qeʼ kykʼuʼj tiʼj ttziybʼil Jehová tkuʼx toj Salmo 37:5: «Oqxenanx tibʼa tuj tqʼabʼ Qman, qeʼk tkʼuʼja tiʼj ex tzul onil teya». Kanet jun kyaqʼun aju in tzaj tqʼoʼn ambʼil kye tuʼn kyok te precursor regular, ex jaʼlo in che ajbʼen atz kyxol jun kʼloj okslal te Veraguas (Panamá).
Tqʼama Daniel jlu: «Tej naʼmxtoq qetze toj tnam España, mintiʼ bʼin quʼne qa jakutoq qo anqʼine kyukʼil nya nim tiʼchaq qeʼye. Atzun jaʼlo in bʼant quʼne, ex mintiʼ jun tiʼ nim toklen atx taj qeʼye». ¿Alqiʼj mas in che tzalaj? In kyqʼamaʼn: «Aju tuʼn qonine kyiʼj xjal kyaj tuʼn tel kynikʼ tiʼj axix tok tiʼj Jehová, atzunju in tzaj qʼonte nim tzalajbʼil qeʼye».