ONBʼIL KYE JA XJAL
¿Tiʼ jaku bʼant kyuʼne qa junxitl kyximbʼetze at kyiʼj junjun tiʼchaq?
Kwest jaku tzʼela kye mejebʼleʼn qa junxitl kymod ex qa junxitl kyximbʼetz at kyiʼj junjun tiʼchaq. Pero at junjuntl tiʼchaq mas nim toklen ex il tiʼj tuʼn kyximen tiʼj ik tzeʼn qe jlu:
Aju ambʼil in nel kypaʼn kye toj kyja.
Tzeʼn tuʼn tajbʼen pwaq kyuʼn.
Aj tkubʼ kyximen qa tzul kykʼwal moqa miʼn.
¿Tiʼ jaku bʼant kyuʼn qeju o che kubʼ mojeʼ qa junxitl kyximbʼetz at kyiʼj junjun tiʼchaq?
Aju bʼaʼn tuʼn tel tnikʼa tiʼj
Qa in mojeʼ kychkʼel kabʼe xjal, nya a t-xilen jlu qa junx kyximbʼetz. Maske in nok kykʼujlan kyibʼ kabʼe xjal toj kymejebʼleʼn, nya a t-xilen jlu qa ax kyximbʼetz ktel tiʼj tkyaqilju kyaj tuʼn tbʼant kyuʼn.
«In jaw chʼiye toj jun ja xjal kukx el kypaʼn ambʼil tuʼn kyten junx. Kyoj fin de semana in qo tene junx kyukʼil n-aweloye, kyukʼil ntiye ex qe nprimoye. Atzun kye toj tja nchmile, mintiʼtoq in nok kychmon kyibʼ. Tuʼntzunju, junxitl qximbʼetze ten tiʼjju ambʼil tuʼn qtene kyukʼil toj qjaye moqa jniʼ ambʼil tuʼn tel qpaʼne tuʼn qyoline kyukʼil toj qjaye ateʼ najchaq» (Tamara).
«Tuʼnju junxitl tten o jaw chʼiye, attoq junjun tiʼchaq mas nim toklen te nxuʼjile tuʼn ttzaj tlaqʼoʼn. Kyoj qe tnejel xjaw tej qkubʼ mojeʼye, o yoline nim maj tiʼj jlu ex xi tiʼn ambʼil tuʼn tkyaj toj ttxolil» (Tyler).
Jaku tzʼok kyqʼoʼn kabʼe xjal kywitz tiʼj jun tbʼanel tilbʼilal ex junxitl tiʼchaq jaku tzʼok kykeʼyin. Chʼixmi axju in bʼaj kyiʼj mejebʼleʼn, at maj junxitl kyximbʼetz at tiʼj jun tiʼ.
Aj t-xi tqʼoʼna ambʼil te tukʼila tuʼn t-xi tbʼinchaʼn aju mas tgan, nya tkyaqil maj kʼonil jlu tuʼn tkyaj jun nya bʼaʼn toj ttxolil. Jun techel, ¿tiʼ kbʼantel kyuʼne qa ma tzaj yabʼil kyiʼj kytate ex il tiʼj tuʼn kyok xqʼuqit? ¿Yajtzun qa at jun kyeye taj tuʼn tul jun tkʼwal, atzun juntl nya taj? a
«Nim maj o chin yoline tukʼil nxuʼjile tiʼjju qa tzul qkʼwale. Atzunte nxuʼjile, kukx in ximen tiʼj jlu ex mas in chʼexpaj qximbʼetze tiʼj jlu aj tbʼet ambʼil. Mintiʼ in kanet jun tumel wuʼne tzeʼn tuʼn tkyaj toj ttxolil» (Alex).
Mintiʼ tuʼn tkubʼ naj kymejebʼleʼne noq tuʼnju junxitl kyximbʼetze at. In tzaj kyqʼamaʼn junjun xjal at kyojtzqibʼil qa mintiʼ in mojeʼ twi tyola tukʼil tchmila moqa t-xuʼjila tiʼj jun tiʼ nim toklen, bʼaʼn tuʼn tok tilil tuʼna tuʼn tbʼant ik tzeʼn tajbʼila, maske knajel tmejebʼleʼna. Pero tuʼn jlu kbʼel tyekʼina qa oʼkx in ximana tiʼja ex nya tiʼjju o txi kytziyene te Dios tuʼn kukx kytene junx maske in che ok weʼye twitz nya bʼaʼn.
Aju jaku bʼant tuʼna
Japunx twi kyyole xi kytziyene tej kykubʼ mojeʼye. Qa ma tzaj kynaʼne jlu, jaku tzʼok tilil kyuʼne tuʼn t-xi kybʼinchaʼne tiʼj nya bʼaʼn ex nya tuʼn kyqʼojine kyxolxe.
Taqikʼ Tyol Dios nim toklen: «Aju ok tmojbʼaʼn Dios, miʼn tzʼel tpaʼn xjal» (Mateo 19:6).
Che ximane tnejel. Qo ximen tiʼj qa at jun kyeye taj tuʼn kyten kʼwal, atzun juntl nya taj. Qa ikju, che ximane kyiʼj tiʼchaq ik tzeʼn jlu:
Qa kʼonil tiʼj kymejebʼleʼne.
¿Mape bʼant kytene tuʼn kyok weʼye twitz junjun nya bʼaʼn in che tzaj aj kychʼiy kʼwal?
Aju kyoklene aj kyoke te mambʼaj.
Aj kyoke te mambʼaj, nya oʼkx at toklen jlu tukʼilju tuʼn t-xi kyqʼoʼne twa kykʼwale, t-xbʼalun ex tja.
Aju pwaq.
¿Jakupe bʼant tuʼn kyaqʼunane, tuʼn kyxqʼuqine kyiʼj toj kyjaye ex tuʼn tbʼant junjuntl tiʼchaq kyuʼne?
Taqikʼ Tyol Dios nim toklen: «Alkye jun kyxole, qa taj tuʼn tbʼant jun ja tuʼn, ¿mlaypelo kubʼ qeʼ ximal tiʼj nej nikʼpun knajel tuʼn, qa akux aju pwaq tuʼn tbʼant ja?» (Lucas 14:28).
Che ximane tiʼj tzeʼn jaku txi kybʼinchaʼne kyiʼj nya bʼaʼn. Bʼalo jaku txi kybʼinchaʼne kyiʼj junjun tiʼchaq junxitl kyximbʼetze tiʼj. Jun techel, qa in tzaj nya bʼaʼn kyxole tuʼnju in che ximane tiʼj qa che ul kykʼwale moqa miʼn, aju nya taj tuʼn kyul kʼwal, bʼaʼn tuʼn t-ximen kyiʼj xjel lu:
«Aj t-xi nqʼamaʼne qa nya waje tuʼn kyten qkʼwale, ¿ape t-xilen jlu qa mlayx che ten moqa oʼkx toj ambʼil jaʼlo?».
«¿Nya waje tuʼn kyten nkʼwale tuʼnju in kubʼ nximane qa mlay chin oke te jun tbʼanel mambʼaj?».
«¿In chin xobʼe tuʼnju in kubʼ nximane qa ya mlay chin ok kʼujlaʼne tuʼn wukʼile?».
Atzun teju taj tuʼn kyul kʼwal, jaku kubʼ t-xjelin jlu:
«¿Mape bʼant qtene tuʼn qoke te mambʼaj?».
«¿Okpe kkanel qpwaqe tuʼn tjaw chʼiyset jun qkʼwale?».
Taqikʼ Tyol Dios nim toklen: ‹Qa at tnabʼil xjal in tzaj tqʼoʼn Dios, [...] mejor tmod› (Santiago 3:17).
Bʼaʼn tuʼn tel tnikʼa tiʼj qa ateʼ junjun tbʼanel tiʼchaq tiʼj t-ximbʼetz tukʼila. Aj tok kyqʼoʼn kabʼe xjal kywitz tiʼj jun tbʼanel tilbʼilal, jaku tzʼok kyqʼoʼn kywitz kyiʼj junxichaq tiʼchaq. Chʼixmi axju in bʼaj aj kyximen mejebʼleʼn kyiʼj junjun tiʼchaq ik tzeʼn tiʼj pwaq. Aj kyyoline kyiʼj junjun tiʼchaq junxitl kyximbʼetze tiʼj, bʼaʼn tuʼn t-xi tzyet tuʼn kyyoline tiʼjju in mojeʼ kyximbʼetze tiʼj.
¿Alkyeqe tiʼchaq in mojeʼ kyximbʼetze tiʼj?
¿Alkye junjun tbʼanel at tiʼj t-ximbʼetz teyele junjun?
Tuʼn kytzalaje toj kymejebʼleʼne, ¿jakupe kubʼ tchʼexpuʼn jun kyeye t-ximbʼetz moqa kykabʼile?
Taqikʼ Tyol Dios nim toklen: «Mya noq oʼkx tuʼn kyximane tiʼj ju bʼaʼn te kyeye, ax ikx tuʼn kyximane tiʼj alkyeju bʼaʼn kye mastl» (1 Corintios 10:24).
a Bʼaʼn tuʼn kyyoline kyiʼj tiʼchaq nim kyoklen ik tzeʼn jlu naʼmxtoq kykubʼ mojeʼye. Pero at maj jaku bʼaj jun tiʼ mintiʼ ximen kyuʼne moqa jaku chʼexpaj t-ximbʼetz chmilbʼaj moqa xuʼjilbʼaj aj tbʼet ambʼil (Eclesiastés 9:11).