IK TZEʼN in tzaj tqʼamaʼn Mateo 13:24-26, tqʼama Jesús jlu: «Aju kawbʼil in tzaj tuj kyaʼj ik tten ik tzaʼn jun xjal kuʼx tawaʼn tbʼanil iyaj tuj tkojbʼil. Pero te qonikʼan in che tantoq xjal, ul jun xjal at tqʼoj tiʼj, kuʼx tawaʼn tiyjil chʼim kʼul t-xol triw, ex ajtzun. Tej tjawil poqʼl triw ex tej tok twitz, ax ikx te chʼim kʼul tzaj poqʼl». Ate junjun xjal at kyojtzqibʼil mintiʼxix in nok qeʼ kykʼuʼj qa ax tok bʼaj jlu toj kyanqʼibʼil xjal. Noqtzun tuʼnj, ik tzeʼn in tzaj kyqʼamaʼn junjun uʼj in che yolin kyiʼj kawbʼil te tnam Roma toj ambʼil ojtxi, in tzaj tqʼamaʼn qa jakutoq che ikʼ qeju tiʼchaq lu.

In tzaj tqʼamaʼn jun uʼj pujbʼil yol tiʼj Tyol Dios qa jun il aju qa at jun xjal ma tzʼok ten bʼinchal nya bʼaʼn tiʼj juntl xjal aj tkux tawaʼn nya bʼaʼn kʼul toj ttxʼotxʼ. Qa iltoq tiʼj tuʼn tten jun ley tiʼj jlu, a jlu in tzaj tyekʼun qa ax tok bʼaj qeju nya bʼaʼn lu. In tzaj tchikʼbʼaʼn Alastair Kerr, jun xjal at tojtzqibʼil kyiʼj ley qa toj abʼqʼi 533 tej otoq tten Jesús twitz Txʼotxʼ, etz tiʼn Justiniano, jun aj kawil te tnam Roma jun uʼj aju Digesto tbʼi. Aju uʼj lu, in yolin tiʼj jun kʼloj kyley xjal aj Roma ex tkuʼxtoq junjun kyyol xjal at kyojtzqibʼil kyiʼj ley toj, aqeju e ten toj abʼqʼi 100 ex 250 tej otoq tten Jesús twitz Txʼotxʼ. In yolin uʼj Digesto tiʼj jun xjal at tojtzqibʼil kyiʼj ley, aju Ulpiano tbʼi, ex yolin xjal lu tiʼj jun xjal kux tawaʼn nya bʼaʼn kʼul toj ttxʼotxʼ juntl xjal ex qa tzaj nya bʼaʼn tiʼj awal tuʼn jlu. Ax ikx in tzaj tqʼamaʼn uʼj qa attoq toklen tajaw txʼotxʼ tuʼn ttzaj tkʼamoʼn jun tajlal pwaq teju xjal nya bʼaʼn tuʼntzun tchjet aju tawal xjal otoq naj.

A jlu in tzaj tyekʼun qa ax tok in che ikʼtoq nya bʼaʼn jlu tjaqʼ tkawbʼil tnam Roma. Ex tuʼn jlu in nel qnikʼ tiʼj qa ax tok bʼaj aju techel yolin Jesús tiʼj.