1, 2. ¿Tiquʼn bʼaʼn tuʼn qxnaqʼtzan tiʼj tanqʼibʼil Sansón?

 ¿TIʼ IN nul toj twiʼya aj tok tbʼiʼna in che yolin txqantl tiʼj Sansón? Bʼalo in tzaj tnaʼna qa ten nim tipumal, pero ax ikx el txalpaj Sansón ex tzaj nim nya bʼaʼn tiʼj tuʼn jlu. Ok tqʼoʼn Jehová twitz tiʼj qʼuqbʼil tkʼuʼj kubʼ tyekʼin ex xi tqʼoʼn ambʼil tuʼn tkubʼ tzʼibʼin aju ikʼ toj tanqʼibʼil toj Biblia tuʼntzun tel qiʼn jun xnaqʼtzbʼil tiʼj.

² Ajbʼen Sansón tuʼn Jehová tuʼn tonin tiʼj tnam te Israel. Tej tikʼ nim syent abʼqʼi, tuʼn tonbʼil xewbʼaj xjan tzaj tqʼamaʼn Jehová te apóstol Pablo tuʼn tkubʼ ttzʼibʼin tbʼi Sansón toj jun lista kyiʼj junjun tmajen kubʼ kyyekʼin qʼuqbʼil kykʼuʼj (Heb. 11:32-34). Ok qeʼ tkʼuʼj Sansón tiʼj Jehová, axpe ikx tej tok weʼ kywitz nya bʼaʼn. Toj xnaqʼtzbʼil lu, qo yolil tiʼj alkyeqe techel jaku tzʼel qiʼn tiʼj Sansón ex tzeʼn in nonin qiʼj tuʼn tchʼiy qʼuqbʼil qkʼuʼj.

3. ¿Tiʼ aqʼuntl xi tqʼoʼn Jehová te Sansón?

³ Tej tul itzʼj Sansón, in che kawintoq filisteo kyibʼaj xjal te Israel ex ok kybʼinchaʼn nya bʼaʼn kyiʼj (Juec. 13:1). Tzaj kybʼis xjal te Israel tuʼnju ok bʼinchaʼn nim nya bʼaʼn kyiʼj kyuʼn filisteo. Tuʼntzunju, jaw tskʼoʼn Jehová Sansón tuʼn tok te «klolte kye aj Israel tuj kyqʼabʼ» (Juec. 13:5). Tuʼnju kwest oklenj xi qʼoʼn te Sansón, iltoq tiʼj tuʼn tok qeʼ tkʼuʼj tiʼj Jehová.

4. ¿Tzeʼn onin Jehová tiʼj Sansón? (Jueces 15:14-16).

 ⁴ Qo xnaqʼtzan tiʼj jun ambʼil jatumel kubʼ tyekʼin Sansón qa ok qeʼ tkʼuʼj tiʼj Jehová. Jun maj, e pon junjun soldad filisteo toj tnam Lehí tuʼntzun ttzyet Sansón kyuʼn ex bʼalo atztoq taʼ lugar lu toj tnam Judá. Tuʼnju tzaj nim kyxobʼil xjal te Judá, kubʼ kyximen tuʼn t-xi kyqʼoʼn Sansón kye aj qʼoj. Tuʼntzunju, ok kykʼalon tukʼil kabʼe las akʼaj ex xi kyiʼn kyukʼil filisteo (Juec. 15:9-13). Noqtzun tuʼnj, «tzaj qʼoʼn tipumal Sansón tuʼn T-xew Qman» ex tzoqpaj. Yajxitl, «jawtzun tiʼn Sansón jun tbʼaqil tjaqʼ ttzi bur naʼnxtoq ttzqij» ex kubʼ tbʼyoʼn mil filisteo tuʼn (kjawil uʼjit Jueces 15:14-16).

5. ¿Tzeʼn kubʼ tyekʼin Sansón qa ok qeʼ tkʼuʼj tiʼj Jehová?

⁵ ¿Tiquʼn ajbʼen jun tbʼaqil tjaqʼ ttzi bur tuʼn Sansón ex nya juntl tiʼ? Tuʼnju el tnikʼ tiʼj qa mas nim toklen tuʼn tok qeʼ tkʼuʼj tiʼj Jehová. Ajbʼen alkyexku tiʼ tuʼn Sansón tuʼn tjapun twi t-ximbʼetz Jehová. Ex tuʼnju ok qeʼ tkʼuʼj tiʼj, kubʼ kyiʼj filisteo tuʼn.

6. ¿Alkye jun xnaqʼtzbʼil jaku tzʼel qiʼn tiʼj tanqʼibʼil Sansón?

⁶ Jaku tzʼok qeʼ qkʼuʼj tiʼj qa tzul tqʼoʼn Jehová qipumal tuʼn tjapun twi alkyexku oklenj in tzaj qʼoʼn qe toj ttnam maske kwest jaku tzʼela toj qwitz. Ex jaku qo jaw labʼin tiʼj onbʼil tzul tqʼoʼn Jehová qe. Kʼonil qiʼj tuʼn tjapun twi qximbʼetz ex tzul tqʼoʼn qipumal ik tzeʼn bʼant tuʼn tukʼil Sansón (Prov. 16:3).

7. ¿Alkye techel in tzaj tyekʼin qe qa nim toklen tuʼn qjyon onbʼil tukʼil Jehová?

⁷ Ateʼ nim erman in che onin tiʼj construcción o kubʼ kyyekʼin qa in nok qeʼ kykʼuʼj tiʼj Jehová. Toj ambʼil ojtxe, atoq ttnam Jehová in jaw bʼinchante qe Ja te Chmabʼil ex junjuntl lugar in che ajbʼen quʼn tuʼn qkʼulin te. Pero o che bʼant junjun chʼixpubʼil tuʼnju kukx in chʼiy ttnam. Kykyaqil qeju erman e onin tuʼn kybʼant chʼixpubʼil, tnejel e naʼn Dios ex yajxitl e bʼant junjuntl tiʼchaq kyuʼn. Jun techel, xi  tzyet tuʼn ttzaj kylaqʼoʼn junjun ja ex tuʼn kybʼaj kybʼinchaʼn chʼintl. O tzʼaqʼunan Robert kyoj nim proyecto te construcción twitz tkyaqil Txʼotxʼ. In tzaj tqʼamaʼn jlu: «Kwest ela toj qwitze tuʼn tok qeʼ qkʼuʼje kyiʼj akʼaj tqanil lu. Junxitl twitzju otoq bʼant quʼne kyoj nimku abʼqʼi. Pero ok tilil kyuʼn erman tuʼn kyok lepeʼ kyiʼj chʼixpubʼil ex el qnikʼe tiʼj qa tzaj tkʼiwlaʼn Jehová aqʼuntl». Aju ma qo yolin tiʼj, in tzaj tyekʼin qa in tzaj tkʼiwlaʼn Jehová ttnam tuʼn tjapun twi t-ximbʼetz. Tuʼntzunju, tbʼanel tuʼn kukx tkubʼ qxjelin jlu: «¿In nokpe tilil wuʼne tuʼn njyone onbʼil tukʼil Jehová ex in che bʼantpe chʼixpubʼil wuʼne tuʼn t-xi nqʼoʼne aju mas tbʼanel te?».

8. ¿Tiʼ bʼant tuʼn Sansón tej ttzaj kʼaj tiʼj?

⁸ Ax ikx jakulo tzaj tnaʼna junjuntl tbʼanel tiʼchaq bʼant tuʼn Sansón. Jun techel, qʼojin tukʼil jun león ex kubʼ tbʼyoʼn. Ax ikx, e kubʼ tbʼyoʼn 30 filisteo te tnam Asquelón (Juec. 14:5, 6, 19). El tnikʼ Sansón tiʼj qa oʼkx jakutoq bʼant tkyaqil jlu tuʼn tuʼn tonbʼil Jehová. In nel qnikʼ tiʼj qa ok qeʼ tkʼuʼj Sansón tiʼj Jehová tuʼnju bʼant tuʼn tej otoqxi che kubʼ tbʼyoʼn mil filisteo. Tej ttzaj kʼaj tiʼj, mintiʼ ok tilil tuʼn tuʼn tjyon tiʼj aʼ, sino jyon onbʼil tukʼil Jehová (Juec. 15:18).

9. ¿Tzeʼn onin Jehová tiʼj Sansón? (Jueces 15:19).

⁹ Tzaj ttzaqʼweʼn Jehová tnaʼj Dios Sansón tej tbʼant jun milagro tuʼn tuʼn ttzaj tqʼoʼn aʼ te. Tej t-xi tkʼaʼn Sansón aʼ, «o tnaʼ ok mas tipun» (kjawil uʼjit Jueces 15:19). Ex bʼalo kukx ten nasimyent te aʼ lu toj tqʼijlalil Samuel tej ttzaj tqʼamaʼn Jehová te tuʼn tkubʼ ttzʼibʼin uʼj te Jueces. Tej tok kykeʼyin xjal te Israel nasimyent lu, bʼalo tzaj kynaʼn qa jaku tzʼonin Jehová kyiʼj toj ambʼil kwest qa ma tzʼok qeʼ kykʼuʼj tiʼj.

10. ¿Tiʼ il tiʼj tuʼn tbʼant quʼn tuʼn tonin Jehová qiʼj? (Ax ikx qʼonka twitza kyiʼj tilbʼilal).

¹⁰ Ik tzeʼn bʼant tuʼn Sansón, ax ikx qe nim toklen tuʼn qjyon onbʼil tukʼil Jehová noq tiʼxku qoklen at toj ttnam moqa aju o bʼant quʼn toj qajbʼebʼil te. Nim toklen tuʼn tkubʼ qin qibʼ ex tuʼn tel qnikʼ tiʼj qa oʼkx jaku bʼant tkyaqil tajbʼil Jehová quʼn qa ma tzʼok qeʼ qkʼuʼj tiʼj. Ten tipumal Sansón juntl maj tej t-xi tkʼaʼn aʼ xi tqʼoʼn Jehová te. Ik tzeʼn bʼant tuʼn Sansón, ax ikx qe nim toklen tuʼn t-xi qkʼamoʼn onbʼil in tzaj tqʼoʼn Jehová qe tuʼntzun qten tzʼaqli twitz (Mat. 11:28).

11. ¿Tzeʼn in kubʼ qyekʼin qa in nok qeʼ qkʼuʼj tiʼj Jehová ex tiʼ bʼant tuʼn jun mejebʼleʼn?

¹¹ Qo yolin tiʼjju in bʼaj tiʼj Alexéi, jun ermano te Rusia in tzaj nim nya bʼaʼn tiʼj tuʼnju in che el ikʼun erman toj lugar aju. ¿Tiʼ o tzʼonin tiʼj tuʼn kukx tikʼx tuʼn? Kukx o tzʼok tilil tuʼn junx tukʼil t-xuʼjil tuʼn kyxnaqʼtzan tiʼj Biblia ex tuʼn kykʼulin te Jehová. In tzaj tqʼamaʼn Alexéi jlu: «In nok tilil wuʼne tuʼn nxnaqʼtzane njunalxe ex tuʼn wuʼjine tiʼj Tyol Dios tkyaqil qʼij. Ex tkyaqil prim, in qo xnaqʼtzane tiʼj texto diario tukʼil nxuʼjile ex in qo naʼne Dios junx». ¿Tiʼ xnaqʼtzbʼil jaku tzʼel qiʼn kyiʼj? Qa nim toklen tuʼn tok qeʼ qkʼuʼj tiʼj Jehová ex nya qiʼjx. Tuʼn tbʼant jlu quʼn, nim toklen tuʼn tok tilil quʼn tuʼn tchʼiy qʼuqbʼil qkʼuʼj aj qxnaqʼtzan tiʼj Biblia, aj qnaʼn Dios, aj qxiʼ kyoj chmabʼil ex aj qpakbʼan. Qa ma bʼant jlu quʼn, ok qo tzajel kʼiwlaʼn tuʼn Jehová ex kʼonil qiʼj tuʼn kukx qajbʼen te. Ex jaku tzʼok qeʼ qkʼuʼj tiʼj qa tzul tqʼoʼn qipumal ik tzeʼn bʼant tuʼn tukʼil Sansón.

12. ¿Tiʼ bʼant tuʼn Sansón ex tiquʼn junxitl ok ambʼil lu kywitz txqantl tej tel txalpaj?

¹² Tuʼnju nya tzʼaqlitoq Sansón, ax ikx el txalpaj ex tzaj nya bʼaʼn tiʼj tuʼnju mintiʼ ximen tiʼj toklen otoq txi qʼoʼn tuʼn Jehová. Tej otoq tzikʼ jun ambʼil in najbʼen te jwes, «o t-xoʼ tgan Sansón tiʼj jun xuʼj Dalila tbʼi, aju najl tuj chqʼajlaj Sorec» (Juec. 16:4). Tej naʼmxtoq tok tojtzqiʼn Sansón Dalila, otoq kubʼ t-ximen tuʼn tkubʼ mojeʼ tukʼil jun xuʼj filistea. In tzaj tqʼamaʼn Biblia qa bʼant jlu tuʼn tuʼnju «in jyontoq Qman tumel tzaʼn tten tuʼn tok tzoqpaj kyiʼj aj Filisteo». Yajxitl, xi Sansón toj tnam Gaza ex kyaj ten tja jun prostituta. Toj ambʼil lu, ax ikx onin Jehová tiʼj Sansón tuʼn t-xi tiʼn qe tpwertil tnam (Juec. 14:1-4; 16:1-3). Pero junxitl aju bʼaj tukʼil Dalila tuʼnju bʼalo te Israel te. Ex toj ambʼil lu, ax Sansón kubʼ ximente tuʼn tyolin tukʼil.

13. ¿Tiʼ xi tqanin Dalila te Sansón?

¹³ Xi kyqʼamaʼn filisteo te Dalila tuʼn tok meltzʼaj tiʼj Sansón ex xi kyqʼoʼn nim pwaq te. Tuʼnju kʼujlaʼntoq Dalila tuʼn Sansón, bʼalo mintiʼ el tnikʼ tiʼjju kubʼ t-ximen. Noq tiʼxku bʼaj, kukx ok tilil tuʼn Dalila tuʼn t-xi tqanin te Sansón jatumel tzaj tipumal. Tej tikʼ ambʼil, kubʼ tkʼuʼj Sansón tuʼn Dalila ex el tiʼn Jehová tipumal toj jun ambʼil ex ya mintiʼ tzalaj tiʼj (Juec. 16:16-20).

14. ¿Tiʼ bʼaj tiʼj Sansón tuʼnju ok qeʼ tkʼuʼj tiʼj Dalila?

¹⁴ Tzaj nim nya bʼaʼn tiʼj Sansón tuʼnju ok qeʼ tkʼuʼj tiʼj Dalila ex nya tiʼj Jehová. Tzyet kyuʼn filisteo ex i etz qʼiʼn tbʼaqʼ twitz. Yajxitl okx qʼoʼn pres toj tnam Gaza aju lugar otoq tzʼel tiʼn tpwertil. Toj tnam lu, ok obligarin kyuʼn xjal cheʼl twitz  awal. Yajxitl, kubʼ kybʼinchaʼn filisteo jun fiesta ex xi kyqʼoʼn chojbʼil te kydios Dagón tuʼnju kubʼ kyximen qa a xi qʼonte Sansón toj kyqʼabʼ. «Etztzun qʼiʼn Sansón tuj pres ex ajbʼen te kysaqchbʼil», toj juntl yol e xmayin tiʼj (Juec. 16:21-25).

15. ¿Tzeʼn kubʼ tyekʼin Sansón qa jyon onbʼil juntl maj tukʼil Jehová? (Jueces 16:28-30; qʼonka twitza tiʼj dibujo tok tiʼj revista).

¹⁵ Maske kubʼ tbʼinchaʼn Sansón jun matij il, ok tilil tuʼn tuʼn tajbʼen te Jehová. Kukx qʼojin kyukʼil filisteo ik tzeʼn xi tqʼamaʼn Jehová te (kjawil uʼjit Jueces 16:28-30). Tuʼntzunju, xi tqʼamaʼn Sansón jlu te Jehová: «Qʼontza wipumale tuʼn tchjet kyuʼn aj Filisteo bʼiʼx jaʼlo aqeju kabʼe tbʼaqʼ nwitze o jatz kyiʼn». Tzaj bʼiʼn tnaʼj Dios Sansón tuʼn Jehová ex tzaj qʼoʼn tipumal juntl maj. Ex toj ambʼil lu, mas nim filisteo e kyim tuʼn twitzju toj tkyaqil tanqʼibʼil.

16. ¿Tiʼ xnaqʼtzbʼil jaku tzʼel qiʼj tiʼj Sansón?

¹⁶ Maske tzaj nya bʼaʼn tiʼj Sansón tuʼnju el txalpaj, kukx ok tilil tuʼn tuʼn t-xi tbʼinchaʼn tajbʼil Jehová. Ax ikx qe, mintiʼ tuʼn tkyaj qtzaqpiʼn tuʼn qajbʼen te Jehová qa ma qo el txalpaj. Atlo maj qo tzajel kawin moqa jaku tzʼel qʼiʼn jun qoklen. Pero miʼn tzikʼ tnaʼl quʼn qa jaku kubʼ najsaʼn qil tuʼn Jehová (Sal. 103:8-10). Maske jaku qo el txalpaj, kukx jaku tzaj tqʼoʼn Jehová qipumal tuʼn t-xi qbʼinchaʼn aju tajbʼil ik tzeʼn bʼant tuʼn tukʼil Sansón.

17, 18. ¿Tiquʼn in tzaj qʼuqbʼaʼn tkʼuʼja tuʼnju bʼaj tiʼj Michael? (Ax ikx qʼonka twitza kyiʼj foto).

¹⁷ Qo xnaqʼtzan tiʼjju bʼaj tiʼj jun kuʼxun Michael tbʼi. Otoq tzaj qʼoʼn toklen te siervo ministerial ex te precursor regular. Ex in noktoq tilil tuʼn toj tajbʼebʼil te Jehová. Noqtzun tuʼnj, el txalpaj ex i el qʼiʼn toklen toj congregación. Tqʼama jlu: «Toj ambʼil aju, in noktoq tilil wuʼne toj wajbʼebʼile te Jehová. Pero noq minabʼen, ya mlaytoq bʼant jun tiʼ wuʼne. Ok qeʼ nkʼuʼje tiʼj qa mlaytoq chin kyaj koline tuʼn Jehová. Pero kwest ela toj nwitze tuʼn t-xi nnimane qa jakutoq ten juntl maj wamiwbʼile tukʼil ex jakutoq chin ajbʼene juntl maj kye erman toj congregación ik tzeʼn tnejel».

¹⁸ Tbʼanel tuʼnju kukx ok tilil tuʼn Michael. Tqʼama jlu: «Ok tilil wuʼne tuʼn wok laqʼeʼye mas ttxlaj Jehová. El npaʼne  ambʼil tuʼn nnaʼne Dios te Jehová tuʼn tkyaqil wanmiye, tuʼn nxnaqʼtzane ex tuʼn nximane tiʼjju in jaw wuʼjine». Tej tikʼ ambʼil, e tzaj qʼoʼn juntl maj toklen Michael toj congregación. Toj ambʼil jaʼlo, in najbʼen te ansyan ex te precursor regular. Tqʼamatl jlu: «Aju onbʼil tzaj kyqʼoʼn txqantl weye ex mas aju tzaj kyqʼoʼn ansyan, onin wiʼje tuʼn tel nnikʼe tiʼj qa kukx kʼujlaʼn qine tuʼn Jehová. Toj ambʼil jaʼlo, jaku chin ajbʼene te Jehová tukʼil tbʼanel nximbʼetze. Aju bʼaj wiʼje, in tzaj tyekʼin weye qa jaku kubʼ tnajsaʼn Jehová til alkyexku xjal qa ax tok ma tzʼajtz tiʼj tanmi». Ik tzeʼn bʼaj tiʼj Michael, ax ikx qe jaku tzʼok qeʼ qkʼuʼj tiʼj qa jaku qo ajbʼen juntl maj tuʼn Jehová ex qa jaku qo tzaj tkʼiwlaʼn maske otoq qo el txalpaj. Noqtzun tuʼnj, il tiʼj tuʼn kybʼant chʼixpubʼil quʼn ex tuʼn tok qeʼ qkʼuʼj tiʼj Jehová (Sal. 86:5; Prov. 28:13).

19. ¿Tzeʼn o tzʼonin tiʼja aju techel kyaj tqʼoʼn Sansón?

¹⁹ Toj xnaqʼtzbʼil lu, oʼkx ma qo yolin kyiʼj junjun tbʼanel tiʼchaq e ikʼ toj tanqʼibʼil Sansón. Maske nyatoq tzʼaqli ex el txalpaj tej tyolin tukʼil Dalila, kukx ok tilil tuʼn tuʼn tajbʼen te Jehová. Ax ikx, mintiʼ kubʼ t-ximen Jehová qa ya mintiʼtoq tajbʼen. Sino ajbʼen tuʼn tuʼn tkubʼ tbʼinchaʼn jun tiʼ tbʼanelxix. Nya oʼkxju, ax ikx xi tqʼoʼn ambʼil tuʼn tkubʼ tzʼibʼin tbʼi toj capítulo 11 te Hebreos junx tukʼil kybʼi txqantl tmajen kubʼ kyyekʼin qʼuqbʼil kykʼuʼj. In kubʼ qnaʼn nimxix tzalajbʼil tuʼnju kʼujlaʼn qoʼ tuʼn Jehová ex taj tuʼn ttzaj tqʼoʼn qipumal, ex mas aj qok weʼ kywitz nya bʼaʼn. Tuʼntzunju, bʼaʼn tuʼn t-xi qqanin jlu te Jehová ik tzeʼn te Sansón: «In chin kubʼsane twitza Nman Dios, chin tnaʼntza noq oʼkx juntl maj jaʼlo, ex qʼontza wipumale» (Juec. 16:28).