1, 2. a) ¿Tiʼ nya bʼaʼn in qo ok weʼ twitz toj ambʼil jaʼlo ex tiʼ jaku bʼaj aj tbʼet ambʼil? b) ¿Tiʼ qʼuqbʼil qkʼuʼj in tzaj tqʼoʼn Isaías 41:10, 13?

TQʼAMA jun precursora regular mejebʼni tukʼil jun ansyan jlu: «Maske naqʼli qine tuʼn kukx wajbʼene te Jehová, ma tzikʼ nim abʼqʼi in nok tilil wuʼne tuʼn miʼntl ttzaj bʼaj nkʼuʼje. Tuʼn tpaj jlu, kwest tuʼn njtane, in tzaj yabʼil wiʼje ex nya toj tkyaqil ambʼil in nok nbʼinchaʼne bʼaʼn kyiʼj txqantl. At maj in kubʼ nnane qa ya mlay tzʼok tilil wuʼne».

² ¿In nelpe qnikʼ tiʼjju in kubʼ tnaʼn ermana? Bʼisbʼajil tuʼnju in qo anqʼin twitz jun txʼotxʼ jatumel in kawin Satanás. Tuʼntzunju, in kubʼ qnaʼn qa atoʼ tjaqʼ nim nya bʼaʼn. Jaku kubʼ qnaʼn bʼis ex siktlen aj ttzaj bʼaj qkʼuʼj, ex jaku qo ok ik tzeʼn jun kar in kyaj qʼeʼt toj xoqʼl ex ya mintiʼ in bʼet (Proverbios 12:25). ¿Alkye junjun tichaq jaku kubʼ qnaʼn bʼis kyuʼn? Jakulo kubʼ qnaʼn bʼis tuʼnju o kyim jun toj qja kʼujlaʼn quʼn. Moqa in tzaj yabʼil qiʼj ex qa in qo el ikʼun. Ax ikx kwestlo tuʼn t-xi qqʼoʼn aju at tajbʼen kye toj qja tuʼnju mintiʼxix pwaq at. Aj tbʼet ambʼil, jaku tzʼel tiʼn bʼis qipumal ex tzalajbʼil qe. Noqtzun tuʼnj, in tzaj tqʼuqbʼaʼn Tyol Dios qkʼuʼj qa bʼantni tten Jehová tuʼn tonin qiʼj (kyjawil uʼjit Isaías 41:10, 13).

3, 4. a) ¿Alqiʼj in yolin Tyol Dios aj tyolin tiʼj qʼabʼaj? b) ¿Alkyeqe tiʼchaq jaku tzʼel qʼinte qipumal?

 ³ At maj in najbʼen junjun tiʼchaq tok tiʼj qxmilal tuʼn Tyol Dios tuʼntzun ttzaj tqʼamaʼn junjun tmod jun xjal moqa aju in bʼant tuʼn. Jun techel, nim maj in yolin tiʼj qʼabʼaj. Aj ttzaj tqʼamaʼn Tyol Dios qa in nok qʼoʼn tipumal tqʼabʼ jun xjal, jaku yolin tiʼj aj t-xi qʼuqbʼet tkʼuʼj moqa aj t-xi qʼoʼn tipumal ex qa ya bʼantni tten tuʼn tbʼant jun tiʼ tuʼn (1 Samuel 23:16; Esdras 1:6, TNM). Ax ikx, jaku yolin tiʼj aj tten jun tbʼanel t-ximbʼetz xjal tiʼj ambʼil tzul.

⁴ Junjuntl maj, in tzaj tqʼamaʼn Tyol Dios qa in nel tipun tqʼabʼ jun xjal. A jlu in yolin tiʼj aj ttzaj tbʼis moqa aj ya mintiʼ qʼuqbʼil tkʼuʼj (2 Crónicas 15:7; Hebreos 12:12). Qa ma kubʼ qnaʼn nim siktlen moqa in kubʼ qnaʼn qa xiʼni tchewix qamiwbʼil tukʼil Jehová, tuʼn jlu jaku tzʼel tiʼn qipumal. ¿Tiʼ kʼonil qiʼj tuʼn tten qʼuqbʼil qkʼuʼj ex qipun tuʼntzun tikʼx quʼn, ex tuʼn kukx qtzalaj?

5. a) Aj kytzaj nya bʼaʼn qiʼj, ¿tiʼ jaku kubʼ qnaʼn, noqtzun tuʼnj, tiʼ bʼaʼn tuʼn ttzaj qnaʼn? b) ¿Tiʼ qo xnaqʼtzal tiʼj toj xnaqʼtzbʼil lu?

⁵ (Kjawil uʼjit Sofonías 3:16, 17). Aj kytzaj nya bʼaʼn qiʼj, mintiʼ tuʼn qtzaj xobʼ nix tuʼn ttzaj qbʼis nix tuʼn tel kyipumal qqʼabʼ. Bʼaʼn tuʼn ttzaj qnaʼn qa a Jehová Qtat ex kʼujlaʼnxix qoʼ tuʼn. Taj tuʼn tkyaj qqʼoʼn qeju tiʼchaq in tzaj bʼaj qkʼuʼj kyuʼn toj tqʼabʼ (1 Pedro 5:7). Ax ikx in qo ok tkwentin ik tzeʼn ok tkwentin qeju aj Israel. In tzaj tqʼamaʼn Tyol Dios jlu: «Aju tipumal Qman mintiʼ ma tzʼajtz tiʼj, atx tipumal tuʼn kyklete tuʼn». A jlu in tzaj tyekʼun qa bʼantni tten Jehová tuʼn tkolin kyiʼj tmajen kukx in che ajbʼen te (Isaías 59:1). Toj xnaqʼtzbʼil lu, qo xnaqʼtzal tiʼj oxe techel in yolin Tyol Dios tiʼj, aju in tzaj tyekʼun qa at tipumal Jehová ex taj tuʼn ttzaj tonin qeju tmajen aj kyok weʼ twitz nya bʼaʼn. Ex kʼelel qnikʼ tiʼj alkye tten jaku tzaj kyqʼoʼn qeju techel lu qipumal.

6, 7. ¿Tiʼ xnaqʼtzbʼil jaku tzʼel qiʼn tiʼj tej kykambʼan qeju aj Israel kyiʼj aj Amalec?

⁶ Tej otoq tzikʼ chʼin ambʼil kyetzlen qeju aj Israel toj tnam Egipto, e ok weʼ twitz nya bʼaʼn kyuʼn qeju aj qʼoj kyiʼj, aqeju aj Amalec. Xi tqʼamaʼn Moisés te jun xjal mintiʼtoq in xobʼ, aju Josué tbʼi, tuʼn tkubʼ nej kywitz tuʼntzun txi tyekʼun kybʼe toj qʼoj. Yajxitl, jax Moisés twi jun witz tukʼil Aarón, aju terman, ex Hur. Atztzu, jakutoq tzʼok kyqʼoʼn kywitz tiʼj txʼotxʼ jatumel tuʼn tok qʼoj. ¿I elpe oq tuʼnju e tzaj xobʼ? Miʼn.

⁷ Bʼant aju kyuʼn tuʼnju otoq bʼaj kyximen jun tiʼ tuʼntzun kykambʼan aj Israel kyiʼj qeju aj Amalec. Tzaj ttzyuʼn Moisés ttzeʼ Jehová kyuʼn tqʼabʼ ex e jaw tiʼn twitz kyaʼj. Akux in jaw tiʼn Moisés qeju tqʼabʼ twitz kyaʼj, tzaj tqʼoʼn Jehová kyipumal aj Israel tuʼntzun tkubʼ kyiʼj qe aj qʼoj. Noqtzun tuʼnj, tej kysikt qe tqʼabʼ Moisés ex in kubʼ tiʼntoq kubʼni, in che kambʼantoq aj qʼoj. Tuʼntzunju, jun rat e onin Aarón ex Hur tiʼj Moisés. In tzaj tqʼamaʼn Tyol  Dios lu: «Tzaj qʼiʼn jun abʼj tuʼn tkubʼ qeʼ tibʼaj. Kubʼtzun qeʼ tibʼaj. Atzunte Aarón ex Hur tzyuʼn qe tqʼabʼ Moisés kyuʼn, jun tiʼj jun tqʼabʼ ex jun tiʼj juntl. Kyjaʼtzun o kyipa tqʼabʼ tejxi tex qʼij». E kambʼan aj Israel kyiʼj aj qʼoj noq tuʼnju tzaj tqʼoʼn Jehová kyipumal (Éxodo 17:8-13).

8. a) ¿Tiʼ bʼant tuʼn aj kawil Asá tej kyok ten aj qʼoj Etiopía qʼojil kyiʼj aj Judá? b) ¿Alkye tten jaku tzʼel qkanoʼn techel kyaj tqʼoʼn Asá?

⁸ Ax ikx ajbʼen tipumal Jehová tuʼn tuʼntzun tonin kyiʼj tmajen toj ambʼil tej tanqʼin aj kawil Asá. Kqʼojiltoq Asá tukʼil Zérah aju aj Etiopía, aju in tzaj tqʼmaʼn Tyol Dios qa atzun jun kyxol qeju attoq nim kysoldad. Attoq jun millón t-soldad ex attoq nim kyojtzqibʼil. Chʼixmi kabʼe maj kybʼet t-soldad at twitzju te Asá. ¿Tiʼ bʼant tuʼn Asá? ¿Tzajpe bʼaj tkʼuʼj, tbʼis moqa tzaj t-xobʼil? ¿Mintiʼpe ten tipun? Miʼn. Jun rat naj ok ten qanil onbʼil te Jehová. Jakutoq kubʼ kyximen noq alkyexku kʼloj soldad qa mlayx che kambʼan kyiʼj qeju aj qʼoj aj Etiopía. Noqtzun tuʼnj, in tzaj tqʼamaʼn Xjan Uʼj qa «tkyaqil jaku bʼant tuʼn» Jehová (Mateo 19:26). Ajbʼen tipumal Jehová tuʼn ex «kubʼ kyiʼj aj Etiopía tuʼn Asa». Ex ajbʼen aj kawil lu tuʼn tkyaqil tkʼuʼj te Jehová toj tkyaqil tanqʼibʼil (2 Crónicas 14:8-13; 1 Reyes 15:14).

9. a) Tej tpon Nehemías toj tnam Jerusalén, ¿tiʼ ok tbʼiʼn ex tiʼ bʼant tuʼn? b) ¿Tzeʼn tzaj ttzaqʼweʼn Jehová tnaʼj Dios Nehemías?

⁹ Qo xnaqʼtzan tiʼj techel kyaj tqʼoʼn Nehemías. Tej t-xiʼ toj tnam Jerusalén, ok tbʼiʼn qa nya kyajbʼil aj qʼoj te juntl tnam tuʼn tjaw bʼinchet juntl maj muro tiʼj tnam Jerusalén. Nyatoq xqʼuqin taʼ tnam ex otoq tzaj bʼaj kykʼuʼj aj Judiy. ¿Tiʼ bʼant tuʼn Nehemías? ¿Tzaj bʼaj tkʼuʼj moqa xi tqʼoʼn ambʼil tuʼn kykubʼ tzʼaq qe tqʼabʼ? Mintiʼ. Naqʼlitoq Nehemías tuʼn t-xi tqanin onbʼil te Jehová ik tzeʼn otoq bʼant tuʼn Moisés, Asá ex junjuntl tmajen Dios. Toj ambʼil aju, ax ikx jyon Nehemías onbʼil tukʼil Jehová. Naʼn Dios, ex tzaj tzaqʼweʼn tuʼn Jehová. ¿Alkye tten? Tej tajbʼen «tipumal» tuʼn tuʼntzun ttzaj tqʼuqbʼaʼn kykʼuʼj qe aj Judiy (kjawil uʼjit Nehemías 1:10; 2:17-20; 6:9). Yajtzun qe, ¿in nokpe qeʼ qkʼuʼj tiʼj qa in najbʼen «tipumal Dios» tuʼn, tuʼn ttzaj tqʼuqbʼaʼn qkʼuʼj toj ambʼil jaʼlo?

10, 11. a) ¿Tiʼ nbʼant tuʼn Satanás tuʼn ya miʼn qajbʼen te Jehová? b) ¿Alkye tten in tzaj tqʼoʼn Jehová qipumal? c) Qʼamantza alkye tten o tzʼonin tiʼja qe xnaqʼtzbʼil in tzaj tqʼoʼn Jehová qe.

¹⁰ Mlay sikt Satanás tuʼn tok tbʼinchaʼn nya bʼaʼn qʼij. Kukx che ajbʼel yol nya ax tok kyuʼn aj kawil, qe nejenel kye okslabʼil ex qeju o tzʼel kypan kyibʼ  tiʼj axix tok tuʼn Satanás, tuʼntzun ya miʼn qajbʼen te Jehová. ¿Tiquʼn in bʼant jlu tuʼn? Tuʼnju nya tajbʼil tuʼn qpakbʼan tiʼj tbʼanel tqanil tiʼj Tkawbʼil Jehová, noqtzun tuʼnj, tajbʼil ex jaku tzʼonin Jehová qiʼj. In tzaj tqʼoʼn qipumal tuʼn xewbʼaj xjan (1 Crónicas 29:12). Tuʼn tkubʼ tiʼj Satanás ex tiʼjju tokx tjaqʼ tkawbʼil quʼn, ilxix tiʼj tuʼn t-xi qqanin xewbʼaj xjan te Jehová (Salmo 18:39; 1 Corintios 10:13). Ax ikx in tzaj tqʼoʼn Jehová qipumal tuʼn Tuʼjil Tyol ex tuʼn jlu in xi qqʼoʼn chjonte te. Nya oʼkxju, bʼaʼn tuʼn qximen tiʼj tkyaqil xnaqʼtzbʼil in neʼl qnikʼ tiʼj kyoj quʼj in che etz junjun xjaw. Ax ikx, bʼaʼn tuʼn ttzaj qnaʼn aju in tzaj tqʼamaʼn Zacarías 8:9, 13 (kjawil uʼjit). Tzaj qʼamaʼn qe yol lu akux in jaw bʼinchet juntl maj muro tiʼj tnam Jerusalén, noqtzun tuʼnj, kukx jaku tzaj kyqʼuqbʼaʼn qkʼuʼj.

¹¹ Ax ikx in tzaj tqʼoʼn Jehová qipumal kyoj chmabʼil, qe nimaq chmabʼil ex kyoj qeju xnaqʼtzbʼil in tzaj tqʼoʼn ttnam. Ex kyuʼn jlu in qo ajbʼen tuʼn tkyaqil qkʼuʼj te Jehová, in nok qqʼoʼn tilil tuʼn qajbʼen mas te ex tuʼn tkubʼ qbʼinchaʼn qe aqʼuntl in tzaj tqanin qe (Salmo 119:32). ¿In nokpe tilil quʼn tuʼn kyajbʼen kykyaqil onbʼil in tzaj tqʼon Jehová qe?

12. ¿Tiʼ kbʼantel quʼn tuʼntzun tten qipumal?

¹² Ik tzeʼn ma qo xnaqʼtzan tiʼj, onin Jehová kyiʼj tmajen tuʼn tkubʼ kyiʼj aj Amalec ex qe aj Etiopía. Nya oʼkxju, ax ikx xi tqʼoʼn tipumal Nehemías ex qe aj Judiy tuʼntzun kyjaw bʼinchet juntl maj muro tiʼj tnam Jerusalén. Ax ikx toj ambʼil jaʼlo, tzul tqʼoʼn Jehová qipumal tuʼn kukx qpakbʼan maske in tzaj bʼaj qkʼuʼj kyiʼj junjun tiʼchaq moqa tuʼnju nya kyajbʼil xjal tuʼn qok kybʼiʼn (1 Pedro 5:10). Ax tok, mlay bʼant jun milagr tuʼn Jehová tuʼn kykubʼ naj qeju nya bʼaʼn in che tzaj qiʼj. Qa qajbʼil tuʼn tten qipumal, il tiʼj tuʼn qaqʼunan tiʼj. ¿Tiʼ kbʼantel quʼn? Il tiʼj tuʼn quʼjin Tyol Dios tkyaqil qʼij, tuʼn tbʼaj qbʼinchaʼn qten kyiʼj chmabʼil ex tuʼn qbʼet kyoj, ax ikx kxel qqʼoʼn ambʼil te Jehová kyukʼil toj qja. Miʼn txi qqʼoʼn ambʼil kye qe tiʼchaq jaku tzʼel kyiʼn ambʼil qe tuʼn tajbʼenxix quʼn aju onbʼil in tzaj tqʼoʼn Jehová qe. Qa in kubʼ qnaʼn qa mintiʼxix in nok tilil quʼn kyoj junjun aqʼuntl in bʼant quʼn te Jehová, bʼaʼn tuʼn t-xi qqanin onbʼil te. Qa ma bʼant jlu quʼn kʼelel qnikʼ tiʼj alkye tten in tzaj tqʼoʼn xewbʼaj xjan qipumal tuʼntzun tkubʼ qbʼinchaʼn tajbʼil Jehová (Filipenses 2:13). Yajtzun qe, ¿jakupe txi qqʼoʼn kyipumal txqantl?

13, 14. a) ¿Tiʼ onin tiʼj jun erman aju o kyim t-xuʼjil tuʼntzun tten tipumal? b) ¿Tiʼ jaku bʼant quʼn tuʼntzun t-xi qqʼoʼn kyipumal txqantl?

¹³ In tzaj tqʼoʼn Jehová nim millón qerman twitz tkyaqil Txʼotxʼ, aqeju in che ximen qiʼj ex jaku tzaj kyqʼuqbʼaʼn qkʼuʼj. Tqʼama apóstol Pablo jlu: «Kynuqpinxe kyqʼabʼe aju nneʼl jilj, ex kykyuwsame kyqane mintiʼ tipun. Che bʼete tuj jun bʼe jiqun tiʼj tuʼntzun miʼn tetz jolpaj kyqane» (Hebreos 12:12, 13). Nim kyxol qeju tnejel okslal xi kykʼamoʼn onbʼil kyukʼil erman ik tzeʼn  jlu. Chʼixmi ax jlu in bʼaj jaʼlo. Qbʼinx aju bʼaj tiʼj jun erman kyim t-xuʼjil ex e tzaj txqantl nya bʼaʼn tiʼj. Tqʼama jlu: «El nnikʼe tiʼj qa mlay bʼant tuʼn tjaw qjyoʼn alkyeqe joybʼil qo ikʼel kyoj nix jtoj tuʼn kyikʼ ex jteʼ maj che ul. Toj nwitze, o tzʼok naʼj Dios ex aju tuʼn qxnaqʼtzan tiʼj Tyol Dios qjunalx ik tzeʼn jun chaleco salvadidas, ex atzun jlu o tzʼonin wiʼje tuʼn miʼn nkubʼ numje. Nya oʼkxju, o tzaj qʼuqbʼaʼn nkʼuʼje tuʼn onbʼil in tzaj kyqʼoʼn erman weye. Ax ikx o tzʼel nnikʼe tiʼj qa nim toklen tuʼn tten jun tbʼanel qamiw tukʼil Jehová naʼmxtoq kytzaj nya bʼaʼn qiʼj».

¹⁴ Xi tqʼoʼn Aarón ex Hur tipumal Moisés tej tkubʼ kytzyuʼn qe tqʼabʼ akux in nok qʼoj kyukʼil aj Amalec. Ax ikx qe, bʼaʼn tuʼn t-xi qjyoʼn tumel tuʼn t-xi qqʼoʼn kyipumal txqantl ex tuʼn qonin kyiʼj. Jun techel, jaku txi qqʼoʼn kyipumal erman ma che tijen, qeju in tzaj yabʼil kyiʼj, qeju in che el ikʼun kyuʼn toj kyja, qeju kyjunalx ateʼ moqa aʼyeju o kyim jun toj kyja. Ax ikx jaku txi qqʼoʼn kyipumal kuʼxun tuʼnju in nok tilil kyuʼn xjal tuʼn kubʼ kybʼinchaʼn junjun nya bʼaʼn tuʼntzun kytzalaj tiʼjju twitz txʼotxʼ (1 Tesalonicenses 3:1-3; 5:11, 14). Ax ikx, bʼaʼn tuʼn t-xi qjyoʼn tumel tuʼn qonin tuʼn tkyaqil qkʼuʼj kyiʼj txqantl aj qpon toj Ja te Chmabʼil, toj pakbʼabʼil, aj qwaʼn junx moqa aj qxi yolin toj yolbʼil kyukʼil.

15. ¿Alkye tten jaku che onin qeju tbʼanel qyol kyiʼj txqantl?

 ¹⁵ Tej otoqxi kubʼ kyiʼj soldad aj Etiopía tuʼn Asá, xi tqʼuqbʼaʼn Azarías aju t-sanjel Dios tkʼuʼj Asá ex qeju xjal kyukʼil qeju yol lu: «Tenx kyipune ex miʼn che kubʼ numje, porque ok kykʼmaʼye chojbʼil tiʼj kyaqʼunbʼene» (2 Crónicas 15:7). Noq tuʼn qeju tbʼanel yol lu, bʼant nim chʼixpubʼil tuʼn Asá tuʼntzun kyajbʼen xjal toj tumel te Jehová. Chʼixmi axju jaku bʼant quʼn, jaku txi qqʼuqbʼaʼn kykʼuʼj txqantl kyukʼil qeju tbʼanel qyol ex jaku qo onin kyiʼj tuʼn kukx kyajbʼen te Jehová (Proverbios 15:23). Ax ikx, bʼaʼn tuʼn ttzaj qnaʼn qa jaku tzʼok kyipumal erman kyuʼn qeju tbʼanel qyol kyoj chmabʼil.

16. a) ¿Alkye tten jaku tzʼel kykanoʼn ansyan techel kyaj tqʼoʼn Nehemías? b) Qʼmantza alkye tten o che onin erman tiʼja.

¹⁶ Noq tuʼn tonbʼil Jehová, ten tipumal Nehemías ex qeju aj Judiy tuʼn tjaw kybʼinchaʼn juntl maj qeju muro tiʼj tnam Jerusalén toj 52 qʼij (Nehemías 2:18; 6:15, 16). Noqtzun tuʼnj, akux in che aqʼunan txqantl mintiʼ kubʼ ten Nehemías keʼyil kye tuʼnju ax ikx te ok ten aqʼunal (Nehemías 5:16). Nim ansyan in nel kykanoʼn techel kyaj tqʼoʼn Nehemías, in bʼant jlu kyuʼn aj in che onin tuʼn kyjaw bʼinchet Ja te Chmabʼil, tuʼn kybʼaj saqet moqa tuʼn kybʼaj bʼinchet chʼintl. Ex tuʼnju kykʼujlabʼil at kyiʼj erman, ax ikx in xi kyqʼoʼn kyipumal aj in chex visitaril kye aj ttzaj nya bʼaʼn kyiʼj moqa aj kypakbʼan junx kyukʼil (kjawil uʼjit Isaías 35:3, 4).

17, 18. ¿Alqiʼj jaku tzʼok qeʼ qkʼuʼj qa ma qo ok weʼ kywitz nya bʼaʼn moqa in kubʼ qnaʼn qa in qo bʼisun?

¹⁷ Aj qaqʼunan kyukʼil erman, in nonin qiʼj tuʼn tten mujbʼabʼil qxol ex tuʼn kukx tok qamiwin qibʼ kyukʼil. Ax ikx in nok qeʼ qkʼuʼj kyiʼj qeju kʼiwlabʼil tzul tqʼoʼn Jehová qe tjaqʼ Tkawbʼil toj chʼintl ambʼil. Aj t-xi qqʼoʼn kyipumal txqantl, in qo onin kyiʼj tuʼn tikʼx qeju nya bʼaʼn kyuʼn ex tuʼn tten jun tbʼanel kyximbʼetz tiʼj ambʼil tzul. Ax ikx in tzaj tqʼoʼn jlu qipumal ex in qo tzaj tonin tuʼn tok qqʼoʼn qwiʼ tiʼjju ambʼil tzul.

¹⁸ Aj qximen tiʼj alkye tten onin ex xqʼuqin Jehová kyiʼj tmajen toj ambʼil ojtxi, in chʼiy mas qʼuqbʼil qkʼuʼj. Tuʼntzunju, aj kytzaj nya bʼaʼn qiʼj moqa in kubʼ qnaʼn qa in qo bʼisun, miʼn txi qqʼoʼn ambʼil tuʼn qkubʼ numj. Jaku tzʼok qeʼ qkʼuʼj tiʼj qa ma txi qqanin onbʼil te Jehová tzul tqʼoʼn qipumal ex toj chʼintl ambʼil tzul tqʼoʼn ambʼil qe tuʼn tok qqʼoʼn qwitz kyiʼj kʼiwlabʼil tjaqʼ Tkawbʼil (Salmo 73:23, 24).