1, 2. a) ¿Alkye techel in kubʼ qʼoʼn tuʼntzun tel qnikʼ tiʼj qa qkyaqilx qaj qʼuqbʼil qkʼuʼj? b) ¿Alkye nya bʼaʼn o tzʼok bʼinchaʼn kyiʼj junjun tal kʼwaʼl?

QKYAQILX qaj tuʼn ttzaj qʼuqbʼaʼn qkʼuʼj, ax ikx jaku txi qqʼuqbʼaʼn kykʼuʼj txqantl. Jun techel, qa ma jaw tzʼaq jun tal kʼwaʼl ex in kʼixbʼi twi tchʼek akux in chaqin, jun rat in xiʼ tukʼil ttxuʼ moqa tman. Mlay qʼanit tal kʼwaʼl kyuʼn ttat, pero jaku txi kyqʼuqbʼaʼn tkʼuʼj. In xi kyqanin te tiʼ ma bʼaj, in nel kysuʼn taʼl twitz, in tzaj kychleʼn ex in chex yolin te tukʼil kʼujlabʼil, axpe ikx jakulo bʼaj kytxʼajoʼn jatumel otoq kʼixbʼi ex jaku tzʼok kypotzin tukʼil jun xbʼalun. Tibʼajxi jlu, ya mlay tzʼoqʼ tal kʼwaʼl, axpe ikx jaku txi saqchal juntl maj. Aj tbʼet ambʼil, kbʼantel twi tchʼek.

² Pero ateʼ junjuntl tal kʼwaʼl in che kʼixbʼi tuʼn juntl tiʼ mas kʼixkʼoj. Ateʼ junjun o che ok ten xjal kyiʼj, qa noq jun maj moqa toj nim abʼqʼi. Noq jteʼxku ambʼil, in kyaj tqʼoʼn jlu nim bʼis toj kyanmi. At maj in nel toj qʼanchaʼl aj tok ten jun xjal kyiʼj tal kʼwaʼl ex at maj in nok tilil kyuʼn tuʼn miʼn tel nikʼbʼaj kyiʼj. Maske jun rat jaku kubʼ qʼoʼn tkastiw xjal, kukx jaku kubʼ tnaʼn tal kʼwaʼl bʼis toj nim ambʼil, axpe ikx kukx jaku tzaj tbʼis ajxi tchʼiy.

3. a) Ik tzeʼn in tzaj tqʼamaʼn 2 Corintios 1:3 ex 4, ¿tiʼ taj Jehová? b) ¿Alkyeqe xjel kxel qqʼoʼn tzaqʼwebʼil kyiʼj?

³ ¿Tiʼ jaku tzʼonin tiʼj jun erman kukx in tzaj tbʼis tuʼnju ok ten jun xjal tiʼj tej tzmatoq kʼwaʼlx? (Kjawil uʼjit 2 Corintios 1:3, 4). Tuʼn jlu in nel qnikʼ tiʼj qa taj Jehová tuʼn kyok kʼujlet qe tmajen ex taj tuʼn t-xi qʼuqbʼet kykʼuʼj. Tuʼntzunju, qo xnaqʼtzan tiʼj tzaqʼwebʼil kyiʼj oxe xjel lu: ¿Tiquʼn nim toklen tuʼn t-xi qʼuqbʼet  kykʼuʼj qeju ok ten jun xjal kyiʼj tej tzmatoq kʼwaʼlx qe? ¿Alkyeqe jaku chex qʼuqbʼante kykʼuʼj? ¿Ex tiʼ jaku bʼant quʼn tuʼn t-xi qqʼuqbʼaʼn kykʼuʼj?

4, 5. a) ¿Tiquʼn nim toklen tuʼn ttzaj qnaʼn qa junxitl qe tal kʼwaʼl kywitz qe xjal ma che chʼiy? b) ¿Tiʼ in bʼaj kyiʼj tal kʼwaʼl aj tok ten jun xjal kyiʼj?

⁴ Maske ma tzikʼ nim abʼqʼi toklen bʼinchaʼn nya bʼaʼn kyiʼj junjun xjal, ateʼ junjun kukx kyaj tuʼn t-xi qʼuqbʼet kykʼuʼj. Tuʼn tel qnikʼ tiʼj tiquʼn, tnejel kʼelel qnikʼ tiʼj qa junxitl qe tal kʼwaʼl kywitz qeju ma che chʼiy. Chʼixmi tkyaqil maj, junxitl nya bʼaʼn in tzaj tiʼj jun tal kʼwaʼl aj tok ten jun xjal tiʼj. Qo xnaqʼtzan tiʼj tiquʼn.

⁵ Kyaj tal kʼwaʼl tuʼn tok qeʼxix kykʼuʼj kyiʼj qeju in che jaw chʼiysante kye ex kyiʼj qeju in che xqʼuqin kyiʼj. Noq tuʼn jlu, mintiʼ in che xobʼ ex in xi kyxnaqʼtzan kyibʼ tuʼn tok qeʼ kykʼuʼj kyiʼj xjal kʼujlaʼn qe kyuʼn (Sal. 22:9). Noqtzun tuʼnj, aj tok ten jun xjal tiʼj jun tal kʼwaʼl, nim maj ax toj tja in bʼaj jlu. At maj in bʼant jlu tuʼn jun xjal at t-xilen tukʼil moqa tuʼn jun xjal otoq tzʼok tamiwin tibʼ kyukʼil toj tja. ¿Tiʼ in bʼaj aj tok bʼinchaʼn nya bʼaʼn lu tiʼj jun tal kʼwaʼl? Aju in tzaj tuʼn jlu ya mintiʼ in nok qeʼ tkʼuʼj kyiʼj txqantl, ex kukx jaku bʼaj jlu kyoj nim abʼqʼi.

6. Aj tok ten jun xjal tiʼj jun tal kʼwaʼl, ¿tiquʼn puro nya bʼaʼn jlu ex ikʼbʼilxix?

⁶ Naʼmx tok tnabʼil jun tal kʼwaʼl. Puro nya bʼaʼn ex ikʼbʼilxix aj tok ten jun xjal tiʼj jun tal kʼwaʼl. Aj tok obligarin tuʼn tkubʼ ten tukʼil jun xjal, in nok bʼinchaʼn nim nya bʼaʼn tiʼj tuʼnju naʼmx tchʼiy, naʼmx tok tnabʼil ex naʼmx tpon t-ximbʼetz tiʼj tuʼn tkubʼ mojeʼ ex tuʼn tkubʼ kuẍe tukʼil jun xjal. Tuʼn jlu, in nel tzpet tnabʼil tiʼjju tuʼn tkubʼ kuẍe tukʼil jun xjal, mintiʼ in nel tnikʼ tiʼjx ex mintiʼ in nok qeʼ tkʼuʼj tiʼj alkyexku xjal in nok laqʼeʼ ttxlaj.

7. a) ¿Tiquʼn nya kwest tuʼn tsbʼun jun xjal tiʼj jun tal kʼwaʼl? b) Aj t-xi qʼamaʼn nya ax tok yol te jun tal kʼwaʼl, ¿tiʼ in tzaj tiʼn jlu?

⁷ Naʼmx tbʼant t-ximen jun tal kʼwaʼl tojxix tumel, naʼmx tok tnabʼil, naʼmx tel tnikʼ tiʼj tzeʼn jaku tzʼok bʼinchaʼn nya bʼaʼn tiʼj ex tzeʼn jaku tzʼok t-xqʼuqin tibʼ (1 Cor. 13:11). Tuʼntzunju, nya kwest tuʼn tkubʼ sbʼuʼn jun tal kʼwaʼl tuʼn jun xjal aj tok ten tiʼj. In xi tqʼamaʼn xjal nya ax tok yol te ex tuʼn jlu tzul nya bʼaʼn tiʼj. In xi tqʼamaʼn te qa ax at tpaj tiʼjju otoq tzʼok bʼinchaʼn tiʼj, qa mintiʼ tuʼn t-xi tqʼamaʼn te jun xjal, qa mlayx txi nimen qa ma txi tqʼamaʼn aju otoq bʼaj, moqa in xi tqʼamaʼn xjal te qa jun yekʼbʼil jlu tiʼj tkʼujlabʼil at tiʼj. Aju in tzaj tuʼn jlu, in kubʼ tsbʼuʼn tal kʼwaʼl toj nimku abʼqʼi. Jakulo jaw chʼiy tal kʼwaʼl tukʼil t-ximbʼetz qa tzʼil taʼ, qa mintiʼx tajbʼen ex qa mintiʼ toklen tuʼn tok kʼujlaʼn kyuʼn txqantl.

8. ¿Tiquʼn jaku tzʼok qeʼ qkʼuʼj tiʼj qa in xi tqʼuqbʼaʼn Jehová kykʼuʼj qeju o tzʼok bʼinchaʼn nya bʼaʼn kyiʼj?

⁸ Tuʼn tkyaqilju ma tzʼel qnikʼ tiʼj, mintiʼ tuʼn qjaw labʼin tiʼj qa in tzaj nim nya bʼaʼn tiʼj jun tal kʼwaʼl aj tok ten jun xjal tiʼj. Jun matij il jlu. Tuʼnju nim xjal in che ok ten kyiʼj tal kʼwaʼl toj ambʼil jaʼlo, a jlu in tzaj tyekʼin qa in qo anqʼin kyoj bʼajsbʼil tqʼijlalil, jatumel ateʼ nya bʼaʼn xjal, sbʼul qe ex mas in cheʼx toj il (2 Tim. 3:1-5, 13). Puro nya bʼaʼn qe tsbʼubʼil Tajaw il ex bʼisbʼajil tuʼnju in kubʼ kybʼinchaʼn xjal aju tajbʼil. Noqtzun tuʼnj, mas at tipumal Jehová twitz Satanás ex kywitz qeju in che ok lepeʼ tiʼj. Ax ikx ojtzqiʼn tuʼn Jehová tiʼ in bʼant tuʼn Satanás. Tuʼntzunju, jaku tzʼok qeʼ qkʼuʼj tiʼj qa in nel tnikʼ Jehová tiʼjju bʼis in tzaj qiʼj ex tzul tqʼuqbʼaʼn qkʼuʼj. In qo tzalaj tuʼnju in qo ajbʼen te jun Dios «in tqʼuqbʼaʼn [...] qkʼuʼj tuj tkyaqil yajbʼil qe, tuʼntzun tbʼant qqʼuqbʼante kykʼuʼj qeju in che yajlanjtz, ik tzaʼn qe ma qʼuqbʼanjtz qkʼuʼj tuʼn Dios» (2 Cor. 1:3, 4). Pero, ¿alkyeqe in che ajbʼen tuʼn Jehová tuʼn ttzaj tqʼuqbʼaʼn qkʼuʼj?

9. Ik tzeʼn kyaj ttzʼibʼin aj kawil David toj Salmo 27:10, ¿tiʼ in bʼant tuʼn Jehová kyukʼil qeju in che el ikʼun kyuʼn toj kyja?

⁹ Aqeju ok bʼinchaʼn nya bʼaʼn kyiʼj tej tzmatoq kʼwaʼlx qe tuʼnju mintiʼ bʼant tuʼn kyok xqʼuqin kyuʼn kytat, ex qeju ok bʼinchaʼn nya bʼaʼn kyiʼj kyuʼn qeju at kyxilen kyukʼil, maslo kyaj tuʼn t-xi qʼuqbʼet kykʼuʼj. Ojtzqiʼntoq tuʼn aj kawil David qa jaku tzaj tqʼuqbʼaʼn Jehová qkʼuʼj toj alkyexku ambʼil (kjawil uʼjit Salmo 27:10). Qʼuqlitoq tkʼuʼj David tiʼj qa a Jehová kxqʼuqil kyiʼj qeju in che el ikʼun kyuʼn toj kyja. ¿Alkyeqe in che ajbʼen tuʼn tuʼn ttzaj tqʼuqbʼaʼn qkʼuʼj? In che ajbʼen tmajen tuʼn. In che ok erman te toj qja. Jun techel, ok tqʼoʼn Jesús qeju e ajbʼen te Dios te titzʼin, te tanabʼ ex te ttxuʼ (Mat. 12:48-50).

10. ¿Tiʼ kubʼ ttzʼibʼin Pablo tiʼj taqʼun bʼant te ansyan?

¹⁰ Qo xnaqʼtzan tiʼj alkye tten bʼant jlu tuʼn jun okslal. Kubʼ tqʼoʼn apóstol Pablo jun tbʼanel techel, tuʼnju ok te jun tbʼanel ansyan ex kukx ten tzʼaqli. Ax ikx onin Jehová tiʼj tuʼn t-xi tqʼamaʼn kye okslal tuʼn tel kykanoʼn tiʼj techel kubʼ tqʼoʼn, ik tzeʼn bʼant tuʼn tej tel tkanoʼn tiʼj Jesús (1 Cor. 11:1). Toj jun maj, kubʼ ttzʼibʼin Pablo jlu tiʼj taqʼun bʼant te ansyan: «O tene kyxole bʼunin qyole, ik tzaʼn jun txuybʼaj kwentinxix qe tal tuʼn, ex at-xix tkʼuʼj kyiʼj» (1 Tes. 2:7). Ax ikx qe ansyan ateʼ toj ambʼil jaʼlo, in che yolin toj tumel ex tukʼil kʼujlabʼil kyukʼil qeju in tzaj bʼaj kykʼuʼj aj tajbʼen Tyol Dios kyuʼn.

11. ¿Tiʼ yekʼbʼil at tiʼj qa nya oʼkx qe ansyan jaku chex qʼuqbʼante kykʼuʼj txqantl?

¹¹ Nya oʼkx qe ansyan jaku chex qʼuqbʼante kykʼuʼj qeju o tzʼok ten jun xjal kyiʼj. Qkyaqilx bʼaʼn tuʼn t-xi qbʼiʼn nabʼil lu: «Kyqʼuqbʼam kykʼuʼje kyxolxe» (1 Tes. 4:18). Aj t-xi qʼuqbʼet tkʼuʼj jun ermana o tzʼok bʼinchaʼn nya bʼaʼn tiʼj, mas jaku bʼant jlu tuʼn jun ermana ma chʼiy toj tokslabʼil. Ax ikx in nok tqʼon tibʼ Jehová ik tzeʼn jun txubʼaj in xi tqʼuqbʼaʼn kykʼuʼj tal (Is. 66:13). In yolin Tyol Dios kyiʼj qe xuʼj xi kyqʼuqbʼaʼn kykʼuʼj qeju tzaj nya bʼaʼn kyiʼj (Job 42:11). In tzalaj Jehová aj tok tkeʼyin qa in che onin ermana kyiʼj junjuntl ermana in che bʼisun. At maj, jaku txi kyqanin ansyan te jun ermana  qa jaku bʼant tuʼn tonin tiʼj juntl ermana in bʼisun. *

12. Aj qonin tiʼj jun erman, ¿tiʼ kʼokel qxqʼuqin qibʼ tiʼj?

¹² Aj qonin tiʼj jun erman, bʼaʼn tuʼn tok qxqʼuqin qibʼ tuʼntzun miʼn t-xi qqanin jun tiʼ te qa nya taj tuʼn tyolin tiʼj (1 Tes. 4:11). Qa ikju, ¿tiʼ jaku bʼant quʼn tuʼn qonin kyiʼj qeju kyaj tuʼn t-xi qʼuqbʼet kykʼuʼj? Qo xnaqʼtzan tiʼj jweʼ nabʼil in tzaj tqʼoʼn Tyol Dios.

13. a) Ik tzeʼn in tzaj tyekʼin 1 Reyes 19:5-8, ¿tiʼ bʼant tuʼn t-anjel Jehová tiʼj Elías? b) ¿Alkye tten jaku tzʼel qkanoʼn tiʼj t-anjel Jehová?

¹³ Bʼaʼn tuʼn t-xi qbʼinchaʼn junjun tbʼanel tiʼchaq kyiʼj. Tej tel oq profeta Elías tuʼnju jakutoq kubʼ bʼyoʼn, tzaj nim tbʼis ex kubʼ t-ximen qa mas bʼaʼn tuʼn tkyim. Tuʼntzunju, tzaj tsamaʼn Jehová jun t-anjel tuʼntzun t-xi tqʼuqbʼaʼn tkʼuʼj. Xi tqʼoʼn anjel twa Elías meqʼmaj ex xi tqʼamaʼn te tuʼn twaʼn (kjawil uʼjit 1 Reyes 19:5-8). Jaku tzʼel qiʼn jun tbʼanel xnaqʼtzbʼil tiʼj txʼolbʼabʼil lu: at maj jaku tzʼonin tbʼanel qmod tiʼj jun xjal in bʼisun. Bʼalo jaku txi qqʼoʼn jun twa, jun oyaj te moqa jaku kubʼ qtzʼibʼin jun tal uʼj te kyukʼil tbʼanel yol tuʼn tel tnikʼ tiʼj qa kʼujlaʼn quʼn ex qa in qo ximen tiʼj. Jaku bʼant jlu quʼn tukʼil jun erman in bʼisun qa mintiʼ in ten qipumal tuʼn qyolin kyiʼj qe tiʼchaq o che ikʼ tiʼj.

14. ¿Tiʼ juntl xnaqʼtzbʼil jaku tzʼel qiʼn tiʼj txʼolbʼabʼil tiʼj Elías?

¹⁴ Tzʼok tilil quʼn tuʼn tel kynikʼ qeju o tzʼok bʼinchaʼn nya bʼaʼn kyiʼj qa xqʼuqin ateʼ ex tuʼn tkubʼ kynaʼn bʼaʼn. Qo yolin juntl maj tiʼjju bʼaj tiʼj Elías. Bʼant jun milagr tuʼn Jehová tej t-xi tqʼoʼn tipumal tuʼn tpon tzmax twi witz Horeb, jatumel otoq kyaj bʼant tiʼj jun tyol Jehová kyukʼil tmajen. Toj lugar aju, kubʼlo tnaʼn Elías qa otoq klet ex qa otoq tzʼel laqʼeʼ kyiʼj aj qʼoj. ¿Tiʼ juntl xnaqʼtzbʼil jaku tzʼel qiʼn tiʼj txʼolbʼabʼil lu? Tuʼn jlu in nel qnikʼ tiʼj qa qaj tuʼn qonin kyiʼj qeju o tzʼok bʼinchaʼn nya bʼaʼn kyiʼj, tnejel kʼelel qnikʼ tiʼj qa mintiʼ in che xobʼ. Jun techel, nim toklen tuʼn tel kynikʼ ansyan tiʼj qa junxitl in tnaʼn teyele junjun erman. Bʼalo mas tbʼanel in nela toj twitz jun ermana tuʼn tyolin akux in che kʼaʼn tiʼj jun vas kapé atz tja, atzun junjuntl, maslo bʼaʼn in nela toj kywitz tuʼn kyyolin toj Ja te Chmabʼil tuʼntzun t-xi kyqʼamaʼn aju o tzikʼ kyiʼj.

15, 16. ¿Tiʼ t-xilen aju tuʼn kyok qbʼiʼn txqantl?

¹⁵ Bʼaʼn tuʼn kyok qbʼiʼn. In tzaj tqʼoʼn Tyol Dios tbʼanel nabʼil lu qe: «Kykyaqile bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline» (Sant. 1:19). ¿Bʼaʼnpe qo bʼin? Jakulo kubʼ qximen qa oʼkx jaku che ok qbʼiʼn txqantl aj qkubʼ qeʼ, aj t-xi qkeʼyin toj kywitz ex qa mintiʼ ma t-xi qqʼamaʼn jun qyol. Noqtzun tuʼnj, nya oʼkx jlu jaku bʼant quʼn aj kyoj qbʼiʼn txqantl. Qo xnaqʼtzan tiʼjju bʼant tuʼn Jehová tiʼj Elías. Tej otoqxi bʼaj tqʼamaʼn Elías tkyaqilju tbʼis ex tkyaqilju in bʼajtoq tkʼuʼj tiʼj, ok tqʼoʼn Jehová twiʼ tiʼj. El tnikʼ Jehová tiʼj qa in xobʼtoq, qa kubʼ t-ximen qa tjunalxtoq at ex qa mintiʼ tajbʼen taqʼun otoq bʼant. Tukʼil kʼujlabʼil onin Jehová tiʼj tukʼil teyele junjun tiʼchaq tzaj bʼaj tkʼuʼj Elías tiʼj. Iktzun tten kubʼ tyekʼin Jehová qa ok tqʼoʼn twiʼ kyiʼj tyol Elías (1 Rey. 19:9-11, 15-18).

¹⁶ Akux in qo bʼin tiʼj jun erman ok ten jun xjal tiʼj tej tzmatoq tal kʼwaʼlx, qo ximen tiʼj tzeʼn jaku kubʼ qyekʼin qkʼujlabʼil ex qʼaqʼbʼil qkʼuʼj tiʼj. Aj t-xi qqʼamaʼn jun tbʼanel qyol te, kbʼel qyekʼin aju in kubʼ qnaʼn tiʼj. Jaku txi qqʼamaʼn jlu te: «In tzaj nbʼise tiʼjju bʼaj tiʼja. Mintiʼ tuʼn tok tbʼinchaʼn jun xjal jlu tiʼj jun tal kʼwaʼl». Ex tuʼn telxix qnikʼ tiʼjju otoq tzaj tqʼamaʼn qe, bʼalo jaku txi qqanin te tuʼn tonin qiʼj tuʼn ttzaj  tqʼamaʼn juntl maj qe tyol moqa jaku txi qqʼamaʼn jlu te: «Tej xyolina tiʼj jlu, ma tzʼel nnikʼe tiʼj qa..., ¿ikpe tten?». Aj tbʼant jlu quʼn, kbʼel qyekʼin qa in qo bʼin tiʼj tukʼil kʼujlabʼil ex qa in nok tilil quʼn tuʼn tel qnikʼ tiʼj (1 Cor. 13:4, 7).

17. ¿Tiquʼn nim toklen tuʼn tten qpasens ex tuʼn miʼn txi qqʼamaʼn naj jun tiʼ?

¹⁷ Ax ikx bʼaʼn tuʼn tok tilil quʼn tuʼn miʼn txi qqʼamaʼn naj jun tiʼ. Miʼn qo ok ten yolil akux in yolin xjal ex miʼn txi qqʼoʼn naj jun nabʼil te. Bʼaʼn tuʼn tten qpasens. Tej tbʼaj tqʼamaʼn Elías tkyaqilju tzaj bʼaj tkʼuʼj tiʼj te Jehová, mintiʼ kubʼ tewin jun tiʼ. Pero tej otoqxi txi tqʼuqbʼaʼn Jehová tkʼuʼj Elías, ok ten Elías qʼamalte juntl maj qe tbʼis te (1 Rey. 19:9, 10, 13, 14). Tuʼn jlu in nel qnikʼ tiʼj qa nyalo oʼkx jun maj tzul kyqʼamaʼn xjal kybʼis qe. Aj tbʼaj jlu, bʼaʼn tuʼn tten qpasens kyiʼj tuʼntzun kyok qbʼiʼn, ik tzeʼn bʼant tuʼn Jehová. Bʼaʼn tuʼn tkubʼ qyekʼin qkʼujlabʼil ex qʼaqʼbʼil qkʼuʼj kyiʼj twitzju tuʼn t-xi qqʼamaʼn kye tzeʼn jaku che ex twitz nya bʼaʼn (1 Ped. 3:8).

18. ¿Alkyeqe naʼj Dios jaku tzʼonin kyiʼj qeju in che bʼisun ex tiquʼn?

¹⁸ Bʼaʼn tuʼn qnaʼn Dios tuʼn tkyaqil qkʼuʼj kyukʼil qeju in che bʼisun. Aj ttzaj tbʼis jun xjal, bʼalo kwest tuʼn tnaʼn Dios. In kubʼlo t-ximen qa mintiʼ toklen tuʼn tyolin tukʼil Jehová. Qa qaj tuʼn qonin tiʼj, bʼaʼn tuʼn qnaʼn Dios tukʼil ex qqʼamanx tbʼi. Bʼaʼn tuʼn t-xi qqʼamaʼn te Jehová qa atxix qkʼujlabʼil tiʼj ex qa kʼujlaʼn kyuʼn erman. Ax ikx, bʼaʼn tuʼn qkubʼsan twitz Jehová tuʼn tonin tiʼj tmajen tuʼntzun tchewix tanmi. Aj kybʼant naʼj Dios ik tzeʼn jlu quʼn, jaku tzʼonin kyiʼj qeju in che bʼisun (Sant. 5:16).

19. ¿Tiʼ jaku tzʼonin qiʼj tuʼntzun tbʼaj qbʼinchaʼn qten aj t-xi qqʼuqbʼaʼn tkʼuʼj jun xjal?

¹⁹ Qjyonktz tbʼanel qyol jaku txi tqʼuqbʼaʼn kykʼuʼj txqantl ex jaku tzʼonin kyiʼj. Bʼaʼn tuʼn qximen kyiʼj qyol naʼmxtoq t-xi qqʼamaʼn. Qa mintiʼ ma bʼant quʼn, jaku kux chyoʼn toj tanmi jun xjal tuʼn, pero qa ma qo ximen tiʼj, kʼokel ik tzeʼn jun qʼanbʼil te te (Prov. 12:18). Tuʼntzunju,  bʼaʼn tuʼn t-xi qqanin te Jehová tuʼn tonin qiʼj tuʼn kykanet tbʼanel qyol tuʼntzun t-xi qqʼuqbʼaʼn kykʼuʼj qeju in che bʼisun ex tuʼn tonin kyiʼj. Bʼaʼn tuʼn ttzaj qnaʼn qa mas at kyipumal yol in che jatz toj Tyol Dios, tuʼnju atz in che tzaj tukʼil Jehová (Heb. 4:12).

20. Tuʼnju o tzʼok bʼinchaʼn nya bʼaʼn kyiʼj junjun, ¿tiʼ jaku kubʼ kyximen ex tiʼ jaku t-xi qnaʼn kye?

²⁰ Ateʼ junjun in kubʼ kyximen qa mintiʼ kyoklen, qa tzʼil qe ex qa nya kʼujlaʼn qe kyuʼn txqantl noq tuʼnju ok ten jun xjal kyiʼj tej tzmatoq kʼwaʼlx qe. Ax ikx in kubʼ kyximen qa mintiʼ kyoklen tuʼn kyok kʼujlaʼn kyuʼn txqantl. Pero nya ax tok qe yol lu. Tuʼntzunju, bʼaʼn tuʼn tajbʼen Tyol Dios quʼn tuʼn t-xi qnaʼn kye qa nim kyoklen toj twitz Jehová (qʼonka twitza tiʼj recuadro « Qe taqikʼ Tyol Dios jaku txi tqʼuqbʼaʼn kykʼuʼj txqantl»). Tej ttzaj bʼaj tkʼuʼj profeta Daniel ex tej tkubʼ tnaʼn qa mintiʼtoq tipumal, tzaj tsamaʼn Jehová jun t-anjel tuʼn t-xi tqʼuqbʼaʼn tkʼuʼj tuʼntzun tel tnikʼ tiʼj qa kʼujlaʼntoq tuʼn ex qa attoq toklen toj twitz (Dan. 10:2, 11, 19). Ax jlu in bʼant tuʼn Jehová toj ambʼil jaʼlo, nim kyoklen tmajen toj twitz.

21. a) ¿Tiʼ kbʼajel kyiʼj qeju in che ok ten kyiʼj tal kʼwaʼl qa mintiʼ ma tzʼajtz tiʼj kyanmi? b) ¿Tiʼ qaj tuʼn tbʼant quʼn kyiʼj qeju o tzʼok bʼinchaʼn nya bʼaʼn kyiʼj?

²¹ Aj t-xi qqʼuqbʼaʼn kykʼuʼj txqantl, in xi qnaʼn kye qa kʼujlaʼn qe tuʼn Jehová. Ax ikx, mintiʼ tuʼn tikʼ tnaʼl quʼn qa kxel tbʼinchaʼn Jehová tiʼj nya bʼaʼn. Mintiʼ jun tiʼ ewin twitz Jehová tuʼnju in keʼyin tiʼj tkyaqil ex kbʼel tqʼoʼn kykastiw qeju o che ok ten kyiʼj tal kʼwaʼl qa mintiʼ ma tzʼajtz tiʼj kyanmi (Núm. 14:18). Akux in pon ambʼil lu, tzʼok tilil quʼn tuʼn tkubʼ qyekʼin qkʼujlabʼil kyiʼj qeju o tzʼok ten jun xjal kyiʼj. In chewix qanmi tuʼnju in nel qnikʼ tiʼj qa kʼelel tiʼn Jehová kybʼis qeju o tzʼok bʼinchaʼn nya bʼaʼn kyiʼj tuʼn Satanás ex kyuʼn xjal ateʼ tjaqʼ tkawbʼil. Toj chʼintl ambʼil, ya mlay che tzaj qnaʼn qeju bʼis lu (Is. 65:17).