1. a) ¿Tiquʼn ojtzqiʼn quʼn qa che eletz qe tmajen Jehová tjaqʼ tipumal Nintz tnam Babilonia? b) ¿Alkye qeju xjel che xel qtzaqʼweʼn?

TOJJU xnaqʼtzbʼil maj kyaj el qnikʼ tiʼj qa e ten qeju okslal kukx in che ajbʼen te Jehová tjaqʼ tipumal Nintz tnam Babilonia. Noqtzun tuʼnj, ¿kpolpe jun qʼij che eletz tjaqʼ tipumal? Ok, tuʼnju toj Xjan Uʼj in tzaj tqʼamaʼn Jehová te ttnam tuʼn tetz toj Nintz tnam Babilonia (kjawil uʼjit Apocalipsis 18:4). In tzaj tyekʼun jlu qa oktoq che eletz qeju okslal axix tok tjaqʼ tipumal nya ax tok okslabʼil. Noqtzun tuʼnj, ¿jtojtzun? Tuʼn tel qnikʼ tiʼj, tnejel che xel qtzaqʼweʼn qeju xjel lu: ¿Tiʼ kubʼ kyximen qeju Xnaqʼtzal tiʼj Tyol Dios tuʼn tbʼant kyuʼn tukʼil Nintz tnam Babilonia tjaqʼxi 1914? ¿Okpe tilil kyuʼn erman tuʼn kypakbʼan tej akux in nikʼ Tnejel Nimaq Qʼoj twitz Tkyaqil Txʼotxʼ? ¿E tenpe tjaqʼ tipumal Nintz tnam Babilonia tuʼnju iltoq tiʼj tuʼn kyxi kawit?

2. ¿Tiʼ bʼant kyuʼn qeju Xnaqʼtzal tiʼj Tyol Dios naʼmxtoq tok Tnejel Nimaq Qʼoj twitz Tkyaqil Txʼotxʼ?

² Aju Tnejel Nimaq Qʼoj twitz Tkyaqil Txʼotxʼ bʼaj toj 1914  ex pon bʼaj toj 1918. Nimku abʼqʼi tjaqʼxi, ok tqʼoʼn twitz ermano Charles Taze Russell ex junjuntl Xnaqʼtzal tiʼj Tyol Dios kywitz tiʼj qa mintiʼ in tzaj kyxnaqʼtzan qeju okslal nya ax tok aju ax tok tiʼj Tyol Dios. Tuʼntzunju, el kypan kyibʼ te jumajx tiʼj okslabʼil nya ax tok. Toj 1879, otoq tqʼama uʼj Aju Xqʼuqil etz toj inglés qa at jun iglesia in tqʼamaʼn qa tuʼn tkubʼ mojeʼ tukʼil Jesús, noqtzun tuʼnj, in onin kyiʼj aj kawbʼil at toklen tukʼil Nintz tnam Babilonia, aju in yolin Tyol Dios tiʼj qa ik tten ik tzeʼn jun xuʼj jawni twitz kyukʼil xinaq (kjawil uʼjit Apocalipsis 17:1, 2).

3. ¿Tiʼ bʼant kyuʼn Xnaqʼtzal tiʼj Tyol Dios tuʼn tkubʼ kyyekʼun qa ya mintiʼ kyoklen tukʼil okslabʼil nya ax tok? (Qʼonka twitza tiʼj tnejel tilbʼilal).

³ Aʼyeju okslal kukx in che ajbʼen te Jehová toj ambʼil aju ojtzqintoq kyuʼn qa mlay che tzaj kʼiwlaʼn tuʼn Jehová qa kukxtoq in che onin tiʼj okslabʼil nya ax tok. Tuʼntzunju, nimku xi kysamaʼn jun carta toj iglesia tuʼn t-xi kyqʼamaʼn qa tuʼn tetz kyiʼn kyibʼ kyxol. Axpe ikx at junjun jaw kyuʼjin carta toj iglesia kywitz kykyaqil. Kyoj qeju lugar jatumel mintiʼ bʼant ikju, xi kysamaʼn carta te teyele junjun ateʼ toj iglesia. Iktzun tten kubʼ kyyekʼun Xnaqʼtzal tiʼj Tyol Dios qa nya kyaj tuʼn kytentl toj okslabʼil nya ax tok. Kyoj qeju abʼqʼi otoq che ikʼ qa ma bʼant jlu kyuʼn jakutoq che kubʼ bʼyoʼn. Noqtzun tuʼnj, te chʼixtoq tkubʼ bʼaj abʼqʼi 1870, nimku aj kawbʼil kye tnam ya mintiʼ in che onin kyiʼj iglesia ik tzeʼn tnejel. Jakutoq che yolin xjal tiʼj Tyol Dios axpe ikx jaku txi kyqʼamaʼn qa nya bʼaʼn aju in bʼant tuʼn ky-iglesia.

4. ¿Tiʼ el kynikʼ Xnaqʼtzal tiʼj Tyol Dios tiʼj Nintz tnam Babilonia tej akux in bʼajtoq Tnejel Nimaq Qʼoj twitz Tkyaqil Txʼotxʼ, ex tiʼ bʼant kyuʼn?

⁴ Aʼyeju Xnaqʼtzal tiʼj Tyol Dios el kynikʼ tiʼj qa nya oʼkx tuʼn t-xi kyqʼmaʼn kye toj kyja, kye kyamiw ex kye qeju ateʼ toj ky-iglesia qa ya mintiʼtoq in che onin tiʼj nya ax tok okslabʼil. Kyajbʼiltoq tuʼn t-xi kyqʼamaʼn kye kykyaqil xjal qa aju Nintz tnam Babilonia iktoq ik tzeʼn jun xuʼj jawni twitz kyukʼil xinaq. Tuʼntzunju, toj diciembre te 1917 ex tej t-xi tzyet 1918, aʼye junjun mil kybʼet Xnaqʼtzal tiʼj Tyol Dios xi kysipen tukʼil nim kyajbʼil 10 millón tal uʼj aju tkux jun xnaqʼtzbʼil toj «La caída de Babilonia». Mintiʼ tzaj kyxobʼil tuʼn t-xi kyqʼamaʼn tukʼil tal uʼj lu qa nya axix tok aju kyxnaqʼtzbʼil nya ax tok okslabʼil. Tzaj nimtoq kyqʼoj qe nejenel kye okslabʼil tuʼn jlu, noqtzun tuʼnj, mintiʼ kyaj kykolin qe Xnaqʼtzal tiʼj Tyol Dios tuʼn kukx tbʼant kyuʼn. Maske iktoq bʼaj, kubʼ kyximen tuʼn kukxtoq kypakbʼan ex «tuʼn t-xi» kyniman «Dios, ex mya qe xjal» (Hechos 5:29). Tkyaqil jlu in tzaj tyekʼun qa mintiʼ tzaj tzyet tuʼn kyten qe okslal tjaqʼ tipumal Nintz  tnam Babilonia tej akux in bʼajtoq Tnejel Nimaq Qʼoj twitz Tkyaqil Txʼotxʼ. Kyoj abʼqʼi aju chʼixtoq kyetz kyxol nya ax tok okslabʼil ex in che onin kyiʼj txqantl tuʼn tbʼant ax kyuʼn.

5. ¿Tiquʼn in xi qqʼamaʼn qa e pakbʼan qe erman tukʼil nim kyajbʼil akux in bʼajtoq Tnejel Nimaq Qʼoj twitz Tkyaqil Txʼotxʼ?

⁵ Ojtxi in qqʼamaʼn qa aʼyeju tmajen Dios mintiʼ e tzaj kʼiwlaʼn tej akux in bʼajtoq Tnejel Nimaq Qʼoj twitz Tkyaqil Txʼotxʼ tuʼnju mintiʼ e pakbʼan tukʼil nim kyajbʼil. Ojtzqintoq quʼn qa tuʼn jlu xi tqʼoʼn Jehová ambʼil tuʼn kyten tjaqʼ tipumal Nintz tnam Babilonia toj chʼin ambʼil. Noqtzun tuʼnj, aʼyeju ermano ex ermana kukx e ajbʼen te Jehová toj 1914 ex tej tpon bʼaj 1918 tzaj kyqʼamaʼn qa toj kʼlojin kyten ok tilil kyuʼn tuʼn kukxtoq kypakbʼan. Tuʼnju kukx in nel qnikʼ tiʼjju bʼaj kyiʼj Xnaqʼtzal tiʼj Tyol Dios kyoj abʼqʼi aju, in onin qiʼj tuʼn tel qnikʼ kyiʼj junjun tiʼ, aʼyeju in yolin Tyol Dios tiʼj.

6, 7. a) ¿Tiʼ nya bʼaʼn e ok weʼ qe Xnaqʼtzal tiʼj Tyol Dios twitz akux in bʼajtoq Tnejel Nimaq Qʼoj twitz Tkyaqil Txʼotxʼ? b) ¿Tiquʼn jaku txi qqʼamaʼn qa ok tilil kyuʼn Xnaqʼtzal tiʼj Tyol Dios tuʼn kypakbʼan?

⁶ Aʼyeju Xnaqʼtzal tiʼj Tyol Dios ok tilil kyuʼn tuʼn kypakbʼan tej akux in bʼajtoq qʼoj. Noqtzun tuʼnj, ax ikx e ok weʼ twitz junjun nya bʼaʼn. Qo xnaqʼtzaʼn tiʼj kabʼe. Aju tnejel, mintiʼtoq in bʼant kypakbʼan qa oʼkx Tyol Dios in najbʼen kyuʼn. Naqʼli qe tuʼn t-xi kysipen qe uʼj ex aʼyeju uʼj in chex chikʼbʼante aju axix tok tiʼj Tyol Dios. Jun kyxol qe uʼj lu ten The Finished Mystery (Ma bʼaj aju mintiʼtoq in nel nikʼbʼaj tiʼj). Tuʼntzunju, kwest el kye nimku erman tuʼn kypakbʼan tej tqʼama aj kawil  tuʼn miʼn t-xi sipet uʼj lu tej t-xi tzyet abʼqʼi 1918. Ex aju tkabʼen tiquʼn, toj ax abʼqʼi aju tzaj gripe española aju kyim nim xjal tuʼn. Aju yabʼil lu lwey in nel kyiqen kyiʼj txqantl, tuʼntzunju, kwest tuʼn kyxiʼ erman pakbʼal kyoj juntl tnam. Maske ikju, kukx ok tilil kyuʼn Xnaqʼtzal tiʼj Tyol Dios tuʼn kukx kypakbʼan.

⁷ Aʼyeju erman e ten toj 1914 ok kyqʼoʼn aju «Foto-Drama de la Creación». Toj programa lu in che japun yekʼun qeju tilbʼilal junx tukʼil película ex tukʼil tqʼajqʼajel, akʼaj ok jlu toj ambʼil aju. In tzaj tqʼamaʼntoq txʼolbʼabʼil kyiʼj xjal aju tzaj tzyet tiʼj tanqʼibʼil Adán ex in pon bʼaj tiʼj tkawbʼil Jesucristo. Toj tnejel abʼqʼi tej tetz, ok kyqʼoʼn kywitz mas te 9 millón xjal tiʼj. Aju tajlal lu mas nim kywitz testigos de Jehová at twitz tkyaqil Txʼotxʼ toj ambʼil jaʼlo. Juntl tqanil in tzaj tqʼamaʼn qa toj 1916 mas te 809,000 xjal pon kyoj chmabʼil toj Estados Unidos. Toj 1918 e pon mas te 950,000 xjal. A jlu in tzaj tyekʼun, qa ok tilil kyuʼn Xnaqʼtzal tiʼj Tyol Dios tuʼn kypakbʼan.

8. ¿Tiʼ bʼant kyuʼn erman qʼil twitz aqʼuntl tuʼn t-xi qʼuqbʼet kykʼuʼj qeju Xnaqʼtzal tiʼj Tyol Dios akux in bʼajtoq Tnejel Nimaq Qʼoj twitz Tkyaqil Txʼotxʼ?

⁸ Akux in bʼaj Tnejel Nimaq Qʼoj twitz Tkyaqil Txʼotxʼ, aʼyeju erman qʼil twitz aqʼuntl ok tilil kyuʼn tuʼn t-xi kyqʼoʼn uʼj ex tuʼn t-xi kyqʼuqbʼaʼn kykʼuʼj qeju Xnaqʼtzal tiʼj Tyol Dios. Tuʼnju kykʼujlabʼil ex onbʼil xi kyqʼoʼn, kukx ten kyajbʼil erman tuʼn kypakbʼan. Aju ermano Richard Barber ten nim tajbʼil tuʼn tpakbʼan toj ambʼil aju. Tqʼama jlu: «Bʼant quʼne tuʼn kukx kyaqʼunan junjun ansyan in che bʼet kyojele Ja te Chmabʼil toj kyaqʼun ex mintiʼ weʼ tuʼn t-xi sipet aju The Watch Tower. Axpe ikx xi qsamaʼne toj Canadá, jatumel mintiʼ tzaj qʼoʼn ambʼil tuʼn t-xi sipet». Ex tqʼamatl: «Axpe ikx in onine tuʼn kyxi samet junjun uʼj The Finished Mystery aju te bolsillo toj correo kye junjun erman otoq tzeʼl qʼiʼn kye. Tzaj tqʼamaʼn ermano Rutherford qeye tuʼn tok nimaq chmabʼil quʼne kyoj nim tman jatumel in kux bʼaj qʼij te tnam Estados Unidos ex tuʼn t-xi qsamaʼne qeju chikʼbʼal tuʼn t-xi qʼuqbʼet kykʼuʼj kykyaqil erman».

9. a) ¿Tiquʼn iltoq tiʼj tuʼn t-xi kawit qeju tmajen Jehová toj 1914 ex in pon toj 1919? b) Maske iltoq tiʼj tuʼn tbʼaj kychʼexpun qeju tmajen Jehová junjun tiʼchaq, ¿tiʼ mintiʼ tuʼn tkubʼ qximen?

⁹ Kukxtoq tuʼn tbʼaj kychʼexpun Xnaqʼtzal tiʼj Tyol Dios junjun tiʼchaq. Mintiʼxix in neltoq kynikʼ tiʼj aju in tzaj tqʼamaʼn Tyol Dios qe tuʼn kyxi qnimen qeju aj kawil (Romanos 13:1). Tuʼntzunju, kwest el te kye tuʼn miʼn tokx kyqʼoʼn kyibʼ toj qʼoj. Jun techel, xi tqʼamaʼn aj kawil te tnam Estados Unidos tuʼn kynaʼn xjal Dios toj qʼij 30 te mayo te 1918 tuʼn tten mujbʼabʼil. Aju Xqʼuqil etz toj inglés toj ambʼil aju, xi tqʼamaʼn  kye Xnaqʼtzal tiʼj Tyol Dios tuʼn tbʼant axju kyuʼn. At junjun erman xi kyqʼoʼn pwaq tuʼn kyonin tiʼj qʼoj ex at junjuntl e xiʼ te soldad ex e kubʼ nej toj qʼoj. Ik tzeʼn in nel qnikʼ tiʼj, iltoq tiʼj tuʼn kyxi kawit. Noqtzun tuʼnj, mintiʼ tuʼn tkubʼ qximen qa tuʼn tpaj jlu e ten tjaqʼ tipumal Nintz tnam Babilonia. Tej akux in bʼaj Tnejel Nimaq Qʼoj twitz Tkyaqil Txʼotxʼ chʼixtoq tel kypan kyibʼ tiʼj okslabʼil nya ax tok (kjawil uʼjit Lucas 12:47, 48).

10. ¿Alkye tten kubʼ kyyekʼun qeju Xnaqʼtzal tiʼj Tyol Dios qa nim toklen chwinqlal toj kywitz?

¹⁰ Ax tok mintiʼxix el kynikʼ qeju Xnaqʼtzal tiʼj Tyol Dios tiʼ t-xilen tuʼn miʼn tokx kyqʼoʼn kyibʼ toj kykawbʼil xjal. Noqtzun tuʼnj, ojtzqiʼntoq kyuʼn qa nya bʼaʼn qa ma kubʼ kybʼyoʼn jun xjal. Axpe ikx, aʼyeju e xiʼ toj qʼoj mintiʼ ajbʼen qʼaqʼ kyuʼn tuʼn tkubʼ kybʼyoʼn jun xjal. Tuʼntzunju, e kubʼ qʼoʼn tnejel kywitz txqantl soldad tuʼntzun kykubʼ bʼyoʼn.

11. ¿Tiʼ kubʼ kynaʼn qeju aj kawbʼil tuʼnju mintiʼ e xiʼ qeju Xnaqʼtzal tiʼj Tyol Dios toj qʼoj?

¹¹ Tzaj nim tqʼoj Satanás tuʼnju kukx e ajbʼen erman te Jehová. Tuʼntzunju, ajbʼen kyley xjal tuʼn tuʼntzun tok tbʼinchaʼn nya bʼaʼn kyiʼj (Salmo 94:20). Jun techel, tqʼama jun general te ejército te Estados Unidos kye erman Rutherford ex Van Amburgh qa otoq kubʼ kyximen jun kʼloj xjal kyokx kyxol aj kawil jun akʼaj ley aju in tzajtoq tqʼoʼn ambʼil tuʼn kykubʼ bʼiyet qeju nya kyaj tuʼn kyxi toj qʼoj. Atz in yolintoq general kyiʼj Xnaqʼtzal tiʼj Tyol Dios. Tukʼil nim tqʼoj xi tqʼamaʼn te ermano Rutherford qa mintiʼ otoq tzaj tqʼoʼn aj kawbʼil ambʼil tuʼn tetz ley lu. Ex tqʼamatl jlu: «Ojtzqiʼn quʼne alkye tten che tzyetele, ¡ex kbʼantel quʼne!».

12, 13. a) ¿Tiquʼn kubʼ qʼoʼn kysentens wajxaq erman te nim abʼqʼi? b) ¿Kyajpe kytzaqpiʼn erman tuʼn miʼn txi kynimen Jehová tej kyokx toj cárcel? Jaku tzaj tchikʼbʼana.

¹² Kanet jun tumel kyuʼn jun kʼloj xjal kyokx kyxol aj kawil tuʼn tkubʼ kykastiw qeju Xnaqʼtzal tiʼj Tyol Dios kyuʼn. E tzyet qeju ermano Rutherford ex Van Amburgh ex juntl qaq erman ax ikx qʼil twitz aqʼuntl qe toj Sociedad Watch Tower. Tqʼama juez aju in keʼyin tiʼj aju bʼant kyuʼn erman qa mas jawni qe twitz jun kʼloj soldad te Alemania. Tqʼama qa otoq tzʼok kybʼinchaʼn nya bʼaʼn tiʼj aj kawbʼil, kyiʼj ejército ex kyiʼj kykyaqil iglesia, tuʼntzunju, iltoq tiʼj tuʼn tkubʼ kykastiw kyuw ^[1] (tqanil jun). Tuʼntzunju, kubʼ qʼoʼn kysentens wajxaq erman te nim abʼqʼi ax ikx e eʼx samaʼn toj jun cárcel toj Atlanta (Georgia, Estados Unidos). Noqtzun tuʼnj, tej tbʼaj qʼoj, e jeʼtz tzaqpiʼn ex el qʼiʼn kysentens.

 ¹³ Maske ateʼtoq wajxaq erman lu toj cárcel, otoq kubʼ kyximen tuʼn t-xi kybʼiʼn qeju tley Dios. ¿Tiquʼn ojtzqiʼn jlu quʼn? Tuʼnju xi kytzʼibʼin te aj kawil te Estados Unidos tuʼn kyetz ttzaqpiʼn. Xi kytzʼibʼin toj carta qa mlayx kubʼ kybʼyoʼn jun xjal ex qa mlayx bʼant kyuʼn, tuʼnju in tzaj tqʼamaʼn Tyol Dios qa mintiʼ tuʼn tkubʼ qbʼiyoʼn jun xjal. Ax ikx, xi kyqʼamaʼn qa at jun xjal otoq txi tqʼamaʼn tuʼn tajbʼen te Dios ex qa mintiʼ ma txi tbʼiʼn jaku txi naj tamiwbʼil tukʼil ex kkyimel xjal lu. ¡Mintiʼ e tzaj xobʼ! In nel qnikʼ tiʼj qa kukxtoq kyaj erman tuʼn t-xi kynimen Jehová.

14. Qʼamantza tukʼil Tyol Dios aju bʼaj toj 1914 ex tej t-xi tzyet 1919.

¹⁴ In tzaj tqʼamaʼn Xjan Uʼj aju bʼaj kyiʼj Xnaqʼtzal tiʼj Tyol Dios toj 1914 ex tej t-xi tzyet 1919 toj Malaquías 3:1-3 (kjawil uʼjit). Kyoj versículo lu, «aju Kyajawe» atzun Jehová ex aju «sanjel aju kyaj bʼant tiʼj jun yol tuʼn» atzun Jesucristo. Aqe e ul keʼyil kye «tiyjil Leví», aqeju in che ok te kyechel skʼoʼn maj. Tej otoqxi txi tkawin Jehová ex otoqxi che bʼaj t-saqsan qeju skʼoʼn maj, bʼaʼntzun kyten tuʼn ttzaj kykʼamoʼn jun akʼaj aqʼuntl. Toj 1919, xi tqʼoʼn Jesús toklen «aju majen in bʼant taqʼun [...] ex at tnabʼl» tuʼn t-xi tqʼoʼn xnaqʼtzbʼil ex tuʼn t-xi tyekʼun kybʼe qeju tmajen Jehová (Mateo 24:45). E etztzun tmajen Jehová te jumajx tjaqʼ tipumal Nintz tnam Babilonia. Atxix toj ambʼil aju o tzʼel kynikʼ tiʼj alkyeju tajbʼil Jehová, ex aju kykʼujlabʼil at tiʼj kukx in chʼiy mas. ¡Nim in che tzalaj tuʼnju in tzaj kykʼamoʼn tkʼiwlabʼil Jehová! ^[2] (Tqanil kabʼe).

15. ¿Alkye tten jaku kubʼ qyekʼun qa in xi qqʼoʼn chjonte tuʼnju o qo etz tjaqʼ tipumal Nintz tnam Babilonia?

¹⁵ Nim in xi qqʼoʼn chjonte te Jehová tuʼnju o qo etz tiʼn tjaqʼ tipumal Nintz tnam Babilonia. Mintiʼx o bʼant tuʼn tkubʼ tnajsaʼn Satanás aju kʼulbʼil axix tok. Bʼaʼn tuʼn ttzaj qnaʼn tiquʼn o qo etz tiʼn Jehová. Tajbʼil Jehová tuʼn kykyaj anqʼin kykyaqil xjal (2 Corintios 6:1). Noqtzun tuʼnj, at nim millón xjal at jun tbʼanel kyanmi kukx ateʼ tjaqʼ tipumal okslabʼil nya ax tok ex kyajbʼil tuʼn qonin kyiʼj. Kukx qqʼonk tilil tuʼn tel qkanoʼn techel kubʼ kyqʼoʼn erman kukx e ajbʼen te Jehová toj ambʼil ojtxi ex qo onin kyiʼj xjal tuʼn kyetz tjaqʼ tipumal okslabʼil nya ax tok.