ONBʼIL KYE JA XJAL | TUʼN KYJAW CHʼIY KʼWAL
¿Tzeʼn jaku tzʼonina tiʼj tkʼwala tuʼn kukx tbʼant taqʼun ex tuʼn miʼn tsikt?
«¡Mlayx bʼant wuʼne!», chi tkʼwala. «¡Kwest tuʼn tbʼant. Miʼn bʼant wuʼne!» Chi kʼwal in tzaj tqʼamaʼn. Jun rat taj tuʼn tkyaj ttzaqpiʼn aju taqʼun tuʼnju kwest in nela te. Nya tgana tuʼn ttzaj tbʼis tkʼwala aj tbʼant jun aqʼuntl tuʼn, noqtzun tuʼnj taja tuʼn tbʼant-xix taqʼunan maske in nok weʼ twitz nya bʼaʼn. ¿Bʼaʼnpetzulo tuʼn tonina naj tiʼj? ¿Tojpe tumel qa ma kyaj ttzaqpiʼn tkʼwala taqʼun? Moqa ¿Kxel tonina tkʼwala tuʼn kukx tbʼant taqʼun ex tuʼn miʼn tsikt?
Aju tuʼn tok tojtzqiʼna
Il tiʼj tuʼn kukx kyaqʼunan kʼwal ex tuʼn miʼn kysikt. Aj kyxi kyxnaqʼtzaʼn mambʼaj kye kykʼwal tuʼntzun tbʼant-xix kyaqʼunan, in che onin kyiʼj tuʼn tel bʼaʼn toj tja xnaqʼtzbʼil, tuʼn miʼn ttzajxix yabʼil kyiʼj, tuʼn tkubʼ kynaʼn bʼaʼn ex tuʼn kyten tbʼanel kyamiw. Pero aj kykolin mambʼaj kyiʼj kykʼwal tkyaqil maj tuʼn miʼn kyel txalpaj, ktzajel bʼaj kykʼuʼj, kbʼel kynaʼn qa mintiʼ kyoklen ex mlaylo che tzalaj aj kychʼiy.
Jaku chʼiy kyajbʼil kʼwal tuʼn kukx kyaqʼunan ex tuʼn miʼn kysikt. Axpe ikx qe tal kʼwal jaku tzʼok tilil kyuʼn tuʼn kyex twitz nya bʼaʼn ex tuʼn t-xi kybʼinchaʼn kyiʼj problem. In tzaj kyqʼamaʼn junjun xjal at kynabʼil qa mas jaku tzʼok tilil tuʼn jun neʼ te 15 xjaw qa ma tzʼok tkeʼyin tzeʼn in nok tilil tuʼn tman tuʼn tex twitz jun nya bʼaʼn.
«Naʼn wuʼne tej t-xi nxnaqʼtzaʼne kye wale tuʼn tok xmet taqʼil kyxajabʼ. Nya jun aqʼuntl jlu tuʼn t-xi xnaqʼtzet noq toj jun maj sino toj nimku maj. Tej kyok ten wale xmol taqʼil kyxajabʼ in xitoq tiʼn 10 minut moqa 15 tuʼn ttzaj kynaʼn tzeʼn tuʼn tbʼant kyuʼn. Ex in ok tene onil kye. Xi tiʼn junjun xjaw ex at maj in che oqʼ tuʼn tbʼant kyuʼn ex e tzalaj tej tbʼant kyuʼn. Jakutoq tzaj nlaqʼoʼne kyxajabʼ mintiʼ taqʼil tuʼntzun nya kwest te weye, noqtzun tuʼnj ilxix tiʼj tuʼn tok tilil quʼn, aqoʼ mambʼaj ex txubʼaj, tuʼn tok tilil kyuʼn qal». Chi Colleen.
Jaku bʼaj kygan kʼwal tuʼn kyaqʼunan. Atku maj nya kyajtl kʼwal tuʼn kyaqʼunan tuʼn kypaj kyman. ¿Tzeʼn in bʼaj jlu? Ateʼ junjun mambʼaj kyaj tuʼn «kykolin» kyiʼj kykʼwal tuʼn miʼn ttzaj kybʼis aj tbʼant jun tiʼ kwest kyuʼn. Pero mas nya bʼaʼn jaku tzaj qa ma bʼant jlu tuʼna. Chi Jessica Lahey toj jun uʼj kubʼ ttzʼibʼin: «qa ma qo kolin kyiʼj qal kykyaqil maj tiʼj jun kyaqʼun, in xi qyekʼin kye qa mintiʼ in nok qeʼ qkʼuʼj kyiʼj ex qa in kubʼ qximen qa mlay bʼant jun tiʼ kyuʼn». a ¿Tiʼ in bʼaj kyiʼj kʼwal tuʼn jlu? In kubʼ kyximen kʼwal qa mlayx bʼant jun tiʼ kyuʼn ex jaku kyaj kytzaqpiʼn naj jun kyaqʼun. Ax ikx aj kychʼiy kbʼel kyximen qa il tiʼj tuʼn tonin jun matij xjal kyiʼj tkyaqil maj.
Mas bʼaʼn tuʼn tonina tiʼj tkʼwala tuʼn kukx tok tilil tuʼn ex nya tuʼn tkolina tiʼj aj t-xi tbʼinchaʼn jun tiʼ kwest
Aju jaku bʼant tuʼna
Il tiʼj tuʼn t-xi kyxnaqʼtzan mambʼaj kykʼwal tuʼn kyaqʼunan. Jaku txi kyqʼoʼn mambʼaj junjun aqʼuntl kye kykʼwal ik tzeʼn kyabʼqʼi. Jun techel, qe kʼwal naʼmx kyokx toj tja xnaqʼtzbʼil jaku che onin tuʼn tex kyiʼn xbʼalun tzʼil ex jaku txi kykʼuʼn ky-saqchbʼil. Qe kʼwal o che chʼiy chʼintl, jaku txi kykʼuʼn qe tiʼchaq, jaku kubʼ kyqʼoʼn ex jaku jaw kysuʼn tibʼaj mes, jaku tzʼex kyiʼn tzʼis ex jaku jaw kysuʼn jun tiʼ sel qojle. Qe kuʼxun jaku che bʼant mastl aqʼuntl kwest kyuʼn ik tzeʼn tuʼn tbʼaj saqet ja, tuʼn t-xqʼuqin ja ex tuʼn tbʼaj ky-repararin jun tiʼ. Atlo maj nyalo kygan tuʼn kyaqʼunan, pero jaku qo onin kyiʼj qa ma chex xnaqʼtzet maske tzma chʼinx qe moqa muchʼ qe. ¿Tzeʼn jaku tzʼonin jlu kyiʼj kʼwal? Jaku tzʼonin kyiʼj tuʼn kybʼant junjun aqʼuntl kwest kyuʼn aj kychʼiy.
Texto nim toklen: «Aju xjal in aqʼnan, at tkambʼabʼl tiʼj jlu» (Proverbios 14:23).
«Miʼn txi tqʼoʼna jun aqʼuntl te tkʼwala noq tuʼn tex tqʼij. Nya kygan xjal jun aqʼuntl noq tuʼn tex kyqiʼj, nix qe kʼwal. Sino qʼonxa jun taqʼun jatumel jaku tzalaj tiʼj. Qa matij chʼin tkʼwala qʼamanxa te tuʼn tjaw tsuʼn qe mesa jatumel jaku kanin. Aj t-xiʼya txʼajol tcarroye, jaku txi tqʼamaʼna te tkʼwala tuʼn tetz ttxʼajoʼn qe lugar jatumel mlay kanina. Ex qʼamanxa qa tbʼanel aqʼuntl ma bʼant tuʼn». Chi Chris.
Xnaqʼtzanxa tkʼwala tuʼn tbʼant jun aqʼuntl kwest. At maj jun rat in bʼaj kygan kʼwal tuʼnju mintiʼ ojtzqiʼn kyuʼn tzeʼn tuʼn tkubʼaj jun aqʼuntl. Tuʼntzunju, aj t-xi tyekʼina jun akʼaj aqʼuntl te tkʼwala, bʼinchama jlu: Tnejel, bʼinchankuya aqʼuntl twitz tkʼwala tuʼntzun tok tkeʼyin tzeʼn in bʼant tuʼna. Yajxitl, kybʼinchankuye kykabʼile. Entons, jaku kubʼ tbʼinchen kʼwal aqʼuntl tjunalx pero keʼyinka tzeʼn in bʼant tuʼn ex qʼonxa junjun tconsej. Te bʼajsbʼil, jaku txi tqʼoʼna ambʼil te tkʼwala tuʼntzun tbʼant taqʼun tjunalx.
Texto nim toklen: «Porke ma txi nyekʼune kyeye, ik tzaʼn ma nbʼinchaye kyeye, ikxtzun kyeye tuʼn kybʼinchanteye» (Juan 13:15).
«O tzʼel nnikʼe tiʼj qa aqoʼ mambʼaj, il tiʼj tuʼn tkubʼ qyekʼin jun tbʼanel techel kywitz qkʼwal qa qajbʼil tuʼn tbʼant-xix kyaqʼunan ex tuʼn miʼn kysikt. Nim toklen tuʼn tkubʼ qyekʼin kywitz qkʼwal aju qaj tuʼn tbʼant kyuʼn». Chi Doug.
Oninxa tkʼwala tuʼn tel tnikʼ tiʼj qa tkyaqil aqʼuntl nya jurat naj in bʼant ex qa ax ikx jaku qo el txalpaj tiʼj. Qʼamanxa te tkʼwala aju o bʼaj tiʼja tej tok tilil tuʼna tuʼn tbʼant jun taqʼuna kwest ex aju tbʼanel tzaj teya tuʼnju mintiʼ sikta. Ax ikx qʼamanxa te tuʼn miʼn ttzaj xobʼ aj tok tkeʼyin junjun tiʼ akʼaj toj aqʼuntl ex qa ma tzʼel txalpaj, jaku tzʼonin jlu tiʼj tuʼn tbʼant aqʼuntl tuʼn toj tumel. Onina tiʼj tkʼwala tuʼn tel tnikʼ tiʼj qa kukx in nok tkʼujlaʼna maske in nel txalpaj tiʼj jun taqʼun. Qa kukx ma txi tqʼoʼna ambʼil te tuʼn tbʼant taqʼun maske ma tzʼel txalpaj tiʼj, kchʼiyil tojtzqibʼl ex mlay sikt, ik tzeʼn qe músculo in nok kyipun aj tbʼant ejercicio quʼn. Tuʼntzunju, aj tok weʼ tkʼwala twitz jun tiʼ kwest, miʼn txi naj tonina sino qʼonxa ambʼil te tuʼn tex twitz tjunalx. In tzaj tqʼamaʼn libro Cómo triunfan los niños jlu: «Tuʼn tchʼiy jun kuʼxun tojxix tumel il tiʼj tuʼn tbʼant junjun aqʼuntl kwest tuʼn aju jaku tzʼel txalpaj tiʼj».
Texto nim toklen: «Qa kuʼxun qoʼ, mas bʼaʼn tuʼn qaqʼunan kyuw» (Lamentaciones 3:27, CEV).
«Qa ma txi qqʼoʼn ambʼil kye qkʼwal tuʼn kyex twitz jun nya bʼaʼn kyjunalx ex in xi qqʼamaʼn qa kukx atoʼ kyukʼil, a jlu in tzaj tiʼn tbʼanel kye. Aj tikʼ ambʼil, ya nyaxix kwest kʼelel te kye ex kbʼantel kyaqʼun toj tumel. Ax ikx kʼokel qeʼ kykʼuʼj tiʼj qa tbʼanel tuʼn kukx kyaqʼunan ex tuʼn miʼn kysikt». Chi Jordan.
Felicitarinxa tkʼwala tuʼnju in nok tilil tuʼn ex nya noq oʼkx tuʼnju at tnabʼil. Jun techel, miʼn txi tqʼamaʼna: «¡Tbʼanelxix taqʼuna tojju evaluacion setz! ¡Puro list teya nkʼwal!» Maslo bʼaʼn qa ma txi tqʼamaʼna jlu: «¡Tbʼanelxix taqʼuna tojju evaluacion setz! ¡Tbʼanel tuʼnju ok tilil tuʼna tuʼn t-estudiarina!» ¿Tiquʼn nim toklen tuʼn t-xi qfelicitarin qkʼwal tuʼnju in nok tilil kyuʼn toj kyaqʼun ex nya oʼkx tuʼnju list qe? Qa oʼkx in qo felicitarin kye tuʼnju list qe, «mintiʼ in nok qeʼ kykʼuʼj kyiʼjx aj kyok weʼ twitz jun tiʼ kwest moqa aj kyel txalpaj», chi Dr. Carol Dweck. Ex tqʼamatl: «Aju mas tbʼanel oyaj jaku txi kyqʼoʼn mambʼaj kye kykʼwal, aju tuʼn t-xi kyxnaqʼtzaʼn kye tuʼn ttzaj kygan tuʼn tbʼant akʼaj tiʼchaq kyuʼn, tuʼn tel kyiʼn xnaqʼtzbʼil aj kyel txalpaj, tuʼn kytzalaj aj tok tilil kyuʼn wen, tuʼn t-xi kyjyoʼn junjuntl tumel tuʼn tbʼant kyaqʼun ex tuʼn kukx t-xi kyxnaqʼtzan kyibʼ. Iktzun tten, miʼn che ayon kʼwal tuʼn kyjaw nimset tkyaqil maj noq tuʼn tbʼant jun kyaqʼun». b
Texto nim toklen: «Atzunju xjal nneʼl nikʼbʼaj tiʼj tuʼnju nimbʼil te» (Proverbios 27:21).