1, 2. a) Ik tzeʼn kyaj tqʼamaʼn Jesús toj Mateo 28:18 a 20, ¿alkye aqʼuntl mas nim toklen in bʼant tuʼn ttnam Jehová? b) ¿Alkyeqe xjel che xel qtzaqʼweʼn toj xnaqʼtzbʼil lu?

NIMLO e tzalaj apóstol tej toj kychmon kyibʼ tukʼil Jesús tkʼuʼj jun witz. Tej otoqxi jaw anqʼin Jesús, xi tqʼamaʼn kye tuʼn tok kychmon kyibʼ toj lugar aju (Mat. 28:16). Bʼalo toj ambʼil aju «kubʼ tyekʼun tibʼ kywitz mas te jweʼ syent erman» (1 Cor. 15:6). ¿Tiquʼn ok chmabʼil lu tuʼn Jesús? Ok chmabʼil lu tuʼnju tajtoq tuʼn t-xi tqʼoʼn tbʼanel aqʼuntl lu kye: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon» (kjawil uʼjit Mateo 28:18-20).

² Aʼyeju ok kybʼiʼn tyol Jesús, yajxitl e ok te okslal toj tnejel syent abʼqʼi. Aju aqʼuntl mas nim toklen tuʼn tbʼanttoq kyuʼn, aju tuʼn kyok mas xjal te t-xnaqʼtzbʼen Jesús. * Toj ambʼil jaʼlo, at nim mil kʼloj okslal twitz tkyaqil Txʼotxʼ ex ax aqʼuntl in bʼant kyuʼn. Toj xnaqʼtzbʼil lu, kxel qqʼoʼn tzaqʼwebʼil tiʼj kyaje xjel: ¿Tiquʼn nim toklen tuʼn kyok xjal te t-xnaqʼtzbʼen Jesús? ¿Tiʼ kbʼantel quʼn tuʼn tbʼant aqʼuntl lu quʼn? ¿In che oninpe kykyaqil tmajen Jehová tuʼn tbʼant aqʼuntl lu? ¿Ex tiquʼn nim toklen tuʼn tten qpasens aj tbʼant aqʼuntl lu?

3. Ik tzeʼn in tzaj tqʼamaʼn Juan 14:6 ex 17:3, ¿tiquʼn nim toklen tuʼn kyok xjal te t-xnaqʼtzbʼen Jesús?

³ ¿Tiquʼn nim toklen tuʼn kyok xjal te t-xnaqʼtzbʼen Jesús? Nim toklen tuʼnju oʼkx qeju in che ok lepeʼ tiʼj Jesús jaku che ok te tamiw Jehová. Ax ikx at jun tbʼanel kyanqʼibʼil toj ambʼil jaʼlo ex jaku ten kychwinqlal te jumajx toj ambʼil tzul (kjawil uʼjit Juan 14:6; 17:3). Ax tok, o kyaj toqxenin Jesús jun aqʼuntl nim toklen qe, pero nya qjunalx atoʼ. Ax ikx tqʼama Pablo qa in che aqʼunantoq junx kyukʼil junjuntl okslal te Jehová (1 Cor. 3:9). A jlu in tzaj tyekʼin qa o tzaj tqʼoʼn Jehová ex Jesucristo jun tbʼanelxix qoklen maske aj il qoʼ.

4. ¿Tiʼ xnaqʼtzbʼil in tzaj tqʼoʼn qe aju ikʼ tiʼj Iván ex Matilde?

⁴ Jaku qo tzalaj aj qonin tuʼn kyok xjal te t-xnaqʼtzbʼen Jesús. Qo xnaqʼtzan tiʼjju bʼaj tiʼj Iván ex Matilde, jun mejebʼleʼn te Colombia. Jun qʼij e pakbʼan te jun kuʼxun Davier tbʼi, ex tqʼama kuʼxun kye: «Waje tuʼn tchʼexpaj wanqʼibʼile, pero mlay bʼant wuʼne». Attoq nim tojtzqibʼil Davier tiʼj boxeo, tgantoq droga ex in kʼantoq nim qʼeʼn. Ax ikx, in nanqʼintoq tukʼil ttxin, aju Érika tbʼi. Tqʼama Iván jlu: «Xi tzyet tuʼn qvisitarine tiʼj ex najchaq in nanqʼintoq. Iltoq tiʼj tuʼn t-xi qbʼetine nim or tibʼaj biciclet kyoj bʼe at xoqʼil toj. Tej tok tkeʼyin Érika qa otoq chʼexpaj tmod Davier, ax ikx te xi tzyet tuʼn t-xnaqʼtzan». Tej tbʼet ambʼil, ya mintiʼ kʼan Davier qʼeʼn nix droga ex ya mintiʼ boxiarin. Ax ikx, kubʼ mojeʼ tukʼil Érika. Tqʼama Matilde jlu: «Tej tjaw aʼ twiʼ Davier ex Érika toj 2016, tzaj qnaʼne qe tyol Davier: ‹Waje tuʼn tchʼexpaj wanqʼibʼile, pero mlay bʼant wuʼne›. Tuʼn jlu etz taʼl qwitze». Aju techel lu in tzaj tyekʼin qe qa jaku qo tzalaj aj qonin tuʼn tok jun xjal te t-xnaqʼtzbʼen Jesús.

5. ¿Alkye tnejel in bʼant quʼn tuʼntzun kyok xjal te t-xnaqʼtzbʼen Jesús?

⁵ Aju tnejel in bʼant quʼn tuʼn qonin kyiʼj xjal kyaj tuʼn tel kynikʼ tiʼj Jehová, in qoʼx jyolte kye (Mat. 10:11). In kubʼ qyekʼin qa axix tok tmajen Jehová qoʼ aj qpakbʼan kye kykyaqil xjal in che kanet quʼn. Ax ikx in kubʼ qyekʼin qa axix tok okslal qoʼ aj qpakbʼan, tuʼnju atzun kawbʼil kyaj tqʼoʼn Jesús qe.

6. ¿Tiʼ kʼonil qiʼj tuʼn qok bʼiʼn kyuʼn xjal toj pakbʼabʼil?

⁶ Ateʼ junjun xjal kyaj tuʼn tel kynikʼ tiʼjju axix tok toj Tyol Dios. Atzun junjuntl xjal, nyaxix kygan tuʼn tok kybʼiʼn, tuʼntzunju, bʼaʼn tuʼn tok tilil quʼn tuʼn tten kygan tiʼj tqanil. Tuʼn qok bʼiʼn kyuʼn xjal toj pakbʼabʼil, nim toklen tuʼn tel qnikʼ tiʼj tiʼ kxel qqʼamaʼn kye. Bʼaʼn tuʼn qyolin kyiʼj xnaqʼtzbʼil kyaj xjal tuʼn tok kybʼiʼn ex bʼaʼn tuʼn qximen tiʼj tzeʼn tuʼn t-xi qqʼamaʼn kye.

7. a) ¿Tzeʼn jaku txi tzyet tuʼn qyolin tukʼil jun xjal? b) ¿Tiquʼn in kubʼ t-ximen teya qa nim toklen tuʼn kyok qbʼin xjal ex tuʼn tok qqʼoʼn toklen aju in tzaj kyqʼamaʼn?

⁷ Jun techel, jakulo txi qqʼamaʼn jlu kye: «Waje tuʼn tok nbʼiʼne tiʼ t-ximbʼetza tiʼj xnaqʼtzbʼil lu. Toj ambʼil jaʼlo in tzaj nim nya bʼaʼn toj tkyaqil twitz Txʼotxʼ. ¿Ilpe tiʼj tuʼn tten jun kawbʼil twitz tkyaqil Txʼotxʼ tuʼntzun t-xi tbʼinchaʼn tiʼj tkyaqil nya bʼaʼn?». Yajxitl, bʼalo jaku jaw quʼjin Daniel 2:44 ex jaku txi qchikʼbʼaʼn. Moqa jaku txi qqʼamaʼn jlu: «Waje tuʼn  t-xi nqanine jun xjel teya. ¿Alkye tbʼanel tumel tuʼn kyxi xnaqʼtzet kʼwaʼl tuʼntzun tten tbʼanel kymod?». Yajxitl, jakulo kubʼ qxnaqʼtzaʼn Deuteronomio 6:6 ex 7 tukʼil xjal. Noq alkyexku xnaqʼtzbʼil kjawil qjyoʼn, bʼaʼn tuʼn qximen kyiʼj xjal qo yolil kyukʼil. Qo ximen tiʼj tzeʼn jaku tzʼonin kyiʼj aj tel kynikʼ tiʼjju in tzaj t-xnaqʼtzaʼn Tyol Dios. Aj qyolin kyukʼil xjal, nim toklen tuʼn qbʼin kyiʼj ex tuʼn tok qqʼoʼn toklen aju in tzaj kyqʼamaʼn. Iktzun tten, kʼelelxix qnikʼ kyiʼj ex jakulo tzʼonin jlu tuʼn tok kybʼiʼn tqanil.

8. ¿Tiquʼn mintiʼ tuʼn qsikt tuʼn qmeltzʼaj kyukʼil xjal?

⁸ Naʼmxtoq tkubʼ t-ximen jun xjal tuʼn t-xnaqʼtzan tiʼj Tyol Dios, il-lo tiʼj tuʼn tel qpaʼn ambʼil ex tuʼn tok tilil quʼn tuʼn qmeltzʼaj nimku maj tukʼil. ¿Tiquʼn? Tnejel, bʼalo mlay kanet quʼn aj qmeltzʼaj tukʼil moqa mlay ten ambʼil tiʼj tuʼn tyolin qukʼil. Ax ikx, bʼalo il tiʼj tuʼn qmeltzʼaj nim maj visitarilte xjal tuʼntzun tok qeʼ tkʼuʼj qiʼj ex tuʼn t-xi tzyet tuʼn t-xnaqʼtzan tiʼj Tyol Dios. Bʼaʼn tuʼn ttzaj qnaʼn qa oʼkx jaku chʼiy jun tal tzeʼ qa kukx ma kux qqʼoʼn aʼ t-xeʼ. Ax jlu jaku bʼaj tiʼj jun xjal, jakulo chʼiy tkʼujlabʼil tiʼj Jehová ex tiʼj Jesús qa kukx ma qo yolin tukʼil tiʼj Tyol Dios.

9, 10. ¿Tiquʼn in xi qqʼamaʼn qa kykyaqil pakbʼal in che onin tuʼn kykanet xjal kyaj tuʼn tel kynikʼ tiʼj Jehová?

⁹ Kykyaqil pakbʼal in che onin tuʼn kykanet xjal kyaj tuʼn tel kynikʼ tiʼj Jehová. Jaku tzʼok mojbʼet qpakbʼabʼil ik tzeʼn aj qok ten jyol tiʼj jun tal kʼwaʼl otoq kyaj naj. ¿Toj alkye tten? Qo ximen tiʼjju bʼaj tiʼj jun tal kʼwaʼl te oxe abʼqʼi. Tej t-xi naj, e onin junlo 500 xjal tuʼn tkanet. Tej tikʼ junlo  20 or, kanet tal kʼwaʼl tuʼn jun kyxol qeju onil atz jatumel awaʼnkux nim kjoʼn. Noqtzun tuʼnj, mintiʼ kubʼ t-ximen xjal lu qa tjunalx otoq kanet kʼwaʼl tuʼn, sino tqʼama jlu: «Ma kanet quʼne noq tuʼn kyonbʼil nimxix xjal».

¹⁰ Ateʼ nim xjal in kubʼ kyximen qa o che el tzpet ik tzeʼn tal kʼwaʼl lu. In kubʼ kyximen qa mintiʼ qʼuqbʼil kykʼuʼj, pero kyaj onbʼil (Efes. 2:12). Mas te 8 millón testigos de Jehová in che jyon kyiʼj xjal lu. Bʼalo mlay kanet jun xjal taj tuʼn t-xnaqʼtzan tiʼj Tyol Dios quʼn, atzun junjuntl erman in kanet jun xjal kyuʼn jatumel in qo pakbʼan. Aj tkanet jun xjal tuʼn jun erman ex in nok te t-xnaqʼtzbʼen Jesús, qkyaqilx in qo jaw tzalaj tuʼn jlu.

11. Maske mintiʼ in xi qqʼoʼn jun xnaqʼtzbʼil toj ambʼil jaʼlo, ¿alkye junjuntl tumel tzeʼn tuʼn qonin tuʼn kyok xjal te t-xnaqʼtzbʼen Jesús?

¹¹ Mintiʼlo in xi qqʼoʼn jun xnaqʼtzbʼil tiʼj Tyol Dios toj ambʼil jaʼlo, pero jaku qo onin toj junjuntl tten tuʼn kyok xjal te t-xnaqʼtzbʼen Jesús. Jun techel, qa tzma tnejel maj in pon jun xjal toj chmabʼil, jaku txi qqʼamaʼn te qa in qo tzalaj tuʼnju ma pon ex bʼaʼn tuʼn qonin tiʼj. Iktzun tten jaku qo onin tiʼj tuʼn tel tnikʼ tiʼj qa aqoʼ axix tok okslal tuʼnju at kʼujlabʼil qxol (Juan 13:34, 35). Ax ikx qeju qyol in xi qqʼoʼn kyoj chmabʼil, maske chʼin kyqan, jaku tzʼonin tiʼj xjal tuʼn t-xi tqʼamaʼn qʼuqbʼil tkʼuʼj ex toj tumel. Ex jaku kubʼ qximen tuʼn qex pakbʼal tukʼil jun akʼaj pakbʼal ex tuʼn qonin tiʼj tzeʼn tuʼn tajbʼen Tyol Dios tuʼn aj t-xi tchikʼbʼaʼn jun xnaqʼtzbʼil kye xjal. Qa ma bʼant jlu quʼn, in xi qxnaqʼtzaʼn kye txqantl tuʼn tel kykanoʼn techel kyaj tqʼoʼn Jesús (Luc. 10:25-28).

12. ¿Ilpe tiʼj tuʼn tetz jun tbʼanel qxnaqʼtzbʼil tuʼn kyok xjal te t-xnaqʼtzbʼen Jesús quʼn? Qʼamantza jun techel.

¹² Mintiʼ tuʼn tkubʼ qximen qa oʼkx jaku che ok xjal te t-xnaqʼtzbʼen Jesús quʼn qa o tzʼetz jun tbʼanel qxnaqʼtzbʼil. Aju bʼaj tiʼj Faustina te tnam Bolivia, in tzaj tyekʼin qe qa nya ik ttenju. Tej tok tojtzqiʼn qe testigos de Jehová, mintiʼtoq in bʼant tuʼjin, pero o bʼant chʼin tuʼjin. Toj ambʼil jaʼlo, o jaw aʼ twiʼ ex tgan tuʼn t-xi t-xnaqʼtzaʼn axix tok kye xjal. Tkyaqil seman in xi tqʼoʼn xnaqʼtzbʼil tiʼj Tyol Dios kye chʼixme jweʼ xjal. Maske mintiʼ in bʼant-xix tuʼjin Faustina ik tzeʼn qe xjal in che xnaqʼtzan tukʼil, o tzʼonin kyiʼj qaq xjal tuʼn tjaw aʼ kywiʼ (Luc. 10:21).

13. Maske in bʼant nim tiʼchaq quʼn, ¿tiʼ kʼiwlabʼil jaku tzaj qkʼamoʼn qa ma qo onin tuʼn kyok xjal te t-xnaqʼtzbʼen Jesús?

¹³ Ateʼ nim tmajen Jehová in bʼant nim tiʼchaq kyuʼn ex tuʼn jlu ya mintiʼxix ambʼil kyiʼj. Maske ikju, in nel kypaʼn ambʼil tuʼn kyqʼon xnaqʼtzbʼil tiʼj Tyol Dios ex in che tzalaj aj tbʼant jlu kyuʼn. Qo ximen tiʼjju ikʼ  tiʼj jun ermana Melanie tbʼi. Tjunalxtoq in nanqʼin tukʼil jun tal te wajxaq abʼqʼi. Ax ikx in naqʼunantoq tkyaqil qʼij ex in nonintoq tuʼn tok xqʼuqit tman tuʼnju attoq cáncer tiʼj. In nanqʼintoq toj jun tal tnam najchaq tok tiʼj Alaska ex tjunalxtoq in najbʼen te Jehová. Nim maj xi tqanin tipumal te Jehová tuʼn tex pakbʼal maske attoq nim cheʼw, tuʼnju tajtoq tuʼn t-xi tqʼoʼn xnaqʼtzbʼil tiʼj Tyol Dios te jun xjal. Yajxitl kanet Sara tuʼn ex jaw tzalaj xuʼj lu tej tel tnikʼ tiʼj tbʼi Dios. Tej tikʼ ambʼil xi tzyet tuʼn t-xnaqʼtzan Sara tiʼj Tyol Dios. In tzaj tqʼamaʼn Melanie jlu: «Aj tok viernes te qale otoq chin sikte. Pero in qoʼxtoqe tukʼil wale qʼol xnaqʼtzbʼil ex nimxix o tzalaje tuʼn jlu. Qgantoqe tuʼn ttzaj qjyoʼne tqanil tuʼntzun kytzaqʼwet t-xjel Sara quʼne, ex nim o tzalaje tej tok te tamiw Jehová». Kubʼ tiʼj ikʼbʼil tuʼn Sara, ya mintiʼ xiʼ toj t-iglesia ex jaw aʼ twiʼ.

14. a) ¿Tiquʼn chʼixme ik tten qpakbʼabʼil ik tzeʼn aj kytzyet pescad kyuʼn xjal? b) ¿Tzeʼn in che onin yol tkuʼx toj 2 Timoteo 4:1 ex 2 qiʼj?

¹⁴ Maske naʼmx tkanet jun xjal quʼn tuʼn qonin tiʼj tuʼn tok te t-xnaqʼtzbʼen Jesús, kukx qqʼonk tilil tuʼn tkanet jun quʼn. Bʼaʼn tuʼn ttzaj qnaʼn qa ok tmojbʼaʼn Jesús pakbʼabʼil tukʼilju aj kytzyet pescad kyuʼn xjal. Aqe xjal lu jaku che aqʼunan nim or ex mlay jatz jun pescad kyuʼn. Chʼixme tkyaqil maj in che aqʼunan qonikʼan ex qa te qlax moqa te prim, ex at maj in xi kybʼetin nim toj bark (Luc. 5:5). Chʼixme ik tzeʼn jlu, ateʼ junjun tmajen Jehová in che pakbʼan  toj nim or tukʼil kypasens ex in bʼant kyuʼn toj junxichaq ambʼil ex lugar noq tuʼn kykanet mas xjal. Aʼyeju in nok tilil kyuʼn tuʼn bʼant jlu, chʼixme tkyaqil maj in che yolin kyukʼil xjal kyaj tuʼn tel kynikʼ tiʼj axix tok. ¿Jakupe bʼant tuʼn qpakbʼan toj jun ambʼil te qʼij moqa toj jun lugar jatumel jaku che kanet mas xjal quʼn? (Kjawil uʼjit 2 Timoteo 4:1, 2).

15. ¿Tiquʼn nim toklen tuʼn tten qpasens aj t-xi qqʼoʼn xnaqʼtzbʼil tiʼj Tyol Dios?

¹⁵ ¿Tiquʼn nim toklen tuʼn tten qpasens aj t-xi qqʼoʼn jun xnaqʼtzbʼil tiʼj Tyol Dios? Tuʼnju nya oʼkx tuʼn qonin kyiʼj xjal tuʼn tel kynikʼ kyiʼj xnaqʼtzbʼil tkuʼx toj Xjan Uʼj ex tuʼn tok kykʼujlaʼn. Sino ax ikx in qo onin kyiʼj tuʼn tok kyojtzqiʼn Jehová ex tuʼn tok kykʼujlaʼn. Ex nya oʼkx in xi qxnaqʼtzaʼn kye tiʼ in tzaj tqanin Jesús kye t-xnaqʼtzbʼen, ax ikx in nok tilil quʼn tuʼn qonin kyiʼj tzeʼn jaku che ok te axix tok okslal. Nim toklen tuʼn qonin kyiʼj akux in nok tilil kyuʼn tuʼn kyjapun nabʼil tkuʼx toj Tyol Dios kyuʼn. Ateʼ junjun jun rat in chʼexpaj kyximbʼetz ex kymod, atzun junjuntl in xi tiʼn mas ambʼil.

16. ¿Tiʼ xnaqʼtzbʼil in tzaj tqʼoʼn qe aju ikʼ tiʼj Raúl?

¹⁶ Aju ikʼ tiʼj jun misionero toj tnam Perú in tzaj tyekʼin qe tiquʼn nim toklen tuʼn tten qpasens. Tqʼama jlu: «Otoq xnaqʼtzan jun xjal Raúl tbʼi kyiʼj qeju kabʼe uʼj, pero kukxtoq in tzaj nim nya bʼaʼn toj tanqʼibʼil. Mintiʼtoq tzalajbʼil toj tmejebʼleʼn ex noq in yolin kyiʼj yol tzʼil, ex kwesttoq tuʼn tok qʼoʼn toklen kyuʼn tkʼwaʼl. Tuʼnju kukx bʼet kyoj chmabʼil, kukxtoq in chin visitarine tiʼj ex kyiʼj toj tja. Tej tikʼ oxe abʼqʼi toklen wojtzqiʼne, bʼant tuʼn tjaw aʼ twiʼ».

17. ¿Tiʼ qo xnaqʼtzal tiʼj toj juntl xnaqʼtzbʼil?

¹⁷ Kyaj tqʼamaʼn Jesús qe tuʼn qxiʼ ex tuʼn t-xi qqʼamaʼn kye xjal tuʼn kyok te t-xnaqʼtzbʼen «kyuj kykyaqil nasyon». Tuʼn tjapun qoklen lu, at maj il tiʼj tuʼn qyolin kyukʼil xjal junxitl kyximbʼetz twitzju qe, axpe ikx in qo yolin kyukʼil qeju mintiʼ jun kyokslabʼil ex kyukʼil qeju in kubʼ kyximen qa mintiʼ Dios. Toj juntl xnaqʼtzbʼil kʼelel qnikʼ tiʼj tzeʼn jaku qo onin kyiʼj xjal lu tuʼn tok kybʼiʼn tbʼanel tqanil.