1. ¿Alkye junjun tiʼchaq jaku tzaj kyqanin qukʼil toj aqʼuntl moqa toj escuela qe?

 CHʼIXMI qkyaqilx in qo tzaj xobʼ aj ttzaj kyqanin qukʼil toj aqʼuntl moqa toj escuela qe tiʼj qokslabʼil. Pero aqeju kyxjel jaku che onin qiʼj tuʼn tel qnikʼ tiʼj kyxim ex tzeʼn jaku qo onin kyiʼj. Ax ikx, in tzaj tqʼoʼn jlu ambʼil qe tuʼn qpakbʼan. Noqtzun tuʼnj, mintiʼ tuʼn qjaw labʼin qa ateʼ junjun xjal in tzaj kyqanin junjun tiʼchaq qe noq tuʼn kyqʼojin. Bʼalo in bʼant jlu kyuʼn tuʼnju o tzʼok kybʼiʼn junjun tqanil nya ax tok qiʼj (Hech. 28:22). Ex tuʼnju in qo anqʼin toj «mankbʼil tqʼijlalil», «mintiʼ in chewix kykʼuʼj» xjal ex «mintiʼ chʼin kylastmi» (2 Tim. 3:1, 3).

2. ¿Tiquʼn bʼaʼn tuʼn qok te mans?

² Jakulo kubʼ t-xjelina jlu: «¿Tiʼ jaku tzʼonin wiʼje tuʼn tkubʼ nyekʼine tbʼanel nmode tukʼil jun xjal in tzaj tqʼamaʼn junjun tiʼchaq nya ax tok tiʼj wokslabʼile?». Jaku kubʼ tyekʼina tbʼanel tmoda tukʼil qa ma tzʼoka te mans. Qa mans jun xjal, nya jun rat in tzaj tqʼoj aj tok bʼinchaʼn nya bʼaʼn tiʼj moqa mintiʼ ojtzqiʼn tuʼn tiʼ tuʼn t-xi tqʼamaʼn (Prov. 16:32). Kwestlo jaku tzʼela toj twitza tuʼn tkubʼ tyekʼina mod lu, pero jaku bʼant tuʼna. ¿Tzeʼn jaku kubʼ tyekʼina qa in noka te mans? ¿Alkyeqe nabʼil jaku che onin tiʼja tuʼn tkubʼ tyekʼina tbʼanel tmoda aj kyyolin xjal nya bʼaʼn tiʼj tokslabʼila? Yajtzun qa ateʼ tkʼwala, ¿tzeʼn jaku tzʼonina kyiʼj tuʼn tkubʼ kyyekʼin tbʼanel  kymod aj kykolin tiʼjju nimen kyuʼn? Qo xnaqʼtzan tiʼj.

3. ¿Tiquʼn in xi qqʼamaʼn qa at kyipumal xjal mans? (2 Timoteo 2:24, 25).

³ In kubʼ tyekʼin jun xjal qa at tipumal aj tok te mans. Nim toklen tuʼn tten qipumal tuʼn miʼn ttzaj qqʼoj aj qok weʼ kywitz nya bʼaʼn. Kyxol mod «in tqʼoʼn Xewbʼaj Xjan», at «tuʼn qok mans» (Gál. 5:22, 23). Aju yol griego ajbʼen tuʼn tkubʼ traducirin tuʼn qok te mans, ax ikx ajbʼen kyuʼn xjal tuʼn kyyolin tiʼj jun chej otoq bʼaj xnaqʼtzaʼn tuʼn tok te mans. Noqpe ximana tiʼj, jaku tzʼok jun chej te mans maske at nim tipumal. Yajtzun qe, ¿jakupe qo ok te mans ex jakupe ten qipumal toj ax ambʼil? Jaku. Pero mlay bʼant quʼn qjunalx, sino nim toklen tuʼn t-xi qqanin te Jehová tuʼn ttzaj tqʼoʼn xewbʼaj xjan qe. Qkyaqilx jaku ten tbʼanel qmod lu. Jun techel, o kubʼ kyyekʼin erman tbʼanel mod lu aj kyok ten xjal jyol qʼoj kyukʼil. Tuʼn jlu, ateʼ junjun xjal o ten tbʼanel kyximbʼetz kyiʼj testigo de Jehová (kjawil uʼjit 2 Timoteo 2:24, 25). ¿Tiʼ jaku bʼant tuʼna tuʼn toka te mans?

4. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn Isaac?

⁴ In tzaj kyyekʼin junjun txʼolbʼabʼil toj Biblia qa tbʼanel tuʼn qok te mans. Qo yolin tiʼj jun techel. Toj jun ambʼil atz anqʼin Isaac toj txʼotxʼ Guerar, jun lugar jatumel e anqʼin filisteo. Noqtzun tuʼnj, el ikʼun kyuʼn xjal lu ex kubʼ kyjupuʼn qe pozo otoq jatz kylukuʼn tmajen tman. ¿Tiʼ bʼant tuʼn Isaac? Mintiʼ qʼojin kyukʼil xjal, sino xiʼ anqʼil toj juntl lugar ex jatz tlukuʼn junjuntl pozo (Gén. 26:12-18). Noqtzun tuʼnj, xi kyqʼamaʼn filisteo te qa kye aʼ otoq kanet tuʼn. Maske ikju, mintiʼ tzaj tqʼoj Isaac (Gén. 26:19-25). ¿Tiʼ onin tiʼj Isaac tuʼn tkubʼ tyekʼin tbʼanel tmod maske ok tilil kyuʼn filisteo tuʼn ttzaj tqʼoj? Bʼalo onin tbʼanel techel kubʼ kyqʼoʼn tman twitz. Kukx jyon Abrahán tiʼj mujbʼabʼil, atzunte Sara ok te mans (1 Ped. 3:4-6; Gén. 21:22-34).

5. ¿Alkye techel in tzaj tyekʼin qa jaku che onin mambʼaj kyiʼj kykʼwal tuʼn tel kynikʼ tiʼj qa tbʼanel tuʼn qok te mans?

⁵ Jaku che onin mambʼaj kyiʼj kykʼwal tuʼn tel kynikʼ tiʼj qa tbʼanel tuʼn qok te mans. Qo xnaqʼtzan tiʼjju bʼaj tiʼj Max, aju qʼiʼn 17 abʼqʼi tuʼn. b Toj escuela ex toj pakbʼabʼil, iltoq tiʼj tuʼn tten kyukʼil xjal jun rat in tzaj kyqʼoj. Kubʼ kyyekʼin tman kypasens tiʼj ex e onin tiʼj tuʼn tok te mans. Kyqʼama tman jlu: «O tzʼel tnikʼ Max tiʼj qa mas kwest tuʼn qjakʼunte qibʼ twitzju tuʼn ttzaj qqʼoj ex tuʼn taj qqʼoʼn t-xel jun nya bʼaʼn». Noqtzun tuʼnj, tbʼanelxix tuʼnju ya o tzʼel tnikʼ Max tiʼj tzeʼn tuʼn tok te mans.

6. ¿Tzeʼn jaku tzʼonin naʼj Dios qiʼj tuʼn tkubʼ qyekʼin tbʼanel qmod?

⁶ Qo ximen tiʼj qa kyaj xjal tuʼn ttzaj qqʼoj. Jun techel, jakulo che xmayin tiʼj Jehová moqa kyiʼj xnaqʼtzbʼil tkuʼx toj Biblia. Tuʼn miʼn ttzaj qqʼoj, tbʼanel qa ma txi qqanin te Jehová tuʼn ttzaj tqʼoʼn xewbʼaj xjan qe ex tuʼn ttzaj tqʼoʼn qnabʼil tuʼn t-xi qqʼoʼn jun tzaqʼwebʼil toj tumel. Yajtzun qa ma tzʼel qnikʼ tiʼj qa nya toj tumel otoq txi qqʼoʼn jun tzaqʼwebʼil, ¿tiʼ jaku bʼant quʼn? Tbʼanel tuʼn qnaʼn Dios juntl maj ex tuʼn qximen tiʼjju jaku bʼant quʼn toj juntl ambʼil. Qa ma bʼant jlu quʼn, tzul tqʼoʼn Jehová xewbʼaj xjan qe tuʼn tbʼant qjakʼunte qibʼ ex tuʼn tkubʼ qyekʼin tbʼanel qmod.

7. Qa ma tzʼok tilil quʼn tuʼn tkyaj junjun texto toj qwiʼ, ¿tzeʼn jaku tzʼonin qiʼj aj qok weʼ kywitz ambʼil kwest? (Proverbios 15:1, 18).

⁷ Jaku che onin junjun texto qiʼj tuʼn qyolin toj tumel aj qok weʼ twitz jun nya bʼaʼn. Ex jaku tzʼonin xewbʼaj xjan qiʼj tuʼn kytzaj  qnaʼn (Juan 14:26). Jun techel, jaku che kanet tbʼanel nabʼil quʼn toj uʼj te Proverbios aʼyeju jaku che onin qiʼj tuʼn qok te mans (kjawil uʼjit Proverbios 15:1, 18). Ax ikx in tzaj kyyekʼin qe alkyeqe tiʼchaq tbʼanel jaku che tzaj qa mintiʼ ma tzaj qqʼoj aj qok weʼ kywitz ambʼil kwest (Prov. 10:19; 17:27; 21:23; 25:15).

8. ¿Tiʼ bʼaʼn tuʼn ttzaj qnaʼn aj kyyolin txqantl nya bʼaʼn tiʼjju nimen quʼn?

⁸ Ax ikx jaku tzʼonin qnabʼil qiʼj (Prov. 19:11). Qa at tnabʼil jun xjal, mintiʼ in tzaj tqʼoj aj kyyolin txqantl nya bʼaʼn tiʼjju nimen tuʼn. In che ok t-ximbʼetz jun xjal ik tzeʼn jun aʼ matij t-xeʼ. Aj ttzaj qanin jun tiʼ qe, chʼixme tkyaqil maj mintiʼ ojtzqiʼn quʼn tiquʼn in bʼant kyuʼn xjal. Tuʼntzunju, naʼmxtoq t-xi qqʼoʼn jun tzaqʼwebʼil, bʼaʼn tuʼn ttzaj qnaʼn qa mintiʼ ojtzqiʼn quʼn tiquʼn ma tzaj qanin qe (Prov. 16:23).

9. ¿Tzeʼn kubʼ tyekʼin Gedeón qa ten tnabʼil ex qa yolin toj tumel?

⁹ Qo ximen tiʼjju bʼaj tiʼj Gedeón. Toj jun ambʼil, e ok ten xjal te Efraín reclamaril te Gedeón tuʼnju mintiʼ xi tqʼoʼn txokbʼil kyiʼj tuʼn kyxiʼ toj qʼoj. ¿Tiquʼn tzaj kyqʼoj xjal lu tiʼj Gedeón? ¿Kubʼpe kyximen qa otoq tzʼel qʼiʼn kyoklen? Noq tiʼxku bʼaj, ten tnabʼil Gedeón, ok tqʼoʼn toklen kyximbʼetz ex  yolin toj tumel kyukʼil. «Tejtzun kybʼinte qe tiyjil Efraín aju tyol Gedeón, o chewix kykʼuʼj» (Juec. 8:1-3).

10. ¿Tiʼ jaku tzʼonin qiʼj tuʼn tkubʼ qyekʼin tbʼanel qmod kyukʼil xjal in tzaj kyqanin junjun xjel qe tiʼj qokslabʼil? (1 Pedro 3:15).

¹⁰ Jakulo tzaj tqanin jun qukʼil toj aqʼuntl moqa toj escuela tiquʼn in xi qnimen qe nabʼil tkuʼx toj Biblia. Tbʼanel qa ma qo kolin tiʼj qokslabʼil, pero il tiʼj tuʼn tok qqʼoʼn toklen kyximbʼetz xjal (kjawil uʼjit 1 Pedro 3:15). Mintiʼ tuʼn tkubʼ qximen qa taj tuʼn tqʼojin qukʼil, sino bʼaʼn tuʼn qximen tiʼj t-xjel tuʼntzun tok qojtzqiʼn aju taj tuʼn tel tnikʼ tiʼj. Maske mintiʼ ojtzqiʼn quʼn tiquʼn tzaj tqanin xjal jun tiʼ qe, bʼaʼn tuʼn tkubʼ qyekʼin tbʼanel qmod tukʼil ex tuʼn qyolin toj tumel. Qa ma bʼant jlu quʼn, jakulo chʼexpaj t-ximbʼetz. Nim toklen tuʼn kukx tkubʼ qyekʼin tbʼanel qmod kyukʼil xjal maske in che yolin nya bʼaʼn qiʼj moqa in che xmayin (Rom. 12:17).

11, 12. a) ¿Tiʼ il tiʼj tuʼn qximen tiʼj naʼmxtoq txi qtzaqʼweʼn jun xjel? b) Qʼamantza jun techel tzeʼn jaku txi qtzaqʼweʼn jun xjel tuʼntzun ttzaj tqʼoʼn xjal ambʼil qe tuʼn qyolin tukʼil. (Ax ikx qʼonka twitza tiʼj foto).

¹¹ Qo ximen tiʼj qa in tzaj tqanin jun qukʼil toj aqʼuntl qe tiquʼn mintiʼ in kubʼ qikʼsaʼn cumpleaño. ¿Tiʼ bʼaʼn tuʼn qximen tiʼj naʼmxtoq txi qqʼoʼn jun tzaqʼwebʼil? ¿In kubʼpe t-ximen qa mintiʼ in tzaj qʼoʼn ambʼil qe tuʼn qtzalaj jun rat? ¿Moqa in kubʼ t-ximen qa mlay ten mujbʼabʼil kyxol txqantl noq tuʼnju mintiʼ in kubʼ qikʼsaʼn cumpleaño? Noq tiʼxku in kubʼ t-ximen, jaku txi qfelicitarin tuʼnju in ximen kyiʼj tukʼil toj aqʼuntl. Ax ikx, jaku txi qqʼamaʼn te qa qaj tuʼn tten mujbʼabʼil kyxol txqantl. Qa ma bʼant jlu quʼn, jakulo tzaj tqʼoʼn ambʼil qe tuʼn qyolin tukʼil tiʼjju in tzaj tqʼamaʼn Biblia kyiʼj cumpleaño.

¹² Chʼixmi ax jlu jaku bʼant quʼn aj ttzaj kyqanin xjal junjuntl xjel qe. Jun techel, jakulo tzaj tqʼamaʼn jun tukʼila toj escuela teya qa il tiʼj tuʼn tkubʼ kychʼexpuʼn testigo de Jehová kyximbʼetz kyiʼj xjal homosexual. ¿In tzajpe tqʼamaʼn jlu tuʼnju mintiʼ in nel tnikʼ tiʼjju nimen quʼn? ¿Atpe jun tamiw moqa jun tfamiliar homosexual? ¿In kubʼpe t-ximen qa in che el qikʼun xjal homosexual? Qa ikju, il-lo tiʼj tuʼn t-xi qnaʼn te qa in nok qqʼoʼn kyoklen kykyaqil xjal ex qa in nok qqʼoʼn toklen aju in kubʼ t-ximen teyele junjun kye (1 Ped. 2:17). c Qa ma bʼant jlu quʼn, jakulo tzaj tqʼoʼn ambʼil qe tuʼn t-xi qchikʼbʼaʼn tiquʼn nim toklen tuʼn qok lepeʼ kyiʼj kawbʼil tkuʼx toj Biblia.

13. ¿Tzeʼn jaku qo onin tiʼj jun xjal in tzaj tqʼamaʼn qa nya toj tumel tuʼn t-xi qnimen qa at Dios?

¹³ Qa mintiʼ in nok qeʼ tkʼuʼj jun xjal tiʼjju nimen quʼn, mintiʼ tuʼn tkubʼ qximen qa ya o tzʼel qnikʼ tiʼjju in kubʼ t-ximen (Tito 3:2). Jun techel, qo ximen tiʼj qa in xi tqʼamaʼn jun tukʼila toj escuela teya qa nya toj tumel tuʼn tok qeʼ qkʼuʼj tiʼj Dios. ¿In kubʼpe t-ximana qa in nimen tiʼj evolución ex qa at nim tojtzqibʼil tiʼj xnaqʼtzbʼil lu? Bʼalo oʼkx in tzaj tqʼamaʼn junjun tiʼchaq o tzʼok tbʼiʼn kyiʼj txqantl. Tuʼntzunju, maslo bʼaʼn qa ma txi tqʼamaʼna jun tiʼ te aju jaku ximen tiʼj twitzju tuʼn tyolina tukʼil tiʼj evolución. Ax ikx, jaku txi tsamaʼna jun enlace te tiʼj jun xnaqʼtzbʼil moqa jun video tkubʼ toj jw.org aju in yolin tiʼj tbʼinchbʼen Jehová. Bʼalo tuʼn jlu jaku tzaj tqʼoʼn ambʼil teya tuʼn tok kykeʼyine junjuntl xnaqʼtzbʼil moqa video. Qa ma tzʼok tqʼoʼna toklen xjal, jakulo chʼexpaj t-ximbʼetz.

14. ¿Tzeʼn ajbʼen jw.org tuʼn Naveen tuʼn t-xi tyekʼin te jun tukʼil toj escuela qa nya ax tok aju in tzaj kyqʼamaʼn xjal kyiʼj testigo de Jehová?

¹⁴ In tzaj tqʼamaʼn jun kuʼxun Naveen tbʼi qa ajbʼen sitio jw.org tuʼn tuʼn t-xi tyekʼin te  jun tukʼil toj escuela qa nya ax tok aju in tzaj kyqʼamaʼn junjun xjal kyiʼj testigo de Jehová. Tqʼama Naveen jlu: «Kukx tzaj tqʼamaʼn jun wukʼile toj escuela weye qa mas in nok qeʼ nkʼuʼje tiʼj jun libro nojni tuʼn cuento ex nya tiʼjju o tzʼel tnikʼ ciencia tiʼj». Tej mintiʼ xi tqʼoʼn tukʼil Naveen ambʼil te tuʼn t-xi tchikʼbʼaʼn aju nimen tuʼn, xi tqʼamaʼn te tuʼn tok tkeʼyin sección «Aju Tyol Dios ex kyxnaqʼtzbʼil xjal» toj jw.org. Jaw labʼin Naveen tej tok tbʼiʼn qa jaw tuʼjin kuʼxun xnaqʼtzbʼil ex tuʼn jlu mas nya kwest ela toj twitz tuʼn tyolin tiʼjju tzeʼn xi tzyet qanqʼibʼil. Ax ikx qe jaku bʼaj jlu qiʼj.

15. ¿Tzeʼn jaku che onin mambʼaj kyiʼj kykʼwal tuʼn t-xi kyqʼoʼn jun tzaqʼwebʼil toj tumel?

¹⁵ Jaku che onin mambʼaj kyiʼj kykʼwal tuʼn t-xi kyqʼoʼn jun tzaqʼwebʼil toj tumel aj kyyolin txqantl nya bʼaʼn tiʼjju nimen kyuʼn (Sant. 3:13). Ateʼ junjun mambʼaj in nel kypaʼn ambʼil tuʼn kyxnaqʼtzan kyukʼil kykʼwal toj noche de adoración en familia. In che yolin kyiʼj xnaqʼtzbʼil jaku che tzaj qanin kye kʼwal toj escuela ex in che onin kyiʼj tuʼn t-xi kyqʼoʼn jun tzaqʼwebʼil tukʼil kyex kyyol. Nya oʼkxju, ax ikx in che onin kyiʼj kykʼwal tuʼn kyyolin toj tumel tuʼntzun kyok bʼiʼn kyuʼn txqantl. (Qʼonka twitza tiʼj recuadro: « Jaku tzʼonina kyiʼj toj tjaya qa ma xnaqʼtzana kyukʼil»).

16, 17. ¿Tzeʼn jaku tzʼonin kyiʼj kuʼxun qa ma tzʼel kypaʼn ambʼil tuʼn kyxnaqʼtzan?

¹⁶ Aj kyxnaqʼtzan familia, in nonin jlu kyiʼj kuʼxun tuʼn tok qeʼ kykʼuʼj tiʼjju nimen kyuʼn ex tuʼn t-xi kychikʼbʼaʼn kye txqantl. Jaku che kanet xnaqʼtzbʼil «Kyxjel kuʼxun» tuʼna toj jw.org ex ateʼ junjun xjel jaku txi tqʼoʼna tzaqʼwebʼil kyiʼj. O che bʼaj bʼinchaʼn xnaqʼtzbʼil lu tuʼn tonin kyiʼj kuʼxun tuʼn tchʼiy qʼuqbʼil kykʼuʼj tiʼjju nimen kyuʼn ex tuʼn t-xi kychikʼbʼaʼn kye txqantl tukʼil  kyex kyyol. Qa ma qo xnaqʼtzan kyiʼj tqanil lu kyukʼil toj qja, jaku tzʼonin qiʼj tuʼn t-xi qqʼoʼn jun tzaqʼwebʼil toj tumel ex jaku qo ok bʼiʼn kyuʼn txqantl.

¹⁷ In tzaj tqʼamaʼn jun kuʼxun Matthew tbʼi qa o tzʼonin tiʼj tej t-xnaqʼtzan kyukʼil toj tja. Toj noche de adoración en familia in nel kypaʼn ambʼil tuʼn kyjyon tqanil kyiʼj xnaqʼtzbʼil jaku che yolin txqantl tiʼj toj escuela. In tzaj tchikʼbʼaʼn jlu: «In qo ximane tiʼj alkyeqe tiʼchaq jaku che ikʼ qiʼje ex in kubʼ qqʼoʼne toj xnaqʼtzbʼil aju otoq tzʼel qnikʼe tiʼj. Aj tok qeʼ nkʼuʼje tiʼjju nimen wuʼne, mas nya kwest in nela toj nwitze tuʼn nyoline toj tumel kyukʼil txqantl».

18. Ik tzeʼn in tzaj tqʼamaʼn Colosenses 4:6, ¿tiʼ il tiʼj tuʼn tok qqʼoʼn toklen?

¹⁸ Tuʼn tkubʼ tkʼuʼj jun xjal quʼn, nya oʼkx tuʼn t-xi qchikʼbʼaʼn jun xnaqʼtzbʼil te, sino nim toklen tuʼn tkubʼ qyekʼin tbʼanel qmod tukʼil ex tuʼn qyolin toj tumel (kjawil uʼjit Colosenses 4:6). Aj qyolin kyukʼil txqantl tiʼjju nimen quʼn, in nok jlu ik tzeʼn aj t-xi qxoʼn jun pelota kye. Jaku txi qxoʼn chebʼe moqa kyuw. Qa ma txi qxoʼn chebʼe, mas nya kwest jaku tzyet tuʼn xjal ex kukx jaku saqchan. Ax jlu jaku bʼaj qa ma qo yolin toj tumel tukʼil jun xjal ex qa ma kubʼ qyekʼin tbʼanel qmod tukʼil. Jaku qo ok tbʼiʼn ex kukx jaku tzaj tqʼoʼn ambʼil qe tuʼn qyolin tukʼil. Pero qa taj jun xjal tuʼn tqʼojin qukʼil moqa in xmayin qiʼj, nya il tiʼj tuʼn kukx qyolin tukʼil (Prov. 26:4). Noqtzun tuʼnj, nya kykyaqil xjal in bʼant jlu kyuʼn, tuʼntzunju, jaku qo ok bʼiʼn kyuʼn.

19. ¿Tiʼ jaku tzʼonin qiʼj tuʼn tkubʼ qyekʼin tbʼanel qmod kyukʼil txqantl aj qkolin tiʼjju nimen quʼn?

¹⁹ Ik tzeʼn ma tzʼel qnikʼ tiʼj, tbʼanel tuʼn qok te mans. Tuʼntzunju, qqaninx qipumal te Jehová tuʼn tkubʼ qyekʼin tbʼanel qmod aj kyyolin txqantl nya bʼaʼn tiʼjju nimen quʼn moqa aj kyyolin nya bʼaʼn qiʼj. Qa ma bʼant jlu quʼn, jaku tzʼonin qiʼj tuʼn miʼn ttzaj qʼoj qxol noq tuʼnju junxitl qximbʼetz. Ex qa ma txi qqʼoʼn jun tzaqʼwebʼil toj tumel, jaku tzʼonin kyiʼj txqantl tuʼn tchʼexpaj kyximbʼetz qiʼj ex kyiʼj xnaqʼtzbʼil toj Tyol Dios. Tuʼntzunju, tbʼanel tuʼn t-xi qbʼiʼn consej lu: «Noq bʼanin kytene tuʼn t-xi kytzaqʼweʼne qe xjal, aqeju in che qanin jun rasón kyeye [...], chebʼa kymanxe kye ex atwit kychi tuj kywitze» (1 Ped. 3:15). Tuʼntzunju, bʼaʼn tuʼn tkubʼ qyekʼin qa at qipumal aj qok te mans.