1, 2. a) ¿Tiʼ kyximbʼetz xjal at tiʼjju nukʼbʼil at tuʼn Dios? b) ¿Tiʼ qo xnaqʼtzal tiʼj tojju xnaqʼtzbʼil lu?

ATEʼ junjun xjal in kyqʼamaʼn qa nya il tiʼj tuʼn tten nukʼbʼil tuʼn Dios kyxol tmajen tuʼn kykʼulin te. In kyqʼamaʼn qa oʼkx tuʼn tten jun kyamiwbʼil tukʼil. ¿Axpe tok jlu?

² Toj xnaqʼtzbʼil lu kʼelel qnikʼ tiʼj qa tkyaqil nukʼuʼn tten tuʼn Jehová ex qa in bʼaj tnukʼuʼn ttnam. Ax ikx qo xnaqʼtzal tiʼj tiʼ kbʼantel quʼn aj ttzaj tqʼoʼn ttnam qe tqanil qe (1 Corintios 14:33, 40). Toj tnejel syent abʼqʼi, in xitoq kybʼiʼn okslal aju in tzaj tqʼamaʼn Xjan Uʼj. Noq tuʼn jlu e pakbʼan tiʼj tbʼanel tqanil tiʼj Tkawbʼil Dios toj nimku lugar. Toj ambʼil jaʼlo, ax ikx in xi kybʼiʼn testigos de Jehová aju in ttzaj tqʼamaʼn Tyol Dios ex in xi kybʼiʼn qeju tqanil in tzaj tqʼoʼn ttnam Jehová. Tuʼntzunju, jaku txi qpakbʼaʼn tqanil tiʼj Tkawbʼil Dios twitz tkyaqil Txʼotxʼ. Ax ikx, ateʼ kʼloj okslal saq ex toj mujbʼabʼil.

3. ¿Tiquʼn qʼuqli qkʼuʼj tiʼj qa tgan Jehová tuʼn tten tkyaqil toj nukʼbʼil?

³ Aj qximen kyiʼj tiʼchaq o kubʼ tbʼinchaʼn Jehová, in nel qnikʼ tiʼj qa tgan tuʼn tten tkyaqil toj nukʼbʼil. In tzaj tqʼamaʼn  Proverbios 3:19 qa kubʼ tbʼinchaʼn Txʼotxʼ tukʼil «tnabʼl» ex qa kubʼ tbʼinchaʼn kyaʼj «tuʼn tojtzqibʼl». Nya nim ojtzqiʼn quʼn kyiʼj tiʼchaq o kubʼ tbʼinchaʼn Dios. Tuʼntzunju in tzaj tqʼamaʼn Tyol qa «noq chʼin» o qbʼi tiʼj tbʼinchbʼen (Job 26:14). Maske ikju, aju ojtzqiʼn quʼn tiʼj tkyaqilju at, in qo tzaj tonin tuʼn tel qnikʼ tiʼj qa nukʼuʼn tten tkyaqil tuʼn (Salmo 8:3, 4). Qo ximen kyiʼj qeju nim millón cheʼw in che yukch twitz kyaʼj ex nukʼuʼn kyten. Ax ikx jaku qo ximen tiʼj alkye tten in che yukchi junjuntl planeta tiʼj Qʼij. At aju nukʼbʼil tbʼanelxix lu tuʼnju ik kubʼ t-ximen Jehová. Qa ma qo ximen tiʼj qa kubʼ tbʼinchaʼn Jehová kyaʼj ex Txʼotxʼ tukʼil tnabʼil, in nonin qiʼj tuʼn tjaw qnimsaʼn, tuʼn qkʼulin te ex tuʼn kukx qajbʼen te (Salmo 136:1, 5-9).

4. ¿Tiquʼn naʼmx ttzaj kyqʼoʼn qeju in che xnaqʼtzan kyiʼj nim tiʼchaq tzaqʼwebʼil kyiʼj xjel nim kyoklen?

⁴ Aʼyeju xjal in che xnaqʼtzan tiʼj Txʼotxʼ ex tiʼj tkyaqilju at, o tzeʼl kynikʼ kyiʼj nim tiʼchaq. Noq tuʼn jlu mas nya kwest qanqʼibʼil jaʼlo. Noqtzun tuʼnj, mintiʼ o tzaj kyqʼoʼn tzaqʼwebʼil kyiʼj xjel nim kyoklen. Jun techel, mlay bʼant tuʼn ttzaj kychikʼbʼaʼn alkye tten tzaj tzyet tkyaqil ex tiquʼn jaku ten qanqʼibʼil tzalu twitz Txʼotxʼ. Ex chʼixmi kykyaqil xjal mintiʼ in bʼant tuʼn ttzaj kychikʼbʼaʼn tiquʼn nya qaj tuʼn qkyim (Eclesiastés 3:11). ¿Tiquʼn nim xjal mintiʼ ojtzqiʼn tzaqʼwebʼil kyuʼn kyiʼj xjel lu? Jun tiquʼn, tuʼnju ateʼ nim xjal in che xnaqʼtzan kyiʼj tiʼchaq, ex junjuntl xjal in kyqʼamaʼn qa mintiʼ Dios at ex qa mintiʼ jun bʼinchalte tkyaqil. Atzun te Dios in tzaj tqʼoʼn tzaqʼwebʼil kyiʼj xjel lu toj Tyol.

5. ¿Alkyeqe techel in tzaj kyyekʼun qa at kyajbʼen qeju ley tiʼj tkyaqil tiʼchaq qe?

⁵ A Jehová kubʼ bʼinchante tkyaqil ley tiʼj tkyaqilju at ex mintiʼ in che chʼexpaj. Aqeju bʼinchal luz, qe albañil, qe ingeniero, qe yukil avión, qe aj qʼanil ex junjuntl xjal, in che ajbʼen ley lu kyuʼn tiʼj kyaqʼun. Jun techel, ojtzqiʼn kyuʼn aj qʼanil jatumel jaku kanet qanmi. ¿Tiquʼn? Tuʼnju qkyaqilx at qanmi toj junx lugar. Ex qkyaqilx ojtzqiʼn quʼn, qa ma kutz t-xon tibʼ jun xjal twiʼ jun tzeʼ ex taj tuʼn tlipen ik tzeʼn jun pájaro, jaku tzaj nya bʼaʼn tiʼj. ¿Tiquʼn? Tuʼnju ley tiʼj tipumal Txʼotxʼ. Tuʼntzunju, qa qajbʼil tuʼn kukx qanqʼin, il tiʼj tuʼn t-xi qbʼiʼn tkyaqil ley tiʼj tkyaqilju at.

6. ¿Tiquʼn tajbʼil Jehová tuʼn tbʼaj qnukʼuʼn qten tuʼn qkʼulin te?

⁶ In qo jaw labʼin tiʼj alkye tten nukʼuʼn tkyaqil tiʼchaq at tuʼn Jehová. Tuʼntzunju, bʼaʼn tuʼn tkubʼ qximen qa tajbʼil tuʼn tbʼaj qnukʼuʼn qten tuʼn qkʼulin te. Ex o tzaj tqʼoʼn Tyol qe tuʼn ttzaj tyekʼun alkye tten tuʼn qkʼulin te. Oʼkx jaku qo tzalaj qa in xi qbʼiʼn aju in tzaj tqʼamaʼn Jehová ex ttnam.

7. ¿Tiʼ xnaqʼtzbʼil in tzaj tyekʼun qe tiʼjju alkye tten tzʼibʼin Tyol Dios?

⁷ Aju Xjan Uʼj jun oyaj nim toklen o tzaj tqʼoʼn Dios qe. At junjun xjal at kyojtzqibʼil in kyqʼamaʼn qa mintiʼ mujbʼabʼil kyxol uʼj tkuʼx toj, tuʼnju noq jun kʼloj uʼj kye aj Judiy ex kye okslal. Noqtzun tuʼnj, a Jehová kubʼ ximente alkyeqe che bʼel tzʼibʼinte Tyol, jtoj ex tiʼ kbʼel kytzʼibʼin toj. Tuʼntzunju, kykyaqil uʼj tkuʼx toj Tyol Dios, at toklen jun tukʼil juntl ex in qo  tzaj kyonin tuʼn tel qnikʼ tiʼj tiʼ tajbʼil Dios tuʼn ttzaj t-xnaqʼtzaʼn qe. In tzaj tyekʼun Tyol Dios toj Génesis ex in pon bʼaj toj Apocalipsis qa ktel jun «tiyjil xuʼj» aju kʼokeltoq Txʼotxʼ tuʼn te jun tbʼanel najbʼil. In tzaj t-xnaqʼtzaʼn qe qa a Jesucristo aju «tiyjil xuʼj» ex qa kbʼel tyekʼun Tkawbʼil qa oʼkx Jehová at toklen tuʼn tkawin qibʼaj (kjawil uʼjit Génesis 3:15, Mateo 6:10 ex Apocalipsis 11:15).

8. ¿Tiquʼn in xi qqʼamaʼn qa bʼaj nukʼuʼn kyten aj Israel?

⁸ Ax ikx, bʼaj tnukʼuʼn Jehová kyten aj Israel. ¿Alkye tten bʼant tuʼn? Tej t-xi tqʼoʼn Ley kye. Jun techel, nukʼuʼn kyten junjun «xuʼj in che ajbʼentoq ttzi ja xbʼalun te mojbʼabʼl tibʼil» (Éxodo 38:8). Ax ikx xi tqʼoʼn Jehová tqanil tiʼj alkye tten tuʼn tikʼ iqʼit campamet ex aju ja xbʼalun toj ttxolil. Tej tbʼet ambʼil, bʼaj tnukʼuʼn aj kawil David kyten qeju pal ex qeju aj Leví tiʼj kyaqʼun in bʼanttoq toj tja Dios (1 Crónicas 23:1-6; 24:1-3). Tzaj tkʼiwlaʼn Jehová qe aj Israel tej t-xi kybʼiʼn ex e tzalaj tiʼj nukʼbʼil, ex mujbʼabʼil attoq kyxol (Deuteronomio 11:26, 27; 28:1-14).

9. ¿Alkye tten nukʼuʼn kyten qeju kʼloj okslal toj tnejel syent abʼqʼi?

⁹ Ax ikx nukʼuʼn kyten kʼloj okslal toj tnejel syent abʼqʼi. Toj ambʼil aju, attoq jun kʼloj xjal qʼil twitz aqʼuntl kyxol kʼloj okslal. Tnejel, oʼkx qeju apóstol ateʼtoq kyxol kʼloj xjal lu, noqtzun tuʼnj, yajxitl e ten junjuntl ansyan (Hechos 6:1-6; 15:6). E ajbʼen kʼloj xjal qʼil twitz aqʼuntl tuʼn Jehová ex qeju okslal in che onintoq kyiʼj tuʼn tkubʼ kytzʼibʼin junjun uʼj tukʼil tqanil ex junjun kawbʼil kye kʼloj okslal (1 Timoteo 3:1-13; Tito 1:5-9). ¿Tiʼ tbʼanel tzaj kye kʼloj okslal tej t-xi kybʼiʼn qeju tqanil xi tqʼoʼn kʼloj xjal qʼil twitz aqʼuntl?

10. ¿Tiʼ tzaj tuʼnju xi kybʼiʼn okslal toj tnejel syent abʼqʼi qeju tqanil xi tqʼoʼn kʼloj xjal qʼil twitz aqʼuntl kye? (Qʼonka twitza tiʼj tnejel tilbʼilal).

¹⁰ (Kjawil uʼjit Hechos 16:4, 5). Toj tnejel syent abʼqʼi, attoq junjun erman in cheʼx visitaril kye kʼloj okslal tuʼn t-xi kyqʼamaʼn aju otoq kubʼ kyximen «apostl» ex qeju «ansyan ateʼtoq tuj Jerusalén». Tuʼnju xi kybʼiʼn okslal tqanil xi tqʼoʼn kʼloj xjal qʼil twitz aqʼuntl, kukx e chʼiy «tuj kyokslabʼl» ex kukx chmet «kybʼet junjun qʼij». ¿Alkye tten jaku tzʼel qkanoʼn techel kubʼ kyqʼoʼn toj Ja te Chmabʼil?

11. ¿Tiʼ kbʼantel kyuʼn erman at kyoklen aj ttzaj qʼoʼn tqanil kye tuʼn ttnam Jehová?

¹¹ Aʼyeju Kʼloj ansyan toj Ninja qʼil twitz aqʼuntl moqa Kʼloj ansyan iqʼel twitz aqʼuntl toj jun tnam, qeju ansyan in che bʼet kyojele Ja te Chmabʼil ex qeju ansyan, il tiʼj tuʼn t-xi kybʼiʼn qeju tqanil in tzaj tqʼoʼn ttnam Jehová. Axpe ikx, in tzaj tqʼamaʼn Tyol Dios qa qkyaqil il tiʼj tuʼn t-xi qbʼiʼn qe nejenel (Deuteronomio 30:16; Hebreos 13:7, 17). Qa kukx in qo ajbʼen te Jehová, kxel qbʼiʼn qeju tqanil in tzaj tqʼoʼn ex mlay qo yolin nya bʼaʼn kyiʼj. Nya qajbʼil tuʼn qok ik tzeʼn Diótrefes aju mintiʼtoq xi tbʼiʼn qeju qʼil twitz aqʼuntl kyxol erman (kjawil uʼjit 3 Juan 9, 10). Aj t-xi qbʼiʼn qeju tqanil, in qo onin tuʼn tten mujbʼabʼil kyxol erman. Tuʼntzunju, qxjelin kubʼ jlu: «¿In chin oninpe kyiʼj erman tuʼn kukx kyajbʼen te Jehová? ¿Jun ratpe in xi nbʼiʼne qeju tqanil in tzaj tqʼoʼn ttnam Jehová?».

12. ¿Alkye tten in xi qʼet toklen jun erman te ansyan ex te onil kye ansyan?

 ¹² Kʼitzqe bʼaj tchʼexpuʼn Kʼloj Xjal Qʼil Twitz Aqʼuntl alkye tten tuʼn t-xi qʼet toklen jun erman te ansyan moqa te onil kye ansyan. Tzaj tchikʼbʼaʼn uʼj La Atalaya te 15 te noviembre te 2014 toj xnaqʼtzbʼil «Preguntas de los lectores», qa xi tqʼoʼn kʼloj xjal qʼil twitz aqʼuntl toj tnejel syent abʼqʼi ambʼil kye ansyan in che bʼet kyojele Ja te Chmabʼil tuʼn t-xi qʼet kyoklen erman te ansyan moqa te onil kye ansyan. Tuʼntzunju, toj septiembre te 2014 tzaj tzyet tuʼn t-xi kyqʼoʼn ansyan in che bʼet kyojele Ja te Chmabʼil kyoklen erman. Aj tkubʼ kyximen ansyan qa jaku txi qʼet toklen jun erman, in nok tilil tuʼn ansyan in bʼet kyojele Ja te Chmabʼil tuʼn tok tojtzqiʼn erman ex qeju toj tja. Tuʼn tbʼant jlu, il-lo tiʼj tuʼn tex pakbʼal tukʼil erman (1 Timoteo 3:4, 5). Yajxitl, kʼokel tchmon tibʼ ansyan in bʼet kyojele Ja te Chmabʼil kyukʼil ansyan. Junx in kubʼ kyxnaqʼtzaʼn qeju taqikʼ Tyol Dios in che yolin tiʼj qa jaku txi qʼet toklen jun erman te ansyan moqa te onil kye ansyan (1 Timoteo 3:1-10, 12, 13; 1 Pedro 5:1-3).

13. ¿Alkye tten in kubʼ qyekʼun qa in qo onin kyukʼil ansyan?

¹³ In najbʼen Tyol Dios kyuʼn ansyan tuʼn kyonin qiʼj tuʼnju kyajbʼil tuʼn tok kyxqʼuqin qeju erman. Qajbʼil tuʼn qonin kyukʼil ex tuʼn t-xi qbʼiʼn aju in tzaj kyqʼamaʼn tuʼnju te qex kʼajbʼel (1 Timoteo 6:3). Toj tnejel syent abʼqʼi, ateʼ junjun okslal «mya tuj tumel» in che bʼettoq. Nyatoq kyaj tuʼn kyaqʼunan ex in nokx kyqʼon kyibʼ toj kyanqʼibʼil txqantl. Ok tilil kyuʼn ansyan tuʼn kyonin kyiʼj, noqtzun tuʼnj, mintiʼ bʼaj kychʼixpuʼn kymod. Tqʼama Pablo kye kʼloj okslal aju alkye kymod tuʼn tten kyukʼil. Tqʼama jlu: «Tzʼelx kynikʼe tiʼj, ex miʼn tzʼok kymojbʼan kyibʼe tukʼil». Mintiʼxix tuʼn tok kymojbʼan kyibʼ erman tukʼil xjal aju, noqtzun tuʼnj, mintiʼtoq tuʼn tok kyqʼoʼn te kyajqʼoj (2 Tesalonicenses 3:11-15). Toj ambʼil jaʼlo, ax ikx in nok tilil kyuʼn ansyan tuʼn kyonin tiʼj jun erman mintiʼ in xi tbʼiʼn qe tkawbʼil Dios. Jun techel, jakulo txi kyqʼoʼn kawbʼil te jun erman in yolin tukʼil jun xjal mintiʼ najbʼen te Jehová (1 Corintios 7:39). ¿Yajtzun qa mintiʼ ma bʼaj tchʼixpuʼn tmod? Jakulo tzʼex kyqʼoʼn ansyan jun chikʼbʼabʼil tuʼn t-xi kyqʼamaʼn qa jaku che yolin txqantl nya bʼaʼn tiʼj ttnam Jehová tuʼn mod lu. Qa ma tzʼex kyqʼoʼn ansyan jun chikʼbʼabʼil ik tzeʼn jlu, ¿tiʼ kbʼantel quʼn? Yajtzun qa ojtzqiʼn quʼn alqiʼj setz qʼoʼn chikʼbʼabʼil, ¿kukxpe kʼokel qmojbʼan qibʼ tukʼil? Iktzun tten jaku qo onin tiʼj tuʼn tel tnikʼ qa ntzaj nya bʼaʼn tiʼj tuʼn tmod ex nya tgan Jehová. Jakulo kubʼ tchʼixpuʼn tmod ^[1] (tqanil jun).

14. ¿Alkye tten jaku qo onin tuʼn tten ttnam Jehová saq?

¹⁴ In tzaj tqʼamaʼn Tyol Dios tiʼ kbʼantel quʼn qkyaqilx tuʼn miʼn tten nya  bʼaʼn toj ttnam Jehová. Qo ximen tiʼjju bʼaj toj tnam Corinto. Attoq tkʼujlabʼil Pablo kyiʼj erman aju. Ax xi qʼonte xnaqʼtzbʼil tiʼj axix tok kye junjun (1 Corintios 1:1, 2). Tuʼntzunju, bʼaʼn tuʼn qximen tiʼj tiʼ kubʼ tnaʼn tej tok tbʼiʼn qa in yaẍintoq jun xjal ex qa in xitoq kyqʼoʼn okslal ambʼil te. Xi tqʼamaʼn Pablo kawbʼil kye ansyan qa tuʼn t-xi qʼet «xjal lu tuj tkwent Satanás». Iltoq tiʼj tuʼn tex lajet aju xjal lu kyxol kʼloj okslal (1 Corintios 5:1, 5-7, 12). Toj ambʼil jaʼlo, jaku tzʼex kylajoʼn ansyan qa at jun nya taj tuʼn tajtz tiʼj tanmi tuʼnju ma kubʼ tbʼinchaʼn jun matij il. Qa ma ten qmod kyukʼil qeju o che ex lajoʼn toj ttnam Jehová ik tzeʼn in tzaj tqʼamaʼn Tyol, qo onil tuʼn tten ttnam Jehová saq. Ex jakulo qo onin kyiʼj tuʼn tajtz tiʼj kyanmi ex tuʼn kyjyon tumel tuʼn tkubʼ najsaʼn kyil tuʼn Jehová.

15. ¿Alkye tten jaku ten mujbʼabʼil quʼn toj Ja te Chmabʼil?

¹⁵ Ax ikx attoq juntl nya bʼaʼn kyxol okslal toj tnam Corinto. Ateʼ junjun in xitoq kyiʼn qe kyerman kywitz jwes. Xitzun tqanin Pablo jlu kye: «¿Myapelo mas bʼaʼn tuʼn tikʼx kyuʼne aju mya bʼaʼn in bʼinchanjtz kyiʼje?» (1 Corintios 6:1-8). Toj ambʼil jaʼlo, ateʼ junjun erman in kyaj bʼant tiʼj jun kyyol tiʼj jun kʼaẍjel kyukʼil txqantl erman ex o txi kynajsaʼn kypwaq moqa in kubʼ kynaʼn qa o che kubʼ sbʼuʼn. Tuʼntzunju, o t-xi kyin qeju erman kywitz jwes. Qa ma bʼaj lu, jakulo che yolin xjal nya bʼaʼn tiʼj Jehová ex tiʼj ttnam. Ex jakulo tzaj tiʼn nya bʼaʼn kyxol okslal. In tzaj tqʼamaʼn Tyol Dios qa il tiʼj tuʼn tten mujbʼabʼil quʼn kyxol qerman, maske kyxel qnajsaʼn qpwaq ^[2] (tqanil kabʼe). Tqʼama Jesús alkye tten jaku kyaj nya bʼaʼn toj ttxolil quʼn (kjawil uʼjit Mateo 5:23, 24 ex 18:15-17). Qbʼinx qeju tconsej. Iktzun tten jaku ten mujbʼabʼil toj Ja te Chmabʼil.

16. ¿Tiquʼn at mujbʼabʼil kyxol tmajen Jehová?

¹⁶ In tzaj tqʼamaʼn Tyol Dios lu: «Puro bʼaʼn ex tzalajbʼil kye qe xjal kyerman kyibʼ in che anqʼin junx ex junx kynabʼl» (Salmo 133:1). Kukx ten nukʼbʼil ex mujbʼabʼil kyxol aj Israel tej t-xi kynimen Jehová. Tej tyolin Jehová tiʼj ambʼil tzul kye tmajen, tqʼama jlu: «Che okel nchmoʼne ik tzaʼn in che ok chmet ẍneʼl tuj kypeʼn» (Miqueas 2:12). Ax ikx tqʼama Jehová qa che teltoq tmajen toj mujbʼabʼil tuʼnju kʼeleltoq kynikʼ tiʼjju axix tok. Tqʼama jlu: «Kchʼexpetel kyyolin qe nasyon tuʼn kyyolin tuj tumelxix, tuʼntzun ntzaj naʼne kyuʼn kykyaqil xjal ex tuʼn kyajbʼen weye mojl kyyol» (Sofonías 3:9). Nimxix in xi qqʼoʼn chjonte te Jehová tuʼnju in qo kʼulin te toj mujbʼabʼil.

17. ¿Tiʼ il tiʼj tuʼn tbʼant kyuʼn ansyan qa at jun erman ma kubʼ tbʼinchaʼn jun matij il?

 ¹⁷ Qa at jun erman ma kubʼ tbʼinchaʼn jun matij il, il tiʼj tuʼn t-xi kybʼinchaʼn naj ansyan tiʼj tukʼil kʼujlabʼil. Ojtzqiʼn kyuʼn qa taj Jehová tuʼn tok kyxqʼuqin qeju erman kyiʼj nya bʼaʼn jaku che oktz kyxol. Iktzun tten ktel ttnam Jehová saq ex toj mujbʼabʼil (Proverbios 15:3). Attoq nim tkʼujlabʼil Pablo kyiʼj okslal te tnam Corinto. Tuʼntzunju, xi tqʼoʼn kawbʼil kye qa iltoq tiʼj tuʼn t-xi qʼet. Atzun jlu bʼant tuʼn tej t-xi ttzʼibʼin aju tnejel uʼj xi t-samaʼn kye. Ex jun rat naj xi kybʼiʼn qeju ansyan te tnam Corinto aju kawbʼil xi qʼoʼn kye tuʼn Pablo. ¿Tiquʼn ojtzqiʼn quʼn? Tuʼnju tej t-xi ttzʼibʼin Pablo aju tkabʼin uʼj kye, tqʼama qa tbʼanel aju otoq bʼant kyuʼn. Tuʼntzunju, qa at jun erman «ma kubʼ tzʼaq» toj jun nya bʼaʼn, il tiʼj tuʼn t-xi kybʼinchaʼn ansyan tiʼj tukʼil kʼujlabʼil (Gálatas 6:1).

18. a) ¿Tiquʼn tbʼanel tej e ok lepeʼ okslal toj tnejel syent abʼqʼi tiʼj onbʼil in tzaj tqʼoʼn Tyol Dios? b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁸ Tuʼnju xi kyqʼoʼn okslal toj tnejel syent abʼqʼi ambʼil tuʼn kytzaj onin tuʼn Tyol Dios, kukx e ten saq ex toj mujbʼabʼil (1 Corintios 1:10; Efesios 4:11-13; 1 Pedro 3:8). Noq tuʼn jlu bʼant tuʼn t-xi kypakbʼaʼn erman tbʼanel tqanil «kye kykyaqil xjal tuj tkyaqil twitz txʼotxʼ» (Colosenses 1:23). Ax ikx toj ambʼil jaʼlo, nukʼuʼn qten ex at mujbʼabʼil qxol, ex in qo pakbʼan tiʼj tbʼanel tqanil twitz tkyaqil Txʼotxʼ. Toj juntl xnaqʼtzbʼil qo xnaqʼtzal tiʼj mas yekʼbʼil qa aju mas qajbʼil tuʼn tbʼant quʼn, aju tuʼn tjaw qnimsaʼn Qman Jehová ex tuʼn t-xi qnimen aju onbʼil in tzaj tqʼoʼn Tyol (Salmo 71:15, 16).