1. ¿Tiʼ kubʼ tnaʼn Pedro tej tok tkeʼyin qa otoq bʼaj jun milagro?

 OTOQ tzʼaqʼunan Pedro tkyaqil qonikʼen ex mintiʼ jun pescad otoq tzyet tuʼn. Pero jawlo labʼin tej t-xi tqʼamaʼn Jesús jlu te: «Tokx laqʼeʼya tuj laguna ex kyqʼonkuxe kyxuybʼe tuʼn tjatz kyiẍ» (Luc. 5:4). Maske mintiʼ ok qeʼ tkʼuʼj Pedro tiʼj qa jakutoq tzyet jun pescad tuʼn, xi tbʼinchaʼn aju xi tqʼamaʼn Jesús te. Tuʼn jlu, tzyet nim pescad tuʼn ex kyuʼn xjal in che aqʼunantoq tukʼil ex chʼixmi el laq red in najbʼentoq kyuʼn. Tej tok tkeʼyin Pedro ex qe xjal ateʼtoq tukʼil qa otoq bʼaj jun milagro, e jaw xobʼ. Tuʼntzunju, tqʼama jlu: «Paʼmil tibʼa wiʼje Tat, porke aqine jun xinaq aj il» (Luc. 5:6-9). Kubʼlo t-ximen Pedro qa mintiʼtoq toklen tuʼn tten tukʼil Jesús.

2. ¿Tzeʼn jaku tzʼonin qiʼj qa ma qo xnaqʼtzan tiʼj tanqʼibʼil Pedro?

² Ax tok aju tqʼama Pedro tuʼnju aj iltoq. In tzaj tqʼamaʼn Biblia qa tzaj tbʼis kyiʼj junjun tiʼchaq bʼant tuʼn moqa tqʼama. ¿In tzajpe teya tbʼis ik tzeʼn te Pedro? ¿Atpe jun tmoda taja tuʼn tok te mas tbʼanel moqa taja tuʼn tkubʼ tiʼj jun nya bʼaʼn tuʼna? Qa ikju, miʼn tzaj bʼaj tkʼuʼja. Jaku tzʼonin techel kyaj tqʼoʼn Pedro tiʼja. Ximana kyiʼj nya bʼaʼn e bʼant tuʼn apóstol lu. Nyatoq il tiʼj tuʼn kykubʼ tzʼibʼin toj Biblia, pero xi tqʼoʼn Jehová ambʼil tuʼn kykubʼ tzʼibʼin tuʼn tel qiʼn jun xnaqʼtzbʼil kyiʼj (2 Tim. 3:16, 17). Aj qxnaqʼtzan tiʼjju bʼaj toj tanqʼibʼil Pedro, in nel qnikʼ tiʼj qa mintiʼ in nayon Jehová tuʼn qok te tzʼaqli. Sino oʼkx taj tuʼn tok tilil quʼn maske in qo el txalpaj.

3. ¿Tiquʼn nim toklen tuʼn kukx tok tilil quʼn?

³ ¿Tiquʼn nim toklen tuʼn tok tilil quʼn? Tuʼnju mas tbʼanel  in bʼant jun tiʼ quʼn qa mas in xi qbʼinchaʼn. Jun techel, qa taj jun xjal tuʼn tbʼant-xix ttokarin marimba, nim toklen tuʼn t-xnaqʼtzan kyoj nimku abʼqʼi. Toj ambʼil lu, in nel-lo txalpaj nimku maj. Pero qa mas ma xnaqʼtzan, mas jaku bʼant tuʼn. Axpe ikx, jaku tzʼel txalpaj junjun maj maske ya otoq tzʼok te maestro. Pero mintiʼ in kyaj ttzaqpiʼn tuʼn ttokarin marimba noq tuʼnju in nel txalpaj, sino kukx in nok tilil tuʼn. Chʼixmi ax jlu jaku bʼaj qiʼj, atlo maj jaku qo el txalpaj maske in kubʼ qximen qa otoq kubʼ tiʼj jun nya bʼaʼn quʼn. Noqtzun tuʼnj, tbʼanel tuʼn kukx tok tilil quʼn. Qkyaqilx jaku tzaj qbʼis aj t-xi qqʼamaʼn jun tiʼ nya toj tumel moqa aj tkubʼ qbʼinchaʼn jun nya bʼaʼn. Pero qa kukx ma tzʼok tilil quʼn, kʼonil Jehová qiʼj (1 Ped. 5:10). Qo xnaqʼtzan tiʼj tzeʼn kubʼ tyekʼin Pedro qa kukx ok tilil tuʼn. Aj tel qnikʼ tiʼj qa tzaj qʼaqʼin tkʼuʼj Jesús tiʼj Pedro maske el txalpaj, jaku tzʼonin qiʼj tuʼn kukx qajbʼen te Jehová.

4. ¿Tiʼ tqʼama Pedro tiʼjx ex tzeʼn xi tqʼuqbʼaʼn Jesús tkʼuʼj? (Lucas 5:5-10).

⁴ Mintiʼ in tzaj tqʼamaʼn Biblia tiquʼn tqʼama Pedro qa «jun xinaq aj il» moqa alkyeqe il ximen tiʼj (kjawil uʼjit Lucas 5:5-10). Noqtzun tuʼnj, atlo maj e kubʼ tbʼinchaʼn junjun matij il. El tnikʼ Jesús tiʼj qa tzaj xobʼ Pedro tuʼnju ya mintiʼtoq in nok qeʼ tkʼuʼj tiʼjx. Pero ax ikx el tnikʼ tiʼj qa kukx jakutoq ten tzʼaqli twitz Jehová. Tuʼntzunju, tukʼil kʼujlabʼil xi tqʼamaʼn jlu te: «Miʼn xobʼa». Tuʼnju kubʼ tyekʼin Jesús qa ok qeʼ tkʼuʼj tiʼj Pedro, onin tiʼj tuʼn kybʼant junjun chʼixpubʼil tuʼn. Yajxitl, kyaj ttzaqpiʼn Pedro ex Andrés tuʼn kytzyuʼn pescad noq tuʼn kyok lepeʼ tiʼj Mesías. Tuʼnju bʼant jlu kyuʼn, tzaj kykʼamoʼn nim kʼiwlabʼil (Mar. 1:16-18).

5. ¿Alkyeqe kʼiwlabʼil tzaj tkʼamoʼn Pedro tuʼnju mintiʼ xi tqʼoʼn ambʼil tuʼn kyten t-ximbʼetz nya toj tumel ex tuʼnju xi tkʼamoʼn txokbʼil xi tqʼoʼn Jesús tiʼj?

⁵ Tuʼnju ok Pedro te t-xnaqʼtzbʼen Jesús, e ikʼ nim tiʼchaq tbʼanel toj tanqʼibʼil. Ok tqʼoʼn twitz tiʼj tzeʼn e kubʼ tqʼanin Jesús yabʼ, tzeʼn i etz demonio toj kyxmilal xjal tuʼn ex tzeʼn e jaw anqʼin kyimni tuʼn (Mat. 8:14-17; Mar. 5:37, 41, 42). b Ax ikx, ok tkeʼyin Pedro toj jun witzikʼ jniʼ toklen Jesús ktel toj Tkawbʼil Dios. Mintiʼlo ikʼ tnaʼl ambʼil lu tuʼn (Mar. 9:1-8; 2 Ped. 1:16-18). Mintiʼwtlo ok tkeʼyin Pedro tkyaqil jlu noqwit mintiʼ ok te t-xnaqʼtzbʼen Jesús. Kubʼlo tnaʼn nimxix tzalajbʼil tuʼnju mintiʼ kubʼ tiʼj kyuʼn t-ximbʼetz nya toj tumel. Tuʼnju bʼant jlu tuʼn, tzaj tkʼamoʼn nim kʼiwlabʼil.

6. ¿Tiquʼn in xi qqʼamaʼn qa nya jun rat kubʼ kyiʼj nya bʼaʼn tuʼn Pedro?

 ⁶ Maske ok tbʼiʼn Pedro junjun tbʼanel xnaqʼtzbʼil ex ok tqʼoʼn twitz kyiʼj junjun tbʼanel tiʼchaq, iltoq tiʼj tuʼn kukx kybʼant chʼixpubʼil tuʼn. Qo xnaqʼtzan kyiʼj junjun techel. Tej t-xi tqʼamaʼn Jesús qa iltoq tiʼj tuʼn tok weʼ kywitz nya bʼaʼn ex tuʼn tkubʼ bʼyoʼn tuʼntzun tjapun kywi profecía, xi kawin tuʼn Pedro (Mar. 8:31-33). Ax ikx, kukxlo qʼojin Pedro kyukʼil txqantl apóstol tuʼn tel kynikʼ tiʼj alkye mas nim toklen (Mar. 9:33, 34). Ex toj qonikʼen tej naʼmxtoq tkyim Jesús, el ttxʼemin Pedro tẍkyin jun xjal (Juan 18:10). Ex tojx qonikʼen aju, xi tqʼamaʼn oxe maj qa mintiʼtoq ojtzqiʼn Jesús tuʼn tuʼnju tzaj xobʼ (Mar. 14:66-72). Tuʼn jlu, kubʼ tnaʼn nim bʼis ex jaw oqʼ (Mat. 26:75).

7. Tej otoqxi jaw anqʼin Jesús, ¿tzeʼn onin tiʼj Pedro?

⁷ Tzaj tbʼis Pedro tiʼj tkyaqilju otoq bʼant tuʼn, pero kukx xi qʼuqbʼaʼn tkʼuʼj tuʼn Jesús. Tej tjaw anqʼin Jesús, xi tqʼoʼn ambʼil te Pedro tuʼn tkubʼ tyekʼin qa kukx kʼujlaʼntoq tuʼn. Ex xi tqʼoʼn txokbʼil tiʼj tuʼn t-xqʼuqin kyiʼj t-ẍneʼl (Juan 21:15-17). Tukʼil tzalajbʼil xi tbʼiʼn Pedro tyol Jesús. Tuʼntzunju, ten kyxol tnejel okslal e jaw skʼoʼn tuʼn xewbʼaj xjan toj Pentecostés atz Jerusalén.

8. ¿Tiʼ bʼant tuʼn Pedro tej tten atz Antioquía?

⁸ Kukx ok tilil tuʼn Pedro tuʼn miʼn tel txalpaj, axpe ikx tej otoq jaw skʼoʼn tuʼn t-xi toj kyaʼj. Toj abʼqʼi 36, ok tkeʼyin Pedro tzeʼn tzaj tqʼoʼn Jehová xewbʼaj xjan te Cornelio, jun xjal nya judiy ex nya circuncidarin. Tuʼn jlu, kubʼ tyekʼin Jehová qa mintiʼ in nok tqʼoʼn twitz tiʼj «kyxilen xjal» ex qa jakutoq tzʼokx alkyexku xjal toj ttnam (Hech. 10:34, 44, 45). Mintiʼ kubʼ t-ximen Pedro tuʼn twaʼn kyukʼil xjal nya judiy, pero atxix toj ambʼil aju bʼant jlu tuʼn (Gál. 2:12). Noqtzun tuʼnj, e ten junjun okslal judiy kubʼ kyximen qa mlaytoq bʼant tuʼn kywan xjal judiy kyukʼil xjal te junjuntl nasyon. Tej kypon junjun kyxol okslal lu toj tnam Antioquía, ya mintiʼ waʼn Pedro kyukʼil okslal te junjuntl tnam. Bʼalo bʼant jlu tuʼn tuʼn miʼn ttzaj kyqʼoj okslal judiy. Pero tej tok tkeʼyin apóstol Pablo aju bʼant tuʼn, xi kawin tuʼn kywitz kykyaqil okslal (Gál. 2:13, 14). Maske el txalpaj Pedro toj ambʼil lu, kukx ok tilil tuʼn. ¿Tiʼ onin tiʼj?

9. Ik tzeʼn in tzaj tqʼamaʼn Juan 6:68 ex 69, ¿tzeʼn kubʼ tyekʼin Pedro qa kukx ten tzʼaqli?

⁹ Ten Pedro tzʼaqli ex kukx ok tilil tuʼn tuʼn tok lepeʼ tiʼj Jesús. Toj jun ambʼil, mintiʼ el kynikʼ t-xnaqʼtzbʼen Jesús tiʼj jun tiʼ xi tqʼamaʼn kye (kjawil uʼjit Juan 6:68, 69). Tuʼn jlu, kyaj kytzaqpiʼn tuʼn kyok lepeʼ tiʼj Jesús maske naʼmxtoq txi tchikʼbʼaʼn kye tiʼ kyxilen tyol. Pero mintiʼ bʼant jlu tuʼn Pedro, sino xi tqʼamaʼn kywitz txqantl qa oʼkx tukʼil Jesús at yol «in tqʼoʼn chwinqlal te jumajx».

10. ¿Tzeʼn kubʼ tyekʼin Jesús qa ok qeʼ tkʼuʼj tiʼj Pedro? (Ax ikx qʼonka twitza tiʼj dibujo).

¹⁰ Kukx ten Jesús tukʼil Pedro maske ojtzqiʼntoq tuʼn qa kjel kolin tuʼn ex kyuʼn txqantl apóstol toj mankbʼil qonikʼen tej tten tzalu twitz Txʼotxʼ. Ax ikx kubʼ tyekʼin qa ok qeʼ tkʼuʼj tiʼj tej tqʼama qa kukx kʼajbʼel te (Luc. 22:31, 32). El tnikʼ Jesús kyiʼj t-xnaqʼtzbʼen, tuʼntzunju xi tqʼamaʼn jlu kye: «Ax tok tajbʼil kyanmiye, atzunju kychibʼjale mintiʼ tipun» (Mar. 14:38). Kukx onin Jesús tiʼj Pedro, axpe ikx tej tqʼama qa mintiʼtoq ojtzqiʼn tuʼn. Ex tej tjaw anqʼin, kubʼ tyekʼin tibʼ twitz Pedro ex bʼalo e yolin kyjunalx (Mar. 16:7; Luc. 24:34; 1 Cor. 15:5). Tuʼn jlu, el-lo tnikʼ Pedro tiʼj qa kukx kʼonil Jehová tiʼj.

11. ¿Tzeʼn onin Jesús tiʼj Pedro tuʼn tel tnikʼ tiʼj qa kukx kxqʼuqil Jehová tiʼj?

 ¹¹ Xi tnaʼn Jesús te Pedro qa kxqʼuqil Jehová tiʼj. Tej otoqxi jaw anqʼin bʼant jun milagro tuʼn tuʼn kytzyet nim pescad tuʼn Pedro ex kyuʼn txqantl apóstol (Juan 21:4-6). Tej tok tkeʼyin Pedro milagro lu, el tnikʼ tiʼj qa kukx kxel tqʼoʼn Jehová aju at tajbʼen te. Ax ikx, tzajlo tnaʼn qe tyol Jesús lu tkuʼx toj Mateo 6:33: «Kynimanxe tnejelxix aju tkawbʼil Dios [...]; tkyaqiltzun jlu ktzajel qʼoʼn kyeye». Tej tel tnikʼ Pedro tiʼj jlu, mas ok tqʼoʼn twiʼ tiʼj pakbʼabʼil ex nya tiʼjju tuʼn kytzyet pescad tuʼn. Pakbʼan tuʼn tkyaqil tanmi ex onin kyiʼj nimku xjal tuʼn t-xi kybʼiʼn tbʼanel tqanil toj Pentecostés te abʼqʼi 33 (Hech. 2:14, 37-41). Ex tej tikʼ ambʼil, onin kyiʼj xjal te Samaria ex kyiʼj junjuntl xjal tuʼn kyok te t-xnaqʼtzbʼen Jesús (Hech. 8:14-17; 10:44-48). Tuʼn jlu, in nel qnikʼ tiʼj qa ajbʼen Pedro tuʼn Jehová tuʼn tonin tiʼj alkyexku xjal tuʼn toktz toj ttnam.

12. Qa in nok tilil quʼn tuʼn tkubʼ tiʼj ax nya bʼaʼn quʼn, ¿tzeʼn jaku tzʼonin qiʼj aju techel kyaj tqʼoʼn Pedro?

¹² Ax ikx jaku tzʼonin Jehová qiʼj tuʼn kukx tok tilil quʼn. Pero atlo maj nya fácil jaku tzʼela jlu toj qwitz. Mas qa at jun nya bʼaʼn kukx in nok tilil quʼn tuʼn tkubʼ tiʼj quʼn. Ex jakulo kubʼ qximen qa mas nim nya bʼaʼn in che tzaj qiʼj twitzju ok weʼ Pedro twitz. Noqtzun tuʼnj, kukx jaku tzaj tqʼoʼn Jehová qipumal tuʼn kukx tok tilil quʼn (Sal. 94:17-19). Qo yolin tiʼjju bʼaj tiʼj jun ermano, tgantoq qe xinaq tej naʼmxtoq tok tojtzqiʼn axix tok. Maske ya otoq kyaj ttzaqpiʼn tuʼn tkubʼ ten kyukʼil xinaq, kukx in che ten nya bʼaʼn t-ximbʼetz. ¿Tiʼ in nonin tiʼj tuʼn tkubʼ tiʼj nya bʼaʼn t-ximbʼetz? In tzaj tqʼamaʼn jlu: «A Jehová in tzaj qʼonte wipumale. Ex tuʼn tonbʼil xewbʼaj xjan [...], o tzʼel nnikʼe tiʼj qa kukx [...] jaku chex nnimane qe tkawbʼil Jehová». Ex te mankbʼil in tzaj tqʼamaʼn jlu: «Kukx in tzaj tqʼoʼn Jehová ambʼil weye tuʼn wajbʼene te [...] ex kukx in tzaj tqʼoʼn wipumale maske at maj in chin el txalpaje».

13. ¿Tzeʼn jaku tzʼel qkanoʼn tiʼj Pedro? (Hechos 4:13, 29, 31; ax ikx qʼonka twitza tiʼj foto).

¹³ Kubʼ tbʼinchaʼn Pedro junjun nya bʼaʼn tuʼnju tzaj xobʼ kywitz xjal. Noqtzun tuʼnj, xi tqanin onbʼil te Jehová ex kubʼ tyekʼin qa mintiʼ tzaj xobʼ (kjawil uʼjit Hechos 4:13, 29, 31). Ax ik qe jaku ten qipumal tuʼn miʼn  qtzaj xobʼ. Qo yolin tiʼjju bʼaj tiʼj Horst, jun kuʼxun testigo de Jehová anqʼin atz Alemania toj ambʼil tej tok Tkabʼ Nimaq Qʼoj twitz Tkyaqil Txʼotxʼ. Toj ambʼil aju, in najbʼentoq jun saludo kyuʼn xjal ex a t-xilen, «Kkolil Hitler qiʼj». Ojtzqiʼntoq tuʼn Horst qa nya bʼaʼn tuʼn t-xi tqʼamaʼn saludo lu, pero at maj bʼant tuʼn tuʼnju tzaj xobʼ kywitz maestro ex kywitz tukʼil toj escuela. Tej tok kybʼiʼn tman aju otoq bʼant tuʼn, mintiʼ xi kykawin, sino xi kyqanin te Jehová tuʼn ttzaj tqʼoʼn tipumal. Tej tikʼ ambʼil, ten tipumal Horst tuʼn tten tzʼaqli tuʼnju onin Jehová tiʼj ex qe tman. Yajxitl tqʼama jlu: «Mintiʼ in kyaj koline tuʼn Jehová». c

14. ¿Tzeʼn jaku che onin ansyan tukʼil kʼujlabʼil kyiʼj qeju in tzaj bʼaj kykʼuʼj?

¹⁴ Mlayx kubʼ t-ximen Jehová ex Jesús qa mintiʼ qajbʼen. Tej t-xi tqʼamaʼn Pedro qa mintiʼtoq ojtzqiʼn Jesús tuʼn, iltoq tiʼj tuʼn tkubʼ t-ximen tiʼ tuʼn t-xi tbʼinchaʼn. ¿Kjelpe ttzaqpiʼn tuʼn tok lepeʼ tiʼj Jesús moqa kukx kʼokel tilil tuʼn? Pero otoq kubʼsan Jesús twitz Jehová tuʼn tonin tiʼj Pedro tuʼn miʼn tkubʼ numj toj tokslabʼil. Yajxitl, xi tqʼamaʼn te Pedro qa otoq naʼn Dios tiʼj ex qa kxeltoq tqʼuqbʼaʼn kykʼuʼj erman aj tikʼ ambʼil (Luc. 22:31, 32). Chewixlo tanmi Pedro tej ttzaj tnaʼn qe tyol Jesús lu. Ax ikx qe, il tiʼj tuʼn tkubʼ qximen junjun tiʼchaq nim toklen toj qanqʼibʼil. Toj ambʼil lu, jakulo che ajbʼen ansyan tuʼn Jehová tuʼn ttzaj kyqʼuqbʼaʼn qkʼuʼj tuʼntzun kukx qten tzʼaqli twitz (Efes. 4:8, 11). O tzikʼ ambʼil in najbʼen Paul te ansyan ex in nok tilil tuʼn tuʼn t-xi tqʼuqbʼaʼn kykʼuʼj txqantl. Aj tok tkeʼyin qa in tzaj bʼaj tkʼuʼj jun erman, in xi tqʼamaʼn te tuʼn ttzaj tnaʼn tzeʼn o tzʼonin Jehová tiʼj tuʼn toktz toj ttnam. Ax ikx in xi tnaʼn kye qa kukx kʼujlaʼn qe tuʼn Jehová ex  qa mlay che kyaj kolin tuʼn. O tzʼok tqʼoʼn Paul twitz tiʼj qa kukx in nok tilil kyuʼn junjun erman otoq tzaj bʼaj kykʼuʼj noq tuʼn tonbʼil Jehová.

15. ¿Tzeʼn in tzaj tyekʼin aju bʼaj tiʼj Pedro ex tiʼj Horst qa kukx in japun kywi yol tkuʼx toj Mateo 6:33?

¹⁵ Ik tzeʼn ma tzʼel qnikʼ tiʼj, xi tqʼoʼn Jehová aju at tajbʼen te Pedro ex kye txqantl apóstol. Ax jlu kbʼantel tuʼn qukʼil qa ma kubʼ qqʼoʼn qajbʼebʼil tnejel toj qanqʼibʼil (Mat. 6:33). Qo yolin juntl maj tiʼj Horst. Tej otoqxi kubʼ bʼaj Tkabʼ Nimaq Qʼoj twitz Tkyaqil Txʼotxʼ, kubʼ t-ximen tuʼn tok te precursor. Noqtzun tuʼnj, el tnikʼ tiʼj qa nyatoq nim tpwaq at tuʼn tanqʼin ex tuʼn tajbʼen te Jehová toj tkyaqil ambʼil. ¿Tiʼ bʼant tuʼn? Kubʼ t-ximen tuʼn tok tqʼoʼn Jehová toj prueba tuʼntzun tel tnikʼ tiʼj qa tzul tqʼoʼn aju at tajbʼen te. Tuʼntzunju, kubʼ t-ximen tuʼn tex pakbʼal tkyaqil seman tej tok visita te superintendente te circuito. Tej tkubʼaj seman, kyaj kʼabʼeʼ toj ttziʼ tej t-xi tqʼamaʼn superintendente te qa otoq kyaj qʼoʼn jun sobre te ex tkuʼx pwaq toj. Tuʼn pwaq lu, jakutoq tzʼajbʼen te precursor kyoj junjun xjaw. Tej tok tkeʼyin Horst oyaj lu, el tnikʼ tiʼj qa kxqʼuqil Jehová tiʼj. Ex atxix toj ambʼil aju, o kubʼ tqʼoʼn Tkawbʼil Jehová tnejel toj tanqʼibʼil (Mal. 3:10).

16. ¿Tiquʼn bʼaʼn tuʼn qxnaqʼtzan tiʼj techel kyaj tqʼoʼn Pedro ex kyiʼj carta e kubʼ ttzʼibʼin?

¹⁶ Kubʼlo tnaʼn Pedro nim tzalajbʼil tuʼnju mintiʼ xi tbʼiʼn Jesús qe tyol lu: «Paʼmil tibʼa wiʼje Tat». Kukx onin Jesús tiʼj Pedro tuʼn tten tzʼaqli ex tuʼn tok te jun tbʼanel techel kywitz okslal. Jaku tzʼel qiʼn nim xnaqʼtzbʼil tiʼj tkyaqil onbʼil xi qʼoʼn te. Yolin Pedro kyiʼj junjun xnaqʼtzbʼil lu ex kyiʼj junjuntl tqanil kyoj kabʼe carta e kubʼ ttzʼibʼin ex xi tsamaʼn kye congregación toj tnejel syent abʼqʼi. Toj juntl xnaqʼtzbʼil, kʼelel qnikʼ tiʼj alkyeqe xnaqʼtzbʼil nim kyoklen in che yolin carta lu tiʼj ex tzeʼn jaku che onin qiʼj toj ambʼil jaʼlo.