1. ¿Tiʼ bʼaj tej tkubʼ xiten tnam Jerusalén?

TOJ abʼqʼi 607 tej naʼmxtoq tul Jesús, aju aj kawil te tnam Babilonia ex qeju t-soldad e ok tzoqpaj tiʼj tnam Jerusalén. In tzaj tqʼamaʼn Tyol Dios qa tuʼn spad e kubʼ tbʼyoʼn qeju xinaq kuʼxun ex mintiʼ tzaj qʼaqʼin tkʼuʼj kyiʼj qeju xuʼj, qeju otoq che tijen ex qeju yabʼ. Yajxitl, «kubʼ kypatun tja Dios, kubʼ kyxitun muro tok tiʼj tnam Jerusalén, ok kyqʼoʼn kyqʼaqʼal qe tbʼanil tja rey ex bʼaj kyxitun tkyaqil tiʼxti wiʼyilxix» (2 Crónicas 36:17, 19).

2. ¿Tiʼ xi tqʼamaʼn Jehová kye aj Judiy ex tiʼ tuʼn ttzaj kyiʼj?

² Mintiʼtoq tuʼn kyjaw labʼin qeju aj Judiy tiʼj xitbʼil tiʼj tnam Jerusalén. ¿Tiquʼn? Tuʼnju toj nimku abʼqʼi i eʼx t-samaʼn Jehová qeju t-sanjel qʼamalte kye qa che okel tzoqpaj qe aj Babilonia kyiʼj qa mintiʼ in xi kybʼin te. Tuʼn jlu, nim aj Judiy che kyimel ex nimku txqantl che xel qʼin anqʼil toj tnam Babilonia (Jeremías 15:2). ¿Tzeʼn anqʼibʼil tjaqʼ tkawbʼil juntl tnam? ¿E anqʼinpe qe okslal ik tzeʼn kye aj Judiy i ex qʼiʼn toj tnam Babilonia? Qa ik bʼaj, ¿toj alkye ambʼil bʼaj lu?

3. ¿Tiquʼn junxitl kyanqʼibʼil aj Judiy ten toj Babilonia ex twitz kye aj Israel tej kyten toj Egipto?

³ Xi tqʼamaʼn Jehová kye aj Judiy tuʼn tkubʼ kynaʼn bʼaʼn ex tuʼn kyanqʼin toj tumel aj kyxi qʼiʼn toj juntl tnam. Ajbʼen Jeremías tuʼn Dios tuʼn t-xi tqʼamaʼn jlu kye: «Kybʼinchan jaw kyjaye ex che anqʼine kyuj, kyawan kuʼxe kyawale ex che nikʼbʼene tiʼj kywitz. Tzʼok tilil kyuʼne tuʼn kyten xjal tuj txubʼtxaj tuj tnam jatum o che pon nsamaʼne ex che kubʼsane nwitze tiʼj tnam lu, porque qa ma che ten xjal tuj txubʼtxaj tuj tnam lu, ax ikx kyeye che tele tuj txubʼtxaj» (Jeremías 29:5, 7). Mas toj tbʼanel e anqʼin qeju aj Judiy xi kybʼiʼn Jehová tej kyten toj juntl tnam. Xi tqʼoʼn tnam Babilonia ambʼil kye aj Judiy tuʼn tbʼant tkyaqil aju kyajbʼil ex tzaqpiʼn qe tuʼn kybʼet toj tkyaqil tnam. Toj ambʼil aju, in che pon nim xjal kʼayel ex laqʼol toj tnam Babilonia. At junjun uʼj e kubʼ tzʼibʼin ojtxi in tzaj kyqʼamaʼn qa at junjun aj Judiy i ex qʼiʼn toj Babilonia e ok te tbʼanel kʼayil ex te tbʼanel artesano. Axpe ikx at junjun e ok te qʼinun. Aju kyanqʼibʼil aj Judiy i ex qʼiʼn toj Babilonia nya ik ok ik tzeʼn kye qeju aj Israel toj tnam Egipto aju otoq bʼant nim syent abʼqʼi tbʼajlen (kjawil uʼjit Éxodo 2:23-25).

4. a) ¿Alkyeqe ax kykastiw tzaj qʼoʼn ik tzeʼn kye aj Judiy mintiʼtoq in xi kybʼiʼn Jehová? b) ¿Tiquʼn mlaytoq japun tkyaqil Ley kyuʼn aj Judiy kukx in che ajbʼen te Jehová?

⁴ Axpe ikx e xi qʼiʼn junjun aj Judiy kukx in che ajbʼen te Jehová. Maske mintiʼ jun nya bʼaʼn otoq bʼant kyuʼn, ax ikx tzaj qʼoʼn kykastiw ik tzeʼnx kye txqantl aj Judiy. Ax tok, attoq tkyaqil aju at tajbʼen kye tuʼn kyanqʼin, noqtzun tuʼnj, ¿alkye tten jaku che kʼulin te Jehová? Otoq kubʼ xiten aju tja Dios ex aju t-altar, ex aʼyeju pal ya nya nukʼun kyten. Maske ikju, kukx ok tilil kyuʼn aj Judiy in che ajbʼen te Jehová tuʼn t-xi kybʼiʼn aju Tley. Jun techel, mintiʼ xi kywaʼn Daniel, Sadrac, Mesac ex Abednego aju wabʼj nya bʼaʼn in nela toj twitz Dios. In tzaj tqʼamaʼn Xjan Uʼj qa tkyaqil qʼij in naʼn Daniel Dios (Daniel 1:8; 6:10). Mlaytoq japun tkyaqil Ley kyuʼn aj Judiy kukx in che ajbʼen te Jehová. ¿Tiquʼn? Tuʼnju ateʼtoq tjaqʼ tkawbʼil jun aj kawil mintiʼtoq in najbʼen te Jehová.

5. a) ¿Tiʼ xi ttziyen Jehová kye tmajen? b) ¿Tiquʼn jaku txi qqʼamaʼn qa japun twiʼ ttziybʼil Jehová?

⁵ ¿Jakupe che kʼulin aj Israel juntl maj te Jehová ik tzeʼn in tqʼamaʼntoq Ley? Toj ambʼil aju, kwest tuʼn kykʼulin juntl maj te Jehová, tuʼnju mintiʼ in che etz kytzaqpin qe aj Babilonia qe xjal tzyun kyuʼn. Noqtzun tuʼnj, otoq txi ttziyen Jehová kye tmajen qa che eletz tiʼn. Ex aju ttziybʼil lu japun twiʼ, ik tzeʼnx in japun kywiʼ kykyaqil ttziybʼil Dios (Isaías 55:11).

6, 7. ¿Tiquʼn il tiʼj tuʼn tbʼaj qchʼexpun aju chikʼbʼabʼil tiʼj xnaqʼtzbʼil toj alkye ambʼil ten ttnam Jehová tjaqʼ tipumal Nintz tnam Babilonia?

⁶ ¿Ope che anqʼin qeju okslal ik tzeʼn kye aj Judiy i eʼx qʼiʼn toj Babilonia? Toj nim abʼqʼi, tzaj tchikʼbʼaʼn uʼj Aju Xqʼuqil qa tzaj tzyet tuʼn kyten qeju axix tok okslal tjaqʼ tipumal Nintz tnam Babilonia toj abʼqʼi 1918 ex qa toj 1919 e jeʼtz tjaqʼ tipumal. Toj xnaqʼtzbʼil lu ex toj juntl qo xnaqʼtzal tiʼj tiquʼn il tiʼj tuʼn tbʼaj qchʼexpun aju chikʼbʼabʼil tiʼj xnaqʼtzbʼil lu.

⁷ Bʼaʼn tuʼn ttzaj qnaʼn qa aju Nintz  tnam Babilonia atz in yolin kyiʼj kykyaqil okslabʼil nya ax tok twitz tkyaqil Txʼotxʼ. Noqtzun tuʼnj, ¿tenpe ttnam Jehová tjaqʼ tipumal Nintz tnam Babilonia toj 1918? Mintiʼ. Ax tok toj ambʼil aju ok bʼinchaʼn nya bʼaʼn kyiʼj qeju okslal otoq che jaw skʼoʼn. Ok bʼinchaʼn nya bʼaʼn kyiʼj kyuʼn aj kawil ex nya kyuʼn nya ax tok okslabʼil. Axpe ikx, otoqxi tzaj tzyet tuʼn tel kypan kyibʼ qeju okslal skʼoʼn maj tiʼj nya ax tok okslabʼil tej tbʼaj Tnejel Nimaq Qʼoj twitz Tkyaqil Txʼotxʼ. In tzaj tyekʼun jlu qa nya toj 1918 tzaj tzyet tuʼn tten tnam Jehová tjaqʼ tipumal Nintz tnam Babilonia.

8. ¿Tiʼ bʼaj tej otoqxi che kyim qeju apóstol? (Qʼonka twitza tiʼj tnejel tilbʼilal).

⁸ Toj ninqʼij te Pentecostés toj abʼqʼi 33, nimku kyxol qeju xjal otoq che ok te okslal e jaw skʼoʼn tuʼn xewbʼaj xjan. Aʼyeju xjal lu e ok te «skʼoʼmaj», «te rey» te «pal», «te jun tnam oʼkx te Dios tuʼn» kyajbʼen (kjawil uʼjit 1 Pedro 2:9, 10). Akux itzʼx qeju apóstol ok kyxqʼuqin qeju kʼloj okslal. Noqtzun tuʼnj, tej otoqxi che kyim, at junjun kyxol okslal e ok ten xnaqʼtzal xnaqʼtzbʼil nya ax tok, tuʼntzun tel kypaʼn qeju okslal tiʼj axix tok. Kygantoq xjal lu aju kyxnaqʼtzbʼil xnaqʼtzal Aristóteles ex Platón. Tuʼntzunju, e ok ten xnaqʼtzal aju xnaqʼtzbʼil lu ex nya aju axix tok in tzaj tqʼamaʼn Tyol Dios (Hechos 20:30; 2 Tesalonicenses 2:6-8). Nimku kyxol in che ajbʼentoq te ansyan in bʼet kyojele Ja te Chmabʼil otoq txi qʼoʼn junjun kyoklen kyxol kʼloj okslal. Maske otoq tqʼama Jesús kye t-xnaqʼtzbʼen qa kykyaqil kyerman kyibʼ, chebʼe chebʼe tzaj tzyet tuʼn tten jun kʼloj nejenel kye okslabʼil (Mateo 23:8).

9. Qʼamantza alkye tten ok ten nya ax tok okslabʼil aqʼunal junx tukʼil aj kawil te tnam Roma ex tiʼ tzaj tuʼn jlu.

⁹ Toj abʼqʼi 313 toj ambʼil iqʼen quʼn jaʼlo, aju emperador Constantino in kawintoq tibʼaj tkyaqil tokx tjaqʼ tkawbʼil tnam Roma. Ok t-legalisarin Constantino okslabʼil nya ax tok. Yajxitl, aqʼunan Iglesia junx tukʼil aj kawil te tnam Roma. Jun yekʼbʼil tiʼj jlu aju chmabʼil ok tuʼn Constantino kyukʼil nim nejenel kye okslabʼil. Ojtzqiʼntoq chmabʼil lu tukʼil bʼibʼaj Concilio te Nicea. Tej otoqxi bʼaj chmabʼil lu, ex tlajoʼn Constantino jun pal Arrio tbʼi tuʼn t-xi toj juntl tnam, tuʼnju mintiʼ xi tkʼamoʼn aju xnaqʼtzbʼil qa a Jesús in nok te Dios. Tej tbʼet ambʼil, aju emperador te tnam Roma aju Teodosio tbʼi ok tqʼoʼn aju Iglesia Católica te kyokslabʼil qe xjal toj tnam Roma. In tzaj kyqʼamaʼn xjal in che xnaqʼtzan tiʼjju o bʼaj qa aju Roma ok te «okslal» toj ambʼil tej tten Teodosio te aj kawil. Noqtzun tuʼnj, toj ambʼil aju aʼyeju nya ax tok okslal otoq txi kykʼamoʼn aju xnaqʼtzbʼil nya ax tok ex otoq tzʼok kymujbʼan kyibʼ tukʼil Nintz tnam Babilonia. Maske  ikju, kukx e ten junjun okslal skʼoʼn maj in che ajbʼen te Jehová iktoq kyten ik tzeʼn triw yolin Jesús tiʼj. Kukx ok tilil kyuʼn tuʼn kukx kyajbʼen te Jehová, maske nya nim xjal xi bʼinte kye (kjawil uʼjit Mateo 13:24, 25, 37-39). In nel qnikʼ tiʼj qa e ten qeju okslal axix tok tjaqʼ tipumal Nintz tnam Babilonia.

10. ¿Tiquʼn el kyikʼen junjun xjal aju in tzajtoq t-xnaqʼtzaʼn Iglesia?

¹⁰ Tej otoq tzikʼ junjun syent abʼqʼi tkyimlen Jesús, nimku xjal jaku jaw kyuʼjin Tyol Dios toj yol griego moqa toj latín. Tuʼntzunju, jaku tzʼok kymojbʼaʼn aju in tzaj tqʼamaʼn Tyol Dios tukʼil t-xnaqʼtzbʼil Iglesia. Tej tok kyqʼoʼn junjun xjal kywitz tiʼj toj Tyol Dios qa aju xnaqʼtzbʼil in tzaj tqʼoʼn Iglesia nya ax tok, eltoq kyikʼen. Noqtzun tuʼnj, mlaytoq  che ok ten yolil tiʼj kyukʼil txqantl aju in kubʼ kyximen. Qa ma bʼant kyuʼn, jakutoq che kubʼ bʼyoʼn.

11. ¿Tiʼ bʼant tuʼn Iglesia tuʼn miʼn kyuʼjin xjal tiʼj Tyol Dios?

¹¹ Tej tbʼet ambʼil, chʼixme kykyaqil xjal kyaj kytzaqpiʼn tuʼn kyyolin toj yol griego ex toj latín. Mintiʼ xi kyqʼoʼn qeju nejenel te Iglesia ambʼil tuʼn tkubʼ qʼet Tyol Dios kyoj qeju yol mas in che yolin xjal tiʼj aʼyeju mintiʼ nim kyxnaqʼtzbʼil. Tuʼn jlu, oʼkx jakutoq che uʼjin qe nejenel kye okslabʼil tiʼj Tyol Dios ex junjun xjal otoq tzʼetz nim kyxnaqʼtzbʼil. Axpe ikx ateʼtoq junjun pal mintiʼxix in bʼant kyuʼjin ex kytzʼibʼin. Qa at jun mintiʼ in xiʼ tokslaʼn aju in tzaj t-xnaqʼtzaʼn Iglesia, in kubʼtoq jun tkastiw kyuwxix. Aʼyeju okslal skʼoʼn maj iltoq tiʼj tuʼn tten kynabʼl aj tok kychmon kyibʼ toj nya nim kybʼet ex ateʼ junjun mlaytoq bʼant tuʼn tok kychmon kyibʼ. Ik tzeʼnx bʼaj kyiʼj aj Judiy i eʼx qʼiʼn toj tnam Babilonia, aju «pal» skʼoʼn maj mlaytoq kʼulin te Dios toj jun tten nukʼun. Ateʼkxtoq xjal tjaqʼ tipumal Nintz tnam Babilonia.

12, 13. ¿Tiʼ kabʼe tiquʼn jakutoq tzʼok qʼuqeʼ kykʼuʼj axix tok okslal tiʼj?

¹² ¿Okpe che kʼulil qeju okslal axix tok te Dios juntl maj ik tzeʼn tnejel? Ok. Attoq kabʼe tiquʼn jaku tzʼok qʼuqeʼ kykʼuʼj tiʼj. Aju tnejel, tej chʼixtoq tkubʼ bʼaj abʼqʼi 1450 kubʼ bʼinchaʼn aju imprenta jaku txi iqʼet jaxku tumel, jun máquina in che etz uʼj toj. Tej naʼmxtoq tetz imprenta oʼkx tuʼn kyqʼabʼ xjal jaku tzaj kycopiarin Tyol Dios. Nimxix aqʼuntl in nok tiʼj. Jun xjal at nim tojtzqibʼil tiʼj jaku txi tiʼn lajaj xjaw tuʼn tbʼaj tcopiarin jun Tyol Dios. Axpe ikx, aʼyeju copia in che kubʼtoq tzʼibʼin twitz pergamino moqa twitz ttzʼumil txkup. Tuʼntzunju, nya nim Tyol Dios at ex nim kywiʼ. Tuʼn tonbʼil imprenta ex uʼj, jun xjal at tojtzqibʼil jaku tzʼetz t-imprimirin mas te 1,300 t-xaq uʼj toj jun qʼij.

¹³ Aju tkabʼin tiquʼn jaku tzʼok qʼuqeʼ qkʼuʼj tiʼj, tuʼnju xi tzyet tuʼn tkubʼ qʼet Tyol Dios kyoj txqantl yol. Tej chʼixtoq tkubʼ bʼaj abʼqʼi 1500 e ten junjun xjal mintiʼ e tzaj xobʼ ex kubʼ kyqʼoʼn Tyol Dios kyoj yol mas in che yolin xjal tiʼj aʼyeju mintiʼ etz nim kyxnaqʼtzbʼil, ex ojtzqiʼn kyuʼn qa jakutoq che kubʼ bʼyoʼn. Tzaj nimxix kyqʼoj nejenel te Iglesia. ¿Tiquʼn? Tuʼnju in che tzaj xobʼ qa jakutoq jaw kyuʼjin xjal Tyol Dios ex jakutoq kubʼ kyxjelin qeju xjel ik tzeʼn jlu: «¿Jatumel in tzaj tqʼamaʼn Tyol Dios qa il tiʼj tuʼn t-xiʼ chjet jun pal tuʼn tetz tqʼoʼn mis tiʼj jun xjal otoq kyim? ¿Jatumel in yolin Tyol Dios kyiʼj papa ex kyiʼj qeju in che jaw skʼonte kye?». Nimku xnaqʼtzbʼil nya ax tok atz e jatz tiʼn Iglesia tiʼjju kyxnaqʼtzbʼil Aristóteles ex Platón, aʼyeju e anqʼin tjaqʼxi ambʼil te Jesús. In tzajtoq nim kyqʼoj qe nejenel te Iglesia aj tel kyikʼen xjal aju kyxnaqʼtzbʼil. Tuʼntzunju, e kubʼ kybʼyoʼn nimku xinaq ex xuʼj. Nyatoq kyaj tuʼn kyuʼjin xjal tiʼj Tyol Dios ex tuʼn tkubʼ kyxjelin qe xjel. Ex chʼixme tkyaqil maj bʼant jlu kyuʼn. Noqtzun tuʼnj,  at junju xjal mintiʼ e tzaj xobʼ ex mintiʼ xi kyqʼoʼn ambʼil tuʼn kyten tjaqʼ tipumal Nintz tnam Babilonia. Otoq tzʼel kynikʼ tiʼj axix tok tiʼj Tyol Dios ex kyajbʼiltoq tuʼn tel mas kynikʼ tiʼj. Nyatoq nimtl ambʼil tuʼn kyetz tjaqʼ tipumal okslabʼil nya ax tok.

14. a) ¿Tiʼ bʼant kyuʼn qeju xjal kyajbʼiltoq tuʼn kyxnaqʼtzan tiʼj Tyol Dios? b) Qʼamantza alkye tten jyon ermano Russell tiʼjju axix tok tkuʼx toj Tyol Dios.

¹⁴ Nimku xjal kyajbʼiltoq tuʼn kyuʼjin ex tuʼn kyxnaqʼtzaʼn tiʼj Tyol Dios, ex tuʼn kyyolin tiʼjju in nel kynikʼ tiʼj kyukʼil txqantl. Nyatoq kyaj tuʼn ttzaj kyqʼamaʼn nejenel kye okslabʼil tiʼ tuʼn t-xi kyokslaʼn. Tuʼntzunju, e eʼx toj junjuntl tnam jatumel jaku che uʼjin tiʼj Tyol Dios. Jun kyxol qeju tnam lu a Estados Unidos. Toj tnam lu najlitoq Charles Taze Russell. Toj 1870, ok tenxix xnaqʼtzal tiʼj Tyol Dios kyukʼil junjuntl xjal. Tej t-xi tzyet tuʼn ermano Russell, tajtoq tuʼn tel tnikʼ alkye okslabʼil in tzaj t-xnaqʼtzaʼn axix tok. Ok tmojbʼan aju in tzaj kyxnaqʼtzaʼn okslabʼil ex aju in kyqʼamaʼn xjal tukʼilju in tzaj t-xnaqʼtzaʼn Tyol Dios. El tnikʼ tiʼj qa mintiʼ jun okslabʼil in tzaj t-xnaqʼtzanxix aju in tzaj tqʼamaʼn Tyol Dios. Jun maj, yolin tiʼj axix tok otoq tzʼel tnikʼ tiʼj kyukʼil qe tukʼil tiʼjju tkuʼx toj Tyol Dios kyukʼil qeju nejenel kye nimku Iglesia jatumel najli. Kubʼ t-ximen ermano Russell qa kxeʼl kykʼamoʼn qeju nejenel lu aju axix tok ex tuʼn t-xi kyxnaqʼtzaʼn toj Iglesia jatumel in che ajbʼen. Noqtzun tuʼnj, mintiʼ xi kykʼamoʼn. Aʼyeju Xnaqʼtzal tiʼj Tyol Dios el kynikʼ tiʼj qa mlaytoq che kʼulin te Dios junx kyukʼil qeju nya axix tok okslabʼil (kjawil uʼjit 2 Corintios 6:14).

15. a) ¿Toj alkye ambʼil tzaj tzyet tuʼn kyten axix tok okslal tjaqʼ tipumal Nintz tnam Babilonia? b) ¿Alkye qeju xjel che xeʼl qtzaqʼweʼn toj juntl xnaqʼtzbʼil?

¹⁵ Toj xnaqʼtzbʼil lu ma tzʼel qnikʼ tiʼj qa tzaj tzyet tuʼn kyten axix tok okslal tjaqʼ tipumal Nintz tnam Babilonia tej tikʼ chʼin ambʼil tkyimlen mankbʼil apóstol. Noqtzun tuʼnj, kukx kxeʼl qqʼoʼn tzaqʼwebʼil kyiʼj qe xjel lu: ¿Tiquʼn jaku txi qqʼamaʼn qa kyoj qeju abʼqʼi tjaqʼxi 1914 chʼixtoq kyetz qeju okslal skʼoʼn maj tjaqʼ tipumal Nintz tnam Babilonia? ¿Axpe tok qa mintiʼ tzalaj Jehová kyiʼj qeju tmajen tuʼnju mintiʼxix e pakbʼan toj Tnejel Nimaq Qʼoj twitz Tkyaqil Txʼotxʼ? ¿Okxpe kyqʼon kyibʼ junjun erman toj kykawbʼil xjal ex xi kynajsaʼn kyamiwbʼel tukʼil Jehová? Qa e ten qeju okslal tjaqʼ tipumal okslabʼil nya ax tok tej kykyim apóstol, ¿tok alkye ambʼil e jeʼtz tjaqʼ tipumal? Toj juntl xnaqʼtzbʼil kxeʼl qqʼoʼn tzaqʼwebʼil kyiʼj xjel lu.