1, 2. a) ¿Tiquʼn kwest te kye mambʼaj tuʼn t-xi kyxnaqʼtzaʼn qe kykʼwaʼl tuʼn tten qʼuqbʼil kykʼuʼj tiʼj Jehová? b) ¿Alkye jun tten jaku bʼant tuʼn kyonin mambʼaj kyiʼj kykʼwaʼl tuʼn tten qʼuqbʼil kykʼuʼj tiʼj Jehová? c) ¿Tiʼ kyaje tiʼchaq qo xnaqʼtzal tiʼj toj xnaqʼtzbʼil lu?

TQʼAMA jun mejebʼleʼn te tnam Francia jlu: «Qʼuqli qkʼuʼje tiʼj Jehová, noqtzun tuʼnj, nya a t-xilen jlu qa kʼokel qeʼ kykʼuʼj qkʼwaʼle tiʼj. Mlay t-xi qqʼoʼn qʼuqbʼil qkʼuʼj kye txqantl. Chebʼe chebʼe in chʼiy qʼuqbʼil kykʼuʼj kʼwaʼl». Kubʼ ttzʼibʼin jun erman te tnam Australia qa tuʼn kyxi onint kʼwaʼl tuʼn tchʼiy qʼuqbʼil kykʼuʼj, alo aqʼuntl mas kwest tuʼn tbʼant kyuʼn mambʼaj. Ex tqʼamatl: «Jakulo kubʼ t-ximana qa bʼaʼn ma kubʼ tnaʼn tkʼwaʼla tuʼnju tzaqʼwebʼil ma txi tqʼoʼna te, noqtzun tuʼnj, noq kjawil labʼina aj ttzaj tqanin axju xjel teya. Aqeju tzaqʼwebʼil kyiʼj kyxel in kubʼ kynaʼn bʼaʼn tuʼn jaʼlo, nya ax jlu kbʼel kynaʼn toj juntl qʼij. Atlo maj il tiʼj tuʼn tyolina nim maj tiʼ jun tiʼ kyukʼil». Akux in che chʼiy kʼwaʼl, nim mambʼaj il tiʼj tuʼn t-xi kychikʼbʼaʼn ax jun tiʼ  kye, noqtzun tuʼnj, tukʼil mas nim tqanil. Ax ikx il-lo tiʼj tuʼn tajbʼen nim wiq tumel kyuʼn tuʼn t-xi kyxnaqʼtzaʼn qe kykʼwaʼl tuʼn tok kykʼujlaʼn Jehová.

² ¿Ateʼ teya tkʼwaʼl? Bʼalo at maj in kubʼ t-xjelina qa jaku bʼant tuʼn t-xi t-xnaqʼtzaʼna qe tkʼwaʼla tuʼn tok kykʼujlaʼn Jehová ex tuʼn kukx kyajbʼen te toj tkyaqil kyanqʼibʼil. Ax tok, mlay bʼant jlu quʼn qjunalx (Jeremías 10:23). Oʼkx jaku bʼant jlu kyuʼn mambʼaj qa ma tzʼok qeʼ kykʼuʼj tiʼjju onbʼil in tzaj tqʼoʼn Jehová. O tzaj tqʼoʼn Jehová nim nabʼil kye mambʼaj. ¿Alkye tten jaku tzʼonina kyiʼj qe tkʼwaʼla? Toj xnaqʼtzbʼil lu qo xnaqʼtzal tiʼj kyaje tten. Tnejel, ojtzqinka qe tkʼwaʼla. Tkabʼ, xnaqʼtzanxa qe tiʼchaq tkuʼx toj tanmiya kye. Toxin, bʼaʼn tuʼn kyajbʼen techel tuʼna. Ex tkyajin, qaninxa xewbʼaj xjan te Jehová ex ten tpasensa kyiʼj tkʼwaʼla.

3. ¿Alkye tten jaku tzʼel kykanoʼn mambʼaj techel tiʼj Jesús tej t-xi t-xnaqʼtzaʼn qe t-xnaqʼtzbʼen?

³ Toj tkyaqil maj xi tqʼanin Jesús kye t-xnaqʼtzbʼen tiʼ kyximbʼetz at (Mateo 16:13-15). Jaku tzʼel tkanoʼna techel tiʼj. ¿Alkye tten? Aj tyolina moqa aj tkubʼ tbʼinchaʼna jun tiʼ kyukʼil, qaninxa kye tiʼ kyximbʼetz at ex qʼonxa ambʼil tuʼn ttzaj kyqʼamaʼn aju axix tok in kubʼ kyximen. Atlo maj mintiʼxix in nel kynikʼ tiʼj jun tiʼ. Tqʼama jun ermano te 15 abʼqʼi te tnam Australia jlu: «Kukx in yolin nmane wukʼile tiʼj qʼuqbʼil nkʼuʼje ex in nonin wiʼje tuʼn nximane tiʼj jun tiʼ. In tzaj tqanin junjun xjel ik tzeʼn jlu, ‹¿tiʼ in tzaj tqʼamaʼn Tyol Dios?›, ‹¿in xipe tnimen teya?› ex ‹¿tiquʼn in xi tnimana?›. In tzaj tqʼamaʼn weye tuʼn t-xi ntzaqʼweʼne kyukʼil wexe nyol ex nya oʼkx tuʼn t-xi nqʼamaʼne aju kye jaku txi kytzaqʼweʼn». Ax ikx tqʼama qa tej tchʼiy chʼintl, xi tqʼoʼn tzaqʼwebʼil mas tzʼaqli tiʼj jun xjel.

4. Qʼamantza jun techel tiquʼn nim toklen tuʼn tten tpasensa ex tuʼn tonina kyiʼj tkʼwaʼla tuʼn tel kynikʼ tiʼjju mintiʼ in nel kynikʼ tiʼj.

⁴ Qa kwest tuʼn t-xi kynimen tkʼwaʼla jun tiʼ in tzaj t-xnaqʼtzaʼn Tyol Dios, ten tpasensa. Onina kyiʼj tiʼjju mintiʼ in nel kynikʼ tiʼj. Tqʼama jun mambʼaj jlu: «Qʼonka nim toklen qe t-xjel tkʼwaʼla. Miʼn kubʼ t-ximana qa nya nim kyoklen moqa noq tuʼnju in kubʼ tnaʼna nya bʼaʼn kyuʼn». Tbʼanel qa ma tzaj kyqanin tkʼwaʼla kyxel teya, a jlu in tzaj tyekʼun qa kyajbʼil tuʼn kukx tel kynikʼ. Ax ik te Jesús xi tqanin qe t-xjel tej tzmatoq kʼwaʼl (kjawil uʼjit Lucas 2:46). Tqʼamaʼn jun kuʼxun te tnam Dinamarca qa tej t-xi tqʼamaʼn kye ttat qa nyaxix qʼuqli tkʼuʼj tiʼj qa at toj okslabʼil axix tok, mintiʼ tzaj kyqʼoj ttat maske tzaj kyximbʼetz tiʼj. Ex tqʼamatl: «Tzaj kytzaqʼweʼn kykyaqil nxjele tuʼn Tyol Dios».

5. Maske in kubʼ kyyekʼun kʼwaʼl qa at qʼuqbʼil kykʼuʼj tiʼj Jehová, ¿tiʼ il tiʼj tuʼn tbʼant kyuʼn mambʼaj?

⁵ Ojtzqinka qe tkʼwaʼla. Miʼn kubʼ t-ximana qa tuʼnju in che eʼx pakbʼal ex in cheʼx kyoj chmabʼil ya qʼuqli kykʼuʼj tiʼj Jehová. Bʼaʼn tuʼn tkubʼ t-xjelina jlu: «¿Tiʼ nimen kyuʼn nkʼwaʼle tiʼj Jehová ex tiʼj Tyol?». Qʼonka tilil tuʼn tel tnikʼa tiʼj qa at jun tiʼ kwest in nela toj kywitz tuʼn kukx kyajbʼen te Jehová. Yolina tkyaqil maj tiʼj Jehová aj tkubʼ tbʼinchaʼna  jun tiʼ junx kyukʼil. Naʼna Dios kyiʼj tkʼwaʼla aj ttena kyukʼil ex aj ttena tjunalxa.

6. ¿Tiquʼn nim toklen tuʼn kukx tel kynikʼ qe mambʼaj tiʼj Jehová ex tiʼj Tyol?

⁶ Ok kyqʼoʼn xjal kywitz tiʼj qa kʼujlan qe tuʼn Jesús ex qa kʼujlaʼn Jehová tuʼn, ex ojtzqiʼntoq Tyol tuʼn. Tuʼntzunju ok bʼiʼn kyuʼn (Lucas 24:32; Juan 7:46). Chʼixmi axju jaku bʼant tuʼna, aj tok kyqʼoʼn tkʼwaʼla kywitz tiʼja qa kʼujlaʼn Jehová tuʼna, kʼonil jlu kyiʼj tuʼn tok kykʼujlaʼn mas Jehová (kjawil uʼjit Deuteronomio 6:5-8 ex Lucas 6:45). Tuʼntzunju, kukx xnaqʼtzana tiʼj Xjan Uʼj, kyiʼj qeju tiʼchaq o kubʼ tbʼinchaʼn Jehová ex kukx uʼjina kyiʼj quʼj (Mateo 6:26, 28). Qa mas ma tzʼel tnikʼa tiʼj Jehová, mas jaku bʼant tuʼn t-xi t-xnaqʼtzaʼna qe tiʼchaq tiʼj kye tkʼwaʼla (Lucas 6:40).

7, 8. a) Tkyaqil maj a tel tnikʼa tiʼ jun xnaqʼtzbʼil tiʼj Jehová, ¿tiʼ jaku bʼant tuʼna? b) ¿Alkye tten o bʼant jlu kyuʼn junjun mambʼaj?

⁷ Aj tel tnikʼa tiʼj jun xnaqʼtzbʼil tiʼj Jehová, qʼamanxa kye tkʼwaʼla. Jaku txi tqʼamaʼna kye toj alkyexku ambʼil aj ttena kyukʼil, nya oʼkx aj tkubʼ kybʼinchaʼne kytene tiʼj chmabʼil moqa aj kyxnaqʼtzane tiʼj Tyol Dios kyukʼil toj tjaya. Atzun in bʼant tuʼn jun mejebʼleʼn te Estados Unidos. Aj tok kyqʼoʼn kywitz tiʼj jun tbʼanel tbʼinchbʼen Jehová moqa aj t-xi kywaʼn jun tbʼanel tiʼ, in che yolin tiʼj Jehová kyukʼil kykʼwaʼl. In tzaj kyqʼamaʼn jlu: «In xi qqʼamaʼne kye kʼwaʼl qa tkyaqil aju in tzaj tqʼoʼn Jehová, atzun jun yekʼbʼil tiʼj tkʼujlabʼil qiʼj ex qa in ximen qiʼj». Ex juntl mejebʼleʼn te tnam Sudáfrica kygan tuʼn kyyolin tiʼj tbʼinchbʼen Jehová kyukʼil kabʼe kymeʼjel, moqa kymyal, akux in che aqʼunan kyxol bʼech. Jun techel, in xilo kyqʼamaʼn qa in che jaw labʼin tiʼj jun ijaj aju in nok te jun bʼech. Kyqʼama jlu: «In xi qxnaqʼtzaʼne kye tuʼn tok kyqʼoʼn nim toklen chwinqlal ex tuʼn tok kyqʼoʼn kywitz tiʼj alkye tten bʼinchan maj».

⁸ Jun mambʼaj te tnam Australia xi tiʼn jun tkʼwaʼl toj jun museo aju qʼiʼntoq junlo 10 abʼqʼi tuʼn. Ajbʼen ambʼil lu tuʼn mambʼaj tuʼn t-xi tonin tkʼwaʼl tuʼn tok tqʼoʼn twitz tiʼj yekʼbʼil qa a Jehová kubʼ bʼinchante tkyaqil, iktzun tten jaku chʼiy qʼuqbʼil tkʼuʼj. Ok kyqʼoʼn kywitz tiʼj jun tqanil kyiʼj junjun txkup e ten toj ambʼil ojtxi ex ya mintiʼ in che kanet jaʼlo. E jaw labʼin tiʼj qa tbʼanelxix che keʼyin qe txkup jlu ex mintiʼ jun atx taj tiʼj kyxmilal ik tzeʼn qeju txkup ateʼ jaʼlo. Tqʼama mambʼaj jlu: «Qa mintiʼ jun bʼinchalte tkyaqil, ¿tiquʼntzun ya tbʼanel che keʼyin qe txkup lu toj ambʼil ojtxi? Nim in jaw labʼine tiʼj jlu ex xi nqʼamaʼne te nkʼwaʼle».

9. a) ¿Tiquʼn nim toklen tuʼn kyajbʼen techel tuʼna aj t-xi t-xnaqʼtzaʼna qe tkʼwaʼla? b) ¿Alkye techel ajbʼen tuʼn jun txubʼaj?

⁹ Nim maj e ajbʼen txʼolbʼabʼil ex techel tuʼn Jesús tuʼn t-xi t-xnaqʼtzaʼn junjun xnaqʼtzbʼil nim kyoklen (Mateo 13:34, 35). Qa axju ma bʼant tuʼna, kʼonil kyiʼj tkʼwaʼla tuʼn tajbʼen kynabʼil kyuʼn. A jlu kʼonil kyiʼj tuʼn kyximen, tuʼn tel kynikʼ tiʼj ex tuʼn ttzaj kynaʼn  junjun xnaqʼtzbʼil in nel kynikʼ tiʼj. Ax ikx che tzalajel tiʼj xnaqʼtzbʼil. Jun techel, tajbʼiltoq jun txubʼaj te tnam Japón tuʼn t-xi tyekʼun kye tal alkye tten kubʼ tbʼinchaʼn Jehová Txʼotxʼ, tuʼn jlu in tzaj tyekʼun jniʼ kʼujlaʼn qoʼ tuʼn. Tuʼnju qʼiʼntoq 8 abʼqʼi tuʼn jun ex juntl 10 abʼqʼi, ajbʼen jun techel tuʼn, aju nya kwest tuʼn tel kynikʼ tiʼj. Xi tqʼoʼn lech, azúcar ex café kye. Ex xi tqʼamaʼn te teyele junjun tuʼn tkubʼ tbʼinchaʼn jun vas tcafé. Tqʼama jlu: «Ok tilil kyuʼn ex tej t-xi nqanine kye tiquʼn, tzaj kyqʼamaʼn weye qa kyajbʼiltoq tuʼn tel café ik tzeʼn weye ngan. Tuʼntzunju, xi nqʼamaʼne kye qa axju bʼant tuʼn Dios tej tbʼaj tbʼinchaʼn Txʼotxʼ aju atxix tajbʼen kye xjal tuʼn kyanqʼin». Kubʼ kynaʼn kʼwaʼl nim tzalajbʼil tej tel kynikʼ tiʼj jlu ex mintiʼ in nikʼ tnaʼl kyuʼn.

10, 11. a) ¿Alkye qeju techel jaku che ajbʼen tuʼna tuʼn t-xi tyekʼuna kye tkʼwaʼla qa at jun Bʼinchal tkyaqil? (Qʼonka twitza tiʼj tnejel tilbʼilal). b) ¿Alkye qeju techel o che ajbʼen tuʼna kyukʼil tkʼwaʼla?

¹⁰ ¿Alkye techel jaku tzʼajbʼen tuʼna tuʼn t-xi tyekʼuna kye tkʼwaʼla qa at jun Bʼinchal tkyaqil? Jaku kubʼ tbʼinchaʼna jun pastel kyukʼil. Ex qʼamanxa kye tiquʼn nim toklen tuʼn kyok lepeʼxix tiʼj receta. Yajxitl bʼaʼn tuʼn ttzaj tiʼna jun mansan moqa alkyexku juntl fruta ex qaninxa jlu kye: «¿Ojtzqiʼn kyuʼne qa bʼinchan mansan lu tiʼj jun receta?». Paʼnkubʼa mansan te kabʼe ex yekʼunxa jun tbʼaqʼ mansan kye. Qʼamanxa kye qa ik tten tbʼaqʼ mansan ik tzeʼn jun receta aju in tzaj tqʼamaʼn tqanil tuʼn tbʼant jun mansan. Ax ikx qʼamanxa qa mas kwest qe tqanil lu twitz qe tqanil tuʼn tbʼant jun pastel. Ex qaninxa jlu kye: «Qa at jun kubʼ tzʼibʼinte jun receta tuʼn tbʼant pastel, ¿alkyetzun kubʼ tzʼibʼinte receta tiʼj mansan?». Jaku txi tqʼamaʼna qa toj tbʼaqʼ mansan ateʼ qeju tqanil kyiʼj mansan ex tiʼjju tqan. Ax ikx jaku txi tyekʼuna qe tilbʼilal ex qe techel tkuʼx toj t-xaq 10 a 20 toj uʼj El origen de la vida.

¹¹ Nimku mambʼaj in jaw kyuʼjin qeju xnaqʼtzbʼil «¿Casualidad o diseño?» kyukʼil kykʼwaʼl toj uʼj ¡Despertad! Qa tzma tal chʼin qe tal kʼwaʼl, jaku txi kyxnaqʼtzaʼn mambʼaj junjun tqanil toj jun tten nya kwest. Jun techel, tqʼama jun mejebʼleʼn te tnam Dinamarca jlu: «Aʼyeju avión, ik kyten ik tzeʼn qeju pájaro, noqtzun tuʼnj, ¿jakupe kubʼ kyqʼoʼn qe avión jos tuʼntzun kyul itzʼji qe tal avión? Yajtzun qeju pájaro, ¿ilpe tiʼj tuʼn tkubʼ bʼinchet jun tbʼanel lugar tuʼntzun kykubʼ toj? ¿Ex alkye mas tgana? ¿Aju tqʼajqʼajel jun avión moqa aju tqʼajqʼajel twi jun pájaro? Tuʼntzunju, ¿alkye mas at tnabʼil toj twitza? ¿Aju kubʼ bʼinchante kye pájaro  moqa aju xjal kubʼ bʼinchante avión?». Qa ma tzʼonina kyiʼj tkʼwaʼla tuʼn kyximen ex qa ma txi tqanina qe xjel kye, in nonina kyiʼj tuʼn tajbʼen kynabʼil kyuʼn ex tuʼn tchʼiy qʼuqbʼil kykʼuʼj tiʼj Jehová (Proverbios 2:10-12).

12. ¿Alkye tten jaku che ajbʼen techel tuʼna tuʼn t-xi t-xnaqʼtzaʼna kye tkʼwaʼla qa ax tok tkyaqilju tkuʼx toj Tyol Dios?

¹² Jaku che ajbʼen techel tuʼna tuʼn t-xi t-xnaqʼtzaʼna kye tkʼwaʼla qa ax tok tkyaqilju tkuʼx toj Tyol Dios. Jun techel, jaku jaw tuʼjina Job 26:7 (kjawil uʼjit). Noqtzun tuʼnj, nya oʼkx kxel tqʼamaʼna qa a Jehová xi qʼamante tqanil lu te Job. Onina kyiʼj tuʼn tajbʼen kynabʼil kyuʼn. Jaku txi tqʼamaʼna kye qa aqeju xjal e anqʼin toj ambʼil aju, nyalo qʼuqli kykʼuʼj tiʼj qa mintiʼ jun tzyulte Txʼotxʼ. Ojtzqiʼntoq kyuʼn qa kykyaqil qeju tiʼchaq kykubʼ tibʼaj jun tiʼ. Naʼmxtoq tqʼama jun xjal qa mintiʼ jun tzyulte Txʼotxʼ, tuʼnju mintiʼ qeju telescopio nix qeju nave in cheʼx twitz kyaʼj. ¿Tiʼ xnaqʼtzbʼil in tzaj tqʼoʼn? Qa maske o bʼant nimxix abʼqʼi tkubʼlen tzʼibʼin Tyol Dios, tkyaqil aju in tqʼamaʼn ax tok tuʼnju te Jehová t-ximbʼetz tkuʼx toj (Nehemías 9:6).

13, 14. ¿Alkye tten jaku che onin mambʼaj kyiʼj kykʼwaʼl tuʼn t-xi kybʼiʼn aju in tzaj tqʼamaʼn Tyol Dios?

¹³ Ax ikx nim toklen tuʼn t-xi t-xnaqʼtzaʼna qe tkʼwaʼla qa mas kbʼel kynaʼn tzalajbʼil qa ma txi kybʼiʼn aju in tzaj tqʼamaʼn Tyol Dios (kjawil uʼjit Salmo 1:1-3). Jun techel, jaku txi tqʼamaʼna kye tuʼn kyximen tiʼj qa che xel anqʼil toj jun isla ex qa il tiʼj tuʼn tjaw kyjoʼn junjun xjal tuʼn kyanqʼin kyukʼil. Ex jakutzun txi tqanina jlu kye: «¿Alkyeqe xjal jaku che jaw kyjyoʼne tuʼntzun kyanqʼine kykyaqile toj tbʼanel ex toj mujbʼabʼil?». Yajxitl jaku jaw tuʼjina Gálatas 5:19-23 tuʼntzun tel kynikʼ tiʼj alkye qeju xjal tajbʼil Jehová tuʼn kyanqʼin toj Tbʼanel Najbʼil.

¹⁴ Iktzun tten jaku txi t-xnaqʼtzaʼna kabʼe xnaqʼtzbʼil nim toklen kye. Tnejel, qa in tzaj t-xnaqʼtzaʼn Jehová qoʼ tuʼn qanqʼin toj tzalajbʼil ex toj mujbʼabʼil kyukʼil txqantl toj ambʼil jaʼlo. Tkabʼ, qa in qo tzaj t-xnaqʼtzaʼn alkye tten qo anqʼil toj Tbʼanel Najbʼil (Isaías 54:13; Juan 17:3). Ax ikx jaku txi t-xnaqʼtzaʼna kye tkʼwaʼla alkye tten o tzʼonin Tyol Dios kyiʼj txqantl erman. ¿Alkye tten jaku bʼant tuʼna? Aj txi tjyoʼna aju in nikʼ toj kyanqʼibʼil txqantl ik tzeʼn aju «Chʼexpaj kyanqʼibʼil tuʼn Tyol Dios», aju in netz toj uʼj Aju Xqʼuqil. Moqa jaku txi tqʼamaʼna te jun erman toj Ja te Chmabʼil tuʼn t-xi tchikʼbʼaʼn te alkye tten o tzʼonin Tyol Dios tiʼj tuʼn tbʼant junjun chʼixpubʼil tuʼn tuʼn tajbʼen te Jehová (Hebreos 4:12).

15. ¿Tiʼ jaku tzʼonin tiʼja tuʼn t-xi t-xnaqʼtzaʼna qe tkʼwaʼla?

¹⁵ Qa ma tzʼajbʼen tnabʼila tuʼna, kʼelel tbʼanel aʼyeju xnaqʼtzbʼil che xel t-xnaqʼtzaʼna kye tkʼwaʼla. Jyonxa nim wiq tumel tuʼntzun kytzalaj tkʼwaʼla tuʼn tel mas kynikʼ tiʼj Jehová ex tuʼn tok kyamiwen mas kyibʼ tukʼil. Ex kukx bʼinchama jlu akux in che chʼiy. Tqʼama jun mambʼaj jlu: «Miʼn sikta tuʼn kyajbʼen akʼaj tumel tuʼna tuʼn t-xi tqʼamaʼna junjun xnaqʼtzbʼil otoq che xnaqʼtzane tiʼj».

16. a) Aj txi t-xnaqʼtzaʼna qe tkʼwaʼla, ¿tiquʼn nim toklen tuʼn tten tpasensa? b) ¿Alkye tten o kubʼ kyyekʼun junjun mambʼaj kypasens?

¹⁶ Tukʼil onbʼil in tzaj tqʼoʼn xewbʼaj xjan, kukx jaku chʼiy qʼuqbʼil kykʼuʼj qe tkʼwaʼla  (Gálatas 5:22, 23). Noqtzun tuʼnj, in xi tiʼn ambʼil. Tuʼntzunju, ten tpasensa kyiʼj ex kukx xnaqʼtzanxa kye. Toj tnam Japón, jun mambʼaj tukʼil jun tkʼwaʼl ex jun tmeʼjel, tqʼama jlu: «In nel qpaʼne nim ambʼil kye junx tukʼil nxuʼjile. Tej tzmatoq tal chʼin qe, in chin xnaqʼtzane 15 minut tkyaqil qʼij kyukʼil, oʼkx qa at chmabʼil mintiʼtoq in bʼant quʼne. 15 minut nya nim te qeye ex te kye». Ax ikx kubʼ ttzʼibʼin jun Ansyan in bʼet kyojele Ja te Chmabʼil jlu: «Tej tzmatoq kʼwaʼlx qiʼne attoq nim nxjele ex mintiʼ in neltoq nnikʼe kyiʼj junjun tiʼchaq. Tej tbʼet ambʼil, nim kyxol qeju jlu e kanet tzaqʼwebʼil kyiʼj wuʼne kyoj chmabʼil, tej in chin xnaqʼtzantoqe njunalxe moqa aj qxnaqʼtzane kyukʼil toj qjaye. Tuʼntzunju, nim toklen tuʼn miʼn tkyaj kytzaqpiʼn mambʼaj tuʼn t-xi kyxnaqʼtzaʼn kykʼwaʼl».

17. a) ¿Tiquʼn nim toklen tuʼn tchʼiy qʼuqbʼil kykʼuʼj qe mambʼaj? b) ¿Alkye tten in che onin jun mejebʼleʼn kyoj isla Bermudas kyiʼj kymeʼjel tuʼn tchʼiy qʼuqbʼil kykʼuʼj tiʼj Jehová?

¹⁷ Aj tok kyqʼoʼn kywitz tkʼwaʼla tiʼja qa at nim qʼuqbʼil tkʼuʼja tiʼj Jehová, kʼonil nim kyiʼj. Kʼokel kyqʼoʼn kywitz tiʼjju in bʼant tuʼna. Tuʼntzunju, kukx qʼonka tilil tuʼn tchʼiy qʼuqbʼil tkʼuʼja ex qʼonxa ambʼil tuʼn tok kyqʼoʼn kywitz tiʼj qa ax tok Jehová te teya. Ximana tiʼj techel tiʼj jun mejebʼleʼn kyoj isla Bermudas. Aj ttzaj bʼaj kykʼuʼj tiʼj jun tiʼ, in che naʼn Dios junx kyukʼil qeju kymel ex in xi kyqanin onbʼil te Jehová. Ax ikx in xi kyqʼamaʼn kye tuʼn kynaʼn Dios te Jehová. Nya oʼkxju, ax ikx in xi kyqʼamaʼn teju tnejel kymel tuʼn tok qeʼxix tkʼuʼj tiʼj Jehová ex tuʼn tok tqʼoʼn twiʼ tiʼj Tkawbʼil Dios, ex tuʼn miʼn ttzajxix bʼaj tkʼuʼj. In tzaj kyqʼamaʼn jlu: «Aj tok tqʼoʼn twitz qmele tiʼjju tbʼanel in tzaj tuʼn jlu, in nel tnikʼ tiʼj qa in qo tzaj onine tuʼn Jehová. Tbʼanelxix tuʼnju o tzʼonin jlu tiʼj tuʼn tchʼiy qʼuqbʼil tkʼuʼj tiʼj Jehová ex tiʼj Tyol».

18. ¿Tiʼ il tiʼj tuʼn ttzaj kynaʼn mambʼaj tkyaqil maj?

¹⁸ Aqeye mambʼaj, bʼaʼn tuʼn ttzaj kynaʼne qa mlay che ok tene obligaril kyiʼj kykʼwaʼle tuʼn tten qʼuqbʼil kykʼuʼj. Jaku kux kyawaʼne ex jaku kux kyqʼoʼne aʼ t-xe jun awal, noqtzun tuʼnj, oʼkx tuʼn Jehová jaku chʼiy (1 Corintios 3:6). Tuʼntzunju, qʼonka tilil tuʼn t-xi t-xnaqʼtzaʼna kye tkʼwaʼla tiʼj Jehová ex qaninxa onbʼil te tuʼn tonin kyiʼj tukʼil xewbʼaj xjan tuʼn tten qʼuqbʼil kykʼuʼj. Jaku tzʼok qeʼ tkʼuʼja qa tzul tkʼiwlaʼn Jehová aju in bʼant tuʼna (Efesios 6:4).