Qa at jun chmilbʼaj moqa jun xuʼjilbʼaj mintiʼ in nok qeʼ tkʼuʼj tiʼj tukʼil ex in kubʼ tnaʼn celos moqa xkyqʼaqbʼil tiʼj tukʼil, kwest tuʼn tten tzalajbʼil toj kymejebʼleʼn. Tuʼntzunju, qa mintiʼ jun tiquʼn tuʼn tkubʼ qnaʼn celos moqa xkyʼaqbʼil tiʼj qukʼil, ¿tiʼ jaku bʼant?.

Toj xnaqʼtzbʼil lu, kʼelel qnikʼ tiʼj jlu:

•  ¿Tiʼ t-xilen yol celos moqa xkyʼaqbʼil?

•  ¿Tiquʼn in kubʼ kynaʼn junjun chmilbʼaj moqa xuʼjilbʼaj celos?

•  ¿Tiʼ jaku bʼant tuʼn miʼn tkubʼ tnaʼna celos?

•  ¿Tiʼ jaku bʼant tuʼna qa in kubʼ tnaʼn tukʼila celos tiʼja?

•  Junjun consej tuʼn tkubʼ kyxnaqʼtzaʼne junx

 ¿Tiʼ t-xilen yol celos moqa xkyʼaqbʼil?

 Nim t-xilen yol celos moqa xkyʼaqbʼil. Pero toj xnaqʼtzbʼil lu, kyyolin tiʼjju in kubʼ tnaʼn jun chmilbʼaj moqa jun xuʼjilbʼaj aj tkubʼ t-ximen qa tajbʼil juntl xjal te tukʼil moqa a tukʼil tajbʼil te juntl xjal. Pero qa ax tok in bʼaj jlu, toj tumel aju in kubʼ tnaʼn chmilbʼaj moqa xuʼjilbʼaj tiʼj tukʼil tuʼnju o che ok te junx ex il tiʼj tuʼn tok t-xqʼuqin tmejebʼleʼn.

 Texto nim toklen: «Mya kabʼe kyten, noq junx kyten; kyjaʼtzun, aju ok tmojbʼaʼn Dios, miʼn tzʼel tpaʼn xjal» (Mateo 19:6).

 «Qa in kubʼ tnaʼna qa chʼix ttzaj jun nya bʼaʼn tiʼj tmejebʼleʼna, in che ok celos ik tzeʼn aj ttzaj qʼamaʼn qa chʼix tul qʼaqʼ tiʼja ex il tiʼj tuʼn tbʼant jun tiʼ tuʼna» (chi Benjamin).

 Noqtzun tuʼnj, ateʼ junjun chmilbʼaj moqa junjun xuʼjilbʼaj in kubʼ kynaʼn celos tiʼj kyukʼil tuʼnju noq toj kywiʼ in netz ex in kubʼ kyximen qa at juntl tukʼil kyukʼil, pero nya ax tok ex nya toj tumel. Atzun qe, qa ax tok kʼujlaʼn qukʼil quʼn, kʼokel tilil quʼn tuʼn miʼn tkubʼ qnaʼn celos tiʼj qukʼil qa mintiʼ jun tiquʼn tuʼn tkubʼ qnaʼn (1 Corintios 13:4, 7). Qatzun miʼn, kbʼajel qiʼj ik tzeʼn kubʼ ttzʼibʼin Dr. Robert L. Leahy tej tqʼama: «Qa mintiʼx jun tiquʼn in kubʼ tnaʼna celos, jaku tzaj tiʼna nya bʼaʼn tiʼjju taja tuʼn tok t-xqʼuqina». a

 ¿Tiquʼn in kubʼ kynaʼn junjun chmilbʼaj moqa xuʼjilbʼaj celos?

 Ateʼ junjun chmilbʼaj moqa xuʼjilbʼaj in kubʼ kynaʼn celos tuʼnju e kubʼ engañarin tuʼn tnejel kyukʼil moqa tuʼnju ik bʼajju toj tmejebʼleʼn kytata moqa kynana ex in kubʼ kyximen qa ax jlu kbʼajel toj kymejebʼleʼn.

 «Tej tal txin qine, kubʼ engañarin ntxuʼye tuʼn nmane, tuʼntzunju, kwest in nela toj nwitze tuʼn tok qeʼ nkʼuʼje kyiʼj txqantl. Ex nya oʼkx kyiʼj txqantl, sino ax ikx at maj tiʼj nchmile» (chi Melissa).

 Ax ikx, bʼaʼn tuʼn t-ximana tiʼj jlu: qa chʼixmi toj tkyaqil maj mintiʼ in nok qeʼxix tkʼuʼja kyiʼj txqantl, mas jun rat jaku kubʼ t-ximana qa kyajbʼil txqantl tuʼn tkubʼ kyxiten tmejebʼleʼna ex qa jun rat jaku kyaj tzaqpiʼna tuʼn tukʼila tuʼn t-xiʼ tukʼil juntl.

 «Tzaj qʼamaʼn te nchmile tuʼn jun tamiw tuʼn tonin tiʼj ajtoq tkubʼ mojeʼ, pero atoq t-xilen jlu qa iltoq tiʼj tuʼn tbʼixin nchmile tukʼil juntl xuʼj. Nya bʼaʼn ela lu toj nwitze ex xi nmaʼne te nchmile tuʼn t-xi tqʼamaʼn qa mlay bʼant» (chi Naomi).

 Junxichaq tten in bʼant kyuʼn xjal aj tcasarin jun xjal kyoj junjuntl lugar, pero in nok tilil kyuʼn okslal tuʼn t-xi kybʼiʼn qe consej in tzaj tqʼamaʼn Biblia. Yajtzun te Naomi, ¿toj tumelpe aju bʼant tuʼn? Aj ttzaj tnaʼn Naomi ambʼil ikʼ, in nel tnikʼ tiʼj qa mintiʼtoq jun tiquʼn tuʼn tkubʼ tnaʼn celos. In tzaj tqʼamaʼn lu: «In tzaj xobʼe toj ambʼil aju», ex «kubʼ nximane qa maslo tbʼanel che elil txqantl xuʼj toj twitz nchmile nwitze. Pero tkyaqil jlu oʼkxtoq in netz toj nwiʼye».

 Ax ikx teya, qa in kubʼ tnaʼna celos tiʼj tukʼila tuʼnju alkye tten xjaw chʼiya moqa tuʼnju kubʼ engañarina ojtxe, mas jun rat jaku kubʼ t-ximana qa taj tchmila moqa t-xuʼjila te juntl, axpe ikx qa ya in kubʼ tentl tukʼil juntl. Qa a jlu in bʼaj tiʼja, jaku tzaj tiʼna nya bʼaʼn tiʼj tmejebʼleʼna, ex axpe ikx jaku tzaj yabʼil tiʼja tuʼn.

 Texto nim toklen: «Atzunju xjal kye loʼch tkʼuʼj [moqa in kubʼ tnaʼn celos], in che bʼaj qʼay qe tbʼaqil» (Proverbios 14:30).

 ¿Tiʼ jaku bʼant tuʼn miʼn tkubʼ tnaʼna celos?

 Qʼonka tilil tuʼn tok qeʼ tkʼuʼja tiʼj tukʼila. Miʼn kubʼ t-ximen naja qa tajbʼil tukʼila tuʼn tkubʼ tjyoʼn juntl, sino mas bʼaʼn tuʼn t-xi t-ximana qa in bʼantlo junjun tiʼchaq tuʼn tuʼnju ateʼ tbʼanel tmod.

 «Aj nximane kyiʼj tbʼanel tmod nchmile, in nonin wiʼje tuʼn tqeʼ nkʼuʼje. Qa in bʼaj tkʼuʼj nchmile tiʼj juntl, nya t-xilen qa in ximen tuʼn tkubʼ tbʼinchaʼn nya bʼaʼn tukʼil, sino tuʼnju tajbʼil tuʼn tonin tiʼj. In nok tilil wuʼne tuʼn ttzaj nnaʼne qa nya tuʼnju kubʼ tjyoʼn nmaʼne juntl t-xuʼjil, ax ikx te nchmile kbʼel tjyoʼn juntl t-xuʼjil» (chi Melissa).

 Miʼn t-xi tnimana qa ax tok aju in kubʼ t-ximana. Aju Dr. Leahy tbʼi ma qo yolin tiʼj, kubʼ ttzʼibʼentl jlu: «At maj in kubʼ qximen qa at jun tiʼ in nul toj qwiʼ ax tok in bʼaj lu. Pero nya tkyaqil maj ax tok qe qximbʼetz. Ex nya tkyaqilju in qnaʼn ax tok in bʼaj». b

 «Noqx gan jaku tzaj qiʼn jun nya bʼaʼn tiʼj qmejebʼleʼn qa ma qo ok ten ximel tiʼj qa at junjun tiʼchaq in bʼaj ex nya ax tok» (Nadine).

 Che yoline tiʼjju in kynaʼne. Noq tiʼxku tiquʼn jaku kubʼ tnaʼna celos tiʼj tukʼila, qa in kubʼ tnaʼna, bʼaʼn tuʼn kyyoline tiʼj. A jlu ok kʼonil kyiʼje tuʼn tel kynikʼe tiʼj alkye bʼaʼn tuʼn tbʼant kyuʼne ex alkye mintiʼ tuʼn tbʼant.

 «Aj t-xi qqʼamaʼn te qukʼil aju in qnaʼn, tbʼanel tuʼn tok tilil quʼn tuʼn tbʼant toj tumel ex tuʼn tkubʼ qximen qa nyalo taj tuʼn qok kʼixbʼisaʼn tuʼn ex qa axlo ikx te in nok tilil tuʼn tuʼn tkyaj nya bʼaʼn toj ttxolil. Ikju, tbʼanel tuʼn tkubʼ qximen qa in che bʼantlo junjun tiʼchaq tuʼn tuʼnju ateʼ tbʼanel tmod. Ex ax tok, at maj aqoʼ jun rat in kubʼ qximen jun nya bʼaʼn tiʼj qukʼil moqa qaj tuʼn tok kyqʼoʼn kywiʼ qiʼj ex tuʼn tel kypaʼn mas ambʼil qe, pero at maj, mintiʼ bʼiʼn jlu kyuʼn» (chi Ciara).

 Texto nim toklen: «Mya noq oʼkx tuʼn kyximane tiʼj ju bʼaʼn te kyeye, ax ikx tuʼn kyximane tiʼj alkyeju bʼaʼn kye txqantl» (1 Corintios 10:24).