Aqeju yol ateʼ ttxlaj in qo tzaj kyonin tuʼn tel qnikʼ tiʼj qa aju «tyol Dios» aju yolin apóstol Pablo tiʼj atzun tqanil tiʼj t-ximbʼetz, ik tzeʼn in kanet quʼn toj Xjan Uʼj.

Kyoj qeju quʼj, nim maj in najbʼen Hebreos 4:12 quʼn tuʼntzun t-xi qxnaqʼtzaʼn qa at tipumal Tyol Dios tuʼn tbʼaj tchʼixpuʼn kyanqʼibʼil xjal. Bʼaʼn aju xnaqʼtzbʼil lu. Noqtzun tuʼnj, ax ikx bʼaʼn tuʼn tel qnikʼ tiʼj alqiʼj yolin Pablo te tkubʼ ttzʼibʼin aju versículo lu. In nonintoq Pablo kyiʼj okslal aj Hebreo tuʼntzun kyonin tiʼj t-ximbʼetz Jehová. Toj Tyol Dios in tzaj qʼamaʼn nim tqanil tiʼj t-ximbʼetz Dios lu. Toj ambʼil aju, ajbʼen aju techel kyiʼj qeju aj Israel tej kyklet tuʼn Dios toj tnam Egipto. Attoq jun qʼuqbʼil kykʼuʼj tuʼn kyokx toj jun txʼotxʼ «qʼinunxix ex tbʼanilxix», aju otoq t-xi ttziyen Dios kye. Atztzu jakutoq che tzalaj tiʼj axix tok ojlabʼil (Éxodo 3:8; Deuteronomio 12:9, 10).

Atzun t-ximbʼetz Dios attoq kyiʼj aj Israel. Noqtzun tuʼnj, mintiʼ kubʼ kyyekʼun qʼuqbʼil kyiʼj tiʼj ex mintiʼ e nimen te, tuʼntzun chʼixmi kykyaqil mintiʼ i oʼkx toj ojlabʼil te Jehová (Números 14:30; Josué 14:6-10). Maske ikju, tqʼama Pablo qa atxtoq jun yol tuʼn tjapun twiʼ «tuʼn qkanun tuj ju ojlabʼl in tqʼoʼn Dios» (Hebreos 3:16-19; 4:1). A jlu in tzaj tyekʼun qa aju «yol tzaj tmaʼn» Dios at toklen tukʼilju o tzaj tchikʼbʼaʼn tiʼj t-ximbʼetz at. Ik tzeʼn kye okslal aj Hebreo, ax ikx qe jaku jaw quʼjin aju t-ximbʼetz Dios lu ex tuʼn qonin tiʼj tuʼntzun tjapun twiʼ. Tuʼn tel nikʼbʼaj tiʼj qa atz toj Xjan Uʼj tkuʼx aju ttziybʼil Dios, tqʼama Pablo qeju yol kyaj tzʼibʼin toj Génesis 2:2 ex Salmo 95:11.

Nim in qo jaw tzalaj tuʼnju kukx at qʼuqbʼil qkʼuʼj «tuʼn qkanun tuj ju ojlabʼl in tqʼoʼn Dios». Qʼuqli qkʼuʼj tiʼj qa ax tok jaku qo oʼkx tojju ojlabʼil in tzaj tqʼoʼn Jehová ik tzeʼn in tzaj tqʼamaʼn Tyol. Tuʼntzunju in nok tilil quʼn tuʼn qokx toj. ¿Alkye tten? Mintiʼ in nok tilil quʼn tuʼn qok lepeʼ tiʼjju in tzaj tqʼamaʼn Ley xi qʼoʼn te Moisés noq tuʼn qtzaj kʼiwlaʼn tuʼn Jehová ex nya noq tuʼn jlu in kubʼ qbʼinchaʼn qe tbʼanel tiʼchaq. In qo onin tiʼj t-ximbʼetz Dios ex kukx kbʼantel quʼn tuʼnju at qʼuqbʼil qkʼuʼj tiʼj. Ateʼ nim mil xjal twitz tkyaqil Txʼotxʼ o txi tzyet tuʼn kyxnaqʼtzan tiʼj Tyol Dios ex o tzʼel kynikʼ tiʼj t-ximbʼetz Dios o tzaj tchikʼbʼaʼn. A jlu o tzʼonin kyiʼj tuʼn tkubʼ kychʼixpuʼn kyanqʼibʼil, tuʼn tkubʼ kyyekʼun qʼuqbʼil kykʼuʼj tiʼj Jehová ex in jaw aʼ kywiʼ. Tkyaqil jlu in tzaj tyekʼun qa «aju tyol Dios itzʼte ex at tipumal». Aju o tzaj tchikʼbʼaʼn Dios tiʼj t-ximbʼetz toj Tyol, ya at tipumal toj qanqʼibʼil ex kukx kbʼantel jlu tuʼn.