1, 2. a) ¿Tiquʼn mintiʼ tuʼn qjaw kaʼyin tiʼj aj tel qʼiʼn ambʼil qe tuʼn tbʼant tajbʼil Jehová quʼn? b) ¿Tiʼ kʼelel qnikʼ tiʼj toj xnaqʼtzbʼil lu?

TOJ abʼqʼi 2018 attoq mas te 223,000 pakbʼal in che anqʼintoq kyoj lugar jatumel o tzʼel qʼiʼn ambʼil qe tuʼn qpakbʼan ex tuʼn tok qchmon qibʼ. Mintiʼ tuʼn qjaw kaʼyin tiʼj jlu, tuʼnju ojtzqiʼn quʼn qa qo elel ikʼun ik tzeʼn el qnikʼ tiʼj toj xnaqʼtzbʼil o kyaj (2 Tim. 3:12). Noq jaxku tumel in qo anqʼin, noq minabʼen jaku tzaj kyqʼamaʼn aj kawil qe tuʼn ya miʼn qajbʼen te Jehová.

² Qa ma tzaj kyqʼamaʼn aj kawil tuʼn ya miʼn qpakbʼan nix tuʼn tok qchmon qibʼ, jakulo kubʼ qxjelin jlu: «Qa in qo el ikʼun, ¿ape tzʼelpuna jlu qa ya mintiʼ in tzalaj Jehová qiʼj? ¿Ya mlaype qo ajbʼen te Jehová? ¿Ilpe tiʼj tuʼn nxiʼye toj juntl lugar jatumel in tzaj qʼoʼn ambʼil qe tuʼn qajbʼen te Jehová?». Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu. Ax ikx kʼelel qnikʼ tiʼj tiʼ jaku bʼant quʼn tuʼn kukx qajbʼen te Jehová aj tel qʼiʼn ambʼil qe tuʼn tbʼant tajbʼil quʼn, ex alkyeqe sbʼubʼil il tiʼj tuʼn tel qikʼun.

3. Ik tzeʼn in tzaj tqʼamaʼn 2 Corintios 11:23 a 27, ¿tiʼ ok weʼ apóstol Pablo twitz ex tiʼ xnaqʼtzbʼil in nel qiʼn tiʼjju ikʼ tiʼj?

³ Qa ma tzʼel qʼiʼn ambʼil qe tuʼn qpakbʼan, jakulo kubʼ qximen qa ya mintiʼ in tzalaj Jehová qiʼj. Pero nya ax tok jlu. Qo ximen tiʼjju bʼaj tiʼj apóstol Pablo. Qʼuqli qkʼuʼj tiʼj qa in tzalajtoq Jehová tiʼj. Xi qʼoʼn toklen tuʼn tkubʼ ttzʼibʼin 14 uʼj toj Tyol Dios kubʼ tzʼibʼin toj yol griego ex  xi qʼoʼn toklen te apóstol tuʼn t-xiʼ pakbʼal kyoj junjuntl tnam. Maske ikju, ok weʼ twitz nimxix ikʼbʼil (kjawil uʼjit 2 Corintios 11:23-27). Aju bʼaj tiʼj, in tzaj tyekʼin qe qa in tzaj tqʼoʼn Jehová ambʼil tuʼn kyel ikʼun tmajen kukx in che ajbʼen te.

4. ¿Tiquʼn in qo el ikʼun kyuʼn xjal?

⁴ Tzaj tchikʼbʼaʼn Jesús tiquʼn qo elel ikʼun. Tqʼama qa kbʼajel jlu qiʼj tuʼnju junxitl qoʼ kywitz xjal (Juan 15:18, 19). Qa in qo el ikʼun, mintiʼ in tzaj tyekʼin jlu qa ya mintiʼ in tzalaj Dios qiʼj, sino in tzaj tyekʼin qa in kubʼ qbʼinchaʼn aju bʼaʼn.

5. ¿Jakupe tzʼel kyiʼn xjal ambʼil qe tuʼn miʼn qkʼulin te Jehová? Chikʼbʼantza.

⁵ Mlayx tzʼel kyiʼn xjal ambʼil qe tuʼn qkʼulin te Jehová, aju Dios at nimxix tipumal. O tzʼok tilil kyuʼn nimku aj qʼoj tiʼj Jehová tuʼn miʼn kykʼulin tmajen te, pero mintiʼ o bʼant kyuʼn. Qo ximen tiʼjju bʼaj toj Tkabʼ Nimaq Qʼoj twitz Tkyaqil Txʼotxʼ. I el ikʼun tmajen Dios kyuʼn aj kawil kyoj nimku tnam. Nya oʼkx el qʼiʼn ambʼil kye tuʼn Alemania nazi tuʼn miʼn tbʼant tajbʼil Jehová kyuʼn, ax ikx bʼant jlu kyuʼn aj kawil te Australia, Canadá ex junjuntl tnam. Maske bʼaj jlu, ikʼ jun tiʼ tbʼanelxix tuʼn tkʼiwlabʼil Jehová. Oʼkx attoq 72,475 pakbʼal twitz tkyaqil Txʼotxʼ toj abʼqʼi 1939 tej ttzaj tzyet qʼoj. Pero tej tkubʼ bʼaj qʼoj toj abʼqʼi 1945, in tzaj kyyekʼin tqanil qa otoq japun kyajlal pakbʼal te 156,299.

6. ¿Tiʼ tbʼanel jaku tzaj qa ma qo el ikʼun? Qʼamantza jun techel.

⁶ Aj qok weʼ twitz ikʼbʼil, jaku tzʼonin jlu qiʼj tuʼn qajbʼen mas te Jehová ex nya tuʼn qtzaj xobʼ. Qo ximen tiʼjju bʼaj tiʼj jun mejebʼleʼn aju attoq jun tal kykʼwaʼl ex in che anqʼintoq toj jun tnam jatumel el qʼiʼn ambʼil kye tuʼn kypakbʼan. Mintiʼ e tzaj xobʼ, sino xi tzyet tuʼn kyajbʼen te precursor regular. Ex tuʼn tbʼant jlu kyuʼn, kyaj ttzaqpiʼn t-xuʼjil jun tbʼanel taqʼun. Tqʼama chmilbʼaj qa tej tel qʼiʼn ambʼil kye tuʼn kyajbʼen te Jehová, kyajtoq xjal tuʼn tel mas kynikʼ kyiʼj testigos de Jehová. Tuʼn jlu, mas nya kwesttoq tuʼn t-xi tqʼoʼn jun xnaqʼtzbʼil tiʼj Tyol Dios. Ax ikx, onin jlu kyiʼj junjuntl. Tqʼama jun ansyan te ax tnam qa aʼyeju otoq che el laqʼeʼ tiʼj ttnam Jehová, xi tzyet tuʼn kybʼet juntl maj kyoj chmabʼil ex i ex pakbʼal.

7. a) ¿Tiʼ xnaqʼtzbʼil in tzaj tqʼoʼn Levítico 26:36 ex 37 qe? b) ¿Tiʼ teya kbʼantel tuʼn qa ma tzʼel qʼiʼn ambʼil qe tuʼn qpakbʼan?

 ⁷ Aj tel kyiʼn aj qʼoj ambʼil qe tuʼn qpakbʼan, kyajbʼil tuʼn qtzaj xobʼ aj qajbʼen te Jehová. Bʼalo jaku kyqʼama nya ax tok tqanil qiʼj, jaku chex kysamaʼn polisiy xpichʼil toj qja, jaku qox kyiʼn toj jusgad, axpe ikx jaku qo okx kyqʼoʼn toj cárcel. Kyajbʼil tuʼn qtzaj xobʼ aj tok qkeʼyin qa otoq che ex qʼiʼn junjun erman toj cárcel. Qa ma txi qqʼoʼn ambʼil tuʼn qtzaj xobʼ tuʼn kybʼinchbʼen, in nok jlu ik tzeʼn ax qoʼ in qo el qʼinte ambʼil qe tuʼn qajbʼen te Jehová. Pero nya qajbʼil tuʼn qok ik tzeʼn qe xjal in yolin Levítico 26:36 ex 37 tiʼj (uʼjinktza). Miʼn txi qqʼoʼn ambʼil te xobʼajil tuʼn qchewix toj qajbʼebʼil te Jehová nix tuʼn tkyaj qkolin. Qeʼk qkʼuʼj tiʼj ex miʼn qo tzaj xobʼ (Is. 28:16). In xi qqanin onbʼil te Jehová tuʼn ttzaj tyekʼin qbʼe. Ojtzqiʼn quʼn qa ma ten qtxlaj, mlay tzʼel kyiʼn aj kawil at kyipumal ambʼil qe tuʼn qajbʼen te (Heb. 13:6).

8, 9. a) ¿Tiʼ kbʼantel tuʼn teyele junjun okslal ex kyuʼn qeju wibʼaj toj ja? b) ¿Tiʼ kʼonil qiʼj tuʼn tjaw qjyoʼn aju mas bʼaʼn?

⁸ Aj tel qʼiʼn ambʼil qe tuʼn qpakbʼan, bʼalo jaku kubʼ qxjelin qa il tiʼj tuʼn qxiʼ toj juntl tnam jatumel qʼoʼntz ambʼil tuʼn qajbʼen te Jehová. Teyele te junjun kbʼel t-ximen tiʼ kbʼantel tuʼn. Bʼalo jaku tzʼonin kyiʼj junjun erman qa ma che xnaqʼtzan tiʼjju bʼant kyuʼn okslal toj tnejel syent abʼqʼi tej kyok weʼ twitz ikʼbʼil. Tej tkubʼ bʼyoʼn Esteban kyuʼn aj qʼoj tukʼil abʼj, ateʼ junjun tmajen Dios e xiʼ anqʼil kyoj junjun lugar te Judea ex te Samaria, axpe ikx e xiʼ toj tnam Fenicia, Chipre ex Antioquía (Mat. 10:23; Hech. 8:1; 11:19). Atzun junjuntl tmajen Dios, bʼalo jaku che ximen tiʼj techel kyaj tqʼoʼn apóstol Pablo, aju kubʼ t-ximen tuʼn tkyaj ten jatumel attoq nim ikʼbʼil. Kubʼ t-ximen tuʼn tpakbʼan tiʼj tbʼanel tqanil ex tuʼn tonin kyiʼj erman jatumel attoq nim ikʼbʼil, maske jakutoq kubʼ bʼyoʼn (Hech. 14:19-23).

⁹ ¿Tiʼ xnaqʼtzbʼil in nel qiʼn tiʼj txʼolbʼabʼil lu? In tzaj tyekʼin qa teyele junjun wibʼaj toj ja kbʼel t-ximen tiʼ kbʼantel tuʼn. Naʼmxtoq tkubʼ t-ximen jun tiʼ, bʼaʼn tuʼn tnaʼn Dios te Jehová ex tuʼn t-ximen tiʼj alkyeqe nya bʼaʼn jaku che ok weʼ twitz aj kyxiʼ toj juntl tnam ex alkye tten jaku tzʼonin kyiʼj. Teyele te junjun okslal kxel tiqan tex tiqatz (Gál. 6:5). Ni jun jaku tzʼok ten yolil tiʼjju kbʼantel kyuʼn txqantl.

10. ¿Tiʼ tqanil tzul tqʼoʼn ninja qʼil twitz aqʼuntl ex qe ansyan qe?

¹⁰ ¿Tzeʼn jaku qo kʼulin te Jehová aj tel qʼiʼn ambʼil tuʼn qajbʼen te? Tzul tqʼoʼn ninja qʼil twitz aqʼuntl tqanil kye ansyan ex junjun tumel tuʼn ttzaj qkʼamoʼn xnaqʼtzbʼil tiʼj Tyol Dios, tuʼn kyok chmabʼil ex tuʼn qpakbʼan. ¿Yajtzun qa mlay bʼant tuʼn ttzaj yolin ninja qʼil twitz aqʼuntl kyukʼil ansyan? Qa ikju, kʼajbʼel Tyol Dios kyuʼn ansyan ex qeju quʼj tuʼn ttzaj kyqʼamaʼn qe tzeʼn tuʼn kukx qajbʼen te Jehová (Mat. 28:19, 20; Hech. 5:29; Heb. 10:24, 25).

11. ¿Tiquʼn jaku tzʼok qeʼ qkʼuʼj tiʼj qa kukx ktzajel qkʼamoʼn xnaqʼtzbʼil tiʼj Tyol Dios ex tiʼ jaku bʼant quʼn tuʼn tok qxqʼuqin?

¹¹ O tzaj ttziyen Jehová qa kukx ktzajel tqʼoʼn xnaqʼtzbʼil qe tuʼntzun tten qʼuqbʼil qkʼuʼj kyuw (Is. 65:13, 14; Luc. 12:42-44). Tuʼntzunju, jaku tzʼok qeʼ qkʼuʼj tiʼj qa kukx ktzajel tqʼoʼn ttnam Jehová xnaqʼtzbʼil qe, aju kʼonil qiʼj tuʼn qten  tzʼaqli. Pero ax ikx qe jaku bʼant jun tiʼ quʼn aj tel qʼiʼn ambʼil qe tuʼn qajbʼen te Jehová. Bʼaʼn tuʼn ttzaj qjyoʼn jun lugar jatumel jaku txi qewin Xjan Uʼj ex junjuntl uʼj. Ex bʼaʼn tuʼn miʼn tkyaj qqʼoʼn toj jun lugar jatumel jaku kanet naj, qa twitz uʼj moqa toj kʼuxbʼil. Qkyaqilx bʼaʼn tuʼn tkubʼ qximen tiʼ kbʼantel quʼn tuʼntzun qten kyuw toj qokslabʼil.

12. ¿Tzeʼn kbʼajel kynukʼun ansyan qe chmabʼil toj jun tten mlay tzʼel nikʼbʼaj tiʼj?

¹² ¿Kukxpe kʼokel qchmon qibʼ tkyaqil seman? Aʼye ansyan che kbʼel ximente jatumel che okel chmabʼil tuʼntzun miʼn tel kynikʼ txqantl tiʼj. Bʼalo jaku tzaj kyqʼamaʼn qe tuʼn tok qchmon qibʼ toj tal kʼlojin, ex nimlo maj kchʼixpetil lugar ex or. ¿Tzeʼn jaku qo onin tuʼn kyok xqʼuqit erman in che pon toj chmabʼil? Bʼaʼn tuʼn tkubʼ qiʼn tqʼajqʼajel qwiʼ aj qyolin kyoj chmabʼil ik tzeʼn aj qpon ex aj qajtz, axlo ikx ya mlay bʼaj qxbʼalumin qibʼ ik tzeʼn in bʼant quʼn jaʼlo.

13. ¿Tiʼ xnaqʼtzbʼil jaku tzʼel qiʼn kyiʼj erman te ojtxe Unión Soviética?

¹³ ¿Kukxpe qo pakbʼal? Junxitl tiʼ kbʼajel kyoj junjun lugar. Noqtzun tuʼnj, tuʼnju kʼujlaʼn Jehová quʼn ex qgan tuʼn qyolin tiʼj Tkawbʼil, kkanetel tumel quʼn tuʼn qpakbʼan (Luc. 8:1; Hech. 4:29). Jun xuʼj in xnaqʼtzan tiʼjju ikʼ ojtxe, aju Emily Baran tbʼi, tqʼama jlu tiʼj kypakbʼabʼil testigos de Jehová toj ojtxe Unión Soviética: «Tej t-xi kyqʼamaʼn aj kawil kye testigos de Jehová tuʼn miʼn kypakbʼan, xi tzyet tuʼn kyyolin kyukʼil kyvesin, kyukʼil kyamiw ex kyukʼil qe xjal in che aqʼunan junx kyukʼil. Tuʼn jlu i ex qʼiʼn aqʼunal toj kojbʼil, pero e ok ten yolil kyukʼil txqantl pres ex ok tilil kyuʼn tuʼn kyok te okslal». Mintiʼ kyaj kytzaqpiʼn erman e ten toj ojtxe Unión Soviética tuʼn kypakbʼan maske el qʼiʼn ambʼil kye. Qajbʼil tuʼn tbʼant ax jlu quʼn qa ma pon ambʼil tuʼn ttzaj qʼamaʼn qe tuʼn miʼn qpakbʼan.

14. Qa ma txi qbʼiʼn aju in tzaj tqʼamaʼn Salmo 39:1, ¿alqiʼj kʼokel qxqʼuqin qibʼ?

¹⁴ Qxqʼuqink tiʼ in xi qqʼamaʼn kye txqantl. Aj tel qʼiʼn ambʼil qe tuʼn qajbʼen te Jehová, nim toklen tuʼn tel qnikʼ tiʼj toj alkye ambʼil tuʼn miʼn qyolin (Ecl. 3:7). Bʼaʼn tuʼn tok qxqʼuqin tqanil mlay tzʼok kybʼiʼn txqantl, ik tzeʼn kybʼi erman, qe tembʼil jatumel in nok qchmon qibʼ, alkye tten in qo pakbʼan ex tzeʼn in tzaj qkʼamoʼn xnaqʼtzbʼil. Mintiʼ tuʼn t-xi qqʼamaʼn tqanil lu kye aj kawil nix kye qamiw moqa kye toj qja ateʼ toj juntl tnam. Tuʼnju qa ma txi qqʼamaʼn jaku tzaj nya bʼaʼn kyiʼj erman (kjawil uʼjit Salmo 39:1).

15. ¿Tiʼ in bʼant tuʼn Satanás ex tzeʼn jaku tzʼok qxqʼuqin qibʼ tiʼj sbʼubʼil lu?

 ¹⁵ Miʼn txi qqʼoʼn ambʼil kye junjun tal tiʼchaq tuʼn tel qpan qibʼ kyiʼj erman. Ojtzqiʼn tuʼn Satanás qa jaku tzaj nya bʼaʼn toj jun ja xjal qa mintiʼ mujbʼabʼil kyxol (Mar. 3:24, 25). Tuʼntzunju, kukx kʼokel tilil tuʼn Satanás tuʼn ttzaj nya bʼaʼn qxol ex in nayon tuʼn qqʼojin qxolx ex nya tiʼj.

16. ¿Tiʼ tbʼanel techel kyaj tqʼoʼn ermana Gertrud qwitz?

¹⁶ Axpe ikx qeju ma che chʼiy toj kyokslabʼil il tiʼj tuʼn tok kyxqʼuqin kyibʼ tiʼj sbʼubʼil lu. Qo xnaqʼtzan tiʼjju bʼaj tiʼj ermana Gertrud Poetzinger ex Elfriede Löhr. Skʼoʼn maj qe ermana lu tuʼn kyxiʼ toj kyaʼj ex e ten toj jun campo te concentración nazi junx kyukʼil junjuntl ermana. Tzaj tloʼch tkʼuʼj ermana Gertrud tiʼj Elfriede tuʼnju in nex tqʼoʼntoq tbʼanel chikʼbʼabʼil tuʼn tonin kyiʼj junjuntl ermana. Yajxitl, tzaj tchʼixwi ermana Gertrud ex kubʼsan twitz Jehová tuʼn tonin tiʼj. Kubʼ ttzʼibʼin jlu: «Il tiʼj tuʼn tel qnikʼ tiʼj qa at junjun tiʼchaq mas tbʼanel in bʼant kyuʼn junjuntl ex qa in xi qʼoʼn junjuntl oklenj kye». ¿Tzeʼn kubʼ tiʼj jlu tuʼn ermana? Ok tqʼoʼn twiʼ kyiʼj tbʼanel tmod ermana Elfriede ex kyiʼj tbʼanel tiʼchaq in bʼanttoq tuʼn. Iktzun tten kukx ten kyamiwbʼil. Kykabʼil e kyaj anqʼin tej kyetz toj campo te concentración ex kukx e ajbʼen te Jehová tzmaxi tej kykyim. Qa ma tzʼok tilil quʼn tuʼn tkubʼ kyiʼj junjun nya bʼaʼn in tzaj qxol kyukʼil erman, mlayx txi qqʼoʼn ambʼil tuʼn tel qpan qibʼ kyiʼj (Col. 3:13, 14, TNM).

17. ¿Tiquʼn il tiʼj tuʼn t-xi qbʼiʼn tqanil in tzaj qʼoʼn qe?

¹⁷ Bʼaʼn tuʼn t-xi qbʼiʼn tqanil in tzaj qʼamaʼn qe. Qa ma txi qbʼiʼn aju in tzaj kyqʼamaʼn erman at kyoklen, mlayxix tzaj nya bʼaʼn qiʼj (1 Ped. 5:5). Qo xnaqʼtzan tiʼj tiquʼn. Toj jun tnam jatumel mintiʼ in tzaj qʼoʼn ambʼil tuʼn qpakbʼan, xi qʼamaʼn kye erman tuʼn miʼn tkyaj kyqʼoʼn uʼj aj kypakbʼan. Pero kubʼ t-ximen jun precursor qa jakutoq bʼant jlu toj jun tten mas tbʼanel ex mintiʼ xi tbʼiʼn tqanil. ¿Tiʼ tzaj tuʼn jlu? Toj jun qʼij tej otoqxi che bʼaj pakbʼan erman, xi qanin junjun xjel kye kyuʼn polisiy. Bʼalo bʼaj jlu tuʼnju otoq che ok lepeʼ polisiy kyiʼj ex otoq che kanet kykyaqil uʼj kyuʼn aʼyeju otoq kyaj kyqʼoʼn erman kye xjal. ¿Tiʼ xnaqʼtzbʼil in tzaj tqʼoʼn jlu qe? Qa nim toklen tuʼn t-xi qbʼiʼn tqanil in tzaj qʼamaʼn qe maske in kubʼ qximen qa jaku che bʼant qe tiʼchaq mas tbʼanel quʼn. Kukx qo tzajel tkʼiwlaʼn Jehová qa ma qo  onin kyiʼj erman at kyoklen tuʼn kykubʼ nej qwitz (Heb. 13:7, 17).

18. ¿Tiquʼn mintiʼ tuʼn tkubʼ qqʼoʼn junjuntl kawbʼil qa nya il tiʼj?

¹⁸ Miʼn kubʼ qqʼoʼn junjuntl kawbʼil qa nya il tiʼj. Qa ma bʼant jlu kyuʼn ansyan, noq jaku tzʼok jlu te jun iqtz kye erman. Tzaj tchikʼbʼaʼn ermano Juraj Kaminský aju bʼaj tej tel qʼiʼn ambʼil kye erman tuʼn kyajbʼen te Jehová toj ojtxe tnam Checoslovaquia, tqʼama jlu: «Tej kyxi qʼiʼn nim ansyan pres, ateʼ junjun erman at kyoklen toj kʼloj okslal ex kyoj circuito kubʼ kyqʼoʼn junjun kawbʼil tiʼj tzeʼn kymod pakbʼal tuʼn tten. Kubʼ kytzʼibʼin tkyaqilju tuʼn tbʼant kyuʼn ex aju mintiʼ tuʼn tbʼant kyuʼn». Mintiʼ o tzaj tqʼoʼn Jehová qoklen tuʼn tkubʼ qximen tiʼ tuʼn tbʼant kyuʼn txqantl. Qa at jun in kubʼ tqʼoʼn junjuntl kawbʼil, mintiʼ in xqʼuqin kyiʼj erman, sino taj tuʼn tok te tajaw kyokslabʼil (2 Cor. 1:24).

19. Ik tzeʼn in tzaj tqʼamaʼn 2 Crónicas 32:7 ex 8, ¿tiquʼn mintiʼ tuʼn qtzaj xobʼ maske in qʼojin Satanás qiʼj?

¹⁹ Kukx kʼokel tilil tuʼn Satanás, aju aj qʼoj qiʼj, tuʼn qel ikʼun (1 Ped. 5:8; Apoc. 2:10). Taj Satanás ex qeju in che onin tiʼj tuʼn tel kyiʼn ambʼil qe tuʼn miʼn qajbʼen te Jehová. Noqtzun tuʼnj, mintiʼ tuʼn qtzaj xobʼ (Deut. 7:21). At Jehová qukʼil ex kukx kʼonil qiʼj maske jaku tzʼel qʼiʼn ambʼil qe tuʼn qajbʼen te (kjawil uʼjit 2 Crónicas 32:7, 8).

20. ¿Tiʼ teya tajbʼil tuʼn tbʼant tuʼn?

²⁰ Bʼaʼn tuʼn tkubʼ qximen tuʼn tel qkanoʼn kyiʼj erman te tnejel syent abʼqʼi, aʼyeju xi kyqʼamaʼn jlu kye aj kawil: «Kyximankuye qa bʼaʼn tuj twitz Dios tuʼn t-xi qnimane kyyole ex mya ate Dios tuʼn t-xi qnimane; porke mlay bʼant tuʼn t-xi qkoline tuʼn t-xi qmaʼne aju ma qile ex ma qbʼiye» (Hech. 4:19, 20).