Bʼaʼn tuʼn tkubʼ qyekʼun tbʼanel qmod kyukʼil qeju in che tzaj toj juntl tnam
«Miʼn tzikʼ tnaʼl kyuʼne tuʼn kyqʼonteye kyposad xjal» (HEBREOS 13:2).
BʼITZ: 50 EX 20
1, 2. a) ¿Tiʼ nya bʼaʼn in tzaj kyiʼj xjal te juntl tnam? (Qʼonka twitza tiʼj tnejel tilbʼilal). b) ¿Tiʼ in tzaj tqʼamaʼn Tyol Dios qe? c) ¿Alkyeqe xjel che xel qtzaqʼweʼn?
MA TZIKʼ mas te 30 abʼqʼi kyaj tkolin jun xjal te tnam Ghana, (África) tuʼntzun tpon toj tnam Europa, Osei tbʼi xjal lu [1] (tqanil jun). Toj ambʼil aju, nya testigo de Jehová Osei. Naʼnx tuʼn qa tzaj nim nya bʼaʼn tiʼj. Tqʼama jlu: «Jun rat naj el nnikʼe tiʼj qa mintiʼtoq in che ximen xjal wiʼje. In jaw labʼine tiʼj nim cheʼw, tej wetze toj aeropuerto kubʼ nnaʼne tnejel maj toj wanqʼibʼile nim cheʼw ex tzyet woqʼe». Kwesttoq tuʼn tbʼant aju yol tuʼn, tuʼntzunju, xi tiʼn mas te jun abʼqʼi tuʼn tkanet jun tbʼanel taqʼun. Ex tuʼnju najchaq at kyiʼj qe toj tja, in bʼisintoq kyiʼj ex kubʼ tnaʼn qa tjunalx at.
2 Noqwit in qo ikʼ toj ik tzeʼn te Osei, ¿alkye kymod txqantl qajbʼil tuʼn tten qukʼil? Ax tok, kxel qqʼoʼn nimxix chjonte kye erman toj Ja te Chmabʼil tuʼnju in qox kykʼamoʼn tukʼil kʼujlabʼil noq alkyexku qtnam. In tzaj tqʼamaʼn Tyol Dios qe tuʼn miʼn tikʼ tnaʼl quʼn tuʼn t-xi qqʼoʼn «kyposad xjal» mintiʼ ojtzqiʼn kywitz quʼn, toj juntl yol, kyposad qeju xjal te juntl tnam (Hebreos 13:2). Tej tkubʼ tzʼibʼin Tyol Dios tnejel maj, aju yol «kyposad», atzun in yolin tiʼj tuʼn tkubʼ qyekʼun «tbʼanel qmod kyukʼil xjal». Tuʼntzunju, toj xnaqʼtzbʼil lu che xel qtzaqʼweʼn qeju xjel lu: ¿Tiʼ t-ximbʼetz Jehová at kyiʼj xjal in che tzaj toj juntl tnam? ¿Ilpe tiʼj tuʼn tkubʼ qchʼixpuʼn qximbʼetz kyiʼj xjal in che tzaj toj juntl tnam? ¿Alkye tten jaku qo onin kyiʼj qeju in che tzaj toj juntl tnam?
¿TIʼ T-XIMBʼETZ JEHOVÁ AT KYIʼJ XJAL IN CHE TZAJ TOJ JUNTL TNAM?
3, 4. Ik tzeʼn in tzaj tyekʼun Éxodo 23:9, ¿alkye kymod aj Israel tajbʼiltoq Jehová tuʼn tkubʼ kyyekʼun kyukʼil xjal te juntl tnam ex tiquʼn?
3 Tej kyetz klet aj Israel te majen tuʼn Jehová, xi tqʼoʼn qe kawbʼil kye aʼyeju in che yolin tiʼj tuʼn tkubʼ kyyekʼun tbʼanel kymod kyukʼil xjal i etz kyukʼil tej kyetz toj tnam Egipto (Éxodo 12:38, 49; 22:21). Ojtzqiʼntoq tuʼn Jehová qa at maj kwest kyanqʼibʼil xjal in che tzaj toj juntl tnam, ex tuʼntzunju e ok tkwentin tukʼil kʼujlabʼil. Jun techel, in xitoq tqʼoʼn ambʼil kye tuʼn kyxiʼ toj kojbʼil otoqxi jaw twitz awal kyuʼn xjal (Levítico 19:9, 10).
4 Mintiʼ kubʼ t-ximen Jehová tuʼn miʼn t-xi tqʼamaʼn kye aj Israel tuʼn tok kyqʼoʼn kyoklen qeju xjal in che tzaj toj juntl tnam. Tajbʼiltoq tuʼn ttzaj kynaʼn tiʼ in kubʼ tnaʼn jun xjal tzajni toj juntl tnam (kjawil uʼjit Éxodo 23:9). Tej naʼmxtoq kyxi qʼiʼn aj Israel te majen toj tnam Egipto, in che eltoq ikʼun kyuʼn xjal te tnam aju (Génesis 43:32; 46:34; Éxodo 1:11-14). Kwest kyanqʼibʼil aj Israel ten tej kyten te stranjer xjal. Tuʼntzunju, tajbʼiltoq Jehová tuʼn ttzaj kynaʼn ex tuʼn tkubʼ kyyekʼun tbʼanel kymod kyukʼil xjal in che anqʼintoq kyukʼil te juntl tnam (Levítico 19:33, 34).
In kubʼ tyekʼun Jehová tbʼanel tmod kyukʼil xjal te juntl tnam
5. ¿Tiʼ kʼonil qiʼj tuʼn tel qkanoʼn tmod Jehová ex tuʼn tkubʼ qyekʼun tbʼanel qmod kyukʼil qeju in che tzaj toj juntl tnam?
5 Mintiʼ o chʼexpaj t-ximbʼetz Jehová. Tuʼntzunju, aj kyul erman te juntl tnam jatumel in nok qchmon qibʼ, il tiʼj tuʼn ttzaj qnaʼn qa taj Jehová tuʼn tkubʼ qyekʼun tbʼanel qmod kyukʼil (Deuteronomio 10:17-19; Malaquías 3:5, 6). Bʼaʼn tuʼn qximen tiʼj junjun nya bʼaʼn in che ikʼ toj. Jun techel, atlo maj mintiʼxix in nikʼ qyol toj kywiʼ ex atlo junjun xjal in nok kybʼinchaʼn nya bʼaʼn kyiʼj. Qa ma qo ximen tiʼj tkyaqil jlu, atzun kʼonil qiʼj tuʼn tok tilil quʼn tuʼn qonin kyiʼj ex tuʼn tkubʼ qyekʼun tbʼanel qmod kyukʼil (1 Pedro 3:8).
¿ILPE TIʼJ TUʼN TKUBʼ QCHʼIXPUʼN QXIMBʼETZ KYIʼJ XJAL IN CHE TZAJ TOJ JUNTL TNAM?
6, 7. Tej t-xi kyxnaqʼtzan kyibʼ okslal judiy tuʼn miʼn tel kykanoʼn kyximbʼetz txqantl xjal judiy, ¿tiʼ in tzaj tyekʼun jlu?
6 Xi kyxnaqʼtzan kyibʼ okslal judiy tuʼn miʼn tel kykanoʼn kyximbʼetz txqantl xjal judiy attoq kyiʼj qeju in che tzaj toj juntl tnam. Tojju ninqʼij te Pentecostés toj abʼqʼi 33, kubʼ kyyekʼun okslal te tnam Jerusalén kykʼujlabʼil ex tbʼanel kymod kyukʼil qeju xjal te juntl tnam tzma otoq che ok te okslal (Hechos 2:5, 44-47). A jlu in tzaj tyekʼun qa eltoq kynikʼ tiʼj t-xilen tuʼn t-xi kyqʼoʼn «kyposad» xjal, toj juntl yol, tuʼn tkubʼ kyyekʼun tbʼanel kymod kyukʼil xjal te juntl tnam.
7 Noqtzun tuʼnj, toj ambʼil aju e ok ten junjun erman in che yolin toj yol griego qʼamalte qa mintiʼtoq in kubʼ kyyekʼun txqantl tbʼanel kymod kyiʼj qeju mebʼa xuʼj attoq kyxol (Hechos 6:1). Tuʼn t-xi bʼinchet tiʼj nya bʼaʼn lu, xi kysamaʼn apóstol wuq xinaq toktoq kybʼi toj yol griego. ¿Tiquʼn? Tuʼnlo tkubʼ kynaʼn qeju mebʼa xuʼj in che yolin toj yol griego tbʼanel (Hechos 6:2-6).
8, 9. a) ¿Alkyeqe xjel jaku che onin qiʼj tuʼn tel qnikʼ tiʼj qa at jun nya bʼaʼn qximbʼetz kyiʼj txqantl? b) ¿Tiʼ il tiʼj tuʼn tkubʼ naj quʼn? (1 Pedro 1:22).
8 Maske mintiʼ in nel qnikʼ tiʼj, jaku ten jun nya bʼaʼn qximbʼetz kyiʼj txqantl noq tuʼnju qkostumbr (Romanos 12:2). Nya oʼkxju, ax ikx jaku che ok ten qeju xjal in che anqʼin qtxlaj, qe qukʼil toj aqʼuntl moqa toj tja xnaqʼtzbʼil yolil nya bʼaʼn kyiʼj qeju in che tzaj toj juntl tnam, ex qa kyiʼj qeju junxitl kykostumbr moqa kyiyjil, moqa kyyajil. Yejtzun qe, ¿qape ik qximbʼetz ik tzeʼn kye? ¿Tiʼ in bʼant quʼn qa at jun in nok ten xmayil tiʼj qtnam moqa tiʼj qkostumbr?
9 Toj jun ambʼil, ten nya bʼaʼn t-ximbʼetz apóstol Pedro kyiʼj qeju xjal nya judiy. Noqtzun tuʼnj, tej tbʼet ambʼil kubʼ kyiʼj nya bʼaʼn t-ximbʼetz tuʼn (Hechos 10:28, 34, 35; Gálatas 2:11-14). ¿Yejtzun qe? ¿Tiʼ kbʼantel quʼn qa in nel qnikʼ tiʼj qa in jaw qnimsaʼn chʼin qibʼ tiʼjju qiyjil moqa in nel qikʼun junjun xjal? Il tiʼj tuʼn tok tilil quʼn tuʼn kyetz qiʼn nya bʼaʼn ximbʼetz lu toj qwiʼ (kjawil uʼjit 1 Pedro 1:22). ¿Tiʼ kʼonil qiʼj tuʼn tbʼant quʼn? Bʼaʼn tuʼn ttzaj qnaʼn qa qkyaqilx aj il qo ex qa mintiʼ qoklen tuʼn qklet, noq alkyexku qtnam (Romanos 3:9, 10, 21-24). Tuʼntzunju, mintiʼ jun tiquʼn tuʼn tkubʼ qnaʼn qa mas nim qoklen kywitz txqantl (1 Corintios 4:7). Bʼaʼn tuʼn tkubʼ qnaʼn ik tzeʼn te apóstol Pablo. Tqʼama qa ya nya te juntl tnam qeju erman, sino otoq tzʼok kyerman kyibʼ kykyaqil (Efesios 2:19). Qkyaqilx bʼaʼn tuʼn tok tilil quʼn tuʼn tkubʼ tiʼj alkyexku ximbʼetz nya toj tumel quʼn. Iktzun tten che tel qeju akʼaj qmod (Colosenses 3:10, 11).
¿ALKYE TTEN JAKU QO ONIN KYIʼJ QEJU IN CHE TZAJ TOJ JUNTL TNAM?
10, 11. ¿Alkye tten kubʼ tyekʼun Boaz qa ten t-ximbʼetz ik tzeʼn te Jehová kyiʼj xjal tzajnitoq toj juntl tnam?
10 In yolin Xjan Uʼj tiʼj qa kukx ajbʼen Boaz te Dios. Kubʼ tyekʼun qa ten t-ximbʼetz kyiʼj xjal te juntl tnam ik tzeʼn te Jehová. ¿Alkye tten bʼant tuʼn? Jun qʼij, xi keʼyil qe tkojbʼil akux in jaw kywitz tawal. Oktzun tqʼoʼn twitz tiʼj jun xuʼj tzajnitoq toj tnam Moab, aju Rut tbʼi. Nimxix in naqʼunantoq Rut, in jawtoq tchmoʼn qeju twitz sebada. Maske qʼontoq ambʼil tuʼn Ley tuʼn t-xi sikʼelte twitz awal, xi tqanin ambʼil tuʼn tbʼant jlu tuʼn. Tej tok tbʼiʼn Boaz jlu, jaw labʼin tiʼj ex tuʼntzunju xi tqʼoʼn ambʼil te Rut tuʼn tjaw tchmoʼn twitz awal otoq tjaw kytxʼemin qeju aqʼunal (kjawil uʼjit Rut 2:5-7, 15, 16).
11 Bʼanttzun jun tiʼ tuʼn Boaz tuʼntzun tel toj qʼanchaʼl qa in ximintoq tiʼj Rut ex kyiʼj nya bʼaʼn in che tzajtoq tiʼj tuʼnju tzajnitoq toj juntl tnam. Xi ttxkoʼn tuʼn taqʼunan junx kyukʼil qeju tmajen tzma txin tuʼntzun miʼn tok kybʼinchaʼn majen xinaq jun nya bʼaʼn tiʼj. Nya oʼkxju, ax ikx ok tilil tuʼn, tuʼn tel tnikʼ tiʼj qa at twa ex tkʼaʼ ik tzeʼn kye txqantl majen. Ok tqʼoʼn Boaz toklen aju mebʼa xuʼj tzajnitoq toj juntl tnam ex xi tqʼuqbʼaʼn tkʼuʼj (Rut 2:8-10, 13, 14).
12. ¿Tiʼ jaku bʼaj qa ma kubʼ qyekʼun tbʼanel qmod kyukʼil qeju xjal te juntl tnam?
12 Kubʼ tyekʼun Boaz tbʼanel tmod tiʼj Rut tuʼnju ax ikx te ok tkʼujlaʼn tlibʼ, aju Noemí tbʼi. Ax ikx kubʼ tyekʼun Boaz tbʼanel tmod tiʼj Rut tuʼnju otoq t-xi tzyet tuʼn tajbʼen te Jehová ex jyoʼn onbʼil tukʼil. Tej tkubʼ tyekʼun Boaz tbʼanel tmod tukʼil Rut, aju in bʼanttoq tuʼn, in neltoq tkanoʼn tkʼujlabʼil Jehová (Rut 2:12, 20; Proverbios 19:17). Chʼixmi ax jlu in bʼaj toj ambʼil jaʼlo. Qa ma kubʼ qyekʼun tbʼanel qmod kyukʼil «kykyaqil xjal», jaku qo onin kyiʼj tuʼn tel kynikʼ tiʼjju axix tok ex tuʼn tel kynikʼ tiʼj qa kʼujlaʼn qe tuʼn Jehová (1 Timoteo 2:3, 4).
¿In nokpe qqʼolbʼen qeju te juntl tnam tukʼil kʼujlabʼil aj kypon toj Ja te Chmabʼil? (Qʼonka twitza tiʼj taqikʼ 13 ex 14).
13, 14. a) ¿Tiquʼn nim toklen tuʼn t-xi qqʼolbʼen qeju te juntl tnam aj kypon jatumel in nok qchmon qibʼ? b) ¿Tiʼ jaku tzʼonin qiʼj tuʼn miʼn tkubʼ qnaʼn nya bʼaʼn aj qyolin kyukʼil qeju junxitl tten kyanqʼibʼil?
13 Jun tten tuʼn tkubʼ qyekʼun tbʼanel qmod kyukʼil qeju in che tzaj toj juntl tnam, aju qa ma ten qkʼujlalil kyiʼj aj kypon kyoj chmabʼil. At maj, tuʼnju mintiʼxix in che yolin ex tuʼntzunju mintiʼ in che ok laqʼeʼ kytxlaj txqantl. Ax ikx jakulo kubʼ kynaʼn qa mas chʼin kyoklen tuʼnju juntl tten kyanqʼibʼil, tuʼnju nya qʼinun qe, tuʼnju kyiyjil moqa tuʼnju kytnam. Tuʼntzunju, bʼaʼn tuʼn tok tilil quʼn tuʼn qxi yolin kyukʼil ex tuʼn tkubʼ qyekʼun axix tok qkʼujlabʼil kyiʼj. Ax ikx jaku tzʼajbʼen aplicación JW Languaje quʼn qa jaku bʼant, tuʼntzun tkubʼ qxnaqʼtzaʼn alkye tten jaku qoʼx qʼolbʼen kye toj kyex kyyol (kjawil uʼjit Filipenses 2:3, 4).
14 Atlo maj jaku kubʼ qnaʼn nya bʼaʼn aj qyolin kyukʼil qeju junxitl tten kyanqʼibʼil. ¿Tiʼ jaku tzʼonin qiʼj tuʼn miʼn tkubʼ qnaʼn ikju? Jaku txi qqʼamaʼn kye aju in nikʼ qiʼj. Jakulo tzʼel qnikʼ tiʼj qa at maj aʼyex tiʼchaq in bʼant quʼn ik tzeʼn kye. Bʼaʼn tuʼn ttzaj qnaʼn qa teyele junjun tten kyanqʼibʼil xjal at junjun tiʼ tbʼanel ex nyaxix tbʼanel at toj.
QO ONIN KYIʼJ KYKYAQIL TUʼN TKUBʼ KYNAʼN TZALAJBʼIL
15. ¿Tiʼ kʼonil qiʼj tuʼn tel qnikʼ kyiʼj qeju tzma in che naqʼet toj jun akʼaj tnam?
15 ¿Alkye tten jaku qo onin kyiʼj txqantl tuʼn tkubʼ kynaʼn tzalajbʼil jatumel in nok qchmon qibʼ? Bʼaʼn tuʼn tkubʼ qxjelin jlu tuʼn tkyaqil qkʼuʼj: «Noqwit at qine toj juntl tnam, ¿alkye kymod txqantl wajbʼile tuʼn tkubʼ kyyekʼun wukʼile?» (Mateo 7:12). Bʼaʼn tuʼn tten qpasens kyiʼj qeju tzma in che naqʼet toj jun akʼaj tnam. Ax tok, atlo maj kwest tuʼn tel qnikʼ tiʼj tkyaqil kyximbʼetz moqa tiʼ in kubʼ kynaʼn. Noqtzun tuʼnj, mintiʼ tuʼn tkubʼ qximen qa ax kyximbʼetz ex kymod ktel ik tzeʼn qe qxjalil. Mas tbʼanel qa ma tzʼel qnikʼ kyiʼj ex tuʼn t-xi qkʼamoʼn qe ik tzeʼnx kyten (kjawil uʼjit Romanos 15:7).
Bʼaʼn tuʼn tten qpasens kyiʼj qeju tzma in che naqʼet toj jun akʼaj tnam
16, 17. a) ¿Tiʼ jaku bʼant quʼn tuʼn tok qojtzqiʼn mas qeju te juntl tnam in che anqʼin nqayin qtxlaj? b) ¿Alkye tten jaku qo onin kyiʼj qeju te juntl tnam ateʼ jatumel in nok qchmon qibʼ?
16 ¿Tiʼ jaku bʼant quʼn tuʼn tok qojtzqiʼn mas qeju te juntl tnam in che anqʼin nqayin qtxlaj? Jun tten, jaku tzʼel qpaʼn ambʼil tuʼn qxnaqʼtzan tiʼjju kytnam ex kyanqʼibʼil. Tojju ambʼil in xi qqʼoʼn te Jehová kyukʼil toj qja, jaku txi qjyoʼn tqanil tiʼj kyanqʼibʼil qeju te juntl tnam ateʼ jatumel in nok qchmon qibʼ moqa jatumel in qo anqʼin. Juntl tten tuʼn kyok qojtzqiʼn, aju qa ma chex qtxkoʼn wal qja. O tzaj tqʼoʼn Jehová «ambʼil kye txqantl xjal mya judiy qe tuʼn kyokslan» (Hechos 14:27). Bʼaʼn tuʼn tel qkanoʼn techel tiʼj Jehová aj t-xi qqʼoʼn ambʼil «kye qe erman» te juntl tnam tuʼn kypon qja (Gálatas 6:10; Job 31:32).
¿In kubʼpe qyekʼun tbʼanel qmod kyiʼj qeju xjal te juntl tnam? (Qʼonka twitza tiʼj taqikʼ 16 ex 17).
17 Qa ma tzʼel qpaʼn ambʼil tuʼn qten kyukʼil qeju te juntl tnam, kʼonil qiʼj tuʼn tel qnikʼ kyiʼj ex tuʼn tok qqʼoʼn toklen aju in bʼant kyuʼn tuʼn kynaqʼet tiʼj qanqʼibʼil. Jakulo tzʼok qqʼoʼn qwitz tiʼj qa kyajbʼil onbʼil tuʼn tbʼant kyyolin toj qe qyol. Moqa jaku qo onin kyiʼj tuʼn tkanet jun kyaqʼun moqa tuʼn tkanet jun ja jatumel jaku che anqʼin. Nim jaku che onin qeju tiʼchaq lu kyiʼj qeju qerman (Proverbios 3:27).
18. ¿Alkye tbʼanel techel jaku tzʼel kykanoʼn qeju te juntl tnam?
18 Ax tok, il tiʼj tuʼn tok tilil kyuʼn qeju te juntl tnam tuʼn kynaqʼet tiʼj alkye tten qanqʼibʼil. Jaku tzʼel kykanoʼn techel kyaj tqʼoʼn Rut. Tnejel, ok tqʼoʼn Rut toklen aju kykostumbr xjal jatumel otoq pon. ¿Alkye tten bʼant tuʼn? Tej t-xi tqanin ambʼil tuʼn t-xi sikʼel twitz awal (Rut 2:7). Mintiʼ kubʼ t-ximen qa ya qʼoʼntoq ambʼil te tuʼn tbʼant jlu tuʼn ex mintiʼ kubʼ t-ximen qa il tiʼj tuʼn kyonin txqantl tiʼj. Ex tkabʼin, xi tqʼoʼn chjonte tej tkubʼ tyekʼun Boaz tbʼanel tmod tukʼil (Rut 2:13). Qa ma tzeʼl kykanoʼn qeju te juntl tnam tmod Rut, jaku tzʼok qʼoʼn kyoklen kyuʼn erman ex kyuʼn xjal jatumel otoq che pon.
19. ¿Tiquʼn bʼaʼn tuʼn qonin kyiʼj qeju te juntl tnam tuʼn tkubʼ kynaʼn tzalajbʼil?
19 Nimxix in qo tzalaj tuʼnju in xi tyekʼun Jehová t-xtalbʼil kyiʼj kykyaqil xjal ex in xi tqʼoʼn ambʼil kye tuʼn tok kybʼiʼn qe tbʼanel tqanil ateʼ toj Tyol. Ateʼ nim qeju te juntl tnam mintiʼtoq bʼant tuʼn kyxnaqʼtzan tiʼj Tyol Dios toj kytnam moqa mintiʼtoq bʼant tuʼn kyxiʼ kyoj chmabʼil. Tuʼntzunju, il tiʼj tuʼn qonin kyiʼj tuʼnju ya in nok kychmon kyibʼ qukʼil, iktzun tten mlay kubʼ kynaʼn qa junxitl qe qwitz aj kyten qukʼil. Mintiʼlo nim qpwaq moqa mlaylo qo onin kyiʼj tukʼil tkyaqil. Noqtzun tuʼnj, qa ma kubʼ qyekʼun tbʼanel qmod kyukʼil, kʼelel qkanoʼn aju tkʼujlabʼil Jehová at kyiʼj. Tuʼntzunju, kukx qkanoʼmil techel in kubʼ tqʼoʼn Jehová ex kukx tzʼok tilil quʼn tuʼn qtzalaj kyiʼj qeju te juntl tnam (Efesios 5:1, 2).
^ [1] (taqikʼ 1): Ma kubʼ chʼixpet tbʼi xjal lu.
