ONBʼIL KYE JA XJAL
¿Tzeʼn jaku qo yolin tiʼj qʼeʼn moqa traw kyukʼil kʼwaʼl?
«Tej qʼiʼntoq qaq abʼqʼi tuʼn qmeʼjele, o yoline tnejel maj tiʼj qʼeʼn tukʼil. O jaw labʼine tiʼj tej tel qnikʼe tiʼj qa mas ojtzqiʼntoq junjun tiʼchaq tuʼn twitzju kubʼ qximane» (Alexander).
Aju bʼaʼn tuʼn tel tnikʼa tiʼj
Nim toklen tuʼn kyyoline tiʼj qʼeʼn kyukʼil kykʼwaʼle. Miʼn kubʼ kyximane tuʼn kyyoline tiʼj jlu kyukʼil tzmaxi aj kychʼiy. Tqʼama jun mambʼaj te Rusia jlu, aju Jamit tbʼi: «Maswitlo bʼaʼn noqwit o yoline tiʼj qʼeʼn tukʼil qkʼwaʼle te tzmatoq tal chʼin». Ex tqʼamatl, «tejxi ttzaj nya bʼaʼn, el nnikʼe tiʼj qa nim toklen tuʼn qyolin tiʼj jlu. El nnikʼe tiʼj qa ya in kʼantoq nkʼwaʼle qʼeʼn tej tjapun twiʼ 13 abʼqʼi».
¿Tiquʼn bʼaʼn tuʼn kyximane tiʼj jlu?
Junxitl kyximbʼetz kykʼwaʼle jaku ten tiʼj qʼeʼn kyuʼn qe kyukʼil toj tja xnaqʼtzbʼil, kyuʼn tqanil ex tuʼnju in netz toj televisión.
In tzaj kyqʼamaʼn Centros para el Control y la Prevención de Enfermedades te Estados Unidos qa tiʼj tkyaqil qʼeʼn in xi kykʼaʼn xjal toj tnam, in najbʼen 11% kyuʼn kʼwaʼl te 12 ex 20 abʼqʼi.
Tuʼntzunju, mintiʼ in qo jaw labʼin tiʼj aj ttzaj kyqʼamaʼn xjal at kyoklen tuʼn kyxqʼuqin kyiʼj yabʼil qa nim toklen tuʼn t-xi kyqʼamaʼn tatbʼaj kye tal kykʼwaʼl tiʼ nya bʼaʼn in tzaj tuʼn qʼeʼn. ¿Tzeʼn jaku bʼant kyuʼn tatbʼaj?
Aju jaku bʼant tuʼna
Kybʼinchame kytene kyiʼj kyxjel kykʼwaʼle. In tzaj kyqanin tal kʼwaʼl nim kyxjel ex mas in tzaj kyqanin xjel akux in che chʼiy. Tuʼntzunju, nim toklen tuʼn tbʼaj kybʼinchaʼne kytene tuʼntzun t-xi kyqʼoʼne tzaqʼwebʼil tiʼj kyxjel. Jun techel:
Qa taj kykʼwaʼle tuʼn tel tnikʼ tiʼj qa chiʼ qʼeʼn, jaku txi kyqʼamaʼne te qa ik tten vino ik tzeʼn jun jugo txʼam, atzunte cerveza puro kʼa.
Qatzun taj kykʼwaʼle tuʼn t-xi tnikʼbʼen chʼin qʼeʼn, jaku txi kyqʼamaʼne te qa jaku tzaj nya bʼaʼn tiʼj t-xmilal tuʼn qʼeʼn tuʼnju tzma kʼwaʼlx. Kyqʼamanxe te tiʼ in tzaj tuʼn: Jaku tzʼel chʼin siktlen qiʼj tuʼn qʼeʼn, pero qa ma txi qkʼaʼn nimx, jaku tzaj sutin toj qwitz tuʼn, jaku kubʼ qbʼinchaʼn nya bʼaʼn ex yajxitl jaku tzaj qbʼis (Proverbios 23:29-35).
Bʼaʼn tuʼn tok kybʼiʼne tqanil. In tzaj tqʼamaʼn Tyol Dios jlu: «Alkyete ati tnabʼl nximan bʼaʼnxiʼx» (Proverbios 13:16, XT). Kyojtzqiʼnke tiʼ nya bʼaʼn jaku tzaj kyiʼj kykʼwaʼle tuʼn qʼeʼn, kyojtzqinke qe ley tiʼj jlu ex toj alkye ambʼil jaku txi qkʼaʼn chʼin qʼeʼn. Tuʼn jlu kbʼajel kybʼinchaʼne kytene tuʼn kyonine kyiʼj kykʼwaʼle.
Kyximinkuye tuʼn kyyoline tiʼj jlu. In tzaj tqʼamaʼn jun tatbʼaj te Gran Bretaña jlu, aju Mark tbʼi: «Mlaylo tzʼelxix kynikʼ qkʼwaʼl tiʼj aj qyolin tiʼj qʼeʼn kyukʼil». Ax ikx tqʼamatl: «Xi nqanine te nkʼwaʼle te 8 abʼqʼi qa bʼaʼn moqa nya bʼaʼn tuʼn qkʼaʼn qʼeʼn. Jaw njyone jun tbʼanel ambʼil tuʼn nyoline tukʼil ex in xi yoline te ik tzeʼn che yolin kuʼxun, onin jlu tiʼj tuʼn ttzaj tqʼamaʼn t-ximbʼetz at tiʼj qʼeʼn».
Qa ma che yoline nim maj tiʼj jlu kyukʼil kykʼwaʼle, mas kʼelel kynikʼ tiʼj. Che ximane tiʼj kyabʼqʼi ex che yoline tiʼj qʼeʼn kyukʼil junx kyukʼil junjuntl xnaqʼtzbʼil nim kyoklen ik tzeʼn tuʼn tok kyxqʼuqin kyibʼ aj kybʼet toj kar moqa tiʼjju aj tkubʼ ten jun xinaq tukʼil jun xuʼj.
Kyqʼonkuye jun tbʼanel techel kywitz kykʼwaʼle. In che ok kʼwaʼl ik tzeʼn jun esponja; in nel kykanoʼn tiʼj tkyaqilju in nok kykeʼyin. In tzaj kyyekʼin junjun xnaqʼtzbʼil qa mas in nel kykanoʼn kʼwalbʼaj kyiʼj kytat. Tuʼntzunju, qa tnejel in cheʼxe jyol qʼeʼn tuʼn miʼn ttzaj bʼaj kykʼuʼje aj kyok weʼye twitz jun nya bʼaʼn, ax jlu kbʼantel kyuʼn kykʼwaʼle aj kyok weʼ twitz nya bʼaʼn. Tuʼntzunju, kyqʼonke jun tbʼanel techel kywitz ex tenx kynabʼile aj t-xi kykʼaʼne chʼin qʼeʼn.
Aqeye che bʼel qʼonte techel kywitz kykʼwaʼle tuʼntzun tel kynikʼ tiʼj jniʼ qʼeʼn jaku txi qkʼaʼn.