1, 2. ¿Alkyeqe tiʼchaq in nok tilil kyuʼn tmajen Jehová tuʼn kykubʼ tiʼj kyuʼn?

KYKYAQIL qeju kukx in che ajbʼen te Jehová, in nok tilil kyuʼn tuʼn kukx kyajbʼen te atxix tej tten Abel, ax ikx toj ambʼil jaʼlo. Xi tqʼamaʼn apóstol Pablo kye okslal aj Hebreo qa otoq tzikʼx nim yajbʼil kyuʼn ex qa otoq tzʼok tilil kyuʼn tuʼn ttzaj kykʼamoʼn tkʼiwlabʼil Jehová (Hebreos 10:32-34). Ok tmojbʼaʼn Pablo tej tok tilil kyuʼn okslal tukʼilju in bʼanttoq kyuʼn qeju xjal in che ojqelan, in che boxearin ex qeju luchador toj ojtxi tnam Grecia (Hebreos 12:1, 4). Toj ambʼil jaʼlo, in che ojqelan okslal tojju bʼe in xi tiʼn toj chwinqlal te jumajx. Noqtzun tuʼnj, ateʼ aj qʼoj qiʼj, aqeju kyajbʼil tuʼn ya miʼn qtzalaj, tuʼn miʼn tok qqʼoʼn qwiʼ tiʼj qbʼe ex tiʼjju in tzaj ttziyen Jehová qe toj ambʼil tzul.

² Aju mas kwest tuʼn tkubʼ tiʼj quʼn, a Satanás ex aju tokx tjaqʼ tkawbʼil (Efesios 6:12). Nimxix toklen tuʼn miʼn t-xi qqʼoʼn ambʼil tuʼn qkubʼ sbʼuʼn, tuʼn miʼn tok qqʼoʼn qwiʼ kyiʼj xnaqʼtzbʼil te twitz txʼotxʼ ex kyiʼj qeju nya bʼaʼn ik tzeʼn yaẍbʼil, sichʼ, kʼaj qʼeʼn ex droga. Ax ikx il tiʼj tuʼn tok tilil quʼn tuʼn miʼn qkubʼ tuʼn bʼis  ex kyuʼn qeju tiʼchaq jun rat in kubʼ qiʼj kyuʼn (2 Corintios 10:3-6; Colosenses 3:5-9).

3. ¿Tiʼ in najbʼen tuʼn Jehová tuʼn qtzaj t-xnaqʼtzaʼn tuʼntzun tkubʼ kyiʼj aj qʼoj quʼn?

³ ¿Axpe tok jaku kubʼ kyiʼj qeju aj qʼoj quʼn? Jaku, noqtzun tuʼnj, kwest tuʼn tkubʼ kyiʼj. Ok tqʼoʼn tibʼ Pablo ik tzeʼn jun boxeador tej tqʼama jlu: «Mintiʼ in chin el takje tiʼj; ikxtzun in chin sweltyine, mintiʼ in chin bʼujine tuj kyqʼiqʼ» (1 Corintios 9:26). Il tiʼj tuʼn tok tilil quʼn tuʼn kykubʼ kyiʼj qe aj qʼoj quʼn ik tzeʼn in bʼant tuʼn jun boxeador, in qo tzaj tonin Jehová ex in qo tzaj t-xnaqʼtzaʼn tiʼj jlu. ¿Alkye tten in bʼant tuʼn? In najbʼen Xjan Uʼj tuʼn, qeju uʼj, qeju chmabʼil ex qeju nimaq chmabʼil. ¿In che ajbʼenpe tkyaqil tiʼchaq quʼn aju in tzaj tqʼoʼn Jehová tuʼntzun qtzaj t-xnaqʼtzaʼn? Qa mintiʼ in che ajbʼen quʼn, mintiʼ in bʼant tkyaqil quʼn tuʼntzun tkubʼ kyiʼj qe aj qʼoj. In qo ok ik tzeʼn jun boxeador in qʼojin toj kyqʼiqʼ.

4. ¿Tiʼ jaku bʼant quʼn tuʼntzun miʼn tkubʼ qiʼj tuʼn nya bʼaʼn?

⁴ Il tiʼj tuʼn tok qxqʼuqin qibʼ. ¿Tiquʼn? Tuʼnju jaku che ok tzoqpaj qe aj qʼoj qiʼj toj jun ambʼil mintiʼ in qo yon tiʼj moqa aj mintiʼ qipumal. In tzaj tqʼamaʼn Tyol Dios lu ex in qo tzaj tonin kyukʼil qeju yol lu: «Miʼnwt kubʼ tiʼja tuʼnju mya bʼaʼn, noq oʼkx tuʼn tkubʼ tiʼj mya bʼaʼn tuʼna tuʼnju tbʼinchbʼena bʼaʼn» (Romanos 12:21). A jlu in tzaj tyekʼun qa kukx ma tzʼok tilil quʼn, jaku kubʼ tiʼj nya bʼaʼn quʼn. Noqtzun tuʼnj, qa mintiʼ ma tzʼok qxqʼuqin qibʼ ex qa mintiʼ ma tzʼok tilil quʼn, jakulo kubʼ qiʼj tuʼn Satanás, tuʼnju tokx tjaqʼ tkawbʼil ex kyuʼn qeju tiʼchaq jun rat in kubʼ qiʼj kyuʼn. Tuʼntzunju, miʼn txi qqʼoʼn ambʼil tuʼn qkubʼ numj ex tuʼn tel qipumal (1 Pedro 5:9).

5. a) Qa qajbʼil tuʼn qtzaj tkʼiwlaʼn Jehová, ¿tiʼ il tiʼj tuʼn ttzaj qnaʼn? b) ¿Alkyeqe xjal in yolin Tyol Dios kyiʼj qo xnaqʼtzal tiʼj toj xnaqʼtzbʼil lu?

⁵ Qa qajbʼil tuʼn qkambʼan, il tiʼj tuʼn ttzaj qnaʼn tiquʼn in nok tilil quʼn. In bʼant jlu quʼn tuʼnju qajbʼil tuʼn qtzaj tkʼiwlaʼn Jehová. In tzaj tqʼamaʼn Hebreos 11:6 jlu: «Qa taj xjal tuʼn tpon laqʼeʼ ttxlaj Dios, ilxix tiʼj tuʼn tokslan qa at Dios, ex qa a Dios in tzaj qʼonte jun oyaj kye qeju in che jyon tiʼj». Tuʼntzunju, qa qajbʼil tuʼn qtzaj tkʼiwlaʼn Jehová il tiʼj tuʼn tok tilil quʼn (Hechos 15:17). In yolin Tyol Dios kyiʼj nim xinaq ex xuʼj ok tilil kyuʼn tuʼn tkyaqil kykʼuʼj. Junjun kyxol qe jlu ten Jacob, Raquel, José ex Pablo. Kykyaqil e ikʼ toj ambʼil kwest ex kubʼ kynaʼn siktlen. Noqtzun tuʼnj, tuʼnju ok tilil kyuʼn e tzaj kʼiwlaʼn tuʼn Jehová. Aqeju techel lu in tzaj kyyekʼun qa ax ikx qo tzajel tkʼiwlaʼn Jehová qa ma tzʼok tilil quʼn. Qo xnaqʼtzan tiʼj alkye tten jaku tzʼel qkanoʼn kyiʼj techel lu.

6. a) ¿Tiquʼn mintiʼ sikt Jacob tuʼn tok tilil tuʼn? b) ¿Tiʼ oyaj tzaj tkʼamoʼn Jacob? (Qʼonka twitza tiʼj tnejel tilbʼilal).

⁶ Kukx ajbʼen Jacob te Jehová ex mintiʼ sikt tej tok tilil tuʼn. ¿Tiquʼn? Tuʼnju kʼujlaʼntoq Jehová tuʼn ex ok tqʼoʼn nim toklen tamiwbʼil tukʼil. Ok qeʼ tkʼuʼj tiʼj ttziybʼil Jehová qa tuʼn ttzajtoq tkʼiwlaʼn qeju tiyjil, moqa tyajil (Génesis 28:3, 4). Tej qʼiʼntoq junlo 100 abʼqʼi tuʼn Jacob, qʼojin, moqa maʼlin, tukʼil jun anjel tuʼntzun ttzaj kʼiwlaʼn tuʼn Jehová (kjawil uʼjit Génesis 32:24-28). ¿Tiquʼn qʼojin tukʼil jun anjel? Nya tuʼnju attoq nim tipumal. Bʼant jlu tuʼn tuʼnju kubʼ t-ximen tuʼn tok tilil tuʼn tuʼntzun ttzaj kʼiwlaʼn  tuʼn Jehová. Ex kambʼan. Tzaj kʼiwlaʼn tuʼn Jehová tuʼnju kukx ok tilil tuʼn. Tuʼntzunju, ok qʼoʼn tbʼi te Israel, a t-xilen bʼibʼaj lu, «in qʼojin tukʼil Dios». Tzaj tqʼoʼn Jehová oyaj te tej ttzaj kʼiwlaʼn tuʼn. Atzun oyaj lu qajbʼil tuʼn ttzaj qʼoʼn qe.

7. a) ¿Alkye bʼis tzaj toj tanqʼibʼil Raquel? b) ¿Tiʼ bʼant tuʼn Raquel ex tiʼ kʼiwlabʼil tzaj tkʼamoʼn?

⁷ A Raquel ok te t-xuʼjil Jacob. Ax ikx te tajbʼiltoq tuʼn tok tqʼoʼn twitz tiʼj alkye tten tuʼn tjapun twiʼ tyol Jehová tuʼn aju otoq t-xi ttziyin te tchmil. Noqtzun tuʼnj, attoq jun nya bʼaʼn. Mintiʼ bʼant tuʼn tul tal Raquel, bʼisbʼajil jlu kye xuʼj toj ambʼil ojtxi. ¿Tiʼ bʼant tuʼn Raquel toj ambʼil aju? Mintiʼ naj qʼuqbʼil tkʼuʼj. Naʼn Dios jun ex juntl maj te Jehová tuʼntzun kukx tok tilil tuʼn. Tzaj tbʼiʼn Jehová Raquel tej tkubʼsan twitz ex tej tbʼet ambʼil, tzaj kʼiwlaʼn tej kyul itzʼji qe tal. Tuʼntzunju, tqʼama jun maj qa otoq tzʼok tilil tuʼn tuʼn tkyaqil tipumal. Ex tqʼamatl jlu: «Ma kubʼ tiʼj wuʼne» (Génesis 30:8, 20-24).

8. a) ¿Tiʼ nya bʼaʼn tzaj tiʼj José? b) ¿Tiʼ xnaqʼtzbʼil in tzaj tqʼoʼn qe aju tbʼanel techel kyaj tqʼoʼn José?

⁸ Aju yekʼbʼil tiʼj qʼuqbʼil tkʼuʼj Jacob ex Raquel oninlo tiʼj kykʼwaʼl, aju José tbʼi, tuʼn tex kywitz nya bʼaʼn ok weʼ twitz toj tanqʼibʼil. Tej qʼiʼntoq 17 abʼqʼi tuʼn José, chʼexpaj tanqʼibʼil te jumajx. Xi kʼayin kyuʼn terman te majen tuʼnju attoq kyqʼoj tiʼj. Tej tbʼet mas ambʼil, ten José nim abʼqʼi toj cárcel toj tnam Egipto maske mintiʼ til (Génesis 37:23-28; 39:7-9, 20, 21). Noqtzun tuʼnj, mintiʼ tzaj bʼaj tkʼuʼj, mintiʼ tzaj tbʼis ex mintiʼ kubʼ t-ximen tuʼn taj tqʼoʼn t-xel nya bʼaʼn. ¿Tiquʼn? Tuʼnju oʼkx ok tqʼoʼn twiʼ tiʼj tamiwbʼil tukʼil Jehová (Levítico 19:18; Romanos 12:17-21). Aju techel kyaj tqʼoʼn José in tzaj tyekʼun qe tuʼn kux tok tilil quʼn, maske kwest qanqʼibʼil ten tej qtzaj chʼiy moqa in kubʼ qximen qa mintiʼ in kanet tumel tuʼn  kykyaj nya bʼaʼn toj ttxolil. Noqtzun tuʼnj, jaku tzʼok qeʼ qkʼuʼj tiʼj qa tzul tkʼiwlaʼn Jehová qoʼ qa kukx ma tzʼok tilil quʼn (kjawil uʼjit Génesis 39:21-23).

9. ¿Alkye tten kukx jaku tzʼel qkanoʼn techel kyaj tqʼoʼn Jacob, Raquel ex José?

⁹ Axlo ikx qe il-lo tiʼj tuʼn tikʼx junjun nya bʼaʼn quʼn. Bʼalo in qo bʼisun tuʼnju in nok bʼinchaʼn nya bʼaʼn qiʼj, in qo el ikʼun, in che xmayin txqantl qiʼj moqa in qʼojin jun xjal qiʼj. Noqtzun tuʼnj, miʼn tzaj bʼaj qkʼuʼj. Bʼaʼn tuʼn ttzaj qnaʼn tiʼ onin tiʼj Jacob, Raquel ex José tuʼn kukx kytzalaj tiʼj kyajbʼebʼil te Jehová. Ok kyqʼoʼn nim toklen aju kyamiwbʼil tukʼil Jehová ex tuʼntzunju tzaj tqʼoʼn kyipumal ex e tzaj tkʼiwlaʼn. Aqeju tmajen Jehová lu kukx ok tilil kyuʼn ex kubʼ kybʼinchaʼn aju xi kyqanin toj kynaʼj Dios. In qo anqʼin kyoj bʼajsbʼil tqʼijlalil, tuʼntzunju, nim toklen tuʼn tten nim qʼuqbʼil qkʼuʼj toj ambʼil tzul. ¿Kukxpe kʼokel tilil quʼn tuʼntzun qtzaj tkʼiwlaʼn Jehová?

10, 11. a) ¿Tiquʼn il tiʼj tuʼn tok tilil quʼn tuʼn ttzaj qkʼamoʼn tkʼiwlabʼil Jehová? b) ¿Tiʼ kʼonil qiʼj tuʼn tjaw qjyoʼn aju mas tbʼanel?

¹⁰ ¿Tiquʼn il tiʼj tuʼn tok tilil quʼn tuʼn ttzaj qkʼamoʼn tkʼiwlabʼil Jehová? At nim tiquʼn. Ateʼ junjun okslal in nok tilil kyuʼn tuʼn tkubʼ tiʼj jun nya bʼaʼn achbʼil kyuʼn. Junjuntl in nok tilil kyuʼn tuʼn tten tbʼanel kyximbʼetz tiʼj pakbʼabʼil ex junjuntl in nok tilil kyuʼn tuʼnju yabʼ qe moqa in kubʼ kynaʼn qa kyjunalx ateʼ. Nya oʼkxju, ax ikx ateʼ junjuntl kwest in nela toj kywitz tuʼn tkubʼ kynajsaʼn kyil qeju in nok kybʼinchaʼn nya bʼaʼn kyiʼj. Noq jniʼxku ambʼil in qo ajbʼen te Jehová, qkyaqilx il tiʼj tuʼn tok tilil quʼn tuʼn tkubʼ kyiʼj junjun nya bʼaʼn quʼn, aʼyeju mintiʼ in che onin qiʼj tuʼn qajbʼenxix te Jehová. Bʼaʼn tuʼn ttzaj qnaʼn qa in tzaj tqʼoʼn Jehová oyaj kye qeju kukx in che ajbʼen te.

¹¹ Ax tok, atlo maj kwest tuʼn qok te okslal ex tuʼn tjaw qjyoʼn aju mas bʼaʼn, mas qa in nok tilil quʼn tuʼn tkubʼ tiʼj jun nya bʼaʼn qajbʼil (Jeremías 17:9). Qa a jlu in bʼaj qiʼj, bʼaʼn tuʼn t-xi qqanin te Jehová tuʼn ttzaj tqʼoʼn xewbʼaj xjan qe. Jaku tzaj tqʼoʼn naʼj Dios ex xewbʼaj xjan qipumal tuʼn tkubʼ qbʼinchaʼn aju bʼaʼn. Iktzun tten tzul qkʼamoʼn tkʼiwlabʼil Jehová. Ex bʼaʼn tuʼn tkubʼ qbʼinchaʼn aju in xi qqanin toj qnaʼj Dios. Tzʼok tililxix quʼn tuʼn quʼjin tiʼj Tyol Dios tkyaqil qʼij ex qpaʼmil ambʼil tuʼn qxnaqʼtzan tiʼj qjunalx, ex tiʼjju ambʼil in xi qqʼoʼn te Jehová kyukʼil qeju toj qja (kjawil uʼjit Salmo 119:32).

12, 13. ¿Tiʼ onin kyiʼj kabʼe okslal tuʼn tkubʼ tiʼjju nya bʼaʼn kyajbʼil?

¹² Ateʼ nim erman o kubʼ tiʼj nya bʼaʼn kyximbʼetz tuʼn tonbʼil Tyol Dios, xewbʼaj xjan ex qeju uʼj. Jaw tuʼjin jun kuʼxun aju xnaqʼtzbʼil «¿Cómo puede usted resistirse a los malos deseos?» toj uʼj ¡Despertad! te 8 te diciembre te 2003. ¿Tiʼ kubʼ tnaʼn tuʼn jlu? In tzaj tqʼamaʼn jlu: «In nok tilil wuʼne tuʼn tkubʼ kyiʼj nya bʼaʼn nximbʼetze. Tej tjaw wuʼjine toj xnaqʼtzbʼil qa ‹kwest tuʼn tkubʼ kyiʼj qeju nya bʼaʼn qajbʼil toj kywitz txqantl›, tuʼn jlu kubʼ nnaʼne qa at qiʼne kyxol nim erman twitz tkyaqil Txʼotxʼ ex nya njunalxe atine». Ax ikx etz tiʼn kuʼxun lu tbʼanel tojju xnaqʼtzbʼil «¿Aprueba Dios los estilos de vida alternativos?», aju etz toj uʼj ¡Despertad! te 8 te octubre te 2003. Tojju xnaqʼtzbʼil lu el tnikʼ tiʼj qa toj kywitz junjun okslal, in nok aju in nok tilil kyuʼn ik tzeʼn «jun chʼiʼx tuj» kyxmilal  (2 Corintios 12:7). Noqtzun tuʼnj, ax ikx el tnikʼ tiʼj qa in nok tilil kyuʼn okslal lu tuʼn tten jun kymod saq ex attoq jun tbʼanel kyximbʼetz tiʼj ambʼil tzul. Ex tqʼamatl kuʼxun jlu: «Tuʼntzunju, in kubʼ nximane qa aj tex junjun qʼij kukx jaku chin ajbʼene te Jehová. In xi nqʼoʼne nimxix chjonte te tuʼnju in tzaj tqʼoʼn ttnam tuʼn tonin wiʼje tuʼn wexe kywitz nya bʼaʼn toj ambʼil jaʼlo».

¹³ Ax ikx bʼaʼn tuʼn t-xi qbʼiʼn aju ikʼ tiʼj jun ermana te Estados Unidos. Kubʼ ttzʼibʼin ermana jlu: «In xi nqʼoʼne chjonte kyeye tuʼnju kukx in tzaj kyqʼoʼne xnaqʼtzbʼil qeye tojxix ambʼil. Nim maj in kubʼ nnaʼne qa in kubʼ kytzʼibʼene xnaqʼtzbʼil lu oʼkx te weye. Kyoj nim abʼqʼi, kukx in nok tilil wuʼne tuʼn tkubʼ tiʼj jun nya bʼaʼn aju ikʼun tuʼn Jehová. At maj in kubʼ nnaʼne qa ya mintiʼ wipune ex in kubʼ nximane tuʼn miʼn tok tilil wuʼne. Ojtzqiʼn wuʼne qa at qʼaqʼbʼil tkʼuʼj Jehová ex in kubʼ tnajsaʼn qil, noqtzun tuʼnj, in kubʼ nnaʼne qa mintiʼ woklene tuʼn ttzaj tqʼoʼn onbʼil weye tuʼnju at nya bʼaʼn nximbʼetze ex kwest tuʼn tel wikʼune. Tuʼnju in nok tilil wuʼne, o tzaj tiʼn nim tiʼchaq toj wanqʼibʼile». Ex jawtzun tuʼjin aju xnaqʼtzbʼil «¿Está su corazón dispuesto a conocer a Jehová?», toj uʼj La Atalaya te 15 te marzo te 2013. ¿Tiʼ kubʼ tnaʼn yajxitl? Tqʼamatl jlu: «Elxix nnikʼe tiʼj qa tajbʼil Jehová tuʼn tonin wiʼje».

14. a) ¿Tiʼ ojtzqiʼntoq tuʼn Pablo? b) ¿Alkye tten jaku kubʼ kyiʼj qe tiʼchaq jun rat in qo kubʼ kyuʼn?

¹⁴ (Kjawil uʼjit Romanos 7:21-25). Ojtzqiʼntoq tuʼn Pablo qa kwest tuʼn tkubʼ kyiʼj nya bʼaʼn qajbʼil ex kyiʼj qeju tiʼchaq jun rat in kubʼ qiʼj kyuʼn. Noqtzun tuʼnj, qʼuqlitoq tkʼuʼj tiʼj qa jaku kubʼ kyiʼj tuʼn qa ma naʼntoq Dios, qa ma tzʼok qeʼ tkʼuʼj tiʼj tonbʼil Jehová ex tiʼj chojbʼil bʼant tuʼn Jesús. ¿Yajtzun qe? ¿Jakupe kubʼ kyiʼj qeju tiʼchaq jun rat in kubʼ qiʼj kyuʼn? Jaku kubʼ kyiʼj quʼn qa ma tzʼel qkanoʼn techel kyaj tqʼoʼn Pablo, qa ma tzʼok qeʼ qkʼuʼj tiʼj chojbʼil ex qa ma tzʼok qeʼ qkʼuʼj tiʼj Jehová ex nya tuʼn tok qeʼ qkʼuʼj qiʼjx.

15. ¿Alkye tten in qo tzaj tonin Jehová tuʼn kukx qajbʼen te ex tuʼn kyikʼx qe nya bʼaʼn quʼn?

¹⁵ At maj jaku tzaj tqʼoʼn Jehová ambʼil tuʼntzun tkubʼ qyekʼun jniʼ in tzaj bʼaj qkʼuʼj tiʼj jun tiʼ. Jun techel, ¿tiʼ kbʼantel quʼn qa ma tzaj jun yabʼil tiʼj jun toj qja moqa ma tzʼok bʼinchaʼn jun nya bʼaʼn tiʼj? ¿Ex tiʼ kbʼantel quʼn qa ma tzaj jlu qiʼj? Qa qʼuqlixix qkʼuʼj tiʼj Jehová, kxel qqanin qipumal tuʼn kukx qajbʼen te ex tuʼn kukx qtzalaj tiʼj qajbʼebʼil te, ex tiʼj qamiwbʼil tukʼil (Filipenses 4:13). Aqeju techel kyaj kyqʼoʼn okslal toj ambʼil ojtxi ex toj ambʼil jaʼlo, in tzaj kyyekʼun qa in tzaj tqʼoʼn Jehová qipumal aj qnaʼn Dios ex in tzaj tqʼoʼn qipumal tuʼn kukx tikʼx quʼn.

16, 17. ¿Tiʼ bʼaʼn tuʼn tkubʼ qximen?

¹⁶ Tajbʼilxix Satanás tuʼn ttzaj qbʼis, tuʼn qkubʼ numj ex tuʼn tel qipumal. Tuʼntzunju, bʼaʼn tuʼn tkubʼ qximen tuʼn kukx tkubʼ qbʼinchaʼn «aju bʼaʼn» (1 Tesalonicenses 5:21). Jaku kubʼ tiʼj Satanás quʼn, tiʼjju tokx tjaqʼ tkawbʼil ex tiʼj alkyexku nya bʼaʼn qajbʼil. Kbʼel tiʼj quʼn qa ma tzʼok qeʼ qkʼuʼj tiʼj qa tzul tqʼoʼn Jehová qipumal ex qa tzul tonin qoʼ (2 Corintios 4:7-9; Gálatas 6:9).

¹⁷ Tuʼntzunju, kukx tzʼok tilil quʼn ex miʼn qo kubʼ numj. Jaku tzʼok qeʼ qkʼuʼj tiʼj qa tzul tqʼoʼn Jehová ‹nimxix t-xtalbʼil›, moqa kʼiwlabʼil qe (Malaquías 3:10).