At tipumal Tyol Dios
«Aju tyol Dios itzʼte ex at tipumal» (HEB. 4:12).
BʼITZ: 37 EX 48
1. ¿Tiquʼn qʼuqli qkʼuʼj tiʼj qa at tipumal Tyol Dios? (Qʼonka twitza tiʼj tnejel tilbʼilal).
QʼUQLI kykʼuʼj tmajen Jehová tiʼj qa «itzʼte ex at tipumal» Tyol Dios (Heb. 4:12). O tzʼok qqʼoʼn qwitz tiʼj qa at nim tipumal tqanil tkuʼx toj Tyol Dios tuʼn tchʼixpet qanqʼibʼil ex kyanqʼibʼil juntl xjal tuʼn. Tej naʼmxtoq qok te testigos de Jehová, at junjun in che elqʼan, in che kʼan droga ex in che yaẍintoq. Junjuntl ojtzqiʼntoq kywitz kyuʼn nim xjal ex attoq nim kypwaq, noqtzun tuʼnj, mintiʼ in che tzalajtoq (Ecl. 2:3-11). Tnejel nimku qe attoq toj najen, atzun jaʼlo at qʼuqbʼil qkʼuʼj ex at ttxolil qanqʼibʼil noq tuʼn tipumal Tyol Dios. Olo qo tzalaj tej tjaw quʼjin jun txʼolbʼabʼil tiʼj kyanqʼibʼil junjun erman toj xnaqʼtzbʼil «Chʼexpaj kyanqʼibʼil tuʼn Tyol Dios», aju in netz toj uʼj Aju Xqʼuqil. Ax ikx o tzʼok qqʼoʼn qwitz tiʼj qa maske testigos de Jehová qo, qkyaqilx qaj onbʼil in tzaj tqʼoʼn Tyol Dios tuʼntzun kukx tchʼiy qamiwbʼil tukʼil Jehová.
2. ¿Tiʼ chʼixpubʼil o bʼant kyuʼn junjun okslal te tnejel syent abʼqʼi noq tuʼn tipumal Tyol Dios?
2 Mintiʼ in qo jaw labʼin tiʼj aj tbʼant junjun matij chʼixpubʼil toj kyanqʼibʼil xjal aj kyxnaqʼtzan tiʼj Tyol Dios toj ambʼil jaʼlo. Atzun bʼaj kyiʼj okslal toj tnejel syent abʼqʼi, aqeju at qʼuqbʼil kykʼuʼj tuʼn kyxiʼ toj kyaʼj (kjawil uʼjit 1 Corintios 6:9-11). Tqʼama apóstol Pablo alkye qe xjal mlaytoq che okx toj Tkawbʼil Dios, ex yajxitl tqʼama jlu kye okslal: «Iktzun kyten junjun kyeye ojtxi». Noqtzun tuʼnj, onin Tyol Dios ex xewbʼaj xjan kyiʼj tuʼn tbʼant chʼixpubʼil kyuʼn. Ex tej otoq che ok te okslal, ateʼ junjun kubʼ kybʼinchaʼn il ex tuʼn jlu tzaj nya bʼaʼn tiʼj kyamiwbʼil tukʼil Jehová. Jun techel, in yolin Tyol Dios tiʼj jun okslal skʼoʼn maj ex lajet kyxol kʼloj okslal. Noqtzun tuʼnj, bʼant chʼixpubʼil tuʼn ex meltzʼaj juntl maj kyxol kʼloj okslal (1 Cor. 5:1-5; 2 Cor. 2:5-8). In qo jaw tzalaj aj tok qqʼoʼn qwitz kyiʼj nim erman o bʼant chʼixpubʼil kyuʼn noq tuʼn tonbʼil Tyol Dios.
3. ¿Tiʼ qo xnaqʼtzal tiʼj toj xnaqʼtzbʼil lu?
3 Tuʼnju o tzaj tqʼoʼn Jehová Tyol qe, qaj tuʼn tajbʼen quʼn toj tumel (2 Tim. 2:15). Tuʼntzunju, toj xnaqʼtzbʼil lu kʼelel qnikʼ tiʼj alkye tten jaku tzʼajbʼen tipumal Tyol Dios quʼn toj oxe tten. Tnejel, toj qanqʼibʼil. Tkabʼin, toj pakbʼabʼil. Ex toxin, aj tex qqʼoʼn jun chikʼbʼabʼil. Aju xnaqʼtzbʼil lu kʼonil qiʼj tuʼn tkubʼ qyekʼin qkʼujlabʼil ex tuʼn t-xi qqʼoʼn chjonte te Jehová, aju in tzaj xnaqʼtzante qe (Is. 48:17).
TOJ QANQʼIBʼIL
4. a) ¿Tiʼ il tiʼj tuʼn tbʼant quʼn qa qaj tuʼn tonin Tyol Dios qiʼj? b) ¿Jatumel in netz tiʼn teya ambʼil tuʼn tjaw tuʼjina Tyol Dios?
4 Qa qaj tuʼn tonin Tyol Dios qiʼj, il tiʼj tuʼn quʼjin tiʼj tkyaqil qiʼj, qa jaku bʼant (Jos. 1:8). Ax tok, chʼixme qkyaqilx at nim tiʼchaq tuʼn tbʼant quʼn, noqtzun tuʼnj, mlay txi qqʼoʼn ambʼil te jun tiʼ tuʼn tel tiʼn ambʼil qe tuʼn miʼn quʼjin tiʼj Tyol Dios, axpe ikx qa at junjun tiʼchaq nim toklen tuʼn tbʼant quʼn (kjawil uʼjit Efesios 5:15, 16). Jaku jaw quʼjin Tyol Dios te prim, aj tex qʼij ex qa te qonikʼan. In kubʼ qnaʼn ik tzeʼn kubʼ tnaʼn jun aj tzʼibʼil tiʼj Tyol Dios aju tqʼama jlu: «Kʼujlaʼnxix tleya wuʼne. Tkyaqil qʼij in chin ximane tiʼj» (Sal. 119:97).
5, 6. a) ¿Tiquʼn nim toklen tuʼn qximen aj quʼjin? b) ¿Alkye tten jaku tzʼetz qiʼn tbʼanel aj qximen tiʼjju in jawtoq quʼjin? c) ¿Alkye tten o tzʼonin tiʼja aj t-ximana tiʼj Tyol Dios aj tjaw tuʼjina?
5 Nya oʼkx kyjawil quʼjin Tyol Dios, sino il tiʼj tuʼn qkubʼ ten ximel tiʼjju in jaw quʼjin (Sal. 1:1-3). Qa ma bʼant jlu quʼn kbʼel qqʼoʼn toj xnaqʼtzbʼil qeju nabʼil in che kanet quʼn toj Tyol Dios. Qa twitz t-xaq uʼj moqa toj kʼuxbʼil in jaw quʼjin, aju qaj tuʼn tbʼant quʼn, aju tuʼn tkuʼpin toj qanmi.
6 ¿Alkye tten jaku tzʼetz qiʼn tbʼanel aj qximen tiʼjju in jaw quʼjin? Akux in qo uʼjin tiʼj Tyol Dios, bʼaʼn tuʼn qweʼ jun rat ximel kyiʼj xjel ik tzeʼn jlu: «¿Tiʼ in tzaj t-xnaqʼtzaʼn jlu weʼye tiʼj Jehová? ¿In kubʼpe nqʼoʼne jlu toj xnaqʼtzbʼil toj wanqʼibʼile? ¿Atxpe jun tiʼ atx taj tuʼn tbʼant wuʼne?». Qa ma qo ximen tiʼj Tyol Dios ex qa ma qo naʼn Dios te Jehová, ktel qajbʼil tuʼn tkubʼ qqʼoʼn toj xnaqʼtzbʼil qe nabʼil tkuʼx toj Tyol. Ik tzeʼn tten kʼajbʼel tipumal Tyol Dios quʼn toj qanqʼibʼil (2 Cor. 10:4, 5).
TOJ PAKBʼABʼIL
7. ¿Alkye tten jaku tzʼajbʼen Tyol Dios quʼn toj pakbʼabʼil?
7 ¿Alkye tten jaku tzʼetz qiʼn tbʼanel toj Tyol Dios ik tzeʼn toj pakbʼabʼil ex aj t-xi qqʼoʼn xnaqʼtzbʼil tiʼj axix tok kye xjal? Jun tten tuʼn tbʼant quʼn aju qa ma tzʼajbʼen quʼn toj tkyaqil ambʼil. Tqʼama jun erman jlu: «Qa ma txiʼya ttziyele junjun ja tukʼil Jehová, ¿kyolila tjunalxa toj tkyaqil ambʼil moqa kxel tqʼoʼna ambʼil te tuʼn tyolin?» ¿Tiʼ tajtoq tuʼn ttzaj tqʼamaʼn? Qa aj t-xi quʼjin jun taqikʼ Tyol Dios te jun xjal, in nok jlu ik tzeʼn in xi qqʼoʼn ambʼil te Jehová tuʼn tyolin. Qa ma jaw qjyoʼn jun versículo toj tumelxix, mas jaku ten tipumal jlu ik tzeʼn junjuntl tiʼ jaku txi qqʼamaʼn (1 Tes. 2:13). Tuʼntzunju, bʼaʼn tuʼn tkubʼ qxjelin jlu: «¿In nokpe tilil wuʼne tuʼn tjaw wuʼjine jun taqikʼ Tyol Dios kye xjal toj pakbʼabʼil?».
8. ¿Tiquʼn nya oʼkx kjawil quʼjin qe taqikʼ Tyol Dios kye xjal?
8 Nya oʼkx kjawil quʼjin qe taqikʼ Tyol Dios kye xjal. Ik tzeʼn bʼaj toj tnejel syent abʼqʼi, chʼixme kykyaqil xjal toj ambʼil jaʼlo mintiʼ in nel kynikʼ tiʼjju in tzaj tqʼamaʼn Tyol Dios (Rom. 10:2). Tuʼntzunju, mintiʼ tuʼn tkubʼ qximen qa in nel kynikʼ xjal tiʼj Tyol Dios noq tuʼnju in jaw quʼjin kye, sino il tiʼj tuʼn tel qpaʼn ambʼil tuʼn t-xi qqʼamaʼn juntl maj qe yol ex qe txol yol nim kyoklen kye ex tuʼn t-xi qchikʼbʼaʼn. Qa ma bʼant jlu quʼn, kpol Tyol Dios toj kyximbʼetz ex toj kyanmi (kjawil uʼjit Lucas 24:32).
9. Qʼamantza tukʼil jun techel alkye tten jaku qo yolin tiʼj jun versículo toj jun tumel tuʼn tok tnimen xjal Tyol Dios.
9 Aj qyolin tiʼj jun versículo, il tiʼj tuʼn tbʼant quʼn toj jun tumel tuʼn tok kynimen xjal Tyol Dios. Jun techel, jaku txi qqʼamaʼn ik tzeʼn jlu: «Qo ximen tiʼ t-ximbʼetz Dios tiʼj jlu». Noqtzun tuʼnj, qa ma qo yolin tukʼil jun xjal naʼmx tten jun tokslabʼil, jaku txi qqʼamaʼn jlu: «Ximana tiʼjju in tzaj tqʼamaʼn Xjan Uʼj». Ex qa mintiʼ tgan xjal tiʼj okslabʼil, jaku txi qqanin jlu te: «¿O tzʼok tbʼiʼna jun maj qe ojtxe yol lu?». Tuʼnju junxitl junjun xjal, il tiʼj tuʼn qximen alkyeqe yol che ajbʼel quʼn aj qyolin tukʼil junjun xjal (1 Cor. 9:22, 23).
10. a) Qʼamantza tiʼ bʼaj tiʼj jun ermano toj pakbʼabʼil. b) Qʼamantza alkye tten o tzʼok tqʼoʼn twitza tiʼj qa at tipumal Tyol Dios toj pakbʼabʼil.
10 Ateʼ nim erman o tzʼok kyqʼoʼn kywitz tiʼj qa jaku tzʼonin Tyol Dios kyiʼj xjal qa ma tzʼajbʼen toj pakbʼabʼil. Jun techel, in visitarin jun erman te jun xjal otoq tijen ex toj nim abʼqʼi in nuʼjintoq kyiʼj uʼj Aju Xqʼuqil ex ¡Despertad! Jun qʼij, nya oʼkx xi tiʼn erman uʼj Aju Xqʼuqil te xjal, sino ax ikx jaw tuʼjin jun taqikʼ Tyol Dios tkuʼx toj uʼj. Jaw tuʼjin 2 Corintios 1:3, 4, aju in tzaj tqʼamaʼn jlu tiʼj Jehová: «Atzunte Mambʼajju kukx in qʼaqʼan tkʼuʼj qiʼj, ex atzunte Diosju kukx in tqʼuqbʼaʼn qkʼuʼj» ex qa «in tqʼuqbʼaʼn Dios qkʼuʼj tuj tkyaqil yajbʼil qe». Tbʼanel el te xjal, axpe ikx xi tqʼamaʼn te erman tuʼn tjaw tuʼjin juntl maj qe versículo. Yajxitl tqʼama xjal qa kyajtoq tukʼil t-xuʼjil nim qʼuqbʼil kykʼuʼj ex qa kyaj tuʼn tel mas kynikʼ tiʼj Tyol Dios. Tuʼn jlu in nel qnikʼ tiʼj qa ma tzʼajbʼen Tyol Dios quʼn toj pakbʼabʼil, jaku tzʼonin kyiʼj xjal (Hech. 19:20).
AJ TEX QQʼOʼN JUN CHIKʼBʼABʼIL
11. ¿Tiʼ il tiʼj tuʼn tbʼant kyuʼn erman in che etz qʼonte chikʼbʼabʼil?
11 Qkyaqilx qgan tuʼn qxiʼ kyoj chmabʼil ex kyoj nimaq chmabʼil. In qoʼx tuʼnju qaj tuʼn qkʼulin te Jehová, noqtzun tuʼnj, ax ikx in qoʼx tuʼn tetz qiʼn tbʼanel xnaqʼtzbʼil in netz qʼoʼn kyoj. Jun tbʼanel oklenj lu kye erman in che etz qʼonte chikʼbʼabʼil, noqtzun tuʼnj, nya jun saqchbʼil lu (Sant. 3:1). Tuʼntzunju, il tiʼj tuʼn tel kynikʼ tiʼj qa toj Tyol Dios in jatz kyiʼn tkyaqilju in xi kyxnaqʼtzaʼn. Qa at teya toklen kyxol erman lu, ¿tiʼ jaku bʼant tuʼna tuʼntzun tonin Tyol Dios kyiʼj qeju in che bʼin tiʼja?
12. ¿Alkye tten jaku tzʼel tnikʼa tiʼj qa atz toj Tyol Dios in jatz tiʼna xnaqʼtzbʼil kʼelex tchikʼbʼana?
12 Tzʼok tilil tuʼna tuʼn tok tqʼoʼna mas nim toklen Tyol Dios toj tchikʼbʼabʼila (Juan 7:16). Miʼn txi tqʼoʼna ambʼil tuʼn tel kyiʼn txʼolbʼabʼil ex qe techel toklen qe taqikʼ Tyol Dios in jaw tuʼjina. Ax ikx bʼaʼn tuʼn ttzaj tnaʼna qa nya junx taʼ tuʼn tjaw quʼjin jun taqikʼ Tyol Dios twitzju tuʼn t-xi qxnaqʼtzaʼn aju in tzaj tqʼamaʼn. Qa ma che ajbʼen nim taqikʼ Tyol Dios tuʼna, mlay kyaj toj kywiʼ erman. Tuʼntzunju, chebʼe jyoʼnktza qe taqikʼ Tyol Dios ex paʼmila ambʼil tuʼn kyjaw tuʼjina, tuʼn kyxi tchikʼbʼaʼna, tuʼn tajbʼen jun techel kyiʼj ex tzeʼn tuʼn kykubʼ toj xnaqʼtzbʼil (Neh. 8:8). Qa atz in jatz xnaqʼtzbʼil toj jun chikʼbʼabʼil in tzaj tqʼoʼn tnam Jehová, xnaqʼtzana kyiʼj txol yol ex kyiʼj taqikʼ Tyol Dios, ex tuʼn tok tilel tuʼna tuʼn tel tnikʼa tiʼj tiʼ t-xilen jun tukʼil juntl. Yajxitl, jyoʼnktza alkyeqe versículo che ajbʼel tuʼn t-xi t-xnaqʼtzaʼna qe txol yol tkuʼx toj chikʼbʼabʼil (kkanetel mas tqanil tuʼna kyoj xnaqʼtzbʼil 21, 22 ex 23, toj uʼj Benefíciese de la Escuela del Ministerio Teocrático). Aju mas nim toklen aju tuʼn t-xi tqanina onbʼil te Jehová tuʼn tex tqʼoʼna qe xnaqʼtzbʼil in che jatz toj Tyol (kjawil uʼjit Esdras 7:10 ex Proverbios 3:13, 14).
13. a) ¿Alkye tten onin Tyol Dios tiʼj jun ermana toj jun chmabʼil? b) ¿Alkye tten o tzʼonin Tyol Dios tiʼja kyoj chmabʼil?
13 Qbʼinx alkye tten onin Tyol Dios tiʼj jun ermana te Australia toj jun chmabʼil. Kwest tanqʼibʼil ten tej tjaw chʼiy, noqtzun tuʼnj, xi tkʼamoʼn tqanil tkuʼx toj Tyol Dios ex xi tqʼamaʼn te Jehová tuʼn tajbʼen te. Maske ikju, mintiʼxix ok qeʼ tkʼuʼj tiʼj qa kʼujlaʼntoq tuʼn Jehová. Jun qʼij, ok tbʼiʼn jun taqikʼ Tyol Dios kuʼpin toj tanmi. Tej otoq ximen tiʼj ex tej tjaw tuʼjin txqantl versículo, ok qeʼ tkʼuʼj tiʼj qa kʼujlaʼn tuʼn Jehová. * Yajtzun teya, ¿o tzʼok tbʼiʼna jun maj jun taqikʼ Tyol Dios toj jun chmabʼil moqa toj jun nimaq chmabʼil aju kuʼpin toj tanmiya? (Neh. 8:12).
14. ¿Alkye tten kbʼel qyekʼin qa nim toklen Tyol Dios toj qwitz?
14 Qkyaqilx in xi qqʼoʼn chjonte te Jehová, aju Qdios at nimxix tkʼujlabʼil, tuʼnju o tzaj tqʼoʼn Tyol qe ex o japun twiʼ ttziybʼil tuʼn kukx tten Tyol (1 Ped. 1:24, 25). Tuʼntzunju, qo uʼjin tiʼj Tyol tkyaqil qʼij, qqʼonk toj xnaqʼtzbʼil ex tzʼajbʼenx quʼn tuʼn qonin kyiʼj txqantl. Iktzun tten kbʼel qyekʼin qa kʼujlaʼn ex qa in nok qqʼoʼn toklen qʼinumabʼil lu. Ex aju mas nim toklen, kbʼel qyekʼin qa kʼujlan Jehová quʼn, aju Bʼinchal Xjan Uʼj.
^ taqik' 13 Qʼonk twitza tiʼj recuadro « Chʼexpaj tkyaqil».
