Alkye mas kygan kykʼwale, ¿ape tuʼn kyuʼjin twitz pantalla moqa twitz uʼj?

 Ateʼ nim kʼwal ex kuʼxun kygan tuʼn kyuʼjin twitz pantalla. In tzaj tqʼamaʼn Jean Twenge jlu, jun xjal at tojtzqibʼil tiʼj Psicología: «Kwest jaku tzʼela kye xjal tuʼn kyuʼjin tiʼj jun libro tuʼnju naqʼli qe tuʼn t-xi kyqʼoʼn clic kyibʼaj enlace moqa tuʼn kyxiʼ naj toj juntl página». a

 Ax ikx, tbʼanel qa ma qo uʼjin twitz pantalla. In tzaj tqʼamaʼn jun kuʼxun John tbʼi te 20 abʼqʼi jlu: «Toj escuela jatumel in xnaqʼtzane, e ajbʼen libro digital quʼne. Tuʼntzunju, mas jun rat kanet jun tqanil at tajbʼen weye tej t-xi njyoʼne toj buscador».

 Aj kyuʼjin xjal toj jun dispositivo electrónico, jaku kanet mas onbʼil kyuʼn. Jun techel, qa ma txi tqʼoʼna clic twitz pantalla, jaku tzaj yekʼin tiʼ t-xilen jun yol, jaku tzʼok tbʼiʼna jun audio, jaku tzʼok tkeʼyina jun video tiʼj xnaqʼtzbʼil in jyona tiʼj moqa jaku kanet mas tqanil tuʼna toj jun enlace. ¿Ape t-xilen jlu qa mas tbʼanel qa ma qo uʼjin twitz pantalla ik tzeʼn twitz uʼj?

 Noqtzun tuʼnj, ateʼ junjun xjal mas kygan tuʼn kyuʼjin twitz uʼj aj kyxnaqʼtzan tiʼj jun xnaqʼtzbʼil nim toklen. ¿Tiquʼn? Qo xnaqʼtzaʼn tiʼj.

•   In nonin tuʼn tok qqʼoʼn qwiʼ tiʼjju in jaw quʼjin. In tzaj tqʼamaʼn jun kuʼxun Nathan tbʼi jlu: «Aj wuʼjine twitz jun pantalla, mintiʼ in nonin wiʼje tuʼn tok nqʼoʼn nwiʼye tiʼjju in jaw wuʼjine tuʼnju in che etz junjun anuncio ex tqanil toj».

   Ax jlu in bʼaj tiʼj Karen te 20 abʼqʼi. In tzaj tqʼamaʼn jlu: «Aj wuʼjine toj jun teléfono moqa toj jun tablet, kwest tuʼn tok nqʼoʼn nwiʼye tiʼjju in jaw wuʼjine. At maj in chin okxe toj jun aplicación mintiʼ toklen tukʼilju in chin uʼjine tiʼj moqa waje tuʼn wokxe toj jun juego».

   Texto nim toklen: «Tzʼajbʼenxwit tkyaqil qʼij kyuʼne tuʼn kybʼinchanteye ju bʼaʼn» (Colosenses 4:5).

   Ximana tiʼj jlu: Aj tuʼjin tkʼwala moqa aj t-xnaqʼtzan twitz jun pantalla, ¿in nokpe tqʼoʼn twiʼ tiʼjju in jaw tuʼjin moqa mintiʼ? Qa kwest tuʼn tbʼant jlu tuʼn, ¿tzeʼn jaku tzʼonina tiʼj?

   Nabʼil: Onina tiʼj tkʼwala tuʼn tel tnikʼ tiʼj qa kxel tiʼn mas ambʼil tuʼn tbʼant jun tdeber qa mas ma tzʼok tqʼoʼn twitz tiʼj jun dispositivo electrónico. Ex qa ma bʼant jlu tuʼn, mlay ten ambʼil tiʼj tuʼn t-xi tbʼinchaʼn qe tiʼchaq mas tgan tuʼn tbʼant tuʼn.

•   In nonin tuʼn tel qnikʼ tiʼjju in jaw quʼjin. Toj libro kubʼ ttzʼibʼin Naomi Shaefer Riley, aju tok tbʼi Be the Parent, Please (Sea el padre, por favor), in tzaj tqʼamaʼn jlu: «In tzaj kyyekʼin nim xnaqʼtzbʼil qa mas in nel kynikʼ qeju in che uʼjin tiʼj jun xnaqʼtzbʼil qa ma jaw kyuʼjin twitz uʼj ex nya twitz jun pantalla».

   Jaku bʼaj jlu tuʼnju aj quʼjin twitz pantalla, oʼkx in jaw quʼjin tqanil ex mintiʼ in qo ximen tiʼj. In tzaj tqʼamaʼn escritor Nicholas Carr qa aj tajbʼen internet quʼn, qaj «tuʼn tjaw quʼjin tkyaqilju in nok qkeʼyin ex in nikʼ qqʼabʼ tiʼj [toj pantalla]». b

   Jakulo tzʼonin qiʼj aj quʼjin jun rat, pero in tzaj qʼamaʼn Nicholas Carr qa nya bʼaʼn jlu tuʼnju «in qo naqʼet tuʼn tbʼant jlu quʼn aj quʼjin». Tuʼntzunju, jaku naqʼet tkʼwala tuʼn tjaw tuʼjin jun tqanil ex mintiʼ in nel tnikʼ tiʼjju in jaw tuʼjin.

   Texto nim toklen: «Jyoma aju nabʼl ex aju ojtzqibʼl» (Proverbios 4:7).

   Ximana tiʼj jlu: Qa in uʼjin tkʼwala twitz uʼj moqa twitz pantalla, ¿tiʼ jaku bʼant tuʼna tuʼn tonina tiʼj tuʼn tjyon mas tqanil tiʼj jun xnaqʼtzbʼil?

   Nabʼil: Tenx tnabʼila. Nya oʼkx jaku uʼjina toj uʼj sino ax ikx jaku uʼjina twitz pantalla, tuʼnju kykabʼil jaku che onin tiʼja. Ex qa ma tzʼajbʼen jun aparato electrónico tuʼna, jaku tzʼonin tiʼja tuʼn tel mas tnikʼa tiʼjju in jaw tuʼjina ex jaku kanet mas tqanil tuʼna. Tuʼntzunju, tenx tbʼanel tmoda aj tyolina kyukʼil tkʼwala tiʼjju jaku tzaj kyiʼj aj kyuʼjin twitz uʼj moqa twitz pantalla. Ax ikx, bʼaʼn tuʼn ttzaj tnaʼna qa junxitl teyele junjun kʼwal.

•   In nonin tuʼn miʼn tikʼ tnaʼl quʼn aju in jaw quʼjin. Toj jun xnaqʼtzbʼil etz toj revista Scientific American, ok tmojbʼaʼn Ferris Jabr aj quʼjin twitz uʼj tukʼilju tuʼn quʼjin twitz pantalla. Ex tqʼama qa aj quʼjin toj pantalla, «jun rat in sikt qximbʼetz [...] ex mas kwest tuʼn ttzaj qnaʼn aju in jaw quʼjin».

   Jun techel, in nonin qiʼj qa ma qo uʼjin twitz uʼj tuʼnju in tzaj qnaʼn jun tilbʼilal tiʼj página jatumel tkuʼx aju otoq jaw quʼjin. Jaku tzʼok qmojbʼaʼn jlu ik tzeʼn aj tkyaj qqʼoʼn jun techel toj jun libro tuʼntzun tkanet juntl maj quʼn.

   O tzʼel kynikʼ junjun investigador tiʼj qa mas in tzaj kynaʼn xjal tqanil aj kyuʼjin twitz uʼj. Ex mas in tzaj kynaʼn tuʼnju mas fácil tuʼn tel tnikʼ qcerebro tiʼj tqanil in jaw quʼjin.

   Texto nim toklen: «Miʼn kyaj tkolina aju tnabʼla bʼaʼn» (Proverbios 3:21).

   Ximana tiʼj jlu: ¿Kwestpe in nela te tkʼwala tuʼn ttzaj tnaʼn ex tuʼn tel tnikʼ tiʼjju in jaw tuʼjin moqa in xnaqʼtzan tiʼj? ¿Tiʼ jaku tzʼonin tiʼj tkʼwala tuʼn tnaqʼet tuʼn t-xnaqʼtzan? ¿In kubʼpe t-ximana qa jaku tzʼonin tiʼj qa ma uʼjin twitz uʼj?

   Nabʼil: Tbʼanel qa ma ximana tiʼj tiʼ jaku tzʼonin tiʼj tkʼwala aj t-xnaqʼtzan ex nya tiʼjju taj tkʼwala tuʼn tbʼant tuʼn. Pero bʼaʼn tuʼn ttzaj tnaʼna qa ateʼ junjun xjal in kubʼ kyximen qa mlay bʼant kyuʼjin twitz jun pantalla.