1. ¿Tiʼ aqʼuntl xi tqʼoʼn Jehová te Pedro tej chʼinxtoq tkyim?

 TEN apóstol Pedro tzʼaqli twitz Jehová kyoj nimku abʼqʼi. Pakbʼan tukʼil Jesús, xi tzyet tuʼn tpakbʼan kye xjal nya judiy ex ajbʼen toj Cuerpo Gobernante. Pero tzaj qʼoʼn mas taqʼun tuʼn Jehová tej ya chʼixtoq tkyim. Kyoj abʼqʼi 62 a 64 tiʼj ambʼil qʼiʼn quʼn jaʼlo, ajbʼen xewbʼaj xjan tuʼn Jehová tuʼn tonin tiʼj Pedro tuʼn tkubʼ ttzʼibʼin kabʼe carta, aju tnejel ex tkabʼin uʼj te Pedro. Tajtoq Pedro tuʼn kyonin carta lu kyiʼj okslal, axpe ikx tej ya otoqxi kyim (2 Ped. 1:12-15).

2. ¿Tiquʼn in xi qqʼamaʼn qa kubʼ ttzʼibʼin Pedro qe tcarta toj jun tbʼanel ambʼil?

² Kubʼ ttzʼibʼin Pedro qe kabʼe carta tej kyok weʼ erman twitz nim nya bʼaʼn ex tej ttzaj bʼis kyiʼj (1 Ped. 1:6). Ok tilil kyuʼn junjun xjal tuʼn t-xi kyyekʼin xnaqʼtzbʼil nya ax tok kye okslal ex tuʼn tkubʼ kybʼinchaʼn nya bʼaʼn (2 Ped. 2:1, 2, 14). Chʼinxtoq tok kykeʼyin okslal te Jerusalén «tqʼijlalil tuʼn tbʼaj tkyaqil», toj juntl yol, aju ambʼil tej tkubʼ xiten tnam ex templo kyuʼn soldad te Roma (1 Ped. 4:7). Qʼuqli qkʼuʼj tiʼj qa e onin kabʼe carta kubʼ ttzʼibʼin Pedro kyiʼj okslal tej kyok weʼ kywitz nya bʼaʼn ex onin kyiʼj tuʼn tbʼaj kybʼinchaʼn kyten kyiʼj prueba e ok weʼ twitz yajxitl. b

3. ¿Tiquʼn bʼaʼn tuʼn qxnaqʼtzan kyiʼj kabʼe carta kubʼ ttzʼibʼin Pedro?

³ Kubʼ ttzʼibʼin Pedro qe kabʼe carta lu kye okslal toj tnejel syent abʼqʼi. Noqtzun tuʼnj, xi tqʼoʼn Jehová ambʼil tuʼn kyten toj Biblia tuʼntzun tel qiʼn jun xnaqʼtzbʼil kyiʼj (Rom.  15:4). Toj ambʼil jaʼlo, kwest jaku tzʼela toj qwitz tuʼn qajbʼen te Jehová tuʼnju in qo ok weʼ kywitz nim nya bʼaʼn ex tuʼnju in kubʼ kyyekʼin xjal nya bʼaʼn kymod. Ax ikx, chʼix ttzaj jun xitbʼil mas matij twitzju tzaj tiʼj Jerusalén ex tiʼj templo. Tuʼntzunju, jaku che jatz qiʼn tbʼanel xnaqʼtzbʼil kyoj kabʼe carta kubʼ ttzʼibʼin Pedro ex jaku che onin qiʼj tuʼn qayon tiʼj tqʼijlalil Jehová, tuʼn miʼn qtzaj xobʼ kywitz txqantl ex tuʼn tkubʼ qyekʼin qkʼujlabʼil kyiʼj erman. Ex che onil xnaqʼtzbʼil lu kyiʼj ansyan tuʼn kyxqʼuqin tiʼj congregación.

4. ¿Tiʼ jaku chewix qokslabʼil tuʼn? (2 Pedro 3:3, 4).

⁴ Chʼixmi kykyaqil xjal mintiʼ in nok qeʼ kykʼuʼj tiʼjju in tzaj tqʼamaʼn Biblia tiʼj ambʼil tzul. Tuʼnju o tzikʼ ambʼil in xi qqʼamaʼn kye txqantl qa tzul xitbʼil, jakulo che xmayin qiʼj moqa jaku tzaj kyqʼamaʼn qe qa mlayx tzul (kjawil uʼjit 2 Pedro 3:3, 4). ¿Tiʼ jaku bʼaj qa ma che xmayin txqantl qiʼj toj pakbʼabʼil, toj aqʼuntl moqa aju qfamilia? Qa ma tzʼok qqʼoʼn qwiʼ tiʼj kyyol, jakulo qo chewix toj qokslabʼil. Pero tuʼn miʼn tbʼaj jlu, qo xnaqʼtzan tiʼjju tqʼama Pedro.

5. ¿Tiʼ jaku tzʼonin qiʼj tuʼn qayon tukʼil pasens tiʼj xitbʼil? (2 Pedro 3:8, 9).

⁵ Jakulo kubʼ kyximen junjun xjal qa o txi tiʼn nim ambʼil tuʼn ttzaj tiʼn Jehová xitbʼil. Pero tqʼama Pedro jun tiʼ tbʼanel tuʼn qximen tiʼj, tzaj tnaʼn qe qa mintiʼ in nok tqʼoʼn Jehová twitz tiʼj ambʼil ik tzeʼn kye xjal (kjawil uʼjit 2 Pedro 3:8, 9). Toj twitz Jehová, in nok mil abʼqʼi ik tzeʼn jun qʼij. Ex in kubʼ tyekʼin Jehová tpasens tuʼnju nya taj tuʼn tkyim jun xjal. Pero tzul tqʼij ex kpol ambʼil tuʼn tel tiʼn tkyaqil nya bʼaʼn. Tuʼn jlu, in nel qnikʼ tiʼj qa o tzaj qʼoʼn jun tbʼanelxix qoklen tuʼn qpakbʼan kye xjal toj chʼintl ambʼil atx.

6. ¿Tiʼ jaku bʼant quʼn tuʼn tkubʼ qyekʼin qa in qo ayon tiʼj tqʼijlalil Jehová? (2 Pedro 3:11, 12).

⁶ Tzaj tqʼamaʼn Pedro tuʼn kukx tok tilil quʼn ex tuʼn qayon tiʼj tqʼijlalil Jehová (kjawil uʼjit 2 Pedro 3:11, 12). ¿Tzeʼn jaku bʼant jlu quʼn? Jaku bʼant quʼn aj qximen tkyaqil qiʼj tiʼj tbʼanel qanqʼibʼil tzul tqʼoʼn Jehová toj ambʼil tzul. Tuʼntzunju, tbʼanel qa ma qo ximen tiʼj qa ktel tbʼanel wabʼj ex kyqʼiqʼ. Ax ikx, jaku qo ximen tiʼj qʼij aj kyjaw anqʼin toj qja o che kyim ex tiʼj ambʼil aj t-xi qchikʼbʼaʼn kye xjal e anqʼin toj ambʼil ojtxe tzeʼn japun kywi junjun profecía. Qa ma qo ximen kyiʼj tiʼchaq ik tzeʼn jlu, jaku tzʼonin qiʼj tuʼn kukx qxqʼuqin ex tuʼn ttzaj qnaʼn qa in qo anqʼin kyoj mankbʼil tqʼijlalil. Tuʼnju ojtzqiʼn quʼn tiʼ kbʼajel toj ambʼil tzul, mintiʼ in xi qqʼoʼn ambʼil tuʼn tchʼexpaj qximbʼetz kyuʼn xnaqʼtzbʼil nya ax tok (2 Ped. 3:17).

7. ¿Tiʼ jaku bʼaj qa ma qo tzaj xobʼ kywitz txqantl?

⁷ Ojtzqiʼn quʼn qa chʼinx tul tqʼijlalil Jehová, tuʼntzunju tbʼanel qa ma tzʼok tilil quʼn tuʼn qonin kyiʼj xjal tuʼn tok kybʼiʼn tbʼanel tqanil. Pero atlo maj jaku qo tzaj xobʼ tuʼn qyolin kyukʼil xjal. Atzun jlu bʼaj tiʼj Pedro toj qonikʼen tej tok Jesús toj juicio kyuʼn xjal. Mintiʼ xi tqʼamaʼn qa t-xnaqʼtzbʼen Jesús, sino kubʼ tewin nimku maj (Mat. 26:69-75). Noqtzun tuʼnj, ok tilil tuʼn tuʼn ya miʼn ttzaj xobʼ ex tqʼama jlu: «Miʼn che xobʼe kywitz xjal, ex miʼn naj kynabʼle» (1 Ped. 3:14). Kyuʼn yol lu tqʼama Pedro, in nel qnikʼ tiʼj qa jaku ten qipumal tuʼn miʼn qtzaj xobʼ kywitz txqantl.

8. ¿Tiʼ kʼonil qiʼj tuʼn miʼn qtzaj xobʼ kywitz txqantl? (1 Pedro 3:15).

⁸ ¿Tiʼ jaku tzʼonin qiʼj tuʼn miʼn qtzaj xobʼ kywitz txqantl? Tzaj tqʼoʼn Pedro consej  jlu qe: «Noq oʼkx tuʼn kynimane te Crist tuj kyanmiye» (kjawil uʼjit 1 Pedro 3:15). Tuʼn tbʼant jlu quʼn, nim toklen tuʼn ttzaj qnaʼn qa o txi qʼoʼn toklen Jesús te Rey ex qa at nim tipumal. Qa ma tzaj xobʼa tuʼn tpakbʼana moqa in tzaj nervios tiʼja, bʼaʼn tuʼn t-ximana tiʼj toklen Jesús te Rey. Jun techel, ximana tiʼj qa ya in kawin toj kyaʼj ex qa ateʼ nim anjel ttxlaj. Miʼn tzikʼ tnaʼl tuʼna qa o tzaj qʼoʼn toklen «tiʼj tkyaqilju at tuj kyaʼj ex twitz txʼotxʼ», ex qa ktel tukʼila «tkyaqil qʼij akutzun in japun bʼaj mankbʼil tqʼijlalil» (Mat. 28:18-20). Tzaj tqʼamaʼn Pedro qa nim toklen tuʼn qkolin tiʼj qokslabʼil. Tqʼama jlu: «Noq bʼanin kytene tuʼn t-xi kytzaqʼweʼne qe xjal». Qa taja tuʼn tpakbʼana kye tukʼila toj aqʼuntl, toj escuela moqa toj juntl lugar, tbʼanel tuʼn t-ximana tiʼj toj alkye ambʼil kbʼantel tuʼna ex kyiʼj tyola kxel tqʼamaʼna. Qaninxa te Jehová tuʼn ttzaj tqʼoʼn tipumala ex jaku tzʼok qeʼ tkʼuʼja tiʼj qa kʼonil tiʼja tuʼn miʼn ttzaj xobʼa kywitz txqantl (Hech. 4:29).

9. ¿Toj alkye ambʼil mintiʼ kubʼ tyekʼin Pedro tkʼujlabʼil? (Ax ikx qʼonka twitza tiʼj dibujo).

⁹ El tnikʼ Pedro tiʼj tzeʼn tuʼn tkubʼ tyekʼin tkʼujlabʼil. Ten Pedro tukʼil Jesús tej tqʼama jlu: «Kxel nqʼoʼne jun akʼaj mandamyent kyeye: Tuʼn kykʼujlante kyibʼe kyxolxe ik tzaʼn weye ma che nkʼujlaye, ikxtzun kyeye tuʼn kykʼujlante kyibʼe kyxolxe» (Juan  13:34). Noqtzun tuʼnj, el tkanoʼn Pedro kyiʼj txqantl tej tikʼ ambʼil ex ya mintiʼ waʼn kyukʼil xjal nya judiy. Tuʼnju bʼant jlu tuʼn Pedro, tqʼama apóstol Pablo qa otoq tzʼok te xmeletzʼ (Gál. 2:11-14). Xi tbʼiʼn Pedro kawbʼil xi tqʼoʼn Pablo te ex e bʼant chʼixpubʼil tuʼn. Kyoj kabʼe carta kubʼ ttzʼibʼin, in tzaj tyekʼin qe qa nya oʼkx il tiʼj tuʼn t-xi qqʼamaʼn qa kʼujlaʼn qe erman quʼn, sino ax ikx il tiʼj tuʼn tkubʼ qyekʼin.

10. ¿Tiʼ in nonin qiʼj tuʼn tkubʼ qyekʼin qkʼujlabʼil axix tok? (1 Pedro 1:22).

¹⁰ Tzaj tqʼamaʼn Pedro tuʼn tkubʼ qyekʼin kʼujlabʼil axix tok kyiʼj erman (kjawil uʼjit 1 Pedro 1:22). Jaku bʼant jlu quʼn qa ma txi qnimen «yol axix tok», toj juntl yol, qa ma t-xi qnimen qe xnaqʼtzbʼil o tzʼel qnikʼ tiʼj. Ik tzeʼn qa mintiʼ in nok tkeʼyin «Dios aju kyxilen xjal» (Hech. 10:34, 35). Qa oʼkx in kubʼ qyekʼin qkʼujlabʼil kyiʼj junjun erman toj congregación, mintiʼ in xi qnimen mandamyent kyaj tqʼoʼn Jesús tiʼj kʼujlabʼil. Ax tok, jakulo ten jun tbʼanel qamiwbʼil kyukʼil junjun erman toj congregación ik tzeʼn bʼaj tiʼj Jesús kyukʼil junjun t-xnaqʼtzbʼen (Juan 13:23; 20:2). Noqtzun tuʼnj, in tzaj tnaʼn Pedro qe qa il tiʼj tuʼn kyok qkʼujlaʼn kykyaqil erman tuʼnju in qo ok ik tzeʼn jun familia (1 Ped. 2:17).

11. ¿Tiʼ t-xilen tuʼn kyok qkʼujlaʼn txqantl tuʼn tkyaqil qkʼuʼj?

¹¹ Tzaj tqʼoʼn Pedro consej jlu qe: «Kykʼujlam kyibʼe kyxolxe tuʼn tkyaqil kykʼuʼje ex tuʼn tkyaqil kyipune». ¿Tiʼ kyxilen yol lu? A t-xilen tuʼn kyok qkʼujlaʼn txqantl, axpe ikx qa kwest in nela toj qwitz. Jun techel, ¿tiʼ jaku bʼaj qa ma tzʼok bʼinchaʼn nya bʼaʼn qiʼj tuʼn jun erman? Mlaylo kubʼ qyekʼin qkʼujlabʼil tiʼj, sino jaku tzʼaj qqʼoʼn t-xel nya bʼaʼn. Noqtzun tuʼnj, mlay tzalaj Jehová qiʼj qa ma bʼant jlu quʼn ik tzeʼn xi tqʼamaʼn Jesús te Pedro (Juan 18:10, 11). Kubʼ ttzʼibʼin Pedro jlu: «Qa at jun mya bʼaʼn ma bʼinchanjtz kyiʼje kyuʼn xjal, miʼn tzʼaj kyqʼoʼne t-xel mya bʼaʼn; qa ma che ok yasoʼne kyuʼn xjal, miʼn tzʼaj kymojtzaʼne yasbʼil» (1 Ped. 3:9). Qa ma che ok qkʼujlaʼn txqantl tuʼn tkyaqil qkʼuʼj, kbʼel qyekʼin tbʼanel qmod kyukʼil, axpe ikx kyukʼil qeju in nok kybʼinchaʼn nya bʼaʼn qiʼj.

12. a) Qa ma che ok qkʼujlaʼn txqantl tuʼn tkyaqil qkʼuʼj, ¿tiʼ mas kbʼantel quʼn? b) ¿Tiʼ xnaqʼtzbʼil jaku tzʼel tiʼna tiʼj video Aqeju kʼiwlabʼil in che tzaj qa at mujbʼabʼil qxol?

¹² Toj tnejel carta kubʼ ttzʼibʼin Pedro ax ikx tqʼama qe yol lu: «Tuʼn ttenxix kykʼujlalile kyxolxe». Qa ma bʼant jlu quʼn, jaku kubʼ qnajsaʼn «nimku kyil txqantl» (1 Ped. 4:8). Tej tkubʼ ttzʼibʼin Pedro qe yol lu, tzajlo tnaʼn aju xi t-xnaqʼtzaʼn Jesús te tiʼjju tuʼn tkubʼ qnajsaʼn kyil txqantl. Toj jun ambʼil, xi tqʼamaʼn Pedro te Jesús qa jakutoq kubʼ tnajsaʼn til jun xjal wuq maj. Tuʼn jlu tajtoq tuʼn tkubʼ tyekʼin qa ten jun tbʼanel tmod. Pero xi tqʼamaʼn Jesús te qa iltoq tiʼj tuʼn tkubʼ tnajsaʼn kyil txqantl 77 maj, toj juntl yol, nimku maj. ¡Jun tbʼanelxix xnaqʼtzbʼil! (Mat. 18:21, 22). Qa kwest in nela toj qwitz tuʼn t-xi qbʼiʼn consej jlu, miʼn tzaj bʼaj qkʼuʼj. Tuʼnju aj il qoʼ, atlo maj kwest in nela toj qwitz tuʼn tkubʼ qnajsaʼn kyil txqantl. Maske ikju, nim toklen tuʼn tbʼant quʼn ex tuʼn t-xi qbʼinchaʼn tiʼj nya bʼaʼn kyukʼil. c

13. ¿Tiquʼn kwest jaku tzʼela toj kywitz ansyan tuʼn kyxqʼuqin kyiʼj erman?

¹³ Kukxlo tzaj tnaʼn Pedro qe yol xi tqʼamaʼn Jesús te tej otoqxi jaw anqʼin. Xi tqʼamaʼn jlu te: «Che tkwentin oka qe  nẍneʼle» (Juan 21:16). Qa in najbʼen teya te ansyan, ax ikx nim toklen tuʼn t-xi tbʼiʼna qe yol lu. Noqtzun tuʼnj, atlo maj kwest jaku tzʼela toj twitza tuʼn tten ambʼil tiʼja tuʼn tjapun twi toklena. Jun techel, il tiʼj tuʼn t-xqʼuqina kyiʼj toj tjaya ex tuʼn t-xi tqʼoʼna aju at tajbʼen kye, tuʼn tkubʼ kynaʼn qa kʼujlaʼn qe tuʼna ex tuʼn tonina kyiʼj tuʼn kyok laqʼeʼ ttxlaj Jehová. Ax ikx, il tiʼj tuʼn tkubʼ tqʼoʼna jun tbʼanel techel kywitz txqantl toj pakbʼabʼil, tuʼn tbʼaj tbʼinchaʼn ttena kyiʼj chmabʼil ex tuʼn kyex tqʼoʼna chikʼbʼabʼil toj asamblea. Ex ateʼ junjuntl ansyan in che onin kyukʼil Kʼloj Yolil kyukʼil aj Qʼanil ex tukʼil Departamento Local de Diseño ex Construcción. Tuʼn jlu, in nel qnikʼ tiʼj qa at nim aqʼuntl tuʼn tbʼant kyuʼn ansyan.

14. ¿Tiquʼn kyaj ansyan tuʼn kyxqʼuqin kyiʼj erman ex tiʼ jaku tzʼonin kyiʼj? (1 Pedro 5:1-4).

¹⁴ Xi tqʼamaʼn Pedro qe yol lu kye ansyan: «Kypastorin oke qe t-ẍneʼl Dios» (kjawil uʼjit 1 Pedro 5:1-4). Kʼujlaʼn qe erman kyuʼn ansyan ex kyaj tuʼn kyxqʼuqin kyiʼj. Pero atlo maj jaku kubʼ kyximen ansyan qa mlay japun twi kyoklen kyuʼn tuʼnju at nim tiʼchaq tuʼn t-xi kybʼinchaʼn moqa otoq che sikt. Qa a jlu in bʼaj tiʼja, ¿tiʼ jaku bʼant tuʼna? Qʼamanxa te Jehová tiʼ in kubʼ tnaʼna. Kubʼ ttzʼibʼin Pedro jlu: «Qa at jun in ajbʼen kye txqantl, tzʼajbʼenx tuʼn tipumal Dios» (1 Ped. 4:11). Bʼalo in che ok weʼ erman kywitz nya bʼaʼn mintiʼ solución tiʼj toj ambʼil jaʼlo. Pero miʼn tzikʼ tnaʼl tuʼna qa mas tbʼanel onbʼil jaku txi tqʼoʼn Jesús kye jaʼlo ex toj ambʼil tzul tuʼnju a pastor mas nim toklen. ¿Tiʼtzun taj Jehová tuʼn tbʼant kyuʼn ansyan? Taj tuʼn tok kykʼujlaʼn qe erman, tuʼn kyxqʼuqin kyiʼj ex tuʼn tkubʼ kyqʼoʼn jun tbʼanel techel kywitz.

15. ¿Tiʼ in bʼant tuʼn jun ansyan tuʼn t-xqʼuqin kyiʼj erman? (Ax ikx qʼonka twitza tiʼj foto).

¹⁵ O tzʼajbʼen William te ansyan toj nimku ambʼil ex nim toklen toj twitz tuʼn t-xqʼuqin kyiʼj erman. Tej ttzaj pandemia te COVID-19, el tnikʼ William tiʼj kyukʼil ansyan toj tcongregación qa nimtoq toklen tuʼn kyyolin kyukʼil erman toj teyele junjun grupo te predicación tkyaqil seman. ¿Tiquʼn? In tzaj tchikʼbʼaʼn William jlu: «Ateʼ nim erman kyjunalx e ten kyja, tuʼntzunju mastoq fácil tuʼn tten nya bʼaʼn kyximbʼetz». Aj tok weʼ jun erman twitz jun nya bʼaʼn, in nok tilil tuʼn William  tuʼn tok tbʼiʼn, tuʼn tel tnikʼ tiʼjju in tzaj bʼaj tkʼuʼj tiʼj ex alkye onbʼil taj. Yajxitl, in xi tjyoʼn jun xnaqʼtzbʼil tuʼn tonin tiʼj erman ex chʼixmi tkyaqil maj in xi tsamaʼn jun video te sitio te internet te. Tqʼamatl William jlu: «Mas nim toklen tuʼn qxqʼuqin kyiʼj erman toj ambʼil jaʼlo. Qa in nok tilil quʼn tuʼn qonin kyiʼj xjal tuʼn tel kynikʼ tiʼj Jehová, ¿nyapetzulo mas nim toklen tuʼn qonin kyiʼj erman tuʼn kukx kybʼet toj axix tok?».

16. ¿Tzeʼn jaku kubʼ qqʼoʼn toj xnaqʼtzbʼil aju ma tzʼel qnikʼ tiʼj kyoj kabʼe carta kubʼ ttzʼibʼin Pedro?

¹⁶ Toj xnaqʼtzbʼil lu, oʼkx ma qo yolin kyiʼj junjun xnaqʼtzbʼil jaku che jatz qiʼn kyoj kabʼe carta kubʼ ttzʼibʼin Pedro. Malo tzʼok tqʼoʼn twitza tiʼj qa jaku che bʼant junjun chʼixpubʼil tuʼna. Jun techel, ¿tajpe teya tuʼn t-ximana mas ambʼil tiʼj qanqʼibʼil ktel toj akʼaj twitz Txʼotxʼ? ¿Ope kubʼ t-ximana tuʼn tpakbʼana toj aqʼuntl, toj escuela moqa toj juntl lugar? ¿Ope ximana tiʼj tzeʼn tuʼn tkubʼ tyekʼina tkʼujlabʼila kyiʼj erman toj junjuntl tumel? Yajtzun qa in najbʼena te ansyan, ¿ope kubʼ t-ximana tuʼn tok tilil tuʼna tuʼn t-xqʼuqina kyiʼj erman tuʼn tkyaqil tkʼuʼja? Qa in nel tnikʼa tiʼj qa il tiʼj tuʼn kybʼant junjun chʼixpubʼil tuʼna, miʼn tzaj bʼaj tkʼuʼja. Miʼn tzikʼ tnaʼl tuʼna qa «tbʼanilxix Qajaw» ex qa kʼonil tiʼja tuʼn kybʼant chʼixpubʼil tuʼna (1 Ped. 2:3). In tzaj tqʼamaʼntl Pedro jlu qe: «Axte Dios ktzʼaqsalte kynabʼle, ex tuʼn kyweʼxixe tuj kyokslabʼle, ex kqʼolte kyipumale, ex kkyuwsal kyeye» (1 Ped. 5:10).

17. ¿Alkye oyaj ktzajel qʼoʼn qe qa kukx ma tzʼok tilil quʼn ex qa ma txi qqʼoʼn ambʼil te Jehová tuʼn qtzaj t-xnaqʼtzaʼn?

¹⁷ Tnejel, kubʼ t-ximen Pedro qa nyatoq nim toklen at tuʼn tten tukʼil Jesús (Luc. 5:8). Pero tuʼnju kubʼ tyekʼin Jehová ex Jesús tkʼujlabʼil tiʼj, mintiʼ kubʼ numj toj tokslabʼil. Tuʼnju bʼant jlu tuʼn, xi qʼoʼn ambʼil te tuʼn tokx toj «kawbʼil te jumajx te Qajaw ex Klolqe Jesucrist» (2 Ped. 1:11). Jun tbʼanelxix oyaj xi qʼoʼn te Pedro. Qa kukx ma tzʼok tilil quʼn ik tzeʼn te Pedro ex ma txi qqʼoʼn ambʼil te Jehová tuʼn ttzaj tqʼoʼn xnaqʼtzbʼil qe, tzul tqʼoʼn qchwinqlal te jumajx ex qo kletel noq tuʼn qokslabʼil (1 Ped. 1:9).