1. ¿Alkye kabʼe tiʼ jaku tzʼok qeʼ qkʼuʼj tiʼj?

IN CHE ok tkʼujlaʼn Jehová qeju in che ajbʼen te. Kukx o bʼant jlu tuʼn ex kukx kbʼantel tuʼn. Ax ikx kʼujlaʼn aju tzʼaqli tuʼn (Sal. 33:5). Tuʼn jlu qʼuqli qkʼuʼj tiʼj kabʼe tiʼ. Tnejel, qa in kux chyoʼn toj tanmi Jehová aj tok bʼinchaʼn nya bʼaʼn kyiʼj tmajen. Ex tkabʼ, qa kxel tbʼinchaʼn tiʼj tkyaqilju nya bʼaʼn. Toj tnejel xnaqʼtzbʼil tiʼj kʼloj xnaqʼtzbʼil lu, * el qnikʼ tiʼj qa xi tqʼoʼn Jehová Ley kye aj Israel ex atztoq tzajni tiʼj kʼujlabʼil, tuʼn jlu ok qʼoʼn kyoklen kykyaqilx, axpe ikx qeju mintiʼ jun onil kye (Deut. 10:18). In tzaj tyekʼin Ley qa at nimxix tkʼujlabʼil Jehová kyiʼj tmajen.

2. ¿Alkyeqe xjel che xel qtzaqʼweʼn?

² Japun bʼaj twiʼ Ley xi qʼoʼn te Moisés toj abʼqʼi 33 tej ttzaj tzyet kʼloj okslal. ¿Ape t-xilen jlu qa ya mlaytoq ten jun ley tzajni tiʼj kʼujlabʼil ex tiʼjju tzʼaqli kyxol okslal? Miʼn. Attoq jun akʼaj ley kyxol okslal. Toj xnaqʼtzbʼil lu, tnejel kʼelel qnikʼ tiʼj alkyeju akʼaj ley ex yajxitl kxel qqʼoʼn tzaqʼwebʼil kyiʼj xjel lu: ¿Tiquʼn in xi qqʼamaʼn qa atz tzajni akʼaj ley tiʼj kʼujlabʼil? ¿Tiquʼn jaku txi qqʼamaʼn qa in xi bʼinchet kyiʼj tiʼchaq toj tumel tuʼn akʼaj ley? Ex tjaqʼ akʼaj ley lu, ¿tzeʼn kymod qeju at kyoklen kbʼel kyyekʼin kyukʼil txqantl?

3. ¿Tiʼ tkuʼx toj «tley Crist» aju in yolin Gálatas 6:2 tiʼj?

³ (Kjawil uʼjit Gálatas 6:2). Ateʼ okslal tjaqʼ «tley Crist». Noqtzun tuʼnj, mintiʼ kyaj tqʼoʼn Jesús jun tajlal ley kye  t-xnaqʼtzbʼen, noq oʼkx e kyaj tqʼamaʼn junjun kawbʼil, nabʼil ex aju tuʼn tbʼant kyuʼn. Aju «tley Crist», atz in yolin tiʼj tkyaqilju bʼant tuʼn Jesús. Tuʼn telxix qnikʼ tiʼj, kxel qqʼoʼn tzaqʼwebʼil kyiʼj junjun xjel in kubʼ qximen tiʼjju «tley Crist».

4, 5. a) ¿Alkye tten xi tqʼoʼn Jesús xnaqʼtzbʼil kye xjal? b) ¿Toj alkye ambʼil xi tqʼoʼn Jesús xnaqʼtzbʼil kye xjal?

⁴ ¿Alkye tten xi tqʼoʼn Jesús xnaqʼtzbʼil kye xjal? Tnejel, xi tqʼoʼn xnaqʼtzbʼil kye tukʼil tyol. Attoq kyipumal tyol tuʼnju xi tyekʼin axix tok tiʼj Dios, tqʼama tiquʼn atoʼ tzalu twitz Txʼotxʼ ex tqʼama qa oʼkx tuʼn Tkawbʼil Dios kxel bʼinchet tiʼj nya bʼaʼn in tzaj kyiʼj xjal (Luc. 24:19). Ax ikx, xi tqʼoʼn Jesús xnaqʼtzbʼil kye xjal tukʼil tbʼinchbʼen. Tuʼn jlu, kyaj tqʼoʼn jun tbʼanel techel kywitz t-xnaqʼtzbʼen (Juan 13:15).

⁵ ¿Toj alkye ambʼil xi tqʼoʼn Jesús xnaqʼtzbʼil kye xjal? Bʼant tuʼn tej tpakbʼan tzalu twitz Txʼotxʼ (Mat. 4:23). Ax ikx, xi tqʼoʼn Jesús xnaqʼtzbʼil kye t-xnaqʼtzbʼen tej tikʼ chʼin ambʼil tjawlen anqʼin. Jun techel, kubʼ tyekʼin tibʼ kywitz maslo te 500 t-xnaqʼtzbʼen ex xi tqʼamaʼn kye tuʼn kyok xjal kyuʼn te t-xnaqʼtzbʼen (Mat. 28:19, 20; 1 Cor. 15:6). Ex tuʼnju ok qʼoʼn toklen te nejenel kyibʼaj okslal, kukx tzaj tqʼoʼn xnaqʼtzbʼil kye t-xnaqʼtzbʼen tej otoqxi pon juntl maj toj kyaʼj. Jun techel, toj abʼqʼi 96 ajbʼen apóstol Juan tuʼn tuʼn t-xi tqʼoʼn qʼuqbʼil kykʼuʼj okslal skʼoʼn maj ex tuʼn t-xi tqʼoʼn nabʼil kye (Col. 1:18; Apoc. 1:1).

6, 7. a) ¿Jatumel kyaj tzʼibʼin aju kyaj t-xnaqʼtzaʼn Jesús? b) ¿Tiʼ kbʼantel quʼn tuʼntzun qnimen tiʼj «tley Crist»?

⁶ ¿Jatumel kyaj tzʼibʼin aju kyaj t-xnaqʼtzaʼn Jesús? Atz kyoj qeju kyaje uʼj in che yolin tiʼj tanqʼibʼil, tuʼnju in che yolin tiʼjju tqʼama ex tiʼjju bʼant tuʼn tzalu twitz Txʼotxʼ. Atzun junjuntl uʼj kubʼ tzʼibʼin toj Tyol Dios toj yol griego, in che onin qiʼj tuʼn telxix qnikʼ tiʼj t-ximbʼetz Jesús tuʼnju onin xewbʼaj xjan kyiʼj qeju e kubʼ tzʼibʼinte ex ten kynabʼil ik tzeʼn «tnabʼl Crist» (1 Cor. 2:16).

⁷ Xnaqʼtzbʼil in tzaj tqʼoʼn qe: Jaku tzʼajbʼen tkyaqilju kyaj t-xnaqʼtzaʼn Jesús quʼn toj tkyaqil tten qanqʼibʼil. Tuʼntzunju, jaku tzʼonin tley Cristo qiʼj toj qaqʼun, toj tja xnaqʼtzbʼil, toj kʼloj okslal ex tiʼjju in bʼant quʼn toj qja. Jaku tzʼel qnikʼ tiʼj ley lu qa ma jaw quʼjin qeju uʼj e kubʼ tzʼibʼin toj Tyol Dios toj yol griego ex qa ma qo ximen kyiʼj. In xi qbʼiʼn ley lu qa ma kubʼ  qbʼinchaʼn aju in tzaj tqʼamaʼn, qa ma txi qnimen qe kawbʼil ex qe nabʼil tkuʼx toj. Qa ma qo ok lepeʼ tiʼj «tley Crist», kbʼel qyekʼin qa in qo bʼin te Jehová tuʼnju atz tukʼil in tzaj tkyaqilju kyaj t-xnaqʼtzaʼn Jesús (Juan 8:28).

8. ¿Alqiʼj tzajni «tley Crist»?

⁸ Aqeju in che anqʼin toj jun ja tbʼanel bʼinchabʼin te ex kyuw qe tsimyent, mintiʼ in bʼaj kykʼuʼj tiʼj jun tiʼ. Ax jlu in bʼaj kyiʼj qeju in xi kybʼiʼn jun tbʼanel ley, jaku tzʼok qeʼ kykʼuʼj tiʼj tuʼnju atz tzajni tiʼj jun tbʼanel mod. Ikju, atz tzajni «tley Crist» tiʼj kʼujlabʼil ex atzun jlu mas tbʼanel jaku ten. ¿Tiquʼn in xi qqʼamaʼn jlu?

9, 10. a) ¿Alkyeqe yekʼbʼil at qa bʼant tkyaqil tuʼn Jesús tuʼn kʼujlabʼil? b) ¿Alkye tten jaku tzʼel qkanoʼn tiʼj Jesús?

⁹ Tnejel, bʼant tkyaqil tiʼchaq tuʼn Jesús tuʼnju ten tkʼujlabʼil. Tuʼnju tzaj qʼaqʼin tkʼuʼj Jesús kyiʼj xjal, xi tqʼoʼn xnaqʼtzbʼil kye, e kubʼ tqʼanin qe yabʼ, xi tqʼoʼn kywa qeju at weʼyaj kyiʼj ex e jaw anqʼin kyimni tuʼn, iktzun tten kubʼ tyekʼin tkʼujlabʼil (Mat. 14:14; 15:32-38; Mar. 6:34; Luc. 7:11-15). Ax tok, tkyaqil jlu el tiʼn ambʼil tiʼj Jesús ex sikt tuʼn. Noqtzun tuʼnj, tuʼn tkyaqil tkʼuʼj ximen tnejel tiʼjju at tajbʼen kye txqantl. Ex tej t-xi tqʼoʼn tchwinqlal, atzun jlu ok te mas tbʼanel yekʼbʼil tiʼj tkʼujlabʼil (Juan 15:13).

¹⁰ Xnaqʼtzbʼil in tzaj tqʼoʼn qe: Jaku tzʼel qkanoʼn tiʼj techel kyaj tqʼoʼn Jesús qa ma qo ximen tnejel tiʼjju at tajbʼen kye txqantl. Ax ikx, bʼaʼn tuʼn tten qʼaqʼbʼil qkʼuʼj kyiʼj xjal jatumel in qo pakbʼan. Aj tonin qʼaqʼbʼil qkʼuʼj qiʼj tuʼn qpakbʼan kye txqantl ex tuʼn t-xi qqʼoʼn xnaqʼtzbʼil kye, in japun tley Cristo quʼn.

11, 12. a) ¿Tiquʼn ojtzqiʼn quʼn qa in ximen Jehová kyiʼj tmajen? b) ¿Tzeʼn jaku tzʼel qkanoʼn techel tiʼj tkʼujlabʼil Jehová?

¹¹ Tkabʼin, kubʼ tyekʼin Jesús tkʼujlabʼil Ttat. Toj ambʼil tej tpakbʼan Jesús, kubʼ tyekʼin qa in ximen Jehová kyiʼj tmajen. Jun techel, kyaj t-xnaqʼtzaʼn qa qkyaqilx nim qoklen toj twitz Qtat at toj kyaʼj (Mat. 10:31). Ex kubʼ tyekʼin Jesús qa taj Jehová tuʼn kymeltzʼaj tmajen o che el laqʼeʼ tiʼj ex tuʼn tajtz tiʼj kyanmi tuʼntzun kyoktz qkʼamoʼn tukʼil tzalajbʼil (Luc. 15:7, 10). Ax ikx, tqʼama Jesús qa kubʼ tyekʼin Jehová tkʼujlabʼil kyiʼj xjal tej ttzaj samaʼn tuʼn kyetz xjal tjaqʼ il (Juan 3:16).

¹² Xnaqʼtzbʼil in tzaj tqʼoʼn qe: ¿Tzeʼn jaku tzʼel qkanoʼn techel tiʼj tkʼujlabʼil Jehová? (Efes. 5:1, 2). Jaku bʼant quʼn aj tkubʼ qyekʼin qa nim kyoklen erman toj qwitz ex qa in qo tzalaj aj tmeltzʼaj jun tmajen Jehová (Sal. 119:176). In kubʼ qyekʼin qa kʼujlaʼn qe erman quʼn aj qonin kyiʼj aj kyok weʼ twitz jun nya bʼaʼn (1 Juan 3:17). Aj tkubʼ qyekʼin qkʼujlabʼil kyiʼj txqantl, in japun tley Cristo quʼn.

13, 14. a) ¿Alkye mandamyent kyaj tqʼamaʼn Jesús toj Juan 13:34 ex 35 ex tiquʼn akʼaj jlu? b) ¿Tzeʼn jaku japun akʼaj mandamyent quʼn?

¹³ Toxin, xi tqʼamaʼn Jesús kye t-xnaqʼtzbʼen tuʼn tkubʼ kyyekʼin kykʼujlabʼil kyiʼj txqantl ik tzeʼn bʼant tuʼn (kjawil uʼjit Juan 13:34, 35). Ok jlu te akʼaj mandamyent tuʼnju mintiʼtoq tkuʼx toj Ley xi tqʼoʼn Jehová kye aj Israel. Kyaj tqʼamaʼn Jesús qa il tiʼj tuʼn kyok qkʼujlaʼn erman ik tzeʼn bʼant tuʼn qiʼj. Mas che okel qkʼujlaʼn erman twitzju qkʼujlabʼil at qiʼjx, axpe ikx jaku txi qqʼoʼn qchwinqlal kyiʼj ik tzeʼn bʼant tuʼn Jesús. *

¹⁴ Xnaqʼtzbʼil in tzaj tqʼoʼn qe: ¿Tzeʼn jaku japun akʼaj mandamyent quʼn? Toj chʼin yol, aj qonin kyiʼj erman. Nya oʼkx kbʼel qximen tuʼn t-xi qqʼoʼn qchwinqlal kyiʼj, sino ax ikx kʼokel tilil quʼn tuʼn kybʼant junjun tiʼchaq quʼn kyiʼj.  Jun techel, bʼalo jaku qo ikʼ qʼil jun erman ma tijen tuʼn t-xi qiʼn toj chmabʼil, jaku kubʼ qximen tuʼn miʼn tkubʼ qbʼinchaʼn jun tiʼ mas qgan tuʼntzun ttzalaj jun erman moqa jaku txi qqanin qvacación tuʼn qonin kyiʼj txqantl aj kytzaj xitbʼil. Aj kybʼant tiʼchaq ik tzeʼn jlu quʼn, in japun tley Cristo quʼn ex in nonin tuʼn tel kynikʼ erman tiʼj qa xqʼuqin ateʼ.

15-17. a) ¿Tzeʼn kubʼ kyyekʼin tbʼinchbʼen Jesús qa xi tbʼinchaʼn qe tiʼchaq toj tumel? b) ¿Tzeʼn jaku tzʼel qkanoʼn techel kyaj tqʼoʼn Jesús?

¹⁵ Aj in najbʼen yol tzʼaqli tuʼn Tyol Dios, atz in yolin tiʼj tuʼn tkubʼ qbʼinchaʼn aju bʼaʼn toj twitz Jehová ex tuʼn miʼn tok qqʼoʼn qwitz tiʼj kyyajil moqa kyiyjil xjal. ¿Tiquʼn in xi qqʼamaʼn qa toj tumel in xi bʼinchaʼn kyiʼj xjal tuʼn tley Cristo?

¹⁶ Tnejel, qo xnaqʼtzan tiʼj tzeʼn kubʼ tyekʼin Jesús tukʼilju bʼant tuʼn qa xi tbʼinchaʼn kyiʼj tiʼchaq toj tumel. Toj ambʼil aju, el kyikʼun nejenel kye aj Judiy qe xjal nya aj Judiy, qeju mintiʼ etz kyxnaqʼtzbʼil ex mintiʼ ok kyqʼoʼn kyoklen xuʼj. Atzunte Jesús kubʼ tyekʼin tbʼanel tmod ex mintiʼ ok tqʼoʼn twitz tiʼj kyyajil xjal. Mintiʼ i el tikʼun qe xjal te junxitl tnam tej tok qeʼ kykʼuʼj tiʼj (Mat. 8:5-10, 13). Pakbʼan kye xjal mebʼa moqa prow ex kye qʼinun (Mat. 11:5; Luc. 19:2, 9). Mintiʼ i el tikʼun qe xuʼj ex mintiʼ kubʼ tyekʼin nya bʼaʼn tmod kyukʼil. Sino ok tqʼoʼn kyoklen kykyaqil xuʼj, axpe ikx qeju ikʼuntoq kywitz kyuʼn txqantl (Luc. 7:37-39, 44-50).

¹⁷ Xnaqʼtzbʼil in tzaj tqʼoʼn qe: Jaku tzʼel qkanoʼn techel kyaj tqʼoʼn Jesús qa mintiʼ ma tzʼok qqʼoʼn qwitz tiʼj kyyajil xjal ex aj qpakbʼan kye kykyaqil, qa at kypwaq moqa mintiʼ ex noq alkyexku kyokslabʼil. Atzun kye xinaq moqa ichan in che ajbʼen te Jehová, in nel kykanoʼn tiʼj Jesús aj tok kyqʼoʼn kyoklen ermana. Aj tbʼant jlu quʼn, in japun tley Cristo quʼn.

18, 19. ¿Tiʼ kyaj t-xnaqʼtzaʼn Jesús tiʼjju tuʼn t-xi bʼinchet tiʼj tkyaqil toj tumel ex tiʼ xnaqʼtzbʼil in nel qiʼn tiʼj jlu?

¹⁸ Tkabʼin, qo xnaqʼtzan tiʼjju tqʼama Jesús tuʼn t-xi bʼinchet tiʼj tkyaqil toj tumel. Tqʼama junjun nabʼil kye t-xnaqʼtzbʼen tuʼn tonin kyiʼj tuʼn tten tbʼanel kymod kyukʼil txqantl. Jun techel, tqʼama tuʼn tok qbʼinchaʼn tbʼanel kyiʼj txqantl ik tzeʼn qaj tuʼn tok bʼinchaʼn qiʼj (Mat. 7:12). Qa ma kubʼ qyekʼin tbʼanel qmod kyukʼil txqantl, ax jlu jaku bʼant kyuʼn qiʼj. ¿Yajtzun qa o tzʼok bʼinchaʼn jun nya bʼaʼn qiʼj? Ax ikx kyaj tqʼamaʼn Jesús kye t-xnaqʼtzbʼen tuʼn tok qeʼ kykʼuʼj tiʼj Jehová, tuʼnju kxel tbʼinchaʼn tiʼj nya bʼaʼn in nok bʼinchaʼn kyiʼj qeju «in che kubʼsan twitz qʼijtl ex qonikʼan» (Luc. 18:6, 7). Jun tziybʼil qe yol lu tuʼnju ojtzqiʼn tuʼn Jehová alkyeqe nya bʼaʼn in qo ok weʼ twitz kyoj bʼajsbʼil tqʼijlalil jaʼlo ex kxel tbʼinchaʼn kyiʼj toj ambʼil mas bʼaʼn (2 Tes. 1:6).

¹⁹ Xnaqʼtzbʼil in tzaj tqʼoʼn qe: Qa ma qo ok lepeʼ kyiʼj nabʼil kyaj t-xnaqʼtzaʼn Jesús, kxel qbʼinchaʼn aju bʼaʼn kyiʼj txqantl. Ex qa o tzʼok bʼinchaʼn jun nya bʼaʼn qiʼj tuʼn tkyaqilju tokx tjaqʼ tkawbʼil Satanás, in chewix qanmi aj tel qnikʼ tiʼj qa kxel tbʼinchaʼn Jehová tiʼj tkyaqil jlu.

20, 21. a) ¿Tzeʼn kymod qeju at kyoklen ktel kyukʼil txqantl? b) ¿Tzeʼn in nel kykanoʼn chmilbʼaj tkʼujlabʼil Jesús? c) ¿Tzeʼn kymod mambʼaj kbʼel kyyekʼin kyiʼj kykʼwaʼl?

²⁰ Ik tzeʼn ma tzʼel qnikʼ tiʼj, atz tzajni tley Cristo tiʼj kʼujlabʼil. Tuʼntzunju, il tiʼj tuʼn tkubʼ kyyekʼin qeju at jun kyoklen jun tbʼanel kymod kyukʼil txqantl ex tuʼn tten kykʼujlabʼil kyiʼj. Bʼaʼn tuʼn ttzaj qnaʼn qa taj Jesús tuʼn tkubʼ qyekʼin qkʼujlabʼil tiʼj tkyaqilju in bʼant quʼn.

 ²¹ Toj qja. Il tiʼj tuʼn tok kykʼujlaʼn chmilbʼaj kyxuʼjil «ik tzaʼn te Crist ma che tkʼujla kykyaqil okslal» (Efes. 5:25, 28, 29). In nel kykanoʼn chmilbʼaj tkʼujlabʼil Jesús aj kyximen tnejel tiʼj kyxuʼjil ex nya kyiʼjx. Kwest in nela toj kywitz junjun xinaq tuʼn tkubʼ kyyekʼin kʼujlabʼil ik tzeʼn jlu, bʼalo tuʼnju e jaw chʼiy toj jun ja xjal jatumel mintiʼ kubʼ yekʼin kʼujlabʼil kyiʼj txqantl ex mintiʼ ok qʼoʼn kyoklen. Maske kwest tuʼn tkyaj kytzaqpiʼn junjun kostumbr, il tiʼj tuʼn tbʼaj kychʼixpuʼn kyximbʼetz tuʼntzun tjapun tley Cristo kyuʼn. Aʼyeju chmilbʼaj in kubʼ kyyekʼin kykʼujlabʼil ik tzeʼn te Cristo, in che ok nimen kyuʼn kyxuʼjil. Atzun qeju mambʼaj in nok kykʼujlaʼn kykʼwaʼl tuʼn tkyaqil kykʼuʼj, mlay tzʼok kybʼinchaʼn nya bʼaʼn kyiʼj tuʼn kyyol ex kybʼinchbʼen (Efes. 4:31). Aju in bʼant kyuʼn, in kubʼ kyyekʼin tbʼanel kymod ex kykʼujlabʼil kyiʼj kykʼwaʼl. Tuʼn jlu kbʼel kynaʼn kʼwaʼl qa xqʼuqin ateʼ, ex kʼonil kyiʼj tuʼn tok kykʼujlaʼn kyman.

22. Ik tzeʼn in tzaj tqʼamaʼn 1 Pedro 5:1 a 3, ¿alkye kyajaw ẍneʼl ex tzeʼn che okel xqʼuqit?

²² Toj kʼloj okslal. Il tiʼj tuʼn ttzaj kynaʼn ansyan qa nya aʼye kyajaw ẍneʼl (Juan 10:16; kjawil uʼjit 1 Pedro 5:1-3). Aju yol «qe t-ẍneʼl Dios» ex aju yol «miʼn kubʼ kyximane tuʼn kyoke te kyajaw», in tzaj tnaʼn kye ansyan qa te Jehová qe ẍneʼl. Ex taj Jehová tuʼn tkubʼ kyyekʼin kykʼujlabʼil kyiʼj (1 Tes. 2:7, 8). Aʼyeju ansyan in kubʼ kyyekʼin kymod ik tzeʼn jlu kyukʼil t-ẍneʼl Dios, in tzalaj Jehová kyiʼj, in nok qʼoʼn kyoklen kyuʼn erman ex in ten kykʼujlabʼil kyiʼj.

23, 24. a) ¿Alkye kyoklen ansyan at aj t-xi bʼinchet tiʼj jun il? b) Aj tbʼaj jlu, ¿tiʼ in bʼant kyuʼn ansyan tuʼn tel kynikʼ tiʼjju kbʼantel kyuʼn?

²³ Tojju Ley xi tqʼoʼn Jehová kye aj Israel, attoq kyoklen jwes ex qe ansyan tuʼn kyxqʼuqin  tiʼj kyamiwbʼil aj Israel tukʼil Jehová, tuʼn t-xi kybʼinchaʼn tiʼj junjun tiʼ at toklen tukʼil ley ex tiʼj junjuntl nya bʼaʼn. Atzun tjaqʼ tley Cristo, junxitl kyoklen ansyan at. Tuʼntzunju, qa ma kubʼ tbʼinchaʼn jun xjal jun matij il, oʼkx at kyoklen ansyan tuʼn t-xi kybʼinchaʼn tiʼj tamiwbʼil tukʼil Jehová. In nel kynikʼ tiʼj qa o txi tqʼoʼn Dios kyoklen aj kawil tuʼn t-xi kybʼinchaʼn kyiʼj nya bʼaʼn at toklen tukʼil ley. Kyjuʼtzun, at kyoklen aj kawil tuʼn tel kyiʼn kymult xjal ex tuʼn kyokx kyqʼoʼn toj cárcel (Rom. 13:1-4).

²⁴ Qa ikju, ¿tiʼ in bʼant kyuʼn ansyan aj tbʼant jun matij il? In najbʼen Tyol Dios kyuʼn tuʼn tel kynikʼ tiʼjju otoq bʼaj ex in kubʼ kyximen tiʼ kbʼantel. Ax ikx in tzaj kynaʼn qa atz tzajni tley Cristo tiʼj kʼujlabʼil. Atzun jlu in nonin kyiʼj tuʼn tel kynikʼ tiʼj tiʼ jaku bʼant kyuʼn tuʼn kyonin tiʼj jun xjal at toj kʼloj okslal aju o tzʼok bʼinchaʼn nya bʼaʼn tiʼj. Ex in nonin kʼujlabʼil kyiʼj ansyan tuʼn tel kynikʼ tiʼj qa otoq tzʼajtz tiʼj tanmi xjal otoq kubʼ tbʼinchaʼn il ex qa jaku che onin tiʼj tuʼn tbʼant tten tukʼil Jehová.

25. ¿Tiʼ qo xnaqʼtzal tiʼj toj juntl xnaqʼtzbʼil?

²⁵ Nimxix in xi qqʼoʼn chjonte tuʼnju atoʼ tjaqʼ tley Cristo. Qa qkyaqilx in nok tilil quʼn tuʼn qnimen tiʼj, in qo onin tuʼn tel kynikʼ erman tiʼj qa kʼujlaʼn qe kyuʼn txqantl ex tuʼn miʼn tkubʼ kynaʼn nya bʼaʼn. Noqtzun tuʼnj, in qo anqʼin jatumel ateʼ xjal «kyjaʼ kyxi laqʼeʼ mastl tuj mya bʼaʼn» (2 Tim. 3:13). Tuʼntzunju, il tiʼj tuʼn tok qxqʼuqin qibʼ. Noqtzun tuʼnj, aj tok ten jun xjal tiʼj jun tal kʼwaʼl, ¿tzeʼn jaku txi kybʼinchaʼn ansyan tiʼj jlu toj tumelxix? Toj juntl xnaqʼtzbʼil kxel qqʼoʼn tzaqʼwetil tiʼj xjel lu.