1. ¿Tiʼ oklenj xi qʼoʼn te Jehoás, Uzías ex Josías?

 NOQWIT xi qʼoʼn toklena tuʼn tkawina tibʼaj ttnam Dios ex tzmatoq kuʼxuna, ¿tiʼwtlo kubʼ tnaʼna? ¿Jakupe tzʼajbʼen toklena tuʼna toj tumel? In yolin Biblia kyiʼj junjun kuʼxun xi qʼoʼn kyoklen tuʼn kyok te rey tibʼaj tnam Judá. Jun techel, tzmatoq qʼiʼn 7 abʼqʼi tuʼn Jehoás tej t-xi qʼoʼn toklen te rey. Atzunte Uzías qʼiʼntoq 16 abʼqʼi tuʼn ex te Josías qʼiʼntoq 8 abʼqʼi tuʼn. Nyatoq fácil kyoklen kuʼxun lu xi qʼoʼn. Maske ikju, onin Jehová ex junjuntl xjal kyiʼj tuʼn kybʼant tbʼanel tiʼchaq kyuʼn ex tuʼn kyex kywitz junjun nya bʼaʼn.

2. ¿Tiquʼn bʼaʼn tuʼn qxnaqʼtzan tiʼjju bʼaj toj tanqʼibʼil Jehoás, Uzías ex Josías?

² Toj ambʼil jaʼlo, mlay tzaj qʼoʼn qoklen te rey nix te reina. Pero jaku tzʼel qiʼn tbʼanel xnaqʼtzbʼil tiʼj kyanqʼibʼil oxe kuʼxun lu. Jaku tzʼel qiʼn jun xnaqʼtzbʼil kyiʼj tbʼanel tiʼchaq bʼant kyuʼn ex kyiʼj nya bʼaʼn kubʼ kybʼinchaʼn. Aju ikʼ toj kyanqʼibʼil, in tzaj tyekʼin qe qa nim toklen tuʼn qximen tiʼj alkyeqe che okel te qamiw, qa nim toklen tuʼn tkubʼ qin qibʼ ex tuʼn qjyon tiʼj Jehová.

3. ¿Tiʼ bʼant tuʼn Jehoás tuʼnju onin Jehoiadá tiʼj?

³ Jyoʼnktza aju mas tbʼanel ik tzeʼn te Jehoás. Kyim tman Jehoás tej tzmatoq kʼwalx. Tuʼntzunju, jaw chʼiysaʼn tuʼn tnejel pal Jehoiadá ex xi tqʼoʼn xnaqʼtzbʼil te tiʼj Jehová. Kubʼ tyekʼin Jehoás qa ten tnabʼil tuʼnju xi tbʼiʼn qe consej xi tqʼoʼn Jehoiadá te. Tuʼnju ten jun tbʼanel tamiw, kubʼ t-ximen tuʼn tajbʼen te Jehová ex onin kyiʼj txqantl tuʼn tbʼant ax jlu kyuʼn. Ax ikx, bʼaj tbʼinchaʼn chʼintl templo (2 Crón. 24:1, 2, 4, 13, 14).

4. Qa ma tzʼok qqʼoʼn kyoklen tkawbʼil Jehová, ¿tzeʼn jaku tzʼonin jlu qiʼj? (Proverbios 2:1, 10-12).

 ⁴ Qa in xi qʼoʼn xnaqʼtzbʼil teya kyuʼn tmana moqa tuʼn juntl erman tuʼn tok tkʼujlaʼna Jehová, in xi qʼoʼn jun tbʼanelxix oyaj teya (kjawil uʼjit Proverbios 2:1, 10-12). Jaku txi kyqʼoʼn mambʼaj xnaqʼtzbʼil kye kykʼwal toj junxichaq tten. Qo xnaqʼtzan tiʼjju bʼant kyuʼn tman jun ermana Katia tbʼi tuʼn kyonin tiʼj tuʼn tjaw tskʼoʼn aju mas tbʼanel. Tej t-xi qʼiʼn Katia tuʼn tman toj escuela, el tpaʼn ambʼil tuʼn tyolin tukʼil tiʼj texto diario. Tqʼama Katia jlu: «Ayeju tiʼchaq o yoline tiʼj tukʼil nmane, e onin wiʼje tej wok weʼye kywitz nya bʼaʼn junjun qʼij». Ax ikx, jakulo che kubʼ tqʼoʼn tmana junjun kawbʼil in jatz kyiʼn toj Biblia ex tuʼn jlu jakulo kubʼ t-ximana qa in nel kyiʼn ambʼil teya tuʼn tkubʼ tbʼinchaʼna aju teya taj. Qa in kubʼ t-ximana jlu, ¿tiʼ jaku tzʼonin tiʼja tuʼn t-xi tbʼiʼna kyyol? In tzaj tqʼamaʼn jun ermana Anastasia tbʼi qa nya oʼkx e kubʼ tqʼoʼn tman junjun kawbʼil, sino ax ikx xi kyqʼamaʼn te tiquʼn bʼant jlu kyuʼn. Tqʼama jlu: «Tej ttzaj kyqʼamaʼn weye tiquʼn e kubʼ kyqʼoʼn junjun kawbʼil, onin wiʼje tuʼn tel nnikʼe tiʼj qa kʼujlaʼn qine kyuʼn ex qa kyaj tuʼn kyxqʼuqin wiʼje».

5. ¿Tiʼ jaku kubʼ tnaʼn Jehová ex qe tmana tiʼjju in bʼant tuʼna? (Proverbios 22:6; 23:15, 24, 25).

⁵ Kbʼel kynaʼn tmana nimxix tzalajbʼil qa ma txi tbʼiʼna qe consej in xi kyqʼoʼn teya aʼyeju in jatz kyiʼn toj Biblia. Nya oʼkxju, ax ikx ktzalajel Jehová tiʼja ex jaku ten tamiwbʼila tukʼil te jumajx (kjawil uʼjit Proverbios 22:6; 23:15, 24, 25). Tuʼntzunju, tbʼanel qa ma kubʼ t-ximana tuʼn tel tkanoʼna kyiʼj tbʼanel tiʼchaq bʼant tuʼn Jehoás tej tzmatoq kuʼxun.

6. ¿Alkyeqe consej xi tbʼiʼn Jehoás ex tiʼ tzaj tiʼj tuʼn jlu? (2 Crónicas 24:17, 18).

⁶ Qʼiʼmela jun xnaqʼtzbʼil kyiʼj nya bʼaʼn tiʼchaq bʼant tuʼn Jehoás. Tej tkyim Jehoiadá, ok tmojbʼan tibʼ Jehoás kyukʼil nya bʼaʼn amiw (kjawil uʼjit 2 Crónicas 24:17, 18). Xi tbʼiʼn consej xi qʼoʼn te kyuʼn nejenel te Judá maske nya kʼujlaʼntoq Jehová kyuʼn. Maswitlo tbʼanel noqwit el tpan tibʼ Jehoás kyiʼj tuʼnju kubʼ kybʼinchaʼn nya bʼaʼn (Prov. 1:10). Noqtzun tuʼnj, mintiʼ bʼant jlu tuʼn ex xi tbʼiʼn kyyol nya bʼaʼn tamiw. Ex tej t-xi qʼoʼn onbʼil te tuʼn jun tprim Zacarías tbʼi, xi tqʼamaʼn tuʼn tkubʼ bʼyoʼn (2 Crón. 24:20, 21; Mat. 23:35). Bʼisbʼajil tuʼnju kubʼ tyekʼin Jehoás qa mintiʼ ten tnabʼil. E bʼant tbʼanel tiʼchaq tuʼn toj tanqʼibʼil, pero yajxitl ok te jun apóstata ex te jun bʼyol xjal. Ex tej tikʼ ambʼil, kubʼ bʼyoʼn kyuʼn tmajen (2 Crón. 24:22-25). Noqwit xi tbʼiʼn Jehoás tyol Jehová ex kyyol tmajen, mintiʼwtlo e bʼaj tiʼchaq lu tiʼj. ¿Tiʼ xnaqʼtzbʼil jaku tzʼel tiʼna tiʼj txʼolbʼabʼil lu?

7. ¿Alkyeqe tamiwa bʼaʼn tuʼn tjaw tjyoʼna? (Ax ikx qʼonka twitza tiʼj foto).

 ⁷ Jaku tzʼel qiʼn jun tbʼanel xnaqʼtzbʼil kyiʼj nya bʼaʼn tiʼchaq e bʼant tuʼn Jehoás. ¿Alkye? Qa nim toklen tuʼn kyjaw qskʼoʼn qamiw in tzalaj Jehová kyiʼj ex kʼujlaʼn kyuʼn. Qa ma bʼant jlu quʼn, jaku che onin qiʼj tuʼn t-xi qbʼinchaʼn aju mas bʼaʼn. Ex jaku che ten qamiw te junxichaq kyabʼqʼi. Qa ma tzaj qnaʼn, mastoq matij Jehoiadá twitz Jehoás. Ximana kyiʼj tamiwa ex xjelinkuya jlu: «¿In che oninpe wiʼje tuʼn tchʼiy mas qʼuqbʼil nkʼuʼje tiʼj Jehová? ¿In tzajpe kyqʼamaʼn weye qa mas tbʼanel tuʼn wok lepeʼye kyiʼj tkawbʼil? ¿Kyganpe tuʼn kyyolin tiʼj Jehová ex tiʼjju in nel kynikʼ tiʼj toj Biblia? ¿In nokpe kyqʼoʼn toklen tkawbʼil? ¿In tzajpe kyqʼoʼn jun consej weye aj wel txalpaje?» (Prov. 27:5, 6, 17). Qa nya kʼujlaʼn Jehová kyuʼn tamiwa, mas bʼaʼn qa ma tzʼel tpan tibʼa kyiʼj. Pero qa kʼujlaʼn kyuʼn, tbʼanel tuʼn ttena kyukʼil tuʼnju jaku che onin tiʼja (Prov. 13:20).

8. ¿Tiʼ bʼaʼn tuʼn t-ximana tiʼj qa in najbʼen redes sociales tuʼna?

⁸ In che onin redes sociales qiʼj tuʼn qyolin kyukʼil qamiw ex qfamiliar. Noqtzun tuʼnj, ateʼ junjun xjal in kubʼ kyqʼoʼn foto moqa video kyiʼj tiʼchaq in tzaj kylaqʼoʼn moqa in bʼant kyuʼn noq tuʼn kyjaw labʼin txqantl kyiʼj. Qa in che ajbʼen redes sociales tuʼna, bʼaʼn tuʼn tkubʼ t-xjelina: «¿In nokpe tilil wuʼne tuʼn tok kyqʼoʼn txqantl kywitz wiʼje? ¿In kubʼpe kyximen qa in jaw nnimsan wibʼe moqa waje tuʼn wonine kyiʼj? ¿In kubʼpe nchʼexpuʼne nximbʼetze, nmode ex aju alkye tten in chin yoline noq tuʼn kytzalaj txqantl?». Ten ermano Nathan Knorr kxol erman in che ajbʼen te Cuerpo Gobernante. Ex toj jun ambʼil, tzaj tqʼoʼn consej jlu: «Mi al jun ktzalajel kyiʼje qa ma tzʼok tilil kyuʼne tuʼn kytzalaj txqantl. Tuʼntzunju, mas tbʼanel tuʼn ttzalaj Jehová kyuʼne ex che tzalajel tmajen kyiʼje».

9. ¿Tiʼ bʼant tuʼn Uzías tuʼnju onin Jehová tiʼj? (2 Crónicas 26:1-5).

⁹ Jyoʼnktza aju mas tbʼanel ik tzeʼn te Uzías. Tej tzmatoq kʼwalx Uzías, kubʼ tin tibʼ ex ok tilil tuʼn tuʼn tnimen te Dios. Anqʼin 68 abʼqʼi ex tzaj kʼiwlaʼn tuʼn Jehová toj chʼixme tkyaqil tanqʼibʼil (kjawil uʼjit 2 Crónicas 26:1-5). Kubʼ kyiʼj nim aj qʼoj tuʼn Uzías ex ok tilil tuʼn tuʼn t-xqʼuqin tiʼj tnam Jerusalén (2 Crón. 26:6-15). Kubʼlo tnaʼn Uzías nim tzalajbʼil tiʼj tkyaqilju bʼant tuʼn noq tuʼn tonbʼil Jehová (Ecl. 3:12, 13).

10. ¿Tiʼ bʼaj tiʼj Uzías?

¹⁰ Qʼiʼmela jun xnaqʼtzbʼil kyiʼj nya bʼaʼn tiʼchaq bʼant tuʼn Uzías. Naqʼlitoq Uzías tuʼn t-xi tqʼamaʼn kye txqantl tiʼ tuʼn tbʼant kyuʼn. Tuʼn jlu, kubʼlo t-ximen qa jakutoq txi tbʼinchaʼn noq tiʼxku taj. Toj jun ambʼil, okx toj templo ex kubʼ tpatin incienso twitz altar, jun aqʼuntl mlaytoq bʼant kyuʼn rey (2 Crón. 26:16-18). Tej tbʼant jlu tuʼn, xi kawin tuʼn pal Azarías, pero tzaj tqʼoj tiʼj. Bʼisbʼajil tuʼnju mintiʼ ten Uzías tzʼaqli twitz Jehová ex kubʼ tqʼoʼn tkastiw tej ttzaj lepra tiʼj (2 Crón. 26:19-21). Noqwit kukx kubʼ tin tibʼ Uzías, maswitlo tbʼanel tanqʼibʼil ten.

11. ¿Tiʼ in bʼant tuʼn jun xjal qa in kubʼ tin tibʼ? (Ax ikx qʼonka twitza kyiʼj foto).

¹¹ Tej tok Uzías te jun rey nim toklen, ya mintiʼ xi tqʼoʼn chjonte te Jehová tiʼj tkyaqilju otoq bʼant tuʼn tiʼj. ¿Tiʼ xnaqʼtzbʼil jaku tzʼel qiʼn tiʼj? Qa mintiʼ tuʼn tikʼ tnaʼl quʼn qa a Jehová in tzaj qʼonte tkyaqil tbʼanel tiʼchaq in che ikʼ toj qanqʼibʼil ex toj qajbʼebʼil te. Tuʼntzunju, mas bʼaʼn tuʼn t-xi qqʼoʼn chjonte te ex mintiʼ tuʼn tjaw qnimsan qibʼ tiʼjju in bʼant quʼn (1 Cor. 4:7). b Ax ikx, nim toklen  tuʼn tel qnikʼ tiʼj qa nya tzʼaqli qoʼ ex qa il tiʼj tuʼn kytzaj qʼoʼn consej qe. Qʼiʼn mas te 60 abʼqʼi tuʼn jun erman ex kubʼ ttzʼibʼin jlu: «O tzʼel nnikʼe tiʼj qa mintiʼ tuʼn ttzaj bʼaj nkʼuʼje aj ttzaj kyqʼamaʼn txqantl weye tiʼ otoq chin el txalpaje tiʼj. Qa ma tzaj qʼoʼn jun consej weye tuʼnju otoq txi nbʼinchaʼne junjun tiʼchaq nya toj tumel, in che bʼant chʼixpubʼil wuʼne ex in nok tilil wuʼne tuʼn t-xi nqʼoʼne aju mas tbʼanel te Jehová». Qa ma qo nimen te Jehová ex qa mintiʼ ma jaw qnimsan qibʼ, jaku qo tzalaj toj qanqʼibʼil (Prov. 22:4).

12. ¿Tiʼ bʼant tuʼn Josías tuʼn tjyon tiʼj Jehová tej tzmatoq kuʼxun? (2 Crónicas 34:1-3).

¹² Jyoʼnktza aju mas tbʼanel ik tzeʼn te Josías. Qʼiʼntoq 16 abʼqʼi tuʼn Josías tej t-xi tzyet tuʼn tjyon tiʼj Jehová. Tajtoq tuʼn tel tnikʼ tiʼj ex tuʼn t-xi tbʼinchaʼn aju tajbʼil. Pero nya fácil ela toj twitz Josías tuʼn tajbʼen te rey tuʼnju e kʼulin chʼixme kykyaqil xjal kywitz nya ax tok dios. Tuʼntzunju, iltoq tiʼj tuʼn tkubʼ tyekʼin tipumal tuʼn tkolin tiʼj kʼulbʼil axix tok ex atzun jlu bʼant tuʼn. Naʼmxtoq tjapun twi 20 abʼqʼi tej t-xi tzyet tuʼn tel tiʼn kykyaqil tiʼchaq at kyoklen tukʼil kʼulbʼil nya axix tok (kjawil uʼjit 2 Crónicas 34:1-3).

13. Qa ma txi tqʼamaʼna te Jehová tuʼn tajbʼena te, ¿tzeʼn jaku tzʼonin jlu tiʼja?

¹³ Maske kuʼxun teya, jaku tzʼel tkanoʼna tiʼj tbʼanel techel kyaj tqʼoʼn Josías. Jaku bʼant jlu tuʼna aj tjyona tiʼj Jehová ex aj tok tilil tuʼna tuʼn tel tnikʼa kyiʼj tbʼanel tmod. Qa ma bʼant jlu tuʼna, jaku tzʼonin tiʼja tuʼn t-xi tqʼamaʼna te Jehová tuʼn tajbʼena te. ¿Ex alkyeqe kʼiwlabʼil tzul tkʼamoʼna? In tzaj tqʼamaʼn Luke jlu, jun kuʼxun bautisarin tej qʼiʼntoq 14 abʼqʼi tuʼn: «Atxix toj qʼij jaʼlo, kbʼel nqʼoʼne wajbʼebʼile te Jehová tnejel toj wanqʼibʼile ex kʼokel tilil wuʼne tuʼn ttzalaj wiʼje» (Mar. 12:30). Qa ma tzʼok tilil tuʼna tuʼn t-xi tbʼinchaʼna ax jlu, tzul tkʼamoʼna nim kʼiwlabʼil.

14. ¿Tiʼ in bʼant kyuʼn junjun kuʼxun tuʼn tel kykanoʼn tiʼj rey Josías?

¹⁴ ¿Alkyeqe prueba in che ok weʼ kuʼxun twitz? Bautisarin Johan tej qʼiʼntoq 12 abʼqʼi tuʼn ex in tzaj tqʼamaʼn qa in nok tilil kyuʼn tukʼil toj escuela tuʼn tajbʼen cigarrillos electrónicos tuʼn. ¿Tiʼ onin tiʼj Johan tuʼn miʼn tkubʼ tkʼuʼj kyuʼn txqantl? Ximen tiʼj alkyeqe nya bʼaʼn jakutoq che tzaj tiʼj ex  tiʼj tamiwbʼil tukʼil Jehová. Bautisarin Rachel tej tzmatoq qʼiʼn 14 abʼqʼi tuʼn ex in tzaj tqʼamaʼn tiʼ in bʼant tuʼn tuʼn tex kywitz nya bʼaʼn in nok weʼ twitz toj escuela. Tqʼama jlu: «In nok tilil wuʼne tuʼn t-xi njyoʼne junjun tiʼchaq in che onin wiʼje tuʼn ttzaj nnaʼne Jehová ex Tyol. At maj, in tzaj nnaʼne jun txʼolbʼabʼil moqa jun profecía aj qxnaqʼtzane tiʼj curso te historia toj clase. Ex aj nyoline kyukʼil txqantl toj escuela, in chin ximane tiʼj jun texto jaku txi nqʼamaʼne kye». Bʼalo nya aʼyex nya bʼaʼn in nok weʼya twitz ik tzeʼn te Josías, pero jaku ten tnabʼila ik tzeʼn te ex jaku tena tzʼaqli twitz Jehová. Qa ma tzʼok tilil tuʼna tuʼn texa kywitz nya bʼaʼn toj ambʼil jaʼlo, mas nya kwest kʼelel toj twitza toj ambʼil tzul.

15. ¿Tiʼ onin tiʼj Josías tuʼn kukx tajbʼen te Jehová? (2 Crónicas 34:14, 18-21).

¹⁵ Tej qʼiʼntoq 26 abʼqʼi tuʼn Josías, xi tzyet tuʼn tbʼaj tbʼinchaʼn chʼintl templo. Tej in che aqʼunantoq xjal, kanet «libro jatum tzʼibʼan tley Dios, aju otoq kyaj ttzʼibʼan Moisés». Tej tok tbʼiʼn rey aju in tzaj tqʼamaʼn libro, e bʼant junjun chʼixpubʼil tuʼn tuʼn t-xi tnimen Tley Jehová (kjawil uʼjit 2 Crónicas 34:14, 18-21). Yajtzun teya, ¿taja tuʼn tjaw tuʼjina Tyol Dios tkyaqil qʼij? Qa ya in bʼant tuʼna, ¿in kubʼpe tnaʼna tzalajbʼil aj tuʼjina tiʼj? Ex qa tbʼanel ma tzʼela jun versículo toj twitza, ¿tiʼ in xi tbʼinchaʼna tuʼn miʼn tikʼ tnaʼl tuʼna? In tzaj tqʼamaʼn Luke, aju ma qo yolin tiʼj toj párrafo 13, qa in kubʼ ttzʼibʼin toj jun cuaderno alkyeqe xnaqʼtzbʼil tbʼanel in che ela toj twitz. Qa ma tzʼel tkanoʼna tiʼjju in bʼant tuʼn Luke, jaku che tzaj tnaʼna qe texto ex qe xnaqʼtzbʼil tbʼanel in che ela toj twitza. Qa mas ma tzʼok tojtzqiʼna Biblia ex mas ma tzʼok tkʼujlaʼna, mas ktzalajela tuʼn tajbʼena te Jehová. Qa ma bʼant jlu tuʼna, kʼonil Tyol Dios tiʼja tuʼn t-xi tbʼinchaʼna aju bʼaʼn ik tzeʼn bʼant tuʼn Josías.

16. ¿Tiquʼn el txalpaj Josías ex tiʼ xnaqʼtzbʼil jaku tzʼel qiʼn tiʼj?

¹⁶ Qʼiʼmela jun xnaqʼtzbʼil kyiʼj nya bʼaʼn tiʼchaq bʼant tuʼn Josías. Tej qʼiʼntoq 39 abʼqʼi  tuʼn Josías, kubʼ tbʼinchaʼn jun tiʼ nya toj tumel ex kyim tuʼn jlu. Toj ambʼil lu, mintiʼ ok qeʼ tkʼuʼj tiʼj Jehová ex ok qeʼ tkʼuʼj tiʼjx (2 Crón. 35:20-25). ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj? Qa nim toklen tuʼn kukx qjyon tiʼj Jehová maske o tzikʼ nim ambʼil in qo xnaqʼtzan tiʼj Biblia moqa ya o qo tijen. Tuʼn tkubʼ qyekʼin qa in bʼant jlu quʼn, nim toklen tuʼn qnaʼn Dios te, tuʼn qxnaqʼtzan tiʼj Tyol ex tuʼn t-xi qbʼiʼn qe consej in che tzaj qʼoʼn qe kyuʼn erman o che chʼiy toj kyokslabʼil. Qa ma bʼant jlu quʼn, mlaylo kubʼ qbʼinchaʼn jun matij il ex mas qo tzalajel toj qanqʼibʼil (Sant. 1:25).

17. ¿Tiʼ xnaqʼtzbʼil ma tzʼel qnikʼ tiʼj tej ma qo xnaqʼtzan tiʼj kyanqʼibʼil oxe rey te Judá?

¹⁷ Jaku che tzalaj kuʼxun tiʼj kyanqʼibʼil. Aju historia tiʼj Jehoás, Uzías ex Josías in tzaj kyyekʼin qe qa jaku tzalaj Jehová kyuʼn kʼwal ex kyuʼn kuʼxun, ex qa jaku jaw kyskʼoʼn aju mas tbʼanel. I el txalpaj oxe xjal lu ex tzaj nya bʼaʼn kyiʼj. Pero qa ma tzʼel tkanoʼna kyiʼj tbʼanel tiʼchaq bʼant kyuʼn ex qa mintiʼ ma kubʼ tbʼinchaʼna qe tiʼchaq i el txalpaj tiʼj, jaku tzalaja toj tanqʼibʼila.

18. ¿Alkyeqe techel ma qo yolin tiʼj in tzaj kyyekʼin qe qa jaku qo tzalaj toj qanqʼibʼil? (Ax ikx qʼonka twitza tiʼj dibujo).

¹⁸ Ax ikx in yolin Biblia kyiʼj junjuntl kuʼxun e ok laqʼeʼ ttxlaj Jehová ex e tzalaj toj kyanqʼibʼil. Kyxol qe kuʼxun lu, ten David. Tej tzmatoq kuʼxun, kubʼ t-ximen tuʼn tok te tamiw Jehová ex ten tzʼaqli twitz tej tajbʼen te rey. Maske at maj el txalpaj, tzalaj Jehová tiʼj (1 Rey. 3:6; 9:4, 5; 14:8). Qa ma tzʼel tpaʼna ambʼil tuʼn t-xnaqʼtzana tiʼj tanqʼibʼil David, jaku tzʼonin tiʼja tuʼn ttena tzʼaqli twitz Jehová. Ax ikx, jaku kubʼ t-ximana tuʼn t-xnaqʼtzana tiʼj tanqʼibʼil Marcos ex Timoteo. Kubʼ kyximen kabʼe kuʼxun lu tuʼn t-xi tzyet tuʼn kyajbʼen te Jehová ex kukx e ten tzʼaqli twitz. Tuʼnju bʼant jlu kyuʼn, e tzalaj toj kyanqʼibʼil ex tzalaj Jehová kyiʼj.

19. ¿Tzeʼn tanqʼibʼila jaku ten toj ambʼil tzul?

¹⁹ Aya kuʼxun, ¿tzeʼn tanqʼibʼila taja toj ambʼil tzul? Jaku ten jun tbʼanel tanqʼibʼila qa ma tzʼok tilil tuʼna toj ambʼil jaʼlo tuʼn tok qeʼ tkʼuʼja tiʼj Jehová ex nya tiʼj teya t-ximbʼetz. Jaku tzʼonin Jehová tiʼja tuʼn tjaw tjyoʼna aju mas tbʼanel (Prov. 20:24). Ax ikx, bʼaʼn tuʼn ttzaj tnaʼna qa in nok tqʼoʼn Jehová toklen tkyaqilju in bʼant tuʼna. Tuʼntzunju, tbʼanel tuʼn qajbʼen te Jehová tuʼnju kʼujlaʼn qoʼ tuʼn. Mintiʼ juntl tiʼ mas tbʼanel jaku bʼant quʼn.