1. a) ¿Toj alkye tbʼanel tten kubʼ tyekʼin tibʼ Jehová twitz Moisés? b) ¿Tiquʼn nimtoq toklen tuʼn tkubʼ tyekʼin tibʼ Jehová twitz Moisés ik tzeʼn bʼant tuʼn?

JUN maj, kubʼ tyekʼin tibʼ Dios twitz Moisés tej ttzaj tqʼamaʼn alkye tbʼi ex junjun tmod. Mintiʼ ok ten Dios yolil tiʼj qa attoq nim tnabʼil ex tipumal, sino tnejel tqʼama qa attoq qʼaqʼbʼil tkʼuʼj ex yaj in tzaj tqʼoj (kjawil uʼjit Éxodo 34:5-7). Ojtzqiʼntoq tuʼn qa tajtoq Moisés tuʼn tok qeʼ tkʼuʼj tiʼj qa kʼoniltoq tiʼj, tuʼntzunju yolin kyiʼj tmod jatumel tzaj tyekʼin qa taj tuʼn tonin kyiʼj tmajen (Éx. 33:13). In chewix qkʼuʼj aj tel qnikʼ tiʼj qa kwentin qoʼ tuʼn Dios. Aju xnaqʼtzbʼil lu, kyolil tiʼj qʼaqʼbʼil qkʼuʼj, toj juntl yol aju tuʼn ttzaj qlastmi kyiʼj txqantl aj ttzaj nya bʼaʼn kyiʼj ex qaj tuʼn qonin kyiʼj.

2, 3. a) ¿Tiquʼn in tzaj qlastmi kyiʼj txqantl? b) ¿Tiquʼn il tiʼj tuʼn qyolin tiʼjju in tzaj tqʼamaʼn Tyol Dios tiʼj qʼaqʼbʼil qkʼuʼj?

² Ik tzeʼn in nel qnikʼ tiʼj, at qʼaqʼbʼil tkʼuʼj Jehová ex o qo kubʼ tbʼinchaʼn ik tzeʼn te. Tuʼntzunju in tzaj qlastmi kyiʼj txqantl, axpe ikx in bʼant kyuʼn qeju mintiʼ ojtzqiʼn Dios axix tok kyuʼn (Gén. 1:27). In che kanet nim techel quʼn toj Xjan Uʼj, aʼyeju in che yolin kyiʼj xjal kubʼ kyyekʼin qʼaqʼbʼil kykʼuʼj. Jun techel,  in tzaj qnaʼn qeju kabʼe xuʼj e ok ten qʼojil twitz aj kawil Salomón tuʼntzun tel nikʼbʼaj tiʼj alkyeju axix tok ttxuʼ jun tal neʼ. Tej tqʼama Salomón qa maslo bʼaʼn tuʼn tkubʼ txʼemin tal neʼ te kabʼe piẍ, kubʼ tnaʼn ttxuʼ tal neʼ nim bʼis ex tqʼama qa maslo bʼaʼn qa ma txi qʼoʼn te juntl xuʼj tuʼntzun miʼn tkubʼ bʼiyet (1 Rey. 3: 23-27). Ax ikx in tzaj qnaʼn aju bʼant tuʼn tmyal faraón. Tej tkanet Moisés toj nim aʼ tuʼn, el tnikʼ tiʼj qa aj Hebreo ex qa mintiʼ tuʼn tkolin tiʼj. Noqtzun tuʼnj, tzaj «qʼaqʼan tkʼuʼj» tiʼj ex kubʼ t-ximen tuʼn tok tkwentin ik tzeʼn jun tal (Éx. 2:5, 6).

³ ¿Tiquʼn il tiʼj tuʼn qyolin tiʼj qʼaqʼbʼil qkʼuʼj? Tuʼnju in tzaj tqʼamaʼn Xjan Uʼj qa il tiʼj tuʼn tel qkanoʼn tiʼj Jehová (Efes. 5:1). O qo kubʼ tbʼinchaʼn Jehová tuʼn tkubʼ qyekʼin qʼaqʼbʼil qkʼuʼj. Noqtzun tuʼnj, tuʼnju o tzʼel qiqen il tiʼj Adán, at maj oʼkx in qo ximen qiʼjx. At maj kwest tuʼn qximen tiʼj qa qo onil tiʼj juntl moqa oʼkx qo ximel qiʼjx. ¿Tiʼ kʼonil qiʼj tuʼn tten mas qʼaqʼbʼil qkʼuʼj? Tnejel, qo xnaqʼtzan tiʼj alkye tten kubʼ tyekʼin Jehová ex junjuntl xjal qʼaqʼbʼil kykʼuʼj. Ex yajxitl, qo xnaqʼtzal tiʼj alkye tten jaku tzʼel qkanoʼn techel in kubʼ tqʼoʼn Jehová ex tiʼ tbʼanel jaku tzaj tqʼoʼn qe qa ma bʼant quʼn.

4. a) ¿Tiquʼn xi tsamaʼn Jehová junjun t-anjel toj tnam Sodoma? b) ¿Tiʼ xnaqʼtzbʼil in tzaj tqʼoʼn qe aju ikʼ tiʼj Lot kyukʼix qe toj tja?

⁴ Toj Xjan Uʼj, in che kanet nim techel quʼn tiʼj qʼaqʼbʼil tkʼuʼj Jehová. Qo xnaqʼtzan tiʼ bʼant tuʼn tiʼj Lot, jun xjal tzʼaqli ex otoq ttzaj nim tbʼis tuʼnju nya bʼaʼn kymod xjal in che anqʼintoq toj tnam Sodoma ex Gomorra. Nimtoq in che yaẍin ex tuʼntzunju kubʼ t-ximen Jehová tuʼn kykyim (2 Ped. 2:7, 8). Tuʼn tklet Lot, xi tsamaʼn Jehová qe t-anjel qʼamal te qa kbʼeltoq t-xitin qe tman ex qa iltoq tiʼj tuʼn tetz oq kyukʼil toj tja. Tej «mintiʼx bʼant naj tten Lot», tzaj kytzyuʼn anjel tqʼabʼ Lot «tukʼix t-xuʼjil ex qe kabʼe tmeʼjel [...]. E jeʼtz qʼiʼn tuʼn kyetz tiʼjxi tnam tuʼntzun kyklet» (Gén. 19:16). A jlu in tzaj tyekʼin qe qa ojtzqiʼnxix tuʼn Jehová alkyeqe nya bʼaʼn in che ok weʼ tmajen twitz (Is. 63:7-9; Sant. 5:11; 2 Ped. 2:9).

5. ¿Tiʼ xnaqʼtzbʼil in nel qiʼn tiʼj qʼaqʼbʼil qkʼuʼj kyoj junjun versículo ik tzeʼn 1 Juan 3:17?

⁵ Nya oʼkx in tzaj tyekʼin Jehová qʼaqʼbʼil tkʼuʼj qiʼj, sino ax ikx in qo tzaj t-xnaqʼtzaʼn tuʼn tkubʼ qyekʼin qʼaqʼbʼil qkʼuʼj. Qo ximen tiʼj jun ley xi tqʼoʼn kye aj Israel. Qa at jun aj Israel ma txi qʼonte tchʼex juntl, jakutoq kyaj tiʼn jun t-xbʼalin aju xjal otoq t-xi qʼet tchʼex te jun yekʼbʼil tiʼj qa kchjetel tkʼas (kjawil uʼjit Éxodo 22:26, 27). Jakutoq kubʼ t-ximen aju otoq t-xi qʼonte chʼex tuʼn tkyaj ten tukʼil xbʼalun, atzunte juntl mlay ten jun ttxoʼw te qonikʼen. Tuʼntzunju, xi tqʼamaʼn Jehová kye aj Israel tuʼn tten qʼaqʼbʼil kykʼuʼj ex tuʼn taj kyqʼoʼn t-xbʼalun juntl aj «tex qʼij». ¿Tiʼ xnaqʼtzbʼil jaku tzʼel qiʼn tiʼj nabʼil jatumel xi qʼoʼn ley lu? Qa at jun erman taj onbʼil ex qa jaku bʼant tuʼn qonin tiʼj, il tiʼn tuʼn tbʼant quʼn (Col. 3:12; Sant. 2:15, 16; kjawil uʼjit 1 Juan 3:17).

6. ¿Tiʼ xnaqʼtzbʼil in nel qiʼn tiʼj qʼaqʼbʼil tkʼuʼj Jehová kubʼ tyekʼin kyiʼj aj Israel e bʼinchan il twitz?

⁶ Tzaj qʼaqʼin tkʼuʼj Jehová kyiʼj aj Israel, axpe ikx tej tkubʼ kybʼinchaʼn il twitz. In tzaj tqʼamaʼn Tyol Dios jlu: «Ate Qman aju Kydios qtzan kyxeʼchel kokʼx e tzaj t-samaʼn qe t-sanjel qʼmalte tyol kye, tuʼnju in tzʼeʼytoq tkʼuʼj kyiʼj xjal etzan tuʼn ex tiʼj tja» (2 Crón. 36:15). Ax ikx qe, il tiʼj tuʼn ttzaj qʼaqʼin qkʼuʼj kyiʼj qeju naʼmx tel  kynikʼ tiʼj Jehová, noqtzun tuʼnj, jaku tzʼajtz tiʼj kyanmi tuʼntzun kyok te tamiw. Nya taj Jehová tuʼn tkyim jun xjal (2 Ped. 3:9). Tuʼntzunju, akux atx ambʼil, kukx qo yolil tiʼj tqanil tiʼj kolbʼil kye xjal tuʼntzun ttzaj qʼaqʼin tkʼuʼj Jehová kyiʼj.

7, 8. ¿Tiquʼn kubʼ tnaʼn jun ja xjal qa tzaj tyekʼin Jehová qʼaqʼbʼil tkʼuʼj kyiʼj?

⁷ Toj ambʼil jaʼlo, ateʼ nim erman in kubʼ kynaʼn qa o kubʼ tyekʼin Jehová qʼaqʼbʼil tkʼuʼj kyiʼj. Qbʼinx aju ikʼ tej ttzaj tzyet abʼqʼi 1990 tuʼn tpaj ikʼbʼil ten tiʼj kyyajil xjal toj tnam Bosnia. In bʼettoq kyxiʼ jun kʼloj erman te Bosnia tuʼn kypon toj jun nimaq chmabʼil atz Serbia. Kyxol erman attoq jun kʼwaʼl te 12 abʼqʼi, Milan tbʼi, jun terman ex qe ttat. Kykyaqilx in bʼettoq kyxiʼ toj nimaq chmabʼil jatumel tuʼn tjaw aʼ kywiʼ ttat Milan. Toj frontera, kuʼtz kyin soldad qe toj tja Milan tuʼnju junxitl kyyajil, atzun kye txqantl erman xi qʼoʼn ambʼil kye tuʼn kyikʼx. Tej tikʼtl kabʼe qʼij, xi tllamarin xjal nejni kywitz soldad toj radio te nejenel tuʼn t-xi tqanin te tiʼtoq tuʼn tbʼant tuʼn tiʼj ja xjal. Waʼltoq xjal nejni kywitz soldad kywitz erman, tuʼntzunju, kykyaqilx ok kybʼiʼn aju tzaj tqʼamaʼn nejenel: «¡Bʼaʼn tuʼn kyetz tiʼna ex che tbʼyonkuya!».

⁸ Akux in yolintoq xjal nejni kywitz soldad kyukʼil, e pon laqʼeʼ kabʼe xinaq kytxlaj ja xjal ex xi kyjasin jlu toj kyẍkyin: «Testigo de Jehová qoʼye; ex o tzaj kyqʼamaʼn erman qeye aju bʼaj toj bus». Yajxitl, xi kyqʼamaʼn te Milan ex te terman tuʼn kyjax toj kykar tuʼntzun kyikʼx toj frontera, tuʼnju mintiʼ el kynikʼ soldad tiʼj kyuʼj. Yajxitl kyqʼama jlu kye kytat Milan: «Atzun kyeye, bʼaʼn tuʼn kyxiʼye tuʼn kyqane tiʼjxi lugar jatumel kykubʼ xjal toj frontera». Tej tok tbʼiʼn Milan jlu, mintiʼ el tnikʼ tiʼj qa tuʼn tjaw tzeʼn moqa tuʼn tjaw oqʼ. Xi kyqanin kytat jlu: «¿Axpe tok qʼuqli kykʼuʼje tiʼj qa tzul qʼoʼn ambʼil qeye tuʼn qikʼxe?». Tzyettzun kybʼet tuʼn kyikʼx toj frontera, ex maske in che keʼyin soldad kyiʼj, ok ik tzeʼn mintiʼ in che keʼyintoq. Ok kymojbʼan kyibʼ ja xjal toj juntl plaj ex tzyet kybʼet tuʼntzun kypon jatumel tuʼn tok nimaq chmabʼil. Qʼuqlitoq kykʼuʼj tiʼj qa otoq tzaj tbʼiʼn Jehová kynaʼj Dios tej ttzaj bʼaj kykʼuʼj. Ojtzqiʼn quʼn qa in tzaj tqʼamaʼn Tyol Dios qa nya toj tkyaqil ambʼil kolin kyiʼj tmajen ik tzeʼn jlu (Hech. 7:58-60). Atzun toj ambʼil lu, in tzaj tqʼamaʼn Milan aju kubʼ tnaʼn: «Toj weye nwitz, kubʼlo kymoẍsaʼn qe anjel kywitz soldad ex o qo klete tuʼn Jehová» (Sal. 97:10).

9. ¿Alkye tmod Jesús kubʼ tyekʼin kyiʼj xjal e ok lepeʼ tiʼj? (Qʼonka twitza tiʼj tnejel tilbʼilal).

⁹ Ax ikx jaku tzʼel qkanoʼn tiʼj tbʼanel techel kyaj tqʼoʼn Jesús. Tej tok tqʼoʼn twitz kyiʼj xjal lepcheqeʼtoq tiʼj ex «ik kyten ik tzaʼn qe ẍneʼl mintiʼ pastoril» kyiʼj, «tzaj qʼaqʼan tkʼuʼj kyiʼj» ex ok «ten Jesús qʼol nimku xnaqʼtzbʼil kye» (Mat. 9:36; kjawil uʼjit Marcos 6:34). Junxitl tmod kubʼ tyekʼin ik tzeʼn kye Fariseo, aqeju nyatoq kyaj tuʼn kyonin tiʼj alkyexku xjal (Mat. 12:9-14; 23:4; Juan 7:49). ¿Ikpe qmod ik tzeʼn te Jesús ex qajpe tuʼn qonin tuʼn tkyaqil qkʼuʼj kyiʼj xjal kyaj tuʼn tel kynikʼ tiʼj Jehová?

10, 11. ¿Tojpe tkyaqil ambʼil kbʼel qyekʼin qʼaqʼbʼil qkʼuʼj? Bʼaʼn tuʼn ttzaj tchikʼbʼaʼna.

¹⁰ ¿Ape t-xilen jlu qa toj tkyaqil ambʼil kbʼel qyekʼin qʼaqʼbʼil qkʼuʼj? Miʼn. Tuʼn tel qnikʼ tiʼj, qo xnaqʼtzan tiʼj jun ambʼil jatumel kubʼ t-ximen Jehová tuʼn miʼn tkubʼ tyekʼin qʼaqʼbʼil tkʼuʼj. Tej t-xi tsamaʼn Saúl tuʼn tkubʼ tbʼiyoʼn qe aj Amalec kyukʼix qe kyalun, mintiʼ kubʼ tbʼiyoʼn Saúl aj kawil, axlo ikx qeju talun. Kubʼlo t-ximen Saúl qa kubʼ tyekʼin qʼaqʼbʼil tkʼuʼj, noqtzun tuʼnj, el tiʼn Jehová toklen te aj  kawil kyibʼaj Israel tuʼnju mintiʼ xi tnimen (1 Sam. 15:3, 9, 15). A Jehová jwes tzʼaqli ex in nel tnikʼ tiʼj tiʼ tkuʼx toj kyanmi xjal, tuʼntzunju, ojtzqiʼn tuʼn toj alkye ambʼil mlay kubʼ tyekʼin qʼaqʼbʼil tkʼuʼj kyiʼj (Lam. 2:17; Ezeq. 5:11). Toj chʼintl ambʼil, kbʼel tqʼoʼn kykastiw qe xjal mintiʼ in che nimen te (2 Tes. 1:6-10). Toj ambʼil aju, mlay kubʼ t-ximen tuʼn tkubʼ tyekʼin qʼaqʼbʼil tkʼuʼj kyiʼj qeju ya otoq kubʼ tqʼoʼn kykastiw. Aju kbʼantel tuʼn, kbʼel t-xiten qe xjal lu tuʼntzun tkubʼ tyekʼin qʼaqʼbʼil tkʼuʼj kyiʼj qeju kukx in che ajbʼen te.

¹¹ Ax tok, nya a qaqʼun tuʼn qok ten qʼamal alkyeqe xjal kbʼel tqʼoʼn Jehová kykastiw ex alkyeqe che kletel. Sino kʼokel tilil quʼn tuʼn qonin kyiʼj xjal toj ambʼil jaʼlo. Qa ikju, ¿alkye tten jaku kubʼ qyekʼin qʼaqʼbʼil qkʼuʼj kyiʼj txqantl? Qo xnaqʼtzan tiʼj junjun nabʼil.

12. ¿Alkye jun tten jaku kubʼ qyekʼin qʼaqʼbʼil qkʼuʼj kyiʼj txqantl?

¹² Qo jyon tumel tuʼn qonin kyiʼj txqantl tukʼil junjun tiʼchaq tkyaqil qʼij. Jun tiʼ il tiʼj tuʼn tbʼant kyuʼn okslal, aju tuʼn tkubʼ kyyekʼin qʼaqʼbʼil kykʼuʼj kyiʼj erman ex kyiʼj kykyaqil xjal (Juan 13:34, 35; 1 Ped. 3:8). Aju «tuʼn tkubʼ qyekʼin qʼaqʼbʼil qkʼuʼj», jaku txi qqʼamaʼn qa a t-xilen tuʼn «qbʼisun junx tukʼil juntl». Ax ikx in yolin tiʼj qa kbʼel qnaʼn qajbʼil tuʼn qonin kyiʼj qeju in che ikʼ toj nya bʼaʼn. Qo jyon tumel tuʼn tbʼant jlu quʼn. Jun techel, jaku txi qqʼamaʼn te juntl tuʼn qonin tiʼj jun taqʼun atz tja moqa tuʼn t-xi qbʼinchaʼn jun xtalbʼil te (Mat. 7:12).

13. ¿Alkye tten in kubʼ kyyekʼin tmajen Jehová qʼaqʼbʼil kykʼuʼj aj in tzaj junjun xitbʼil tuʼn twitz txʼotxʼ?

¹³ Bʼaʼn tuʼn qonin jatumel in tzaj xitbʼil. Nim erman in kubʼ kyyekʼin qʼaqʼbʼil kykʼuʼj kyiʼj erman in tzaj nya bʼaʼn kyiʼj tuʼn xitbʼil tuʼn twitz txʼotxʼ. Ojtzqiʼn kywitz tmajen Jehová kyuʼn xjal aj kyonin toj ambʼil aju (1 Ped. 2:17). At jun ermana te Japón in nanqʼintoq toj jun lugar jatumel tzaj nya bʼaʼn tej tikʼ kyaqnajnabʼ ex tej tetz mar toj tlugar toj 2011. Tqʼama qa kubʼ tnaʼn qʼuqbʼil tkʼuʼj ex tzalajbʼil tej tok tqʼoʼn twitz kyiʼj nim erman e pon onil te junxichaq lugar tuʼn kyjaw  bʼinchet ja ex qe Ja te Chmabʼil. Ex kubʼ ttzʼibʼin jlu: «Tkyaqilju ikʼ toj wanqʼibʼile, tzaj tyekʼin weye qa kʼujlaʼn qoʼ tuʼn Jehová, qa in che ximen erman qiʼj ex qa in che naʼn Dios qiʼj twitz tkyaqil Txʼotxʼ».

14. ¿Alkye tten jaku qo onin kyiʼj qeju ma che tijen ex kyiʼj qeju yabʼ?

¹⁴ Qo onin kyiʼj qeju ma che tijen ex kyiʼj yabʼ. Aj tok qqʼoʼn qwitz tiʼj jun xjal at toj kʼixkʼoj tuʼn tpaj ma tijen moqa tuʼn tpaj jun yabʼil, in tzaj qʼaqʼin qkʼuʼj tiʼj. In xi qqanin te Jehová tuʼn tul Tkawbʼil tuʼntzun tel tiʼn qe yabʼil ex tuʼn ya miʼn kytijen xjal. Akux in pon ambʼil lu, in nok tilil quʼn tuʼn qonin kyiʼj qeju kyajbʼil onbʼil. Tqʼama jun aj tzʼibʼil tiʼ bʼaj tiʼj ttxuʼ, aju attoq yabʼil Alzheimer tiʼj. Jun qʼij, ikʼ ttzʼal ex tkʼuʼj toj t-xbʼalun. Akux in bʼajtoq tsaqin tkyaqil, at kabʼe ermana in che pon visitaril te tkyaqil maj, e pon tja toj qʼij aju. Tej tok kyqʼoʼn kywitz ermana tiʼjju otoq bʼaj, xi kyqʼamaʼn qa kyajtoq tuʼn kyonin tiʼj. Tqʼama xuʼj kye: «In tzaj nim nchʼixwiye tiʼj, noqtzun tuʼnj, waje onbʼil». Tuʼntzunju, e onin tiʼj, bʼaj kybʼinchaʼn jun vas tté ex e kyaj ten yolil tukʼil. Tzaj tqʼoʼn tal nim chjonte kye ermana ex tqʼama qa in kubʼ kybʼinchaʼn aju in che pakbʼan tiʼj. ¿In oninpe qʼaqʼbʼil qkʼuʼj qiʼj tuʼn tok tilil quʼn tuʼn qonin kyiʼj qeju ma che tijen ex kyiʼj qeju yabʼ? (Filip. 2:3, 4).

15. ¿Tiquʼn in nok pakbʼabʼil te jun tumel tuʼn qonin kyiʼj txqantl?

¹⁵ Qo onin kyiʼj xjal tuʼn tok kyojtzqiʼn Jehová. Toj ambʼil jaʼlo, in tzaj nya bʼaʼn kyiʼj xjal ex in tzaj bʼaj kykʼuʼj. Aju mas bʼaʼn jaku bʼant quʼn kyiʼj, aju qa ma txi qxnaqʼtzaʼn kye tiʼj Jehová ex tiʼjju kbʼantel tuʼn Tkawbʼil kyiʼj xjal. Ax ikx bʼaʼn tuʼn t-xi qxnaqʼtzaʼn kye tiʼj qa nim kʼonil kyiʼj qa ma txi kybʼiʼn qe nabʼil in tzaj tqʼoʼn Jehová (Is. 48:17, 18). In tzaj tqʼoʼn pakbʼabʼil ambʼil qe tuʼn tjaw qnimsaʼn Jehová ex tuʼn t-xi qyekʼin qʼaqʼbʼil tkʼuʼj at kyiʼj xjal. ¿Jakupe qo pakbʼan mas? (1 Tim. 2:3, 4).

16. ¿Tiʼ tbʼanel in tzaj qe qa ma kubʼ qyekʼin qʼaqʼbʼil qkʼuʼj?

¹⁶ Aqeju xjal in che xnaqʼtzan tiʼj qximbʼetz, in tzaj kyqʼamaʼn qa ma kubʼ qyekʼin qʼaqʼbʼil qkʼuʼj, mas mintiʼ in tzaj yabʼil qiʼj ex mas in ten tbʼanel qxol kyukʼil txqantl. Aj qonin kyiʼj qeju in che ikʼ toj yajbʼil, mas in qo tzalaj, mintiʼ in kubʼ qnaʼn qa qjunalx atoʼ ex mas in ten qximbʼetz toj tumel. Jaku tzʼok qeʼ qkʼuʼj tiʼj qa in tzaj tiʼn nim tbʼanel qe qa ma kubʼ qyekʼin qʼaqʼbʼil qkʼuʼj (Efes. 4:31, 32). Qa ma tzʼok qkʼujlaʼn qe txqantl ex qa ma qo jyon tumel tuʼn qonin kyiʼj, ktel jun tbʼanel qximbʼetz tuʼnju kʼelel qnikʼ tiʼj qa in kubʼ qbʼinchaʼn tajbʼil Jehová. Ex tuʼn jlu qo okel te mas tbʼanel mambʼaj, chmilbʼaj ex amiw. Nya oʼkxju, aqeju in kubʼ kyyekʼin qʼaqʼbʼil kykʼuʼj kyiʼj txqantl, chʼixmi tkyaqil maj in che onin txqantl kyiʼj aj kyaj onbʼil (kjawil uʼjit Mateo 5:7 ex Lucas 6:38).

17. ¿Tiquʼn taja tuʼn kukx tten qʼaqʼbʼil tkʼuʼja ex tuʼn tkubʼ tyekʼina?

¹⁷ Mintiʼ in kubʼ qyekʼin qʼaqʼbʼil qkʼuʼj noq tuʼnju in tzaj tiʼn nim tbʼanel qe. In bʼant jlu quʼn tuʼnju qaj tuʼn tel qkanoʼn ex tuʼn tjaw qnimsaʼn Jehová, aju in tzaj qʼonte kʼujlabʼil ex qʼaqʼbʼil qkʼuʼj (Prov. 14:31). Tuʼntzunju, tzʼok tililxix quʼn tuʼn tel qkanoʼn tbʼanel techel in kubʼ tqʼoʼn. Iktzun tten qo okel laqʼeʼ mas kytxlaj erman ex qo tzalajel tiʼj tbʼanel mujbʼabʼil kyukʼil qeju ateʼ qtxlaj (Gál. 6:10; 1 Juan 4:16).