Kyoj qeju abʼqʼi tzma in che ikʼ, mas nim qʼa ex txin in kubʼ kybʼyoʼn kyibʼ kyoj junjun tnam. ¿Tiquʼn in bʼaj jlu? ¿Axpe jlu jaku bʼaj tiʼj tkʼwala moqa tala?

Toj xnaqʼtzbʼil lu, kʼelel qnikʼ tiʼj lu:

•  ¿Tiquʼn bʼaʼn tuʼn tel kynikʼ mambʼaj tiʼj qa in che ximen kʼwal tuʼn kykyim?

•  ¿Tiʼ jaku bʼant tuʼna tuʼn tel tnikʼa tiʼj tiʼ in bʼaj tiʼj tkʼwala moqa tala?

•  ¿Tiʼ jaku bʼant tuʼna qa tajbʼil tkʼwala moqa tala tuʼn tkyim?

 Kyiʼj 100 kʼwal in che xnaqʼtzan toj básico atz Estados Unidos, jax 40 kyajlal qeju tzaj yabʼil depresión tbʼi kyiʼj kyoj abʼqʼi 2009 a 2019. Pero ax ikx, toj ambʼil aju, jax kyajlal qeju kubʼ kybʼyon kyibʼ. a

 «Mas nim nya bʼaʼn in tzaj kyiʼj kuʼxun toj ambʼil jaʼlo. Ex mas nim yabʼil in tzaj tiʼj kyximbʼetz tuʼn» (chi Vivek H. Murthy, jun aj qʼanil te Estados Unidos).

 Texto nim toklen: «Qatzun in bʼisun [xjal], in bʼaj tipun t-ximlal tuʼn» (Proverbios 17:22).

 Bʼaʼn tuʼn t-ximana tiʼj lu:

•   Aqeju tiʼchaq o che ikʼ tiʼj. ¿Tiʼ o tzikʼ toj tanqʼibʼil tkʼwala moqa tala? Qa o tzikʼ jun kʼwal toj jun nya bʼaʼn ik tzeʼn qa in nel ikʼen, qa o kyaj kytzaqpiʼn kyibʼ tukʼil jun in yolin tukʼil, qa o kyim jun toj kyjaye ex moqa o tzaj juntl nya bʼaʼn tiʼj, at maj tuʼn jlu jaku kubʼ t-ximen tuʼn tel tiʼn tchwinqlal. b

•   Aju in bʼant tuʼn. ¿Ope tzʼel tpan tibʼ kʼwal kyiʼj tamiw, kyiʼj toj tja moqa ya mintiʼ in kubʼ tbʼinchaʼntl qeju tiʼchaq in che bʼant-toq tuʼn? ¿Ope chex toyin qe tiʼchaq nim kyoklen te?

•  Aqeju tyol. ¿Alkyeqe tyol kʼwal? ¿Atpe maj in tzaj tqʼamaʼn jlu: «Maswitlo bʼaʼn noqwit o chin kyime»? ¿In tzajpe tqʼamaʼn qa nya taj tuʼn tok te jun iqtz teya?

   Ax tok, at maj noqx gan in tzaj tqʼamaʼn jun kʼwal junjun tyol kyuw, moqa nya toj ttxolil (Job 6:3). Pero at maj, in tzaj tqʼamaʼn qe tyol tuʼnju taj onbʼil. Tuʼntzunju, bʼaʼn tuʼn tok tqʼoʼn twiʼya tiʼj tkyaqil tyol aj ttzaj tqʼamaʼn qa taj tuʼn tkyim.

 Qa ma tzaj tqʼamaʼn kʼwal qa o kubʼ t-ximen tuʼn tel tiʼn tchwinqlal, jaku txi tqanina jlu te: «¿O kubʼ t-ximana jtoj ex alkye tten kbʼantel tuʼna?». Tukʼilju tzul tqʼamaʼn, kʼelel tnikʼa tiʼj tiʼ onbʼil taj kʼwal ex alkye tten tuʼn t-xi qʼet te.

 «Atlo maj nya kyaj mambʼaj ex txubʼaj tuʼn t-xi kyqanin junjun tiʼchaq kye kʼwal tuʼnju in che xobʼ tiʼ tzul kyqʼamaʼn. Pero qa aju tzul kyqʼamaʼn atzun tkuʼx ju toj kyanmi, mas bʼaʼn tuʼn qbʼinte» (chi Sandra).

 Texto nim toklen: «Aju t-ximbʼetz jun xjal tuj ewaj in bʼant, ik tten ik tzaʼn jun aʼ maʼ t-xeʼ, ex aju xjal at tnabʼl jurat nneʼl tnikʼ tiʼj» (Proverbios 20:5).

•  Chebʼe qaninxa tiʼ in kubʼ tnaʼn ex tiʼ in kubʼ t-ximen. Tnejel qʼonxa chjonte te tkʼwala moqa te tala tuʼnju in tzaj tqʼamaʼn aju in kubʼ t-ximen ex aju in tnaʼn. Yajxitl, jaku txi tqʼamaʼna jlu te: «Waje tuʼn telxix nnikʼe tiʼj tiʼ in nikʼ tiʼja. ¿Tiʼ in bʼaj tiʼja?». Moqa jaku txi tqanina: «¿Qape at jun tiʼ in bʼaj toj tanqʼibʼila? ¿Ex tiʼxix in kubʼ tnaʼna tuʼn jlu?».

   Bʼaʼn tuʼn tkubʼ tbʼiʼna tyol kʼwal tukʼil pasens. Miʼn kubʼ naj t-ximana qa nya nim toklen aju in kubʼ t-ximen kʼwal ex miʼn txi naj tqʼamaʼna tiʼ il tiʼj tuʼn tbʼant tuʼn.

   Texto nim toklen: «Bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline, ex mya jurat naj tuʼn kyjaw kyaqpaje» (Santiago 1:19).

•  Ximana tiʼj tiʼ jaku bʼant tuʼna tuʼn miʼn tok tbʼinchaʼn kʼwal nya bʼaʼn tiʼjx. Bʼaʼn tuʼn tonina tiʼj kʼwal tuʼn tkubʼ ttzʼibʼin ex tuʼn tel tnikʼ tiʼj lu:

   Aju yekʼbʼil tiʼj qa in ximen tiʼj kyimen. ¿Tiʼ in bʼaj moqa alkyeqe ximbʼetz in che ul toj twiʼ kʼwal naʼmxtoq tkubʼ t-ximen tuʼn tkubʼ tbʼyon tibʼ?

   Aju jaku tzʼonin. ¿Alkyeqe junjun tiʼ jaku tzʼonin tiʼj tuʼn miʼn ttzaj bʼajxix tkʼuʼj ex tuʼn t-ximen tiʼj juntl tiʼ?

   Aqeju jaku che onin. Qape ate’ junjun xjal jaku che onin tiʼj kʼwal; ik tzeʼn aya, ik tzeʼn jun xjal qʼuqli tkʼuʼj tiʼj, ik tzeʼn jun qʼanil tiʼj kyximbʼetz xjal moqa ik tzeʼn jun spital aju in nonin kyiʼj qeju kyaj tuʼn kykyim.

   Texto nim toklen: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te» (Proverbios 21:5).

•   Kukx xqʼuqina tiʼj. Kukx bʼaʼn tuʼn t-xqʼuqina tiʼj kʼwal, axpe ikx qa parece que ya mas ma tzʼel bʼaʼn chʼintl.

   «Kubʼ nximane qa ya otoq tzikʼ nya bʼaʼn tej ttzaj tqʼamaʼn nkʼwale qa ya mintiʼtl in kubʼ t-ximen tuʼn tkyim. Pero nya bʼaʼn bʼant wuʼne tej tkubʼ nximane lu, tuʼnju noq minabʼen jaku tzul juntl maj nya bʼaʼn toj kywiʼ qe jlu ex tuʼn tkubʼ kyximen tuʼn tkubʼ kybʼyon kyibʼ» (chi Daniel).

   Bʼaʼn tuʼn tonina tiʼj qʼa moqa tiʼj txin tuʼn tel tnikʼ tiʼj qa aju in tnaʼn noq toj jun ambʼil ktel ex qa kbʼel naj. In tzaj tqʼamaʼn jun uʼj qa aju in kubʼ qnaʼn ik tten ik tzeʼn jbʼal ex qʼij. «Qa in kubʼ nim jbʼal, nyalo toj tumel qa ma qo kubʼ weʼ tjaqʼ ex tuʼn t-xi qqʼamaʼn qa mintiʼ in kubʼ jbʼal. Pero ax ikx, nyalo toj tumel qa ma txi qqʼamaʼn qa mlayx tzʼetz juntl maj qʼij», chi libro The Whole-Brain Child [Tkyaqil ex qe kʼwal list qeʼ].

•   Qʼuqbʼanxa tkʼuʼj: Qʼamanxa te tkʼwala moqa te tala qa kʼujlaʼn tuʼna ex qa kʼonila tiʼj. Ax ikx, jaku txi tqʼamaʼna jlu te: «Kʼokel tilil wuʼne tuʼn wonine tiʼja tuʼn texa twitz lu».

   Texto nim toklen: «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17).