«Tkyaqil qʼij il tiʼj tuʼn tkubʼ tyekʼin jun xinaq ex jun xuʼj tpasens qa o kubʼ mojeʼ. Qa naʼmx tkubʼ mojeʼ jun xjal, bʼalo nya nim toklen toj twitz tuʼn tten tpasens. Noqtzun tuʼnj, nim toklen mod lu tuʼn kytzalaj mejebʼleʼn» (John).

•  ¿Tiquʼn il tiʼj tuʼn tten tpasensa?

•  ¿Tiʼ jaku bʼant tuʼna tuʼn tten mas tpasensa?

•  Nim toklen tuʼn tten qpasens

•   Mas nya kwest jaku tzʼel kynikʼ mejebʼleʼn tiʼj kypaltil.

   «Aj tikʼ ambʼil qkubʼlen mojeʼ, mas nya kwest tuʼn tok qqʼoʼn qwitz tiʼj tpaltil qukʼil. Aj in ten nya bʼaʼn qximbʼetz lu, mas kwest jaku ten qpasens» (Jessena).

•   Mlay qo ximen tiʼj qyol qa mintiʼ qpasens.

   «Jun rat in xi nqʼamaʼne aju in kubʼ nnaʼne ex mintiʼ in chin ximane tiʼj. Noqwit at npasense, jaku chin ximane toj tumel kyiʼj tiʼchaq, jaku tzikʼ tnaʼl wuʼne ex mlay txi nqʼamaʼne jun tiʼ» (Carmen).

   In tzaj tqʼamaʼn Tyol Dios jlu: «Aju xjal at tkʼujlalil at tpasens ex in tzʼeʼy tkʼuʼj tiʼj tukʼil» (1 Corintios 13:4). Tuʼntzunju, qa at kykʼujlabʼil mejebʼleʼn kyxolx, kbʼel kyyekʼin kypasens. Pero nya tkyaqil maj in bʼaj jlu. In tzaj tqʼamaʼntl John jlu: «Ik tzeʼn in bʼaj tukʼil alkyexku mod, mas jun rat jaku bʼaj qpasens twitzju tuʼn tkubʼ qyekʼin. Tuʼn kukx tten qpasens, il tiʼj tuʼn tok tilil quʼn».

•   Aj tbʼaj jun tiʼ mintiʼ ayon tuʼna.

   Jun techel: Qa ma txi tqʼamaʼn tukʼila jun tiʼ jaku kux choʼn toj tanmiya tuʼn, axlo ikx teya jaku tzʼaj tqʼoʼna t-xel.

   Taqikʼ Tyol Dios nim toklen: «Miʼn taqʼa ambʼil tuʼn ttzaj naj tqʼoja, porke aju qʼoj atzun in kybʼinchan xjal mintiʼ kynabʼl» (Eclesiastés 7:9).

   ¿Tiʼ jaku bʼant tuʼna?: Ximana tnejel. Naʼmxtoq t-xi tqʼamaʼna jun tiʼ, bʼaʼn tuʼn tel tnikʼa tiʼj qa nyatoq taj tukʼila tuʼn tok tbʼinchaʼn nya bʼaʼn tiʼja. «Chʼixme tkyaqil maj in kubʼ qyekʼin nya bʼaʼn qmod tuʼnju junxitl yol in nok toj qwiʼ twitzju tajtoq qukʼil tuʼn ttzaj tqʼamaʼn qe», chi uʼj Fighting for Your Marriage (Tzʼok tilil tuʼna tuʼn miʼn tnaj tmejebʼleʼna).

   Axpe ikx qa tajtoq t-xuʼjila tuʼn ttzaj tqʼamaʼn jun nya bʼaʼn yol teya, tenx tpasensa ex miʼn tzʼaj tqʼoʼna t-xel, iktzun tten mlay tzaj mas qʼoj kyxole. In tzaj tqʼamaʼn Tyol Dios jlu: «Qa mintiʼ siʼ in kuʼx yupj qʼaqʼ» (Proverbios 26:20).

   «Qa ma txi tzyet tuʼn tok tqʼoʼna t-xuʼjila te jun aj qʼoj tiʼja, weʼkuya ex ximana tiʼj tiquʼn kʼujlaʼn tuʼna, ex jun rat bʼinchanxa jun tbʼanel tiʼ tiʼj» (Ethan).

   Ximana tiʼj jlu:

  •  ¿Tiʼ tmoda in ten aj tkubʼ tbʼinchaʼn tukʼila moqa aj ttzaj tqʼamaʼn jun tiʼ nya bʼaʼn in nela toj twitza?

  •  ¿Tzeʼn jaku kubʼ tyekʼina mas tpasensa aj tbʼaj jlu juntl maj?

•   Aj tkubʼ tbʼinchaʼn tukʼila jun tiʼ nimku maj.

   Jun techel: Qa tkyaqil maj kwest tuʼn tetz tukʼila toj ja, atzun teya in nayona nim ambʼil ex in tzaj tqʼoja.

   Taqikʼ Tyol Dios nim toklen: «Tzikʼx kyuʼne aju kypaltil junjuntl, kynajsam kyile kyxolxe qa at jun at tyol tiʼj juntl» (Colosenses 3:13).

   ¿Tiʼ jaku bʼant tuʼna?: Ximana mas tiʼj tmejebʼleʼna twitzju teya tajbʼil. Xjelinkuya jlu: «Qa ma tzʼok nqʼoʼnxix nwiʼye tiʼj jlu, ¿jakupe tzaj nya bʼaʼn tiʼj nmejebʼleʼne tuʼn?». Ax ikx bʼaʼn tuʼn ttzaj qnaʼn qa in tzaj tqʼamaʼn Tyol Dios jlu: «Qkyaqil nimku maj in qo tzpet» (Santiago 3:2). Tuʼn jlu in nel qnikʼ tiʼj qa ax ikx teya il tiʼj tuʼn tchʼexpaj junjun tmoda.

   «At maj, mas at npasense kyiʼj wamiwe ex nya tiʼj nchmile. In kubʼ nximane qa tuʼnju atine mas ambʼil tukʼil, in nok nqʼoʼne nwitze kyiʼj tpaltil. Qa at qkʼujlabʼil kbʼel qyekʼin qpasens, ex tuʼn jlu in nok qqʼoʼn toklen juntl. Tuʼntzunju, nim toklen tuʼn tten qmod lu toj qmejebʼleʼn» (Nia).

   Ximana tiʼj jlu:

  •  ¿Atpe tpasensa tiʼj tukʼila aj tel txalpaj?

  •  ¿Tiʼ jaku bʼant tuʼna tuʼn tten mas tpasensa?