1, 2. a) ¿Tiʼ in kynaʼn testigos de Jehová tiʼj Tyol Dios? b) ¿Alkye uʼj tkuʼx toj Tyol Dios mas tgana tiʼj?

KʼUJLAʼN Tyol Dios kyuʼn testigos de Jehová. In tzaj tchewsaʼn qkʼuʼj, in tzaj tqʼuqbʼaʼn qkʼuʼj ex in tzaj tqʼoʼn xnaqʼtzbʼil qe aju jaku tzʼok qeʼ qkʼuʼj tiʼj (Romanos 15:4). Mya kyyol xjal tkuʼx toj, sino atzun «tyol Dios» (1 Tesalonicenses 2:13).

² Atlo junjun qe mas qgan junjun uʼj tkuʼx toj Tyol Dios. At junjun tbʼanel in nela toj kywitz aju uʼj te Mateo, Marcos, Lucas ex Juan tuʼnju in che yolin tiʼj tanqʼibʼil Jesús, ex tuʼn jlu in nel kynikʼ tiʼj alkyeqe tmod Jehová at (Juan 14:9). Ateʼ junjuntl kygan qe uʼj jatumel e kyaj tziyen qe yol kyoj ik tzeʼn uʼj te Apocalipsis, aju in tzaj tyekʼun «tkyaqilju» kbʼajel toj chʼintl ambʼil (Apocalipsis 1:1). Atzun junjuntl in chewix kykʼuʼj aj in che uʼjin kyiʼj Salmos ex junjuntl in che tzalaj aj in jaw kyuʼjin qe tbʼanel nabʼil tkuʼx toj uʼj te Proverbios. Tuʼn jlu in nel qnikʼ tiʼj qa bʼinchan maj Tyol Dios kye kykyaqil xjal.

3, 4. a) ¿Tiʼ in kubʼ qnaʼn kyiʼj uʼj in che etz tuʼn ttnam Jehová? b) ¿Alkye txqantl uʼj in che etz kye junjuntl kʼloj xjal?

³ Tuʼnju kʼujlaʼn Tyol Dios quʼn, ax ikx kʼujlaʼn quʼn qe uʼj in  che etz tuʼn ttnam Jehová tuʼnju atz in che jatz xnaqʼtzbʼil toj Xjan Uʼj. Kykyaqil nimaq uʼj, qe uʼj, aju uʼj Aju Xqʼuqil ex ¡Despertad!, ex txqantl uʼj, a Jehová in tzaj qʼonte qe. Tkyaqil jlu in nonin qiʼj tuʼn qok laqʼeʼ mas ttxlaj ex tuʼn kukx tchʼiy qʼuqbʼil qkʼuʼj (Tito 2:2).

⁴ Chʼixme tkyaqil uʼj bʼinchaʼn kye kykyaqil testigos de Jehová. Noqtzun tuʼnj, ax ikx in che bʼaj bʼinchaʼn txqantl uʼj kye junjuntl kʼloj xjal, ik tzeʼn kye kuʼxun ex kye mambʼaj. Ex chʼixme tkyaqil xnaqʼtzbʼil ex qe video tkubʼ toj qtembʼil toj Internet, o bʼaj bʼinchaʼn kye xjal nya testigos de Jehová qe. Tkyaqil xnaqʼtzbʼil lu in tzaj tyekʼun qa in japun twi tyol Jehová tej tqʼama qa tuʼn ttzaj tqʼoʼn nim xnaqʼtzbʼil kye kykyaqil xjal (Isaías 25:6).

5. ¿Tiʼ jaku tzʼok qʼuqeʼ qkʼuʼj tiʼj?

⁵ Qkyaqilx qajbʼil tuʼn tten mas ambʼil qiʼj tuʼntzun quʼjin tiʼj Tyol Dios ex kyiʼj qe quʼj. Atlo maj mlay tzʼok qqʼoʼn ax ambʼil tiʼj tkyaqil xnaqʼtzbʼil tkuʼx kyoj qe uʼj. Noqtzun tuʼnj, jaku tzʼok qʼuqeʼ qkʼuʼj tiʼj qa in tzalaj Jehová aj in najbʼen ambʼil quʼn toj tumel aj quʼjin ex aj qxnaqʼtzan tiʼj Tyol, ex kyiʼj quʼj (Efesios 5:15, 16). Maske ikju, at jun tiʼ il tiʼj tuʼn tok qxqʼuqin qibʼ tiʼj. ¿Alkye jlu?

6. ¿Tiʼ jaku kubʼ qximen tuʼntzun miʼn kyajbʼenxix junjun xnaqʼtzbʼil quʼn?

⁶ Qa mintiʼ ma tzʼok qxqʼuqin qibʼ, jaku kubʼ qximen qa at junjun piẍ Tyol Dios moqa junjun xnaqʼtzbʼil tkuʼx kyoj quʼj mintiʼ kyajbʼen qe. Jun techel, ¿tiʼ kbʼantel quʼn qa at jun txʼolbʼabʼil in yolin Tyol Dios tiʼj aju mintiʼ in yolin tiʼj qanqʼibʼil? ¿Ex tiʼ kbʼantel quʼn qa at jun xnaqʼtzbʼil oʼkx in yolin tiʼj jun kʼloj xjal ex nya qiʼj? ¿In qo ximen tiʼj aj in jaw quʼjin moqa mintiʼ in jaw quʼjin? Qa in kubʼ qximen qa mintiʼ tajbʼen qe, tuʼn jlu mlay bʼant tuʼn tetz qiʼn tbʼanel xnaqʼtzbʼil kyoj quʼj aju jaku tzʼonin qiʼj. ¿Ti jaku bʼant quʼn tuʼn miʼn tbʼaj jlu qiʼj? Bʼaʼn tuʼn ttzaj qnaʼn qa a Jehová in tzaj qʼonte tkyaqil xnaqʼtzbʼil qe. In tzaj tqʼamaʼn Tyol Dios jlu: «Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye» (Isaías 48:17). Toj xnaqʼtzbʼil lu, qo xnaqʼtzal tiʼj oxe nabʼil aju jaku tzʼonin qiʼj tuʼn tetz qiʼn tbʼanel xnaqʼtzbʼil kyoj onbʼil in tzaj tqʼoʼn Jehová qe.

7. ¿Tiquʼn il tiʼj tuʼn tten jun tbʼanel qximbʼetz aj quʼjin tiʼj Tyol Dios?

⁷ Tenx tbʼanel t-ximbʼetza aj tuʼjina. Ax tok, at junjun plaj Tyol Dios bʼinchan maj te jun kʼloj xjal ex qa te jun xjal. Noqtzun tuʼnj, in tzaj tqʼamaʼn Tyol Dios qa «tkyaqil aju tzʼibʼan tuj Tuʼjil, a Dios o qʼmante ex at tajbʼen te xnaqʼtzbʼil qe» (2 Timoteo 3:16). Tuʼntzunju, il tiʼj tuʼn tten tbʼanel qximbʼetz aj quʼjin tiʼj Tyol Dios. Jun techel, in nok tilil tuʼn jun erman tuʼn ttzaj tnaʼn qa jaku tzʼetz tiʼn nim xnaqʼtzbʼil toj jun txʼolbʼabʼil. A jlu in nonin tiʼj tuʼn tel tnikʼ kyiʼj junjun xnaqʼtzbʼil nyaxix qʼanchaʼl. Tuʼntzunju, naʼmxtoq qok ten uʼjil tiʼj Xjan Uʼj, bʼaʼn tuʼn t-xi qqanin te Jehová tuʼn tten jun tbʼanel qximbʼetz ex tuʼn ttzaj tqʼoʼn qojtzqibʼil tuʼn tel qnikʼ kyiʼj xnaqʼtzbʼil taj tuʼn tel qnikʼ kyiʼj (Esdras 7:10; kjawil uʼjit Santiago 1:5).

8, 9. a) Aj quʼjin tiʼj Tyol Dios, ¿alkyeqe xjel bʼaʼn tuʼn tkubʼ qxjelin? b) ¿Tiʼ xnaqʼtzbʼil in tzaj tqʼoʼn qe tiʼj Jehová aj ttzaj tqʼoʼn qeju kawbʼil kye ansyan?

⁸ Bʼaʼn tuʼn tkubʼ qxjelin junjun xjel. Aj quʼjin tiʼj Tyol Dios, bʼaʼn tuʼn qweʼ jun rat ex  bʼaʼn tuʼn tkubʼ qxjelin jlu: «¿Tiʼ xnaqʼtzbʼil in tzaj tqʼoʼn jlu weye tiʼj Jehová? ¿Alkye tten jaku tzʼajbʼen xnaqʼtzbʼil lu wuʼne toj wanqʼibʼile? ¿Alkye tten jaku tzʼajbʼen xnaqʼtzbʼil wuʼne tuʼn wonine kyiʼj txqantl?». Qa ma qo ximen kyiʼj xjel lu, jaku tzʼetz qiʼn tbʼanel xnaqʼtzbʼil aj quʼjin tiʼj Tyol Dios. Qo ximen tiʼj jun techel. In tzaj tqʼamaʼn Tyol Dios junjun kawbʼil tuʼn tbʼant kyuʼn ansyan (kjawil uʼjit 1 Timoteo 3:2-7). Nya ansyan qoʼ qkyaqilx, tuʼntzunju, jakulo kubʼ qximen qa melay tzʼonin xnaqʼtzbʼil lu qiʼj. Qo xnaqʼtzaʼn tiʼj alkye tten jaku che onin qiʼj qeju kawbʼil in tzaj tqʼoʼn Jehová kye ansyan qa ma che ajbʼen quʼn qeju xjel ma qqʼama jawni.

⁹ «¿Tiʼ xnaqʼtzbʼil in tzaj tqʼoʼn jlu weye tiʼj Jehová?». Aqeju kawbʼil o tzaj tqʼoʼn Jehová kye qeju in che ok qʼoʼn te ansyan, in tzaj tyekʼun qe qa taj tuʼn tjapun junjun kawbʼil nim kyoklen kyuʼn ansyan. ¿Tiquʼn? Tuʼnju nim kyoklen kʼloj okslal toj twitz Jehová. In tzaj tqʼamaʼn Xjan Uʼj qa o «che laqʼet tuʼnx ju tchkʼel» Tkʼwaʼl (Hechos 20:28). Tuʼntzunju, taj Jehová tuʼn tkubʼ kyqʼoʼn ansyan jun tbʼanel techel kywitz txqantl. Nya oʼkxju, ax ikx kxel kyqʼoʼn tajlal te Jehová tiʼj alkye kymod in kubʼ kyyekʼun kyukʼil okslal. Taj Jehová tuʼn tok qeʼ qkʼuʼj tiʼj kolbʼil in tzaj tqʼoʼn (Isaías 32:1, 2). Aj tjaw quʼjin qeju kawbʼil in xi tqʼoʼn Jehová kye ansyan, in nel qnikʼ tiʼj qa ax tok in ximen Jehová qiʼj.

10, 11. a) ¿Alkye tten jaku kubʼ qqʼoʼn toj xnaqʼtzbʼil qeju kawbʼil o tzaj tqʼoʼn Jehová kye ansyan? b) ¿Alkye tten jaku tzʼajbʼen xnaqʼtzbʼil lu quʼn tuʼn qonin kyiʼj txqantl?

 ¹⁰ «¿Alkye tten jaku tzʼajbʼen xnaqʼtzbʼil lu wuʼne toj wanqʼibʼile?». Qa ansyan teya, nim toklen tuʼn tkubʼ t-xnaqʼtzaʼna qeju kawbʼil lu tkyaqil maj ex tuʼn tok tilil tuʼna tuʼn toka te mas tbʼanel. Ex qatzun taja tuʼn toka «te nejenel kyxol okslal», il tiʼj tuʼn tok tilil tuʼna tuʼn kyjapun qe kawbʼil lu tuʼna (1 Timoteo 3:1). Noqtzun tuʼnj, qkyaqilx jaku tzʼetz qiʼn tbʼanel xnaqʼtzbʼil kyoj kawbʼil lu. Jun techel, taj Jehová tuʼn tten tbʼanel t-ximbʼetz teyele junjun qe ex taj tuʼn tten tbʼanel qnabʼil (Filipenses 4:5; 1 Pedro 4:7). Aj kyok ansyan «te jun yekʼbʼil tuʼn kyok lpeʼ ẍneʼl» kyiʼj, jaku tzʼel qkanoʼn kyiʼj ex jaku tzʼel qkanoʼn qʼuqbʼil kykʼuʼj (1 Pedro 5:3; Hebreos 13:7).

¹¹ «¿Alkye tten jaku tzʼajbʼen xnaqʼtzbʼil wuʼne tuʼn wonine kyiʼj txqantl?». Jaku che ajbʼen qeju kawbʼil kye ansyan quʼn tuʼn t-xi qyekʼun kye xjal in che xnaqʼtzan tiʼj Tyol Dios qa junxitl qe ansyan kywitz qe nejenel kye txqantl okslabʼil, ax jlu jaku tzʼajbʼen quʼn tuʼn qonin kyiʼj junjuntl xjal kyaj tuʼn tel kynikʼ tiʼj Tyol Dios. Ax ikx che onil kawbʼil lu qiʼj tuʼn tzaj qnaʼn qa nim in che aqʼunan ansyan jatumel in nok qchmon qibʼ. Ex kʼonil jlu qiʼj tuʼn t-xi qnimen qe ansyan (1 Tesalonicenses 5:12). Ex qa mas ma qo nimen kye, mas che tzalajel tiʼj kyoklen (Hebreos 13:17).

12, 13. a) ¿Alkye tqanil jaku txi qjyoʼn kyiʼj kykyaqil xnaqʼtzbʼil? b) Qʼamantza jun techel tiʼj alkye tten jaku txi qjyoʼn mas tqanil kyiʼj junjun xnaqʼtzbʼil nyaxix qʼanchaʼl.

¹² Jyoma mas tqanil. Aj qxnaqʼtzan tiʼj Tyol Dios, jaku t-xi qjyoʼn tzaqʼwebʼil kye xjel ik tzeʼn jlu:

• ¿Alkye kubʼ tzʼibʼinte jlu toj Tyol Dios?

• ¿Jatumel ex toj alkye ambʼil kubʼ tzʼibʼin?

• ¿Alkyeqe tiʼchaq nim kyoklen e ikʼ tej tkubʼ tzʼibʼin jlu toj Tyol Dios?

Qa ma bʼant jlu quʼn, jaku tzʼonin qiʼj tuʼn tel qnikʼ kyiʼj junjun xnaqʼtzbʼil nyaxix qʼanchaʼl.

¹³ Jun techel, in tzaj tqʼamaʼn Ezequiel 14:13, 14 jlu: «Qa at jun nasyon ma bʼinchan il nwitze, ex qa ma tzʼel kypaʼn kyibʼ xjal wiʼje, kbʼel kykastiw wuʼne, ex kʼelel wiʼne kywa; ktzajel weʼyaj kyibʼaj wuʼne, ex che kymel qe xjal ex qe alumaj wuʼne. Ex noqwit a najl Noé, Daniel tukʼix Job tuj txʼotxʼ lu, oʼkxwitlo ox xjal lu jaku che klet, tuʼnju tzʼaqlxix qe. Aqine Dios in chin qʼmante ju yol lu». Qa ma qo jyon mas tqanil, kʼelel qnikʼ tiʼj qa e kubʼ ttzʼibʼin Ezequiel qe yol lu tojlo abʼqʼi 612 tej naʼmxtoq tul Jesús. Ya otoq tzikʼ nim syent abʼqʼi tkyimlen Noé ex Job, noqtzun tuʼnj, kukx in tzajtoq tnaʼn Jehová kye tuʼnju kukx e ajbʼen te. Atzunte Daniel, kukx itzʼxtoq toj ambʼil aju ex qʼiʼn junlo 20 abʼqʼi tuʼn tej ttzaj tqʼamaʼn Jehová qa tzʼaqli te ik tzeʼn te Noé ex Job. ¿Tiʼ xnaqʼtzbʼil in tzaj tqʼoʼn jlu qe? In tzaj tyekʼun jlu qa in nok tqʼoʼn Jehová twitz kyiʼj tmajen kukx in che ajbʼen te ex nim kyoklen toj twitz, axpe ikx qeju kuʼxun (Salmo 148:12-14).

14. a) ¿Alkye onbʼil o tzaj tqʼoʼn Jehová kye kuʼxun? b) ¿Alkye tten jaku tzʼetz qiʼn tbʼanel xnaqʼtzbʼil toj? (Qʼonka twitza tiʼj tnejel tilbʼilal).

¹⁴ Aju uʼj bʼinchan maj kye kuʼxun. Ma qo xnaqʼtzan tiʼj qa jaku tzʼetz qiʼn tbʼanel xnaqʼtzbʼil toj tkyaqil Tyol Dios. Chʼixmi axju jaku bʼant quʼn tuʼntzun tetz qiʼn tbʼanel xnaqʼtzbʼil kyoj kykyaqil uʼj. Jun techel, kyoj qe abʼqʼi tzma in che ikʼ, o tzaj tqʼoʼn Jehová nim onbʼil kye kuʼxun ^[1] (tqanil jun). Aju xnaqʼtzbʼil lu jaku tzʼonin kyiʼj kuʼxun aj kyok weʼ twitz nya bʼaʼn akux in che chʼiy ex aj kyokx toj tja xnaqʼtzbʼil. Noqtzun tuʼnj, ¿alkye tten jaku che onin xnaqʼtzbʼil lu ex qe uʼj qiʼj qkyaqilx? Aj in jaw quʼjin qeju xnaqʼtzbʼil lu, in nel qnikʼ tiʼj alkye nya bʼaʼn in che ok weʼ kuʼxun twitz ex tuʼn jlu jaku qo onin kyiʼj, ex jaku txi qqʼuqbʼaʼn kykʼuʼj.

15. ¿Tiquʼn il tiʼj tuʼn tok kyqʼoʼn kywiʼ okslal ma che chʼiy tiʼjju xnaqʼtzbʼil bʼinchan maj kye kuʼxun?

¹⁵ intiʼ tuʼn tjaw kynimsan kyibʼ okslal ma che chʼiy ex mintiʼ tuʼn tkubʼ kyximen qa nya il tiʼj tuʼn tjaw kyuʼjin jun xnaqʼtzbʼil bʼinchan maj kye kuʼxun. At nim nya bʼaʼn in che ok weʼ kuʼxun twitz ex axju in qo ok weʼ twitz qkyaqilx. Jun techel, qkyaqilx il tiʼj tuʼn qkolin tiʼj qokslabʼil, tuʼn tok qxqʼuqin qibʼ tiʼjju in kubʼ qximen, tuʼn miʼn tkubʼ qbʼinchaʼn aju kyajbʼil txqantl, tuʼn tel qikʼun qeju nya bʼaʼn amiw ex aju nya bʼaʼn saqchbʼil. Tuʼntzunju, maske o che bʼaj bʼinchaʼn xnaqʼtzbʼil lu kye kuʼxun, atz in jatz xnaqʼtzbʼil toj Tyol Dios ex kykyaqilx okslal jaku tzʼetz kyiʼn tbʼanel xnaqʼtzbʼil toj.

16. ¿Alkye juntl uʼj jaku tzʼonin kyiʼj kuʼxun?

¹⁶ Ax ikx jaku che onin qeju uʼj o bʼaj bʼinchaʼn kye kuʼxun tuʼn tchʼiy kyamiwbʼil tukʼil Jehová (kjawil uʼjit Eclesiastés 12:1, 13). Ex jaku tzʼonin jlu kyiʼj kykyaqil okslal o che chʼiy. Jun techel, toj xjaw te abril te 2009 etz jun xnaqʼtzbʼil toj uʼj ¡Despertad! kye kuʼxun aju tok tbʼi, «¿Cómo disfrutar la lectura de la Biblia?». Toj xnaqʼtzbʼil lu, etz junjun nabʼil ex jun recuadro toj aju jakutoq tzʼajbʼen tuʼn qxnaqʼtzan. ¿Oninpe xnaqʼtzbʼil lu kyiʼj erman ma che chʼiy? Onin. Tqʼama jun xuʼj o kubʼ mojeʼ ex ateʼ qe tal qa kwesttoq in nela toj twitz tuʼn tuʼjin tiʼj Tyol Dios. Noqtzun tuʼnj, toj ambʼil jaʼlo nim in tzalaj ex in nel tnikʼ tiʼj tiʼ toklen jun uʼj tukʼil juntl uʼj tkuʼx toj Tyol Dios, ex tbʼanel in nela tkyaqil Tyol Dios toj twitz. In kubʼ tnaʼn jlu tuʼnju e ajbʼen qe nabʼil tuʼn aju etz toj uʼj ¡Despertad! Ex tqʼamatl jlu: «Naʼmxtoq tkubʼ nnaʼne jun maj qa nim ngane tuʼn wuʼjine tiʼj Tyol Dios».

17, 18. ¿Alkye tten jaku che onin qiʼj qeju xnaqʼtzbʼil bʼinchan maj kye xjal nya testigos de Jehová qe? Qʼamantza jun techel.

¹⁷ Qe uʼj bʼinchan maj kye xjal nya testigos de Jehová qe. Atxix toj abʼqʼi 2008 etz uʼj Aju Xqʼuqil tuʼn qxnaqʼtzan toj kastiy ex bʼinchan maj kye testigos de Jehová. Noqtzun tuʼnj, ax ikx in che etz txqantl uʼj kye xjal nya testigos de Jehová. ¿Alkye tten jaku tzʼetz qiʼn tbʼanel xnaqʼtzbʼil kyoj uʼj lu?  Kbʼel qqʼoʼn jun techel. Aj t-xi qqʼoʼn txokbʼil tiʼj jun xjal tuʼn tpon kyoj chmabʼil ex qa ma pon xjal toj chmabʼil, in qo jaw tzalaj tuʼn jlu. Ex aj tex tqʼoʼn erman tchikʼbʼabʼil, in qo ok ten ximel tiʼjju xjal otoq tzaj qtxkoʼn ex in qo ok ten ximil tiʼj tiʼ t-ximbʼetz at tiʼjju in bʼin tiʼj. Ax ikx in qo ok ten ximel tiʼj alkye tten jaku tzʼonin xnaqʼtzbʼil tiʼj xjal tuʼn tkubʼ chʼixpuʼn tanqʼibʼil. Aju tbʼanel in tzaj tuʼn jlu, in pon xnaqʼtzbʼil toj qanmi ex in kubʼ qnaʼn tuʼn t-xi qqʼoʼn chjonte tiʼj xnaqʼtzbʼil.

¹⁸ Chʼixme ax jlu jaku bʼant quʼn aj quʼjin kyiʼj uʼj bʼinchan maj kye xjal nya testigos de Jehová qe. Jun techel, in netz uʼj Aju Xqʼuqil kye xjal nya testigos de Jehová qe ex ateʼ txqantl xnaqʼtzbʼil toj jw.org. Kyoj xnaqʼtzbʼil lu in che ajbʼen yol nya kwest tuʼn tel kynikʼ xjal tiʼj Tyol Dios. Qa ma qo uʼjin kyiʼj xnaqʼtzbʼil lu, in nonin qiʼj tuʼn tchʼiy qkʼujlabʼil kyiʼj axix tok xnaqʼtzbʼil ya ojtzqiʼn quʼn ex mas in nel qnikʼ kyiʼj. Ex jaku tzʼel qnikʼ tiʼj alkye junjuntl tten jaku txi qyekʼun kye xjal aju nimen quʼn aj qpakbʼan. Ax ikx in nonin uʼj ¡Despertad! qiʼj tuʼn tok qeʼ qkʼuʼj tiʼj qa ax tok at jun bʼinchalte tkyaqil qe tiʼchaq. Ax ikx in nonin qiʼj tuʼn qkolin tiʼjju nimen quʼn (kjawil uʼjit 1 Pedro 3:15).

19. ¿Alkye tten jaku kubʼ qyekʼun qa in xi qqʼoʼn chjonte tiʼj tkyaqil xnaqʼtzbʼil in tzaj tqʼoʼn Jehová qe?

¹⁹ Tkyaqilju ma qo xnaqʼtzan tiʼj, in tzaj tyekʼun qa in tzaj tqʼoʼn Jehová nim xnaqʼtzbʼil tuʼn tajbʼen qe (Mateo 5:3). Tuʼntzunju, kukx tzʼok tilil quʼn tuʼn quʼjin ex tuʼn tkubʼ qbʼinchaʼn tkyaqil xnaqʼtzbʼil o tzaj tqʼoʼn Jehová qe. Qa ik ma bʼant quʼn, tzul tiʼn nim tbʼanel qe ex tuʼn jlu kbʼel qyekʼun te Jehová qa in xi qqʼoʼn chjonte tiʼj tkyaqil xnaqʼtzbʼil in tzaj tqʼoʼn qe (Isaías 48:17).