Jun maj, ok tbʼiʼn t-xuʼjil jun xjal qa toj ewaj in nok tqʼoʼn xjal lu twitz tiʼj pornografía moqa tiʼj kyilbʼilal xjal mintiʼ kyxbʼalun tok. Xi tqanin xjal najsam te t-xuʼjil, xi tqʼamaʼn qa ya mlaytoq t-xi tbʼinchaʼntl ex atzun jlu bʼant tuʼn, pero noq toj chʼin ambʼil, tuʼnju aj tikʼ chʼin ambʼil, in kubʼ tzʼaq juntl maj, in xi tqanin najsam ex in xi tqʼamaʼn qa ya mlay txi tbʼinchaʼntl. Ex kukx in bʼant jlu tuʼn toj tkyaqil maj.

 ¿Axpe jlu in bʼaj tiʼja? Qa ikju, nimxix toklen tuʼn tel tnikʼa tiʼj tiʼ in kubʼ tnaʼn t-xuʼjila tuʼnju in nok tqʼoʼna twitza tiʼj nya bʼaʼn tilbʼilal moqa pornografía. Ax ikx, ilxix tiʼj tuʼn tel tnikʼa tiʼj tzeʼn jaku kyaj ttzaqpiʼna vicio lu ex te jumajx. a

Toj xnaqʼtzbʼil lu, kʼelel qnikʼ tiʼj jlu:

•  ¿Tiʼ bʼaʼn tuʼn tel tnikʼa tiʼj?

•  ¿Tiʼ jaku bʼant tuʼna?

•  Qa in nok tqʼoʼn twitz tchmila tiʼj pornografía

 Jaku tzaj nya bʼaʼn tiʼj jun mejebʼleʼn tuʼn pornografía moqa nya bʼaʼn kyilbʼilal xjal. Aju xuʼjilbʼaj moqa chmilbʼaj mintiʼ in nok tqʼoʼn twitz tiʼj, jaku kubʼ tnaʼn nya bʼaʼn aj tok tbʼiʼn qa in bʼant jlu tuʼn tchmil moqa tuʼn t-xuʼjil ex jaku ya mlay tzʼok qeʼtl tkʼuʼj tiʼj. b

 Qa in nok tqʼoʼn jun chmilbʼaj twitz tiʼj pornografía, ¿tiʼ jaku kubʼ tnaʼn t-xuʼjil?

•   Jaku kubʼ tnaʼn qa in kubʼ jyoʼn juntl twitz. At jun xuʼjilbʼaj Sarah tbʼi tqʼama jlu: «Kubʼ nnaʼne ik tzeʼn in kubʼ ten nchmile nimku maj tukʼil juntl».

•   Qa mintiʼx tajbʼen. Tqʼama jun xuʼjilbʼaj qa in kubʼ tnaʼn qa nya tbʼanel keʼyin ex qa mintiʼx tajbʼen tuʼnju in nok tqʼoʼn tchmil twitz tiʼj pornografía.

•   Qa mlay tzʼok qeʼ tkʼuʼj tiʼj tchmil. «Mintiʼx in nok qeʼ nkʼuʼje tiʼj tkyaqilju in bʼant tuʼn nchmile», chi Helen.

•   Qa in tzaj bʼaj tkʼuʼj. Tqʼama Catherine jlu: «In tzaj bʼajtoq nkʼuʼje tuʼnju oʼkxtoq tok nwiʼye tiʼjju in bʼant-toq tuʼn nchmile».

 Ximana tiʼj jlu: In tzaj tqʼamaʼn Biblia kye chmilbʼaj qa il tiʼj tuʼn tok kykʼujlaʼn kyxuʼjil (Efesios 5:25). Pero qa in kubʼ tnaʼn t-xuʼjila tkyaqilju ma tzaj qʼamaʼn, mintiʼlo in kubʼ tyekʼina tkʼujlabʼila tiʼj t-xuʼjila tukʼilju in bʼant tuʼna.

 Kwest tuʼn tkyaj ttzaqpiʼn jun xjal vicio tiʼj pornografía. Tzaj tqʼamaʼn jun xuʼjilbʼaj lu aju Stacey tbʼi: «Kyaj ttzaqpiʼn nchmile sichʼ, marihuana ex qʼeʼn. Pero kwest in nela toj twitz tuʼn tkyaj ttzaqpiʼn pornografía».

 Qa ax jlu in bʼaj tiʼja, aqeju consej in che tzaj qʼamaʼn kubʼni jaku che onin tiʼja tuʼn tkyaj ttzaqpiʼna vicio lu te jumajx.

•   Bʼaʼn tuʼn tel tnikʼa tiʼj tiquʼn nya bʼaʼn pornografía. Tuʼn ttzalaj jun xuʼjilbʼaj ex jun chmilbʼaj toj kymejebʼleʼn, il tiʼj tuʼn tten kʼujlabʼil kyxol ex il tiʼj tuʼn tok qeʼ tkʼuʼj jun tiʼj juntl. Pero tkyaqil jlu in naj tuʼnju aju xjal in nok tqʼoʼn twitz tiʼj pornografía, oʼkx in ximen tiʼjx ex tiʼjju tuʼn tkubʼ tbʼinchaʼn tajbʼil. Nya oʼkxju, ax ikx mintiʼ in nok tqʼoʼn xjal toklen Jehová aju kyaj qʼonte mejebʼleʼn.

   Texto nim toklen: «Nimanxwit ju mejebʼleʼn kyuʼn kykyaqil» (Hebreos 13:4).

•   Miʼn tzʼok tqʼoʼna te tpaj juntl. Miʼn tqʼamaya jlu: «Noqwit in kubʼ tyekʼin nxuʼjile tkʼujlabʼil wiʼje, mintiʼwtlo in nok nqʼoʼne nwitze tiʼj pornografía». Nya toj tumel qa ma tzʼok tqʼoʼna jlu te tpaj t-xuʼjila, ex qa ma bʼant jlu tuʼna, mas fácil kbʼel tzʼaqa toj vicio tkyaqil maj aj ttzaj jun tbʼisa tuʼn t-xuʼjila.

   Texto nim toklen: «Ex teyle junjun nnoʼk tuj joybʼil tiʼj, ax tnabʼl in xmoxin te tuʼn tpon tkʼuʼj tiʼj ju mya bʼaʼn, ax tnabʼl in sbʼunte te» (Santiago 1:14).

•   Miʼn kubʼ tewena ni jun tiʼ twitz t-xuʼjila. At jun chmilbʼaj aju Kevin tbʼi, tqʼama jlu: «Tkyaqil qʼij in xi nqʼamaʼne te nxuʼjile tzeʼn otoq tzʼex nqʼije. In xi nqʼamaʼne te tiʼ xbʼant wuʼne qa noq minabʼen sok nqʼoʼne nwitze tiʼj jun tiʼ nya bʼaʼn; qa ma tzʼok nqʼoʼnxix nwitze tiʼj moqa jun rat xi nkeʼyine juntl tiʼ. Aj tbʼant jlu wuʼne, in nonin tiʼj nxuʼjile tuʼn miʼn tkubʼ tnaʼn qa at jun tiʼ in kubʼ wewine twitz».

   Texto nim toklen: «Qajbʼile tuʼn qbʼinchanteye aju bʼaʼn tuj tkyaqil» (Hebreos 13:18).

•   Kukx xqʼuqink tibʼa. Maske ya o tzikʼ nim ambʼil ya mintiʼ in nok tqʼoʼntl twitza tiʼj pornografía moq nya bʼaʼn tilbʼilal, nimxix toklen tuʼn tok t-xqʼuqin tibʼa tuʼnju jaku kubʼ tzʼaqa juntl maj. Atzun jlu tqʼama Kevin aju ma tzaj tqʼamaʼn junjun tyol. Chi: «Kubʼ nximane qa ya otoq kubʼ tiʼj lu wuʼne tuʼnju ya otoq tzikʼ 10 abʼqʼi ya mintiʼ in nok nqʼoʼne nwitze tiʼj pornografía, pero nya iktoq ttenju, kukx attoq nya bʼaʼn lu ex iktoq tten ik tzeʼn jun txkup in ayon tiʼj jun ambʼil tuʼn tok lipen wiʼje».

   Texto nim toklen: «Qa at jun waʼlxix taʼ tuj tnabʼl, kwentim tibʼ tuʼn miʼn tkubʼ tzʼaq» (1 Corintios 10:12).

•   Miʼn kubʼ naj tbʼinchaʼna nya bʼaʼn ximbʼetz. Atlo maj, che ul nya bʼaʼn ximbʼetz toj twiʼya, pero a teya kqʼmalte qa kxel tbʼinchaʼna moqa miʼn. Nya kukx ktel nya bʼaʼn ximbʼetz ex mas jun rat jaku kubʼ naj qa ma tzʼok tilil tuʼna tuʼn tetz tiʼna toj twiʼya ex qa ma tzʼok tqʼoʼn twiʼya tiʼj juntl tiʼ.

   Texto nim toklen: «Teyle junjun kyeye tuʼn tten tex t-xuʼjil, atwit toklen t-xuʼjil tuj twitz ex miʼn pon tkʼuʼj tiʼj juntl, ex mya tuʼn t-xi kytzoqpin kyibʼe teju kyajbʼile mya bʼaʼn ik tzaʼn in kybʼinchaʼn txqantl xjal mintiʼ ojtzqiʼn Dios kyuʼn» (1 Tesalonicenses 4:4, 5).

•   Tzʼok tilil tuʼna tuʼn miʼn t-xiʼya jatumel jaku kubʼ tzʼaqa juntl maj toj il. Tqʼama jun libro lu: «Aj t-xiʼya jatumel at il, ik tten ik tzeʼn aj tok ttxqoʼna jun fosforo. Ex qa at jun tiʼ jun rat in jaw kʼant, lwey kxeʼl qʼaqʼ tiʼj tkyaqil» (Querer no es poder [Nya t-xilen qa qaj, kbʼantel], aju kubʼ traducirin Gloria Vitale).

   Texto nim toklen: «Miʼn [...] tuʼn tkubʼ wiʼje tuʼnju mya bʼaʼn» (Salmo 119:133).

•   Bʼaʼn tuʼn tten tpasensa. Bʼaʼn tuʼn tten tpasensa tuʼnju jaku txi tiʼn nim ambʼil tuʼn tok qeʼ juntl maj tkʼuʼj t-xuʼjila tiʼja, pero jaku bʼant. Ex o bʼant jlu kyuʼn nimku mejebʼleʼn.

   Texto nim toklen: «Aju xjal at tkʼujlalil at tpasens» (1 Corintios 13:4).